Author: misbah116@hotmail.com

پہلی محبت آخری بازی
پیش لفظ

سخن میں دلکشی کچھ ہے تو عجب کیا اس میں؟
خون سے ہر لفظ کو سینچیں تو کمال آتا ہے

یہ کہانی تمہارے ذہن میں کیسے آئی؟ کیسے بھر دیتی ہو اتنے بڑے بڑے رجسٹرز؟ یہ اتنے سارے الفاظ کہاں سے آتے ہیں تمہارے ذہن میں؟ ایسے بہت سارے سوالات مجھ سے لوگ پوچھتے ہیں لیکن مجھے تو شاید یاد بھی نہیں کہ لفظوں سے میرا ناطہ کب جڑا؟ لفظ تو رگوں میں یوں بہتے ہیں جیسے خون یا شاید اوپر سے مجھ پر اترتے ہیں لیکن مجھے اپنی صلاحیت کی پہچان عظمیٰ باجی کو چپکے چپکے ناول اور افسانے لکھتے دیکھ کر ہوئی اور پھر میں نے بھی کاغذ پر لفظوں کو بکھیرنا شروع کیا…
اس سفر میں جن لوگوں نے مجھے سپورٹ کیا ہے ان میں میرے والدین (انوارالحق راہی اور نشاط بیگم) میرا بھائی اور میری پانچ بہنوں کے ساتھ ساتھ میرے اساتذہ اور تمام دوست شامل ہیں۔
”پہلی محبت آخری بازی” کی کہانی ایسے کرداروں پر مبنی ہے جس کے نظریات ایک دوسرے سے قطعاً مختلف ہیں۔ اس ناول کو لکھتے ہوئے میں نے اپنے معاشرے میں حسد جیسے منفی پہلو کو اُجاگر کرنے کی کوشش کی ہے کیوں شدید محبت میں حسد بھی محبت کی ہی ایک قسم ہے۔ اس کہانی میں جہاں اپنے حسد کی آگ میں جل کر اپنی محبت کو جلا کر راکھ کرنے کا حوصلہ رکھنے والے کرداروں سے تعارف کروایا گیا ہے۔ وہاں محبت کی خاطر قربانیاں دینے والے کردار بھی نظر آتے ہیں۔ کہتے ہیں کہ انسان رحمانیت اور شیطانیت کا مجموعہ ہے اگر اس کی رحمانیت غالب آتی ہے تو وہ اللہ کی طرف متوجہ ہوتا ہے اور اگر اس کی شیطانیت غالب آتی ہے تو وہ برائی کی طرف جاتا ہے۔ اب یہ ہم پر منحصر ہے کہ ہم اچھائی کی طرف جائیں یا پھر برائی کے پودے کو غذا دے کر اتنا پروان چڑھائیں کہ وہ برائی ہماری ذات کا حصّہ ہی بن جائے۔ الف کتاب کا پلیٹ فارم میرے لیے گولڈن چانس تھا جس کے لیے میں اپنی دوست ندا کی بہت شکر گذار ہوں جس نے مجھے میسج کرکے بتایا اور یوں دن رات ایک کرکے رمضان کے مہینے میں آدھی آدھی راتوں کو ٹارچ کی روشنی میں تقریباً پچیس دنوں کے اندر اندر میں نے یہ کہانی لکھی۔ مجھے اندازہ بھی نہ تھا کہ اتنی کم عمری اور کم علمی کے باوجود میں اس پاک سرزمین کے لکھاریوں کی صف میں شامل ہوجاؤں گی بہرحال میں تو الف کتاب کی پوری ٹیم کی تہ دل سے شکر گذار ہو جنہوں نے خاص میرٹ کی بنیاد پر میری کہانی کو سلیکٹ کیا اور میری تحریر دوسرے انعام کی حق دار ٹھہری۔
شیما قاضی

دِن بھر کی تھکن اور مشقت نے اس کے پورے وجود کو ڈھانپا ہوا تھا۔ اسے ہلکا ہلکا بخار بھی تھا، اس کے باوجود بھی اس نے آج ناغہ نہیں کیا تھا۔ وہ سارا دن چائے بناتا اور پیالیاں بھرتا رہتا۔ ابھی تھوڑی دیر قبل ہی وہ فارغ ہوا تھا اور بادامی رنگ کی پیوند لگی، جگہ جگہ سے جلی ہوئی، میلی سی چادر پہنے سکڑا ہوا بیٹھا تھا۔ سردی کی شدت اتنی تھی کہ اس کے دانت بج رہے تھے اور مالک اتنا سخت تھا کہ جب وہ دیکھتا کہ گاہک کم آرہے ہیں تو انگیٹھی کی آگ بجھوا دیا کرتا۔ مری کا مال روڈ تھا اور دسمبر کی سردی اپنے جوبن پر تھی۔
مالک نے ہوٹل میں نیا نیا اکیس انچ کاٹی وی لگوایا تھا، ساتھ ہی ڈش بھی… ہر اتوار کو ایک چینل پر پرانی پاکستانی فلم لگا کرتی جس کا مالک کو بڑی بے صبری سے انتظار رہتا۔ اتوار آتا تو مالک کے تو وارے نیارے ہو جاتے، لیکن اس کی شامت آجاتی… عام، دنوں میں بھی اگر کوئی اچھا شو چلتا تو مالک دیکھنے بیٹھ جاتا اور ساتھ ہی اسے بھی بٹھائے رکھتا، یہ جاننے کے باوجود بھی کہ اس کی ان چیزوں میں کوئی دل چسپی نہیں۔ سامنے والی دیوار پر لگی گھڑی نے ابھی ابھی گیارہ بجائے تھے لیکن اس کے منہ پر بارہ بج رہے تھے… ٹی وی کی آواز خطر ناک حد تک تیز تھی اور سلطان راہی کے بڑھکیں پورے ہوٹل میں گونج رہی تھیں۔
”مالک! فلم ختم ہونے میں کتنا دیر ہے؟ مجھے گھر جانا ہے۔” اس نے سہمی ہوئی کپکپاتی آواز نکالی، جو اتنے شور میں مالک کے کانوں تک نہ پہنچ پائی۔ اس نے دوسری بار یہی جملہ دہرایا تو مالک نے سن لیا اور کُن اکھیوں سے اسے گھورا۔ وہ اس گھوری سے مزید سکڑ کر بیٹھ گیا۔ دوسری جانب ٹی وی پر صائمہ ناچ ناچ کر کھڑی فصلیں تباہ کررہی تھی… اور مالک ”اوتیری خیر” کرتے کرتے نہ تھکتا تھا۔
اس نے اپنا سر دیوار سے ٹکا لیا اور آنکھیں موند لیں۔ اس کی آج کی رات پھر برباد ہوگئی تھی۔
٭…٭…٭

فلم پورے بارہ بجے ختم ہوئی تھی۔ ہوٹل کا سامان سمیٹتے اور ہوٹل کے باہر پڑی کرسیاں اور میزیں اندر منتقل کرتے کرتے اسے ساڑھے بارہ ہوگئے تھے۔ مالک نے شٹر نیچے گرایا اور اس نے دل ہی دل میں شکر کا کلمہ پڑھا۔ مالک اپنی سر مستی میں جھومتا گاتا، فلم کے قصیدے پڑھتا چلا گیا اور اس نے اپنے گھر کی راہ لی تھی۔
ہلکی ہلکی سی دھند نے درختوں اور پہاڑوں کو لپیٹا ہوا تھا۔ ٹھنڈی یخ ہوائیں چل رہی تھیں جو اسے مزید کپکپارہی تھیں۔ وہ چھوٹے چھوٹے قدم بھرتا، اپنے ہاتھ مسلتا ہوا گھر کی طرف چلا جارہا تھا اور ذہنی طور پر خود کو روز پوچھے جانے والے سوالوں کے لیے تیار کررہا تھا۔ سوال اس کا باپ کرتا… لالہ رخ کرتی… اور اس کی ماں کیا کرتی۔ سوالوں کی نوعیت، لہجہ سب کا مختلف ہوا کرتا۔ ابا کے سوالوں میں سختی اور ڈانٹ کا عنصر غالب رہتا، لالہ رخ کے سوالوں میں لاڈ، پیار، معصومیت، شرارت، شوخی سب کچھ جھلکتا تھا اور ماں کے سوالوں میں ڈھیر ساری فکریں، اندیشے اور وسوسے ہوتے۔ وہ ان سوالوں کے جواب آرام سے سبھاؤ کے ساتھ دیا کرتا اور خود اپنے آنسو تکیے کے لیے محفوظ کئے اپنے بستر کی راہ لیتا۔ وہ جاکر لیٹتا تو ہر رات اس کے اپنے سوال اس کے ذہن میں گونجتے رہتے ایک طلاطم بپا کئے رکھتے اس کے اندر۔ لیکن وہ یہ سوال کبھی اپنوں سے نہیں پوچھ پایا تھا۔ اس نے اپنے سوال اپنے اندر دبا لئے تھے، لیکن باقیوں کے سوالوں کے جواب دینے کے لیے وہ ہر وقت تیار رہتا۔ وہ ایمل خان تھا اور ایمل خان نے کبھی ہار نہیں مانی تھی۔
٭…٭…٭
رنگوں، رعنائیوں، روشنیوں اور خوب صورتیوں سے سجی رات اپنے عروج پر تھی۔ ایک طرف ریمپ پر واک کرتے ماڈلز جلوے بکھیر رہے تھے تو دوسری جانب شو سے محظوظ ہونے والوں کا جوش دیدنی تھا۔ آگے کی قطاروں میں بیٹھے ہوئے فوٹو گرافرز کے کیمروں کے فلش ماڈلز کے ملبوسات کو اور نمایاں کررہا تھا۔ پیچھے بیٹھے لوگ ستائش بھری نگاہوں سے ماڈلز اور ان کے آؤٹ فٹس کو دیکھ رہے تھے۔ ہر لب سے "wow” کی صدا ہی گونج رہی تھی۔ روحیل وحید نے اپنی جھلک دکھلائی اور حاضرینِ محفل کے دلوں کی دھڑکنیں تھمنے لگیں۔تالیوں، سیٹیوں اور چیخوں کے شور میں کان پڑی آواز سنائی دیتی تھی۔ وہ مسحور کرکے رکھ دینے والے انداز میں خوب صورت سی مخملیں شیروانی پہنے ہوئے ریمپ پر چلتا ہوا آرہا تھا۔ دادوتحسین کا سلسلہ شروع ہوچکا تھا۔ ایسے میں وہاں حاضرینِ محفل میں موجود واحد لڑکی نیہا تھی جس کی آنکھوں سے آنسو ٹپکنے لگے تھے اور وہ اٹھ کر چلی گئی تھی۔
٭…٭…٭
”نیہا آخر تمہارے ساتھ مسئلہ کیا ہے اتنی سی بات کو لے کر تم اتنی Hyper کیسے ہوسکتی ہو۔” وہ میک اپ روم میں تھی اور وہ بھی اس کے پیچھے وہیں آیا تھا اور آتے ہی اس نے چیخنا شروع کردیا۔
”میں تمہارے کسی سوال کی جواب دہ نہیں ہوں اور بہتر ہو گا کہ تم یہ سوال مجھ سے پوچھنے کے بجائے خود سے پوچھو۔” نیہا نے اپنا کیمرہ اٹھاتے ہوئے عجیب سے انداز میں کہتے ہوئے وہاں سے جانے لگی تو روحیل نے اس کا بازو پکڑ لیا۔
”خود سے پوچھا ہے۔ کئی بار پوچھا ہے اور جب جب پوچھا ہے تمہاری اتنی سطحی سوچ پر سوائے ہنسی کے اور کچھ نہیں آیا” وہ وحشت زدہ نگاہوں سے اسے دیکھتے ہوئے بولا۔
”مرد ہوتا ہی بے وفا ہے۔” وہ اپنا بازو چھڑاتے ہوئے بولی۔
”عورت ہوتی ہی بے وقوف ہے۔” وہ اس کے بازو کے گرد اپنے ہاتھ کی گرفت مضبوط کرتے ہوئے بولا۔
”میں نے کہا مجھے جانے دو، میں تم سے مزید بحث نہیں کرنا چاہتی۔” وہ چلا کر بولی تھی۔
”اور تم میرے ساتھ بحث کر بھی نہیں سکتیں۔ مجھے نہیں معلوم تھا کہ تمہاری سوچ بھی Typical middle class لڑکیوں جیسی ہوگی۔” اس دفعہ وہ قدرے آرام سے بولا تھا۔
”رونا تو اسی بات کا ہے تم سارے مرد عورت کو مڈل کلاس یا اپرکلاس کے طعنے دیتے دیتے زندگی گزار دیتے ہو۔ لیکن کبھی عورت کے دل کو نہیں پرکھتے۔” وہ یہ کہتے ہوئے وہاں سے چلی گئی اور روحیل وحید نے سگریٹ سلگا لیا۔
٭…٭…٭

صبح کا سورج طلوع ہوا تو ہر طرف چاندنی سی پھیل گئی تھی… اُجالا ہی اجالا۔ لالہ رخ کتنی دیر سے ایمل خان کے پاس کھڑی اسے جگا رہی تھی لیکن وہ ٹس سے مس بھی نہیں ہوا تھا۔
”اٹھ جاؤ لالا دیر ہورہی ہے آج کام پر نہیں جانا کیا۔” آخر لالہ رخ زچ ہوکر بولی۔
”صبر کرو ابھی بابا کو جاکے بتاتی ہوں وہ تمہارا کام تمام کرے گا۔”
لالہ رخ کا اتنا ہی کہنا تھا کہ ایمل خان فوراً سے پیش تر کمبل پھینک کر اٹھ بیٹھا اور آنکھیں ملتے ہوئے بولا:
”تم نے بھی اچھا دھمکی دینا سیکھا ہوا ہے ہم کو ڈرانے کے لیے۔”
”یہ ہوئی نا بات۔ اب جلدی سے منہ ہاتھ دھو لو پھر ناشتہ کرنا۔” لالہ رخ پیار سے اس کا ناک پکڑ کر بولی۔
”اُٹھ گیا تمہارا لاڈلا بھائی؟ جلدی کیوں نہیں اٹھتا تم، کام پہ جائے گا یا نہیں؟” ابھی وہ وہاں سے جانے کو تھی کہ اس کا باپ اکبر خان آکر طنزیہ انداز میں بولا۔
”جائے گا! بابا جائے گا کیوں نہیں، وہ رات مالک نے دیر سے چھوڑا ناں اس لیے دیر تک سوتا رہا آج لالا۔” لالہ رخ بھائی کی طرف داری کرتے ہوئے بولی۔
”سارے بہانے ہیں اس کے، چلا گیا ہوگا اپنے آوارہ دوستوں کے پاس ہوٹل سے۔” اکبر خان اونچی آواز میں بولا۔
”نہیں بابا! ہم کو رات بخار تھا اور مالک فلم دیکھتا رہا، بارہ بجے اٹھا اس لیے ہم بھی رات گھر دیر سے آیا۔” ایمل خان آہستہ سے بوالا۔
”اچھا اچھا بس بس زیادہ صفائی دینے کا ضرورت نہیں ہم کو، جلدی سے اٹھو ناشتہ کرو اور ہوٹل جاؤ، تمہارا مالک کا فون آیا تھا، پوچھ رہا تھا کہ ابھی تک ایمل خان کیوں نہیں آیا۔” اکبر خان یہ کہتا ہوا چلا گیا۔ ایمل خان جلدی سے اٹھا اور منہ ہاتھ دھو کر ناشتہ کرنے بیٹھ گیا۔
٭…٭…٭
رات دیر تک جاگنے کی وجہ سے وہ ابھی تک سو رہی تھی اور بہت گہری نیند میں تھی کہ سائیڈ ٹیبل پر پڑا اس کا موبائل بجنے لگا۔ وہ کسل مندی سے آنکھیں رگڑتے ہوئے موبائل کو اٹھانے لگی تھی کہ موبائل سکرین پر جگمگاتے نام اور نمبر کو دیکھ کر اسے شاک لگا کیوں کہ وہ بالکل توقع نہیں کررہی تھی کہ رات کو ہونے والی گفتگو کے بعد بھی روحیل اسے کال کرے گا۔ اس نے کال کاٹ دی اور پھر سے سوگئی۔ کچھ ہی دیر بعد موبائل پھر بجنا شروع ہوگیا تھا۔ اب کی بار اس نے موبائل اٹھا کر سوئچ آف کردیا تھا۔
٭…٭…٭
پلوشے کی لش پش دیکھنے لائق تھی۔ حسین بھی تو بہت تھی وہ، خوب صورت گول چہرہ، بڑی بڑی آنکھیں، گھنی گھنی پلکیں کہ پلک جھپکتے چینی گڑیا کا گمان ہوتا… ہر وقت بنی سنوری رہتی… گہرے رنگ کے کپڑے پہنتی اور گہرے رنگ کی سرخی سے ہونٹوں کو گلابی تو ضرور کرتی۔ ابھی دو دن پہلے کی تو بات ہے خانم جان نے خوب دل لگا کر اس کے لیے پشتو فراک تیار کیا تھا۔ اور اس سدا کی بے صبری سے صبر نہ ہوا، آج ٹرنک سے فراک نکالا اور لگی اپنا بناؤ سنگھار کرنے۔ پشتو گیت گائے جاتی اور چہرے کی کھلی کھلی گلاب جیسی رنگت مزید گلابی ہوئے جاتی۔ ابھی سر پر دوپٹہ نکانے کو تھی کہ اماں آگئی۔ اُدھر مورے نے کمرے میں قدم رکھا، ادھر اس نے دوپٹہ پرے پھینک دیا۔

انجم انصار گزشتہ اٹھائیس برسوں سے پاکیزہ ڈائجسٹ کی مدیرہ کی حیثیت سے کام کررہی ہیں۔ پاکیزہ کی ادارت کے علاوہ انجم انصار ایک مصنفہ بھی ہیں اور ان کی کئی تحریریں رسائل اور کتابی صورت میں شائع ہوچکی ہیں۔ مدیر سے پوچھیں میں، اس بار انجم انصار ہماری مہمان ہیں۔

٭ آپ اس فیلڈ میں کتنے عرصے سے ہیں؟ کس طرح اس فیلڈ میں آئیں؟
انجم: لکھنے کا شوق تو مجھے سکول کے زمانے سے ہی تھا، جو کالج کے زمانے میں زیادہ ہوگیا تھا تب سے ہی میری تحریریں چھپ رہی ہیں۔ مجھے تحریری دنیا میں آئے چالیس پینتالیس سال تو ہوچکے ہیں۔مجھے چوں کہ ہمیشہ سے ہی لکھنے کا شوق تھا، یہی شوق مجھے پاکیزہ کے دفتر میں معراج رسول صاحب کے پاس لے گیا، ا نہوں نے مجھ سے پوچھا: ”پاکیزہ میں جاب کرسکتی ہیں؟” میں نے کہا: ”میں تو نہیں کرسکتی ، کیوں کہ میں ایک گھریلو عورت ہوں، آفس میں کبھی کام کیانہیں۔”انہوں نے کہا: ”اگر آپ یہ کام گھر پر بیٹھ کر کریں؟” میں نے جواب دیا کہ یہ میرے لئے ممکن ہے۔ سو وہ سلسلہ جو شروع ہوا تو اب تک چلتا رہا۔
٭ ایک مہینے میں آپ کو اوسطاً کتنی تحریریں موصول ہوجاتی ہیں؟
انجم: تحریریں تو میرے خیال میں پچیس سے تیس کے قریب آجاتی ہیں۔ مجھے پڑھنے کی عادت ہے، پڑھے بغیر میں رہ نہیں سکتی۔اور خطوط تو بہت زیادہ آتے ہیں ، تقریباً ہزار کے قریب خطوط آجاتے ہیں، اُنہیں پڑھنا اور ان میں سے منتخب خطوط کو شائع کرنا سب میری ہی ذمہ داری ہے۔
٭ آپ کے انتخاب کا معیار کیا ہے؟
انجم: بھئی میں یہ نہیں دیکھتی کہ کس نے لکھا ہے، میں یہ دیکھتی ہوں کہ کیا لکھا ہے۔اگر کوئی چیز ایسی ہے جس سے پڑھنے والا کچھ سیکھ سکتا ہے، تو میں یہ سوچے بغیر کہ وہ کہاں سے آئی ہے اور کس نے لکھی ہے، اُس تحریر کو منتخب کر لیتی ہوں۔ ہمارے یہاں آپ دیکھیں نئی لکھنے والوں کی تحریریں زیادہ ہیں۔
٭ ایسی کون سی چند چیزیں ہیں جن کا خیال ایک نئے لکھنے والے کو اپنی تحریر لکھتے وقت رکھنا چاہیے؟
انجم: سب سے پہلے تو مسودے کو درست طریقے سے لکھنا، جس کا بہت سی سینئر رائٹرز کو بھی نہیں پتہ ہوتا۔ انہیں یہ نہیں پتہ کہ ایک سطر چھوڑ کر لکھنا چاہیے، انہیں یہ نہیں پتہ کہ صفحہ کی ایک سائیڈ پر لکھنا چاہیے، انہیں یہ نہیں پتہ کہ ایک فوٹوکاپی مصنف کو اپنے پاس بھی رکھنی چاہیے، انہیں یہ بھی نہیں پتہ کہ مسودے کو صحیح طریقے سے pin up کر کے بھیجنا چاہیے، صفحات پر نمبر ڈالنے چاہیے، اکثر نمبرنگ غلط کردیتی ہیں۔ بعض دفعہ صفحہ نمبر سترہ کے بعد چودہ چل رہا ہوتا ہے پھر اٹھارہ ۔بعض دفعہ لکھ تو لیتی ہیں لیکن پڑھ کر دوبارہ نہیں دیکھتی کہ لکھا کیا ہے۔آج کل تیزر فتاری زیادہ ہوگئی ہے، اس لئے لوگ زحمت نہیں کرتے۔ دوسری اہم بات ہے موضوع، ہم کیا لکھ رہے ہیں،اور پڑھنے والے اس سے کیا سیکھیں گے۔ کہیں ایسا تو نہیں کہ تحریر پڑھنے والوں پر منفی اثر چھوڑے۔ ہم پاکیزگی کا اس وجہ سے بھی زیادہ خیال رکھتے ہیں کہ ہمارے پرچے کا نام ہی ‘پاکیزہ ‘ ہے۔میں کبھی کوئی چیز ایسی نہیں جانے دیتی جسے پڑھ کر میں اور قاری دونوں شرم سار ہو جائیں۔ لیکن کبھی کبھار غیر ارادی طور پرایسا ہوجاتا ہے کہ کوئی تحریر ہماری نظروں کے سامنے سے گزرتی تو ہے لیکن ہم زیادہ غور نہیں کرپاتے، جس پر بعد میں بہت تنقید ہوتی ہے۔ ہم بھی انسان ہیں، انسان خطا کا پتلا ہے یہ تو نہیں کہہ سکتے کہ ہم عقلِ کُل ہیں۔
٭ کیا آپ riskier themes پر کام کرتی ہیں؟
انجم: ہمارے پاس سیاست کے موضوع لکھی ہوئی تحریریں آتی ہیں، لیکن ہم اس سے تھوڑا پہلو بچا کر چلتے ہیں۔کیوں کہ سیاست کے لئے تو نیوز چینلز اور اخبار موجود ہیں تو پھر ہم بھی وہی چیزیں کیوں چھاپیں۔ ہم ان تحریروں سے agree بھی کرتے ہیں، لیکن پھر ہم یہی سوچتے ہیں کہ فائدہ اس کا کچھ ہونا نہیں، جب میڈیا اور اخبار والے چیخ چیخ کر اپنا حلق خشک کررہے ہیں اور اس سے کوئی فرق نہیں پڑرہا تو ہم اپنے میگزین میں نہیں لگائیں گے تو بھی کوئی خاص فرق نہیں پڑے گا۔اس کے علاوہ اسلامی کہانیاں، جس میں فقہ کے حوالے سے بات ہو، میں ایسی تحریریں بھی نہیں چھاپتی۔ لوگ بہت زیادہ باریک بینی سے ہمارا رسالہ پڑھتے ہیں، اب مثال کے طور پر رسالے میں کوئی بات یا آیت کسی تحریر میں موجود ہے اور ایک اشتہار بھی ہے، تو وہ کہتے ہیں کہ آیت یا وہ بات اس طرف لکھی ہے جہاں پر اشتہار کی ماڈل گرل کے پیر آرہے تھے۔اب مجھے تو یہ نہیں پتہ کہ اشتہار کدھر لگے گا اور پیر کدھر لگیں گے۔ اب جب پڑھنے والے اتنی باریک بینی سے ہر ایک چیز کو دیکھتے ہیں تو پھر ہم ایسی themes پر کام نہیں کرتے۔
٭ نئے آئیڈیاز کو دریافت کرنے اور ان پر اچھا کام کرنے کے لیے کون سے رائٹرز زیادہ موزوں ہیں ؟ نئے یا پرانے؟
انجم: دیکھیں اگر آپ پرانے پرچے اٹھا کر دیکھ لیں ستر اور اسی کی دہائی کے جو افسانے تھے، وہ زیادہ تر شادی پر ختم ہوجاتے تھے۔اب آج کا افسانہ شادی سے شروع ہوتا ہے۔ جہاں پر وہ افسانے ختم ہوتے تھے، وہاں سے آج کا افسانہ شروع ہوتا ہے۔اس میں نئی خواتین لکھاری بھی اچھے موضوعات لے کر آرہی ہیں۔پہلے حور اورزیب النساء سٹائل کی تحریریں بہت چلتی تھیں، میں بھی پڑھتی تھی، پسند تھیں، مگر اب وہ منظر نگاریاں، دسترخوان بچھانے کا منظر یہ سب نہیں چلتا۔ اصل میں آ ج کل ہر چیز فاسٹ ہے، بے شک ان چیزوں میں لڑکیوں کی تربیت ہوتی تھی لیکن اگر ہم انہی نکات پر زور دیئے جائیں کہ دسترخوان کس طرح بچھانا ہے، کھانا کس طرح بنانا ہے تو قاری بور ہوجائے گا۔

٭ نئے آنے والے رائٹرز میں آپ کی رائے میں کون اچھا لکھ رہا ہے؟
انجم: صائمہ اکرم، وہ تو اب سینئرز میں آگئی ہیں۔ انہوں نے ہمارے ہاں پاکیزہ سے ہی شروع کیا تھا،بہت اچھا لکھ رہی ہیں۔ فائزہ افتخار، عمیرہ احمد تو خیر اب بہت سینئر ہوگئی ہیں۔نئے لکھنے والوں میں نایاب جیلانی، سحرش فاطمہ ، فاخرہ گل بہت اچھا لکھ رہی ہیں۔ایک نئی لڑکی آئی ہے حاجرہ ریحان، جب اس کا افسانہ آیا پاکیزہ میں تو میں پڑھ کر بڑا حیران ہوئی۔ میں نے اسے فون کر کے پوچھا کہ تم کیا کرتی ہو تو اس نے کہا آنٹی میں تو گھر پر ہی ہوتی ہوں۔میں نے اسے بتایا کہ تم نے بہت اچھا لکھا ہے، اب ہمیں اور بھی چیزیں لکھ کر بھیجو۔ ایک اور رائٹر ہیں اُمِّ ایمان قاضی ، وہ بھی اچھا لکھتی ہیں ۔بہت ساری رائٹرز ہیں میں کس کس کا نام گنواؤں۔
٭ دنیا بھر کے ادیبوں میں آپ کا پسندیدہ ادیب؟
انجم: عصمت چغتائی۔ مجھے ان کی تحریریں بہت پسند ہیں۔ حالاںکہ ان کے بارے میں لوگوں کی رائے مختلف ہے لیکن مجھے پھر بھی وہ پسند ہیں۔ غلام عباس، احمد ندیم قاسمی ،منٹو مجھے بہت سارے لوگ پسند ہیں لیکن سب سے زیادہ پسند مجھے عصمت ہیں ۔ ان کے جملوں میں برجستگی ہوتی ہے۔ان کے ایک ایک فقرے میں زندگی سانس لیتی نظر آتی ہے۔میں تو ان کی پرانی تحریریں ابھی بھی پڑھتی ہوں اور انجوائے کرتی ہوں۔
٭ اگر آپ کو کسی ایک رائٹر کے ساتھ ساری زندگی کام کرنا پڑے تو آپ کا چنائو کون ہو گا؟
انجم: دیکھیں ایک ہی رائٹرکے ساتھ کام کرنا تو بالکل ناممکن ہے، کیوں کہ ہمیں تو پرچہ نکالنا ہوتا ہے، ایک رائٹر سے تو نہیں نکل پائے گا۔ ہمیں ایک گروپ چاہیے ہوتا ہے رائٹرز کا، جو آگے بڑھنے والا ہو، جس سے تحریروں میں ورائٹی آئے اور جنہیں لوگ پڑھنا پسند کریں۔
٭ سینئر ڈائجسٹ رائٹرز میں سے کس کی تحریر آپ کو اچھی لگتی تھی؟
انجم: سینئرز میں مجھے بشریٰ رحمن کی تحریریں بہت اچھی لگتی ہیں۔ ان کی تحریریں پڑھ کر تو ہم نے لکھنا سیکھا، اس کے علاوہ ناہید سلطانہ اختر۔ وہ بہت اچھی رائٹر ہیں۔ اب بھی پاکیزہ میں لکھتی ہیں، اگرچہ اب کم لکھتی ہیں، لیکن بہترین لکھتی ہیں، پورا ہوم ورک کر کے لکھتی ہیں۔ نئی بچیاں ہوم ورک کر کے نہیں لکھتیں، ناہید ہمیشہ پورا ہوم ورک کر کے لکھتی ہیں۔ ان کی منظر نگاری اتنی غضب کی ہوتی ہے کہ انسان اپنے آپ کو اس کا حصہ سمجھنے لگتا ہے۔ان کا ایک ناول تھا ”بہتے پانی پر مکان” جو پاکیزہ میں شائع ہوا تھا، جس پر ڈرامہ بھی بنا تھا ”آنچ” وہ اس قدر مشہور ہوا تھا کہ لوگ تقریبات میں دیر سے جاتے تھے کہ ناہید کا ڈرامہ آرہا ہے۔
٭ آپ کا پسندیدہ writing genre کون سا ہے؟
انجم: مجھے معاشرتی کہانیاں پسند ہیں۔ رومانس بھی زندگی کا حصہ ہے لہٰذا وہ بھی پسند ہیں۔
٭ کون سا genre آپ کو غیر دلچسپ لگتا ہے؟
انجم: مجھے مسٹری اور ہارر کہانیاں غیر دلچسپ لگتی ہیں، یا وہ کہانیاں جو بے حد ڈارک ہوں۔
٭ اپنے کیے ہوئے کام میں اب تک آپ کا پسندیدہ پراجیکٹ؟
انجم: پاکیزہ میں لکھنے والی کچھ ایسی خاتون رائٹرز تھیں جن کی تحریریں ایڈٹ کرنے کی مجھے کبھی ضرورت ہی نہیں پڑتی تھی۔ عمیرہ کا کبھی ایڈٹ نہیں کرتی تھی، ناہید کا ایڈٹ کرنے کی ضرورت نہیں پڑتی تھی۔شیریں حیدر بہت اچھا لکھنے والی ہیں، ان کے کیے ہوئے کام بہت پسند ہیں مجھے۔