Author: misbah116@hotmail.com

الف لیلہ دو ہزار اٹھارہ داستان

سارہ قیوم 

قسط نمبر۳ 

(رات:۳)

بھاگنا حسن بدر الدین کا ماموں کے گھر سے اور ڈرنا جادو کے شیطانی چرخوں سے۔ 

تیسری شب کو بادشاہ شہریار اپنی دُلہن شہرزاد کے پاس آیا اور فرمایا کہ اب اس قصے کا باقی حصہ سناؤ کہ حسن بدرالدین کا کیا حشر ہوا۔ شہرزاد آداب بجا لائی اور بولی، شہریار تاجدار کا حکم دل و جان سے منظور ہے، نافرمانی سے طبیعت نفور ہے۔ یہ کہہ کر کہانی یوں سنائی۔
حسن بدرالدین کو ہوش آیا تو دیکھا کہ برآمدے میں تخت پر پڑا ہے اور نانی جان آنکھوں میں آنسو لیے ہتھیلیاں سہلاتی ہے اور مارے محبت کے صدقے واری جاتی ہے۔ زلیخا پاس کھڑی اس کی نبض گنتی ہے اور پریشان دکھائی دیتی ہے۔ حسن کو آنکھیں کھولتا دیکھ کر نانی بولی:’’میں صدقے، میں قربان میرے بچے تجھے کیا ہوگیا ہے؟‘‘ اس شفقت و محبت کو دیکھ کر حسن کا دل بھر آیا، آنکھوں میں آنسو بھر کر بولا: ’’خدارا مجھے بتائیے میں کون ہوں؟‘‘
نانی بولی:’’تو حسن بدرالدین ہے میرے بچے، میرا نواسہ، میری مرحومہ بیٹی کا جگر گوشہ، یہ تیرے ماموں کا گھر ہے، تجھے کیا ہوگیا ہے میرے لال؟ یہ کیسی باتیں کررہا ہے؟‘‘
حسن چکرا کر بولا:’’اگر میں حسن ہوں، تو میں کہاں گیا؟ اور اگر میں، میں ہوں تو حسن کہاں گیا؟‘‘
نانی صدمے سے چلائی:’’ہائے نظر لگ گئی میرے بچے کو، دماغ اُلٹ گیا۔‘‘
زلیخا تشویش سے بولی:’’کھانا کھایا تھا تم نے رات کا؟ پیٹ میں درد تو نہیں؟‘‘
اتنے میں وہ بے ادب ماما دوبارہ آئی، آتے ہی چلائی’’سب ڈرامے ہیں تاکہ بل جمع کروانے نہ جانا پڑے۔ اپنے باپ کی طرح نکما ہے یہ بھی۔‘‘
حسن کو طیش آیا، غصے سے ڈانٹا: ’’چپ بے ادب گستاخ ورنہ کھڑے کھڑے نوکری سے نکال دوں گا۔ ماما ہوتے ہوئے یہ بے ادبی؟ابھی سر اڑاؤں گا، ملکِ عدم کو پہنچاؤں گا۔‘‘ یہ سن کر ماما پہلے لال ہوئی، پھر پیلی، پھر نیلی ہوگئی، پاؤں سے چپل اتاری اور حسن پر جھپٹ پڑی۔ ’’ٹھہر تجھے میں بتاتی ہوں، حرام خور جس کا کھاتا ہے اس پر بھونکتا ہے؟‘‘
نانی ڈر کر چلائی، زلیخا نے بڑھ کر ماما کا ہاتھ پکڑااور بہ منت التجا کی:’’چھوڑیں ماما یہ اپنے آپ میں نہیں، اس کی طبیعت ٹھیک نہیں ہے۔‘‘
’’کیا ہوا ہے طبیعت کو؟‘‘ ماما بگڑ کر چلائی۔’’شوگر ہوگئی ہے؟ کینسر ہوگیا ہے؟‘‘
اب نانی بھی بگڑ گئی۔’’اللہ نہ کرے، تیری نظر لگی ہے میرے بچے کو۔ ابھی پانی دم کرکے دوں گی تو بھلا چنگا ہو جائے گا۔‘‘
زلیخا بولی:’’ میں بی پی چیک کرلیتی ہوں۔ لگتا ہے لو ہوگیا ہے۔‘‘
ماما نے تیکھی چتون سے کہا:’’رہنے دے تو اپنی ڈاکٹری، ایسی ہی لائق ہوتی تو ڈاکٹری داخلے کے امتحان میں فیل نہ ہوتی۔‘‘
زلیخا روہانسی ہوگئی:’’میں فیل نہیں ہوئی تھی، صرف تین نمبر کم تھے میرٹ سے۔‘‘
ماما نے منہ بنایا ’’ہاں پر ڈاکٹر تو نہیں بن سکی نا۔ ایک تو تو موٹی، دوسرے کالی۔ سوچا تھا ڈاکٹر بن جائے گی تو اچھا رشتہ مل جائے گا، اب تجھے کون پوچھے گا؟ ہائے میرے نصیب، ایک ہی بیٹی وہ بھی پھوپھی پہ چلی گئی۔‘‘

الف لیلہ ۲۰۱۸ء داستان 

سارہ قیوم 

قسط نمبر۲ 

دوسری رات 

جاگنا حسن بدرالدین کا ماڈل ٹاون میں، چکرانا، ملنا زلیخا سے

دن کو جب وزیر ارسطو تدبیر درِ دولتِ سلطانی پر حاضر ہوا اور بادشاہ کی زبانی اپنی دختر نیک اختر کے قتل کا حکم نہ سنا تو بڑی حیرت ہوئی اور مسرت بھی ہوئی کہ اللہ نے بچایا۔ بیٹی کا صدمہ نہ دکھایا۔ جناب باری کا شکر ادا کیا۔ جب شب ہوئی تو بادشاہ نے ملکہ شہرزاد سے کہا اب وہ کہانی سناؤ، حسن بدر الدین کا حال بتاؤ، تب شہرزاد نے یوں کہانی سنائی۔
حسن بدر الدین کہ ایک مکارہ ساحرہ کے ہاتھوں وقت کی گردش میں پھینکا گیا تھا۔ اس سفر کی تیزی کی تاب نہ لا کر بے ہوش ہوگیا۔ آنکھ کھلی تو خود کو ایک ایسے کمرے میں پایا جو اس نے کبھی خواب و خیال میں بھی نہ سوچا تھا۔ وہ ایک مسہری پر پڑا تھا اور جو لحاف اوڑھے ہوئے تھا، پھول کے مانند ہلکا لیکن گرم تھا۔ حسن نے اردگرد نظر دوڑائی۔ کھڑکی سے تیز دھوپ اندر آرہی تھی اور اس کی روشنی میں کمرے کی سفید دیواریں چمک رہی تھیں۔ ایک دیوار کے ساتھ میز رکھی تھی جس کے ساتھ ایک بغیر پٹ کی الماری میں کتابیں تھیں۔ دوسری دیوار پر ایک جہاز قامت تصویر تھی جس میں چند چست و چالاک نوجوان عجیب قسم کے پوشاک پہنے ایک گیند کو ٹھوکر لگاتے نظر آرہے تھے۔ نیچے کسی جناتی زبان میں کچھ لکھا تھا۔ حسن اس تصویر کو دیکھ کر حیران ہوا اور دل میں کہنے لگا یااللہ یہ کیابوالعجبی ہے؟ میں کہاں ہوں؟ یہ کیا ہے؟ ان نوجوانوں کے پاجامے آدھے کسی نے کاٹ دیے؟ اور یہ تصویر کس مصور کے زورِ قلم کا شاہ کار ہے، یہ کون فن کار ہے جس نے ایسی تصویر بنائی کہ ہو بہ ہو نقل بہ مطابق اصل معلوم ہوتی ہے۔ اوپر چھت پر جو نگاہ گئی تو ایک عجیب سی چیز الٹی لٹکی نظر آئی۔ دل میں سوچا یہ کیا چیز ہے؟ جھاڑ ہے یا فانوس؟ اگر وہی ہے تو اس میں شمعیں لگانے کی جگہ کہاں ہے؟ اور اس کے مرکز سے یہ تین پتریاں سی کیوں نکلی ہوئی ہیں؟ ابھی دم بہ خود لیٹا اسی ادھیڑ بن میں مصروف تھا کہ اچانک دروازہ کھلا اور ایک نوخیز مہ پارہ اندر آئی۔ آتے ہی ڈپٹ کر بولی: ’’اُف تم ابھی تک سو رہے ہو؟ ماما نے کہا ہے فوراً اٹھو ورنہ ناشتا نہیں ملے گا۔‘‘
حسن نے اسے دیکھا تو دیکھتا رہ گیا۔ بوٹاسا قد، بھرا بھرا بدن، چہرے پر وہ ملاحت، وہ نمک کہ کانِ نمک بھی شرمائے، مقابلے کو نہ آئے۔ اتنے میں وہ پری وش بد دماغ ہو کر بولی: اب گھور کیا رہے ہو؟ اٹھتے ہو یا نہیں؟ گیارہ بج گئے، تمہاری سواری کمرے سے ہی نہیں نکلی۔ اٹھو ماما ناراض ہورہی ہیں۔‘‘
حسن نے کہا ’’اے پری پیکر، نازک کمر، بلبلِ شاخسارِ رعنائی، ندوہِ کوہسارِ برنائی، ستم کوش، نسترن بناگوش تو کون ہے؟‘‘
حیرت سے اس نازنین کا منہ کھلے کا کھلا رہ گیا۔ گھبرا کر چلائی، ’’کیا بکواس کررہے ہو؟ کون سی زبان بول رہے ہو؟ بھنگ پی کر سوئے تھے کیا؟ ہائے اللہ، ماما کو تو ویسے ہی شک ہے کہ تم سگریٹ پینے لگے ہو۔ کہیں چرس تو نہیں شروع کردی ؟‘‘
حسن نے گڑ گڑا کر کہا،’’واللہ بندہ بے قصور ہے، ہر قسم کے نشے سے طبیعت نفور ہے، مگر یہ تو بتائیے آپ کون ہیں؟ یہ کون سی جگہ ہے؟ اتنا تو میں سمجھا ہوں کہ یہ مقام آباد ہے مگر آدمی رہتے ہیں یا مسکنِ دیوزاد ہے؟‘‘
اب کے اس پری پیکر نے ناک چڑھائی اور تنک کر بولی، ’’ویری فنی، خوامخواہ میں انجینئر بن رہے ہو، تمہیں تو ایکٹر بننا چاہیے۔ بھائی جان، یہ آپ کے ماموں کا گھر ہے۔ 420۔ ڈی ماڈل ٹاؤن لاہور۔ اور میں آپ کے ماموں کی بیٹی زلیخا ہوں۔ اب اگر ہوش سنبھل گئے ہوں تو باہر تشریف لائیے ورنہ باقی کا دماغ آپ کا ماما درست کریں گی۔‘‘
یہ کہہ کر وہ زہرہ جمال پری تمثال دروازے سے نکل گئی۔ حسن بدر الدین جی میں حیران ہوا کہ یہ کون سی بستی ہے، کون سا دیار ہے؟ یہ کون سے ماموں ہیں جن کا یہ مسکن رود بار ہے؟ میرے تو کوئی ماموں ہی نہیں۔