admin شرف النسا بیگم ناظم لاہور خواب عبدالصمد خاں کی دوسری بیوی اور اِس کے دوسرے فرزند نواب عبداللہ خاں کی والدہ تھی۔ نواب صاحب کی پہلی بیوی بیگم جان ہی نے محلہ بیگم پورہ کی بنیاد رکھی۔ بیگم شرف النسا متقی پرہیزگار اور عبادت گزار خاتون تھی۔ خداداد صلاحیتیں اُس کے وقار میں مزید اضافہ کرچکی تھیں۔ تلوار زنی میں وہ مردوں کو پیچھے چھوڑتی تھیں۔ اُن کا مقبرہ اور تزئین کاری اُن کی شاندار انجینئرنگ اور فنکارانہ صلاحیتوں کا غماز ہے جو انہوں نے اپنی زندگی میں تعمیر کرایا اگر انہیں مغلوں کی آخری انجینئر خاتون کہا جائے تو غلط نہ ہوگا دونوں بیگمات الگ الگ محلوں میں مقیم تھیں۔ اپنے محل کے ایک گوشے میں شرف النسا بیگم نے خواتین کی درس و تدریس کا سلسلہ جاری کررکھا تھا۔ وہ موت کو یاد رکھنے کے لیے خاص ترغیب دیتیں اور مرنے سے قبل اپنا مقبرہ تیار کرنا اِسی بات کی تصدیق کرتا ہے۔ نواب زکریا خاں بیگم جان کا چہیتا اور عبدالصمد خاں کا لاڈلا بیٹا تھا۔ زکریا خاں کو بھی لاہور کا ناظم بننے کا شرف حاصل ہوا۔
عبدالصمد خاں اور نواب کا زکریا خاں کے تانے بانے بیگم شرف النسا سے کچھ اس طرح ملے ہوئے ہیں کہ اِن کا احوال بیان کیے بنا معاملہ ادھورا رہ جاتا ہے۔ بندہ بیراگی ایک سکھ سردار جو ظلم و بربریت میں ہلاکو خاں اور چنگیز خاں کو بھی پیچھے چھوڑ جاتا ہے۔ اُس کا ذکر بھی آپ کو انہی کی داستان میں ملے گا۔ شرف النسا بیگم سلطنت کے معاملات میں عبدالصمد خاں کی معاون رہیں۔ ان کے مشوروں سے نواب عبدالصمد خاں نے شان دار فتوحات اپنے نام کیں۔
جی ٹی روڈ انجینئرنگ یونیورسٹی سے ملحق علاقہ بیگم پورہ مغلیہ دور کی عمارتوں اور نامی گرامی ہستیوں کی آما جگاہ میرے بچپن کی بہت سی یادیں اس علاقے سے وابستہ ہیں کیوں کہ میرے تایا جان کا گھر بیگم پورہ میں تھا اور میں اکثر اُن کے ہاں جاتا رہتا۔ کھیل کُود کے دوران ہم بچے اکثر مغلیہ دور کی عمارتوں، باغات، محلات اور مقابر میں چھپن چھپائی کھیلتے۔ اُن دنوں آبادی برائے نام تھی اور یہ عمارتیں گردش دوراں کے باوجود اُسی طمطراق سے استادہ تھیں۔ مجھے یاد ہے میں جس عجیب دہشت کی عمارت کو دیکھ کر حیران ہوا تھا وہ بلند وبالا ایک مقبرہ تھا جس پر سرو کے بوٹے بنے ہوئے تھے۔ لحد تک جانے کے لیے سیڑھی استعمال کی جاتی تھی اور جس باغ میں یہ مقبرہ واقع تھا اُس کی شادابی اور خوبصورتی دیکھنے کے لائق تھی۔ ایک تالاب بھی اس باغ کا حصہ تھا۔
میں جب بھی کوئی مغلیہ کی دور کی عمارت یا کسی ہستی کی کھوج میں نکلتا ہوں تو مطلوبہ جگہ پہنچ کر گردوپیش کے مناظر مجھے دل گرفتہ کردیتے ہیں۔ اِس نشست میں میرا ہدف شرف النساء بیگم کا مقبرہ تھا۔ جی ٹی روڈ پر لب سڑک واقع گلابی باغ کے درودیوار اُسی شان و شوکت سے استادہ ہیں جس کے عقب میں دائی رنگا کا شاندار مقبرہ الٰہی کسمپرسی کی منہ بولتی تصویر ہے۔ اس سے ملحق علاقہ بیگم پورہ کے نام سے منسوب ہے۔ میری حیرت کی انتہا نہ رہی جب میں نے وہاں سب کچھ بدلا بدلا محسوس کیا۔
حضرت ایشاں کا بلند اور دیوہیکل مقبرہ اُن کے عقیدت مندوں کے باعث اپنا وجود برقرار رکھے ہوئے ہے۔ باقی اکثر یادگاریں محکمہ آثار قدیمہ کی غفلت یا ملی بھگت کے باعث اپنا وجود کھوچکی ہیں۔ تاریخ گواہ ہے کہ سکھوں کو مسلمانوں سے خدا واسطے کا بیر تھا، لیکن درحقیقت انہوں نے یہ اُکھیڑ پچھاڑ محض اینٹیں حاصل کرنے کے لیے گیں یہ سمجھ لیں بیگم پورہ میں انہیں اینٹوں کی کان مل گئی تھی۔ شرف النسا بیگم کا مقبرہ بھی اُن سے محفوظ نہ رہا۔
سکھوں کو یہی گمان گزرا کہ اس بلند مقبرے میں ضرور کوئی خزانہ دفن ہے۔ اسی لالچ میں انہوں نے کُھدائی شروع کی تو ایک تلوار، قرآن مجید کا نسخہ اور مکین کے سوا اُن کے ہاتھ کچھ نہ لگا۔ تلوار اپنے ساتھ لے گئے اور قرآن کے ساتھ نہ جانے انہوں نے کیا سلوک کیا۔ یہ وہی تلوار تھی جو شرف النسا بیگم ہر وقت اپنے پاس رکھتی تھیں اور اُن کے وصیت کے مطابق اُن کی میت کے ساتھ ہی دفن کی گئی۔ بعد میں انگریزوں نے مقبرے کی تعمیر و مرمت کروائی۔
شرف النسا بیگم کا مقبرہ بھی اپنی بلندی اور جسامت کے باعث باقی شہزادیوں کے مقابر سے منفرد ہے۔ یہ بات وثوق سے کہی جاسکتی ہے کہ لاہور میں مغل دور کی یہ آخری عمارت تھی جسے شرف النسا بیگم نے اپنی زندگی ہی میں تعمیر کرایا تھا۔
یہ مقبرہ بلند چبوترے پر ہے۔ اس سے مغرب کی جانب بیگم پورہ تھی جس کے دس مغربی دروازے تھے جن کا اب نام و نشان نہیں ملتا۔ اُن دنوں پنجاب کا گورنمنٹ ہاؤس بیگم پورہ ہی میں واقع تھا۔
شرف النساء بیگم نواب عبدالصمد خاں کی دوسری بیوی تھیں۔ لاہور کا حاکم علی مردان خاں فوت ہوا تو اُس کی جگہ عبدالصمد خاں کو 22 فروری 1713ء کو لاہور کا حاکم مقرر کیا گیا۔ بہادر شاہ اوّل کی وفات کے بعد اُس کے فرزندوں میں جنگ تخت نشینی کے باعث ہوئی۔ جہاں دارشاہ کے عیش و عشرت اور فرخ میر سے اس کی جنگوں کے سبب بندہ بیراگی کو اپنی پہاڑی پناہ گاہوں سے نکل کر میدانی علاقوں کو تاخت و تاراج کرنے اور مسلمان کو نقصان پہنچانے کا موقعہ مل چکا تھا۔ بندہ بیراگی اب پہلے سے زیادہ طاقتور اور خونخوار ہوچکا تھا۔ ساڈھورے کے قریب بیراگی نے قلعہ تعمیر کرایا اور وہاں مقیم ہوگیا۔ عبدالصمد خاں نے اپنے فرزند زکریا خاں فوجدار جموں اور زین الدین احمد خاں فوج دار سرہندکی مدد سے بندہ بیراگی کو کئی معرکوں میں شکست دی۔ قصہ مختصر یہ کہ بندہ بیراگی کا خاتمہ عبدالصمد خاں کا بہت بڑا کارنامہ ہے۔
محلہ بیگم پورہ نواب عبدالصمد خاں کی بیوی بیگم جان ہی کا آباد کیا ہوا ہے۔ اس کے ہر گوشے میں اس خاندان کے محلات، باغات اور شاندار مقبرے تھے جن کا سلسلہ باغبانپورہ سے چاہ میراں تک پھیلا ہوا تھا۔ بیگم پورہ میں آج بھی اُس دور کا ایک محل موجود ہے جس کی چھت پر بنے حوض میں شہزادیاں غسل کرتی تھیں۔ کئی سو سال گزرنے کے باوجود محل کی وہ چھت اُسی طمطراق سے استادہ ہے۔ اُس دور کے کاریگروں کو داد دینی پڑتی ہے جنہوں نے محدود وسائل کے باوجود عمدہ اور پختہ حوض بنایا جو آج تک ٹپکانہ اس میں دراڑیں آئیں۔
بندہ بیراگی کا بھی مختصر حال جانتے چلئے:
بندہ بیراگی 1670ء میں لیاقت پونچھ کے مقبہ راجوری میں پیدا ہوا۔ اس کا نام لچھمندیوسنگھ اور باپ کا نام رام دیوتی جو ڈوگرہ راجپوت خاندان سے تعلق رکھتا تھا۔
بندہ بیراگی سے سکھ ”بابا بندہ سنگھ بہادر” کے لقب سے یاد کرتے ہیں۔ ایک سفاک اور ستم گر انسان تھا۔ عام ڈوگروں کی طرح مسلمانوں کی دشمنی اس میں کوٹ کوٹ کر بھری تھی۔ اس نے ناصرف مغلوں کی سرکاری فوج سے جنگ کی بلکہ جہاں کہیں بھی مسلمانوں کی بستی نظر آئی اُسے تاخت و تاراج کردیا۔ شوالک کے پہاڑی سلسلے میں اِس نے اپنا اڈابنا رکھا تھا۔ 26 جولائی 1737ء کو عبدالصمد خاں اور 1745ء میں زکریا خاں فوت ہوکر بیگم پورہ ہی میں شرف النسا بیگم کے مقبرے سے متصل تھوڑے ہی فاصلے پر بہ جانب جنوب کے دفن ہوئے۔ ان دونوں باپ بیٹا، ناظمان لاہور کے مقبرے راقم نے دیکھے تھے اور اُر دو ڈائجسٹ کے شمارے میں اُن کی تصاویر بھی شائع کی تھیں مگر اس میں اب دونوں مقبرے صفحہ ہستی سے مٹا دیے گئے۔ یہ وہی نواب زکریا خاں تھا جن کے جنازے پر اتنے پھول برسائے گئے کہ شہر میں اُس وقت پھول نایاب ہوگئے اور کسی قیمت پر نہ ملتے تھے۔
