آؤ چلتے ہیں لاہور
ارسلان اللہ خان
کیوں ہوتے ہو اتنے بور
آؤ چلتے ہیں لاہور
دیکھو داتا کا دربار
گھومو باغِ شالیمار
ماڈل ٹاؤن، سبزہ زار
چوبُرجی کے یہ مینار
چڑیا گھر ہے جیسے بَن
جانوروں کا ہے مسکن
یہ مینارِ پاکستان
میرے دیس کی ہے پہچان
دیکھو مُغلوں کے آثار
کیسے کیسے ہیں شہکار
آؤ دیکھیں دہلی گیٹ
جائیں گے پھر بھاٹی گیٹ
شاہی مسجد جائیں ہم
ربّ کی رحمت پائیں ہم
زندہ دِل ہیں سارے لوگ
کیسے پیارے پیارے لوگ
سب ہیں کھانے کے شوقین
پہنیں کپڑے بھی رنگین
جس نے نا دیکھا لاہور
وہ کیا دیکھے گا کچھ اور
٭…٭…٭
جواب دیں