Tag: afsana

اندھیروں کے سفر میںدور سے نظر آنے والی روشنی ۔۔۔۔اور گہرا ئیوں میں گرتے ہوئے دل کی بلند دھڑکنیں ، اُداسیوں میں کہیں دور سے آنے والی گونج ۔۔۔۔ اور تنہائی کی وحشت میں آنکھوں میں دبے ہوئے آنسو۔ کس لمحے میں اتنی سکت ہے کہ وہ بے سکت ہو جائے، کس خواہش کو سرِزندگی مرنے کی آرزو ہے۔ کس بند آنکھ میں زہر اگلتے سپنے سہنے کی ہمت ہے اور کھلی آنکھ میں کوئی زہر بھی کیسے بھر دے۔ دل کا سچ افسانہ ہے اور زبان کا سچ آج قتل۔۔۔۔ کچھ باتیں سوچ سے باہر ہو جاتی ہیں اور کچھ سوچیں باتوں کے بس میں نہیں رہتیں بالکل اسی طرح جیسے بارش سے برسنے والی بوند اور سگار کا دھواں یا پھر پھول کی مہکتی خوشبو۔
میری زندگی کے کچھ دن میری زندگی کا حیرت کدہ ہیں اور میری زندگی کے کئی سال کچھ بھی نہیں۔ بہت سی راتیں مجھے یاد نہیں مگر کچھ دن ایسے ہیں کہ اب شاید ان کی شام نہ ہو ۔۔۔۔ میں اپنے انصاف کے ترازو کو کئی سال تک متوازن نہ کر سکا۔۔۔۔ اونچ نیچ تو پلڑوں کی تھی مگر بھٹکنا تو مجھے ہی پڑا۔۔۔۔ یہ صبح شام تو رسمِ کائنات تھی مگر منزل کی تشنگی تو میری بڑھ گئی۔۔۔۔ میں ایک ہی نکتہ کے گرد اتنا گھوما کہ زمانہ مچل گیا۔۔۔۔ کئی سال صدیوں کے اعتبار سے میں نے بہار کی آرزو میں گزارے۔۔۔۔ کئی خوشیاں چاہت کے اعتبار سے میں نے گم کر دیں۔۔۔۔ کئی فیصلے قسمت کے اعتبار سے میں نے منظور کئے۔ صبح ہونے سے پہلے رات کی کڑی آزمائش صبر آزما تھی۔۔۔۔ اب زندگی میرے ساتھ ہے، اب پھولوں کی پتیاں میرے ہاتھوں قتل نہیں ہوتیں۔
میں نے بچپن سے ہی خدا سے اچھے دوستوں کو مانگا، میں صبح ہی سے چاندنی کی تلاش میں تھا، وقت تو تھا مگر زندگی نہیں تھی میرے پاس۔۔۔۔ جیسے خوشیاں تو تھیں مگر مقدر نہیں تھا میرے پاس۔۔یہی تو میری ناکامی تھی۔ میری زندگی نے کئی رخ تبدیل کئے۔مقدر کو میں بالکل اسی طرح الزام دیا کرتا تھا جیسے جلتے پاؤں تپتی دوپہر کو۔ کولہو کے بیل نے اپنے دائرے میں اتنے چکر کاٹے مگر رہا وہ ایک ہی جگہ۔۔۔۔ ساری زندگی ایک ہی مرکز کے گر دگھومنا کیسا ہو گا۔۔۔۔ مگر میں تو اس سے بھی بے بس تھا، وہ تو گھومتا رہا اور میں ایک ہی جگہ کھڑا قسمت کو کوستا رہا۔۔۔۔ کیسا مقدر تھا میرا بھی یا میں نے خود کر لیا تھا؟اس وقت زندگی کی ابتدا میں کس طرح مقدر نے میری پیروی کی۔۔۔ میں نے بہت سوچا بہت کوشش کی مگر کچھ سمجھ نہ پایا اور نتیجہ تھا مقدر کو الزام دیتے ہوئے میرے اشعار۔ دل کا لاوا جب بہ نکلا اور خود کو کھوکھلا محسوس کیا تو پھر جان گیا کہ جلتے پاؤں کا تپتی دوپہر کو کوسنا کتنا غلط ہے۔
تقدیر ہمارے ساتھ اکثر اس طرح نہیں کھیلتی جس طرح ہم سمجھتے ہیں ۔ ہم اپنی ناکامیوں اور مایوس دھڑکنوں کو تقدیر کے سپرد کر کے خود کو ضمیر کی شرمندگی سے بچانے کی کوشش کرتے ہیں۔۔۔۔اور آخر کار قسمت کا فلسفہ میں نے کچھ اس طرح سے بدل دیا کہ جو خدا کی مدد سے بوئے گا وہ خدا کی مدد سے کاٹے گا۔۔۔۔ بات تو سیدھی تھی مگر تجربہ نیا۔
میں نے غالب کی طرح ہر تیز رو کو اپنا راہبر سمجھا کیوںکہ مجھے منزل تو نظر آتی تھی مگر میں راستہ نہیں جانتا تھا یا پھر میں راہبر کو جانتا نہ تھا۔ہر شمع مجھے طورِسینا میں جلتی دکھائی دی۔۔۔۔ ہر چراغ کی میں نے سورج سے برابری کی۔۔۔ ہر کنواں مجھے سمندر سے گہرا لگا۔۔۔۔ ہر دل مجھے کعبہ لگا۔۔۔۔ اور پھر ہر شمع بجھ گئی،سمندروں سے میرا ناتا ٹوٹ گیا اور کعبہ کا طواف میرے بس میں نہ رہا۔مندر اور کلیسا میں بھگدڑ مچ گئی۔ گماں پر بنائے مضبوط سہارے خود میرے کندھوں کا بوجھ بن گئے۔ اوپربادلوں کی نظر آنے والی مضبوطی دھواں نکلی۔ معلم طالب نکلے اور ستارے وہم۔۔۔ ۔۔۔۔
آ دھا راستہ میری منزل نہ تھا اور منزل کا راستہ نظر نہ آتا تھا۔ زندگی ارادوں کی اوٹ میں چھپتی جا رہی تھی۔ جب رات صبح کے اعتبار سے طویل ہو گئی۔۔۔ تو میں نے جان لیا کہ جب کسی کے گھر کی چھت اس کے قد سے نیچی رہ جائے تو پھر اسے چاہیے کہ پوری دنیا کو اپنا مسکن بنا لے۔۔۔۔ اب راستہ بدل لینا ہی مجھے سود مند نظر آیا۔ اس راستے کی تلاش شروع کی جس میں منزل دھندلی نہ ہو۔ کئی سال میں نے بھٹکنے کے اعتبار سے تلاش جاری رکھی، گو ایک ہی منزل کو نئے راستے میں تلاش کر نا ایسا لگا جیسے صحرا میں گم مسافر کو صدیوں کے بعد پانی مل گیا ہو۔
میں نے ایک سہارا لیا منزل تک پہنچنے کا۔۔۔ مجاز کا سہارا۔۔۔ محبت کا سہارا۔ اس کی اور اپنی خیالی دنیا میں میں نے کعبہ کے گرد اتنے طواف کئے کہ شاید میں کبھی نہ کر سکتا۔۔۔ اس دنیا میں میں نے آسمان کے رستے کو جان لیا۔۔۔میں یہ نہیں کہتا کہ اس دنیا کا سحر ہی ایسا تھا ہاں مگر حقیقت کو جھٹلانا بھی میرے بس میں نہیں۔۔۔اس دنیا کا ہر لمحہ میرا رہبر بنا اور بالآخر میں نے وہ تمام اصول اس سے ملے توازن کے توسط سے سیکھے، میں بہت مطمئن ہوں ۔۔۔۔ میرا شمار اب ”ہما” کی فہرست میں ہونے لگا ہے۔ میں اس کے نظر کرم کو کیسے بھول جاؤں۔ اس کے احساسات اس کی چاہتیں جو صرف میرے لئے ہیں میں نہیں بھلا پاؤں گا۔۔۔
میں اس تک پہنچنے کے لئے ہر راہ سے گزروں گا۔۔۔۔ چاہے مجھے راہ کی تعریف ہی کیوں نہ بدلنا پڑے۔۔۔۔ اور اس سے پہلے کے میں کوئی نیا دین اکبری پیش کرتا خدائے بلندوبالا کی پاک ذات نے مجھے دین الٰہی کا پابند کر دیا مگر ہجر اور وصل کی کمان نے مجھے تیر بنا رکھا ہے ۔۔۔۔ میرے دل کی گھٹن ۔۔۔۔ میرے سانسوں کی رکتی آہٹ۔۔۔۔ مجھ کو بے بس کر رہی ہے۔
دل و دماغ کی خالی سر زمیںکس با دِ نسیم سے مسرور ہے۔ یہ کس کی عبادت کا موسم آن پڑا ہے کہ اب دشت میں بھٹک جانا آسان ہے کہ اب بحر کی گہرائی میرے آنسو سے کم ہے۔
اور اگر صنم خداہوتا تو آج ساری دنیا خدا سے محروم ہو چکی ہوتی۔ میری آنکھوں کے سوا ہر طرف اندھیرا ہوتا۔۔۔۔ میری محفل کے سوا ہر سو مزار ہوتے۔

بس نے مجھے گاؤں کے اسٹاپ پر اُتارا ۔میں نے اپنا سفری بیگ اُٹھایا اور اپنے گاؤں کی فضا کو محسوس کرتے ہوئے ایک لمبا اور گہراسانس لیا۔ ایک اپنائیت تھی اُس فضا میں۔۔ مانوسیت تھی۔۔ محبت تھی۔۔۔ایک منٹ۔۔ کچھ الگ سا بھی محسوس ہو ا تھا مجھے۔۔کچھ غیر معمولی سے محسوسات ۔۔۔میں سر جھٹک کربے اختیار مسکرا دیا۔ آج پانچ سال بعد میں کویت سے واپس اپنے گاؤں لوٹا تھااور میں نے اپنی آمد کے بارے میں کسی کو کچھ بتایا بھی نہ تھا۔ سڑک پار کرکے گاؤں کی طرف جانے والے راستے پہ قدم رکھ دیے لیکن میں اپنے احساسات کو سمجھ نہیں پارہا تھا۔ مجھے لگا میں بہت پرجوش ہوں جب کہ دوسری جانب میرے جوش اور ہیجان پر گھبراہٹ غالب تھی۔ ملی جلی کیفیت میں گھرا یونہی اپنی سوچوں میں گم قبرستان کے نزدیک پہنچ گیا جہاں میرے پاؤں سست پڑ گئے۔
قبرستان کے چھوٹے سے لوہے کے دروازے کے سامنے یونہی کچھ دیر کو رک گیا۔ اندر کچھ لوگ اپنے عزیزوں کی قبروں پر فاتحہ پڑھ رہے تھے۔ کچھ بچے بھی ادھر ادھر گھوم رہے تھے۔ ہمارے گاؤں کا قبرستان آبادی کے ساتھ ہی تھا اس لئے بچے بلا خوف وجھجک وہاں گھومتے پھرتے تھے۔ کچھ عرصہ پہلے تک جب قبرستان کا زیادہ حصہ خالی تھا تو بچے وہاں کرکٹ بھی کھیل لیا کرتے تھے۔لیکن اب اُس جگہ بھی قبریں بن چکی تھیں۔
گہراسانس لیتے ہوئے میں نے اپناسفر دوبارہ شروع کیا اور چلتے چلتے اپنے گاؤں میں موجود سب سے بڑے بوہڑ کے درخت کے پاس پہنچ گیا۔ارے یہ کیا؟ بوہڑ کا آدھا درخت کٹ چکا تھا۔ جہاں پہلے وسیع و عریض میدان ہوا کرتا تھا وہاں اب مختلف قسم کے چھوٹے بڑے پکے گھر بن چکے تھے۔ ۔یہ منظر میری آنکھوں کو بالکل نہ بھایا۔ میرے بچپن کے دن جس قطعہ زمین پر کنچے ، کرکٹ اور فٹ بال کھیلتے گزرے تھے ،آج وہ کسی کی ملکیت بن چکا تھا۔

وہاں ایک عالیشان مکان کھڑا تھا۔ میں سست قدموں سے آگے بڑھا جہاں بوہڑ کے باقی بچے کھچے آدھے درخت کے نیچے ایک چارپائی بچھی تھی اور اُ س پر بیٹھا ایک بوڑھا وجود سوچوں میں گم حقے کے کش لگا رہا تھا۔میں یونہی چلتا ہوا اُس چارپائی کے پاس پہنچا ۔باباجی نے حقہ منہ میں لئے نگاہیں اُٹھا کر میری طرف دیکھا۔ اُن کی آنکھوں میں واضح الجھن تھی۔اُنہوں نے حقہ چھوڑ کر ہاتھوں سے چھجہ بناتے ہوئے دوبارہ مجھے دیکھ کر پہچاننے کی کوشش کی۔ میں ہلکا سا مسکرایا اور پاس ہی چارپائی پر بیٹھ گیا۔
”باباجی یہ بوہڑ کا درخت کیسے کٹ گیا۔۔اور یہ سب گھر۔” میری آواز میں دُکھ نمایاں تھا۔
باباجی بھی ہلکا سا مسکرادیئے۔ ان کے چہرے کی جھریوں پر اُداسی سی پھیل گئی ۔
”پتر لگتا ہے تو کہیں باہر سے آیا ہے۔۔۔ تجھے نہیں آنا چاہئے تھا۔۔” انہوں نے مجھے پہچاننے کا ارادہ ترک کر کے حقے کا کش لگایا۔
” بابا جی یہ میرا پنڈ ہے۔۔ میرا گاؤں ہے۔۔ میرا بچپن گزرا ہے اس بوہڑ کے نیچے کھیلتے اور وہاں۔۔ جہاں آج یہ گھر بسے ہیں ۔۔ وہاں ہم گرمیوں کی تپتی دوپہروں میں بھی بھاگ بھاگ کر نہیں تھکتے تھے۔۔۔۔” میں نے دُکھی لہجے میں کہا ۔
”جانتا ہوں۔۔ میں تجھے پہچان نہیں پایا لیکن تیرا دکھ پہچان لیا میں نے بچہ۔۔اسی لئے تو کہا کہ تجھے نہیں آنا چاہئے تھا۔۔” حقے کی گڑگڑاہٹ میں اِضافہ ہوا۔
”یہ گاؤں میری پہچان ہے۔۔ اس مٹی سے میری شناخت ہے۔۔ یہاں میرے اپنے بستے ہیں۔۔ ایسے کیسے نہیں آتا۔۔ اپنا گھر تو نہیں چھوڑا جاتا نا بابا جی۔۔ ” میں نے جوتے کی نوک سے مٹی کریدتے ہوئے جواب دیا۔
”یہ بھی عجیب بات ہے۔۔ جو یہاں رہتے ہیں انہیں تو کوئی لحاظ نہیں رہا ان سب باتوں کا۔۔ اور تو۔۔ ” بابا جی طنزیہ مسکرائے۔
”میرا بچپن بھی انہی گلیوں میں بیتا ہے پتر۔۔ کتنا زور لگایا ہم سب یاروں نے کہ یہاں گھر نہ بنیں۔۔ یہ بوہڑ کا درخت جو میرے بچپن کا سنگی ہے۔۔ نہ کٹے ۔۔ میری چھایا مجھ سے نہ چھنے۔۔۔ لیکن وقت کا تقاضا ہے پتر کیا کر سکتے ہیں۔۔تبدیلی۔۔تبدیلی کا رولا ہے آج کل۔۔ یہاں بھی لوگ تبدیل ہورہے ہیں۔۔۔ ”انہوں نے اپنے تہ بند پربیٹھی مکھیوں کو ہاتھ سے اُڑایا۔
”تبدیلی۔۔۔” میں بڑبڑایا۔
”جا گھر جا پتر ۔۔ تیری ماں تیری راہ دیکھ رہی ہوگی۔۔” بابا جی نے شفقت بھری نظروں سے مجھے دیکھ کر کہا۔
”ہاں۔۔ اماں۔۔۔ابا۔۔۔ میری گڑیا سی بہن صفیہ۔۔۔ اور۔۔ اور وہ۔۔۔” میں پرجوش ہوتاایک دم کھڑا ہوا ۔
”اچھا بابا جی اللہ حافظ۔۔ ” میں نے بیگ پھر سے اُٹھا لیا۔
”چنگا پترجیتا رہ۔۔” بابا جی نے ہاتھ اُٹھا کر کہا۔
میں ایک اُداس اور آزردہ نظر بوہڑکے بوڑھے اور نامکمل وجود پر ڈالتا ہوا آگے بڑھ گیا۔
” وہ کیسی ہوگی۔۔۔ کیا اُسے میرا انتظار ہوگا۔۔ مجھے اچانک دیکھے گی تو کیا کرے گی ۔۔ ”میں اپنے آپ میں گم مسکرایا۔
”اپنا دوپٹہ منہ میں دے کر شرما شرما کر دیکھے گی اور پھر بھاگ جائے گی اور کیا۔۔۔” میں نے سر جھٹکا۔
وہ میرے چاچا کی بیٹی تھی اور میری بچپن کی منگ ۔۔۔ہمارے گھرآس پاس ہی تھے۔ وہ بہت شرمیلی تھی۔ مجھے یاد ہے جب چھے سال پہلے ہماری بات پکی ہوئی تھی ،اُس دن اُس کی سرمہ بھری آنکھیں شرم کے بوجھ سے کیسے جھکی ہوئی تھیں ۔میرے دیکھنے پر وہ کیسے گھبرا کر فوراََ غائب ہوجایا کرتی تھی۔ہماری منگنی کے بعد ایک سال جو میں نے گاؤں میں گزارا وہ اسی لکا چھپی کے کھیل میں گزرا تھا۔ میں چاچا کے گھر دن میں دس دس چکر لگا تا تھا کہ کب اُسے ایک نظر دیکھ پاؤں، اُس سے بات کر پاؤں لیکن وہ تو گویا میری قدموں کی آہٹ بھانپ کر ہی کمرے میں گھس جاتی ۔کئی دفعہ مجھے صفیہ کو کہہ کر اُسے دھوکے سے بلوانا پڑتا اور اُس دوران بھی وہ بس رسی تڑا کر بھاگنے کے چکروں میں رہتی تھی۔
”حسین پتر!!!” میں اُسی کے خیالوں میں گم گھر کے قریب پہنچ چکا تھا اور گھر کے سامنے والی دُکان پر اپنے دوستوں کے ساتھ بیٹھے ابا نے مجھے بے یقینی سے دیکھا اور خوشی سے اپناآپ سنبھالتے آگے بڑھے۔میں تیزی سے آگے بڑھا اور اُن کے گلے لگ گیا۔
”پتر۔۔تو نے بتایا ہی نہیں۔۔ ہم تجھے لینے آجاتے شہر۔۔ ایسے کیسے آگیا۔۔” وہ میرا ماتھا چومتے ہوئے بولے۔
”بس ابا۔۔ میں نے سوچا بغیر بتائے ہی جاتا ہوں سب خوش ہوجائیں گے۔۔” میں نے مسکرا کر جواب دیا۔
”حسین بھرا۔۔۔” یہ کاشی تھا میرے چچا زاد اور”اُس ‘ ‘کا بھائی۔۔۔
”کاشی تو؟یار تو کتنا بڑا ہوگیا ہے۔۔” میں اُس کے اپنے کندھے تک پہنچتے قدکو دیکھ کر حیران ہوا۔جب میں کویت گیا تھا تو وہ پانچویں کا طالب ِ علم اور ایک کمزور مریل سا لڑکاتھا۔
”بس بھائی۔۔۔” کاشی جھینپ کر بولا۔
”چلو ۔۔چلو گھر۔۔ تیری ماں تجھے دیکھے گی توخوشی سے پاگل ہوجائے گی۔۔ روز کہتی تھی حسین کو دیکھے اتنے سال ہوگئے۔۔” ابا خوشی سے بولے۔۔۔کاشی نے فوراََ آگے بڑھ کر میرا بیگ اُٹھا لیا۔ ہم تینوں گھر کی جانب بڑھے۔
گھر میں داخل ہوتے ہی میری نظر برآمدے میں ایک طرف بنے چھوٹے سے باورچی خانے اور اُس کے آگے رکھے مٹی کے چولہے پر پڑھی۔۔چولہے پر کوئی ہانڈی پک رہی تھی اور اماں چو لہے میں جلنے والی لکڑیوں کو اوپر نیچے کر رہی تھیں اور ساتھ ہی پھونکیں مار تی جاتیں۔ میری طرف اماں کی پشت تھی۔
”تائی اماں۔۔ دیکھوتو۔۔” کاشی خوشی سے چلایا۔ اماں نے مڑ کر دیکھا اور اپنی آنکھیں مل مل کر میری طرف دیکھنے لگی۔
”نہ مل اتنی آنکھیں ،تیرا پتر ہی آیا ہے۔۔” ابا نے خوشی سے نہال ہوتے ہوئے کہا۔
”حسین۔۔میرا پتر حسین آیا ہے۔۔ماں صدقے جائے۔۔ ” اماں میری طرف اور میں اماں کی طرف تیزی سے بڑھا۔
اماں نے مجھے دبوچ کر سینے سے بھینچ لیا۔ میں اُن کے وجود کی خوشبو کو اپنی سانسوں میں محسوس کرنے لگا ۔۔میری آنکھیں بھیگ گئیں۔۔
”تو نے بتایا کیوں نہیں کہ تو آرہا ہے ۔۔ ” اماں نے مجھے گھورا۔
”بس اماں ،پھر تیری یہ خوشی کیسے دیکھتا۔” میں ہنس دیا۔
”چل کاشی جا بھائی کے لئے مالٹے رنگ کی بوتل لے آ۔۔” اماں نے پاس کھڑے دانت نکالتے کاشی کو بھگایا۔
”ارے اماں بوتل کی کیا ضرورت ہے۔۔ میں کوئی مہمان ہوں۔۔” ہم لوگ آگے بڑھ کر آنگن میں بچھی چارپائیوں پر بیٹھ گئے۔
”چل رہنے دے۔۔ مجھے جیسے پتانہیں کہ تجھے وہ والی بوتل کتنی پسند ہے۔۔”اماں نے میرے کندھے پر پیار سے تھپکی لگائی۔
”صفیہ کہاں ہے اماں۔۔” میں نے اِدھراُدھر دیکھتے ہوئے کہا۔
”صفیہ کو میں نے تیرے چاچا کے گھر جاتے دیکھا تھا کہہ رہی تھی کوثر سے کوئی کام ہے۔۔”ابا نے خوش دلی سے جواب دیا۔”اُس’ ‘کے نام پر اماں نے معنی خیز نظروں سے مجھے دیکھا۔ میں جھینپ گیا۔
”اچھا پھر میں بھی چا چاجی سے مل آؤں اماں۔۔” میں نے بے تابی سے کہا ۔

وہ ساگ کا تڑکا تیار کرتے ہوئے مسکرائی…. اور پھر منہ ہی منہ میں بڑبڑائی!!! ”ایمان آج میرا پکایا ہوا ساگ تمہارے چہرے سے شرافت کا نقاب اتارڈالے گا، اویس کو میری ہر بات پر یقین آجائے گا۔” اور تڑکا ساگ پر پھیلا دیا …. آج سے پہلے اس نے اتنی محنت سے کبھی ساگ نہیں پکایا تھا… کیوں کہ اس کی نند ایمان کو ساگ پسند نہیں تھا… شادی کے کچھ دنوں بعد ہی اویس نے اپنی چھوٹی بہن کی پسند ناپسند اسے بتادی… کیوں کہ وہ گھر کے خرچ میں برابر کی شریک کار تھی ۔
”تو کیا…. ساگ کبھی نہیں پکے گا؟” اس کا موڈ آف ہوگیا۔ ”نہیں…. اب ایسا بھی نہیں!!…. البتہ میں اور ایمان پسند نہیں کرتے …. میں پھر بھی کبھی کبھار کھالیتا ہو…. مگر ایمان نہیں کھاسکتی اور ایسے میں وہ آفس سے تھک ہار کر گھر آئے گی… تو کیا کھائے گی!” بڑا بھائی ہونے کے ناطے وہ اپنی چھوٹی بہن کے لئے فکر مند تھا ۔ایسی بہن جس نے اویس کو کبھی کسی چیز کے لیے پریشان نہیں کیا تھا… والدین کی وفات کے بعد اس نے ملازمت کرلی اور اپنے بھائی کی ہر معاملے میں مددگار بن گئی ۔
اویس نے اپنی شادی کے بعد اس کے لیے بھی رشتے تلاش کیے…. لیکن جانے اللہ کو کیا منظور تھا…. کہیں کوئی بات نہ بن سکی اور ایمان نے بھی کبھی کسی سے شکوہ نہ کیا…. مگر دوسری طرف اس کی بھابھی ارم کو اس سے بلاوجہ ہی اتنے شکوے تھے کہ اویس کی شادی شدہ زندگی مشکلات کا شکارہونے لگی…
ارم کو ایمان کا وجود خوامخوا ہی کھٹکنے لگا..وہ اسے اپنے گھر میں نہیں دیکھنا چاہتی تھی ۔ ایمان جانتی تھی.کہ اس کی بھابھی اسے پسند نہیں کرتی۔ مگر وہ اپنے بھائی سے اتنی محبت کرتی تھی کہ بھابھی کی نفرت اسے نظرنہ آتی تھی۔
”ٹھیک ہے! کبھی ساگ نہیں بناؤں گی….” اس کے چہرے پر خفگی نمایاں تھی۔

” ارم! بچی مت بنو… تمھارا جو دل کرتا ہے کرو میں نے تمہیں کب منع کیا ہے؟” اس نے بیوی کا ہاتھ تھام لیا… اور کرتا بھی کیا ۔بہن کے ساتھ ساتھ بیوی کو بھی خوش رکھنا چاہتا تھا… مگر ارم تھی کہ خوش ہونے کے بجائے خفا خفا ہی رہتی۔ جس سے گھر کا ماحول نا خوش گوار رہتا..
ایمان نے گھر کے کاموں میں مداخلت کرنا چھوڑدی تھی اور اوپر ی منزل پررہنے لگی ۔
”بچی میں نہ بنوں…ہاں اورآپ کی بہن نے تو بچی بننے کا ٹھیکہ لے رکھا ہے۔ عمر تیس کی…. اور عقل سمجھ دس سال کی بچی جیسی ۔”
”آہستہ بولو… ارم! کیوں ہر وقت اس کے پیچھے پڑی رہتی ہو۔آخر اس نے تمہارا کیا بگاڑا ہے ؟ جس کی وجہ سے تم اس کی جان نہیں چھوڑتی”…. اس نے بھی غصے سے پوچھا۔
”میں اس کی جان نہیں چھوڑرہی… یا وہ ہماری؟…. آخر کب تک بیٹھی رہے گی اس گھر میں …. شادی کیوں نہیں کرتی…. کہیں…. کہیں…. کچھ ایسا تو نہیں… جو آپ نہیں سمجھ رہے۔” اس نے سوچتے سوچتے حیرانی ظاہر کی۔
”کیا مطلب ہے تمہارا؟” وہ اس کو غصے سے گھورنے لگا۔
”میرا مطلب ہے…. کہ کسی سے محبت وغیرہ !!۔” اس نے دبی آواز میں جواب دیا۔
خبردار! جو میری بہن کے بارے میں ایسا سوچا…. تمہاری بہن جیسی نہیں ہے وہ جو سب کی عزت رُسوا کرکے گھر چھوڑ کر بھاگ جائے۔”
”یہی سننا باقی رہ گیا تھا…. دیں اور طعنے! ہاں میری بہن بری تھی بہت بری، بس آپ کی بہن بڑی پارسا ہے، باقی سب برے ہیں !” وہ رونے لگی… اس کے آنسو ہمیشہ کام کرجاتے اور وہ پسپائی اختیار کر جاتا۔
اس نے ساگ بھون لیا تھا… اور پھر ہری مرچیں دھوکر کاٹنے لگیں۔ ”ایمان تمہاری وجہ سے میری ہر خوشی کڑوی ہوجاتی ہے۔ اب دیکھنا میں کیسے تمہاری زندگی کاسچ سب کے سامنے لاتی ہوں۔” اس نے ساگ کے اوپر ہری مرچیں ڈال دیں… ساگ نئی نویلی دلہن کی طرح سجا ہوا دکھائی دے رہا تھا۔
”اویس… اویس…! سچ… یقین کریں پہلے وہ تھوڑا سا سالن … ایک روٹی لے کر اوپر چلی جاتی تھی… مگر پچھلے ایک ماہ سے دو روٹیاں… اور بہت زیادہ سالن لے کر جارہی ہے۔”
”ارم …. وہ اس گھر کی عزت ہے… جیسے تم!! وہ تمہاری بھی بہن جیسی ہے… اللہ سے ڈرو…. وہ کبھی بھی مجھے شرمندہ نہیں کرسکتی۔”اویس نے اس کی بات سمجھتے ہوئے کہا۔
”اچھا… اگر ایسا کچھ نہ ہوا تو… تو…. آپ بے شک مجھے گھر سے نکال دیجیے گا۔”ارم نے ایک اور تیر چلایا۔
”توبہ…. ارم! کیسی باتیں کرتی ہو… میں بھلا تمہارے بغیر جی سکوں گا۔” اس نے دونوں ہاتھ تھام کر اسے اپنی محبت کا احساس دلایا مگر وہ شوہر کی محبت کو نظر انداز کرتے ہوئے اپنی دھن میں بولتی گئی۔ ”اگر سچ میں اس کی زندگی میں کوئی لڑکا نہیں… تو پھر اس نے حسنین شاہ سے شادی کرنے پر کیوں اعتراض کیا تھا؟” اس بات پر وہ بھی سوچنے لگا ”سچ اویس…. وہ آپ کو بیوقوف بنارہی ہے…. اور پھر اوپر جاکر رہنے کی کیا تک ہے… کمرے تو نیچے بھی ہیں…”
”صاف… صاف کہو… تم کیا کہنا چاہتی ہو؟” اس کی آنکھیں غصے سے لال ہوگئیں۔
”چھوڑیں… کچھ نہیں…” وہ منہ پھیرکر بیٹھ گئی۔
”بولو… اب بول کیوں نہیں رہی۔” اس نے غصے سے پوچھا۔
”اویس..لگتا ہے رات کو ہماری چھت پر کوئی آتا ہے!”… اس نے ڈرتے ڈرتے بتایا۔
”کون…؟؟ … اور کب سے… تم نے مجھے کیوں نہیں بتایا؟” اس کا چہرہ غصے سے سرخ ہوگیا۔
”یہ تو میں نہیں جانتی… کیوں کہ وہ سیڑھیوں کا دروازہ بند کردیتی ہے… مگر میں نے کئی دفعہ آوازیں سے سنی ہیں۔”
”اچھا… تو… تو… وہ حیدر خبیث ہوگا… آخر کار اس نے اپنا کام کر دکھایا۔”
”کون حیدر؟”… وہ جیسے حیرانی سے بولی۔
”وہی… حیدر… جو محلے کی ہر لڑکی کو خوب صورت خواب دکھاکر ان کی زندگیوں سے کھیلتا ہے۔” اویس کے لہجہ میں کڑواہٹ گھل گئی ۔
”وہ بدمعاش جو گلی کے نکڑ پر آوارہ لڑکوں کے ساتھ بیٹھتا ہے۔؟” ارم نے تجسس سے پوچھا۔
”ہاں… ہاں ۔۔وہی….!!… مگر ایمان تو اتنی سمجھ دار ہے… تو کیسے وہ اور حیدر… یقین نہیں آرہا”۔ اس نے پھر سے ٹھنڈے دماغ سے سوچنا شروع کردیا….
مگر ارم اسے مزید تپا گئی جو آگ پر تیل ڈالنے کا کام چھوڑ نہیں رہی تھی۔
”یاد آیا… اس دن جب میںایمان کے ساتھ کلینک پر گئی تھی تو وہ ایمان کو دیکھ دیکھ کر مسکرارہا تھابلکہ اس نے پیچھا بھی کیا تھا۔”
”کیا؟ اس کی اتنی جرأت؟ میںاس کا وہ حال کروں گا کہ پورا محلہ دیکھے گا”۔
”اویس تحمل سے کام لیں۔جرأت ایمان نے دکھائی ہے… تبھی تو اس نے پیچھا کیا تھا… اور پھر پورے محلے کے سامنے ….. اس نے یہ ثابت کردیا کہ ایمان اور اس کا چکر ہے… تو؟ … …. کتنی بے عزتی ہوگی… آپ کی اس خاندان کی… اور ہمارے بچوں پر اس کا کیا اثر پڑے گا۔” اویس نے گھبراکر اسے دیکھا۔

شام ڈھل چکی تھی۔
سرد موسم میںیہاں شام ڈھلتے ہی سناٹا چھا جاتا ۔ شہر سے کچھ دور یہ ایک چھوٹا سا پہاڑی گاؤں تھا جہاں کچھ ہموار قطعۂ زمین اور چھوٹی چھوٹی ڈھلانوں پر گھر بنے ہوئے تھے۔
کہیں کہیں کتوں کے بھونکنے کی آوازیں سنسان اور نیم تاریک راستوں کو زندگی کی نوید دیتیں تھیں۔ گھروں کے باہر لگے اکا دکا بلب اندھیرے کا نوحہ پڑھتے محسوس ہوتے۔ نئے لوگوں کے لیے یہ ماحول بے حد پراسرار یت کا حامل مگراس علاقے کے مکین یہاں کی ہر اونچ نیچ سے آشنا تھے۔
کچی پکی سڑکیں جن پر پانی جمع تھا، محلے کی معاشی خستہ حالی کا منہ کا بولتا ثبوت تھیں۔
گھروں کی ٹیڑھی میڑھی دیواروں میں موجود دراڑیں اس حالتِ زار کو مزید اُجاگر کرنے کا باعث تھیں۔تمام گھر تقریباً ایک جیسے خستہ حال تھے اور اونچے نیچے ان گھروں میں بسنے والے شعور سے ناآشناافراد بھی تقریباً ایک جیسے مزاج کے حامل تھے ۔
ایک گھر سے اٹھنے والی آوازیں محلے کے در و دیوار کوہلا رہی تھیں۔
”مارو سالے کو۔۔!”ایک آواز۔
گالیوں اور کوسنوں کی گونج میں سُنائی دینے والی دوسری آوازیں، اس کو پڑنے والے ہاتھ، پیر ، گھونسے ، لاتیں اور ڈنڈے تھے۔
”گھر میں گھسنے کی ہمت کیسے ہوئی ۔ ماں بہنیں نہیں ہیں اس کے گھر میں۔۔”ایک اور آواز۔
”اتنا مارو کہ آئندہ ایسی حرکت کا سوچ بھی نہ سکے۔”ایک دوسری نوجوان آواز جس کا ہر جملہ اول آخر گالی کے ساتھ تھا۔
محلے کے تمام مرد اپنی ذمے داری پوری کرنے پہنچ چکے تھے۔ عورتیں زبانی جمع خرچ سے اس نیکی کے کام میں پورا پورا حصہ ڈال رہی تھیں۔ لڑکے کے ہر طرف اشرف المخلوقات جمع تھی اور اسے اس کے غیر انسانی فعل کی سزا دے رہی تھی۔
عورتوں میں چہ می گوئیاں جاری تھیں۔ وہ ایک دوسرے سے اصل واقعہ جاننا چاہ رہی تھیں۔
”ارے مجھے موت کیوں نہ آگئی یہ دن دیکھنے سے پہلے۔”ایک عورت نے سینہ پیٹا۔
”شادا ںسورہی تھی اچانک اس کی چیخ سن کر کمرے میں داخل ہوئی تو دیکھا کہ لڑکے نے شادا ں پر سے رضائی اٹھاکر پرے جھٹکی ہے۔”چشم دید گواہ عورت نے کہا۔
”بچی تو مارے خوف کے بے ہوش ہوگئی ہے۔”ایک دوسری ہمدرد عورت نے تاسف سے کہا۔
”میرے بیٹے کو مت مارو وہ بے قصور ہے۔”
لڑکے کے باپ کو کسی نے اس انہونی کا بتادیا تھااوروہ دور ہی سے چلاتا آرہا تھا۔
”پکڑو اسے بھی مارو۔”کئی آوازیں بلند ہوئیں۔اس کے باپ کی آواز بھی لاٹھی ، ڈنڈے اور گھونسوں کے شور میں دب میں گئی۔
”ہوا کیا ہے؟کچھ تو پتا چلے۔ اللہ کے واسطے میرے بیٹے کو مت مارو۔” اس کا باپ رحم کی بھیک مانگ رہا تھا۔ مگر وہاں اس کی سننے والا کوئی نہ تھا۔کچھ لوگ باپ کو پکڑ کر الگ لے گئے۔
”تمہارے بچے بھی ایسے ہی مریں گے۔”وہ دہائیاں دینے لگا۔
باپ کا درد تھا جو منہ سے خون تھوکتے ہوئے نکل رہا تھا۔مار کھانے والا پندرہ سولہ سال کا نوجوان تھا جس کی ایک آنکھ سوج کر نیلی پڑ چکی تھی۔ کان اور ناک سے خون بہ رہا تھا۔ ملگجے کپڑوں پر جگہ جگہ خون کے دھبے اس کے حلیے کو مزید خستہ اور وحشت ناک بنا رہے تھے ۔ وہ کچھ کہنا چاہتا تھا مگر خوف اور درد کی شدت سے آواز اس کا ساتھ نہیں دے رہی تھی۔
”حجام کو بلاؤ۔۔۔ اس کے سر اور بھنووں کے بال منڈواؤ۔”محلے کے ایک سرکردہ بزرگ نے جوشیلے لہجے میں کہا، جو شدت جذبات سے کانپ بھی رہے تھے۔ ساتھ ساتھ ایک آدھ لات بھی لڑکے کو رسید کرتے جاتے۔
حجام آگیا۔ تمام محلے والے جب اس لڑکے کی خدمت سے تھک کر ہٹ چکے تواس نیم مردہ کے بال مونڈھ دیے گئے۔
رات ظلمت کی سیاہ چادر اوڑھے اس گھر میں اتری تھی۔ اس کا گواہ واحد چھوٹا سا بلب تھا۔ جس کی کمزور سی روشنی سے بننے والے مہیب سایوں کی درندگی لڑکے کو کھائے جارہی تھی۔
حجام اب تک بال مونڈھ ہی چکا تھا۔ اس کی غیرت نے جوش مارا تو دو چار ہاتھ اس نے بھی رسید کردیے۔ ایک بار پھر اسے مارنے کا عمل شروع ہوچکا تھا۔ لڑکا بے سدھ پڑا تھا۔
”شاداں کو ہوش آیا؟”عورتوں میں سے پھر کسی نے پوچھا۔
”ابھی تک نہیں آیا۔”
لڑکے کا باپ بے بسی کی تصویر بنا دور ہی سے لختِ جگر کا خونِ جگر دیکھ رہا تھا۔ محلے کے چند بڑے ، اس کے اردگرد کھڑے اظہارِ خیال فرما رہے تھے ۔ ”ماں باپ بچوں کی تربیت ہی ٹھیک سے نہیں کرتے۔”ایک شخص نے نفرت سے اس کے باپ کو دیکھتے ہوئے کہا۔
”اس کے باپ نے بھی جوانی میں ایسے ہی کام کیے ہوں گے ۔”دوسرے شخص نے مزید غلاظت انڈیلی۔
”ایسے لوگوں کی نسل ہی خراب ہوتی ہے۔ انہی لوگوں کی وجہ سے دن بہ دن معاشرہ خراب ہوتا جا رہا ہے۔”
”ایک ہمارے بچے ہیں۔۔ مجال ہے جو کہیں آنکھ اٹھا کر دیکھ ہی لیں۔”
”ایک یہ بھوکے ننگے جنہیں ہر چیز کی ہوس کھائے جاتی ہے۔ بچے پالے نہیں جاتے اور لائن لگادیتے ہیں۔” عظمت کے ایک مینارنے نخوت سے لڑکے کے باپ کو دیکھا۔
لڑکے کے باپ کا چہرہ غصے اور شرمندگی سے سرخ اور ڈاڑھی آنسوؤں سے تر تھی۔ چہرے پر شدید کرب کے آثار تھے۔
اس کی اٹکی ہوئی سانسوں کے درمیان چند الفاظ نکلے:
”غریب کی بددعا سے بچو۔ تم لوگ عظیم ہونا۔۔ میرے بیٹے کا قصور کا تو بتاؤ۔۔ وہ مرجائے گا اسے مت مارو۔!!””تمہیں اللہ کا واسطہ۔”
اچانک بھیڑ سے آواز بلند ہوئی کہ لڑکے نے دم توڑ دیاہے ۔
”ہوش آگیا ہے۔۔ شادا ںکو ہوش آگیا ہے۔” دوسری آواز اُبھری۔
شادا ںنے ہوش میں آتے ہی خوف زدہ انداز سے پوچھا۔
”وہ لڑکا کہاں گیا جو سانپ کو جھٹکنے کے لیے رضائی جھاڑ رہا تھا؟”
لڑکا چلاگیا تھا وہاں ،جہاں سے اس کی واپسی محلے والوں کی تمام تر شرمندگی کے باوجود ممکن نہ تھی۔ اسے بڑھ بڑھ کر کاندھا دیتے محلے کے تمام لوگ سوگ وارتھے ۔عظمت کے سب مینارے ایک دوسرے سے نظریں چرا رہے تھے۔ لڑکے کے باپ کا بوڑھا وجود ڈھے چکا تھا۔
”ارے صاحب ہیرا تھا، ہیرا۔۔۔!”ایک صاحب لڑکے کے باپ سے گویا ہوئے: ”خدا ایسی اولاد سب کو دے۔”
اس رات گھر کے مکینوں نے سانپ کو ڈھونڈنے کی تمام تر کوشش کی مگر سانپ تھا جو مل کے نہ دیا۔۔ اور اس دن کے بعد اس علاقے سے سانپ کی بدولت لاشیں اٹھنے لگیں۔

(داستانِ شبِ غم اور قصہ روزِ درد، اُس مظلوم مخلوق کا جسے ”طالبِ علم” کہتے ہیں……)
اپنی پیدائش کے چند لمحات بعد ہی وہ بے چارہ اس بات کا ماتم کر تانظر آتا ہے کہ وہ عاقبت نااندیشوں کے کس جہان میں پھنس گیا۔ بڑوں کی محفل میں ایک جانب اعلانِ شاہی صادر ہوتا ہے: ”ہمارا بیٹا ڈاکٹر بنے گا”دوسری صدا آتی ہے” انجینئر بنے گا” (انسان بنانے کا کبھی کسی کو خیال ہی نہیں آیا) بس اس کی کم بختی شروع ہو جاتی ہے۔
والدین کیا جانیں اس لمحے کی بے چارگی! جب گرم کمبل، حسین نیند اور سہانے خواب، اچانک ایک دھاڑ سے ریزہ ریزہ ہو جاتے ہیں: ”بیٹا! اٹھوسکول نہیں جانا”۔ جتنی گالیاں (اور وہ بھی پنجابی میں) موجدِ تعلیم جدید کو دینے کا اُس وقت دل چاہتا ہے وہ بس وہی جانتا ہے۔ دادی اماں کی کہانی والی پریوں کے ساتھ ابھی بچہ بے چارہ تصوراتی محلات میں گھوم رہا ہوتا ہے، مولوی صاحب کی دھاڑ سن کر ہڑ بڑا کر اُٹھ بیٹھتا ہے۔
10 کلو وزن والے بچے پر 20کلو کتابیں لاد دی جاتی ہیں (آج تک یہ معمہ حل نہیں ہو سکا کہ اگر گدھے پر کتابوں کا انبار لاد دیا جائے تو وہ ”استاد” ہونے کا دعویٰ کیوں نہیں کرتا… حالاں کہ آج کل ہمارے سیاست دان ایسے اداروں سے بھی ڈگریاں لے لیتے ہیں، جن کا قیام سو سال بعد ہوتا ہے، اور پھر فخریہ طور پر ‘ڈال سے ڈاکٹر’ کہلا کر خوش ہوتے ہیں)… ہائے وہ رِقت انگیز مناظر!! ! جب باپ، بچے کو سکول کے گیٹ سے اندر داخل کرتا بلکہ زبردستی دھکیلتا ہے اور وہ بچہ ایسے بے جان قدم اُٹھاتا مڑ مڑ کر ظالم کو دیکھتا ہے جیسے پھانسی گھاٹ کی جانب جا رہا ہو ۔ اس کی امید کا سہارا hopping best ….. for next time ہی ہوتا ہے۔
چھٹی کی گھنٹی سنتے ہی جو دِلی سکون اور ذہنی اطمینان حاصل ہوتا ہے، گھر آتے ہی ماں جی کے اس اعلان سے سمندر کی جھاگ کی طرح بیٹھ جاتا ہے: ”تمہارے پاپا نے تمہارے لیے نیا ٹیوٹر مقرر کیا ہے۔ آج سے عصر تا عشا تم گھر میں پڑھائی کیا کرو گے۔”
”اگر کبھی ٹی وی پر پسندیدہ کارٹون لگے ہوں تو ریموٹ فوراً سے پیشتر ایسے جھپٹ لیا جاتا ہے، جیسے حکمران عوام سے جینے کا حق چھینتے ہیں اور ساتھ ہی ڈانٹتے ہوئے کہا جاتا ہے: ”چلو اُٹھو!! پڑھو جاکر ، تمہارے امتحان سر پر ہیں”… (پتانہیں یہ امتحان ہی کیوں سر پر ہوتے ہیں؟ کوئی ہیروں سے سجا تاج کیوں نہیں ہوتا…؟؟)
سارے بڑے (والدین، اساتذہ اور گلی محلوں میں ہوا کے ساتھ اُڑنے والے لفافوں کی طرح بکثرت پائے جانے والے دانشور) فریب کا ایسا لولی پوپ بچے کے منہ میں گھسیڑتے کہ وہ آخر وقت سمجھ ہی نہیں پاتا کہ اس کے ساتھ گیم کیا کھیلی گئی۔ ”بیٹا! یہ سکول کے چند سال پڑھ لو، کالج میں تو پھر عیش ہی عیش ہو گا…… محنت کر لو کالج میں ایڈمیشن ہو گیا تو موجیں ہی کرو گے”۔
پھر کالج یونی ورسٹی کے زمانے میں یہ ہدایت ہوتی کہ اب یہ آخری سٹیج ہے تمہاری سٹڈیز کی، اس کو بھی اچھا ہونا چاہیے، پروفیشنل لائف میں تو مزے ہی مزے ہوں گے……” (ہر دور کے اینڈ پہ ان کے ”عیش” کے وعدے کو تازہ دم کرنے کی بات کی جائے تو …… مٹی پائو جی…… رات گئی، بات گئی!!)
ایک طالب علم جس دور کے بارے میں سہانے خواب دیکھتاہے۔ اب وہ شروع ہوتا ہے تعلیمی سفر کے اختتام پر اور ”جن گھر والوں کا ہمیشہ کھاتے رہے” ان کو کھلانے کے لیے ہاتھ پائوں مارنے شروع کرنے سے… اب جناب صاحب کے پاس ڈگری ہے…… اعلیٰ تعلیم …… اور اپنے تمام کوائف اٹھا کر مطلوبہ ملازمت ڈھونڈنے کے لیے اتنی جگہوں کے دھکے کھاتا ہے کہ اسے بعض دفعہ وہ چند کاغذات بھی پہاڑ سے زیادہ وزنی محسوس ہوتے ہیں۔
اس سارے دور میں کھوجتی نگاہیں، ذومعنی اشارے اور مثالی ”حسن سلوک” بعض رشتہ داروں کی جانب سے تحفے میں ملتاہے وہ بھی زبردست ہے……
”بیٹاابھی تک جاب ہی نہیں ملی … وہ اسلم صاحب کا بیٹا بھی تو اسی یونی ورسٹی سے پڑھا ہے، وہ کب سے اتنی اچھی پوسٹ پر بیٹھا ہے……” پھر سرگوشی کرتے ہوئے ”رزلٹ تو ٹھیک آیا اس میں تو کوئی مسئلہ نہیں!” ہاہاہاہا۔
(بس چچا جان ایک بات بھول گئے کہ اسلم صاحب کے چچا ایک بڑی انڈسٹری کے چیئرمین ہیں)
”میں تو شاہ صاحب سے پہلے ہی کہتا تھا کہ کاروبار میں ڈال دو چھوکرے کو، کیا رکھا ہے انگریزی پڑھائیوں میں!!! خوفِ خدا باقیہے نا مخلوق سے شرم …… اپنے ہمسائے کو ہی دیکھ لو، کہاں پہنچ گیا ہے اس کا کاروبار……”ایک ہمسائے کی کا جلتی پر تیل ڈالنے کا کام۔
”ہاتھ کا کاری گر ہوتا تو باہر ہی چلا جاتا… (چاہے وہاں جا کر ٹیکسی چلانا پڑتی) …… آپ نے تو ایسے ہی اتنی رقم ضائع کر دی اس پر…” ایک رشتہ دار کی جلی کٹی۔
پر ان سب سے زیادہ تکلیف دہ موقع وہ ہوتا ہے جب ماں کہتی ہے کہ بیٹا …… فارغ بیٹھے ہو تو ذرا یہ ”مٹر” ہی چھیل دو…… مشین کی سوئی میں ”دھاگا” ڈال دو…… ”جالے” ہی اتار دو …… اور بابا کہتے ہیں بیٹا …… ”کال” نہیں آئی کہیں سے !!!!!خالی کیوں بیٹھے ہو تو کار ہی صاف کر دو۔”
ان حالات کے بعد اقبال کے شاہین کو زندہ رہنے کے لیے اقبال کے ہی تجویز کردہ نسخے پر عمل کرنا پڑے گا ……… بہ قول شاعر مشرق علامہ اقبال:
تو شاہین ہے بسیرا کر پہاڑوں کی چٹانوں پر

کوئی سوال؟ ہمیشہ کی طرح لیکچر کے اختتام پر اُس نے مارکر کا کیپ بند کر کے ایک نظر کلاس میں بیٹھے ہوئے سٹوڈنٹس کی طرف دیکھتے ہوئے پوچھا۔
”جی عمران؟” جن سٹوڈنٹس نے سوال پوچھنے کے لیے ہاتھ کھڑے کیے تھے اُن میں سے ایک کو اُس نے مخاطب کیا اور خود ڈائس کی جانب آگئی۔
”میڈم آپ نے بتایا کہ ہماری ہینڈ رائٹنگ ہماری شخصیت کی عکاسی کرتی ہے۔ ”عمران نے بات کا آغاز کیا۔
”جی بالکل!” سویرا نے اثبات میں سر ہلایا۔
”لیکن میڈم میرا ایک دوست ہے وہ آج کل ایک رائٹنگ بک لے کر آیا ہے۔ اُس بک میں مختلف سٹائلز کی ہینڈ رائٹنگ سیکھنے کے لیے lessons ہیں۔”
سویرا کے ساتھ کلاس میں موجود سب ہی سٹوڈنٹس بہ غور عمران کی بات سن رہے تھے۔
”تو میڈم جب کوئی اپنی رائٹنگ اُس بک کے مطابق بدل لے گا تو کیا اُس کی شخصیت بھی تبدیل ہو جائے گی؟” عمران نے اپنا سوال مکمل کرتے ہوئے ڈائس کے پیچھے کھڑی اپنی سائیکولوجی کی ٹیچر کی طرف دیکھا جو بڑے سکون سے اُس کی بات مکمل ہونے پر ہلکا سا مسکرا رہی تھی۔
”اچھا سوال ہے” سویرا نے ڈائس پہ اپنے دونوں بازو پھیلاتے ہوئے کہا۔
”عمران، آپ کے دوست کی شخصیت میں تبدیلی نہیں آئے گی۔” وہ فقط ایک جملہ بول کر خاموش ہو گئی۔
”لیکن میڈم! ظاہر ہے جب اُس کی رائٹنگ بدلے گی تو پھر اس کی شخصیت کو ہم اُس کی نئی رائٹنگ کی بنیاد پر ہی جانچیں گے۔” پہلی قطار میں بیٹھی فرح نے کہا۔
اُس سمیت کلاس میں بیٹھے سب ہی سٹوڈنٹس اپنے ذہنوں میں یہی سوال لئے ہوئے تھے۔ عمران بھی اپنے سوال کا مناسب جواب نہ ملنے پر ماتھے پر بل ڈالے اُلجھا سا بیٹھا تھا۔ ”ٹھیک کہا فرح آپ نے” سویرا مسکرائی۔ ”ہم عمران کے دوست کو اُس کی نئی رائٹنگ کی بنیاد پر ہی جانچیں گے۔” سویرا کی اس بات پر کلاس ایک مرتبہ پھر تذبذب کا شکار ہو گئی۔

لیکن اُس کی اگلی بات نے نہ صرف اُن کے تذبذب کو دور کر دیا بلکہ عمران بھی اپنے سوال کے جواب پر مطمئن ہو گیا۔ ”اصل میں سٹوڈنٹس آپ لوگ آج کے ٹاپک کو ٹھیک طرح سے سمجھ نہیں پائے۔” سویرا نے کلاس میں نظر دوڑاتے ہوئے کہا۔ ”لیکن عمران نے بہت اچھا سوال پوچھا ہے جس سے آپ لوگوں کی اُلجھن دور ہو جائے گی۔ میں نے یہ کہا کہ عمران کے دوست میں رائٹنگ تبدیل کرنے کے بعد کوئی تبدیلی نہیں آئے گی۔
جانتے ہیں میں نے ایسا کیوں کہا؟”
سب سٹوڈنٹس نے نفی میںسر ہلایا۔
”وہ اس لئے سٹوڈنٹس کہ عمران کے دوست میں چینج پہلے ہی آچکا ہے اور وہ اُسی چینج کی وجہ سے اپنی رائٹنگ تبدیل کر رہا ہے ورنہ وہ اپنی پہلی رائٹنگ کو ہی جاری رکھتا۔” کلاس میں موجود سب سٹوڈنٹس اب بات سمجھ آنے پر مسکرا رہے تھے۔
”یہی میں آپ کو سمجھا رہی تھی کہ رائٹنگ سٹائل آپ کی شخصیت کا عکاس ہوتا ہے۔جیسی آپ کی شخصیت ہوگی، آپ کی سوچ ہو گی، ویسا ہی آپ کے لکھنے کا انداز ہو گا۔” سویرا نے اپنی بات مکمل کی۔ ”یعنی میڈم! عمران کا دوست اب رائٹنگ بک میں سے جو رائٹنگ پسند کرے اور اُس کی پریکٹس کرے گا اصل میں وہ رائٹنگ اُس کا ذہن منتخب کرے گی۔ تو اس کیس میں رائٹنگ بک اس کو چینج نہیں کرے گی بلکہ اس کے اندر آنے والی تبدیلی کسی رائٹنگ کو منتخب کرے گی۔” عمران کے ساتھ بیٹھے باسط نے بات کو مزید کھول کر بیان کیا۔
”بالکل” سویرا نے اثبات میں سرہلاتے ہوئے اس کی تائید کی۔ ”اور کوئی سوال؟ ہمارے پاس چند منٹ ہی باقی ہیں۔” سویرا نے بائیں بازو پر بندھی گھڑی پہ وقت دیکھتے ہوئے کہا۔
”جی ثمرین؟” سویرا نے ہاتھ کھڑا کیے پہلی صف میں بیٹھی سٹوڈنٹ کو مخاطب کیا۔
”میڈم آپ نے آج کے لیکچر میں یہ بھی بتایا کہ بائیں ہاتھ سے لکھنے والوں کی پرسنالٹی دائیں ہاتھ سے لکھنے والوں سے مختلف ہوتی ہے ۔ میں نے نوٹ کیا ہے میڈم کہ بہت سے دائیں ہاتھ سے لکھنے والے لوگ، بائیں ہاتھ سے لکھنے کی کوشش بھی شوق سے کرتے ہیں کیوںکہ بائیں ہاتھ سے لکھنے والوں کی رائٹنگ بہت خوب صورت ہوتی ہے۔”
سویرا پوری توجہ سے ثمرین کی بات سن رہی تھی۔
”تو میڈم! آپ کی رائٹنگ تو بہت خوب صورت ہے لیکن کیا آپ نے کبھی بائیں ہاتھ سے لکھنے کی کوشش کی؟ شائدآپ کی بائیں ہاتھ کی رائٹنگ اور بھی خوب صورت ہوتی۔”
ثمرین کے سوال کے بعد کلاس میں ایک دم ہی مکمل خاموشی چھا گئی۔
سب ہی سٹوڈنٹس سویرا کی جانب دیکھتے ہوئے اُس کے جواب کے منتظر تھے۔
سویرا سوال سن کر کچھ دیر تک خاموشی سے کھڑی رہی، جیسے کسی گہری سوچ میں تھی۔ پھر وہ جواب دینے کی بجائے مارکر اٹھائے وائٹ بورڈ کی جانب آگئی۔
”میں اپنے بائیں ہاتھ سے بھی اتنا ہی خوب صورت لکھ سکتی ہوں۔”
یہ جملہ اُس نے اپنے بائیں ہاتھ سے بورڈ پر تحریر کیا اور کلاس کی طرف دیکھ کر مسکرا دی۔
سٹوڈنٹس کے چہروں پر پھیلی مسکراہٹ اُس کی رائٹنگ کی خوب صورتی کا اعتراف تھا۔
”یعنی میڈم آپ نے بھی شوقیہ بائیں ہاتھ سے لکھنا سیکھا۔”
ثمرین نے بورڈ پر دیکھتے ہوئے تبصرہ کیا۔
”نہیں شوقیہ نہیں۔ ”سویرا نے نفی میں سر ہلایا۔ ”بلکہ ایک حادثے کے نتیجے میں۔” بات مکمل کرتے ہوئے اُس کے لہجے میں عجیب سی اُداسی تھی۔
٭٭٭٭
”ڈاکٹر سویرا آپ کو ڈاکٹر نوید اپنے کمرے میں بلا رہے ہیں۔” وہ مریض دیکھ کر فارغ ہوئی ہی تھی کہ ریسپشنسٹ نے اُسے انٹر کام پر اطلاع دی۔
”’اوکے پھر میرے واپس آنے تک آپ کوئی مریض نہ بھیجیں۔” اُس نے ریسیور رکھا اور کرسی سے اٹھ گئی۔
وہ شام کو جس پرائیویٹ ہسپتال میں جاب کرتی تھی،ڈاکٹر نوید وہاں کے سربراہ تھے۔
”آپ نے بلایا سر؟” وہ دروازے پہ ہلکی سی دستک دے کر اندر داخل ہوئی۔
”جی ڈاکٹر سویرا، پلیز بیٹھیں۔” درمیانی عمر کے سوبر سے ڈاکٹر نوید نے ایک نظر اُس پہ ڈال کر میز کے سامنے موجود کرسیوں کی جانب اشارہ کیا۔
”اصل میں ڈاکٹر سویرا! یہ میرے ایک مریض کی رپورٹ ہے اور اُسے کچھ سائیکولوجیکل ٹریٹمنٹ (Psychological Treatment) کی ضرورت ہے۔ میں چاہتا ہوں کل سنڈے ہے تو آپ اس رپورٹ کو سٹڈی کر لیں۔ پیر کو وہ مریض آپ کے پاس آئے گا۔”
سویر اکے بیٹھتے ہی انہوں نے اپنے سامنے رکھی ایک فائل کھولتے ہوئے کہا۔
”جی سر۔ ”سویرا نے ہلکی سی مسکراہٹ کے ساتھ کہا۔
”یہ اصل میں ایک بزرگ مریض ہیں اور …”
ڈاکٹر نوید کی بات ابھی مکمل نہیں ہوئی تھی کہ اُن کے موبائل پر کال آنے لگی۔
”ایکسکیوزمی!” انہوں نے معذرت کرتے ہوئے کال ریسیو کی۔
ڈاکٹر نوید بات کرنے میں مصروف ہو گئے تو وہ ایسے ہی سامنے موجود میز پہ پڑی چیزوں پہ نظر دوڑانے لگی۔
میز پر زیادہ تر مریضوں کی فائلز یا لفافوں میں بند رپورٹس رکھی تھیں۔
سویر انے اپنے دائیں جانب موجود لفافے پر نظر ڈالی تو پھر جیسے وہ پلک جھپکنا بھی بھول گئی۔
”گل رعنا رضا” لفافے پر لکھا نام بہت جانا پہچانا تھا۔ سویرا کی نظریں اُسی نام پر ساکت ہو گئیں۔
”جی ڈاکٹر سویرا!” ڈاکٹر نوید نے کال ختم ہونے کے بعد اُسے پکارا تو جیسے وہ کسی خواب سے جاگی۔
”جی سر!” اُس نے لفافے سے اپنی نظریں ہٹاتے ہوئے کہا۔
تھوڑی دیر تک مریض کی کیس ہسٹری سننے کے بعد وہ ڈاکٹر نوید سے فائل لے کر اپنے کمرے میں واپس آگئی۔
لیکن اُس کا دماغ ابھی بھی ڈاکٹر نوید کے کمرے میں پڑے لفافے میں اٹکا ہوا تھا۔
جس وقت وہ سب مریض دیکھ کر فارغ ہوئی رات کے 9 بج رہے تھے۔ وہ بے دلی سے اُٹھ کر کھڑکی کی جانب آگئی۔
نیچے پارکنگ میں کھڑی گاڑیوں کو دیکھتے ہوئے اُس کی نظر ڈاکٹر نوید پر پڑی جو اپنی کار کا دروازہ کھول رہے تھے اور تب ہی ایک خیال کوندے کی طرح اُس کے ذہن میں لپکا۔
”افشاں! ڈاکٹر نوید ہیں کمرے میں؟” اُس نے دھڑکتے دل کے باوجود لہجے کو نارمل رکھتے ہوئے ریسپشن پہ موجود لڑکی کو مخاطب کیا۔
”نہیں ڈاکٹر سویرا، سر ابھی ابھی گئے ہیں۔ آپ کو کوئی کام تھا؟” ریسپشنسٹ نے پوچھا۔
”ہاں، اصل میں انہوں نے کہا تھا کہ میں ایک مریض کی رپورٹ جاتے ہوئے اُن کے کمرے سے لیتی جاؤں۔”
”ٹھیک ہے ڈاکٹر سویرا، سر نے کہا تھا تو آپ اُن کے کمرے سے وہ رپورٹ لے لیں۔”
افشاں نے جیسے اُس کی مشکل آسان کر دی۔
”ہاں یہ ٹھیک ہے” وہ مسکراتے ہوئے ڈاکٹر نوید کے کمرے کی جانب بڑھ گئی۔
کمرے میں موجود میز پر ابھی بھی لفافے موجود تھے لیکن سویرا کا مطلوبہ لفافہ نظر نہ آیا۔
اُس نے کانپتے ہاتھوں سے اُوپر والے لفافوں کو ہٹانا شروع کیا تو نیچے وہ لفافہ موجود تھا، جسے کھول کے پڑھنے کے لیے وہ بے چین تھی۔
اُس نے گہرا سانس لے کر اُسے اپنے شولڈر بیگ میں رکھا اور کمرے سے باہر آگئی۔
٭٭٭٭

لکھ منتاں منیاں پر لاحاصل
اک منت کیتی من یار گیا
اک مسئلہ زیر، زبر دا سی
جو سمجھ گیا لنگھ پار گیا
موتیا نے بے اختیار چیخ ماری اور پھر وہ چیختی ہی چلی گئی تھی۔ اُس کی پہلی چیخ نے مراد کے قدموں میں جیسے زنجیر ڈال دی تھی۔
”ابّا سانپ! وہاں سانپ!”
موتیا اب تھر تھر کانپتے ہوئے ہاتھ سے مراد کے پیروں کی طرف اشارہ کررہی تھی۔ مراد، اللہ وسائی اور گامو نے بہ یک وقت وہ سانپ دیکھا تھا۔
مراد کچھ خوف کے عالم میں پیچھے ہٹا تھا مگر گامو نے لپک کر ہاتھ میں پکڑ ی لاٹھی سے سانپ پروار کیا تھا۔ سانپ ضرب کھا کر تڑپا اور اُس کی لاٹھی کے گرد لپٹنے لگا۔ گامو لاٹھی سے اُسے پٹخ پٹخ کر تب تک مارتا رہا جب تک وہ مر نہیں گیا۔
پیر ابراہیم کے ڈیرے کے لوگ موتیا کی چیخیں سن کر جب تک وہاں پہنچے تھے تب تک گامو سانپ مار چکا تھا۔
”تو تم موتیا ہو، گامو چاچا کی بیٹی۔ ”
وہ پہلا جملہ تھا جو مراد نے خود سے کچھ فاصلے پر کھڑی تھر تھر کانپتی موتیا کو دیکھ کر کہا تھا ۔ گامو اور اللہ وسائی دونوں اس سانپ کے پاس کھڑے اب اُسے لاٹھی اور چھڑی سے ایک درخت کے تنے کی جڑ میں ڈھیر کررہے تھے اور موتیا کی چیخوں پر آنے والے مزارعے اُن کی مدد کررہے تھے۔موتیا ساکت کھڑی تھی۔
وہ مراد کا سوال نہیں تھا جس نے زرد پڑتی کانپتی موتیا کو ساکت کیا تھا۔ وہ اُس کی نظریں تھیں جن میں پہچان کا ایسا گوڑھا (گہرا) رنگ تھا جو مہندی کے رنگ کی طرح جوبن دکھا رہا تھا۔
”تم نے میری جان بچالی۔”

وہ مراد کا دوسرا جملہ تھا۔ وہ بس اتنا نہیں کہنا چاہتا تھا۔ جو کچھ کہنا چاہتا تھا وہ یہاں کہہ نہیں سکتا تھا۔ نہ وقت تھا نہ موقع اور پھروہاں ”دنیا” بھی تھی۔ یہ دُنیا ہر جگہ کیوں آجاتی ہے۔ مراد نے عجیب کسک سے ایک ہاتھ کی مٹھی بند کرکے مسلی تھی۔
”پتر! تو تو ٹھیک ہے نا؟” گامو اُس کی طرف آیا اور مراد موتیا سے نظر ہٹانے پر مجبور ہوگیا تھا۔
”میں ٹھیک ہوں چاچا۔” مراد نے آگے بڑھ کر گامو کو لپٹا کر اُس کا شکریہ ادا کیا تھا۔
”بڑا لمبا اور زہریلا سانپ تھا۔ ”گامو نے اُسے تھپکتے ہوئے دور سانپ کے مردہ وجود کی طرف اشارہ کیا جو اب بے جان پڑا تھا۔
”یہ تو موتیا کی نظر پڑگئی ورنہ اتنی لمبی گھاس میں مجھے کہاں نظر آتا۔”
گامو نے کہا تھا اور جیسے مراد کو ایک اور موقع دیا موتیا کو دیکھنے کا۔ اُن دونوں نے ایک دوسرے کو دیکھا تھا اور نظریں چرالی تھیں۔
مراد کو سانپ نہیں لڑاتھا، پیار لڑگیا تھا۔ اور پیار کا کاٹا پانی نہیں مانگتا۔
…٭…
پیر ابراہیم کے ڈیرے پر مراد پر سانپ کے حملے کی خبر مراد کے واپس پہنچنے سے پہلے ہی پہنچ چکی تھی اورتاجور حواس باختہ پیر ابراہیم کے ساتھ لپکتی ہوئی آئی تھی مگر تب تک مراد گامو کے خاندان کے ساتھ واپس پہنچ چکا تھا۔ تاجور نے اُسے سینے سے لگا کر جیسے اُس کے جسم کے ایک ایک حصّے کو چھو کر اس کے خیر وعافیت سے ہونے کی تسلی کی تھی اور اس وقت اُسے یہ بھی بھول گیا تھا کہ وہاں موتیا بھی تھی جسے مراد کی نظر سے دور رکھنے کے لئے اُس نے سوجتن کئے تھے۔
”تمہارا بڑا احسان آگیا ہے ہمارے کندھوں پر گامو!”
پیر ابراہیم نے وہاں کھڑے کھڑے بے حد ممنون انداز میں گامو کے دونوں ہاتھوں کو تھام کے کہا تھا اور گامو جیسے پانی پانی ہوگیا تھا۔ کہاں وہ کہاں پیر صاحب، اُس کی کیا اوقات تھی کہ وہ اُن پر احسان کرتا۔
”نہیں نہیں پیر صاحب! آپ گناہ گار نہ کریں ہمیں، ہم نے کیا احسان کرنا ہے آپ پر۔ احسان تو آپ کے ہیں ہمارے سر۔” گامو نے دونوں ہاتھ جوڑ کر کہا تھا۔
”ہمیں بس معاف کردیں۔ موتیا سے گناہ ہوگیا ایک۔ آپ کے درخت سے ایک امرود اتار کر کھا لیا اس نے۔” گامو نے بندھے ہاتھوں کے ساتھ پیر ابراہیم سے کہا تھا اور اس بار اُس کے جملے پر تاجور نے چونک کر جیسے پہلی بار موتیا کو دیکھا اور پھر اُس نے مراد کو دیکھا جس کی نظریں موتیا پر ٹکی ہوئی تھیں اور اُن میں جوتاثر تھا، اُس نے تاجور کو ہلا دیا تھا۔
”کھا یا نہیں تھا ابھی، سانپ آگیا تھا تو میرے ہاتھ سے گرگیا۔” موتیا نے جیسے وضاحت دی تھی او رپیر ابراہیم نے بے حد محبت سے اُس کے سر پر ہاتھ رکھ کر اُسے تھپکتے ہوئے کہا:
”موتیا کو اجازت ہے گا مو ہمارے باغ کے جس بھی درخت کا پھل چاہے توڑ کے کھالے۔”
اُن کے لہجے کی شفقت اور احترام تاجور کو جیسے کانٹے کی طرح چبھا تھا۔ اس نے اپنے باپ کے لہجے میں ایسا احترام اپنے علاوہ کبھی کسی کے لئے نہیں دیکھا تھا۔
”میری موتیا کے لئے دعا کریں پیر صاحب! اللہ اُس کے نصیب کھولے اور کسی بڑی اچھی جگہ رشتہ ہوجائے اس کا۔” اللہ وسائی نے کھڑے کھڑے پیر ابراہیم سے بیٹی کے نصیب کے لئے دعا کرنے کا کہا تھا۔
اس سے پہلے کہ پیر ابراہیم کچھ کہتے، تاجور نے مداخلت کی تھی۔
”ہاں ہاں! میں کروں گی کسی نہ کسی سے بات۔ مزارعوں کی بیویاں اپنے بچوں کے رشتوں کے لئے مجھ سے کہتی رہتی ہیں۔ تو اسے حویلی لایا کر اللہ وسائی!” تاجور کے جملے پر پیر ابراہیم نے بیٹی کو دیکھا تھا پھر عجیب سی مسکراہٹ کے ساتھ انہوں نے ایک بار پھر موتیا کے سر پر ہاتھ رکھ کے کہا تھا۔
”کسی مزارع کے گھر نہیں جائے گی موتیا۔ اونچے درجہ پر رہے گی ہمیشہ اونچا ہی رتبہ رہے گا۔”
تاجور کو باپ کی بات نے جیسے ایک بار پھر تکلیف پہنچائی تھی۔ وہ پیر ابراہیم تھے، سات گاؤں جن کے مرید تھے اور وہ ایک ماشکی کی بیٹی کے سر پر ہاتھ رکھ کر اُس کے رتبے اور درجے کی بشارتیں دے رہے تھے۔ کیوں؟ کس لئے؟ صرف اس لئے کہ اُس کے باپ نے مراد کی جان بچائی تھی۔ تاجور جل کر بھسم ہونے سے پہلے کوئلہ ہوئی تھی۔ پر باپ کے سامنے وہ کچھ کہہ نہیں سکتی تھی۔
گامور اور اللہ وسائی کے چہرے پر وہ چمک موتیا نے پہلے کبھی نہیں دیکھی تھی جو اُس نے پیر ابراہیم کی دعا پر دیکھی تھی ۔ پیر ابراہیم نے اُسے نظربھر کے بھی نہیں دیکھا تھا۔ موتیا کے سامنے وہ نظریں جھکائے ہی رہے تھے اور موتیا نے اُن کا چہرہ بغور دیکھا تھا۔اُن کی دعا اورالفاظ اس کی سمجھ میں نہیں آئے تھے۔ وہ اُسے بس یہ دعا دے دیتے کہ اُسے مراد مل جائے گا تو موتیا کی ڈکشنری وہیں شروع اور ختم ہوجاتی۔ ایک لمحہ کو اس کا دل چاہا تھا وہ پیر ابراہیم سے کہے وہ اسے مراد کا ساتھ نصیب ہونے کی دعا دیں جس کی نظریں اس وقت بھی اس کے چہرے کا طواف کررہی تھیں۔ جو اس سے بس پندرہ قدم دور کھڑا تھا موتیا جیسے فاصلہ ناپ چکی تھی اور اب پندرہ قدموں میں مراد اور اس کے بیچ بس تاجور تھی۔ وہ نہ ہوتی تو وہ اس سے چودہ قدم دور ہوتا۔
وہ مراد کی طرح دلیر نہیں تھی کہ وہاں کھڑی اُس کو اُسی طرح دیکھتی جیسے وہ دیکھ رہا تھا۔ پر وہ پھر بھی اُسے دیکھ رہی تھی۔ سفید شلوار قمیص میں ہاتھ سینے پر لپیٹے وہ چپ چاپ کھڑا تھا۔ اُس نے ایک لفظ بھی نہیں کہا۔ پر اُس سے پندرہ قدم دور کھڑی موتیا جیسے پھر بھی وہ ساری گفتگو سن رہی تھی جو اس کی نظریں کررہی تھیں۔
وہ مرد کی نگاہ نہیں تھی، محبوب کی نگاہ تھی۔ جس میں بس قربان ہوجانے، نثار ہوجانے کی آرزو تھی۔ پروانہ بن کر جل جانے کی تمنا تھی۔ جو اس پر جمی اس سے کہہ رہی تھی ۔ تجھ سا کوئی دوسرا ہے ہی نہیں موتیا اور نہ کبھی ہوگا۔
وہ گامو اور اللہ وسائی کے ساتھ اس بولتی نگاہ کے جواب میں کچھ بھی کہے بغیر پیر ابراہیم کے ڈیرے سے واپس آئی تھی اور مراد کا چین قرار ایک بار پھر لوٹ کر چلی گئی تھی۔
حسن اس نے بے پناہ دیکھا تھا پر موتیا سا نہیں دیکھا تھا۔ وہ اپنے گھمنڈ میں رہنے والا مرد تھا جس کو لگتا تھا وہ کبھی کسی عورت پر فدانہیں ہوسکتا۔ کنگز کالج میں وکالت پڑھتے ہوئے جو آخری چیز کبھی اس کے دماغ میں آتی تھی، وہ محبت ہی ہوسکتی تھی اور یہاں ایک نظر میں لٹا تھا اور ایک نظر میں لٹنے والا تو کبھی کسی کو بتا بھی نہیں سکتا کہ اُس کے ساتھ ہوا کیا۔ دل کیسے گیا؟ جاں کہاں گئی ؟ وہ پری چہرہ کیا کیا لے گئی؟
…٭…
”اُس رات بخار کے علا ج کے لئے بھی آپ نے موتیا کو بلوایا تھا؟ ”
تاجور مراد کے ساتھ اپنے گاؤں واپس آرہی تھی جب مراد نے رستے میں ٹانگے پر بیٹھے اُس سے پوچھا اور تاجور کو جیسے سانپ سونگھ گیا تھا۔ وہ کہاں کہاں آکر کھڑی ہوجاتی تھی اُس کے اور اُس کے بیٹے کے بیچ۔
”تمہیں کس نے بتایا؟” تاجور نے اُس سے نگاہ ملائے بغیر باہر کھیتوں میں دیکھتے ہوئے کہا۔
”مجھے بے ہوشی میں وہ نظر آئی تھی۔ مجھے لگا میرا وہم تھا۔ ” سیدھے سادے لہجے میں کہے گئے جملے نے تاجور کو کہیں کا نہیں رہنے دیا تھا۔ وہ اُس کے بیٹے کو بے ہوشی میں بھی نظر آنے لگی تھی جس کو وہ ہوش میں چھپانے کے جتن کررہی تھی۔
”چاچا گامو نے بڑا اچھا کیا موتیا کو میڈیکل پڑھارہے ہیں۔ گاؤں کو بڑی ضرورت ہے ڈاکٹر کی۔” مراد نے بات جاری رکھتے ہوئے کہا۔
”یہ تمہارے باپ کا احسان ہے کہ گامو پڑھا رہا ہے بیٹی کو ورنہ میرے بس میں ہوتا تو میں تو کبھی گاؤں کی کسی لڑکی کو لڑکوں کے ساتھ شہر میں نہ پڑھنے دیتی۔ بے حیائی سی بے حیائی ہے۔”
”امّی ماہ نور بھی تو پڑھ رہی ہے شہرجاکر۔”
تاجور اس کے جملے پر جیسے تڑپ اٹھی۔ وہ اس کی بھتیجی کا مقابلہ موتیا سے کررہا تھا۔
”ماہ نور اور موتیا کا کیا مقابلہ؟ تو اُس کی ذات اور اوقات تو دیکھ۔”
تاجور خفا ہوئی تھی اور مراد ماں کے جملے پر کچھ اور حیران۔
”یہ ذات اور اوقات کیا ہوتی ہے امّی؟”
تاجور کو اس سوال کا جواب نہیں آیا یا پھر شاید وہ موتیا کے ذکر سے تنگ آگئی تھی۔ اُس نے یک دم بات بدل دی۔
”تمہیں ماہ نور کیسی لگی؟” مراد اُس کے سوال پر ایک بار پھر حیران ہوا۔
”ماہ نور اچھی ہے۔ سب کزنز کی طرح۔ آپ کیوں پوچھ رہی ہیں؟ ”
مراد نے ماں کو کریدا، اس کی چھٹی حس نے اُسے کوئی عجیب سا سگنل دیا تھا۔ تاجور بڑے پراسرار انداز میں مسکرائی تھی۔
”بتادوں گی۔ بتادوں گی۔ ایسی جلدی کیا ہے ؟”
مراد ماں کے چہرے کو بغور دیکھتا رہا لیکن اُس نے مزید کوئی سوال نہیں کیا تھا۔
…٭…