Tag: کہانیاں

الف لیلہٰ داستان ۲۰۱۸ ۔ قسط نمبر ۱۶

سارہ قیوم

سترہویں رات

شہریار فریدوں کمر، سنجر فر کو بڑا شوق اور انتہا کا ذوق تھا کہ حسن بدر الدین، صاحب ِ جمال اور اس کی محبوبہ ٔ زہرہ تمثال کا کیا حال ہوا۔ عیش و عشرت نصیب ہوئی یا خدانخواستہ مرغِ دل صیدِ تیر اندوہ و ملال ہوا۔ شہر زاد کو حکم دیا کہ اس قصے کا باقی حصہ جلد سناؤ، دیر نہ لگاؤ ۔
شہر زاد عندلیب گفتار یوں نغمہ طراز ہوئی، بہ صد دلربائی عرض پرداز ہوئی کہ جب حسن بدر الدین نے کرن کے دریچے میں پہنچ کر کھڑکی پر دستک دی تو کرن نے لپک کر کھڑکی کھولی اور حسن نے خود کو اندر پہنچایا، اور جب خود کو محبوبہء رشکِ قمر کے خلوت کدے میں پایا تو جامے میں پھولا نہ سمایا۔ جنابِ باری کا شکربجالایا۔ اب جو کرن قریب آئی تو خدا کی خدائی مجسم نظر آئی۔ پہلے تو چودھویں کے چاند کا دھوکہ ہوا۔ پھر اور قریب آئی اور پاس سے چہرہ ء زیبا کی جھلک دکھائی تو یقین ہوگیا کہ پرستان کی پری ہے یا مہرِ خوبروئی کی جلوہ گستری ہے۔
؂وہ مکھڑا جسے دیکھ ماہ داغ کھائے
وہ نقشہ کہ تصویر کو حیرت آئے

ادھر حسن تو اس زنکہ خوش جمال کو دیکھ کر عش عش کرتا تھا اور ادھر کرن کا یہ حال کہ،
؂یہ شوق، یہ ارمان، یہ حسرت، یہ تمنا
کیا ہو مرے قابو میں تم آجاؤ اگر آج

حسن نے بہ صد شوق و اشتیاق کہا ۔ ‘‘اے جانِ جہاں، رشکِ سرو گلزار جناں تم نے آج مجھے نئی زندگی دی ورنہ جینے سے بیزار تھا، مصیبت سے دورچار تھا۔ سمجھا تھا کہ زندگی بیکار گئی۔ مگر تمہیں پایا تو جان میں جان آئی، منہ مانگی مراد پائی، تمنائے دلی ہزاروں حسرتوں اور ناامیدی کے بعد برآئی۔’’
حسن کی زبانی اس کی بے تابی کا یہ حال سن کر کرن کھلکھلائی ، بہ صد ناز و انداز اٹھلائی اور دلربائی سے بولی۔ ‘‘میں تو خود بڑی اپ سیٹ تھی، سوچتی تھی ہائے حسن بھائی تو اب سٹار بن گئے ہیں، بڑے آدمی ہوگئے ہیں، اب ہمیں کہاں لفٹ کرائیں گے؟’’
حسن سمجھ گیا کہ کیا کہتی ہے، پیار سے بولا۔ ‘‘جانی ! ہمت کیوں ہاری ہو؟ ہم تمہارے تم ہماری ہو۔’’
یہ کہہ کر ہاتھ تھام لیا اور جھک کر ہاتھ کی پشت پر بوسہ دیا۔
کرن نے ٹھنک کر ناز سے کہا۔ ‘‘اتنے رشتے آرہے ہیں میرے۔ مجھے تو فکر ہے ڈیڈی کہیں میری بات نہ طے کردیں۔’’ یہ کہہ منہ بسورا اور معصومیت سے بولی: ‘‘لیکن میں آپ کے سوا کسی اور سے شادی نہیں کروں گی، بتارہی ہوں، ہاں۔’’
یہ معصومیت اور یہ اظہارِ رضا مندی دیکھ کر حسن کے دل پر اس قدر اثر ہوا کہ عنانِ صبر ہاتھ سے جاتی رہی۔ فرط ِانبساط و بہجت اور وفورِ نشاط و مسرت سے کہا۔ ‘‘اے یارِ جانی، الفت کی نشانی، میرے دل کا عجب حال ہے جینا محال ہے۔ جو محبت میرے دل میں پیدا ہوئی ہے۔ اس کا مٹنا میرے دل کی فنا پر موقوف ہے۔ اب صرف عقدِ نکاح سے سروکار ہے، تم نہ ملیں تو جینا بے کار ہے۔’’
یہ کہہ کر فرطِ طرب سے آبدیدہ ہوا۔
کرن نے جو جذبات کا سیلاب امنڈتے دیکھا تو گرم لوہے پر کاری ضرب لگانے کا فیصلہ کیا۔ قریب آئی۔ اپنی نازک انگلیوں سے حسن کے آنسو پونچھے اور اس کے گلے میں بانہیں ڈال دیں۔
اب سنئے کہ ِادھر حسن اور کرن تو باہم راز و نیاز کی باتیں کرتے تھے، عاشقی معشوقی کی گھاتیں کرتے تھے، اُدھر کرن کے والد بزرگوار سیڑھیاں چڑھتے تھے۔
ہوا یوں کہ کرن نے نیند کی دوا دودھ میں ملا کر باپ کو پلائی تھی۔ خیال تھا کہ پی کر انٹاغفیل ہوگا اور صبح سے پہلے نہ اٹھے گا۔ لیکن باپ پہلوانوں کا پہلوان تھا، اور روزگارکا یہی سامان تھا کہ لڑکوں کو کسرت کرایا کرتا تھا۔ چنانچہ صبح سے لے کر شام تک وزن اٹھاتا تھا، کسرت کرتا تھا، ڈنڈ پیلتا تھا اور بیٹھکیں نکالتا تھا۔ دن رات یہی کام تھا، مشٹنڈوں میں نام تھا۔ نتیجہ اس ساری ورزش کا یہ نکلا تھا کہ خوب تنومند، مضبوط جسم، قوی اور صحت مند ہوگیا تھا اور حواس اور اعصاب فولادی ہو چکے تھے۔ اب کرن نے جو نیند کی دوا دودھ میں ملا کر پلائی تو اس کا بجزاس کے کوئی اثر نہ ہوا کہ ابخرے سے دماغ کی طرف متصاعہ ہوئے، چکر آنے لگے اور سر میں درد ہوگیا۔ پہلے تو لیٹا کروٹ پہ کروٹ بدلتا رہا اور انتظار کرتا رہا کہ سر درد ٹھیک ہوجائے تو سوجائے، مگر جب افاقہ نہ ہو اتو اٹھ کر سر درد کی دو ا ڈھونڈ نا شروع کی۔ گھر میں رکھی چیزوں کا اسے کچھ خاص علم نہ تھا۔ بیوی مرچکی تھی، اب سب کچھ بیٹی کے ہاتھ میں تھا۔ سمجھتا تھا کہ بیٹی سوچکی ہوگی۔ اس لئے خود ہی ڈھونڈ ھتا رہا۔
دوا تو نہ ملی البتہ اوپرکی منزل سے ایسی آواز آئی جیسے کوئی چیز گری ہو یا جیسے کسی نے زور سے شیشہ کھٹکھٹایا ہو۔ بہت کوفت ہوئی، پھر دل میں سوچا اس آواز کا مطلب ہے کرن جاگ رہی ہے۔ جاکر اس سے حال کہتا ہوں ۔یقینا وہ سر درد کا کوئی علاج کرے گی، سعادت مند بیٹیوں میں نام کرے گی۔
یہ سوچ کر یہ پدر ِناشاد و نامراد اپنا چکراتا سر لئے اوپر کرن کے کمرے کو چلا۔ ادھر کرن نے حسن بدر الدین کی گردن میں بازو ڈالے تھے اور حسن نے بھی نازک کمر کو بانہوں میں لیا تھا اور قریب تھا کہ فرطِ عشق سے پھول سے رخسار کا بوسہ لے کہ دروازے کے باہر قدموں کی آوا ز آئی۔ کرن اچھل کر حسن سے علیحدہ ہوئی، آنکھیں پھاڑ کر سرگوشی میں بولی ۔‘‘ڈیڈی۔’’
یہ کہہ کر چھلانگ مار کر کمرے کے وسط میں بچھے قالین پر جا کھڑی ہوئی، بجلی کی سی تیزی سے دوپٹہ گلے سے نکال کر سرپر لپیٹا اور چشم زدن میں نماز کی نیت باندھ لی۔ ابھی حسن ہکا بکا کھڑا یہ کارروائی ملاحظہ کرہی رہا تھا کہ دروازے کی چرخی گھومی اور ایک تنومند آدمی کمرے میں داخل ہوا۔ ادھر وہ کمرے میں داخل ہوا، ادھر کرن جو ابھی لمحہ بھر پہلے نیت باندھ رہی تھی، رکوع میں چلی گئی۔
اب وہ پدر ِبزرگوار تو یہ سوچ کر آیا تھا کہ بیٹی سے سردرد کی دوا لے کر کھاؤں گا، پھر مزے سے آرام فرماؤں گا۔ یہاں پہنچا تو اور ہی ماجرا دیکھا۔ کیا دیکھتا ہے کہ بیٹی سر پر دوپٹا لپیٹے بی بی حاجن بنی تہجد پڑھتی ہے، رکوع و سجود کرتی ہے اور کھڑکی کے پاس ایک نوجوان حواس باختہ، حیران پریشان کھڑا ہے۔ چند لمحے تو کچھ سمجھ نہ پایا کہ یہ کیا ماجرا دیکھنے میں آیا۔ پھر حواس ٹھکانے آئے اور گرج کر چلایا۔ ‘‘اوئے کون ہے تو؟’’
کرن نے باپ کی یہ گرجدار للکار سنی تو رکوع سے سراٹھا کر اوپر دیکھا ، دل پر ہاتھ رکھ کر چلائی :
‘‘چور……’’ اور پھر لہرا کر نزاکت سے قالین پر گر کربے ہوش ہوگئی۔
اب باپ یہ سمجھا کہ حسن چور ہے اور حسن یہ سمجھا کہ باپ چور ہے۔ دونوں نے ایک دوسرے کو چشم خشم آلودہ دکھائی اور للکار لگائی۔
حسن نے للکار کرکہا۔ ‘‘او نابکار تو کون ہے؟ جن ہے یا کسی رئیس کا غلام ہے؟ چور ہے یا ڈکیتِ بے نام ہے۔’’
باپ نے چلا کر کہا۔ ‘‘اوئے سُورا کنجرا توں میری بیٹی دے کمرے اچ کی کرنا پیاں ایں؟ ’’
دونوں ہی کو سمجھ نہ آیا کہ دوسرا کیا کہتا ہے۔ لیکن جب اس نے میری بیٹی کہا تو حسن سمجھ گیا کہ کرن کا والدِ بزرگوار ہے، پدرِ باوقار ہے۔ قریب تھا کہ جھک کر سلام

1. کیا موت کا جزیرہ، واقعی موت کا جزیرہ ہی تھا؟
2. کیوں اس خطرناک مجرم کا نام سننے والوں پر لرزہ طاری کر دیتا تھا؟
3. بیگم جمشید کیوں اتنے آرام سے اتنے خطرناک مجرم کو ناشتا کروا رہی تھیں؟
4. پروفیسر داﺅد دیوار پر لکھا نام دیکھ کر کیوں چونک گئے؟
5. انسپکٹر جمشید اتنے خطرناک مجرم کی عزت کیوں کرتے تھے؟
6. رگوں میں خون منجمد اور رونگٹے کھڑے کر دینے والے واقعات سے بھرپور کہانی ”موت کا جزیرہ“

٭….٭….٭

موت کا جزیرہ

بیگم جمشید، انسپکٹر جمشید اور بچوں کو ناشتا کرا چکی تھیں۔ اب وہ دفتر اور اسکول جانے کی تیاری کر رہے تھے۔ جب کہ بیگم جمشید برتن دھونے میں مصروف تھیں۔ بچوں سے پہلے انسپکٹر جمشید تیار ہو گئے۔

”اچھا بھئی! میں چلا۔ جاتے وقت اپنی امی کو بتا دینا تاکہ وہ دروازہ بند کر لیں۔“ انہوں نے کہا۔

”جی اچھا۔“ محمود بولا۔

ان کے جانے کے پندرہ منٹ بعد وہ بھی تیار ہو گئے۔

”امی کو بتا دو فرزانہ ہم جا رہے ہیں۔ آکر دروازہ بند کر لیں۔“

”اچھا۔“ فرزانہ نے کہا اور دوڑتی ہوئی باورچی خانے کی طرف گئی۔

”امی جان! ہم جا رہے ہیں، دروازہ بند کر لیں۔“

”اچھا بیٹی! تم لوگ جاﺅ۔ میں ابھی بند کر لیتی ہوں۔“ بیگم جمشید بولیں۔

اور وہ تینوں بھی چلے گئے۔ صرف ایک منٹ بعد وہ اٹھیں اور دروازے کی طرف بڑھیں۔ دروازے کی چٹخنی لگا کر وہ واپس مڑیں تو فرش پر کیچڑ میں بھرے ایک جوتے کا نشان نظر آیا۔ وہ دھک سے رہ گئیں۔ بھلا کیچڑ بھرے جوتے کے نشان کا ان کے صحن میں کیا کام۔ چند قدم آگے بڑھیں تو میز پر انہیں ایک پستول رکھا نظر آیا۔ ان کے اٹھتے قدم رک گئے۔ دل دھک دھک کرنے لگا۔ آنکھوں میں خوف سمٹ آیا۔ پھر جونہی انہوں نے نظریں اوپر اٹھائیں ان کی آنکھیں پھٹی کی پھٹی رہ گئیں۔ رونگٹے کھڑے ہو گئے۔ وہاں پر کوئی موجود تھا۔

وہ بہت لمبا چوڑا اور خوف ناک شکل صورت کا آدمی تھا۔ اس کی آنکھیں اگرچہ چھوٹی تھیں مگر ان میں بَلا کی چمک تھی، ہونٹ بھدے، سیاہ اور موٹے تھے۔ سر کے بال گہرے سیاہ اور بہت گھنے تھے۔ ہاتھوں کی پشت اور بازوﺅں پر بھی بال ہی بال تھے۔ غرض پہلی نظر میں تو وہ خوف ناک لگتا ہی تھا۔ اسے دیکھ کر بدن میں سنسنی سی پیدا ہونا لازمی بات تھی۔ خوف کی ایک لہر بیگم جمشید نے اپنے جسم کے روئیں روئیں میں دوڑتی محسوس کی۔ ان کے منہ سے کوئی لفظ نہ نکل سکا۔ پھر ان کے کانوں سے اس کی کرخت آواز ٹکرائی۔ بالکل ایسی جیسی پھٹے ہوئے بانس میں سے نکلتی ہے۔

”میں جانتا ہوں، گھر میں تمہارے سوا کوئی اور نہیں ہے۔“ یہ کہتے ہوئے وہ مسکرایا بھی تھا۔ اس کی مسکراہٹ کس قدر خوف ناک تھی۔ وہ کانپ کر رہ گئیں۔

حلق خشک ہونے لگا۔ بدن میں تھرتھراہٹ دوڑنے لگی۔ آخر بڑی مشکل سے انہوں نے اپنے لب کھولے:

”تم…. تم کیا چاہتے ہو؟“

”سب سے پہلے ناشتا۔“ وہ ہنسا۔

”اگر تم بھوکے ہو تو تمہیں کھانا ضرور ملے گا۔ اس گھر سے کوئی بھوکا خالی نہیں جاتا۔“

”میں بھوکا ضرور ہوں، لیکن بھیک نہیں مانگتا۔ اس وقت چوں کہ اس گھر پر میری حکومت ہے، اس لیے جو حکم بھی دوں، تمہیں بجا لانا ہو گا۔ میں انکار سننے کا عادی نہیں ہوں۔ جاﺅ، پہلے میرے لیے ناشتا لے کر آﺅ۔“ اس نے گرج دار آواز میں کہا۔

”اس گھر میں غیرقانونی طور پر داخل ہونے والا محفوظ نہیں رہ سکتا، تم نے اپنی شامت کو آواز دی ہے۔“

اس کے الفاظ سُن کر بیگم جمشید کو غصہ آگیا۔ ان کا خوف اُڑن چھو ہو گیا۔ وہ ایک دم دلیر ہو گئیں اور خون خوار نظروں سے اُسے گھورنے لگیں، لیکن اس تبدیلی سے بھی اس خوف ناک آدمی نے کوئی اثر نہیں لیا۔

”میں جانتا ہوں، یہ انسپکٹر جمشید کا گھر ہے، یہاں اس کے تین بچے محمود، فاروق اور فرزانہ بھی رہتے ہیں۔ ان کی بیوی بھی رہتی ہے، لیکن میں یہ بھی جانتا ہوں کہ انسپکٹر جمشید دفتر اور بچے اسکول جا چکے ہیں۔ اس کے ساتھ ہی مجھے اچھی طرح معلوم ہے کہ بچے دو بجے سے پہلے اور انسپکٹر جمشید پانچ بجے سے پہلے واپس نہیں آئیں گے۔ گھر کا دروازہ بند ہے اور اس گھر کا کوئی دوسرا راستہ بھی نہیں ہے۔ نہ ہی گھر میں ٹیلی فون ہے۔ پھر تم کس بنا پر اس قدر اکڑ کر بات کر رہی ہو؟ یاد رکھو، میں بہت بُرا آدمی ہوں۔“ اُس نے منہ بنا کر کہا۔

”وہ تو تم شکل سے نظر آہی رہے ہو۔“ بیگم جمشید جل کر بولیں۔

”چلو اچھا ہے، تمہیں اندازہ ہو گیا ہے۔ اب جلدی سے ناشتا لے آﺅ۔“

وہ پھر مسکرایا۔

”ناشتا ختم ہو چکا ہے۔“ انہوں نے منہ بنا کر کہا۔

”تو اور تیار کر لاﺅ۔“ اس نے ایسے انداز میں کہا جیسے اپنے گھر میں بیٹھا ہو۔

”پہلے یہ بتاﺅ، تم کون ہو اور یہاں کیا لینے آئے؟“

”ناشتے سے پہلے ایک لفظ نہیں بتاﺅں گا۔“ اس نے کندھے اُچکائے۔

”اچھی بات ہے، میں تمہارے لیے ناشتا لاتی ہوں۔“ تنگ آکر انہوں نے کہا اور باورچی خانے میں چلی آئیں۔ ان کا ذہن تیزی سے کام کر رہا تھا۔ وہ سوچ رہی تھیں۔ یوں وہ اس کے مقابلے میں ہار ماننے کے لیے تیار نہیں تھیں۔ وہ ان کے ساتھ باورچی خانے میں نہیں آیا تھا، بدستور صحن میں بیٹھارہا تھا۔ باورچی خانے سے نکل کر اس کی نظروں سے بچ کر کسی دوسرے کمرے تک جانا ناممکن تھا، وہ ضرور دیکھ لیتا۔“ ورنہ وہ سیدھی اپنے کمرے میں جاتیں اور انسپکٹر جمشید کا پستول اٹھا لاتیں۔ فائر کرنا تو انہیں آتا ہی تھا، لیکن اس صورت میں کہ وہ صحن میں بیٹھا تھا کسی اور کمرے میں جانا ناممکن تھا۔ وہ ہوشیار بیٹھا تھا اور برابر باورچی خانے کی طرف دیکھ رہا تھا۔

انہوں نے باورچی خانے کا جائزہ لیا، جہاں لوہے کے چمچ تھے جنہیں وہ ہتھیار کے طور پر استعمال کر سکتی تھیں لیکن ایک پستول کے مقابلے میں وہ کیا کام دیتے۔ آخر انہوں نے فیصلہ کر لیا کہ وہ عقل سے کام لے کر اس کا مقابلہ کریں گی۔

انہوں نے ناشتا تیار کر لیااور ٹرے میں رکھ کر وہ باہر نکلیں۔ نہ جانے کیوں اب انہیں خوف محسوس نہیں ہو رہا تھا اور وہ دل ہی دل میں مسکرا رہی تھیں۔ ٹرے میز پر رکھتے ہوئے انہوں نے زندہ دلی سے کہا:

”ناشتا تیار ہے، کسی اور چیز کی ضرورت ہو تو بتا دو۔“

”بہت خوب، اب آئی ہو تم سیدھے راستے پر۔ میرا خیال ہے تم نے پہلے ہی کافی کچھ تیار کر دیا ہے، بہرحال اگر ان چیزوں سے میرا پیٹ نہ بھرا تو ضرور بتا دوں گا۔“

”ضرور بتا دینا۔“ انہوں نے مسکرا کر کہا۔ خوف ناک آدمی نے انہیں چند لمحوں کے لیے حیران ہو کر دیکھا اور پھر ناشتے پر اس طرح ٹوٹ پڑا، جیسے کئی دنوں سے ہو، لیکن پہلے ہی لقمے پر اسے ابکائی آگئی۔ ڈبل روٹی کے توسوں میں نمک اور مرچ کوٹ کوٹ کر بھر دیا گیا تھا اور وہ بہت بد ذائقہ تھے۔ اس کی آنکھوں اور ناک سے بھی پانی بہنے لگا۔

”یہ ناشتا ہے؟“ وہ حلق پھاڑ کر چلایا۔

”تو کیا نہیں؟“ بیگم جمشید نے حیرت کا اظہار کیا۔

”ان ڈبل روٹی کے ٹکڑوں میں سوائے نمک اور مرچ کے اور کچھ بھی نہیں ہے۔“

”اوہ۔ شاید مجھ سے غلطی ہو گئی۔“ انہوں نے چونک کر کہا۔

”تم یہ انڈوں کا آملیٹ کھا لو۔ اگر یہ اچھا لگا تو اور بنا دوں گی۔“

”یہ بھی دیکھ لیتا ہوں، لیکن تم میرے غصے کو آواز دے رہی ہو۔“ اس نے غرا کر کہا۔

”نہیں تو، میں نے تو کسی کو بھی آواز نہیں دی۔ جب سے تم آئے ہو، تم سے ہی باتیں کر رہی ہوں۔“ انہوں نے معصومانہ لہجے میں کہا اور انہیں فاروق کا خیال آگیا۔ اس قسم کے جواب وہی دیا کرتا تھا۔ انہوں نے سوچا، وہ تو مزے سے اسکول میں بیٹھے پڑھ رہے ہوں گے اور میں یہاں ایک نئی مصیبت میں پھنس گئی ہوں۔ ایک ایسی مصیبت میں کہ کچھ پلّے نہیں پڑ رہا ہے، کیا کروں، کیا نہ کروں۔ دوسری طرف اجنبی نے آملیٹ چمچ میں لے کر منہ میں ڈالا اور پھر منہ نیچے کر کے آخ تھو آخ تھو کرنے لگا۔ منہ صاف کرنے کے بعد اس نے نگاہیں اوپر اٹھائیں اور گرج کر بولا:

”تو یہ آملیٹ ہے؟“

”اور یہ کسٹرڈ بھی ہے۔“ بیگم جمشید مسکرائیں۔ وہ انڈوں میں بہت ساری پھٹکری ملا لائی تھیں جس کی وجہ سے آملیٹ کڑوا زہر ہو گیا تھا۔

”میں سمجھ گیا، اس میں بھی کچھ ملا ہو گا۔ کیا تم مہمانوں کو ایسا ہی ناشتا دیا کرتی ہو؟“ اس نے جھنجھلا کر کہا۔

”جو مہمان تمہاری طرح میرے گھر میں داخل ہوں، انہیں اس سے بہتر ناشتا نہیں دے سکتی۔“ بیگم جمشید نے بھی بُرا سا منہ بنا کر کہا۔

”لیکن تمہیں یہ نہیں معلوم کہ جو مجھے اس قسم کا ناشتا دے، میں اس کے ساتھ کیا سلوک کرتا ہوں۔“ اس نے بھی مسکرا کر کہا۔ اب اس نے اپنے غصے پر قابو پا لیا تھا۔

”معلوم ہو ہی جائے گا۔ اب آگئے ہو تو خود کو ظاہر کیے بغیر تو جاﺅ گے نہیں۔ ویسے تمہارا نام کیا ہے؟“

یہ سوال انہوں نے اس لیے کیا تھا کہ انہیں بھی تھوڑی بہت جاسوسی کرنی چاہیے۔ کیوں کہ محمود، فاروق اور فرزانہ تو گھر میں تھے نہیں کہ سارا معاملہ ان پر ڈال کر آپ باورچی خانے میں چلی جاتیں۔

”کیوں، تم نے میرا نام کیوں پوچھا؟“ اس نے چونک کر کہا۔

”بس یونہی۔ گھر میں آئے مہمان کا نام پوچھنا کوئی اخلاق سے گری ہوئی بات تو نہیں ہے۔“ انہوں نے تنک کر کہا۔

”بداخلاقی کی ابتدا بھی تو تمہاری طرف سے شروع ہوئی ہے۔“

”اچھا جاﺅ۔ دوسرا ناشتا تیار کر کے لاﺅ، لیکن اس مرتبہ ناشتا خوش ذائقہ ہونا چاہیے۔ ورنہ مجھ سے بُرا کوئی نہ ہو گا۔“

”پہلے ہی کب ہے؟“ بیگم جمشید نے تلملا کر کہا۔

”تم ناشتا تیار کر نے کے لیے جاتی ہو یا نہیں؟“ اس نے پھر کہا۔

”تم نے ابھی تک بتایا نہیں کہ یہاں کس لیے آئے ہو، کیا چاہتے ہو اور تمہارا نام کیا ہے؟“

”میں کوئی تمہارا ملازم تو ہوں نہیں کہ تمہاری ہر بات کا جواب دینے پر مجبور ہوں۔ جاﺅ، ناشتا لاﺅ۔“

”افسوس! تمہیں اسی ناشتے سے پیٹ بھرنا ہو گا۔“ بیگم جمشید بولیں۔

”کیا مطلب؟“

”باورچی خانے میں اب کچھ نہیں بچا۔“

”تم جھوٹ کہتی ہو۔“ اس نے غرا کر کہا۔

”چل کر دیکھ لو۔“ یہ کہتے وقت وہ مسکرائیں۔

”چلو۔“ وہ اٹھ کھڑا ہوا۔

دونوں آگے پیچھے چلتے باورچی خانے میں آئے اور پھر وہ خوف ناک آدمی چونک اُٹھا۔ انڈے فرش پر گرا کر توڑ دیے گئے تھے۔ ڈبل روٹی پانی میں بھگو دی گئی تھی۔ مربے اور چٹنی کے خالی جار بھی منہ چڑا رہے تھے۔ آٹے کے ڈرم کا ڈھکنا الگ پڑا تھا۔ اجنبی نے اس میں جھانک کر دیکھا۔ آٹے میں بھی کچھ ڈال دیا گیا تھا۔ چینی کے ڈبے میں نمک اور مرچ بھی شامل کیے جا چکے تھے۔ غرض ایک چیز بھی ایسی نہیں تھی جس سے وہ ناشتا یا ناشتے کی قسم کی کوئی چیز تیار کی جا سکتی۔

٭….٭….٭

بیگم جمشید کی چیخ

”یہ تم نے کیا کیا؟“ خوف ناک آدمی حلق پھاڑ کر بولا۔ وہ انہیں کھا جانے والی نظروں سے دیکھ رہا تھا۔

”ناشتے کا سارا سامان برباد کر دیا۔ اب مجھے سو دو سو روپے خرچ کرنے پڑیں گے۔“ بیگم جمشید نے افسوس بھرے لہجے میں کہا۔ نہ جانے کیا بات تھی۔ اب انہیں اس سے ڈر نہیں لگ رہا تھا۔ حالاں کہ وہ پہلے سے زیادہ غصے میں تھا۔

”اب میں کیا کھاﺅں گا، میں بہت بھوکا ہوں۔“ وہ گلا پھاڑ کر بولا۔

”تمہیں اپنے گھر سے ناشتا کر کے آنا چاہیے تھا۔ کسی کے گھر بن بلائے جائیں تو کھا پی کر جانا چاہیے۔“

”خاموش، تمہاری آواز مجھے زہر لگ رہی ہے۔“ وہ چلا اُٹھا۔

”میرا بھی یہی حال ہے۔ کانوں میں درد ہونے لگا ہے۔ تمہاری بھدّی آواز سُن سُن کر۔“ بیگم جمشید نے بھی ترکی بہ ترکی جواب دیا۔

”میں تمہارا گلا گھونٹ دوں گا۔ خون پی جاﺅں گا۔“ اس کی آنکھیں سرخ ہو گئیں۔

”کیا آدم خور ہو؟“ بیگم جمشید نے گھبراہٹ کا مظاہرہ کیا۔

”اچھا، تم یوں نہیں مانو گی۔“ یہ کہہ کر وہ آگے بڑھا اور بیگم جمشید کے بال مٹھی میں پکڑ کر ایک جھٹکا مارا۔ ان کے منہ سے تکلیف کی وجہ سے چیخ نکل گئی۔

”بولو، میرے لیے ناشتا تیار کرو گی یا نہیں؟“

”اگر تم کہو تو میں باورچی خانے میں موجود چیزوں سے ناشتا بنا دوں۔ انہوں نے اب ڈرے بغیر کہا۔“ ویسے اگر تم اندر آنے کے بعد شرافت کا ثبوت دیتے تو میں کبھی کا تمہیں ناشتا کرا چکی ہوتی، لیکن تم نے تو اتنا تک نہیں بتایا کہ کون ہو، کہاں سے آئے ہو، کیوں آئے ہو، چاہتے کیا ہو؟ مزے کی بات یہ کہ میرے گھر کا فرش برباد کر دیا۔ کیا تم دیکھ کر نہیں چلتے؟“

”کیا مطلب؟“اس نے پھاڑ کھانے والے لہجے میں کہا۔

”تمہارا ایک جوتا کیچڑ میں بھرا ہوا ہے۔ اس سے میرے گھر کا فرش گندا ہو گیا ہے۔ بھلا میں ایسے آدمی کو ناشتا دے سکتی ہوں؟“ بیگم جمشید کا منہ بن گیا۔

”اگر ناشتا نہیں دو گی تو پچھتاﺅ گی۔“ اس نے سرد آواز میں کہا۔

”اچھا، پچھتا لوں گی۔“ بیگم جمشید نے مایوسانہ لہجے میں کہا اور چیخ اٹھیں۔ اُس نے ان کے بالوں کو ایک اور جھٹکا دیا۔ ان کے منہ سے پھر چیخ نکلی۔

”میں کرتا ہوں تمہارا بندوبست۔ اس کمرے میں چلو جس میں تم سوتے ہو۔“

”کیوں، وہاں کیا کام ہے۔ کیا چارپائیاں چرا کر لے جانا چاہتے ہو؟“ انہوں نے پوچھا۔

”بے وقوف عورت، میں چور نہیں ہوں۔“

”تو پھر کیا ہو؟“ وہ ایک دم بولیں۔

”جانے سے پہلے تمہیں ضرور بتا کر جاﺅں گا۔“

”کب جا رہے ہو تم؟“ انہوں نے پوچھا۔

”فکر نہ کرو۔ دو چار دن یہاں نہیں ٹھہروں گا۔“

”مجھے تو تم کوئی مفرور مجرم معلوم ہوتے ہو۔ سچ کہو۔ تم جیل سے فرار ہو کر آئے ہو نا۔“

”جیل؟ میں نے آج تک جیل کا منہ نہیں دیکھا۔ نہ جانے جیل کیسی ہوتی ہے۔“ اس نے پُرغرور لہجے میں کہا۔

”اگر کچھ دیر ٹھہرے رہے تو شاید ہم تمہیں دکھا دیں، جیل کیسی ہوتی ہے۔“

”میں کہہ چکا ہوں کہ اس گھر اور گھر کے رہنے والوں کے بارے میں سب کچھ جانتا ہوں۔ اسی لیے تو تمہارے دروازہ بند کرنے سے پہلے میں گھر کے اندر موجود تھا۔“

”وہ تو میں سمجھ چکی ہوں، محمود فاروق اور فرزانہ کے جاتے ہی تم اندر آگئے ہو گے۔ جب میں باورچی خانے سے نکلی تو تم میز کے نیچے دب گئے ہو گے تاکہ میں دروازہ بند کر دوں۔“

”ہوں، یہی بات ہے، لیکن تمہیں اس سے کوئی فائدہ تو پہنچنے سے رہا۔ میں نے تم سے کہا تھا کہ چارپائیوں والے کمرے میں چلو۔“

”چلو۔“ بیگم جمشید نے بے بسی کے عالم میں کہا۔

وہ انہیں لے کر سونے والے کمرے میں آئیں۔ ان کے بال ابھی اس کی مٹھی میں تھے۔ بال اسی طرح پکڑے پکڑے اس نے اپنی جیب سے چاقو نکالا اور ایک چارپائی کی رسی کاٹ کر اسے چارپائی سے الگ کیا۔

”کیا مجھے باندھنے کا ارادہ ہے؟“ انہوں نے پوچھا۔

”ہاں، تمہیں باندھ کر اطمینان سے اپنا کام کروں گا۔“

”یعنی ناشتا تیار کرو گے؟“ بیگم جمشید نے حیران ہو کر پوچھا۔

”اگر کچھ ملا تو ناشتا بھی تیار کروں گا، ورنہ باہر سے کچھ لے آﺅں میں بھوکا ننگا نہیں ہوں۔“

”تو شکل سے ہی نظر آتے ہو۔“

یہ کہتے ہوئے انہوں نے اچانک اپنے بالوں کو جھٹکا۔ خوف ناک آدمی بے دھیان تھا۔ بال اس کے ہاتھ سے پھسل گئے۔ جھٹکے کے ساتھ ہی بیگم جمشید سرہانے والی میز تک پہنچ گئیں۔ دوسرے ہی لمحے وہ ایک دراز کھینچ کر اس میں سے پستول نکال چکی تھیں۔

”تم جانتے ہو کہ یہ گھر کس کا ہے، اس لیے یہ بھی جانتے ہو گے کہ اس گھر کا ہر فرد پستول چلانا خوب جانتا ہے۔ اس لیے اپنی جگہ سے حرکت نہ کرنا۔ پہلا کام یہ کرو کہ چارپائی کی رسی دوبارہ کس دو تاکہ تمہارے جیل جانے کے بعد مجھے تکلیف نہ ہو۔“ وہ مسکراتے ہوئے کہہ رہی تھیں۔

٭….٭….٭

”آج نہ جانے کیا بات ہے، اسکول میں دل نہیں لگ رہا۔“ فاروق نے ایک خالی پیریڈ میں کہا۔

”میرا بھی حال کچھ ایسا ہی ہے۔“ محمود بولا۔

”خدا جانے، ہو سکتا ہے کوئی بات بھی نہ ہو اور ہمیں یونہی محسوس ہو رہا ہو، جیسے کوئی بات ہے۔“

”یہ بھی تو ہو سکتا ہے کوئی بات ہی ہو اور ہمارے محسوسات ٹھیک ہوں۔“

”تو پھر، کیا گھر چلیں؟“ محمود نے پوچھا۔

”میرا تو یہی جی چاہتا ہے۔“ فاروق بولا۔

”تو پھر لکھو درخواست۔“

اور ان دونوں نے چھٹی کی درخواست لکھ ماری۔ درخواست مانیٹر کے حوالے کی اور اسکول سے باہر نکل آئے۔ وہ کبھی مشکل سے ہی اسکول سے چھٹی کرتے تھے۔ یوں بھی تمام بچوں میں پڑھائی میں آگے تھے۔ اس لیے مانیٹر جانتا تھا، کلاس کے انچارج کوئی اعتراض نہیں کریں گے۔

”کیا خیال ہے، فرزانہ کو بھی ساتھ لے لیں۔“ محمود نے پوچھا۔

”وہ اسکول سے گھر جانا پسند نہیں کرے گی۔“ فاروق نے انکار میں سرہلایا۔

”ہو سکتا ہے، اس کا دل بھی نہ لگ رہا ہو۔“ محمود مسکرایا۔

”آج ہم پر ”ہو سکتا ہے“ کا دورہ تو نہیں پڑ گیا۔“ فاروق نے بھی ہنس کر کہا، لیکن اس کی ہنسی میں وہ جانینہیں تھی۔

”ایسا ہی لگتا ہے۔ میرا خیال ہے، ہم فرزانہ سے پوچھ لیتے ہیں۔ اگر اس نے ساتھ چلنا پسند کیا تو اسے بھی ساتھ لے لیں گے، ورنہ ہم دونوں ہی چلیں گے۔“

”ٹھیک ہے، لیکن شام کو جب ابا جان چھٹی کرنے کی وجہ پوچھیں گے تو کیا جواب دیں گے؟“

”جو بات ہے، وہی بتائیں گے۔ صاف صاف کہہ دیں گے کہ اسکول میں دل نہیں لگ رہا تھا۔ دھیان اِدھر اُدھر جا رہا تھا۔“

”تو پھر چلو، پہلے فرزانہ سے پوچھیں۔“

فرزانہ کا اسکول زیادہ فاصلے پر نہیں تھا۔ وہ جلد ہی وہاں پہنچ گئے۔ لڑکیوں کے اسکول میں لڑکوں کا داخلہ بند تھا، اس لیے انہوں نے چوکیدار کے ذریعے فرزانہ کو دروازے پر بلوایا۔ فرزانہ دروازے پر آئی تو دونوں اسے دیکھ کر بہت حیران ہوئے۔ اس کے بال بکھرے ہوئے تھے۔ آنکھوں میں بے چینی تھی۔ بس یوں لگتا تھا۔ جیسے اب روئی کہ اب روئی۔

”خیر تو ہے فرزانہ، کیا سہیلی سے لڑائی ہو گئی ہے؟“ فاروق نے گھبرا کر کہا۔

”نہیں تو۔“ اس کے منہ سے نکلا۔

”پھر کیا بات ہے، تم بہت پریشان دکھائی دے رہی ہو؟“

”ہاں! نہ جانے کیا بات ہے۔ میرا دل بیٹھا جا رہا ہے۔“

”یا اللہ رحم۔“ محمود بولا۔

”تم کیسے آئے؟“

”ہمارے بھی دل بیٹھے جا رہے تھے۔“ فاروق نے مسکرا کر کہا۔

”اوہ۔ تو ہم تینوں کی ایک ہی حالت ہے۔“ فرزانہ نے چونک کر کہا۔

”ہاں! ہم تو اسکول سے چھٹی لے آئے ہیں اور گھر جا رہے ہیں۔ تمہارا کیا خیال ہے، پڑھنا پسند کرو گی یا ہمارے ساتھ چلنا؟“ محمود نے پوچھا۔

”میں بھی تمہارے ساتھ چلوں گی۔ اسکول تو آج مجھے کاٹ کھانے کو دوڑ رہا ہے۔“

”تو پھر جلدی سے چھٹی لے آﺅ۔ نہ جانے آج کیا بات ہے۔“

”میں ابھی آئی۔“

چند منٹ بعد تینوں گھر کی طرف تیز تیز قدم اٹھا رہے تھے۔ پھر جونہی وہ گھر کے دروازے پر پہنچے، ان کے کانوں سے ایک گھٹی چیخ کی آواز ٹکرائی۔ وہ دھک سے رہ گئے۔ یہ چیخ ان کی ماں کے حلق سے نکلی تھی۔

٭….٭….٭

اُن کی آمد

”بہت خوب، تم تو بہت دلیر عورت ہو۔ میں سمجھا تھا، بزدل ہو گی۔“ خوف ناک آدمی نے حیران ہو کر کہا۔ اس کی نظریں بیگم جمشید کے ہاتھ میں پکڑے پستول پر جمی ہوئی تھیں۔

”تم نے میرے حکم کی تعمیل نہیں کی۔ میں نے کہا ہے، چارپائی کی رسی دوبارہ کس دو۔“

”اچھا، ابھی کستا ہوں۔“

اس نے کہا اور رسی ہاتھ میں پکڑ کر چارپائی پر جھک گیا، لیکن پھر نہ جانے اچانک اس نے کیا کیا کہ رسی سیدھی بیگم جمشید کے دائیں ہاتھ کی طرف آئی اور پستول کے گرد لپٹتی چلی گئی۔ ساتھ ہی رسی کو جھٹکا دیا گیا اور پستول بیگم جمشید کے ہاتھ سے نکلتا ہوا خوف ناک آدمی کے ہاتھ میں آگیا۔ بیگم جمشید بھونچکی رہ گئیں۔ ان کے وہم و گمان میں بھی نہ تھا کہ یہ شخص اس قدر تیزطرار اور پکا نشانے باز بھی ہو سکتا ہے۔ ورنہ ہوشیار ہو جاتیں۔

”میں یہاں یونہی نہیں چلا آیا، کچھ سوچ سمجھ کر ہی مجھے بھیجا گیا ہے۔“

”بھیجا گیا ہے۔ کیا مطلب؟“ ان کے منہ سے نکلا۔

”مطلب بتانے کا میں قائل نہیں۔ تم بتاﺅ، اب کیا کہتی ہو؟“

”کچھ بھی ہو، تمہیں ناشتا نہیں ملے گا۔“

”ٹھیک ہے۔ دیوار کی طرف منہ کر کے اپنے ہاتھ کمر پر لے آﺅ۔ میں تمہیں باندھ کر بازارسے کچھ کھانے کے لیے لے آﺅں گا۔“ اس نے کہا۔

”آخر تم چاہتے کیا ہو، کیا تمہارا یہیں رہنے کا ارادہ ہے؟“

”کم از کم اس وقت تک جب تک تمہارے تینوں بچے گھر نہیں آجاتے۔“

”کیا مطلب، تم ان سے کیا چاہتے ہو؟“ بیگم جمشید نے بوکھلا کر پوچھا۔

”اصل کام تو انہی سے ہے۔“ وہ خوف ناک انداز میں مسکرایا اور وہ کانپ اٹھیں۔ انہوں نے دل ہی دل میں دُعا کی کہ یا خدا، آج محمود، فاروق اور فرزانہ لیٹ ہو جائیں، بہت دیر سے گھر آئیں۔

”کیا کام ہے ان سے؟“ انہوں نے ہمت ہارنا کب سیکھا تھا۔

”یہ میں انہی کو بتاﺅں گا۔“

یہ کہہ کر وہ آگے بڑھا اور چارپائی کی رسی سے بیگم جمشید کے ہاتھ باندھنے لگا۔ اس نے ہاتھ باندھنے پر ہی بس نہیں کی، ہاتھوں کے بعد پیر باندھے، پھر ان کے منہ میں ایک رومال ٹھونسا اور اوپر ایک اور رومال باندھ دیا۔ اب بیگم جمشید کمرے کے فرش پر بندھی پڑی تھیں۔ اس طرح کہ منہ سے ہلکی سی آواز بھی نہیں نکال سکتی تھیں۔ اس کام سے فارغ ہو کر وہ کمرے سے باہر نکلا اور دروازہ بند کر کے باہر سے چٹخنی لگا دی۔ مطمئن انداز میں مسکرایا اور باہر کی طرف قدم اٹھانے لگا۔ اچانک اسے یاد آیا، میں نے اپنا پستول تو میز پر ہی چھوڑ دیا تھا۔ میز سے پستول اٹھا کر اس نے دوسری جیب میں رکھا کیوں کہ ایک جیب میں تو پہلے ہی انسپکٹر جمشید والا پستول موجود تھا۔ ایک بار پھر وہ دروازے کی طرف بڑھ رہا تھا کہ ٹھٹک کر رُک گیا۔ اس کی آنکھوں میں حیرت سمٹ آئی، کیوں کہ عین اسی وقت دروازے کی گھنٹی بجی تھی جب کہ اسے معلوم تھا کہ دو بجے سے پہلے کسی کے آنے کا امکان نہیں ہے۔ چند لمحے تک وہ کھڑا سوچتا رہا۔ پھر دبے پاﺅں دروازے کی طرف بڑھنے لگا۔

٭….٭….٭

”یا اللہ رحم۔“ محمود نے خوف زدہ لہجے میں کہا۔

”اندر تو کوئی گڑبڑ ہے۔“ فاروق بولا۔

”کہیں امی ریڈیو پر کوئی ڈراما تو نہیں سُن رہی ہیں۔“ فرزانہ نے سوچتے ہوئے کہا۔“ اور یہ گھٹی گھٹی چیخ اس ڈرامے میں شامل ہو۔“

”لیکن آواز امی جان کی تھی۔“ محمود نے اعتراض کیا۔

”ہاں! اس میں کوئی شک نہیں کہ چیخ امی جان کی تھی۔“ فاروق نے کہا۔

”پھر اب کیا کریں، دروازہ تو اندر سے بند ہے۔“

”ہم گھنٹی بجانے کے سوا کر بھی کیا سکتے ہیں؟“

”کیوں نہ پہلے پائیں باغ والی کھڑکی کا جائزہ لے لیں۔ اگر وہ کھلی ہوئی ملی تو ہم گھنٹی بجائے بغیر بھی اندر داخل ہو سکیں گے۔“ فرزانہ نے تجویز پیش کی۔

”لیکن ہم صبح کھڑکی اندر سے بند کر کے اسکول گئے تھے۔“ فاروق بولا۔

”اس وقت گھر کے حالات بدلے ہوئے ہیں، اندر نہ جانے کون ہے۔ ہو سکتا ہے، بدلے ہوئے حالات کے تحت کھڑکی کھلی ہوئی ہو۔“ محمود نے خیال پیش کیا۔

”تو پھر آﺅ، وقت کیوں ضائع کرتے ہو۔“ فاروق گھبرا کر بولا۔

اور وہ تیزی سے کھڑکی کی طرف بڑھے۔ اُسے دھکیلا، تو پتا چلا کہ وہ تو اندر سے بند تھی۔

”اب ہمیں گھنٹی ہی بجانا ہو گی۔“ محمود بولا۔

”میرے ذہن میں ایک ترکیب آئی ہے۔“ فرزانہ بولی۔

”جلدی بتاﺅ۔“

”تم دونوں گھنٹی بجا کر اندر جاﺅ، میں ابا جان کو فون کر کے اندر آنے کی کوشش کروں گی۔ اس طرح انہیں بھی اطلاع مل جائے گی۔“

”بہت اچھے۔ یہ بالکل ٹھیک رہے گا۔“ محمود نے خوش ہو کر کہا۔

تینوں پائیں باغ سے باہر نکلے۔ محمود اور فاروق دروازے پر رُک گئے اور فرزانہ آگے بڑھتی چلی گئی۔

محمود نے گھنٹی کے بٹن پر انگلی رکھی اور دباﺅ ڈال دیا۔ اندر گھنٹی زور سے بجی اور بجتی چلی گئی۔ پھر دونوں انتظار کرنے لگے۔ یہ لمحے ان کے لیے بہت مشکل سے گزر رہے تھے۔ وہ چاہتے تھے، دروازہ فوراً کھل جائے، پھر چاہے انہیں آگ میں کودنا پڑے۔ وہ اپنی امی کو بچانے کے لیے کود جائیں گے۔ ابھی تک انہیں قدموں کی آہٹ بھی سنائی نہیں دی تھی۔

”کوئی دروازہ کھولنے کے لیے نہیں آیا۔ اب ہم کیا کریں؟ “ محمود نے پریشان ہو کر کہا۔

”اندر کوئی لمبا چکر چل رہا ہے۔ یا اللہ، یہ ہمارے جاتے ہی کیا شروع ہو گیا؟“ فاروق بولا۔

”کیوں نہ ہم دروازہ توڑنے کی کوشش کریں۔ اس طرح محلے کے لوگ بھی تو ہماری مدد کے لیے آجائیں گے۔“ محمود نے مشورہ دیا۔

”جب تک یہ نہ معلوم ہو جائے کہ اندر کیا چکر ہے اور کیا حالات ہیں، اس وقت تک ہم کسی سے مدد نہیں مانگ سکتے۔ ہو سکتا ہے، مدد الٹی نقصان دہ ثابت ہو۔“ فاروق نے کہا۔

”ہوں، یہ بھی ٹھیک ہے۔ اوہ خاموش میرا خیال ہے، کوئی دروازے کی طرف دبے پاﺅں آرہا ہے۔“ محمود نے چونک کر دبی آواز میں کہا۔

”یہی بات ہے، لیکن ہم کوئی حرکت نہیں کریں گے۔ دروازے پر آرام سے کھڑے رہیں گے۔ ہمارا پہلا مقصد اندر جا کر حالات کا جائزہ لینا ہو گا تاکہ معلوم ہو سکے امی کس حال میں ہیں؟“

”ٹھیک کہتے ہو۔“ محمود نے فکرمند ہو کر کہا۔

اسی وقت چٹخنی گرنے کی آواز آئی۔ دونوں نے چہروں پر مسکراہٹ طاری کر لی۔ جونہی دروازہ کھلا دونوں ایک ساتھ بولے۔

”السلام علیکم امی جان!“ وہ جان بوجھ کر رُک گئے۔ جانتے تھے کہ دروازہ کھولنے والی ان کی والدہ نہیں ہو سکتیں۔

پھر ان کی آنکھیں کھلی کی کھلی رہ گئیں۔ ان کے سامنے ایک خوف ناک آدمی کھڑا تھا جو انہیں بری طرح گھور رہا تھا۔

”کون ہو تم؟“ اس نے پوچھا۔

”ارے، یہ ہمارا گھر ہے۔ تم کون ہوتے ہو پوچھنے والے؟“ فاروق نے بُرا سا منہ بنا کر کہا۔

”اوہ، تو یہ تم ہو، مگر تم اسکول سے اتنی جلدی کیوں آگئے؟“ اس نے حیران ہو کر کہا۔

”ہماری مرضی، تم کون ہوتے ہو پوچھنے والے۔“

”ٹھیک ہے، اندر آجاﺅ۔“

”لیکن تم کون ہو اور ہمارے گھر میں کیا کر رہے ہو؟“

”میں تمہارے سوالات کے جوابات دینے کا پابند نہیں، چلو اندر۔“

یہ کہتے ہوئے، اس نے جیب سے پستول نکال لیا۔ انہوں نے دیکھا، پستول ان کے والد کا تھا۔

”اب تو اندر چلنا ہی پڑے گا، کیوں محمود۔“ فاروق نے شریر لہجے میں کہا۔

”ہاں! مجبوری ہے۔“ محمود نے کندھے اچکائے۔

دونوں اس کے آگے چلتے ہوئے صحن کی طرف بڑھے۔ خوف ناک آدمی دروازہ اندر سے بند کرنا نہیں بھولا تھا۔ کھانے کی میز کے پاس فرش پر انہیں تھوکا ہوا کچھ کھانا نظر آیا۔ وہ حیران رہ گئے۔ خوف ناک آدمی انہیں بھی سونے والے کمرے میں لے آیا۔

انہوں نے دیکھا، ان کی والدہ رسیوں سے جکڑی فرش پر پڑی ہیں۔ ان کے منہ پر بھی رومال بندھا تھا۔ وہ دنگ رہ گئے۔ ساتھ ہی ان کا رواں رواں سُلگ اٹھا، خون جوش مارنے لگا اور آنکھوں میں شعلے بھڑک اٹھے۔

”بدتمیز، پاگل، ہم تمہیں اس حرکت کا مزہ چکھائیں گے۔“ محمود نے پاگلوں کی طرح گلا پھاڑ کر کہا۔

”لیکن یہ نہ بھولنا کہ میرے ہاتھ میں تمہارے باپ کا پستول ہے اور میرا نشانہ تمہارے والد سے بھی زیادہ پختہ ہے۔“ اس نے بدستور مسکراتے ہوئے کہا۔

”کچھ بھی ہو، ہم تمہیں تگنی کا ناچ نچا کر رہیں گے۔“

”تم دونوں بے وقوف ہو، مجھے یہاں کچھ سوچ سمجھ کر ہی بھیجا گیا ہے۔“ اس نے کہا۔

”تم کون ہو اور یہاں کس لیے آئے ہو؟“ فاروق نے خود پر قابو پاتے ہوئے کہا۔

”یہ سوال تمہاری والدہ نے بھی کیا تھا۔“ اس نے جواب دیا۔

”تمہاری بہتری اسی میں ہے کہ پہلی فرصت میں ہماری والدہ کو کھول دو ورنہ تمہارا انجام اتنا بھیانک ہو گا کہ زندگی بھر پچھتاﺅ گے۔“

عین اسی وقت گھنٹی ایک بار پھر بجی۔ وہ چونک اٹھے۔ محمود اور فاروق نے سوچا، یہ ضرور فرزانہ ہو گی، جو فون کر آئی ہو گی۔

٭….٭….٭

جیرال

”اور یہ تمہاری بہن ہو گی۔ کیوں ٹھیک ہے نا۔“ خوف ناک آدمی نے مسکرا کر کہا۔

”ہو سکتا ہے۔“ فاروق بولا۔

”تم دونوں میرے ساتھ دروازے تک چلو گے، سمجھے۔“

”جی بہت بہتر۔“ محمود نے سعادت مندی کا مظاہرہ کیا۔

”سنو، اگر دروازے پر تمہاری بہن موجود ہوئی تو چپ چاپ اس کے لیے دروازہ کھول کر پیچھے ہٹ آنا۔“

”اچھا۔“ دونوں کے منہ سے نکلا۔ ان کے ذہن تیزی سے گردش کر رہے تھے۔

وہ انہیں ساتھ لے کر دروازے پر آیا اور محمود کو دروازہ کھولنے کا اشارہ کیا۔ خود دیوار سے لگ کر کھڑا ہو گیا۔ محمود نے دروازہ کھول دیا۔ فرزانہ کی آواز سنائی دی۔

”کیا اندر سب خیریت ہے، میں نے پھر یونہی فون کیا۔“

محمود اور فاروق دھک سے رہ گئے، انہیں یہ امید نہیں تھی کہ فرزانہ یہ جملہ بول دے گی۔ دوسری طرف خوف ناک آدمی بھی بڑے زور سے چونکا۔ پھر اس نے غرا کر کہا۔

”اب اندر جانے کی ضرورت نہیں، یہیں ٹھہرو۔“

اُن کے اٹھتے قدم رُک گئے۔ فرزانہ بھی بوکھلا گئی۔ پھر خوف ناک آدمی کو دیکھ کر تو اس کی سٹی ہی گم ہو گئی۔ اسے احساس ہو گیا کہ اس نے کتنی بڑی غلطی کی ہے۔ دوسری طرف خوف ناک آدمی جیب سے چاک نکال کر دیوار پر کچھ لکھنے لگا تھا، لیکن ایسے میں بھی اس کی نظر ان تینوں پر جمی تھی۔ وہ اسے حیرت سے دیوار پر لکھتے دیکھ رہے تھے۔ انہوں نے دیکھا، اس نے دیوار پر صرف ایک نام لکھا تھا۔

”جیرال۔“

اچانک وہ بڑی زور سے اچھلے اور پھر سکتے کی حالت میں کھڑے رہ گئے۔

”تو۔ کیا۔ تم جیرال ہو؟“ محمود ہکلایا۔

”ہاں! معلوم ہوتا ہے تم میرے نام سے واقف ہو۔“

”بہت اچھی طرح۔ ہم نے اخبارات میں تو پڑھا ہی ہے۔ ہمارے والد نے بھی تمہارے بارے میں بہت کچھ بتایا ہے۔“ فاروق نے جواب دیا۔

”پھر تو مجھ سے اچھی طرح واقف ہوگے۔ چلو یہ اور بھی اچھا ہے۔ اچھا، اب سنو۔ اپنے منہ دروازے کی طرف کر لو۔“ اس نے حکم دیا۔ تینوں مُڑ گئے۔

”اب پھر میری طرف پلٹو۔“ اس نے کہا، وہ پلٹے تو انہیں پستول نظر نہیں آیا۔

”پستول اب میرے کوٹ کی جیب میں ہے اس کی نالی کا رُخ تمہاری طرف ہے۔ میں ایک ہی فائر میں تم تینوں کو ڈھیر کر سکتا ہوں۔ یہ بات شاید تمہیں معلوم ہی ہو گی۔“

”ہاں! ہم جانتے ہیں۔“

”ہوں ٹھیک ہے۔ تمہیں اتنا کرنا ہے کہ میرے آگے آگے چلتے رہنا، جونہی تم نے کوئی حرکت کی اور میں نے تمہیں گولی ماری، لیکن جب تک تم کوئی حرکت نہیں کرو گے، میں گولی نہیں چلاﺅں گا۔ اب چلو، کہیں تمہارے والد سے بھی یہیں مقابلہ نہ کرنا پڑ جائے۔ ویسے ان سے مقابلہ تو ہو گا ہی۔ وہ تمہارے پیچھے ضرور آئیں گے۔“ اس نے ہنس کر کہا۔

”تم ہمیں کہاں لے جانا چاہتے ہو؟“ محمود نے پوچھا۔

”یہ میں تمہیں ابھی نہیں بتا سکتا۔“ جیرال نے کہا۔

”بس اب چلو۔“

وہ دروازے سے باہر نکل کر سڑک کی طرف چلنے لگے۔ جیرال اور اس کے کارناموں سے وہ اچھی طرح واقف تھے۔ ان کے والد نے اس کے بارے میں انہیں بہت کچھ بتایا اور یہ بھی ہدایت کی تھی کہ اگر کبھی جیرال سے سامنا ہو جائے تو اس کی ہدایت پر عمل کرنا اور بالکل چوں چرا نہ کرنا۔ وہ جانتے تھے، جیرال ایک ایسا جاسوس ہے جس سے بڑے بڑے ملک معاوضہ دے کر کام لیتے ہیں۔ دوسرے ملکوں کے راز معلوم کرتے ہیں، فائلیں وغیرہ اس کے ذریعے غائب کراتے ہیں۔ یہی وجہ تھی کہ تینوں حیران تھے اور سوچ رہے تھے، آخر جیرال ہمیں کہاں لے جا رہا ہے۔ ایک اتنے بڑے جاسوس کو ہمارے گھر آنے کی کیا ضرورت پڑ گئی۔ پھر انہیں جیرال کا وہ جملہ یاد آیا، اس نے کہا تھا، مجھے یہاں کچھ سوچ سمجھ کر ہی بھیجا گیا ہے۔

یہ سب باتیں سوچ کر ان کی پریشانی میں اضافہ ہوتا جا رہا تھا، پھر وہ آگے آگے چلتے ہوئے سڑک تک آگئے۔ سڑک کنارے ایک نیلے رنگ کی کار کھڑی تھی۔ پیچھے سے جیرال کی آواز آئی:

”تمہیں اس کار میں بیٹھنا ہے۔ کوئی غلط حرکت نہ کر بیٹھنا۔ اگر میرے ہاتھ سے مارے گئے تو مجھے بہت افسوس ہوگا جس طرح تم مجھ سے اچھی طرح واقف ہو، اسی طرح میں بھی تمہیں بہ خوبی جانتا ہوں۔“

”بہت خوب۔“ فاروق نے کہا۔

تینوں اپنے ذہنوں کو تیزی سے گھما رہے تھے۔ وہ سوچ رہے تھے نہ جانے یہ ہمیں کہاں لے جانا چاہتا ہے اور یہ کہ ان کے والد انہیں کس طرح تلاش کریں گے۔ کر بھی سکیں گے یا نہیں۔ اگر وہ تلاش نہ کر سکے تو کیا ہو گا؟ انہوں نے کچھ نہ کچھ کر ڈالنے کا فیصلہ کر لیا۔ وہ جانتے تھے، تینوں مل کر بھی جیرال کا مقابلہ نہیں کر سکیں گے کیوں کہ اس کا مقابلہ تو دس آدمی مل کر بھی نہیں کر سکتے تھے، ان کی تو حیثیت ہی کیا تھی، لیکن وہ دوسری قسم کی کوشش تو کر سکتے تھے۔ دل ہی دل میں یہ فیصلہ کرتے ہوئے وہ کار کی طرف قدم اٹھانے لگے۔ اچانک فاروق کو ایک زوردار چھینک آئی۔ اس نے منہ ہی منہ میں کہا۔

”شاید میں نزلے کا شکار ہونے والا ہوں۔“ پھر جیب سے اپنا رومال نکال کر ناک صاف کرنے لگا۔

”تم رومال سڑک پر نہیں گراﺅ گے، میں تمہاری ان کرتبوں سے واقف ہوں۔“ پیچھے سے جیرال کی مسکراتی آواز ان کے کانوں سے ٹکرائی اور فاروق نے مایوس ہو کر رومال جیب میں رکھ لیا۔ عین اسی وقت محمود نے ٹھوکر کھائی۔

”ارے ارے، سنبھل کر۔“ فرزانہ نے گھبرا کر کہا اور اسے تھامنے کی کوشش میں آگے بڑھی۔

”کیا تم لوگ کوئی چال چلنے کی فکر میں ہو؟“ جیرال نے چونک کر کہا۔

”نہیں، ایسی کوئی بات نہیں۔ چھینک کا آنا کوئی عجیب بات نہیں، نہ ہی محمود کے پاﺅں کو ٹھوکر لگنا۔“

اتنی دیر میں وہ کار تک پہنچ چکے تھے۔

”اچھا خیر، اس میں بیٹھ جاﺅ۔ تمہاری جیبوں میں کوئی ہتھیار تو نہیں۔“

”جی نہیں۔“ فاروق بولا۔

”کیا تم بتا سکتے ہو کہ میں نے تمہاری تلاشی کیوں نہیں لی جب کہ میں یہ بات بھی جانتا ہوں کہ تم تینوں پروفیسر داﺅد کے بنائے ہوئے کھلونے نما ہتھیار اپنی جیبوں میں رکھتے ہو۔“

”اس لیے کہ ہم اسکول سے آئے تھے۔ ہتھیار ہم کسی مہم پر جاتے وقت ساتھ لیتے ہیں۔“ فرزانہ بولی۔

”بہت خوب، تم واقعی بہت عقل مند ہو۔ میں نے بھی یہی سوچ کر تمہاری تلاشی نہیں لی تھی۔“ جیرال نے مسکرا کر کہا۔

پھر اس نے دونوں طرف کے دروازے بند کرتے ہوئے انہیں لاک کر دیا۔

” میں ایک ہاتھ سے کار چلانے میں ماہر خیال کیا جاتا ہوں اور صرف ایک ہاتھ سے تم تینوں سے نمٹ سکتا ہوں۔ اس لیے ایک بار پھر بتاتا چلوں، کوئی حرکت نہ کر بیٹھنا، پھر میں کوئی لحاظ نہیں کروں گا۔“

”اچھی بات ہے، ہم کوئی غلط حرکت نہیں کریں گے۔“ فاروق نے سنجیدہ لہجے میں کہا۔

”میں نے تمہاری بہت تعریفیں سنی ہیں۔ یہ بھی سُن رکھا ہے کہ حالات خواہ کچھ بھی ہوں، تم چہکتے رہتے ہو۔“

”ہم پرندے نہیں، انسان ہیں۔“ فاروق مسکرایا۔

”بہت خوب۔“ اس نے کار سٹارٹ کرتے ہوئے کہا۔

”میں تم تینوں کی نوک جھونک اپنے کانوں سے سُن کر لطف اندوز ہونا چاہتا ہوں، لیکن میرا خیال ہے کہ تم پر میرا رعب اس حد تک طاری ہو چکا ہے کہ شاید ہی تم کار میں کوئی بات کر سکو۔“

”نہیں خیر، ایسی تو کوئی بات نہیں۔“ محمود بولا۔

”ویسے فرزانہ، کیا تم نے اپنے والد کو خطرے کی اطلاع دے دی تھی؟“ جیرال نے اس طرح پوچھا جیسے وہ مدتوں ان کے ساتھ رہا ہو۔“

”ہاں! میں فون کر کے ہی اپنے دروازے پر آئی تھی۔“

”انہوں نے کیا کہا تھا؟“

”انہوں نے کہا تھا وہ فوراً پہنچ رہے ہیں، فکر نہ کرنا۔“

”ویسے میں تمہیں ایک خاص بات بتانا چاہتا ہوں۔“ جیرال عجیب سے انداز میں مسکرایا۔

”وہ کیا؟“ انہوں نے ایک ساتھ پوچھا۔

”وہ یہ کہ میں ذاتی طور پر انسپکٹر جمشید کی بہت عزت کرتا ہوں۔ اس لحاظ سے تم تینوں کو بھی پسند کرتا ہوں۔“

”بہت بہت شکریہ جناب! آپ پہلے مجرم ہیں جن کی زبان سے ہم اس قسم کے الفاظ سن رہے ہیں۔“ محمود نے خوش ہو کر کہا۔

”میں اور قسم کا مجرم ہوں۔“ وہ مسکرایا۔

”ویسے آپ نے اب تک یہ نہیں بتایا، ہمیں کہاں لے جا رہے ہیں؟“ فاروق نے سوال کیا۔

”ابھی نہیں، کچھ دیر بعد بتاﺅں گا۔“ اس نے کہا۔

”اب تو ہم کار میں بیٹھ بھی چکے ہیں۔ اب ہم کسی کو خبردار تو کر نہیں سکیں گے۔“ محمود نے سامنے دیکھتے ہوئے کہا۔

سامنے سے آنے والی کاروں میں اچانک اُسے اپنے ایک دوست کے والد بیٹھے نظر آئے تھے۔ اس نے سوچا کاش! دوست کے والد انہیں کار میں بیٹھا دیکھ لیں۔

”دشمن کو کبھی کم زور نہیں سمجھنا چاہیے۔ یہ میرا بہت پرانا اصول ہے۔“ اس نے کہا۔

”اچھا نہ بتائیں لیکن ایک بات میں بھی آپ کو بتا دینا چاہتا ہوں۔“ فاروق نے پُراسرار لہجے میں کہا۔

”وہ کیا؟“

”ہمارے والد ہمارے پیچھے آئیں گے ضرور۔“

”کیا تم کوئی سراغ چھوڑ آئے ہو۔ میں نے پوری طرح دھیان دیا تھا کہ تم ایسا نہ کرو۔ اسی لیے جب تم چھینکے تھے اور محمود لڑکھڑایا تو میں ہوشیار ہو گیا تھا، لیکن مجھے سڑک کنارے ایسی کوئی چیز نظر نہیں آئی جس سے تمہارے والد یہ اندازہ لگا سکیں کہ تم اس جگہ سے کار میں بیٹھ کر روانہ ہوئے ہو۔“

”کچھ بھی ہو، وہ آئیں گے ضرور۔“ اس نے پختہ یقین سے کہا۔ جیرال نے اس کے الفاظ پر پچھلا منظر دکھانے والے آئینے میں اس کی طرف گھور کر دیکھا اور بولا۔

”کوئی بات نہیں، ایک عرصے سے میری خواہش بھی تھی، کہ ان سے میرا مقابلہ ہو۔“

”کار پوری رفتار سے دوڑ رہی تھی۔ آبادی اب بہت پیچھے رہ گئی تھی اور سڑک کے دونوں طرف درختوں کا سلسلہ شروع ہو گیا تھا۔

٭….٭….٭

موٹر بوٹ میں

انسپکٹر جمشید ریسیور ہاتھ سے رکھتے ہی اچھل کر کھڑے ہو گئے اور اکرام سے بولے:

”اکرام، میرے ساتھ چلو۔“

یہ کہہ کر وہ دفتر سے باہر نکل آئے اور اپنی موٹرسائیکل کی طرف لپکے۔ اکرام بدحواسی کے عالم میں دوڑتا ہوا ان کے پیچھے بیٹھ گیا۔ دوسرے ہی لمحے موٹرسائیکل پوری رفتار سے اڑی جا رہی تھی۔

”خیریت تو ہے جناب؟“

”نہیں۔ فرزانہ نے خبر سنائی ہے کہ گھر کے اندر کوئی گڑبڑ ہے۔ محمود اور فاروق اندر جا چکے ہیں۔ وہ فون کرنے بیگم شیرازی کے ہاں چلی آئی ہے۔ اب وہ بھی گھر میں جا چکی ہو گی۔“

”کیسی گڑبڑ، کیا اس نے بتایا نہیں؟“

”نہیں کچھ بتانے کا وقت ہی کہاں ہو گا۔“

”بچے آج اسکول نہیں گئے؟“ اکرام نے حیران ہو کر پوچھا۔

”جب میں گھر سے چلا تھا تو اسکول جانے کے لیے تیار ہو رہے تھے۔ اب خدا جانے وہ اسکول گئے تھے یا نہیں۔“ انہوں نے سوچ میں ڈوبتے ہوئے کہا۔

”خدا خیر ہی کرے۔“ اکرام کے منہ سے نکلا۔

آندھی اور طوفان کی طرح موٹرسائیکل چلاتے وہ گھر کے دروازے تک پہنچ گئے۔ ساتھ ہی ان پر حیرت کا پہاڑ ٹوٹ پڑا۔

”ارے! یہ کیسے ہو سکتا ہے۔ دروازہ تو کھلا پڑا ہے۔“ انہوں نے موٹرسائیکل سے اترتے ہوئے کہا۔

”اس کا مطلب ہے، اندر کوئی گڑبڑ نہیں ہے۔“ اکرام بولا۔

”غلط سمجھے، اندر زبردست گڑبڑ ہوئی ہے۔“ انہوں نے گھبرا کر کہا اور پھر دوڑتے ہوئے اندر گھس گئے۔ اکرام ان کے پیچھے دوڑا۔ صحن میں انہیں کچھ بھی نظر نہ آیا۔ سارا مکان بھائیں بھائیں کر رہا تھا۔ وہ باورچی خانے کی طرف لپکے۔ یہ بھی خالی تھا، البتہ اندر بے ترتیبی کا عالم تھا۔ لمحہ بہ لمحہ ان کی حیرت اور خوف بڑھتا ہی جا رہا تھا۔ آخر وہ سونے والے کمرے میں داخل ہوئے اور پھر دھک سے رہ گئے۔ اُن کی بیگم رسیوں سے بندھی فرش پر بے ہوش پڑی تھیں۔ ان کے ہاتھ پیر پھول گئے۔ جلدی جلدی انہوں نے ان کی رسیاں کھولیں۔ انہیں اٹھا کر چارپائی پر ڈالا۔ منہ میں سے رومال نکالا۔ اتنے میں اکرام ایک گلاس میں پانی لے آیا۔ انہوں نے بیگم کے منہ پر پانی کے چھینٹے دیے، تب کہیں جا کر ان کی آنکھوں کے پپوٹے حرکت میں آئے۔ انہوں نے نیم بے ہوشی کے عالم میں آنکھیں جھپک جھپک کر انہیں دیکھا، پھر چونک اٹھیں اور چلائیں۔“

”وہ۔ وہ۔ میرے بچوں کو لے گیا۔“

”کیا کہا؟ کون بچوں کو لے گیا؟“ انسپکٹر جمشید نے بوکھلا کر پوچھا۔

”میں نہیں جانتی، وہ کون تھا۔ ہاں وہ بہت خوف ناک شکل صورت کا آدمی تھا، لمبا تڑنگا۔“

”گھبرانے کی ضرورت نہیں۔ تفصیل سے بتاﺅ۔ وہ میرے ہاتھ سے بچ کر نہیں جا سکے گا۔“

اور بیگم جمشید نے تفصیل سے انہیں ساری بات بتا دی۔ چند لمحے تک وہ کھڑے سوچتے رہے، پھر بولے:

”لیکن اس سے یہ کب ثابت ہوتا ہے کہ وہ ان تینوں کو لے گیا ہے۔“

”محمود اور فاروق اندر آچکے تھے۔ اس وقت میں ہوش میں تھی، پھر گھنٹی ایک بار پھر بجی تھی۔ اس نے کہا تھا، یہ ضرور تمہاری بہن ہو گی۔ اس پر محمود نے یا فاروق نے کہا تھا کہ ہو سکتا ہے۔ اس سے میں نے اندازہ لگا لیا کہ فرزانہ ہی ہو گی۔ پھر وہ تینوں دروازے پر چلے گئے اور واپس نہیں آئے۔“

”ہوں۔ خیر، تم آرام کرو۔ اگر اٹھ سکو تو بیگم شیرازی کے ہاں جا کر ڈاکٹر کو بلا لو۔ ایک ایک سیکنڈ قیمتی ہے۔ نہ جانے وہ کون تھا اور تینوں کو کہاں لے گیا ہے۔ آﺅ اکرام ہم چلیں۔“ انہوں نے صحن کی طرف مُڑتے ہوئے کہا۔

”جلدی جائیے، میری فکر نہ کریں۔“ بیگم جمشید بولیں۔

وہ گھر سے باہر نکلنے کے لیے دروازے تک آئے اور پھر ٹھٹک کر رُک گئے۔ انسپکٹر جمشید کی نظریں دیوار پر چاک سے لکھے ایک نام پر جم کر رہ گئیں۔

٭….٭….٭

ان کا سفر دو گھنٹے تک جاری رہا۔ پھر کار ایک طرف مُڑتی نظر آئی۔ انہوں نے دیکھا، وہ ساحل سمندر پر پہنچ چکے تھے۔ دُور دُور تک انہیں کوئی انسان نظر نہیں آیا۔ البتہ ایک طرف سمندر میں ایک موٹربوٹ کھڑی ہلکورے لے رہی تھی۔ یہ ایک غیرآباد ساحل تھا۔

”نیچے اُتر آﺅ۔“ جیرال نے سرد آواز میں کہا۔ اس سے پہلے وہ اس کی آواز میں جو دوستانہ گرمی محسوس کرتے رہے تھے، ایک دم غائب ہو گئی تھی۔ انہوں نے چونک کر اس کی طرف دیکھا، اب اس کے چہرے پر وحشت اور درندگی کا راج تھا۔

”گھڑی میں تولہ، گھڑی میں ماشہ، یہ تم یکا یک بدل کیوں گئے؟“ فاروق نے بُرا سا منہ بنا کر کہا۔

”تم سے نرم گرم گفتگو اس لیے کرتا رہا کہ کہیں تم کار میں کوئی حرکت نہ کر بیٹھو۔ جب کہ تمہیں بخیروعافیت یہاں تک پہنچانے کا معاہدہ ہوا تھا۔“ اس نے کہا۔

”یہ معاہدہ کس کے ساتھ ہوا؟“ محمود نے پوچھا۔

”یہ ایسے راز ہیں جو بچوں کو بتائے نہیں جاتے۔“ اس نے طنزیہ انداز میں مسکرا کر کہا۔

”چلو خیر۔ ہمارے والد کو بتا دینا۔“ فاروق مسکرایا۔

”اُن کے تو فرشتے بھی یہاں تک نہیں پہنچ سکتے۔“ اس نے بُرا سا منہ بنا کر کہا۔

”کچھ دیر پہلے تو تم کہہ رہے تھے کہ اُن سے مقابلہ کرنے کے خواہش مند ہو۔“ فرزانہ نے جل بھن کر کہا۔

”بالکل ہوں، لیکن مجھے ایک فیصد بھی امید نہیں کہ وہ یہاں پہنچ سکیں گے۔“

”دیکھا جائے گا۔“

وہ کار سے اُتر ے اور اب موٹربوٹ کی طرف بڑھ رہے تھے۔ جیرال نے اب پھر پستول ہاتھ میں پکڑ لیا تھا۔ اچانک پانی کی ایک تیز لہر آئی اور ان کی پنڈلیوں کو چھوتی ہوئی گزر گئی۔

”ارے میری چپل نکل گئی۔“ فاروق چلایا۔

”پروا نہ کرو۔ موٹربوٹ میں ننگے پاﺅں بیٹھنے پر کوئی اعتراض نہیں کرے گا۔“ جیرال ہنسا۔

”لیکن میرے والد کو تو دوسری چپل خریدنی پڑے گی۔“

”بھول جاﺅ انہیں۔“

”کیا کہا؟ اپنے والد کو بھول جاﺅ۔ یہ کیسے ہو سکتا ہے۔ کیا کوئی اس طرح بھی اپنے ماں باپ کو بھولا کرتا ہے۔ یا تمہاری طرف ایسا ہی ہوتا ہے۔“

فاروق نے جل بھن کر کہا۔

”اچھا بھائی نہ بھولو۔ ذرا تیز تیز چلو۔“ اس نے دوستانہ لہجے میں کہا۔

”تم میری سمجھ میں نہیں آئے۔ کبھی دوست نظر آتے ہو، کبھی دشمن۔“ محمود بولا۔

”میں تو بڑے بڑوں کی سمجھ میں نہیں آیا، تم کیا سمجھو گے؟“

پانی کی لہر جب واپس گئی تو انہوں نے دیکھا، فاروق کے صرف ایک پیر میں چپل تھی۔

”اسے بھی اتار پھینکو۔ یوں اچھے نہیںلگ رہے۔“ فرزانہ نے بُرا سا منہ بنا کر کہا۔

”اچھا، یہ لو۔“ فاروق نے کہا اور دوسری چپل بھی اچھال دی۔ وہ ریت میں گری۔

چاروں آگے بڑھتے چلے گئے۔ یہاں تک کہ موٹربوٹ تک پہنچ گئے۔ اب انہوں نے دیکھا، یہ ایک بہت بڑی اور جدید قسم کی موٹربوٹ تھی۔ اس میں باقاعدہ کمرے بنے تھے۔

جیرال نے کہا:

”کیا آنکھیں پھاڑ پھاڑ کر دیکھ رہے ہو۔ یہ صرف موٹربوٹ ہی نہیں۔ ضرورت پڑنے پر آبدوز میں بھی تبدیل کی جا سکتی ہے اور گھنٹوں پانی کے نیچے سفر کر سکتی ہے۔“

”اوہ۔“ ان کے منہ سے نکلا۔

”ہیلو جارج۔ ہم آگئے ہیں۔“ جیرال نے چلا کر کہا۔

فوراً ہی موٹربوٹ میں ایک کھڑکی سی نمودار ہوئی اور پھر غائب ہو گئی۔ اس کے بعد موٹر بوٹ چل پڑی ہے۔ نامعلوم منزل کی طرف۔

”ہماری آواز اس کمرے سے باہر نہیں جا سکے گی کیوں یہ موٹربوٹ آبدوز بھی ہے۔ اس لیے تم بے خطربات چیت کر سکتے ہو۔“ محمود نے انہیں بتایا۔

”خطر کیا اور بے خطر کیا۔ یہاں بات چیت کرنے کے لیے رکھا ہی کیا ہے۔“ فرزانہ نے کہا۔

”کیا تم مایوس ہو گئی ہو؟“ محمود نے کہا۔

”نہیں، مایوسی گناہ ہے۔“ فرزانہ بولی۔

”تو پھر خدا کی ذات پر یقین رکھو۔ ابا جان ضرور آئیں گے۔“ فاروق بولا۔

”آخر تمہیں اس قدر یقین کیوں ہے؟“ فرزانہ نے پوچھا۔

”اس لیے کہ ابا جان جیرال سے اچھی طرح واقف ہیں۔ وہ اس کے کام کرنے کے طریقوں سے بھی واقف ہیں۔ پھر بھلا وہ کیوں نہ آئیں گے؟“

”لیکن اب تو ہم سمندر میں ہیں اور پھر یہ شہر کا وہ ساحل بھی تو نہیں، جہاں سے موٹربوٹیں اور آبدوزیں چلتی ہیں۔“ فرزانہ بولی۔

تو پھر کیوں نہ ہم خود ہاتھ پیر مارنے کی کوشش کریں۔ اس وقت تو ہم تنہا ہیں۔“ محمود نے کہا۔

”لیکن ہم اس بند کمرے میں دشمنوں کے خلاف کیا کر سکتے ہیں۔ پہلے ایک جیرال ہی کیا کم تھا کہ یہ جارج بھی شامل ہو گیا۔“ فاروق کے لہجے میں ناامیدی تھی۔

”ہمت نہ ہارو۔ حوصلہ رکھو اور دماغ پر زور دو۔“ محمود نے انہیں دلاسا دیا۔

”کیوں نہ ہم یہ دروازہ کھولنے کی کوشش کریں۔“ اچانک فرزانہ نے کہا اور دونوں چونک اُٹھے۔

”بالکل ٹھیک۔ “ محمود بولا۔

تینوں ایک ساتھ دروازے کی طرف بڑھے۔

٭….٭….٭

انسپکٹر جمشید میدانِ عمل میں

”اُف خدا، تو یہاں جیرال آیا تھا۔“ ان کے منہ سے نکلا۔

”دیوار پر نام لکھ کر جانے کا تو یہی مطلب ہو سکتا ہے۔“ اکرام نے بوکھلا کر کہا۔

”تو وہ تینوں بچوں کو اغوا کر کے لے گیا ہے، لیکن کیوں؟ اس نے ایسا کیوں کیا۔“ انسپکٹر جمشید نے پیشانی پکڑ کر کہا۔

”جیرال ہمیشہ بڑے بڑے ملکوں کے لیے معاوضے پر کام کرتا ہے۔ ہو سکتا ہے، کسی نے اسے ایسا کرنے پر مجبور کیا ہو۔“

”آﺅ اکرام! جلدی کرو۔ کہیں وہ دُور نہ نکل جائے۔“ انسپکٹر جمشید بوکھلا کر بولے۔

دونوں تیزی سے باہر نکلے اور موٹرسائیکل پر بیٹھ کر سڑک کنارے پر آئے، یہاں آکر انہوں نے موٹرسائیکل روک لی۔

”ہمیں پہلے یہ دیکھنا ہے کہ وہ کوئی نشانی تو نہیں چھوڑ گئے۔“ وہ بولے۔

”جیرال نے انہیں اس کا کب موقع دیا ہو گا۔“ اکرام نے کہا۔

”ہاں! وہ بہت چالاک ہے، مگر بچے بھی کچھ کم نہیں ہیں۔ انہوں نے اپنی سی کوشش ضرور کی ہو گی۔“

یہ کہہ کر انسپکٹر جمشید فٹ پاتھ کے ساتھ ساتھ غور سے جائزہ لینے لگے۔ اکرام محسوس کر رہا تھا کہ وہ وقت ضائع کر رہے ہیں۔ دفعتاً انسپکٹر جمشید چونکے۔

”دیکھو اکرام، اگرچہ لوگ سڑک پر آجا رہے ہیں، لیکن اس کے باوجود وہ آثار چھوڑ گئے ہیں۔“ انہوں نے فٹ پاتھ کے ساتھ سڑک پر اشارہ کرتے ہوئے کہا۔

”لیکن یہاں تو کچھ بھی نہیں ہے۔“

”اوہ! تم میں غور سے دیکھنے کی عادت نہ جانے کب پیدا ہو گی۔“ پاﺅڈر کے ان ذروں کو غور سے دیکھو۔ کیوں کیا نظر آئے؟“

”لیکن پاﺅڈر۔ بھلا اس سے کیا بات ثابت ہوتی ہے۔“ اکرام نے حیران ہو کر پوچھا۔

”تم نہیں جانتے۔“ انسپکٹر جمشید پہلی مرتبہ مسکرائے۔ فاروق کی ایک عادت ہے۔ اپنے رومال میں تھوڑا سا پاﺅڈر ضرور چھڑک کر رکھتا ہے۔ اس نے ضرور کسی بہانے سے رومال جیب سے نکالا ہو گا اور رومال یہاں جھٹک دیا ہو گا۔ اس سے کم از کم یہ بات ثابت ہوتی ہے کہ یہاں سے وہ کسی کار یا جیپ میں سوار ہو کر لے جائے گئے ہیں۔“

”لیکن اس سے یہ معلوم نہیں ہو سکتا کہ کار کس طرف گئی ہے۔“ اکرام نے کہا۔

”فاروق اپنے حصے کا کام کر چکا تھا۔ محمود اور فرزانہ اس کی چال سمجھ گئے تھے۔ اگلا قدم ان دونوں نے اٹھایا۔“ انسپکٹر جمشید سڑک کو بہ غور دیکھتے ہوئے بولے۔

”کیا مطلب؟“ اکرام بڑے زور سے چونکا۔

”مطلب یہ کہ اس کے بعد محمود نے چلتے چلتے اچانک ٹھوکر کھائی ا ور فرزانہ اسے سنبھالنے کے لیے آگے بڑھی اور اب میں یقین سے کہہ سکتا ہوں کہ وہ لوگ اس طرف گئے ہیں۔“ انہوں نے ایک سمت میں کرتے ہوئے کہا۔

”لیکن یہ کس بات سے ثابت ہو رہا ہے۔“ اکرام نے حیران ہو کر کہا۔

”لڑکھڑانے کے نشانات جو پاﺅڈر کے ذرّات کی وجہ سے صاف دکھائی دے رہے ہیں۔ آﺅ اب دیر نہ کرو، میں انہیں اچھی طرح جانتا ہوں۔“

یہ کہہ کر وہ موٹرسائیکل پر سوار ہو گئے۔ اکرام پھر ان کے پیچھے بیٹھ گیا۔ ایک بار پھر موٹرسائیکل طوفانی رفتار سے جا رہی تھی۔ اس کا رُخ اب جس سڑک کی طرف تھا، وہ آگے جا کر دو طرف مُڑ جاتی تھی، لیکن انسپکٹر جمشید رُکے بغیر ایک سڑک پر مُڑ گئے۔ ٹھیک پندرہ منٹ بعد وہ ساحل سمندر پر پہنچ چکے تھے۔

ساحل پر بہت سی موٹربوٹیں اور آبدوزیں کھڑی تھیں۔ لوگ انہیں کرائے پر لے کر سیر کرتے تھے۔ دونوں اترے اور ایک موٹربوٹ کی طرف بڑھے اس کا مالک لپک کر ان کی طرف آیا۔ یہ ایک بوڑھا آدمی تھا۔

”موٹربوٹ چاہیے جناب؟“ اس نے کہا۔

”ہاں! چاہیے تو، لیکن پہلے یہ بتاﺅ، ابھی ابھی چند منٹ پہلے ایک کار میں تین بچے اور خوفناک سی صورت والا آدمی یہاں آئے تھے۔ وہ موٹربوٹ میں بیٹھ کر کس طرف گئے ہیں؟“

”ایک خوف ناک آدمی اور تین بچے….“ اس نے پیشانی پر انگلی رکھ کر کہا۔

”ہاں! بچوں میں ایک لڑکی اور دو لڑکے تھے۔“

”جی نہیں! میں بہت دیر سے یہاں موجود ہوں۔ ایسی کوئی کار یہاں نہیں آئی۔“ اس نے انکار میں سرہلاتے ہوئے کہا۔

”اچھا، تمہارے خیال میں کوئی اور ایسا ساحل ہے، جہاں سے موٹربوٹیں چلتی ہوں۔“

”صرف یہیں سے چلتی ہیں۔“ اس نے جواب دیا۔

”اگر کوئی جرائم پیشہ آدمی کسی کو سمندر کے راستے اغوا کرنا چاہے تو وہ کہاں سے لے کر جائے گا۔ بڑے میاں اس سوال کا جواب خوب سوچ کر دو۔ میں تمہاری موٹربوٹ کرائے پر بھی لوں گا اور کرایہ بھی منہ مانگا دوں گا۔“

”اس کی ضرورت نہیں، دوسروں کی مدد کرنا میری عادت ہے۔ اگر آپ بوٹ کرائے پر لیں گے تو میں وہی کرایہ لوں گا جو بنے گا۔ نہ لیں گے تب بھی وہ باتیںآپ کو ضرور بتاﺅں گا جو مجھے معلوم ہیں۔ یہاں سے چند میل دُور ایک چھوٹاسا غیرآباد ساحل ہے۔ دو ایک بار میں نے وہاں ایک بڑی سی نئی قسم کی موٹربوٹ کھڑی دیکھی ہے۔“

”اوہ۔“ انسپکٹر جمشید پر جوش انداز میں بولے:

”تو پھر بڑے میاں، اس طرف لے چلو، لیکن ٹھہرو پہلے میں موٹرسائیکل ایک طرف کھڑی کر دوں۔“

موٹرسائیکل سٹینڈ پر رکھ کر وہ موٹربوٹ میں سوار ہو گئے۔

”اب جس قدر تیز چل سکتے ہو چلو۔“ انسپکٹر جمشید بولے۔

”اس ساحل کی طرف؟“ اس نے پوچھا۔

”ہاں ۔“

بوڑھے نے موٹربوٹ گھمائی اور پوری رفتار پر چھوڑ دی۔ وہ کافی ماہر معلوم ہوتا تھا۔ پانی کے شور سے کان پڑی آواز سنائی نہ دیتی تھی۔ اس لیے انہیں اونچی آواز میں بات کرنا پڑ رہی تھی۔

”چکر کیا ہے؟“ بوڑھے نے کچھ دیر بعد پوچھا۔

کچھ غیر ملکی تین بچوں کو اغوا کر لے گئے ہیں۔“

”اوہ! یہ تو بہت بھیانک جرم ہے۔“ اس نے کانپ کر کہا۔

”ہاں۔ اور تم اس معاملے میں ہماری مدد کر رہے ہو۔ یہ بہت بڑی نیکی اور ملک اور قوم کی خدمت ہے۔“ انسپکٹر جمشید نے اس کی تعریف کی۔

”شکریہ جناب، یہ تو میرا فرض ہے۔“

تقریباً پانچ منٹ بعد وہ اس ساحل پر پہنچ گئے لیکن یہاں دُور دُور تک کوئی نہ تھا۔

”کنارے پر روک لو۔ ہم ذرا اُتر کر جائز ہ لیں گے۔“

”اچھا!“

انسپکٹر جمشید اور اکرام موٹربوٹ سے کود کر اُترے اور ریت پر چلتے ہوئے خشکی کی طرف بڑھنے لگے۔ کچھ دُور چل کر انہیں ایک نیلی کار نظر آئی۔ وہ تیزی سے اس کی طرف بڑھے۔

”وہ اسی کار پر لائے گئے ہیں۔“ انسپکٹر جمشید نے پُرجوش انداز میں کہا۔

”کار میں سے مخصوص خوشبو آرہی ہے۔ یہ محمود استعمال کرتا ہے۔“ وہ مسکرائے۔ پھر واپس مڑ کر ریت پر نظریں دوڑانے لگے۔ اچانک وہ چلائے۔

”ارے، وہ چپل اٹھانا۔

چپل انہیں بوڑھے کے قریب نظر آیا تھا جو ان سے کچھ فاصلے پر کھڑا تھا۔ اس نے چپل اٹھا لیا اور ان کی طرف بڑھا۔ چپل کو نزدیک سے دیکھتے ہی انسپکٹر جمشید کانپتی ہوئی آواز میں بولے:

”یہ چپل فاروق کا ہے۔“

”کیا آپ کو یقین ہے۔“ اکرام کے منہ سے نکلا۔

”بالکل مجھے سو فیصد یقین ہے۔“ انہوں نے کہا اور بوڑھے کی طرف مُڑے۔

”کیا یہاں آس پاس کوئی جزیرہ موجود ہے؟“

”جزیرہ۔ جزیرے تو کئی ہیں۔“

”تو پھر چلو۔ وہ لوگ ضرور بچوں کو کسی جزیرے پر لے گئے ہیں۔“

”آئیے میں آپ کو نزدیک ترین جزیرے پر لے چلوں۔“ بوڑھا بولا۔

وہ ایک بار پھر موٹربوٹ میں بیٹھ کر روانہ ہو گئے۔

٭….٭….٭

دروازہ کھولنے کی انہوں نے لاکھ کوشش کی، لیکن کامیابی نہ ہوئی۔ ان کے پاس چابیوں کا گچھا تو تھا نہیں کہ اس کو آزماتے، نہ ہی کوئی کیل وغیرہ تھی۔ آخر وہ تھک ہار کر بیٹھ گئے۔

”جو ہو گا دیکھا جائے گا۔“ محمود نے ہانپتے ہوئے کہا۔

”اور کیا۔ دروازہ کھول کر بھی ہم کیا کر لیں گے؟ کیا سمندر میں تیر کر کنارے تک پہنچیں گے۔“ فاروق نے جھلا کر کہا۔

”چلو ٹھیک ہے۔ آرام کرو۔“

تینوں کرسیوں پر بیٹھ گئے۔ جلد ہی ان کے کمرے کا دروازہ کھلا اور جیرال کی شکل دکھائی دی۔

”باہر آجاﺅ۔ اندر بیٹھے بیٹھے اُکتا گئے ہو گے۔“

”بہت خیال ہے تمہیں ہمارا؟“ فاروق نے جل کر کہا۔

”اگر خیال نہ ہوتا، تو صحیح سلامت یہاں تک نہ آسکتے۔“

”اب کیا ارادہ ہے؟“ محمود نے پوچھا۔

”یہاں ایک بہت پُرفضا جزیرہ ہے، ذرا تمہیں اس کی سیر کرائیں گے، پھر آگے چلیں گے۔“ جیرال نے وحشیوں کی طرح ہنس کر کہا۔

”اچھی بات ہے۔“ انہوں نے کہا اور باہر نکل آئے۔ یہاں جارج تنہا کھڑا تھا۔

”چلو! نیچے اترو۔“ اس نے غرا کر کہا۔

جزیرہ واقعی پرفضا تھا۔ درخت بہت لمبے لمبے، گھنے اور سرسبز تھے۔ کئی درختوں پر انہوں نے پھل لدے دیکھے۔ ان میں بعض پھل ایسے بھی تھے جو انہوں نے آج تک نہیں دیکھے تھے۔

”اس جزیرے پر اس وقت ہماری حکومت ہے۔“ جیرال نے ہنس کر کہا۔

”اچھا۔ پھر کیا ارادہ ہے؟“

”وقت آگیا ہے کہ تمہیں سب کچھ بتا دیا جائے۔ بس چند منٹ ٹھہرو۔“

جزیرے کی زمین ریتلی تھی۔ کہیں کہیں گھاس بھی اُگی ہوئی تھی۔ جزیرے کے بیچوں بیچ پہنچ کر وہ ٹھٹک کر رُک گئے۔ یہاں تین غیرملکی آرام کرسیوں پر بیٹھے سگار پی رہے تھے۔ ان کے سامنے میز پر گلاس اور مشروب کی بوتل رکھی تھی۔ وہ بھی انہیں دیکھ کر سیدھے ہو گئے۔

”بہت خوب جیرال۔ تو تم انہیں لے ہی آئے۔“ ان میں سے ایک نے خوش ہو کر کہا۔

”انہیں لانا بھی کوئی مشکل کام تھا ماسٹر۔“ جیرال نے مسکرا کر جواب دیا۔

”مزہ تو تب ہے، جب ان کا باپ بھی ان کے پیچھے بھاگا چلا آئے۔“ اسی آدمی نے کہا جسے جیرال نے ماسٹر کہہ کر مخاطب کیا تھا۔

”وہ بھی آئے گا ماسٹر۔ وہ بہت چالاک ہے، لیکن ہمارے جال سے بچ نہیں سکتا۔ اپنے تین بچوں کے لیے اسے آنا ہی پڑے گا اور اگر نہیں آئے گا تب بھی جیت ہماری ہی ہو گی۔ کیا بچوں کا گم ہو جانا اُسے زندہ درگور نہیں کر دے گا۔ پھر کس کام کا رہ جائے گا۔ ان بچوں کو بھی خوب چکر دے کر یہاں تک لایا ہوں۔ میں نے انہیں احساس دلا دیا تھا کہ یہ ایک دوست کے ساتھ سفر کر رہے ہیں۔“

”بہت خوب جیرال! تمہارا جواب نہیں۔ بڑی بڑی حکومتیں تم سے یونہی تو کام نہیں لیتیں، لیکن سوال یہ ہے کہ آخر انسپکٹر جمشید کس طرح یہاں پہنچے گا۔ ظاہر ہے کہ تم نے انہیں راستے میں کوئی آثار چھوڑنے نہیں دیے ہوں گے۔“

”میں نے دہری چال چلی ہے۔ ایک طرف تو انہیں کوئی نشانی کسی جگہ پر گرانے کی اجازت نہیں دی، دوسری طرف میں ان کے گھر کی دیوار پر چاک سے جیرال لکھ آیا ہوں۔“

محمود، فاروق اور فرزانہ یہ گفتگو سن سن کر حیران ہو رہے تھے۔ اب ان کی سمجھ میں یہ بات آگئی تھی کہ دراصل ان لوگوں نے ان کے والد پر قابو پانے کا ایک خوف ناک منصوبہ بنایا تھا۔ اس منصوبے کو بنانے والا جیرال تھا۔ سب کچھ اس کی ہدایت کے مطابق ہو رہا تھا۔ اگرچہ اغوا کرانے والے اور تھے۔ نہ جانے ماسٹر اور اس کے ساتھی کس ملک سے تعلق رکھتے تھے اور انہیں انسپکٹر جمشید سے کیا دشمنی تھی؟ انہوں نے چاروں طرف دیکھا، ان پانچ دشمنوں کے سوا انہیں دُور دُور کوئی نظر نہ آیا۔ یہ جزیرہ غیرآباد تھا۔ یوں بھی شہر سے بہت دُور تھا۔ کوئی سیروتفریح کرنے والا گروپ بھی اِدھر مشکل سے ہی آتا ہو گا۔

اس سے پہلے وہ یہ دعا کرتے رہے تھے کہ ان کے والد انہیں تلاش کرنے میں کامیاب ہو جائیں، لیکن اب وہ یہ دُعا کر رہے تھے، یا اللہ ہمارے والد ہم تک نہ پہنچیں۔

٭….٭….٭

جزیرے میں

نزدیک ترین جزیرے میں انہیں لوگوں کے چند گروہ پکنک مناتے نظر آئے۔ وہ جان گئے کہ کم از کم محمود فاروق اور فرزانہ کو اس جزیرے پر نہیں لایا گیا۔ بوڑھا بھی ان کے ساتھ تھا۔ اس نے کہا۔

”کوئی بات نہیں۔ یہاں اور بھی بہت سے جزیرے ہیں۔ آئیے ہم ان پر بھی ایک نظر ڈال لیں۔“

جزیروں کی تلاش میں انہیں ایک گھنٹہ لگ گیا، لیکن کوئی فائدہ نہ ہوا۔ آخر انسپکٹر جمشید بولے۔

”بڑے میاں! کیا تم کسی ایسے جزیرے سے واقف نہیں جو یہاں سے بہت فاصلے پر ہو اور غیرآباد بھی ہو۔“

یہ سن کر بوڑھا سوچ میں ڈوب گیا۔ پھر بولا۔

”جی ہاں! ایک جزیرہ ایسا ہے تو سہی، لیکن وہ بہت دُور ہے۔

”کیا وہاں تک لوگ سیر کرنے جاتے ہیں۔“

”جی نہیں۔“ اس نے کہا۔

”تو پھر وہیں چلو۔“ انسپکٹر جمشید بولے۔

”اچھا صاحب۔“

ایک بار پھر وہ موٹربوٹ میں روانہ ہوئے۔ انسپکٹر جمشید کی پریشانی میں اضافہ ہوتا جا رہا تھا۔ وہ سوچ رہے تھے کہ اگر اس غیرآباد جزیرے پر بھی بچے نہ ملے، تو وہ کیا کریں گے، کہاں جائیں گے۔ اکرام بھی خاموش تھا۔ بھاگ دوڑنے یوں بھی انہیں بُری طرح تھکا دیا تھا۔ آخر آدھ گھنٹے تک تیز رفتاری سے سفر کرنے کے بعد وہ جزیرہ انہیں دکھائی دینے لگا۔ انسپکٹر جمشید نے دُور سے دیکھا، ایک بڑی سی موٹربوٹ اس کے کنارے کھڑی تھی۔

”کیا یہ وہی موٹربوٹ ہے جو تم نے اس غیرآباد ساحل پر کئی بار کھڑی دیکھی ہے؟“ انسپکٹر جمشید نے پُرجوش لہجے میں کہا۔

”جی ہاں! وہی لگتی ہے۔“

”ٹھیک ہے، ہم اس جزیرے پر اتریں گے۔“ وہ بولے۔

بوڑھے نے موٹربوٹ کنارے کے ساتھ لگاتے ہوئے روک لی۔

”کیا میں بھی آپ کے ساتھ آﺅں؟“ اس نے پوچھا۔

”نہیں بڑے میاں، ہماری وجہ سے تم پر کوئی مصیبت کیوں آئے، تم یہیں ٹھہر کر ہمارا انتظار کرو۔ اگر ہم دو گھنٹے تک واپس نہ آئیں تو تم پولیس کو اطلاع دے دینا اور یہ اپنا کرایہ بھی رکھ لو۔“ یہ کہہ کر انسپکٹر جمشید نے جیب سے سو سو روپے کے دو نوٹ نکال کر اس کی طرف بڑھائے۔

”ابھی رہنے دیں، ابھی تو آپ کو واپس بھی چلنا ہے۔ بعد میں لے لیں گے۔ آپ فکر نہ کریں، میں یہاں پورے دو گھنٹے تک انتظار کروں گا۔ اگر آپ کی واپسی نہ ہوئی تو پولیس کو خبر کر دوں گا۔“

”تمہارا بہت بہت شکریہ بڑے میاں، تم بہت اچھے آدمی ہو۔“

انہوں نے بیٹھی ہوئی آواز میں کہا اور موٹربوٹ سے جزیرے پر اُتر گئے۔ اکرام ان کے پیچھے تھا۔

وہ جزیرے کے درمیانی حصے کی طرف بڑھتے چلے گئے۔ پھر انسپکٹر جمشید دبی آواز میں بولے:

”اکرام! وہ بچوں کو اسی جزیرے پر لائے ہیں۔ اگرچہ زمین ریتلی ہے، لیکن کہیں کہیں ان کے قدموں کے نشان موجود ہیں۔ محمود اور فرزانہ کے پیروں میں چپل موجود ہیں جب کہ فاروق ننگے پاﺅں ہے۔ اس نے تو اپنے چپل ہمیں راستہ دکھانے کے لیے ساحل کی ریت پر ہی چھوڑ دیے تھے۔“

”آپ ٹھیک کہتے ہیں۔ پیروں کے نشانات کہیں کہیں مجھے بھی دکھائی دیے ہیں۔“

”اور یہ بھی بتا دوں۔ انہیں یہاں تک صرف دو آدمی لے کر آئے ہیں۔“

ان میں سے ایک یقینا جیرال ہے، دوسرا کوئی اور ہو گا۔“ انہوں نے آگے بڑھتے اور زمین کو غور سے دیکھتے ہوئے کہا۔

”اب ہم کیا کریں۔ کیا اپنے پستول نکال لیں؟“ اکرام نے پوچھا۔

”اس کی ضرورت نہیں۔ انہوں نے پورا انتظام کر رکھا ہو گا۔ تم جیرال کو کیا سمجھتے ہو۔ وہ بہترین منصوبے بنانے کا بہت بڑا ماہر ہے۔ یہی وجہ ہے کہ بڑی بڑی حکومتیں اس سے کام لیتی ہیں اور….“

انسپکٹر جمشید کچھ کہتے کہتے رک گئے۔ وہ عجیب سے انداز میں مسکرائے تھے۔

”اور کیا؟“ اکرام نے پوچھا۔

”اور یہ کہ میرا خیال ہے، ہم جال میں پھنس گئے ہیں۔“

انہوں نے بدستور مسکراتے ہوئے کہا۔

”جی کیا مطلب؟“ اکرام بُری طرح چونکا۔

”ہاں اکرام! دشمن کی چال میری سمجھ میں چند لمحے پہلے آئی ہے۔ انہوں نے بچوں کو جیرال کے ذریعے اغوا کرنے کا پروگرام صرف اس لیے بنایا ہے کہ میں ان کو تلاش کرتا ہوا ان تک پہنچ جاﺅں گا۔ جیرال کے نام کے ساتھ ہی سمندر ذہن میں آتا ہے کیوں کہ عام طور پر یہ سمندروں میں سفر کرتا ہے۔ انہوں نے سوچا تھا کہ میں سمندر کی طرف بھاگا آﺅں گا اور پھر کوئی موٹربوٹ والا مجھے اس جزیرے تک پہنچا دے گا۔“

”اوہ۔“ اکرام کی آنکھیں خوف سے پھیل گئیں۔

”یہ بھی ہو سکتا ہے کہ ساری سکیم جیرال کی ہو اور اس سے کام لینے والے صرف تماشائی کی حیثیت سے موجود ہوں۔“

”کیا یہ جزیرہ ہماری حکومت میں شامل نہیں۔“ اکرام نے پوچھا۔

”ضرور شامل ہے، لیکن غیرآباد ہے۔ ہم یہاں مدد کے لیے کسی کو کیسے بلا سکتے ہیں؟“ انہوں نے بتایا۔

”تو کیا ہم پھنس چکے ہیں۔“

”شاید۔ یہ تو آگے چل کر ہی معلوم ہو گا۔“

پھر وہ جزیرے کے بیچوں بیچ پہنچ گئے۔ یہاں کچھ درختوں کے نیچے ایک کرسی کے گرد پانچ کرسیاں پڑی تھیں، لیکن ان کے پاس کوئی نہ تھا۔ انہوں نے چاروں طرف نظریں دوڑائیں۔ پھر منہ پر ہاتھ رکھ کر بلند آواز میں چلائے۔

”محمود! تم کہاں ہو؟“

انہیں اپنی آواز کی گونج سنائی دی، مگر بچوں کی طرف سے کوئی جواب نہ ملا۔ دوبارہ انہوں نے اپنے حلق سے پھر آواز نکالی، لیکن کسی طرف سے کوئی جواب نہ آیا۔

”ہو سکتا ہے، وہ یہاں نہ لائے گئے ہوں۔“ اکرام نے مایوس ہو کر کہا۔

”نہیں میرا دل کہہ رہا ہے کہ وہ یہیں کہیں موجود ہیں۔ دشمنوں نے انہیں حلق سے آواز نہ نکالنے کی ہدایت کر رکھی ہو گی۔“ انہوں نے کہا۔ پھر اچانک وہ چونک اُٹھے۔ ایک آواز ان سے مخاطب تھی۔

”خوش آمدید انسپکٹر، ہمیں تمہارا ہی انتظار تھا۔“

٭….٭….٭

بیگم جمشید کے اوسان بحال ہوئے تو وہ اٹھ کر آہستہ آہستہ چلتی ہوئی بیگم شیرازی کے گھر پہنچیں۔ انہیں سارے واقعات تفصیل سے بتائے تو وہ دھک سے رہ گئیں۔ پھر بیگم جمشید نے خان عبدالرحمن اور پروفیسر داﺅد کو فون کیے۔

تھوڑی دیر بعد ان کے گھر میں بیگم شیرازی کے علاوہ پروفیسر داﺅد شائستہ سمیت اور خان رحمان اپنے تینوں بچوں حامد، سرور، ناز اور بیگم شہناز کے ساتھ موجود تھے۔

”میں ڈی آئی جی صاحب کو فون پر حالات بتا آیا ہوں۔ انہوں نے تالش کا سلسلہ شروع کروا دیا ہو گا۔“ خان رحمان نے انہیں بتایا۔

”اور میں نے تمام بڑے بڑے افسروں کو اطلاع دی ہے۔ امید ہے کہ بڑے پیمانے پر انہیں تلاش کیا جا رہا ہو گا۔“ پروفیسر بولے۔

”آپ کا بہت بہت شکریہ۔“ بیگم جمشید بجھی بجھی مسکراہٹ چہرے پر لاتے ہوئے بولیں۔

”بھابھی فکر نہ کریں۔ کوئی ان تک پہنچے نہ پہنچے، جمشید ضرور پہنچے گا۔ اور انشا اللہ وہ انہیں لے کر آتا ہی ہو گا۔“ خان رحمان نے کہا۔

”بالکل، مجرم تو اس کے سائے سے بھی بھاگتے ہیں۔ نہ جانے انہیں یہ جرا¿ت کس طرح ہوئی۔“ پروفیسر بولے۔

”مجھے وہ آدمی بہت خطرناک دکھائی دے رہا تھا۔“ بیگم جمشید نے بتایا۔

”کوئی بات نہیں اللہ سے دعا کریں۔“

پھر وہ سب ان کا دھیان بٹانے کے لیے اِدھر اُدھر کی باتیں کرنے لگے۔

وقت بہت آہستہ آہستہ گزر رہا تھا اور جوں جوں گزر رہا تھا، ان کی پریشانی میں اضافہ ہوتا جا رہا تھا۔ اچانک دروازے کی گھنٹی بجی۔

”یا اللہ خیر۔“ خان رحمان کے منہ سے نکلا۔ ساتھ ہی وہ دروازہ کھولنے کے لیے اٹھ کھڑے ہوئے۔ دروازے پر انہیں ایک سب انسپکٹر نظر آیا۔

”مجھے خان صاحب نے بھیجا ہے۔“ اس نے بتایا۔

”ڈی آئی جی صاحب نے؟“ انہوں نے پوچھا۔

”جی ہاں! سارے شہر میں بچوں کی تلاش شروع ہو چکی ہے۔ تمام جرائم پیشہ لوگوں کو چیک کیا جا رہا ہے۔ مجرموں کے اڈوں پر چھاپے مارے جا رہے ہیں، لیکن ابھی تک کچھ پتا نہیں چل سکا۔ تلاش بدستور جاری ہے۔“

”انسپکٹر جمشید اور اکرام بھی کہیں نہیں ملے؟“

”جی نہیں۔“

”تب پھر وہ ضرور اغوا کرنے والوں کے پیچھے لگے ہوں گے۔“ خان عبدالرحمن نے خیال ظاہر کیا۔

”ہو سکتا ہے۔“ اس نے کہا۔ پھر وہ اجازت لے کر چلا گیا۔ خان عبدالرحمن نے اندر آکر ساری بات بتائی اور ایک بار پھر وہ سوچ میں ڈوب گئے۔

٭….٭….٭

جیرال سے سامنا

انسپکٹر جمشید درختوں کے جھنڈ میں سے آتی ہوئی اس آواز کو سن کر نہ چونکے نہ گھبرائے بلکہ دبے لفظوں میں اکرام سے بولے۔

”میرا خیال ہے، یہ جیرال ہے۔ اسے دیکھنے کے لیے تیار ہو جاﺅ۔“

جیرال جھنڈ میں سے نکل کر ان کے سامنے آگیا اور قدم اٹھاتا ہوا ان کے بالکل نزدیک پہنچ گیا۔ ایک بین الاقوامی مجرم کو وہ پہلی مرتبہ دیکھ رہے تھے اور وہ بھی اس قدر نزدیک سے۔ چند لمحوں تک انسپکٹر جمشید اور جیرال ایک دوسرے کی آنکھوں میں آنکھیں ڈال کر دیکھتے رہے۔ دونوں طرف سے کسی نے بھی پلک تک نہ جھپکی۔ آخر جیرال ہی بولا:

”ہیلو انسپکٹر، مجھے تم سے ملنے کی بہت آرزو تھی۔“

”تو کیا۔ تم نے یہ سب مجھ سے ملاقات کرنے کی خاطر کیا ہے؟“ انسپکٹر جمشید مسکرائے۔

”یہ تو نہیں کہا جا سکتا۔ ایک حکومت نے میری خدمات حاصل کیں اور میں تیار ہو گیا۔ منصوبہ تمہارے متعلق تھا، اس لیے میں بہت خوش ہوا کہ چلو اسی بہانے تم سے ¾ملاقات بھی ہو جائے گی۔“

”بہت خوب، تمہیں زندہ جیرال کہا جاتا ہے اور آج میں بھی کہتا ہوں کہ تمہیں یہ نام غلط نہیں دیا گیا۔“ انسپکٹر جمشید نے اس کی دلیری کی تعریف کی۔

”شکریہ انسپکٹر، میں تمہارے بارے میں بہت کچھ جانتا ہوں، اس لیے ایک عرصے سے میری یہ خواہش بھی تھی کہ کبھی ہم دونوں میں مقابلہ ہو۔ قدرت نے آج ایک ہی وقت میں میری دو خواہشیں پوری کر دیں۔ تم سے ملاقات بھی ہو گئی اور آج مقابلہ بھی ہو گا۔“

”ضرور، لیکن میرے بچوں کا کیا قصور ہے؟“ انسپکٹر جمشید نے مسکرا کر کہا۔

”انہیں چارے کے طور پر استعمال کیا گیا ہے۔ میں جانتا تھا تم کسی نہ کسی طرح انہیں تلاش کرتے ہوئے یہاں تک پہنچ جاﺅ گے۔“

”تو منصوبہ تمہارا ہی بنایا ہوا تھا؟“

”ہاں۔“ اس کے منہ سے نکلا۔

”بچے ہیں کہاں؟“ انہوں نے پوچھا۔

”فکر نہ کرو۔ وہ خیریت سے ہیں۔ سچ بات تو یہ ہے انسپکٹر جمشید، کہ تمہارے بچوں سے مل کر بھی بہت خوش ہوا ہوں۔ انہوں نے میری ہدایات پر بھی پوری طرح عمل کیا ہے۔ بس ایک بار فاروق نے چھینک مار کر رومال گرانے کی کوشش کی تھی۔ لیکن میرے مقابلے میں اس کی یہ چال ناکام ہو گئی۔“

”یہاں تم غلطی پر ہو۔“ انسپکٹر جمشید مسکرائے۔

”کیا مطلب؟“

”ان تینوں نے ہی مجھے یہ اشارہ دینے کی کوشش کی تھی کہ ہمیں اس طرف لے جایا جا رہا ہے اور تم یہ سن کر ضرور حیران ہو گے کہ وہ سو فی صد کامیاب ہو گئے تھے۔“

”یہ غلط ہے۔ میں نے پوری طرح خیال رکھا تھا، کیوں کہ میں اپنا نام تمہارے مکان کی دیوار پر لکھ آیا تھا۔ اس کے بعد اگر تمہیں محمود وغیرہ کی طرف سے چھوڑی ہوئی کوئی نشانی نظر آجاتی تو تم فوراً سمجھ جاتے کہ جال بچھایا گیا ہے، اس صورت میں تم پوری طاقت ساتھ لے کر آتے۔“

”تم غلط فہمی میں مبتلا ہو۔ دراصل فاروق نے رومال گرانے کے متعلق تو سوچا ہی نہیں تھا۔ وہ ہمیشہ رومال پر پاﺅڈر چھڑک کر رکھتا ہے۔ اس نے رومال جھٹک کر پاﺅڈر کے ذرات سڑک پر گرائے تھے۔ پھر محمود نے ٹھوکر کھائی تھی، فرزانہ نے اسے سنبھالا تھا اور اس طرح انہوں نے اپنے قدموں کے نشانات سے سمت کا اشارہ مجھے دیا تھا۔

”اوہ۔“ جیرال کی آنکھیں پھٹی کی پھٹی رہ گئیں۔

”پھر غیرآباد ساحل پر فاروق نے اپنی چپل بھی تو چھوڑی تھی۔“

اس کے بارے میں تو مجھے معلوم ہو گیا تھا، لیکن میں نے کوئی توجہ نہیں دی کیوں کہ میں جانتا تھا، تم آباد ساحل کی طرف سے جزیروں کی تلاش میں نکلو گے۔“

”خیر یہ تو ہوا۔ اب تم بتاﺅ بچے کہاں ہیں؟“

اکرام یہ سوچ سوچ کر حیران ہو رہا تھا کہ آخر انسپکٹر جمشید جیرال سے دوستانہ فضا میں کیوں گفتگو کر رہے ہیں۔ آگے بڑھ کر اسے گرفتار کیوں نہیں کر لیتے۔ اس وقت جیرال کی نظر اکرام پر پڑ گئی۔

”انسپکٹر، یہ شاید تمہارا اسسٹنٹ ہے۔“

”ہاں! یہ اکرام ہے۔“

”میں بتاﺅں۔ یہ سوچ رہا ہے کہ تم مجھے گرفتار کیوں نہیں کر لیتے۔“ اس نے مسکرا کر کہا اور اکرام حیرت زدہ رہ گیا۔

”میں بھی یہ بات جانتا ہوں۔“ انسپکٹر جمشید نے جواب دیا۔

”تم نے اب تک بتایا نہیں کہ بچے کہاں ہیں؟“

”مسٹر جارج، بچوں کو لے آئیں۔ انسپکٹر صاحب کو انہیں دیکھے بغیر چین نہیں آئے گا۔“

درختوں کے جھنڈ میں سے نہ صرف بچے اور مسٹر جارج نکل کر باہر آگئے بلکہ ماسٹر اور اس کے دونوں ساتھی بھی ان کی طرف بڑھنے لگے۔ انسپکٹر جمشید کی نظر جونہی ماسٹر پر پڑی۔ وہ بڑے زور سے چونکے۔ ان کے منہ سے نکلا۔

”تم….“

”ہاں میں۔“ اس نے پراسرار انداز میں کہا۔

”اکرام، ہمارے دشمن ملک کے سب سے بڑا سراغ رساں سے ملو۔ یہ اپنے ملک میں ماسٹر کے نام سے مشہور ہیں۔“

”اوہ۔“ اکرام کے منہ سے نکلا۔ اس نے ماسٹر کے بہت چرچے سنے تھے۔

”مجھے حیرت ہے، تم نے بندوق جیرال کے کندھے پر رکھ کر کیوں چلائی۔ کیا تم خود یہ کام نہیں کر سکتے تھے؟“

”جیرال آج کل مستقل طور پر ہمارے ملک کے لیے کام کر رہا ہے۔ ہم دونوں دوست بن چکے ہیں۔ میں نے اس کے سامنے یہ مسئلہ رکھا تھا کہ انسپکٹر جمشید کی وجہ سے ہمارے بہت سے جاسوس پکڑے جا چکے ہیں۔ کوئی ایسا منصوبہ بناﺅ کہ تم ہمارے قبضے میں آجاﺅ۔ سو اس نے صرف تین منٹ میں منصوبہ بنا ڈالا۔

”بہت خوب، تو یہ بات ہے۔ اچھا، اب تم لوگوں کا کیا پروگرام ہے؟“ انسپکٹر جمشید نے ایسے لہجے میں پوچھا جیسے وہ سب یہاں پکنک منانے آئے ہوں۔

”یہ تمہیں جیرال بتائے گا، کیوں کہ منصوبہ اس نے بنایا ہے۔ میں تو صرف بطورِ نگران آیا ہوں۔“

”چلو جیرال تم بتاﺅ؟“

”پہلے اپنے بچوں کی خیریت تو دریافت کر لو۔ دیکھ لو ہم نے انہیں کوئی نقصان نہیں پہنچایا۔“

”تم جیسے بڑے مجرم ایسی گری ہوئی حرکت کر بھی نہیں سکتے۔ میں جانتا ہوں۔ تم پروگرام بتاﺅ؟“

”پروگرام یہ ہے کہ ہم نہیں چاہتے، تم یہاں سے واپس جاﺅ۔ البتہ تمہارے بچے اور تمہارا اسسٹنٹ جا سکتے ہیں۔“

”تفصیل سے بتاﺅ۔“ انسپکٹر جمشید نے بے خوف ہو کر کہا۔

”تم پوری طرح گھر چکے ہو۔ اپنے چاروں طرف کے درختوں پر نظر ڈال لو۔ تمہیں چار درختوں پر ایک ایک آدمی بیٹھا نظر آئے گا۔ ان کے ہاتھوں میں مشین گنیں ہیں جو آن کی آن میں تمہیں بھون سکتی ہیں، لیکن ہم نے آج تک بزدلوں جیسے کام نہیں کیے۔ اس لیے تمہیں پورا پورا موقع دیا جائے گا۔“

یہ کہہ کر وہ خاموش ہو گیا۔ اس کی باتیں محمود، فاروق اور فرزانہ کے جسموں میں سنسنی دوڑائے جا رہی تھیں۔

”تم نے بات پھر درمیان میں چھوڑ دی۔“ انسپکٹر جمشید چاروں طرف ایک نظر ڈال کر بولے۔

”تمہیں مجھ سے مقابلہ کرنا ہو گا۔ اگر تم نے مجھے شکست دے دی تو تمہیں یہاں سے زندہ جانے دیا جائے گا، ورنہ یہ لوگ تمہاری لاش کو لے جا سکتے ہیں۔ ہمیں کوئی اعتراض نہیں ہو گا۔“

”بہت خوب، لیکن میری بھی ایک شرط ہے۔“ انسپکٹر جمشید مسکرائے۔

”ہاں ہاں! ضرور۔“ جیرال نے کہا۔

”میرے اسسٹنٹ اور بچوں کو میرے سامنے یہاں سے جانے دیا جائے۔“

”لیکن یہ کیسے ہو سکتا ہے۔ یہ لوگ جا کر مدد لے آئیں گے۔“ جیرال نے انکار میں سرہلاتے ہوئے کہا۔

”ہرگز نہیں، یہ یہاں آج شام سے پہلے واپس نہیں آئیں گے۔ میں انہیں سختی سے اس کی ہدایت کر دیتا ہوں۔“

”لیکن تم انہیں پہلے ہی کیوں رخصت کر دینا چاہتے ہو؟“

”تاکہ کم از کم یہ تو محفوظ رہیں۔“

”بے فکر رہو، انہیں خراش تک نہیں آئے گی۔“ جیرال نے وعدہ کیا۔

”لیکن میرا اطمینان اس صورت میں ہو سکتا ہے کہ جب یہ لوگ یہاں سے چلے جائیں۔“ انہوں نے کہا۔

”اچھی بات ہے میں انہیں جانے کی اجازت دیتا ہوں۔ میں جانتا ہوں یہ تمہاری ہدایت پر عمل کریں گے۔ تم وعدے کے پکے ہو۔“

”ٹھیک ہے، اکرام! تم بچوں کو لے کر چلے جاﺅ اور دیکھو شام سے پہلے واپس نہ آنا۔“

اکرام اور بچوں نے اپنی جگہ سے حرکت تک نہ کی۔

”ہم نہیں جائیں گے ابا جان۔“

”میں بھی نہیں جاﺅں گا۔“ اکرام نے مضبوط لہجے میں کہا۔

”انسپکٹر جمشید نے انہیں بہت سمجھایا، لیکن وہ نہ مانے۔ اگر وہ انہیں حکم دیتے تو شاید انہیں جانا ہی پڑتا، لیکن انہوں نے حکم نہیں دیا۔ آخر فیصلہ ہوا کہ وہ لڑائی کے انجام تک یہیں ٹھہریں گے۔“

”اب مقابلہ شروع ہو جانا چاہیے۔“ جیرال بولا۔

”ٹھیک ہے۔“ انہوں نے کہا۔

”آپ سب لوگ دور ہٹ جائیں بلکہ درختوں کی اوٹ لے لیں۔“ جیرال نے باقی لوگوں سے کہا۔

ان کے ہٹنے کے بعد جیرال اور انسپکٹر جمشید ایک دوسرے کے مقابل آگئے۔ باقی سب لوگوں کے دل دھک دھک کر رہے تھے۔ خاص طور پر محمود، فاروق، فرزانہ اور اکرام کا تو بہت ہی بُرا حال تھا۔ انہیں پرانے زمانے کی وہ لڑائیاں یاد آگئیں جب فوجوں کے جنگ شروع کرنے سے پہلے ایک اور ایک کا مقابلہ ہوتا تھا۔

وہ سب پلکیں جھپکائے بغیر میدان میں کھڑے دو جنگجو انسانوں کو دیکھ رہے تھے۔ دُور بہت دُور خیالوں میں انہیں ڈھول بجتا محسوس ہوا۔

٭….٭….٭

خوف ناک جنگ

”کس چیز سے مقابلہ کرنا پسند کرو گے انسپکٹر؟“ جیرال نے کہا۔

”تم ایک بہادر دشمن ہو، میں تمہاری قدر کرتا ہوں اور تم پر چھوڑتا ہوں جس ہتھیار سے بھی مقابلہ کرنا پسند کرو۔“

”تو پھر پستول ہی ٹھیک رہیں گے۔“ جیرال نے کہا۔

”مجھے منظور ہے۔“ انسپکٹر جمشید بولے۔

جیرال نے اپنی دونوں جیبوں میں ہاتھ ڈالے اور دو پستول نکالے۔ پھر ایک انسپکٹر جمشید کی طرف اچھالتے ہوئے بولا۔

”سنبھالو انسپکٹر، یہ تمہارا ہی ہے۔ گولیاں چیک کر لو۔ پھر نہ کہنا میں نے تمہیں دھوکا دیا۔“ جیرال نے کہا اور اپنے پستول کی گولیاں چیک کرنے لگا۔ انسپکٹر جمشید نے بھی گولیاں دیکھیں اور بولے:

”ٹھیک ہے۔“

پھر وہ ایک دوسرے کی طرف بڑھے۔ انہوں نے ایک دوسرے سے ہاتھ ملائے اور کمر سے کمر ملا کر مخالف سمتوں میں قدم اٹھانے لگے۔ لڑائی کے اس طریقے کو ڈوئل کہا جاتا ہے۔ پرانے زمانے میں جب دو آدمی جھگڑ پڑتے تھے تو اس طرح فیصلہ کرتے تھے کہ کسے زندہ رہنا ہے اور کسے مرنا ہے۔ کمر سے کمر ملا کر دونوں دس قدم مخالف سمتوں میں بڑھتے اور پھر تیزی سے گھومتے ہوئے اپنے مدمقابل پر فائر جھونک دیتے۔ وہ ایک ایک قدم گن رہے تھے۔ ایک ایک قدم پر دوسروں کے دل دھڑک رہے تھے۔ موت اور زندگی کا فیصلہ ہونے والا تھا۔ صرف چند سیکنڈ میں پھر جونہی دس قدم پورے ہوئے، دونوں ایک ساتھ بجلی کی تیزی سے مڑے اور ایک دوسرے پر فائر کھول دیے۔

تماشائیوں نے دیکھا، دونوں اپنی پھرتی کی وجہ سے بچ گئے تھے اور بالکل ٹھیک ٹھاک کھڑے تھے۔ انہوں نے حیران ہو کر ایک دوسرے کو دیکھا۔ شاید انہیں اپنے اپنے نشانے پر یقین تھا۔

”یہ کیا ہوا انسپکٹر؟“ جیرال نے کہا۔

”ایک ہتھیار بے کار ثابت ہو گیا تو کیا ہوا، کوئی اور ہتھیار سنبھال لو۔“ انسپکٹر جمشید بولے۔

”بہت خوب! یہ ہوئی نا بات۔ خنجروں کے متعلق کیا خیال ہے؟“

”اگر مل سکیں تو مجھے کوئی اعتراض نہیں۔“ انسپکٹر جمشید بولے۔

”ہم ہر طرح تیار ہو کر آئے ہیں۔“ جیرال ہنسا، پھر درختوں کی طرف منہ کر کے بولا۔

”مسٹر جارج، ہمیں خنجر دے دیں۔“

جارج اوٹ سے باہر نکل آیا۔ اس کے ہاتھ میں دو خنجر تھے جو دھوپ کی وجہ سے چمک رہے تھے۔ خنجروں کو دیکھ کر ان کے دلوں کی دھڑکن اور بھی تیز ہو گئی۔ جارج نے دونوں خنجر جیرال کو دے دیے۔ جیرال خنجر لے کر آگے بڑھا اور بولا:

”لو انسپکٹر، ان میں سے ایک پسند کر لو۔“

انسپکٹر جمشید نے ایک خنجر اس سے لے لیا۔ دونوں ایک دوسرے سے دو فٹ کے فاصلے پر کھڑے ہو گئے۔ پہلا وار جیرال نے کیا۔ اس کا ہاتھ ایک دم سر سے اونچا اٹھا تھا۔ پھر انسپکٹر جمشید کے چہرے کی طرف بڑھا۔ انہوں نے پھرتی سے اپنے دائیں ہاتھ پر وار روکا اور خمیدہ ہوکر الگ ہو گئے۔

”میں ایک وار کر چکا۔ اب تمہاری باری ہے۔“ اس نے کہا۔

”پہلے تم ہی وار کر لو۔“انسپکٹر جمشید نے اسے دعوت دی۔

”نہیں، یہ اصول کے خلاف ہے۔“

”اچھا تو وار سنبھالو۔“ انہوں نے ترچھا ہاتھ مارا۔ نشانہ جیرال کے پیٹ کا لیا تھا۔ جیرال اچھل کر پیچھے ہٹ گیا۔ ساتھ ہی اس نے ان کے شانے پر وار کیا۔ وہ تیزی سے مڑے اور بائیں ہاتھ سے اس کا خنجر والا ہاتھ کلائی پر سے پکڑ لیا۔ پھر خود اس کے سینے پر وار کیا۔ جیرال نے بھی ان کی کلائی تھام لی۔ اب دونوں خنجروں والے ہاتھوں پر زور صرف کرنے لگے۔ دونوں کی کوشش یہی تھی کہ ان کا خنجر دشمن کی شہ رگ میں اتر جائے لیکن خنجر تھے کہ گردنوں تک پہنچ ہی نہیں رہے تھے۔ کئی سیکنڈ تک زور آزمائی ہوتی رہی۔ آخر جیرال بولا۔

”میرا خیال ہے، ہم اس طرح کامیاب نہیں ہو سکیں گے۔“

”پھر کیا کیا جائے؟“

”کیوں نہ دست بدست لڑائی لڑ کر فیصلہ کر لیں۔“

”مجھے کوئی اعتراض نہیں۔“

دونوں نے خنجر دور پھینک دیے اور ایک دوسرے پر ٹوٹ پڑے۔ اب وہ اپنے مکّوں اور لاتوں کو استعمال کر رہے تھے۔ انسپکٹر جمشید نے ایک زبردست مکا تان کر اس کی ناک پر مارا۔ وہ نیچے جھک گیا اور مکا اس کے سر پر لگا۔ ساتھ ہی اُس نے انسپکٹر جمشید کی کمر پر ایک زبردست ہاتھ جما دیا۔ وہ بھی تیزی سے مڑے اور اس کے پیٹ میں ٹکر ماری۔ جیرال لڑکھڑا گیا۔ یہ پہلا موقع تھا کہ اس کے قدم لڑکھڑائے تھے لیکن دیکھنے والوں نے دیکھا کہ فوراً ہی وہ سنبھل گیا۔ اب پھر دونوں چٹانوں کی طرح ایک دوسرے کی طرف دیکھ رہے تھے۔

”ویسے میرے دوست، کیا یہ مقابلہ انصاف سے خالی نہیں۔“ اچانک انسپکٹر جمشید بولے۔

”کیا مطلب؟“ جیرال چونکا۔

”مطلب یہ کہ میرے اور میرے ساتھیوں کے سروں پر سٹین گنیں چمک رہی ہیں، جب کہ تم اس لحاظ سے آزاد ہو۔“

”میں نے بھی اس پر اعتراض کیا تھا، مگر میرا دوست ماسٹر نہیں مانا۔ اس نے کہا تھا کہ اس طرح تم مقابلے پر مجبور ہو جاﺅ گے۔“

”خیر کوئی بات نہیں آﺅ۔ ہو جائیں دو دو ہاتھ۔“ انسپکٹر جمشید نے بےپروائی سے کہا۔

وہ پھر ایک دوسرے پر جھپٹ پڑے۔ اس مرتبہ دونوں ایک دوسرے پر تابڑتوڑ حملے کر رہے تھے۔ لڑائی لمبی ہوتی جا رہی تھی اور دیکھنے والوں کی بے چینی میں اضافہ ہی ہوتا جا رہا تھا۔ انہیں یوں محسوس ہو رہا تھا جیسے یہ لڑائی کبھی ختم نہیں ہو گی، یہ یونہی جاری رہے گی اور وہ کھڑے کھڑے ختم ہو جائیں گے۔ اچانک جیرال کا ایک مکا انسپکٹر جمشید کے سر پر لگا۔ ان کا سر بری طرح چکرایا، وہ لڑکھڑائے۔ جیرال نے اس موقع سے فائدہ اٹھایا اور ان پر چھلانگ لگا دی۔ دوسرے ہی لمحے انسپکٹر جمشید اس کے نیچے دبے پڑے تھے۔ فوراً ہی جیرال نے دونوں ہاتھ ان کے گلے پر جمادیے۔ محمود، فاروق ، فرزانہ اور اکرام کو اپنے سانس سینوں میں اٹکتے محسوس ہوئے ان کے حلق خشک ہو گئے۔

”انسپکٹر جمشید، آخر تم پھنس ہی گئے، تمہاری موت میرے ہی ہاتھوں لکھی تھی، پھر بھی مجھے اقرار ہے کہ تم بہادر شخص ہو۔ تم نے ان حالات میں بھی جس دلیری سے مقابلہ کیا، اس کی داد دینی پڑتی ہے۔“

انسپکٹر جمشید کے منہ سے کوئی لفظ نہ نکل سکا۔ انہیں اپنا دم گھٹتا محسوس ہو رہا تھا۔ پیشانی کی رگیں تن گئی تھیں۔ وہ کچھ اس طرح اچانک گرے تھے کہ سنبھل نہیں سکے تھے۔ ورنہ جیرال انہیں اتنی آسانی سے نہیں دبوچ سکتا تھا۔

”مجھے حیرت ہے انسپکٹر، آخر تم اپنے ہاتھ پیر کیوں استعمال نہیں کر رہے ہو۔ آرام سے لیٹے ہوئے اپنا گلا کیوں گھٹوا رہے ہو؟“ جیرال نے ہنس کر کہا۔

اس کے ان الفاظ کے ساتھ ہی انسپکٹر جمشید عجیب سے انداز میں مسکرائے اور بولے:

”میں تمہیں یہ بتانا چاہتا ہوں کہ تم اس طرح گلا گھونٹ کر میرا کچھ نہیں بگاڑ سکو گے۔“

”کیا مطلب؟“ جیرال نے حیرت زدہ لہجے میں پوچھا۔

”مطلب یہ کہ میں بہت دیر تک اپنا سانس روک سکتا ہوں۔ تم کچھ دیر اور زور لگا لو۔ جب دیکھوں گا کہ تم ناکام ہو چکے ہو اور تمہارا بس نہیں چل رہا ہے تو پھر اپنے ہاتھ اور پیر استعمال کروں گا۔“

یہ سن کر جیرال ہکا بکا رہ گیا۔ شاید یہ اس کی زندگی کا سب سے زیادہ حیران کن لمحہ تھا۔ ابھی وہ حیران ہی تھا کہ اچانک اس کی گردن پر انسپکٹر جمشید کے ہاتھ کی ہڈی اس زور سے لگی کہ وہ دوسری طرف الٹ گیا۔ ان کی گردن سے اس کے ہاتھ خود بہ خود الگ ہو گئے تھے۔

فوراً ہی انسپکٹر جمشید اٹھ کھڑے ہوئے مگر جیرال نے بھی اٹھنے میں دیر نہیں لگائی تھی اور ایک بار پھر وہ ایک دوسرے کے سامنے کھڑے تھے۔

”جیرال، تم لڑائی کو طول کیوں دے رہے ہو؟ اسے جلدی سے ختم کیوں نہیں کر دیتے۔“ ماسٹر نے بُرا سا منہ بنا کر کہا۔

”تمہارا کیا خیال ہے ماسٹر، کیا میں انسپکٹر جمشید سے کھیل کھیل رہا ہوں؟ یہ کوئی معمولی آدمی نہیں ہیں۔ اگر میں بین الاقوامی جاسوس ہوں تو ان کی شہرت بھی نہ جانے کتنے ملکوں میں ہے۔ ان سے مقابلہ کرنا کوئی خالہ جی کا گھر نہیں۔ لوہے کے چنے چبانا ہے۔ میری جگہ اس وقت کوئی اور ہوتا تو کب کا شکست کھا چکا ہوتا۔“

”کیا تم انسپکٹر جمشید کے مقابلے میں ہمت ہار بیٹھے ہو؟“ ماسٹر نے پوچھا۔ اس کی آواز میں ناگواری کی جھلک تھی۔

”نہیں خیر! یہ بات تو نہیں۔ میں ان سے مقابلہ کروں گا اور انہیں شکست دوں گا۔ یہ مجھے شکست نہیں دے سکتے۔“ البتہ میں اتنا جان چکا ہوں کہ گلا گھونٹ کر میں ان کا کچھ نہیں بگاڑ سکتا۔

”اچھا خدا کے لیے اب اس مصیبت کو ختم کر دو، انسپکٹر جمشید کا جلد از جلد صفایا کرو۔ ہمیں ابھی واپس بھی جانا ہے۔“ ماسٹر نے کہا۔

”بہت بہتر۔ ابھی لو۔“ اس نے کہا اور انسپکٹر جمشید سے بولا:

”تم نے سن لیا انسپکٹر جمشید میرے ساتھی کس قدر بے چین ہیں۔ انہوں نے مجھے اس منصوبے کو تکمیل تک پہنچانے کے پچیس لاکھ روپے دیے ہیں۔ یہ بھی اپنی جگہ سچے ہیں۔ پچیس لاکھ انہوں نے کھیل دیکھنے کے تو دیے نہیں۔ اس لیے آﺅ ہم سنجیدگی سے فیصلہ کر لیں۔“

”تو کیا تم ابھی تک غیرسنجیدگی سے لڑتے رہے ہو؟“ انسپکٹر جمشید نے مذاق اڑانے والے لہجے میں کہا۔

”اور نہیں تو کیا میں تم سے لڑ رہا تھا۔ لڑائی تو دراصل اب شروع ہو گی۔“ جیرال نے ہنس کر کہا۔

”بہت خوب، اگر یہ بات ہے تو آﺅ۔ میں تمہاری اصل لڑائی بھی دیکھ لوں۔“

انہوں نے ایک دوسرے پر چھلانگ لگائی۔ اس مرتبہ ان کے جسم بجلی کی طرح حرکت کر رہے تھے۔ دیکھنے والے دم بہ خود ہو کر یہ خوف ناک دنگل دیکھ رہے تھے۔ انسپکٹر جمشید نے پوری قوت سے ایک مکا جیرال کی ناک پر مارا۔ جیرال نیچے جھک گیا اور جواب میں انسپکٹر کے پیٹ میں مکا مارا، لیکن دونوں کے وار خالی گئے۔ انسپکٹر جمشید نے اپنی جگہ سے چھلانگ لگائی اور جیرال کے سر کے بالوں کو مٹھی میں پکڑ کر ایک زور دار جھٹکا مارنا چاہا، لیکن یہ کیا۔ اس کے بال تو ان کے ہاتھ میں آگئے تھے۔ جیرال تو بالکل گنجا تھا۔ اس نے سر پر مصنوعی بالوں کی وِگ لگا رکھی تھی۔

”دھت تیرے کی۔“ انسپکٹر جمشید نے کہا اور وِگ کو زمین پر پٹخ دیا۔ ساتھ ہی جیرال کا ایک ہاتھ ان کے کندھے سے ٹکرایا۔ انہیں یوں محسوس ہوا، جیسے ان کا کندھا جسم سے الگ ہو گیا ہو۔ وہ جھلا گئے اور سر کی ایک ٹکر جیرال کی ٹھوڑی پر دے ماری۔ جیرال کئی قدم پیچھے ہٹ گیا۔ اس نے دونوں ہاتھوں سے ٹھوڑی پکڑ لی۔ چند لمحوں تک دونوں کھڑے ایک دوسرے کو گھورتے رہے۔ پھر ایک دم ایک دوسرے کی طرف دوڑے اور دونوں کے جسم اس زور سے ٹکرائے کہ جزیرہ گونج اٹھا۔ اس کے ساتھ ہی دونوں دوسری طرف اُلٹ گئے۔ لیٹے لیٹے دونوں نے ایک دوسرے کو دیکھا جیسے سوچ رہے ہوں، اب کیا کریں۔ کس رُخ سے حملہ کریں۔ آخر انسپکٹر جمشید تیزی سے اٹھ کھڑے ہوئے اور جیرال کو دبوچنے کے لیے آگے جھپٹے۔ جیرال نے لڑھکنیاں کھا کر خود کو ان سے بچایا اور پھر وہ بھی اٹھ کھڑا ہوا۔

لڑائی طول پکڑ گئی تھی۔ کسی طرح فیصلہ نہیں ہو پا رہا تھا۔ دیکھنے والے انہیں پھٹی پھٹی آنکھوں سے دیکھ رہے تھے او رسوچ رہے تھے، نہ جانے اس لڑائی کا کیا انجام ہو گا۔ انہوں نے اپنی زندگی میں شاید اس قدر خوف ناک لڑائی نہیں دیکھی تھی۔

وہ پھر ایک دوسرے پر جھپٹ جھپٹ کر حملہ کرنے لگے۔ ابھی تک دونوں میں سے کسی کے چہرے پر غصے کے آثار دکھائی نہیں دیے تھے۔ دونوں مزاج کو ٹھنڈا رکھتے ہوئے لڑ رہے تھے۔ دیکھنے والوں کی بے چینی کا اب عالم ہی اور تھا۔ وہ پلکیں تک نہیں جھپکا رہے تھے۔ انہیں یوں لگ رہا تھا۔ جیسے یہ لڑائی کبھی ختم نہیں ہو گی، وہ اس لڑائی کو دیکھتے دیکھتے بوڑھے ہو جائیں گے۔ کھڑے کھڑے ختم ہو جائیں گے اور لڑائی پھر بھی جاری رہے گی۔ اچانک نہ جانے کیا ہوا اور کیسے ہوا۔ انہوں نے صرف اتنا دیکھا کہ انسپکٹر جمشید بلاکی پھرتی سے نیچے جھکے تھے اور پھر ان سب کو جیرال ان کے دونوں ہاتھوں پر نظر آیا۔ ان کے دونوں ہاتھ سر سے اوپر اٹھے ہوئے تھے اور وہ تیزی سے گھوم رہے تھے۔ پھر انہوں نے جیرال کو چھوڑ دیا۔ وہ چکر کھاتا ہوا ایک درخت سے جا ٹکرایا۔ جیرال کی چیخ بہت بھیانک تھی۔ جزیرے کی پرسکون فضا میں ہلچل سی مچ گئی۔

انہوں نے آنکھیں پھاڑ پھاڑ کر انسپکٹر جمشید کو دیکھا۔ وہ اب بھی ایک چٹان کی مانند کھڑے تھے اور جیرال کو دیکھے جا رہے تھے۔ شاید اس خیال سے کہ ابھی پھر اٹھے گا اور ایک بار پھر ان کے مقابل آکھڑا ہو گا، لیکن ایسا نہیں ہوا۔ اس نے اپنی جگہ سے حرکت تک نہ کی۔ آخر انسپکٹر جمشید بولے:

”لو ماسٹر! سنبھالو اپنے جیرال کو۔ ہم چلتے ہیں۔“

”بہت خوب!“ انسپکٹر جمشید تم نے کمال کر دیا۔“ ماسٹر کے منہ سے نکلا۔

اچانک وہ سب چونک اٹھے۔ جیرال کے جسم میں حرکت پیدا ہوئی تھی۔ وہ اٹھنے کی کوشش کر رہا تھا۔ آخر وہ بڑی مشکل سے اٹھ کر بیٹھنے میں کامیاب ہو گیا۔ اس نے گھسٹ کر اس درخت سے ٹیک لگا لی جس سے ٹکرایا تھا۔ اس کے چہرے پر اس عالم میں بھی ایک مسکراہٹ تھی، لیکن یہ مسکراہٹ شکست خوردہ سی تھی۔ اس نے تھکی تھکی سی آواز میں کہا۔

”تمہیں مبارک ہو انسپکٹر، تم جیت گئے اور میں ہار گیا۔ یہ میری زندگی کی پہلی شکست ہے۔ میں نے آج سے پہلے کبھی کسی سے شکست نہیں کھائی تھی، لیکن مجھے اس کا کوئی افسوس نہیں ہے کیوں کہ دو بہادر جب لڑتے ہیں تو ان میں سے ایک ہارا ہی کرتا ہے۔ ویسے میں تمہارے اس کمال کی داد دیتا ہوں۔ تم نے مجھے بالکل ایک کھلونے کے مانند اٹھا لیا تھا۔ شاید میری ریڑھ کی ہڈی پر ضرب آئی ہے۔“

”مجھے افسوس ہے جیرال۔“ انسپکٹر جمشید کے منہ سے نکلا۔

”اس میں افسوس کی کیا بات ہے۔ تمہیں تو خوش ہونا چاہیے۔“

”بہادر دشمن جب شکست کھاتا ہے تو جیتنے والے کو خوشی کے ساتھ ساتھ افسوس بھی ہوا کرتا ہے۔“

”اب تم آزاد ہو انسپکٹر۔ تمہارے بچے بھی آزاد ہیں۔ تم لوگ جا سکتے ہو۔ ہمارا یہ منصوبہ ناکام رہا۔ میرے پچیس لاکھ بھی گئے۔“

”اچھا دوست! اگر زندگی رہی تو کبھی نہ کبھی کسی نہ کسی مقام پر تم سے پھر ملاقات ہو گی۔“ انہوں نے کہا اور اکرام، محمود، فاروق اور فرزانہ کی طرف مڑے۔

”آﺅ بھئی چلیں۔ اچھا ماسٹر خداحافظ۔“

”ٹھہرو انسپکٹر جمشید۔“ ماسٹر کے منہ سے نکلا۔ اس کے لہجے میں نہ جانے کیا تھا کہ انسپکٹر جمشید چونک اٹھے۔

جونہی وہ ماسٹر کی طرف مڑے، دھک سے رہ گئے۔ اس کے ہاتھ میں ایک سیاہ رنگ کا پستول چمک رہا تھا۔

”تم اتنی آسانی سے نہیں جا سکتے۔“ اس نے سانپ کی طرح پھنکارتے ہوئے کہا۔

”کیا مطلب؟“ انسپکٹر جمشید کے منہ سے نکلا۔

”مطلب یہ کہ ہم سوچ بھی نہیں سکتے تھے کہ تم جیرال کو شکست دے دو گے۔ ہم نے تو یہی سوچا تھا کہ تم اس کے ہاتھوں مارے جاﺅ گے۔ یہی ہمارا مقصد بھی تھا۔ اب جب کہ جیرال شکست کھا چکا ہے۔ ہم تمہیں کیسے جانے دیں۔ اس منصوبے پر ہم نے نہ جانے کتنا روپیہ خرچ کیا ہے۔ آبدوز کرائے پر لی۔ یہاں تک آنے پر اخراجات کیے۔ معلومات حاصل کیں۔ کار کرائے پر لی۔ ان حالات میں بھلا ہم تمہیں کیسے جانے دے سکتے ہیں۔ ہمیں تو تمہاری لاش کی ضرورت ہے۔ ماسٹر کہتا چلا گیا۔

”ماسٹر، یہ تم کیا کہہ رہے ہو؟“ جیرال نے حیرت زدہ لہجے میں کہا۔

”یہ اصول کے خلاف ہے۔“

”تم خاموش رہو جیرال۔ تمہاری ریڑھ کی ہڈی ٹوٹ چکی ہے، اب تم بے کار ہو چکے ہو۔“ ماسٹر نے بُرا سا منہ بنا کر کہا۔

”کچھ بھی ہو۔ میں یہ بے قاعدگی برداشت نہیں کر سکتا۔ انسپکٹر جمشید نے مجھ پر فتح پائی ہے، اسے جانے دیا جائے۔“ اس نے گرج کر کہا۔

”یہ نہیں ہو سکتا۔“ ماسٹر نے بھی چلا کر کہا۔ 

”جارج اس کی جیب میں سے پستول نکال لو۔“

جارج نے آگے بڑھ کر جیرال کی جیب سے پستول نکال لیا۔ ماسٹر نے یہ دیکھ کر کہا۔

”بس ، اب منہ سے ایک لفظ بھی نہ نکالنا، ورنہ گولیوں کی بوچھاڑ کر دی جائے گی۔“

”تم پچھتاﺅ گے ماسٹر، جمشید اگر میرے ہاتھ نہیں آیا تو تم بھی اس پر قابو نہیں پا سکو گے۔“

”یہ ہمارا اور انسپکٹر کا معاملہ ہے، تم چپ رہو۔ جارج اگر اب یہ بولنے کی کوشش کرے تو اس کے سر پر پستول کا دستہ دے مارنا۔“ ماسٹر نے جارج کو حکم دیا۔

”بہت اچھا جناب۔“ اس نے کہا اور جا کر جیرال کے سر پر کھڑا ہو گیا۔

جیرال نے انہیں گھور کر دیکھا اور پھر نفرت سے منہ دوسری طرف کر لیا۔

”ہاں تو انسپکٹر جمشید، اب تم اپنے ہاتھ اوپر اٹھا دو۔ اور تم بھی۔“ اس نے اکرام اور بچوں سے کہا۔ ان کے ہاتھ اوپر اٹھ گئے۔

٭….٭….٭

بوڑھے کی آمد

ماسٹر، اگر میں زندہ رہا اور تندرست ہو گیا، تو تم سے اس بدعہدی کا انتقام ضرور لوں گا۔“ جیرال بولے بغیر نہ رہ سکا۔

جارج نے جب یہ دیکھا کہ وہ بولے بغیر نہیں رہ سکتا تو پستول کا دستہ اس کے سر پر دے مارا۔ انہوں نے دیکھا جیرال بے ہوش ہو گیا اور زمین پر گر گیا تھا۔

”تم نے بہت اچھا کیا جارج، یہ یوں خاموش رہنے والا نہیں تھا۔ ماسٹر نے کہا، پھر اپنے دونوں ساتھیوں سے بولا۔

”اب ان لوگوں کے متعلق کیا خیال ہے؟“

”ہم ساحل سے بہت دور ہیں۔ فائر کی آوازیں شاید ہی ساحل تک جا سکیں گی۔ اس لیے انہیں ختم کرنا ہی مناسب رہے گا۔“ ایک غیرملکی نے مشورہ دیا۔

”ہارڈی ٹھیک کہتا ہے۔“ تیسرا بولا۔

”جارج! تم کیا کہتے ہو؟“ اس نے جارج سے پوچھا۔

”اب یہ لوگ ہمارے ہتھے چڑھ ہی گئے ہیں تو پھر انہیں چھوڑا کیوں جائے۔ زندہ لے جانے کی صورت میں اور بھی خطرات ہیں۔ اس لیے ختم کرنا ہی مناسب رہے گا۔“ جارج بولا۔

”میرا ووٹ بھی تمہاری طرف ہی ہے۔ اس کا مطلب یہ ہے کہ ہم چاروں کی ایک ہی رائے ہے اور وہ یہ کہ دشمنوں کو زندہ نہ چھوڑا جائے۔ ویسے بھی ان کی وجہ سے ہمارے ملک کے بہت سے جاسوس گرفتار ہوئے ہیں اور ہمیں زبردست نقصان پہنچایا ہے۔ اب سوال یہ پیدا ہوتا ہے کہ جیرال کا کیا کیا جائے؟“ ماسٹر نے یہ کہہ کر اپنے تینوں ساتھیوں کو دیکھا۔

”گریگری سے پوچھو، یہ زیادہ صحیح مشورہ دے گا۔“ جارج نے چوتھے آدمی کی طرف اشارہ کر کے کہا۔

”میرا تو خیال ہے، جیرال کو ہم زندہ چھوڑ جائیں اور جاتے ہوئے ایک سٹین گن بھی اس کے ہاتھوں میں چھوڑ جائیں تاکہ جب انسپکٹر جمشید اور اس کے ساتھیوں کو تلاش کرتے ہوئے پولیس یا محکمہ سراغرسانی کے لوگ یہاں پہنچیں تو یہی خیال کیا جائے کہ جیرال نے ان سب کو مار ڈالا۔“

”بہت خوب، بہت اچھی ترکیب ہے۔ جواب نہیں۔“ ماسٹر نے خوشی کا اظہار کیا۔

”ٹھیک ہے۔ اب ہمیں دیر نہیں کرنی چاہیے۔“

ماسٹر! مجھے افسوس ہے، تم اپنے اس پلان پر عمل نہیں کر سکو گے۔“ اچانک انہیں انسپکٹر جمشید کی آواز سنائی دی۔

وہ چونک اٹھے۔ انہوں نے دیکھا، ان کی غفلت سے فائدہ اٹھا کر انسپکٹر جمشید نے اپنا پستول جیب سے نکال لیا تھا۔ شاید درختوں پر موجود سٹین گنوں والے بھی ان کی طرف سے بے فکر تھے۔ ان کا خیال ہو گا کہ چار سٹین گنوں اور ایک پستول کی موجودگی میں انسپکٹر جمشید پستول نکالنے کی جرا¿ت نہیں کریں گے۔ لیکن وہ تو میدان کے بیچوں بیچ پستول تانے کھڑے تھے اور ان کے پستول کا رخ ماسٹر کی طرف تھا۔

”یہ کیا بات ہوئی؟“ ماسٹر نے مذاق اڑانے والے لہجے میں کہا۔

”بھلا تم ایک پستول سے کیا کر سکو گے۔“

”تم مجھے نہیں جانتے ماسٹر، لیکن جیرال مجھ سے اچھی طرح واقف تھا۔ اس نے بہادری کا ثبوت دیا اور میں نے بھی اس سے کوئی دھوکا یا چالاکی کرنے کی کوشش نہیں کی، اب تم نے دھوکا دیا ہے تو میں نے بھی دھوکے سے یہ پستول نکال لیا ہے۔ باقی رہی یہ بات کہ میں ایک پستول سے کیا کر سکتا ہوں، اس کا نمونہ میں تمہیں دکھاتا ہوں۔

ان الفاظ کے ساتھ ہی وہ ایک پیر پر تیزی سے گھوم گئے۔ ساتھ ہی ان کے پستول سے چار گولیاں نکلیں۔ چکر پورا کرتے ہی پانچویں گولی ماسٹر کے ہاتھ پر لگی۔ اس کے ہاتھ سے پستول چھوٹ کر دور جا گرا۔ فوراً ہی فضا چیخوں سے لرز اٹھی۔ درختوں پر سے سٹین گنوں والے دھم دھم کر کے گرنے لگے۔ وہ چاروں اس دنیا سے رخصت ہو چکے تھے اور یہ سب کچھ صرف چند سیکنڈوں کے اندر اندر ہو گیا۔

ماسٹر اور اس کے ساتھیوں کے ہوش اڑ گئے۔ انہوں نے ایسا منظر شاید اپنی ساری زندگی میں نہیں دیکھا تھا۔ ماسٹر کے ہاتھ سے خون ٹپ ٹپ گرنے لگا، لیکن کسی نے اپنی جگہ سے جنبش نہ کی۔ بتوں کے مانند کھڑے کے کھڑے رہ گئے۔

”اکرام!“ ان کی سٹین گنیں اور پستول سمیٹ کر ایک طرف ڈھیر کر دو اور انہیں باندھ لو۔“

”بہت بہتر جناب۔“ اکرام نے خوش ہو کر کہا۔ اس کے چہرے پر زندگی دوڑ گئی تھی۔

اس نے جلدی جلدی سٹین گنیں اور اکٹھے کیے اور انسپکٹر جمشید کے نزدیک ایک درخت کے نیچے رکھے پھر جیب سے ریشم کی ڈوری نکال کر انہیں باندھنے لگا۔

”اگر کسی نے حرکت کرنے کی کوشش کی تو گولی اس کے سر کے پار ہو گی۔“

انسپکٹر جمشید نے انہیں دھمکی دی۔ لیکن شاید ان میں سے کسی میں حرکت کرنے کی ہمت ہی نہیں رہی تھی۔ صرف چند منٹ میں اکرام نے انہیں باندھ ڈالا۔ اس نے نہ صرف ان کے ہاتھ پشت کی طرف باندھے تھے بلکہ ان کے پیر بھی باندھ دیے تھے۔ انسپکٹر جمشید نے پستول جیب میں رکھ لیا۔

”اب تم جا کر موٹربوٹ والے بوڑھے آدمی کو بلا لاﺅ تاکہ ہم اس کی مدد سے یہ سارا سامان موٹربوٹ پر لاد سکیں۔ “ انہوں نے ماسٹر، اس کے ساتھیوں اور اسلحے کی طرف اشارہ کر کے کہا۔

”بہت بہتر جناب۔“ اکرام نے کہا اور ساحل کی طرف چلنے کے لیے قدم اٹھائے ہی تھے کہ آواز آئی:

”میں آگیا ہوں۔ اور کافی دیر سے یہ سارا کھیل دیکھ رہا ہوں۔“

انہوں نے مڑ کر دیکھا، بوڑھا ایک درخت کے پیچھے سے نکل کر ان کی طرف آرہا تھا۔ یہ دیکھ کر وہ حیران ہوئے بغیر نہ رہ سکے کہ اس کے ہاتھ میں بھی ایک پستول تھا۔

٭….٭….٭

وہ اس کے ہاتھ میں پکڑے پستول کا مطلب نہ سمجھ سکے۔ نہ صرف انسپکٹر جمشید اور ان کے ساتھی بلکہ ماسٹر اور اس کے ساتھی بھی بوڑھے کو حیرت بھری نظروں سے دیکھ رہے تھے۔ اتنی دیر میں وہ نزدیک آچکا تھا۔ اس نے کہا:

”میں پہلے ہی جانتا تھا، نالائق گدھو۔ کہ تم اسے گرفتار نہیں کر سکو گے۔“

”کیا مطلب؟ کون ہو تم؟“ ماسٹر نے پھنکار کر کہا۔

”الّو کے پٹھے، میں ہوں تمہارا باپ۔“ ان الفاظ کے ساتھ ہی بوڑھے نے اپنی ڈاڑھی اتار پھینکی۔ اب ان کے سامنے ایک نوجوان آدمی کھڑا تھا۔ جس کی نیلی آنکھیں انہیں گھور رہی تھیں۔ اس پر نظر پڑتے ہی ماسٹر اور اس کے ساتھی تھر تھر کانپنے لگے۔ انسپکٹر جمشید کی آنکھوں میں بھی حیرت تھی۔

”آ۔ آپ۔ آپ۔“ماسٹر ہکلایا۔

”ہاں! گدھے یہ میں ہوں۔ اس منصوبے کی منظوری دیتے وقت بھی میں نے تم سے کہا تھا، تم کامیاب نہیں ہو سکے گے، مگر تم نہ مانے۔ تم نے کہا۔ جیرال کا بنایا ہوا منصوبہ ناکام نہیں ہو سکتا۔ اب دیکھ لو، وہ پڑا ہے جیرال اور تم اپنے چار ساتھی بھی گنوا بیٹھے۔ میں نہ آجاتا، تو تمہارا حشر بھی بُرا ہوتا۔“

وہ سب غیرملکی تھے مگر انہیں صاف اُردو بولتے دیکھ کر انہیں حیرت ہو رہی تھی۔ اچانک انسپکٹر جمشید چونک اٹھے۔ فرزانہ جس درخت کے پاس کھڑی تھی، اسی پر چڑھ رہی تھی۔ اس طرح کہ وہ درخت کے دوسری طرف ہو گئی تھی۔ انہوں نے ایک دم نظریں اِدھر سے ہٹا لیں کہ کہیں نئے آنے والے کی نظر نہ پڑ جائے۔

”میرے آقا، ہمیں معاف کر دیں۔“ ماسٹر نے روتی صورت بناتے ہوئے کہا۔

”یہ تو بعد میں دیکھا جائے گا۔ پہلے تمہیں کھول تو دوں، لیکن نہیں یہ کام تو میں انسپکٹر جمشید سے بھی لے سکتا ہوں۔ انسپکٹر مجھ سے ملو۔ میں ہوں اپنے ملک کے محکمہ سراغرسانی کا سربراہ۔ مجھے ڈاکٹر فاران کہتے ہیں۔ اب مہربانی فرما کر میرے ساتھیوں کو کھول دو۔“

”لیکن تمہیں موٹربوٹ کہاں سے مل گئی؟“ انسپکٹر جمشید نے حیران ہو کر پوچھا۔

”میں نے پورے دن کے لیے کرائے پر لے رکھی ہے۔ ضمانت کے طور پر غیرملکی نوٹوں کا ایک سوٹ کیس رکھوایا ہے۔ فکر نہ کرو، ایسے کام ہم کرتے رہتے ہیں۔ جیرال نے بھی تو کار حاصل کر لی تھی۔ وہ بھی کرائے کی تھی۔“

”بہت خوب، تو ان کے ساتھ تم بھی آئے تھے۔“

”ہاں! میں جانتا تھا، تم ان پر چھا جاﺅ گے۔ میں تمہارے کام کرنے کے طریقوں سے واقف ہوں۔ چلو، اب میرے ساتھیوں کو کھول دو۔“

مجبور ہو کر انسپکٹر جمشید اور اکرام نے اس کے ساتھیوں کو کھول دیا۔ اچانک ڈاکٹر فاران چونکا:

”ارے! وہ لڑکی کہاں گئی؟“

سب نے چونک کر اِدھر اُدھر دیکھا، لیکن فرزانہ انہیں کہیں بھی دکھائی نہ دی۔ صرف انسپکٹر جمشید، محمود اور فاروق کو معلوم تھا کہ وہ کہاں ہے۔

”کون سی لڑکی؟“ انسپکٹر جمشید بولے۔

”تمہاری بیٹی، ابھی ابھی تو یہیں تھی۔ اوہ، ماسٹر جزیرے کا چپہ چپہ چھان مارو۔ وہ جہاں بھی نظر آئے اسے پکڑ لاﺅ، کہیں کوئی گڑبڑنہ کر بیٹھے۔ دیکھو، ان لوگوں کو میں اپنے ملک میں زندہ لے جانا چاہتا ہوں۔“

”جی۔ جی بہت اچھا۔“ ماسٹر نے کہا اور اپنے تینوں ساتھیوں کے ساتھ دوڑتا چلا گیا۔

”کیا وہ لڑکی تیرنا جانتی ہے؟“ ڈاکٹر فاران نے پوچھا۔

”ہاں! بہترین تیراک ہے۔“

”تب تو شاید وہ سمندر میں کود بھی گئی ہو۔ افسوس میں اپنے آدمیوں پر برسنے کے شوق میں مار کھا گیا۔“

”تم اپنے آدمیوں کو فضول ہی گدھا اور الّو کا پٹھا کہہ رہے تھے۔“ انسپکٹر جمشید نے طنزیہ لہجے میں کہا۔

”ابا جان! کیا ہم بھی فرزانہ کو ڈھونڈیں جا کر۔“ فاروق نے اچانک سوال کیا۔

”بیٹا! ڈاکٹر صاحب سے اجازت لے لو۔ مجھے تو کوئی اعتراض نہیں۔ اس وقت تو حالات کی باگ ڈور ان کے ہاتھ میں ہے۔“

”خبردار! تم اپنی جگہ سے حرکت بھی نہیں کرو گے۔“ ڈاکٹر غرایا۔

”لیکن فرزانہ کو تو آپ نے منع نہیں کیا۔“ محمود نے کہا۔

”مجھے پتا ہی نہ چلا کہ وہ کب کھسک گئی۔ ویسے تم نے اسے کھسکتے دیکھا ہو گا۔“ ڈاکٹر فاران نے کہا۔

”ہاں! دیکھا ہے۔ دیکھا کیوں نہیں۔“ فاروق مسکرایا۔

”جلدی بتاﺅ! وہ کس طرف گئی ہے؟“

”افسوس! میں نہیں بتا سکتا۔“ فاروق بولا۔

”کیوں! بتا کیوں نہیں سکتے؟“

”اس کے لیے مجھے ابا جان سے اجازت لینا ہو گی۔ آپ اجازت دلوا دیں۔“

”یہ کیا بکواس ہے۔“ اس نے جھلا کر کہا۔

”اگر یہ بکواس ہے تو نہ سنیں۔ اپنے کان بند کر لیں۔ کیا خیال ہے محمود۔ تم میری بکواس سننا پسند کرو گے۔“

”بکواس کیوں ہوتی۔ تمہاری باتیں تو بہت ہی پیاری ہوتی ہیں۔ ارے، وہ رہی فرزانہ۔“

جملہ کہتے کہتے وہ اچانک چلا اٹھا۔ ہاتھ سے ایک طرف اشارہ بھی کیا تھا۔ ڈاکٹر فاران چونک کر اس طرف مڑا۔ یہی موقع تھا کام کرنے کا۔ انسپکٹر جمشید نے اس پر چھلانگ لگا دی۔ دونوں دھڑام سے زمین پر آرہے۔ ڈاکٹر کے ہاتھ سے پستول چھوٹ گیا۔ گرتے گرتے ڈاکٹر فاران اکرام سے ٹکرایا، اکرام کا سر ایک درخت سے لگا اور وہ ہائے کر کے بیٹھ گیا۔ اسے چکر آگیا تھا۔

”محمود، پستول اٹھا لو۔“انسپکٹر جمشید چلائے۔ اسی وقت ڈاکٹر فاران زمین سے اٹھ کر پستول کی طرف لپکا۔ محمود نے بھی اپنی جگہ سے دوڑ لگائی، مگر ڈاکٹر فاران اس سے پہلے پستول تک پہنچ چکا تھا۔ وہ تیزی سے اسے اٹھانے کے لیے جھکا، مگر دوسرے ہی لمحے محمود کی ٹھوکر پستول پر پڑی۔ وہ گھسٹتا ہوا فاروق کی طرف گیا۔ اس نے جھک کر اٹھانا چاہا، لیکن ڈاکٹر فاران کی لات اس کی کمر پر لگی اور وہ اوندھے منہ گرا۔ اتنے میں انسپکٹر جمشید سنبھل چکے تھے، وہ ڈاکٹر فاران کے راستے میں آگئے۔ چاروں بُری طرح ہانپ رہے تھے۔ اچانک فاران نے جھکائی دی اور ایک طرف بھاگ نکلا۔ وہ بوکھلا اٹھے۔ اس کا رخ اس درخت کی طرف تھا جس کے نیچے اکرام نے اسلحہ رکھا تھا۔ ڈاکٹر فاران کے راستے میں اکرام سر پکڑے ابھی تک بیٹھا تھا۔

”اکرام ہوشیار۔“ انسپکٹر جمشید چلائے۔

اکرام نے چونک کر اوپر دیکھا۔ ڈاکٹر فاران طوفان کی طرح دوڑتا ہوا اس کے پاس سے گزرا۔ اکرام نے فوراً ٹانگ اڑا دی۔ وہ منہ کے بل زمین پر گرا۔ اکرام نے آﺅ دیکھا نہ تاﺅ، اس کی کمر پر سوار ہو گیا، لیکن یہی اس کی غلطی تھی۔ دوسرے ہی لمحے وہ کئی فٹ اونچا اچھل گیا اور ایک بار پھر ایک درخت سے ٹکرایا۔ اس مرتبہ وہ مکمل طور پر بے ہوش ہو چکا تھا۔ ڈاکٹر فاران پھر اٹھا اور درخت کی طرف لپکا۔ اتنی دیر میں انسپکٹر جمشید پستول اٹھا چکے تھے۔ مجبور ہو کر انہوں نے فائر ڈاکٹر فاران کی ٹانگوں میں جھونک مارا۔ اس کے حلق سے ایک ہولناک چیخ نکلی اور اسلحے سے چند گز دور وہ زمین پرتڑپنے لگا۔ اس عالم میں بھی اس نے اسلحہ اٹھا لینا چاہا، مگر وہ ابھی چند گز کے فاصلے پر تھا۔ اس کی ٹانگ سے خون بہ رہا تھا اور اس کے لیے گھسٹنا بہت مشکل ہو گیا تھا۔ فائر کی آواز پورے جزیرے میں گونجی تھی۔ فوراً ہی انہوں نے دوڑتے قدموں کی آواز سنی۔ ڈاکٹر فاران کے ساتھی صورت حال کا جائزہ لینے کے لیے واپس آرہے تھے۔

٭….٭….٭

جزیرے سے واپسی

ماسٹر اور اس کے ساتھی دوڑتے ہوئے وہاں آئے اور پھر ڈاکٹر فاران کو تڑپتے دیکھ کر بھونچکے رہ گئے۔ ڈاکٹر فاران ابھی تک اسلحے کو پکڑنے کے لیے تگ و دو کر رہا تھا۔

”یہ کیا ہوا؟“ ماسٹر کے منہ سے نکلا۔

”کیوں کیا تمہاری نظر کمزور ہے۔ دیکھ نہیں رہے، تمہارا آقا پڑا تڑپ رہا ہے۔“ فاروق نے کہا۔

”اوہ، کیا تم نے انہیں گولی مار دی؟“ اس نے بوکھلا کر کہا۔

”صرف ٹانگوں پر۔ میرا خیال ہے، اس کی دائیں پنڈلی اڑ گئی ہے۔“

”اوہ۔“ ان کے منہ سے نکلا۔

”اب کیا ہو گا؟“ ہارڈی نے پوچھا۔

”وہی ہو گا جو تم ہمارے ساتھ کرنا چاہتے تھے۔ پہلے تم ہمیں اپنے ملک کی سیر کرانا چاہتے تھے، اب ہم تمہیں سیر کرانا چاہتے ہیں، اب ہم تمہیں اپنے ملک میں گھمائیں گے اور نئی نئی چیزیں کھلائیں گے۔ فکر نہ کرو۔ ہمارے ملک میں قابل دید مقامات بہت ہیں۔“ فاروق کہہ رہا تھا۔

”آخر یہ سب ہوا کیسے؟“ ماسٹر اب تک حیرت زدہ تھا۔“ پستول تو آقا کے ہاتھ میں تھا۔

”بس کیا بتائیں، کبھی کبھی میری عقل خراب ہو جاتی ہے۔ الٹا سیدھا بول پڑتا ہوں۔ اچانک کہہ بیٹھا، ارے وہ رہی فرزانہ۔ بس یہ حضرت بھی ایک ہی الّو نکلے۔ فوراً پلٹ کر دیکھ لیا۔ اب ہم اتنے بے وقوف بھی نہیں تھے کہ یہ پلٹ کر دیکھتے اور ہم کھڑے ان کا منہ دیکھتے رہتے۔ بس چھلانگ لگا دی ان پر۔ انہوں نے چالاکی دکھانے کی کوشش کی اور گرا ہوا پستول اٹھانا چاہا، ہم نے پستول کو فٹ بال کی گیند سمجھ لیا۔ جب وہ ان کے ہاتھ نہ لگا، تو یہ حضرت اس درخت کی طرف بڑھے۔ وہ دیکھ رہے ہیں نا آپ جہاں اب اکرام صاحب بیٹھے ہیں۔ ”سٹین گنوں پر۔“ اس طرح جیسے یہ گوریلے ہوں۔ ہاں تو آپ کے آقا اس طرف بڑھے۔ اب اگر یہ وہاں سے سٹین گن اٹھا لیتے تو شاید ان کی جگہ ہم پڑے تڑپ رہے ہوتے، اس لیے مجبوراً ایک عدد گولی چلانا پڑی جس کے لیے ہم معافی چاہتے ہیں۔“ فاروق نے اچھی بھلی تقریر جھاڑ دی

”اُف خدا، اب کیا ہو گا؟“

”ڈرتے کیوں ہو بھائی، وہی ہو گا جو منظورِ خدا ہو گا۔“

”حیرت تو یہ ہے کہ تمہاری بہن کہاں چلی گئی۔“

”وہ اگر غائب نہ ہوتی یہ سب کچھ کیسے ہوتا۔ اس کے غائب ہونے میں بھی بڑی برکت ہے۔ جب بھی غائب ہوتی ہے، کوئی نہ کوئی کارنامہ ضرور انجام پا جاتا ہے۔ یوں وہ بہت بڑی جادوگرنی بھی ہے۔ اگر تم آنکھیں بند کر لو تو ابھی حاضر ہو جائے گی۔“ فاروق مذاق اڑانے والے لہجے میں بولے جا رہا تھا۔

”میرا خیال ہے فاروق، تم وقت ضائع کر رہے ہو۔ اب ہمیں ان لوگوں کو بالکل مہلت نہیں دینی چاہیے۔“ انسپکٹر جمشید بولے۔

”جی بہت بہتر۔ فرمائیے، اب ہم کیا کریں؟“

اکرام اور تم دونوں مل کر ان کے ہاتھ پشت کی طرف باندھ دو۔ پیر نہ باندھنا۔ تاکہ یہ اپنے پیروں پر چل کر موٹربوٹ تک جا سکیں۔“

”لیکن ابا جان! اب موٹربوٹ کون چلائے گا۔ بڑے میاں تو آقا میں تبدیل ہو چکے ہیں۔“ فاروق نے سوال کیا اور سب ہنس پڑے۔

”وقتی طور پر میں بڑے میاں بن جاﺅں گا۔“ انسپکٹر جمشید مسکرائے۔

”ارے، تو کیا آپ کو موٹربوٹ چلانا آتا ہے؟“ محمود نے حیران ہو کر کہا۔

”بہت اچھی طرح۔ ابھی تم اپنی آنکھوں سے دیکھ ہی لو گے۔“

”پھر تو مزہ آگیا۔“

انہوں نے ماسٹر اور اس کے ساتھیوں کے ہاتھ پشت کی طرف باندھ دیے۔ ڈاکٹر فاران کو بھی نہیں بخشا گیا۔ اگرچہ وہ زخمی ہو چکا تھا، لیکن اس کے ہاتھ بھی باندھ دیے گئے۔ انسپکٹر جمشید کی ہدایت پر اکرام نے اس کی ٹانگ پر دو تین رومال لپیٹ دیے۔

”پہلے ان سب کو لے کر موٹربوٹ میں لٹا دو اور ان کے پیر بھی باندھ دو۔ اس کے بعد ہم ان لاشوں کو اٹھا لیں گے۔ “ انسپکٹر جمشید بولے۔

ماسٹر اور اس کے ساتھیوں کو موٹربوٹ پر لایا گیا۔ پھر انہیں لٹا کر ان کے پیر جکڑ دیے گئے۔ محمود نے اسی پر ہی بس نہیں کیا، ان سب کے گرد بھی رسی لپیٹ دی۔

”بنڈل تیار ہے۔“ اس نے ہاتھ جھاڑتے ہوئے کہا۔

وہ واپس جزیرے کے درمیان پہنچے۔ محمود نے اوپر کی طرف دیکھتے ہوئے کہا۔

”فرزانہ! اب تم بھی نیچے آجاﺅ۔ بس ہم یہاں سے رخصت ہو رہے ہیں۔“

فرزانہ کی طرف سے کوئی جواب نہ ملا، تو انہوں نے چونک کر اس درخت کی طرف غور سے دیکھا اور پھر وہ دھک سے رہ گئے۔ وہاں فرزانہ نہیں تھی۔

”فرزانہ! تم کہاں ہو؟“ انسپکٹر جمشید پوری قوت سے چلائے۔ پھر ان کی نظر اس درخت پر پڑی جس کے پاس جیرال پہلے بے ہوش پڑا تھا۔ یہ دیکھ کران کی سٹی گم ہو گئی کہ جیرال اب وہاں نہیں تھا۔

”اوہ۔ وہ فرزانہ کو لے گیا۔“ انسپکٹر جمشید کے منہ سے نکلا پھر وہ ساحل کی اس سمت میں دوڑ پڑے جس طرف دشمنوں کی موٹر بوٹ کھڑی نظر آئی تھی۔

وہ سب بے تحاشا بھاگ رہے تھے۔ ان کے دل دھک دھک کر رہے تھے۔ وہ سوچ رہے تھے کہ اگر جیرال فرزانہ کو لے جانے میں کامیاب ہو گیا، تو اس وقت تک کے کیے کرائے پر پانی پھر جائے گا۔ وہ بیگم جمشید کو کیا منہ دکھائیں گے۔ کس منہ سے انہیں بتائیں گے کہ وہ فرزانہ کو ساتھ نہیں لا سکے۔

دوڑتے دوڑتے ان کے سانس پھول گئے، لیکن ان کی رفتار میں کوئی کمی نہ آئی۔ آخر وہ ساحل پر پہنچ گئے۔ اچانک وہ سب پرسکون ہو گئے۔ فرزانہ ساحل پر کھڑی تھی اور ساحل پر جو موٹربوٹ کھڑی تھی، اب تیزی سے سمندر میں چلی جا رہی تھی، لیکن ابھی موٹربوٹ زیادہ دور نہیں گئی تھی۔ اسے جیرال چلا رہا تھا۔

جیرال، رک جاﺅ! ورنہ میں تمہیں گولی مار دوں گا۔“ انسپکٹر جمشید پوری قوت سے چلائے۔

جیرال نے پیچھے مڑ کر دیکھا۔ انسپکٹر جمشید پستول تانے کھڑے تھے اور وہ ان کے نشانے کی زد میں تھا۔ ایک لمحے کے لیے وہ سوچ میں پڑ گیا، پھر مسکرا کر بولا:

”انسپکٹر جمشید، تم بھی بہادر ہو اور میں بھی۔ میرا اور تمہارا مقابلہ کسی اور میدان میں بہت جلد ہو گا۔ ویسے اگر تم بزدلوں کی طرح مجھ پر وار کرنا ہی چاہتے ہو تو میں بھی رکوں گا نہیں، تم گولی چلانا چاہتے ہو، ضرور چلاﺅ۔ بہادری کی روایات کو توڑنا چاہتے ہو، بڑی خوشی سے توڑو۔ میں رکنے والا نہیں۔“

انسپکٹر جمشید کی انگلی کا دباﺅ پستول کے ٹریگر پر دبتا چلا گیا، لیکن پھر اچانک انہوں نے انگلی ہٹا لی۔ ان کا پستول والا ہاتھ نیچے جھکتا چلا گیا۔

”میں جانتا تھا انسپکٹر جمشید، تم بہادر ہو۔ تم گولی نہیں چلا سکتے۔“

”لیکن یہ بھی سن لو! تمہاری ذات سے اس وقت میرے ملک اور قوم کو کوئی نقصان نہیں پہنچا۔ یہی وجہ ہے میں تمہیں چھوڑ رہا ہوں۔ اگر ملک کی آن پر حرف بھی آیا ہوتا تو تم بچ کر نہیں جا سکتے تھے۔ آئندہ بھی اگر تم یہاں آئے اور میرے وطن کو نقصان پہنچانے کی کوشش کی تو میں تم پر فائر کرتے وقت یہ ہرگز نہیں سوچوں گا کہ میرا اقدام بہادری کی تعریف میں آتا ہے یا نہیں۔“ انسپکٹر جمشید کہتے چلے گئے۔

”شکریہ دوست، میں ایک بار پھر آﺅں گا۔ اس وقت میرے سامنے کیا مقصد ہو گا۔ یہ میں اس وقت خود بھی نہیں جانتا۔ ہاں، اتنا ضرور کہوں گا، آج کے بعد میں ماسٹر کے ملک سے کوئی سروکار نہیں رکھوں گا۔ ان کا کوئی کام نہیں کروں گا۔ انہوں نے معاہدے کی خلاف ورزی کی ہے۔ اچھا خداحافظ۔“

اس نے مسکراتے ہوئے ہاتھ ہلایا۔ ان میں سے کسی کا ہاتھ اسے الوداع کہنے کے لیے نہ اٹھ سکا۔ کچھ بھی ہو، وہ ایک دشمن تھا۔ دشمن ملک کے اشارے پر ان کے مقابلے میں آسکتا تھا۔ وہ کس طرح ہاتھ ہلا کر اسے رخصت کر سکتے تھے۔ موٹربوٹ لمحہ بہ لمحہ ان سے دور ہوتی جا رہی تھی۔ وہ جیرال کا ہاتھ ابھی تک ہلتے ہوئے دیکھ رہے تھے۔ اسی وقت اکرام نے کہا:

”کیا ہم اس کا تعاقب نہیں کر سکتے؟“

”نہیں، میں اسے گرفتار نہیں کرنا چاہتا۔“ انسپکٹر جمشید بولے۔

”یوں بھی اس کے پاس جو موٹربوٹ ہے وہ آبدوز بھی ہے۔“ فرزانہ نے کہا۔

”یہ تمہیں کس نے بتایا؟“ انسپکٹر جمشید نے پوچھا۔

”جیرال نے۔ جب وہ ہمیں اغوا کر کے لا رہا تھا۔“

”ارے ہاں!“ فرزانہ تم بتاﺅ۔ تمہارے ساتھ کیا ماجرا پیش آیا۔

ہم تو یہ سمجھے تھے کہ جیرال تمہیں اغوا کر کے لے جا رہا ہے۔ اسی لیے تو ہم سب کچھ چھوڑ چھاڑ کر اس طرف بھاگے تھے۔“ محمود بولا۔

”مجھے افسوس ہے ابا جان۔“

”کیا مطلب، تمہیں کس بات پر افسوس ہے؟“ انسپکٹر جمشید نے چونک کر کہا۔

”جب آپ لوگ ماسٹر اور اس کے ساتھیوں کو ساتھ لے کر جا رہے تھے تو میں آپ کو دیکھ رہی تھی۔ آپ نظروں سے اوجھل ہوئے تو میں مڑی اور اس وقت میں نے دیکھا، جیرال اٹھ کر بھاگا جا رہا تھا میں نے فوراً درخت پر سے چھلانگ لگا دی اور اس کے پیچھے بھاگ کھڑی ہوئی۔ اس نے مڑ کر دیکھا اور پھر اور بھی تیز دوڑنے لگا۔ بھاگتے بھاگتے ہم ساحل پر پہنچ گئے۔ جب میں یہاں پہنچی تو وہ موٹربوٹ پر بیٹھ چکا تھا اور اسے سٹارٹ کر چکا تھا۔ میرے پاس کوئی ہتھیار نہ تھا۔ اس نے میری طرف مسکرا کر دیکھا اور ابا جان آپ جانتے ہیں، اس نے کیا کہا تھا؟“

فرزانہ کہتے رُک گئی۔ اس وقت اس کے چہرے پر عجیب سے تاثرات تھے۔

”کیا کہا تھا؟“ انسپکٹر جمشید نے پرسکون آواز میں کہا۔

”اس نے کہا تھا، میں تم لوگوں سے مل کر بہت خوش ہوا ہوں، جب تمہارے والد نے مجھے اٹھا کر پھینک مارا تھا تو میں سمجھا تھا کہ میری ریڑھ کی ہڈی ٹوٹ گئی ہے، لیکن بعد میں جب مجھے ہوش آیا تو میں نے محسوس کیا، ریڑھ کی ہڈی محفوظ ہے۔ اپنے والد سے میرا سلام کہنا۔ زندگی رہی تو تم سے پھر ملاقات ہو گی اور اس مرتبہ میں بھی کسی کو ہاتھوں پر اٹھا کر پھینک مارنے کا گُر سیکھ کر آﺅں گا۔“

یہ کہہ کر فرزانہ خاموش ہو گئی۔ محمود نے اس کی طرف گھورتے ہوئے کہا۔

”لیکن تمہیں افسوس کس بات پر ہے؟“

”اس پر کہ میں جیرال کو پکڑ نہ سکی۔“

”شکر کرو۔ تم اس سے بھڑ نہیں گئیں۔ بھلا وہ تمہارے قابو میں آنے والا تھا۔“ فاروق نے مسکرا کر کہا۔

”شاید تم ٹھیک کہتے ہو۔“ فرزانہ نے بھی مسکرا کر کہا۔

سمندر میں موٹربوٹ اب ایک دھبے کے مانند دکھائی دے رہی تھی۔ انہوں نے سوچا، جیرال اب تک ان کی طرف دیکھ دیکھ کر ہاتھ ہلا رہا ہو گا اور آخر وہ دھبا بھی ان کی نظروں سے اوجھل ہو گیا۔

”آﺅ چلیں۔“

انسپکٹر جمشید نے کہا اور وہ سب چونک کر مڑے۔ لاشیں اُٹھانے، اسلحہ اور دوسرا سامان موٹربوٹ تک پہنچانے میں انہیں ایک گھنٹہ لگ گیا۔ جب وہ گھر کے لیے روانہ ہوئے تو دوپہر کے دو بج رہے تھے۔ ہنگامہ خیز یہ دن ڈھل رہا تھا اور وہ واپسی کی تیاری کر رہے تھے۔ جب سب لوگ موٹربوٹ میں بیٹھ گئے تو انسپکٹر جمشید ڈرائیونگ سیٹ پر جا بیٹھے۔

اس وقت انہوں نے دیکھا، انسپکٹر جمشید بڑی چابک دستی سے موٹربوٹ چلا رہے تھے۔

”امی جان گھر میں بہت پریشان ہوں گی۔“ فرزانہ بولی۔

”وہاں صرف تمہاری امی جان ہی نہیں اور بھی نہ جانے کتنے لوگ پریشان ہوں گے۔“

”جی! اور کون لوگ؟“ فاروق نے حیران ہو کر کہا۔

”تمہاری امی نے ہوش و حواس میں آنے کے بعد سب سے پہلے بیگم شیرازی کو حالات سنائے ہوں گے، پھر خان عبدالرحمن او رپروفیسر داﺅد کو فون کیا ہو گا۔ پولیس کو اطلاع دی گئی ہو گی۔ محکمہ سراغرسانی کے آفیسروں کو خبردار کیا گیا ہو گا۔ سارے شہر میں ہمیں تلاش کیا جا رہا ہو گا۔“ یہ بتاتے ہوئے انسپکٹر جمشید مسکراتے رہے۔

”اس کا مطلب ہے، ہمارے گھر میں تو اچھا خاصا میلا لگا ہو گا۔“

فرزانہ نے کہا۔

”لیکن یہ میلا بہت غمگین ہو گا۔“ فاروق بولا۔

”کوئی بات نہیں، جب ہم وہاں پہنچیں گے تو خوشی کا سیلاب آجائے گا میلے میں۔“ محمود نے ہنس کر کہا۔

”دیکھنا بھائی، کہیں ڈوب نہ جانا سیلاب میں۔“ فاروق بول اٹھا۔

٭….٭….٭

گھر آگئے

اڑھائی بج چکے تھے۔ ابھی تک بچوں یا انسپکٹر جمشید کی کوئی خبر نہیں ملی تھی۔ وہ سب کے سب گھر کے صحن میں اداس اور چپ چاپ بیٹھے تھے، جیسے کبھی اس گھر میں کوئی قہقہہ گونجا ہی نہیں تھا۔ ہنسی مذاق کی کوئی بات کی ہی نہیں تھی۔ بیگم جمشید کی آنکھوں سے کبھی ٹپ ٹپ آنسو گرنے لگتے، کبھی صرف پلکوں میں ہی اٹک کر رہ جاتے۔ شہناز بیگم اور بیگم شیرازی انہیں بار بار تسلی دے رہی تھیں۔ خان عبدالرحمن اور پروفیسر داﺅد بھی دلاسا دے رہے تھے۔

پولیس کا سب انسپکٹر تین مرتبہ آچکا تھا۔ ہر مرتبہ اس نے یہ خبر سنائی تھی کہ پورے شہر میں شدومد سے تلاش کی جا رہی ہے، لیکن ابھی ان کا کوئی سراغ نہیں ملا۔ وہ ابھی ابھی تیسری بار اطلاع دے کر گیا تھا کہ ایک بار پھر گھنٹی بجی۔

خان عبدالرحمن نے دروازہ کھولا۔ آنے والے ڈی آئی جی صاحب تھے۔

”آپ نے کیوں تکلیف کی؟“ خان عبدالرحمن بولے۔

”میں بہت فکرمند ہوں۔ صبح سے میں نے کچھ کھایا نہ پیا۔ نہ جانے بیگم جمشید کا کیا حال ہو گا، بس ان کے خیال سے آگیا۔“

خان صاحب کہہ رہے تھے۔ ان کی آواز سن کر پروفیسر داﺅد بھی آگئے۔ انہوں نے خان صاحب سے ہاتھ ملایا۔ اچانک خان صاحب کی نظر دیوار کی طرف اٹھ گئی، ایک لمحے کو انہوں نے دیوار پر لکھے ہوئے نام کو بے خیالی میں پڑھااور پھر زور سے اچھل پڑے۔

”کیا ہوا، خیریت تو ہے جناب۔“

”یہ۔ یہ۔ یہ نام۔ دیکھ رہے ہیں، دیوار پر لکھا ہوا؟“

”ہاں، کیوں کیا بات ہے، اس نام میں؟“ خان عبدالرحمن بولے۔

”یہ جیرال ہی لکھا ہے نا۔“

”جی ہاں۔“

”اُف میرے خدا، تو کیا یہاں جیرال آیا تھا۔“ ان کے منہ پر ہوائیاں اڑنے لگیں۔

”یہ جیرال کون ہے؟“پروفیسر داﺅد نے حیران ہو کر کہا۔

”ایک بین الاقوامی مجرم، جو بڑی بڑی حکمتوں کے لیے معاوضے پر کام کرتا ہے۔ اگر وہ بچوں کو اغوا کر کے لے گیا ہے تو پھر تینوں بچے شہر میں ہرگز نہیں ہو سکتے، جب کہ ہم اس وقت تک انہیں شہر میں تلاش کراتے رہے ہیں اور اگر انسپکٹر جمشید کی نظر اس نام پر پڑ چکی ہے تو پھر وہ بھی شہر میں موجود نہیں ہو سکتے۔ کیوں کہ وہ جانتے ہیں، جیرال ہمیشہ سمندروں کے ذریعے سفر کرتا ہے۔“

”اوہ۔“ ان کے منہ سے نکلا۔

”افسوس، اگر صبح میں یہاں آگیا ہوتا، تو ہم سمندر میں جال ڈلوا دیتے، مگر جیرال تو اب نہ جانے کہاں کا کہاں پہنچ چکا ہو گا۔“

”اس سے تو پھر یہ معلوم ہوتا ہے کہ جمشید بھی اس کے پیچھے ہے۔“

”ہاں! خدا کرے کہ ایسا ہی ہو۔“ خان صاحب بولے۔

”آمین۔“ یہ نئی بات بیگم جمشید کو نہ بتائیے گا۔ وہ اور فکرمند ہوں گی۔“

”آئیے، اندر چلتے ہیں۔“

وہ اندر آئے ہی تھے کہ ایک بار پھر گھنٹی بجی۔

٭….٭….٭

ساحل پر پہنچ کر انہوں نے لاشیں اور قیدی پولیس کے حوالے کیے اور خود گھر کا رُخ کیا۔ انہوں نے سوچا تھا کہ وہ باقی کام تو بعد میں بھی کر لیں گے۔ پہلے تو گھر پہنچ کر وہاں موجود پریشان لوگوں کو تسلی دینا چاہیے۔ ویسے انسپکٹر جمشید نے پولیس والوں کو ہدایت کر دی تھی کہ لاشوں اور قیدیوں کو فوراً محکمہ سراغرسانی کی عمارت میں پہنچا دیا جائے۔

گھر کے دروازے پر پہنچ کر انہوں نے گھنٹی بجائی۔ دروازہ فوراً ہی کھلا ۔ وہ یہ دیکھ کر حیران رہ گئے کہ دروازہ کھولنے والے خان عبدالرحمن، پروفیسر داﺅد اور ڈی آئی جی صاحب تھے۔

”ارے۔“ تینوں کے منہ سے انہیں دیکھتے ہی نکلا۔

”ہم خواب دیکھ رہے ہیں یا یہ واقعی تم ہو۔“ خان صاحب بولے۔

”خدا کا شکر ہے کہ ہم ہی ہیں۔ ویسے یہ بھی ہو سکتا تھا کہ ہم واپس نہ آتے۔“ انسپکٹر جمشید مسکرائے۔

”تم نہیں جانتے کہ ہم نے یہ وقت کس طرح گزارا ہے۔ بس ایک ایک منٹ ہم پر بھاری گزرا ہے۔“ پروفیسر داﺅد بولے۔

”اچھا، انہیں اندر تو آنے دو۔ پھر سارے حالات سنیں گے اطمینان سے بیٹھ کر۔“ خان عبدالرحمن مسکرائے۔

جونہی وہ اندر آئے، سب اچھل کر کھڑے ہو گئے۔ ان کی آنکھوں میں حیرت اور خوشی کے دریا اُمڈ پڑے۔

”ارے، یہاں تو واقعی میلا لگا ہوا ہے۔“ فاروق نے ہنس کر کہا۔

”لیکن میلے کی رونق تو اب آئی ہے۔“ ڈی آئی جی صاحب بولے۔

”یا اللہ، تیرا شکر ہے۔“ بیگم شیرازی بولیں۔

بیگم جمشید کے منہ سے تو خوشی کی وجہ سے کوئی لفظ نکل ہی نہ سکا۔ بس وہ اٹھیں اور بے اختیار محمود، فاروق اور فرزانہ سے لپٹ گئیں۔ پھر تجویز ٹھہری، اطمینان سے بیٹھ کر حالات سننے کی۔ صحن میں جگہ کم تھی۔ اس لیے سب لوگ ڈرائنگ روم میں آگئے۔

ابھی وہ اطمینان سے بیٹھنے بھی نہیں پائے تھے کہ دروازے کی گھنٹی ایک بار پھر بجی۔

”خدا خیر کرے۔ اب کون آگیا۔“ خان عبدالرحمن بولے اور دروازے کی طرف جانے کے لیے اٹھ کھڑے ہوئے۔

”بھئی ذرا احتیاط سے۔ کہیں کوئی نئی مصیبت نہ مول لے آنا۔“ پروفیسر داﺅد بولے۔

”ہاں! یہ بھی ٹھیک ہے، ویسے مفت ملے تو لیتا آﺅں گا۔“ خان عبدالرحمن نے مسکرا کر کہا۔

”وہ دروازے پر پہنچ کر رک گئے اور چٹخنی گرانے سے پہلے بولے:

”ہاں بھئی! کون ہے دروازے پر؟“

”جی، اخباری رپورٹر۔“ باہر سے آواز آئی۔

”تو آپ اخباری نمائندے ہیں، لیکن آپ کے پاس کیا ثبوت ہے کہ آپ اخباری نمائندے ہیں۔“

”ثبوت کے طور پر ہمارے پاس اپنے کارڈ موجود ہیں۔“

”دیکھو بھائی، یہ گھر ابھی ابھی ایک بڑے حادثے سے بال بال بچا ہے، اس لیے اگر تم میرے دروازہ کھولنے سے پہلے کوئی ثبوت پیش کر سکتے ہو تو ٹھیک ہے؟ ورنہ میں دروازہ نہیں کھولوں گا۔“

”لیکن یہ کیسے ممکن ہے؟“ باہر سے حیرت زدہ لہجے میں کہا گیا۔

”ممکن ہے یا نہیں ہے۔ یہ میں نہیں جانتا۔ ارے ہاں، تم یوں کیوں نہیں کرتے کہ اپنے کارڈ دروازے کے نیچے سے اندر کھسکا دو۔“

”ہاں واقعی۔“

اور پھر کارڈ اندر آگئے۔ دوسری طرف خان عبدالرحمن کو واپس پہنچنے میں دیر ہوئی تو سب پریشان ہو گئے۔ آخر انسپکٹر جمشید ہی دروازے پر آئے۔

”کیا بات ہے عبدالرحمن؟“ انہوں نے حیران ہو کر پوچھا۔

”کارڈ دیکھ رہا ہوں۔“

”کیا مطلب؟ کس کے کارڈ دیکھ رہے ہو؟“

”جو اندر آنا چاہتے ہیں۔ میں نے ان سے کہا تھا کہ اپنے اپنے کارڈ دروازے کے نیچے سے اندر کھسکا دیں۔

اور انسپکٹر جمشید ہنس پڑے۔ انہوں نے دروازہ کھول دیا۔ انسپکٹر جمشید نے ان سے معافی چاہی کہ دروازہ کھلنے میں دیر ہوئی۔

”کوئی بات نہیں جناب! ہم کچھ کچھ حالات جان چکے ہیں، اس لیے یہ احتیاط بے معنی نہیں ہے۔“

”شکریہ! آئیے آپ بھی اندر ہی آجائیے۔“ انہوں نے کہا۔

اور وہ سب ڈرائنگ روم میں آگئے۔

”اب سنائیے سارے حالات۔“ بیگم شیرازی بولیں۔

”شروع تو بیگم صاحبہ کریں گی۔ کیوں کہ کہانی ان سے شروع ہوئی تھی۔“

انسپکٹر جمشید مسکرائے۔

بیگم جمشید نے کہانی سنانا شروع کی۔ جب انہوں نے جیرال کو ناشتا دینے کے بارے میں تفصیل سے بتایا تو ڈرائنگ روم قہقہوں سے گونج اٹھا۔ اس کے بعد کا حصہ محمود، فاروق اور فرزانہ نے سنایا، کیوں کہ پھر وہ آگئے تھے۔ کہانی کا آخری حصہ سب سے زیادہ دلچسپ تھا اور یہ تھا انسپکٹر جمشید کا جیرال سے مقابلہ کرنا۔ سنتے وقت ان کے سانس رک رک گئے۔ پھر جب انہوں نے بتایا کہ کس طرح جیرال کی شکست کے بعد ماسٹر نے پستول نکال لیا، تو سب لوگ دنگ رہ گئے۔ آخر میں موٹر بوٹ والے بوڑھے کے بارے میں جان کر تو ان کی حیرت کا کوئی ٹھکانا نہ رہا۔

”اور یہ سب میری وجہ سے ہوا۔“ بیگم جمشید ان کے خاموش ہونے پر بولیں۔

”کیوں۔“ کئی آوازیں ابھریں۔

”اگر میں ایک منٹ کی سستی نہ کرتی اور اسی وقت دروازہ بند کر لیتی تو جیرال اندر آہی نہ سکتا۔“

”نہیں، یہ بات نہیں ہے۔ وہ کسی نہ کسی طرح اندر ضرور آتا۔

”لیکن یہاں سوال یہ پیدا ہوتا ہے کہ جیرال نے ہمیں اس وقت کیوں نہ پکڑ لیا، جب ہم اسکول جانے کے لیے گھر سے نکلے تھے۔“ فرزانہ نے کہا۔

”اپنے پیچھے کوئی کہانی بھی تو چھوڑ کر جانا تھا نا۔ دیوار پر جیرال لکھ کر تو گیا ہی تھا وہ۔ بیگم کو بھی پریشان کر ڈالا تاکہ یہ بعد میں مجھے بتائیں تو میں اس کے پیچھے دوڑا جاﺅں۔ یہ وہ جانتا تھا کہ مجھے اس بارے میں سب کچھ معلوم ہے۔ یہ بھی کہ وہ ہمیشہ سمندر کے ذریعے سفر کرتا ہے۔“ انسپکٹر جمشید بولے۔

”کیا آپ کو جیرال کے فرار ہونے کا افسوس ہے؟“ ایک اخباری نمائندے نے سوال کیا۔

”جی نہیں! وہ ایک بہادر دشمن ہے، میں اس کی عزت کرتا ہوں۔“ انہوں نے کہا۔

اور اس طرح یہ مجلس برخاست ہوئی۔ دوسرے دن کے اخبارات ان کی کہانی سے بھرے پڑے تھے۔

٭….٭….٭

اس سلسلے کی مزید تحاریر

موت کا جزیرہ

• مئی 25, 2020

پانچ قدم پہ موت

• مئی 25, 2020

سازشی چہرہ

• مئی 25, 2020

بھوت بنگلہ

• مئی 25, 2020

خونی جال

• مئی 25, 2020

آخری امید

• مئی 25, 2020

چوہے دان

• مئی 25, 2020

ڈریکولا کا بھوت

• مئی 25, 2020

خونی سائنسدان

• مئی 25, 2020

پہلا حصّہ

”حاجو خان! تم سے ایک کام ہے۔ اس کام کے بدلے میں تمہیں دس ہزار روپے دوں گا۔ کام اتنا مشکل نہیں ہے۔ بس تم وہ چیز لاکر مجھے دے دوگے اور تمہارا کام ختم۔ پھر تم سے اس چیز کے بارے میں کوئی نہیں پوچھے گا۔ نہ کوئی تم پر شک کرے گا۔ کیا خیال ہے ، یہ کام کروگے؟“

”ہاں! کیوں نہیں۔ مجھے آج کل پیسوں کی بہت زیادہ ضرورت ہے۔ آپ بس کام بتائیں۔“ حاجو خان نے کر کہا۔

وہ پراسرار آدمی اس سے جب بھی کوئی کام لیتا تھا، پہلے اسے ایک خط لکھتا تھا۔ اس خط میں ایک چابی ہوتی تھی۔ وہ چابی لے کر اس کی بتائی ہوئی عمارت تک پہنچ جاتا۔ عمارت کے دروازے پر لگا تالا اس چابی سے کھل جاتا تھا۔ عمارت کے ایک کمرے میں اسے اس پراسرار آدمی کی آواز سنائی دیتی تھی۔ اُ سے جو کام لینا ہوتا ، وہ اس کی تفصیل بتاتا تھا۔ معاوضے کی رقم بھی اس کمرے میں میز کی دراز سے مل جاتی تھی۔

وہ پراسرار آدمی آج تک ا س کے سامنے نہیں آیا تھا۔ پہلی مرتبہ بھی اس نے اس طرح اس کے نام ایک خط لکھا تھا۔ اس میں چابی تھی اور اس عمارت کا پتا جس میں اسے جانا تھا اور یہ ہدایات لکھی تھیں کہ وہ کسی کو کچھ بتائے بغیر اگر وہاں آجائے تو اس سے ایک بہت آسان سا کام لیا جائے گا اور معاوضہ دس ہزارو روپے بیٹھے بٹھائے مل جائے گا۔

اور واقعی وہ کام بہت آسان تھا۔ بس دفتر کے ایک آدمی کا قلم چرانا تھا۔ اس نے قلم چرا کر اس عمارت تک پہنچا دیا اور اپنے دس ہزار کھرے کرلیے۔ اس بات کو جب ایک ماہ گزر گیا اور پھر اس پراسرار آدمی کا فون نہ آیا تو اسے بے چینی محسوس ہونے لگی۔ وہ چاہنے لگا کہ اس کا فون آجائے اور وہ اس سے کوئی کام لے اور اسے دس ہزار اور مل جائیں۔ آخر ڈیڑھ ماہ بعد اس کا خط آ گیا۔ اس نے ایک اور چھوٹا سا کام اس سے لیا اور اسے دس ہزار مل گئے۔

اس وقت تک وہ اس سے ایسے کتنے ہی کام لے چکا تھا۔ وہ ایک سرکاری دفتر میں چپراسی تھا چوں کہ سب سے اعلیٰ افسر کا چپراسی تھا، اس لیے دوسرے آفیسرز کے کمروں میں اس کا روز کا آناجانا تھا۔

ان حالات میں قلم جیسی چیزیں پارکردینا اس کے لیے ذرا بھی مشکل کام نہیں تھا۔

”ہاں تو حاجو! اس مرتبہ تم اپنے آفیسر کی گھڑی چراکے لاﺅگے۔ یہ کام تمہارے لیے مشکل تو نہیں ہوگا۔“ آواز آئی۔

”جی…. جی نہیں ۔ مشکل تو نہیں ہوگا، لیکن ان کی گھڑی بہت قیمتی ہے، لہٰذا وہ سب سے باری باری پوچھیں گے اور جب نہیں ملے گی تو پولیس کو بلالیں گے۔ پولیس ہم جیسوں سے سوالات ضرور کرے گی۔ آپ جانتے ہی ہوں گے کہ پولیس کے سامنے اپنے چہرے کے تاثرات کو معمول پر رکھنا بہت مشکل ہوجاتا ہے۔ میرا بدلتا ہوا رنگ دیکھ کر انہیں مجھ پر شک ہوجائے گا اور آخر کار وہ مجھ سے اگلوالیں گے۔ پھر یہ ہوگا کہ میں انہیں یہاں تک لاﺅں گا۔ آگے کیا ہوگا؟ مجھے پتا نہیں، لیکن میرے حق میں بہرحال اچھا نہیں ہوگا۔“ یہاں تک کہہ کر حاجو خاموش ہوگیا۔

”تم اپنی بات پوری کرچکے۔“ ناخوش گوار آواز سنائی دی۔

”جی ہاں بالکل۔“

”میز کی دراز کھولو۔“

اس نے میز کی دراز کھولی تو چونک اٹھا۔ دراز میں ایک گھڑی رکھی تھی۔

”یہ…. یہ کیا جناب اس میں تو گھڑی موجود ہے۔“

”ہاں! یہ گھڑی جیب میں ڈال لو…. اپنے آفیسر کی گھڑی اٹھا کر اس کی جگہ یہ والی رکھ دینا۔ اس طرح نہ تو انہیں کوئی شک ہوگا نہ پولیس آئے گی اور نہ تم سے کوئی پوچھ گچھ ہوگی۔ اس سے اندازہ لگا لو مجھے تمہارا کتنا خیال ہے۔“

”وہ تو ٹھیک ہے لیکن یہ کیسے ہوسکتا ہے؟“ حاجو خان نے حیران ہوکر کہا۔

”کیا کیسے ہوسکتا ہے؟“

”بھلا گھڑی تبدیل ہونے کا انہیں کیوں پتا نہیں چلے گا۔“

”اس لیے کہ یہ گھڑی انہوں نے ابھی کل ہی خریدی ہے۔ لہٰذا اس دکان سے بالکل اسی جیسی گھڑی خریدنا کیا مشکل بات تھی۔“

”اب میرے لیے اور زیادہ حیرت کی بات ہوگئی۔ آخر آپ اس گھڑی کا کیا کریں گے۔“

”حاجو خان! تم سوالات بہت کرنے لگے ہو۔ اب میں اس قسم کے آسان سے کام کسی اور سے لیا کروں گا۔“

”نن…. نہیں سر…. نہیں۔“ وہ کانپ گیا کیوں کہ وہ ایسے چھوٹے چھوٹے کاموں کے دس دس ہزار روپے کئی بار وصول کرچکا تھا اور کمائی کے اس ذریعے سے ہاتھ نہیں دھونا چاہتا تھا۔

”اچھا تو پھر جاﺅ وہ گھڑی لاکر یہیں رکھ دینا۔ تمہارا معاوضہ اسی دراز سے تمہیں مل جائے گا۔“

”جی اچھا۔“

گھڑی جیب میں ڈال کر وہ باہر نکل آیا، لیکن آج وہ حد درجے الجھن محسوس کررہا تھا کیوں کہ یہ چکر اس کی سمجھ میں نہیں آیا تھا۔ سمجھ میں تو اس شخص کی کوئی بات پہلے بھی نہیں آئی تھی، لیکن گھڑی والے معاملے نے اسے کچھ زیادہ ہی الجھن میں ڈال دیا تھا۔ اس سے پہلے جب ایک آفیسر کا قلم اس نے چوری کرایا تھا تو اس نے بہت الجھن محسوس کی تھی۔ بھلا کوئی کسی کا قلم دس ہزار روپے خرچ کرکے کیوں چوری کرانے لگا؟ وہ اس سے کیا فائدہ اٹھا سکتا تھا؟ اسی طرح کی چند اور چیزیں اس نے دفتر کے لوگوں کی چوری کروائی تھیں۔ اب معاملہ ذرا مختلف تھا۔ اسے گھڑی اٹھا کر بدلے میں دوسری گھڑی رکھنا تھی۔ اس کے آفیسر کی عادت تھی کہ میز پر بیٹھتے ہی گھڑی اتار کر رکھ دیتے تھے اور پھر جانے کے وقت ہی پہنتے تھے۔ ان حالات میں اس کے لیے یہ کام بہت آسان تھا کیوں کہ آفیسر کئی بار اٹھ کر ادھر اُدھر جاتے تھے، لیکن وہ سوچ رہا تھا کہ بدلے میں رکھی جانے والی گھڑی میں نہ جانے کیا بات ہوگی اور وہ نامعلوم آدمی اس طرح کیا کرنا چاہتا ہے۔ ان باتوں نے اس کی الجھن میں اضافہ کردیا تھا۔

٭….٭….٭

دوسرے دن پروگرام کے مطابق وہ اس کمرے کا تالا کھول کر اندر داخل ہوا تو گھڑی اس کی جیب میں موجود تھی۔ اس نے دراز کھولی تو وہاں دس ہزار روپے موجود تھے۔ اس نے دھک دھک کرتے دل کے ساتھ گھڑی وہاں رکھ دی اور نوٹ جیب میں رکھ لیے۔

”میں نے گھڑی رکھ دی ہے۔“ اس نے منہ اوپر اٹھا کر کہا، لیکن اس شخص کی طرف سے کوئی جواب نہ ملا۔ اس کا مطلب تھا، وہ اس وقت اس مکان میں نہیں تھا، چنانچہ وہ باہر نکل آیا اور دروازے کو تالا لگا کر اپنے گھر چلا آیا۔

دوسرے دن صبح سویرے ناشتے سے پہلے وہ اخبار دیکھ رہا تھا کہ بہت زور سے اچھلا، اس کی آنکھیں مارے خوف کے پھیل گئیں۔

عین اس وقت اس کے فون کی گھنٹی بجی۔ اس نے لرزتے ہاتھوں سے فون اٹھایا تو دوسری طرف سے اسی پراسرار آدمی کی آواز سنائی دی۔

”حاجو خان۔“

”جج…. جی جناب۔“

”یہ تم نے اچھا نہیں کیا۔“

”کیا…. کیا مطلب؟“

”ایسا کرکے تم نے اپنے پاﺅں پر کلہاڑی ماری ہے۔“

”وہ کیسے؟“

”تم نے میری ہدایات پر عمل نہیں کیا جو گھڑی میں نے تمہیں دی تھی۔ وہ تم نے اپنے آفیسر کی میز پر نہیں رکھی اور اس کی گھڑی اٹھا کر اس مکان میں نہیں رکھی بلکہ تم نے مکان میں وہی گھڑی رکھ دی جو میں نے تمہیں دی تھی۔ تم نے ایسا ہی کیا ہے نا۔“

”ہاں! اس لیے کہ مجھے خوف محسوس ہوا تھا۔میں ڈر رہا تھا کہ نہ جانے اس گھڑی کی وجہ سے آفیسر صاحب کے ساتھ کیا معاملہ ہوجائے لہٰذا میں نے ایسا کیا۔ مجھے خوشی ہے کہ آفیسر بچ گئے اور وہ مکان تباہ ہوگیا۔“

”لیکن…. اب تم کس مشکل میں پھنس گئے ہو یہ ابھی تمہیں معلوم نہیں۔ آج ہی کسی وقت تم جان لوگے۔“

ان الفاظ کے ساتھ ہی فون بند ہوگیا۔ اس کا رنگ اڑ گیا اور جسم سے جان نکلتی محسوس ہوئی۔ اس نے سوچا وہ آج دفتر نہیں جاسکے گا، چنانچہ اس نے دفتر فون کردیا اور طبیعت خراب ہونے کا بتا کر چھٹی کرلی۔ اب بھی اس کا دل دھک دھک کررہا تھا۔ اس کی بیوی اور بیٹی اس کی حالت دیکھ کر پریشان ہوگئیں۔

”کیا بات ہے؟ آپ کو کیا ہوگیا ہے۔ تھوڑی دیر پہلے تو آپ بالکل ٹھیک ٹھاک تھے۔ مزے سے ناشتا کررہے تھے۔ پھر اخبار دیکھ کر آپ گھبراگئے اور اس کے بعد یہ فون سن کر آپ کی حالت اور خراب ہوگئی…. بات کیا ہے؟“

اس نے ان دونوں کی طرف خالی خالی نظروں سے دیکھا اور کتنی ہی دیر دیکھتا رہا…. پھر بولا:

”مجھ سے ایک بہت خوفناک غلطی ہونے لگی تھی۔ اللہ نے مجھے اس سے بچالیا، لیکن اب پریشانی آکر رہے گی۔“

”بات کیا ہے؟ آپ پوری بات بتائیں۔“ بیوی گھبرا گئی۔

وہ انہیں تفصیل سے سنانے لگا کیوں کہ اس نے سوچا تھا کہ بات تواب ویسے بھی نکل کر رہے گی کیوں نہ انہیں بتا کر دل ہلکا کرے۔ جونہی اس نے بات پوری کی۔ اس کا بیٹا بہت زور سے چونکا اور چلایا©:

”جلدی کریں آئیں میرے ساتھ۔“

”لیکن کہاں؟“ وہ گھبرا گیا۔

”ان باتوں کا وقت نہیں ہے جلدی کریں۔“

دوسرے ہی لمحے وہ ایک ٹیکسی میں بیٹھے اڑے جارہے تھے اور یہ ٹیکسی ایک صاف ستھرے گھر کے سامنے رکی۔ لڑکا اچھل کر ٹیکسی سے باہر نکلا اور اس نے دروازے کی گھنٹی بجادی۔ دروازہ کھلا اور ایک خوبصورت سا، شوخ سا لڑکا نظر آیا۔ یہ فاروق تھا۔ اسے دیکھ کر وہ حیران رہ گیا۔

”ارے اجمل تم!“ اس کے منہ سے بے اختیار نکلا۔

”السلام علیکم۔“

”وعلیکم السلام کہو خیریت تو ہے؟“

”خیریت نہیں ہے۔ ہم…. ہمیں …. انسپکٹر صاحب سے ملنا ہے….۱ ابھی اسی وقت۔“

”آپ اندر آجائیں۔“

”بہت بہت شکریہ۔“

اجمل اندر داخل ہوا۔ ادھر محمود نے اسے دیکھا، تو اس کے منہ سے بھی نکلا۔”ارے اجمل تم!!“

”ہاں محمود …. میں۔“ اجمل نے اٹک اٹک کر کہا۔

”خیر تو ہے اجمل…. بہت پریشان ہو۔“ محمود نے پوچھا۔

”جج…. جی ہاں۔“

”محمود تمہارے دوست ضرورت سے کچھ زیادہ پریشان ہیں۔ میرا خیال ہے مجھے بھی ٹھہرجانا چاہیے، کہیں انہیں میری ضرورت نہ ہو۔ آیئے تشریف رکھیے۔“ انسپکٹر جمشید نے اجمل کو بغور دیکھتے ہوئے کہا۔

”وہ…. آپ…. آپ بہت اچھے ہیں۔“

”شکریہ۔“ انسپکٹر جمشیدمسکرائے۔

”ڈرائنگ روم میں میرے والد صاحب موجود ہیں۔“ اجمل بولا۔

”پہلے آپ بات بتائیں پھر ان سے ملاقات کروں گا۔“ انسپکٹر جمشید نے کہا۔

”یہ آپ نے کس لیے کہا؟“ محمود کے لہجے میں حیرت در آئی۔

”بس یونہی…. آپ بات بتادیں۔“

اب اجمل نے پوری بات تفصیل سے بتادی۔ انسپکٹر جمشید چند لمحے تک سوچ میں غرق رہے پھر اس سے بولے:

”اچھی بات ہے آپ یہیں ٹھہریں۔ میں اکیلا ان سے بات کروں گا۔“

”جی اچھا۔“ اجمل نے قدرے پریشان ہوکر کہا۔

انسپکٹر جمشید ڈرائنگ روم میں داخل ہوتے ہوئے بولے:

”السلام علیکم حاجو خان صاحب۔“

”جج…. جی …. وعلیکم السلام۔“ وہ اٹھتے ہوئے بولا۔ چہرے پر گھبراہٹ ہی گھبراہٹ تھی۔

”بچے سے میں نے تفصیل سنی ہے۔ آپ محکمہ اطلاعات میں ہیں۔“

”جی ہاں۔“

”اس نامعلوم شخص سے تو ہم لوگ آپ کو بچانے کی کوشش کریں گے اور ان شاءاللہ آپ کو اس کی طرف سے کوئی نقصان نہیں پہنچے گا، لیکن جو جرم آپ کرچکے ہیں، میں آپ کو اس کی معافی نہیں دلاسکوں گا۔ اب یہ عدالت کا معاملہ ہے کہ وہ آپ کو کیا سزا دے گی۔“

یہ بھی بہت ہے کہ آپ مجھے اس شخص سے بچانے کی کوشش کریں گے۔“ اس نے مریل آواز میں کہا۔

”خوب ! اب ذرا آپ شروع سے بتائیں۔ اس نے آپ سے کس طرح رابطہ کیا۔“

”جی میں عرض کرتا ہوں پہلی بار ا س نے مجھے ایک خط لکھا تھا۔ خط میں ایک چابی تھی۔ اس نے لکھا تھا، میں تمہارے بارے میں سب کچھ جانتا ہوں۔ مالی مشکلات میں مبتلا ہو، کوئی مدد کرنے والا نہیں، لیکن میں تمہاری بہت اچھے طریقے سے مدد کرسکتا ہوں۔ پتا لکھ رہا ہوں، اس پتے پر آجاﺅ۔ چابی سے تالا کھول کر میرا نتظار کرنا، میں جلد ہی آجاﺅں گا۔“ یہ خط پڑھ کر اور چابی دیکھ کر میں بہت حیران ہوا اور پھر یہ الجھن مجھے وہاں لے گئی کہ آخر یہ شخص چاہتا کیا ہے۔ وہاں یہ شخص میرے سامنے نہیں آیا بلکہ میں نے اس کی آوا ز سنی۔ اس نے مجھ سے کہا:” ایک چھوٹا سا کام ہے۔ تم اپنے دفتر کے اسسٹنٹ ڈائریکٹر فیاض حامد کا پین مجھے لاکر دے دو، میں تمہیں اتنے سے کام کے دس ہزار روپے دوں گا، کیوں کیا خیال ہے؟“ اب آپ خود سوچیں میں ٹھہرا محکمہ کے ڈائریکٹر نصیر الدین شاہ صاحب کا چپراسی۔ مجھے تو ہر کمرے میں جانا آنا پڑتا ہے اور اس قسم کی چیز اٹھا کر جیب میں رکھ لینا میرے لیے بھلا کیا مشکل کام ہوسکتا ہے۔ میں حیران تو بہت ہوا، لیکن دس ہزار کا لالچ میری حیرت پر چھا گیا اور میں نے یہ کام کرنے کی حامی بھرلی۔ میرا جواب سن کر اس نے کہا۔”بس تو پھر تم وہ قلم کل لے کر یہیں آجانا۔ تمہیں دس ہزار روپے مل جائیں گے۔ سو میں وہاں قلم لے گیا۔ اس کی آواز سنائی دی کہ میز کی دراز کھول کر قلم اس میں رکھ دو اور اس میں سے دس ہزار روپے لے لو۔ بس میں نے ایسا ہی کیا۔ دو ماہ بعد اس کا خط پھر مجھے ملا۔ اس میں پھر چابی تھی۔ میں حیران ہوا، اس بار اس نے ہیڈ کلرک سلیم راشد صاحب کا لائٹر منگوایا تھا۔ میں نے ان کا لائٹر بھی وہاں پہنچادیا۔ اس طرح مجھے دس ہزار اور مل گئے۔ پھر ڈیڑھ ماہ بعد اس کا خط ملا۔ اس بار اس نے نصیرالدین شاہ صاحب کی ردی کی ٹوکری کے کاغذات منگوائے تھے۔ میں نے وہ بھی وہاں پہنچادیے۔ اب یہ چوتھا موقع تھا۔ اس بار اس نے کہا تھا کہ اپنے آفیسر کی گھڑی چرا کر وہاں پہنچادوں۔ اس پر میں نے کہا کہ ان کی گھڑی تو بہت مہنگی ہے۔ دفتر میں شور مچ جائے گا۔ پھر پولیس آئے گی اور وہ اگلوالے گی۔ اس طرح میں پھنس جاﺅں گا۔ تب اس نے کہا کہ میز کی دراز میں سے ایک گھڑی اٹھالو۔ یہ اس کی جگہ رکھ دینا کیونکہ یہ بالکل ویسی ہے۔ یہ اور زیادہ الجھن میں مبتلا کردینے والی بات تھی۔ مجھے اور تو کچھ نہ سوجھا۔ میں نے صاحب کی گھڑی تو چرائی نہ اور اسی کی گھڑی دراز میں رکھ دی اور پیسے اٹھا کر لے آیا۔ دوسرے دن وہ مکان دھماکے سے اڑ گیا۔ تب میرے ہوش جاتے رہے۔ یہ گویا نصیر الدین شاہ صاحب کو اڑانے کا پروگرام تھا۔ ادھر ساتھ ہی اس کا فون ملا۔ اس نے مجھے جان سے مار ڈالنے کی دھمکی دی۔ مجھے پریشان دیکھ کر میرا بیٹے مجھے یہاں لے آیا۔ اب میں حاضر ہوں جو جرم مجھ سے سرزد ہوا ہے، میں نے بیان کردیا ہے اور میں اللہ کا شکر ادا کررہا ہوں کہ میں نے وہ گھڑی شاہ صاحب کی میز پر نہیں رکھ دی۔ ورنہ شاید اس وقت….“ یہ کہتے ہوئے وہ کانپ گیا۔

اس کے خاموش ہونے پر انسپکٹر جمشید چند سیکنڈ تک سوچ میں گم رہے۔ پھر انہوں نے کہا۔

”آپ کی حفاظت کی جائے گی۔ آپ پر مقدمہ اس پراسرار شخص کی گرفتاری کے بعد قائم کیا جائے گا۔ فی الحال آپ کو حوالات نہیں بھیجا جاسکتا کیوں کہ ہوسکتا ہے، وہ شخص آپ کو حوالات میں ختم کرانے کی کوشش کرے، لہٰذا میں آپ کو خفیہ جگہ رکھوں گا۔ آپ کے بچے اور گھر والے بھی آپ کے ساتھ رہیں گے۔ آپ مجھے یہ بتائیں کیا آپ کو ہر مرتبہ اسی مکان میں بلایا جاتا تھا یا وہ مکان ہر بار بدل دیتا تھا؟“

”جی نہیں میں ہر بار وہیں جاتا رہا ہوں۔“

”ہوں! اس مکان کا پتا مجھے لکھوادیں۔ ویسے تو وہاں بہت لوگ جمع ہوں گے۔ دور سے ہی پتا چل جائے گا کہ وہ مکان ہے۔“

”جی ہاں! وہ مکان رام گلی نمبر 19میں ہے۔“ اس نے کہا۔

انہوں نے پتا نوٹ کرلیا۔پھر اکرام کے نمبر ملائے۔ وہ آیا تو حاجو خان کو اس کے حوالے کردیاگیا اور ہدایات بھی دیں۔ اکرام اسے لے کر اسی وقت چلا گیا۔ اجمل کو وہیں روک لیا گیا تھا۔ پھر اکرام اس کے والد کو خفیہ ٹھکانہ نمبر ایک میں لے گیا۔ جلد ہی ا س کی واپسی ہوئی۔ اب اس نے اجمل کو ساتھ لیا اور اس کے گھر پہنچا۔ گھر کے افراد کو ساتھ لیا اور خفیہ ٹھکانے پر پہنچ گیا۔ جیپ میں لگے آلات نے اسے اس قابل بنادیا تھا کہ کوئی جیپ کا تعاقب نہیں کرسکتا تھا اور اگر کرتا تو پتا چل جاتا۔

ان کی طرف سے اطمینان ہوجانے کے بعد انسپکٹر جمشید ان سے بولے۔

”میں ذرا اس تباہ شدہ مکان کو دیکھنا چاہتا ہوں۔ محمود، فاروق کیا تم میرے ساتھ چل رہے ہو؟“

”جی ہاں! کیوں نہیں۔“

وہ اسی وقت گھر سے روانہ ہوئے اور مکان کے سامنے پہنچ گئے۔ پولیس نے اس کے گرد گھیرا ڈالا ہوا تھا۔ مکان اس بری طرح تباہ ہوا تھا کہ بس اب صرف ملبے کا ڈھیر نظر آرہا تھا۔ انہوں نے وہاں موجود ایک حوالدار کی طرف قدم اٹھادیے۔ وہ معمول کے مطابق سادہ لباس میں تھے اور آئے بھی تھے اپنی ذاتی کار میں۔ اس لیے حوالدار نے ان کی طرف لپکنے کی کوشش نہیں کی تھی۔

”کیا معلوم ہوا؟“

”کس بارے میں۔“ اس کا لہجہ کافی اکھڑا تھا۔

”اس دھماکے کے بارے میں۔“ وہ مسکرائے۔

”صا ف ظاہر ہے کسی دہشت گرد کی کارروائی ہے۔“

”مکان تھا کس کا؟“

”آپ ہیں کون؟ سوالات تو ایسے کررہے ہیں جیسے مجھ پر افسر لگے ہوئے ہیں۔“

”نہیں ! میں آپ پر افسرنہیں ہوں۔ ویسے میرا نام انسپکٹر جمشید ہے۔“

”جی!!!“اس کا رنگ اڑ گیا۔

”مکان کے مالک کے بارے میں معلوم ہوا؟“

”جی ہاں! مکان کا مالک اسی محلے میں رہتا ہے۔“

”میں اس سے ملنا چاہتا ہوں۔“

”ابھی یہیں کھڑا حسرت بھری نظروں سے ملبے کے ڈھیر کو دیکھ رہا تھا۔ پھر چلا گیا، اس نے یہ مکان کرائے پر دیا ہوا تھا۔ خوش قسمتی سے کرائے دار اس وقت گھر میں نہیں تھا۔“

”ہوں! مجھے اس کے گھر تک لے چلیں۔“

”آیئے۔“ اس نے کہا اور چل پڑا۔

جلد ہی وہ ایک شان دار مکان کے سامنے پہنچے۔ حوالدار نے گھنٹی کا بٹن دبایا تو فوراً ایک شخص باہر نکل آیا۔

”یہ ہمارے آفیسر ہیں۔ آپ سے کچھ پوچھنا چاہتے ہیں۔“

مالک مکان نے جونہی ان کی طرف دیکھا اس کے چہرے پر زلزلے کے آثار طاری ہوگئے۔ ادھر انسپکٹر جمشید کے منہ سے نکلا۔

”باقر شاہ…. تم؟“

دوسرے ہی لمحے انسپکٹر جمشید کے ہاتھ میں پستول نظر آیا۔ وہ سرد آوا ز میں بولے۔

”خبردار! ہاتھ اوپر اٹھا دو۔“

”لیکن کیوں؟ مدت ہوئی میں جرائم کی زندگی چھوڑ چکا ہوں۔ جرائم سے اب میرا دور کا بھی واسطہ نہیں۔“

”میںنے کہا ہے ہاتھ اوپر اٹھاﺅ۔“

اس نے بھنائے ہوئے انداز میں دونوں ہاتھ بلند کرلیے۔

”اب ساکت کھڑے رہنا۔ محمود! اس کی تلاشی لو۔“

”جی اچھا۔“ ا س نے کہا اور جلدی جلدی تلاشی لینے لگا، لیکن اس کے پاس سے کوئی ایسی ویسی چیز برآمد نہ ہوئی۔

”کچھ نہیں ہے ابا جان۔“ محمود بولا۔

”ٹھیک ہے۔ ہاتھ نیچے کرلو اور یہ بتاﺅ تم یہ حرکتیں کیوں کررہے ہو؟“

”جی…. کون سی حرکتیں؟“

”بھئی یہ حاجو خان والی۔“

”میں کسی حاجو خان کو نہیں جانتا۔“

”یہ مکان جو تباہ ہوا…. کیا تمہارا نہیں ہے۔“

”جی بالکل میرا ہے۔ کچھ مدت پہلے میں نے خریدا تھا۔“

”اور یہ مکان جس میں تم رہ رہے ہو۔“ انہوں نے پوچھا۔

”یہ بھی میرا ہے۔ اس میں، میں اپنے بیوی بچوں کے ساتھ رہتا ہوں۔ وہ میں نے اس لیے خریدا تھا کہ کرائے پر چڑھایا کروں گا۔ اس طرح روزی کی ایک صورت بنی رہے گی۔“

”خوب خوب! آج کل کس نے کرائے پر لے رکھا تھا۔“

”ایک صاحب ہیں۔ نصیر جان کچھ ہی دن پہلے انہو ں نے کرائے پر لیا تھا۔ چھے ماہ کا پیشگی کرایہ دیا تھا انہوں نے۔“

”کیا وہ یہاں رہتے بھی رہے ہیں۔“

”وہ تمام دن باہر رہتے ہیں۔ اپنے کام کا ج کے سلسلے میں۔ رات گئے آتے ہیں۔ یہ بات انہوں نے مجھے پہلے ہی بتادی تھی۔ اس لیے ظاہر ہے انہیں کم ہی لوگوں نے دیکھا ہوگا۔“

”ہوں! ان کا حلیہ تو آپ بتا ہی سکتے ہیں۔“انسپکٹر جمشید مسکرائے۔

”جی ہاں! کیوں نہیں۔ وہ لمبے قد کے، دبلے پتلے سے آدمی ہیں۔ رنگ سرخ اور سفید ہے۔ آنکھیں نیلے رنگ کی، ناک بہت باریک سی اور سر کے بال سرخی مائل اور ہونٹ بھی بہت پتلے پتلے سے۔ بس یوں لگتا ہے جیسے دو لکیریں سی ہوں۔“

”کیا؟“ انسپکٹر جمشید مارے خوف کے چلائے۔

انہیں اس حد تک خوف زدہ دیکھ کر محمود، فاروق، خان عبدالرحمن اور پروفیسر داﺅد بھی ساکت رہ گئے۔

”کیا تم نے بالکل درست حلیہ بتایا ہے۔“

”جج…. جی ہاں…. لیکن بات کیا ہے؟ آپ جیسا شخص اور خوف زدہ۔“

دوسرا حصّہ

”باقر شاہ! تم نے حلیہ اگر درست بتایا ہے اور میرا خیال ہے کہ درست ہی بتایا ہے فرضی نہیں بتایا۔ تب وہ آدمی دنیا کے خطرناک ترین چند لوگوں میں سے ایک ہے اور اس کا ہمارے ملک میں ہونا خطرے کی گھنٹی ہے۔ ظاہر ہے، وہ کسی نیک ارادے سے نہیں آیا۔ اس کا پہلا نشانہ نصیر الدین شاہ تھے، لیکن حاجو خان کی عقل مندی سے وہ بال بال بچ گئے۔ ورنہ اس وقت ہم ان کی لاش کے گرد جمع ہوتے۔ اب جناب باقر شاہ آپ کو ہمارے ساتھ دفتر چلنا ہوگا۔“

”لیکن کیوں؟ میرا اس معاملے سے کیا تعلقہے۔ میں تو بس ایک مالک مکان ہوں اور اس نے مجھ سے میرا مکان کرائے پر لیا تھا۔“

”ہاں! میں مانتا ہوں، لیکن اگر آپ کوئی عام آدمی ہوتے تو یہ بات کہی جاسکتی تھی اور کوئی شک کرنے کی ضرورت بھی نہیں تھی،مگر چونکہ آپ جرائم پیشہ رہے ہیں اس لیے گمان گزرتا ہے کہ اس نے آپ سے باقاعدہ رابطہ کیا ہوگا اور تعاون کرنے کے سلسلے میں کوئی رقم پیش کی ہوگی۔ اب اگر آپ نے اس سے کوئی رقم کرائے کے علاوہ وصول کی ہے….تب تو آپ پھنس گئے ہیں۔ ورنہ ہم آپ کو کچھ نہیں کہیں گے۔ کیا خیال ہے؟“ یہاں تک کہہ کر انسپکٹر جمشید خاموش ہوگئے۔

”ٹھیک ہے میں آپ کے ساتھ چلنے کے لیے تیار ہوں۔ آپ میرے بارے میں اپنا اطمینان کرلیں۔“

وہ اسے دفتر لے آئے۔ انہوں نے اس کے بارے میں جہاں سے بھی ہوسکا، معلومات حاصل کیں، لیکن اس کی کسی مجرمانہ سرگرمی کاپتا نہ چل سکا۔ آخر انہوں نے اسے جانے کی اجازت دے دی۔ تاہم انہوں نے اکرام کو ہدایات دیں کہ ایک آدمی اس کی نگرانی پر مقرر کردیا جائے۔ ابھی انہوں نے اسے رخصت کیا ہی تھا کہ ایک خفیہ کارکن کا فون موصول ہوا۔ وہ خوف زدہ انداز میں کہہ رہا تھا:

”سر! عمارت نمبر 1کے آس پاس کچھ پراسرار لوگ نظر آرہے ہیں۔

”کیا…. نہیں۔“

”یس سر! حاجو خان اور اس کے بیوی بچوں کو اسی عمارت میں رکھا گیا ہے۔“

”نن نہیں…. میں آرہا ہوں۔ سب لوگ ہوشیار ہوجائیں حاجو خان اور اس کے بیوی بچوں کو کچھ ہوا تو مجھے بہت افسوس ہوگا۔ میں نے اس سے کہا تھا تمہاری حفاظت کی جائے گی۔“

”ہم پوری طرح ہوشیار ہیں جناب!“

”ٹھیک ہے ہم پہنچ رہے ہیں۔“

وہ اسی وقت روانہ ہوگئے۔

”لگتا ہے یہ شخص ہمیں سکون کا سانس نہیں لینے دے گا۔ باریک ہونٹوں والے کا نام کیا ہے جمشید…. تم نے اس کے بارے میں کچھ نہیں بتایا۔“ خان عبدالرحمن بولے۔

”اس کا نام بلتان ہے۔ وہ ایک بین الاقوامی مجرم ہے۔ اس کا ہمارے ملک میں ہونا خطرے سے خالی نہیں ہے۔ باقر شاہ نے جو حلیہ بتایا ہے وہ اس پر بالکل فٹ بیٹھتا ہے۔ پھر بھی میری دعا ہے کہ وہ ہمارے ملک میں نہ ہو۔“

”گویا آپ بھی اس سے خوف محسوس کررہے ہیں۔“

”اس سے تو بڑی بڑی حکومتیں خوف کھاتی ہیں۔“

”لیکن وہ خود کس ملک کے لیے کام کرتا ہے؟“

”کسی ملک کے لیے نہیں جو ملک اس سے معاملہ طے کرتا ہے، اس کا منہ مانگا معاوضہ ادا کرتا ہے۔ اسی کے واسطے کام کرنے کے لیے تیار ہوجاتا ہے، البتہ….“ یہاں تک کہہ کر وہ رک گئے۔

”البتہ کیا؟“

”البتہ! اس نے آج تک کسی اسلامی ملک کے لیے کوئی کام نہیں کیا۔ جب بھی کیا اسلام دشمن ملکوں کے لیے کیا۔ یہی وجہ ہے کہ تمام غیر اسلامی ممالک میں اسے قدر کی نگاہ سے دیکھا جاتا ہے۔ ا س کی بہت عزت کی جاتی ہے۔ ان حکومتوں کے سربراہ اس بات کو مانتے ہیں۔ ایک طرح سے اس کی حالت یہ ہے کہ وہ کسی بھی ملک کے کسی بھی محکمے میں دخل اندازی کرڈالتا ہے اور کوئی اس سے جواب طلب نہیں کرتا۔“

”اس کامطلب ہے وہ خالص اسلام دشمن ہے۔“محمود نے پریشانی کے عالم میں کہا۔

”بالکل…. اس میں کوئی شک نہیں۔“

اسی وقت وہ خفیہ عمارت نمبر 1کے سامنے پہنچ گئے۔ انہوں نے گاڑی سے اتر کر چاروں طرف کا جائزہ لیا اور پھر ان کا رنگ اڑ گیا۔ ان کے منہ سے نکلا:

”حیرت ہے…. کمال ہے۔“

”کک…. کیا مطلب؟ جمشید کیا ہوا۔“پروفیسر داﺅدفوراً بولے۔

”عمارت چاروں طرف سے گھیرے میں ہے۔ پہلی حیرت یہ کہ انہوں نے اس کا سراغ کس طرح لگا لیا،دوسری حیرت یہ کہ ان لوگوں نے عمارت کو اس طرح گھیرے میں لیا ہے کہ وہ تو عمارت پر ہر طرف سے حملہ کرسکتے ہیں اور ہم ان پر وار نہیں کرسکتے۔“

”اوہ…. اوہ….“ ان کے منہ سے مارے خوف کے نکلا۔

”اور ایک تیسری بات۔“ انسپکٹر جمشید مسکرائے۔

”اور وہ کیا؟“

”عمارت کے پاس آتے ہی اب ہم بھی پوری طرح ان کی زد میں ہیں۔“

”اوہ۔“ وہ بولے۔

”بالکل ٹھیک کہا انسپکٹر جمشید نے تم بہت ذہین ہو۔ تم سے پہلی ملاقات پر خوشی ہوئی۔“

عمارت کے پاس آواز گونجی۔ انہوں نے ایک بار پھر چاروں طرف کا جائزہ لیا۔

”کیا چاہتے ہو دوست۔“ انسپکٹر جمشید مسکرائے۔

”صرف اور صرف ایک ہی مطالبہ ہے میرا تو حاجو خان کو میرے حوالے کردےں اور بس۔“

”پہلے ہم عمارت کے اندر جائیں گے۔ پھر آپ سے بات کریں گے۔“

”ضرور…. ضرور کوئی اعتراض نہیں۔“ ہنس کر کہا گیا۔ اس کی آواز بھی بہت باریک تھی۔

اور پھر وہ عمارت میں داخل ہوگئے۔ اندر خفیہ کارکنوں کے رنگ اڑے ہوئے تھے۔

”حاجو خان اور اس کے بیوی بچے کہاں ہیں؟“

”جی …. آخری کمرے میں۔“

”اوکے…. پروفیسر صاحب آپ کیا چاہتے ہیں؟“

”میں چھت پر جارہا ہوں جمشید تم تیاری مکمل کرلو۔ جونہی تم اشارہ دوگے۔ میں حرکت میں آجاﺅں گا۔“

”بہت خوب! بس ہم چند منٹ لگائیں گے۔“

”اوکے۔“ پروفیسر صاحب نے کہا اور فوراً اوپر کی طرف دوڑے۔

ایسے میں باہر سے آواز آئی۔

”ہاں تو انسپکٹر جمشیدکیا پروگرام ہے؟“

”دو منٹ ٹھہریں۔“

”ٹھہرنے کو تو میں تین منٹ ٹھہر جاﺅں۔“ باہر سے ہنس کر کہا گیا۔

پھر دو منٹ بعد انسپکٹر جمشید نے پروفیسر داﺅد کو اشارہ کیا۔

پروفیسر داﺅد نے پہلے سامنے کی طرف پھر دائیں، پھر بائیں اور آخر میں پچھلی طرف چار ننھی منی سی گیندیں اچھال دیں۔ فوراً ہی چار دھماکے ہوئے اور ہر طرف دھواں پھیل گیا۔ گیندیں پھینکنے کے فوراً بعد وہ نیچے اتر آئے اور وہاں پہنچ گئے جہاں باقی لو گ موجود تھے۔

خفیہ عمارت کے نیچے ایک تہ خانہ تھا۔ اس تہ خانے سے ایک راستہ نکلتا تھا۔ وہ عمارت سے کافی دور تھا۔ اس راستے سے ہوتے ہوئے وہ جنگل میں نکل گئے اور درختوں کی اوٹ لے کر اب وہ بلتان کے آدمیوں کے گھیرے سے باہر آچکے تھے۔ ادھر خفیہ ٹھکانہ ابھی تک دھوئیں میں ڈوبا ہوا تھا۔ انہوں نے سنا کوئی کہہ رہا تھا:

”خبردار ! دائرہ بڑا کرلو۔ اس دھوئیں کا سہارا لے کر وہ باہر نکلنے کی کوشش کریں گے۔ ان میں سے ایک بھی بچ کر نہ جائے۔“

یہ الفاظ سن کر وہ مسکرا دیے۔ انسپکٹر جمشید نے اپنے ساتھی کو اشارہ کیا کہ کچھ اور پیچھے ہٹ کے درختوں کی اوٹ میں پوزیشن لے لیں۔ انہوں نے ایسا ہی کیا۔ پھر جونہی دشمن پیچھے ہٹنے کے چکر میں ان کی نظروں میں آیا۔ انہوں نے تاک تاک کر گولیاں برسادیں۔ وہ اچھلا چھل کر گرے۔ ان میں سے کوئی بھی بچ کرنہ نکل سکا۔ اس کے باوجود وہ احتیاطاً کافی دیر تک اپنی جگہوں پر کھڑے رہے۔ جب پوری طرح اطمینان ہوگیا، تب وہاں سے آگے بڑھے۔ انہوں نے گرنے والوں کا جائزہ لیا۔ وہ سب کے سب بری طرح زخمی تھے، گولیاں ان کی ٹانگوں پر ماری گئی تھیں۔ پھر اکرام کو فون کیا گیا۔ وہ بڑی گاڑی کے ساتھ وہاں پہنچ گیا۔ زخمی بارہ عددتھے۔ انہیں ہسپتال بھیجنے اور اکرام کو ان کے بارے میں ہدایات دینے کے بعد انہوںنے اطمینان کا سانس لیا۔

”اب رہ گئے حاجو خان اور ان کے گھر والے ان کا کیا کریں؟“

”شاید ہمارا کوئی خفیہ ٹھکانہ بلتان کی نظروں سے چھپا ہوا نہیں ہے۔ اس لیے اب ہم انہیں اپنے گھر میں رکھیں گے۔ اب جو ہوگا وہاں ہوگا۔“

”اس کامطلب ہے آپ بلتان کو اپنے گھر پر حملے کی دعوت دے رہے ہیں؟“

”کیا کیا جائے مجبوری ہے۔“ وہ مسکرائے۔

”لیکن بلتان خود کہاں ہے؟ ہم نے جس کی آواز سنی تھی۔ کیا وہ بلتان تھا۔“ خان عبدالرحمن بولے۔

”ابھی کچھ کہا نہیں جاسکتا، لیکن ہم یہ بات معلوم کرسکتے ہیں۔“

”وہ کیسے جمشید؟“

”زخمیوں کے ہوش میں آنے پر آخر ان سے بات چیت کی جائے گی۔ ان کی آوازیں سنی جائیں گی۔ اس سے معلوم ہوجائے گا۔ ا س کے علاوہ ان سے پوچھا جائے گا کہ وہ کس کے لیے کام کررہے ہیں…. وغیرہ۔“ انہوں نے جواب دیا۔

”لیکن سب سے پہلے حاجو خان کی حفاظت کا مسئلہ ہے۔“

”آپ…. آپ میرے لیے کس قدر کوشش کررہے ہیں اور ایک میں ہوں۔“ یہ کہتے ہوئے حاجو خان رو پڑا۔

”فکر نہ کرو غلطی انسان سے ہوتی ہے، لیکن تم نے دھماکے والی گھڑی خود اس کی جگہ پر رکھ کر بہت بڑا کارنامہ انجام دیا ہے۔ اس بنیا د پر صرف میں ہی نہیں، نصیر الدین صاحب بھی تمہاری سفار ش کریں گے۔ امید ہے عدالت بھی تمہیں رہا کردے گی۔“

”اللہ آپ کا بھلا کرے۔“

پھر وہ وہاں سے گھر پہنچ گئے۔ حاجو خان اور اس کے بیوی بچوں کو بیگم جمشید کے حوالے کردیا گیا۔ صورت حال سمجھا دی گئی۔ ہسپتال فون کیا گیا تو اکرام نے بتایا۔ وہ سب ہوش میں آچکے ہیں۔ وہ اسی وقت روانہ ہوگئے۔

انہیں جس ہال میں رکھا گیا تھا۔ اس کے گرد پولیس کا پہرہ تھا۔ وہ اس ہال میں داخل ہوئے۔ اندر اکرام موجود تھا۔

”کچھ بتایا انہوں نے۔“

”جی ابھی نہیں۔“

وہ آگے بڑھے۔ انہوں نے باری باری سب سے بات کی، لیکن ان میں وہ آواز سنائی نہ دی جو وہ خفیہ عمارت کے باہر سن چکے تھے۔

”اس کا مطلب ہے تمہارا باس وہاں تھا ضرور، لیکن کسی الگ جگہ پر تھا۔“

”جی…. جی ہاں وہ ایک درخت پر تھا۔“

”اوہ!“وہ حیرت زدہ رہ گئے۔

”جب تم لوگ پیچھے ہٹے تھے۔ کیاوہ اس وقت درخت پر ہی تھا۔“

”جی ہاں بالکل۔“

”اس کا نام اور حلیہ….“

”ہم اس کا نام نہیں جانتے۔ نہ حلیہ بیان کرسکتے ہیں کیونکہ وہ نقاب میں تھا۔“

”تم اس کے لیے کب سے کام کررہے ہو؟ وہ تمہارا نیا نیا باس ہے یا کوئی پرانا آدمی ہے۔

”بہت پرانا، اس کا ہمارا ساتھ تو برسوں پرانا ہے۔“

”حیرت ہے۔ پھر بھی تم اس کا نام نہیں جانتے۔“

”بس…. ہم اسے باس کہتے ہیں۔“

”وہ تمہیں احکامات کس طرح دیتا ہے اور کہاں بلاتا ہے؟ کچھ تو بتاﺅ۔“

”ہمارا گرو ہ بہت پرانا ہے۔ وہ ہر ماہ ہمیں ہار ڈی بلڈنگ کے سامنے بلاتا ہے۔ وہیں ہمیں تنخواہ دیتا ہے۔ نئے احکامات دیتا ہے یا پھر فون پر رابطہ کرتا ہے۔“

”اس کا فون نمبر؟“

”فون اسی بلڈنگ کا ہے۔ ایکس ٹینشن نمبر دباناپڑتا ہے 8نمبرہے۔“

”فون نمبر بتاﺅ۔“

انہوں نے نمبر بتادیا۔ نمبر ڈائل کیا گیا، لیکن 8نمبر سے کسی نے فون نہ اٹھایا۔ اب وہ سمجھ گئے کہ ان لوگوں کا باس کوئی مقامی آدمی ہے۔ اس مقامی آدمی سے بلتان کام لے رہا ہے۔ وہ خود سامنے نہیں آیا گویا بلتان تک پہنچنا اتنا آسان کام نہیں تھا۔ آخر وہ ہارڈی بلڈنگ پہنچے۔ اس بلڈنگ میں بے شمار کمرے تھے۔ کمرے کرائے پر دیے جاتے تھے۔ عمارت کے مالک کا نام بھی ہارڈی تھا۔ انہوں نے اس سے ملاقات کی۔ وہ پریشان ہوگیا اور گھبرا سا گیا۔

”میں کیا خدمت کرسکتا ہوں؟“

”کمرا نمبر 302میں کون رہتا ہے۔“

”جج…. جی…. کمرا نمبر 302میں۔“ وہ بری طرح ہکلانے لگا۔

”ہاں۔“ انسپکٹر جمشید نے اسے گھورا۔

”وہ ایک پراسرار آدمی ہے۔ شاید اپنا حلیہ تبدیل کیے رہتا ہے اور جناب! ہمارا کام تو عمارت کے کمرے کرائے پر دینا ہے…. میں نے یہ عمارت اسی لیے بنوائی ہے۔“ اس نے جلدی جلدی کہا۔

”ہوں! ٹھیک ہے۔ کیا وہ اس کمرے میں آتا جاتا ہے؟“

”ہاں جی! بالکل آتا جاتا ہے۔“

”ہم اس کمر ے کو دیکھنا چاہتے ہیں۔“

”میرے پاس ہر کمرے کی چابی ہوتی ہے۔ کمرا کھول کر دکھا سکتا ہوں۔“

”چلیے پھر۔“

وہ اس کے ساتھ کمرے میں آئے۔ پھر انہوں نے اکرام کے ذریعے کمرے سے انگلیوں کے نشانات اٹھوائے۔

”اکرام اب تم ان نشانات کو چیک کرلو۔ شاید ہمارے ریکارڈ میں یہ نشانات مل جائیں۔“ انسپکٹر جمشید نے کہا۔

”جی اچھا۔“

”اور ہاں !مسٹر ہارڈی کی انگلیوں کے نشانات بھی لے لو۔“

”جی….کیا مطلب؟ یہ ….یہ آپ کیا کہہ رہے ہیں۔ میرا بھلا کسی معاملے سے کیوں تعلق ہونے لگا۔ میں تو ایک سیدھا سادہ عام سا آدمی ہوں۔“

”تب پھر انگلیوں کے نشانات دینے میں کیا ڈر؟“ انسپکٹر جمشید مسکرائے۔

”اوہ ہاں…. واقعی یہ بھی ٹھیک ہے۔“

پھر اس نے نشانات دے دیے۔ ان پر ایک نظر ڈالتے ہی اکرام کے چہرے پر حیرت کے آثار ابھر آئے۔ اس نے جلدی سے کمرے میں پائے جانے والے نشانات کو ان نشانات سے ملایا تو اچھل پڑا۔

”یہ ا س کمرے میں پائے جانے والے نشانات مسٹر ہارڈی کے ہیں۔“

”اس …. اس سے کیا ہوتا ہے؟ مجھے تو آخر ہر کمرے میں جانا آنا پڑتا ہے۔ صفائی کرانا پڑتی ہے اور کرائے داروں کے آرام کا خیال کرنا پڑتا ہے۔“

”اکرام! چند اور کمروں سے انگلیوں کے نشانات اٹھواﺅ۔“

”جی …. کیا مطلب؟ اکرام اور ہارڈی نے ایک ساتھ کہا۔

”مطلب یہ کہ ہم دیکھنا چاہتے ہیں دوسرے کمروں میں بھی اسی طرح آپ کی انگلیوں کے نشانات ملتے ہیں یا نہیں۔“

”اوہ….اوہ۔“ ا س کے منہ سے نکلا۔

اکرام نے جلد ہی اپنا یہ کام بھی مکمل کر لیا۔ پھر وہ ان کی طرف آیا۔

”نہیں سر! کسی کمرے سے مسٹر ہارڈ ی کی انگلیوں کے نشانات نہیں ملے…. دوسرے ملازموں کے ضرور ملے ہیں جو صفائی کرتے ہیں۔“

ہارڈی کا چہرہ زرد پڑگیا۔ عین اس لمحے انسپکٹر جمشید کے موبائل کی گھنٹی بجی۔

جونہی انہوں نے فون آن کیا۔ دوسری طرف سے بیگم جمشید کی خوف زدہ آواز ابھری:

”میں خطرہ محسوس کررہی ہوں۔“

فون سنتے ہی انسپکٹر جمشید پریشان ہوگئے۔ انہوں نے فوراً اکرام کی طر ف رخ کیا۔

”اسے لے جاکر حوالات میں بند کردو۔ اس سے بلتان کے بارے میں ضرور کچھ معلوم ہوسکتا ہے۔ ادھر گھر میں کسی گڑبڑ کا امکان ہے۔ غالباً بلتان حاجو کو سزا دینے کے لیے بری طرح بے چین ہے اور جلد از جلد اس کام سے فارغ ہوجانا چاہتا ہے۔“

وہ اندھا دھند انداز میں گاڑی چلاتے گھر پہنچے۔ گھر کا دروازہ بند تھا۔ محمود نے دوڑ کی گھنٹی کا بٹن دبادیا۔ دس پندرہ سیکنڈ گزرنے پر اس نے پھر بٹن دبادیا۔ اندر گھنٹی بجنے کی آواز سنائی دی، لیکن بیگم جمشید نے پھر بھی دروازہ نہ کھولا۔ اب تو ان کی پریشانی بڑھ گئی کہ دروازہ اندر سے بند تھا۔

”محمود دوڑ کر جاﺅ بیگم شیرازی کی چھت سے اپنی چھت پر آجاﺅ۔ دیکھو زینہ کھلا ہے یا نہیں۔“

”جی اچھا۔“ یہ کہتے ہی اس نے دوڑ لگادی۔ پھر بیگم شیرازی کے دروازے سے اس کی خوف زدہ آواز آئی: 

”ابا جان ! دروازہ اندر سے بند نہیں ہے۔ اس کا مطلب ہے گڑبڑ دونوں گھروں میں پھیلی ہوئی ہے۔“

وہ دوڑ پڑے۔ بیگم شیرازی کے گھر میں داخل ہوئے۔ پورا گھر سنسان پڑا تھا۔ اب وہ چھت پر آئے وہاں سے اپنی چھت پر اترے۔ زینہ کھلا تھا بے تحاشا انداز میں سیڑھیاں اترتے نیچے پہنچے۔ بیگم جمشید غائب تھیں۔ صحن کی میز پر ایک کاغذ موجود تھا۔ کاغذ میں ایک خنجر گڑا تھا اور خنجر کی نوک خون آلود تھی۔ انہوں نے جھک کر کاغذ پر لکھے الفاظ پڑھے۔

”میں حاجو خان ، اس کے بیوی بچوں ، بیگم جمشید اور بیگم شیرازی کو لے جارہا ہوں…. انہیں چھڑانے کا شوق ہو تو جزیرہ نانگا پر آجانا…. ملاقات ہوجائے گی۔“

الفاظ پڑھ کر انہوں نے ایک دوسرے کی طرف دیکھا۔

”ہم سے غلطی ہوئی حاجو خان اور اس کے بیوی بچوں کو صرف بیگم کی حفاظت میں دینا کافی نہیں تھا جب کہ مقابلہ بلتان سے ہے، لیکن اب تو غلطی ہوچکی تھی۔“

”اور یہ جزیرہ نانگا کہاں ہے؟“ پروفیسر داﺅد ہکلائے۔

”میںنے بھی اس جزیرے کا نام پہلی بار سنا ہے۔ دنیا کے نقشے میں دیکھنا ہوگا یا پھر جغرافیے کے کسی ماہر سے پوچھ لیتے ہیں۔ ہاں یاد آیا ہمارے شہر میں ایک غیر ملکی جغرافیہ دان ہے تو سہی ایک بار کسی سلسلے میں اخبار میں اس کا ذکر آیا تھا۔ اب یاد کرنا ہوگا کہ وہ کون سا اخبار تھا، لیکن…. نہیں اخبارات کے مدیروں کو فون کرنا زیادہ بہتر ہوگا۔“

اب انہوں نے ایک اخبار کے مدیر کو فون کیا۔ اپنا تعارف کرانے کے بعد وہ بولے:

”ہمارے شہر میں ایک غیر ملکی جغرافیہ دان رہتے ہیں۔ ہمیں ان سے کچھ کام ہے۔ کیا آپ کو ان کے بارے میں کچھ معلوم ہے؟“

”جی ہاں! کیوں نہیں ان کانام پروفیسر جیفر سام ہے اور وہ نیومون ٹاﺅن میں رہتے ہیں۔ کوٹھی کا نمبر ہے G.108۔“

”بہت بہت شکریہ ! آپ نے تو ہمارا بہت سا وقت بچا دیا۔“

وہ فوراً پروفیسر سام کی طرف روانہ ہوگئے۔ ان کی کوٹھی تلاش کرنے میں انہیں کوئی دقت نہ ہوئی۔ وہ اس علاقے کے مشہور آدمی تھے۔ ان سے بے خوف ہوکر ملے۔

”ہم صرف یہ جاننا چاہتے ہیں کہ جزیرہ نانگا کہاں ہے؟“

”اوہ نہیں۔“ پروفیسر سام نے خوف کے عالم میں کہا۔

”کیاہوا؟‘ پروفیسر داﺅد حیران ہوکر بولے۔

”آپ…. آپ لوگ اس جزیرے کے بارے میں کیوں پوچھ رہے ہیں؟“

”ہمیں وہاں جاناہے۔“

”میں اس کا مشورہ ہرگز نہیں دوں گا۔“ اس نے بوکھلائے ہوئے انداز میں کہا۔

”جی…. کیامطلب…. کیا ہے وہاں؟“

”سوائے موت کے اور کچھ نہیں۔ اس جزیرے پر جب بھی کوئی گیا، لوٹ کر نہیں آیا۔ کوئی اس جزیرے کی کہانی نہیں سنا سکا آج تک…. وہاں کیا ہے؟ کوئی نہیں جانتا۔ پروفیسر نے جلدی جلدی کہا۔

”آپ نے ہمارا شوق اور بڑھادیا۔ بات یہ ہے پروفیسر صاحب کہ ایک بین الاقوامی شخص ہے۔ بلتان، کیا آپ نے اس کا نام سنا ہے؟“

”بالکل سنا ہے۔ بہت خطرناک آدمی ہے۔ حکومتیں اس سے ڈرتی ہےں۔“

”بالکل ٹھیک وہ شخص ہمارے ساتھیوں کو اغوا کرکے جزیرہ نانگا لے گیا ہے۔“

”ارے باپ رے۔“ پروفیسر سام بوکھلا اٹھے۔

”لہٰذا آپ ہمیں صرف یہ بتادیں کہ یہ جزیرہ کہاں ہے؟“

 ”مجھے افسوس ہے۔“ پروفیسر بولے۔

”آپ کو افسوس ہے، لیکن کس بات پر جلدی بتایئے تاکہ ہم بھی اس افسوس میں شریک ہوجائیں۔“

پروفیسر سام نے فاروق کو تیز نظروں سے دیکھا ، پھر بولے:

”یہ صاحب کچھ پاگل تونہیں ہیں۔“

”جی نہیں ان کی باتوں کا برا نہ مانیں اور مہربانی فرما کر ہمیں اس جزیرے کے بارے میں بتادیں۔“

”گویا آ پ رک نہیں سکتے۔“

”پروفیسر صاحب شاید آپ نے توجہ نہیں فرمائی۔ بلتان ہمارے ساتھیوں کو اٹھا لے گیا ہے اور ہم کیسے رک سکتے ہیں؟“

”آپ کی مرضی…. بلتان نے اگر آپ کو جزیرہ نانگا بلایا ہے تو اس نے وہاں آپ لوگوں کے خلاف جال بچھارکھا ہوگا۔ وہ ایسے ہی تو آپ کو چیلنج نہیں کرسکتا۔“

”یہ بات ہم سمجھتے ہیں، لیکن ہم مجبور ہیں۔ یہ تو ہمارے اپنے گھر کے دو افراد اور چند دوسرے افراد کی بات ہے۔ اگر وہ ہمارے گھر کے افراد کو نہ لے جاتا تو بھی ہم ضرور جاتے، لہٰذا آپ ہمیں روکنے کی بالکل کوشش نہ کریں۔“

”اچھی بات ہے۔ میں آپ لوگوں کو سمندر ی راستے کا نقشہ بنادیتا ہوں۔ اگر آپ نے اس نقشے کے مطابق سفر کیا تو سمندر میں بھٹکنے سے بچ جائیں گے یاپھر میں خود آپ لوگوں کے ساتھ چلوں اور جزیرے تک پہنچا کر لوٹ آﺅں کیا خیال ہے؟“

”یہ اور بھی اچھی بات ہوگی۔“ فاروق بول اٹھا۔

ایک بار پھر پروفیسر نے فاروق کو گھورا۔

”کیا آپ خاموش نہیں رہ سکتے۔“

”لیکن جناب! آپ کو میرے بولنے پر ہی کیوں اعتراض ہے۔“ فاروق کے لہجے میں حیرت تھی۔

”ہاں واقعی! یہ عجیب بات ہے۔“ پروفیسر بولے

”کیا فرمایا آپ نے۔“ محمود کو ان کی بات سن کر حیرت ہوئی۔

”ان صاحب کی آواز میرے کانوں میں تیر کی طرح لگتی ہے جب کہ باقی لوگوں کی آواز سن کر میں نے ایسی کوئی بات محسوس نہیں کی۔“

”اگر یہ بات ہے ، تو میں اب آپ سے کوئی بات نہیں کروں گا۔ آپ بے فکر رہیں۔“ فاروق نے برا سا منہ بنایا۔

”بہت بہت شکریہ! اس صورت میں میں آپ لوگوں کے ساتھ جاسکوں گا۔ لیکن آپ کو میرے وقت کی قیمت ادا کرنا ہوگی۔“

”اوہ ضرور ضرور…. کیوں نہیں۔“خان عبدالرحمن نے فوراً کہا۔

”چلیے ٹھیک ہے۔ پھر ہم کب چل رہے ہیں؟“ 

”آپ تیاری کرلیں اور ایک بڑی لانچ کا انتظام کرلیں۔ اس کو مشرقی ساحل پر بھجوادیں۔ آپ کل صبح ٹھیک آٹھ بجے یہاں آجائیں ، میں تیا رملوں گا۔“

”اور آپ کا معاوضہ کیا ہوگا“ انسپکٹر جمشید نے پوچھا۔

”اوہو جمشید ! اس کو رہنے دو جو یہ مانگیں گے دے دیں گے۔“ خان عبدالرحمن جلدی سے بولے۔

”نہیں بھئی پہلے طے کرنا اچھا ہوتا ہے۔“

”ٹھیک ہے میں دس ہزار روپے لوں گا۔ آپ لانچ کے ذریعے مجھے واپس بھجوائیں گے۔“

”لیکن اگر ہمیں وہاں دیر لگنے کا امکان نہ ہوا تو آپ ہمارے ساتھ بھی تو آسکتے ہیں۔“

”میں ذرا بزد ل سا آدمی واقع ہوا ہوں۔ لڑائی بھڑائی کا تجربہ نہیںہے۔ آپ کو تو وہاں جاکر کرنا ہوگی جنگ…. بلتان سے جنگ کرنا اتنا بھی آسان نہیں کہ میں وہاں رک کر آپ لوگوں کی فتح کا انتظار کروں گا۔ اس سے یہ بہتر ہوگا کہ جونہی آپ لوگ جزیرے پر پہنچیں پہلے آپ مجھے واپس بھجوادیں اور اپنے لیے لانچ واپس منگوالیں۔“

”اس کا مطلب ہے جزیرہ ساحل سے زیادہ دورنہیں ہے۔“

”ایک دن اور ایک رات کا فاصلہ ہے۔“ اس نے کہا۔

”خیر یونہی سہی…. پروگرام طے ہوگیا۔ ہم کل آٹھ بجے پہنچ جائیں گے۔“

”اور انکل۔“ فاروق نے کچھ کہنا چاہا، لیکن پھر یاد آنے پر اس نے فوراً اپنے منہ پر ہاتھ رکھ لیا، سب لوگ مسکرادیے جب کہ پروفیسر سام کا چہرہ تن گیا تھا، لیکن جونہی فاروق کا …. چہرہ معمول پرآگیا۔ 

”شکریہ…. آپ نے جملہ درمیان میں روک دیا۔“

”کیا واقعی میری آواز آپ کے لیے اس حد تک تکلیف دہ ہے؟“

”ہاں ! مجھے اپنے کانوں کے پردے پھٹتے محسوس ہوتے ہیں۔ یوں محسوس ہوتا ہے جیسے میرے دماغ میں کوئی چیز ٹوٹ رہی ہے۔“

”کیا پہلے بھی کسی کی آواز سن کر آپ کو ایسا ہوا ہے؟“

”نہیں…. زندگی میں پہلی بار ایسا محسوس کررہا ہوں اور دعاکرتا ہوں کہ ان صاحب کی آواز مجھے پھر سنائی نہ دے۔“

”ہم کوشش کریں گے کہ فاروق کو آپ سے فاصلے پر رکھیں اور اس کی آواز آ پ کے کانوں تک نہ پہنچ سکے۔“

”میں ان کے سامنے سرگوشی کرتا رہوں گا۔“ فاروق بول پڑا۔

”اُف اُف۔“ پروفیسراچھل پڑا۔ اس کا رنگ زرد پڑگیا ۔ پھر اس نے کہا۔

”نہیں …. نہیں۔ میں آپ لوگوں کے ساتھ اس مہم پر نہیں جاﺅں گا۔“

”حد ہوگئی فاروق…. پروفیسر صاحب! آپ پریشان نہ ہوں۔ اس بات کی ذمے داری میں لیتا ہوں کہ اب آپ کو فاروق کی آواز سنائی نہیں دے گی۔“

”یہ …. یہ آپ کیا کہہ رہے ہیں۔“ فاروق نے جلدی سے اشاروں میں کہا۔ اس بار اس کے صرف ہونٹ ہلے تھے۔ آواز سنائی نہیں دی تھی۔

”ہاں فاروق ! یہ ٹھیک رہے گا۔“ انسپکٹر جمشید مسکرائے۔

”کیاٹھیک رہے گا۔“پروفیسر سام جھلائے ہوئے اندا ز میں بولے۔

”اس بار فاروق نے اشاروں میں بات کی ہے اور ہم نے اس کی بات کو سمجھ لیا ہے۔“

”چلیے پھر یونہی سہی، لیکن آپ خیال رکھیے گا۔ اس وقت بھی میرے دماغ میں دھماکے ہورہے ہیں۔ پتا نہیں کتنی دیر تک جاری رہیں گے۔ کہیں یہ دس ہزار مجھے مہنگے نہ پڑیں۔“

”آپ فکر نہ کریں۔ ہم آپ کو 20ہزار ادا کریں گے۔“ خان عبدالرحمن جلدی سے بولے۔

انسپکٹر جمشید نے انہیں گھورا۔ پھر وہ اٹھ کر چلے آئے۔ دوسرے دن ٹھیک آٹھ بجے وہ پروفیسر سام کے دروازے کی گھنٹی بجا رہے تھے۔ وہ فوراً ہی باہر آگئے۔ اب خان عبدالرحمن کی بڑی گاڑی میں ساحل کی طرف اشاروں میں کہا:

”ابا جان! اس گاڑی میں کہیں نہ کہیں گڑ بڑ ہے۔ مہربانی فرما کر گاڑی کو چیک کرالیجیے۔“

انسپکٹر جمشید نے چونک کر فاروق کی طرف دیکھا۔

”کیا تم نے کوئی بات محسوس کی ہے؟“

”جی نہیں! بات تو کوئی محسوس نہیں کی، لیکن نہ جانے کیوں یہ خیال بار بار آرہا ہے کہ کہیں کوئی گڑ بڑ ہے۔“

”محمود ! تم کیا کہتے ہو؟“

”وہی جو فارو ق نے کہا ہے۔“ محمود نے بھی پریشانی کے عالم میں کہا۔

”خوب خوب …. خان عبدالرحمن …. تم؟“

”میں نے ایسی ویسی کوئی بات محسوس نہیں کی۔ “ انہوں نے منہ بنایا۔

”پروفیسر صاحب! آپ کیا کہتے ہیں۔“

”میں نے تو بالکل کوئی بات محسوس ہی نہیں کی۔“

”لیکن مشکل ایک اور ہے۔“ انسپکٹر جمشید مسکرائے۔

”اور وہ کیا جمشید۔“ پروفیسر داﺅد جلدی سے بولے۔

”یہ کہ میں بھی یہی بات محسوس کررہا ہوں اور ان دونوں کی نسبت پہلے سے محسوس کررہا ہوں ۔‘ ‘ انہوں نے پریشانی کے عالم میں کہا۔

”تب پھر آگے چلنے سے پہلے گاڑی کو چیک کرنا بہتر ہوگا۔ آپ لوگوں کے ساتھ کہیں میں بھی نہ مارا جاﺅں اور یہ دس ہزار روپے مجھے مہنگے نہ پڑیں۔“ پروفیسر جیفر سام نے گھبرا کر کہا۔

”ٹھیک ہے….گاڑی روک دو۔“

گاڑی رک گئی۔ وہ نیچے اتر آئے اب گاڑی کی اچھی طرح تلاشی لی گئی۔ یہاں تک کہ بعد میں پروفیسر داﺅد نے آلات کے ذریعے بھی تلاش لی، لیکن کوئی ایسی ویسی چیز نہ ملی۔

”میرا خیال ہے ہمیں وہم ہوا ہے آﺅ چلیں۔“

وہ ایک بار پھر روانہ ہوئے۔ فاروق نے بے چینی کے عالم میں پہلو بدلا۔ انسپکٹر جمشید اس کی طرف دیکھ کر مسکرائے۔ یہی حالت محمود کی نظر آئی گویا ان کا احساس ابھی تک باقی تھا۔

پھر وہ ساحل پر پہنچ گئے۔ لانچ بالکل تیاری کھڑی تھی۔ اکرام انہیں ساحل پر کھڑا نظر آیا۔ لانچ کا ڈرائیور اپنی سیٹ پر چوکس بیٹھا تھا۔

”ہاں اکرام ! کہیں کوئی گڑبڑ تو محسوس نہیں ہوئی؟“

”جی…. جی نہیں۔ ہر طرح خیریت ہے۔“

”ٹھیک ہے تم اپنے چند ماتحت یہاں مقرر کردو۔ پروفیسر سام ہمیں جزیرے تک پہنچا کر واپس آئیں گے۔ انہیں گھر پہنچانا ہوگا۔“

”ٹھیک ہے جناب! انہیں یہاں گاڑی تیار ملے گی۔“

اب وہ لانچ میں سوار ہوکر روانہ ہوئے۔ اکرام نے ہاتھ ہلا کر انہیں الوداع کہا۔ جلد ہی لانچ اکرام کی نظروں سے اوجھل ہوگئی۔ وہ اپنی گاڑی پر آیا ماتحت ساتھ تھے۔ اس نے ماتحتوں کو ہدایات دیں اور خود خان عبدالرحمن کی گاڑی کی طرف بڑھا۔ عین اس لمحے ایک زبردست دھماکا ہوا اور گاڑی کے پرخچے اُڑ گئے۔ اکرام اچھل کر دور جا گرا، وہ چند لمحے تک پھٹی پھٹی آنکھوں سے اِدھر اُدھر دیکھتا رہا۔ اس کے ماتحت بھی اپنی گاڑی سے باہر نکل آئے تھے۔ ان کے چہروںپر ہوائیاں اڑ رہی تھیں۔

آخر اکرام نے انسپکٹر جمشید کے نمبرملائے اور سلسلہ ملنے پر وہ بولا©:

”سر! گاڑی کے پرخچے اڑگئے۔“

”کیا مطلب ؟“ ان کے منہ سے مارے حیرت کے نکلا۔

اکرام نے وضاحت کی، تو وہ سکتے میں آگئے۔ آخر انہوں نے کہا۔

”ٹھیک ہے۔ اپنے مزید ماتحتوں کو بلا لو۔ جائے واردات پر اپنی کارروائی مکمل کرلو۔“

”بہت بہتر جناب۔“

فون بند کرکے انسپکٹر جمشید ان کی طرف مڑے۔

”ہم تینوں کا احساس درست تھا۔ گاڑی میں بم تھا۔ خان عبدالرحمن کی گاڑی ٹکڑوں میں تقسیم ہوچکی ہے۔“

”کیا….نہیں۔“ وہ چلائے ۔

چند لمحے تک وہ پھٹی پھٹی آنکھوں سے ایک دوسرے کو دیکھتے رہے۔ 

ایسے میں پروفیسر داﺅد کھوئے کھوئے انداز میں بولے۔

”لیکن ہم نے تو گاڑی کو بہت اچھی طرح دیکھا تھا۔“

”ہمارا خیال درست تھا گاڑی میں گڑ بڑ تھی۔ حیرت اس پر ہے کہ ہم اس کے بارے میںجان کیوں نہ سکے۔“

تیسرا حصہ

”اور میں اب اور زیادہ خوف محسوس کررہا ہوں۔ میرا خیال ہے ہمیں واپس ساحل پر چلنا چاہیے۔ ہم اپنا یہ سفر پھر سے شروع کریں گے کیونکہ روانہ ہونے سے پہلے ہم نے لانچ کو بھی چیک نہیں کیا۔“ فاروق نے جلدی جلدی کہا۔

”اب اس کا کوئی فائدہ نہیں جو ہونا ہے ، ہوکر رہے گا۔ پھر ہمیں جزیرہ نانگا پر تو جانا ہی ہے ہم کیسے رک سکتے ہیں؟“

”مم…. میر ا مشورہ بھی یہی ہے کہ واپس چلتے ہیں۔“ پروفیسر سام نے کانپتی آواز میں کہا۔

”اگر اس لانچ پر بم موجود ہے تو یہ ہمارے واپس پہنچنے سے پہلے پھٹ جائے گا، لہٰذا واپس جانے کا کوئی فائدہ نہیں ہوگا۔ ہاں لانچ کی رفتار بڑھا کر جلد از جلد جزیرے پر پہنچنے کی کوشش کرلی جائے اوراس دوران لانچ کی تلاشی جاری رکھی جائے۔“

”یہ ٹھیک رہے گا جمشید۔“ پروفیسر داﺅد بولے۔

”تب پھر آپ اپنے آلات کے ذریعے تلاشی لے لیں۔“

”وہ تو میں نے پہلے بھی لی تھی، لیکن گاڑی سے کوئی بم نہیں ملا تھا حالاں کہ بم گاڑی میں موجود تھا۔“

”اس پرہم سب کو حیرت ہے، لیکن اس کے باوجود ہمیں اپنا کام کرنا ہوگا۔“

انہوں نے لانچ کی اچھی طرح تلاشی لی، لیکن کوئی بم دم نہ ملا۔ ان کا سفر جاری رہا۔ آخر کار پروفیسر سام کی آواز ابھری:

”وہ رہا جزیرہ نانگا۔“

وہ سب جزیرے کو دیکھنے میں محو ہوگئے اور لانچ ساحل سے جالگی۔ وہ اتر پڑے ان کے ساتھ پروفیسر سام بھی اتر آئے اور بولے: 

”یہ چھوٹا سا جزیرہ ہے۔ دو کلو میٹر میں پھیلا ہوا ہے۔ اس میں بہت گھنے درخت ہیں اور بہت زیادہ بڑ ے اور تن آور ہیں۔ میں حیران ہوں آپ لوگ یہاں کیوں آئے ہیں یہاں تو کوئی بھی نظر نہیں آرہا۔“

”ہمارے ساتھی اور انہیں اغوا کرنے والے آگے کہیں ہوں گے۔ ہمیں پورا جزیرہ تو نظر نہیں آرہا۔“ انسپکٹر جمشید نے منہ بنایا۔

”ہاں! یہی بات ہے جمشید۔ پروفیسر صاحب اب آپ واپس جاسکتے ہیں۔ کپتان صاحب آپ انہیں لے جائیں۔ ساحل پر ان کے لیے گاڑی تیار ملے گی۔“

”اوکے سر۔“ اس نے کہا۔ وہ بھی ان کے ساتھ لانچ سے اتر کر ساحل پر آگیا تھا۔

”نن…. نہیں۔ “ پروفیسر سام ہکلائے۔

”جی…. کیا کہا آپ نے؟“

”مجھے …. خوف محسوس ہورہا ہے۔ کہیں گاڑی کی طرح یہ لانچ بھی نہ اڑ جائے۔“

”ارے ! باپ رے۔“ ڈرائیور بھی کانپ گیا۔

”لیکن ہمارے ساتھ آپ کیسے رہ سکیں گے؟ ہم تو یہاں موت اور زندگی کی جنگ لڑنے آئے ہیں۔ آپ کو معلوم نہیں۔“ انسپکٹر جمشید یہاں تک کہہ کر خاموش ہوگئے۔

”کیا معلوم نہیں۔“

”مجرم نے ہمیں یہاں کس لیے بلایا ہے۔“

”کس لیے بلایا ہے؟“

”وہ ہمیں مو ت کے گھاٹ اتار دینا چاہتا ہے۔“

”لیکن کیوں؟“

”اس وقت وہ جس ملک کے لیے کام کررہا ہے۔ اس ملک کی یہی خواہش ہے۔ حاجو خان اور میری بیگم وغیرہ کو اغوا کرکے یہاں لانے کا مقصد بھی یہی ہے کہ وہ ہم سب کو آسانی سے ٹھکانے لگا سکے۔“

”اور آپ یہاں آگئے۔“ پروفیسر سام نے حیران ہوکر کہا۔

”اور ہم کر بھی کیا سکتے تھے۔ بلتان کی منصوبہ بندی اس قسم کی ہوتی ہے۔ وہ ہر طرف سے اپنے دشمن کو بالکل بے بس کردیتا ہے اور ہمارے ساتھ بھی وہ ایسا ہی کھیل کھیلنا چاہتا ہے۔“

عین اس لمحے کان پھاڑ دینے والا ایک دھماکا ہوا۔ وہ بری طرح اچھل کر دور جا گرے۔ انہوں نے خود کو سنبھال کر ساحل کی طرف دیکھا تو لانچ کے پرخچے پانی پر تیرتے نظر آئے۔ بہت سے ٹکڑوں کو آگ لگ چکی تھی۔ وہ پھٹی پھٹی آنکھوں سے یہ منظر دیکھتے رہے۔

”اللہ اپنا رحم فرمائے۔ یہ ہمارے ساتھ کیا ہورہا ہے جمشید۔“ پروفیسر داﺅد نے لرزتی آواز میں کہا۔

”اور…. اب …. اب میرا کیا ہوگا؟ میں کیسے واپس جاﺅں گا۔“پروفیسر سام نے تھرتھرائی آواز میں کہا۔

”اور میں…. میں ۔“کپتان ہکلایا۔

”مجھے افسوس ہے کہہمارے ساتھ آپ لوگ بھی مصیبت میں پھنس گئے۔ لیکن آپ دونوں فکر نہ کریں ۔ میں ابھی آپ کے لیے لانچ منگواتا ہوں۔“

”لیکن کیسے؟“ پروفیسر سام بولے۔

”کیا مطلب؟“

”لانچ یہاں تک آئے گی کیسے؟ نانگا جزیرے کا راستہ کپتان کیسے معلوم کرے گا۔ یہ تو میں تھا جو آپ لوگوں کو یہاں تک لایا ہوں۔“

”اوہ…. اوہ۔“

ان کے منہ سے نکلاہ پھر اچانک انسپکٹر جمشید مسکرائے۔

”کوئی مسئلہ نہیں۔“

”جی ؟ کیا کہا آپ نے؟ کوئی مسئلہ نہیں؟“ پروفیسر سام بولے۔

”ہاں ! میں نے یہی کہا ہے۔ کوئی مسئلہ نہیں میں آپ دونوں کو ہیلی کاپٹر کے ذریعے واپس بھجوائے دیتا ہوں۔ ہیلی کاپٹر کے پائلٹ سے میں برابر موبائل پر رابطہ رکھوں گا اور یہاں ہم کپڑے اور خشک شاخوں کو آگ لگا کر دھواں بلند کرتے جائیں گے۔ پائلٹ دھواں دیکھ کر آخر یہاں پہنچ جائے گا۔“

”بس تو پھر پہلے آپ یہی کام کریں۔ “ پروفیسر سام نے جلدی سے کہا۔

”ہاں! کیوں نہیں ہم اپنے ساتھ آپ دونوں کو خطرے میں نہیں ڈالیں گے۔“

انہوں نے موبائل نکالا نمبر ڈائل کرنا چاہا، لیکن ان کا فون بند تھا۔

”میرا فون بند ہے، محمو داپنا فون مجھے دو۔“

اس نے گھبرا کر اپنا فون نکالا۔ وہ بھی بند تھا، اب تو سب نے اپنے اپنے فون دیکھے…. سب بند تھے۔

ان کے رنگ اڑ گئے۔ چہروں پر ہوائیاں اُڑنے لگیں۔ ایسے میں جزیرہ ایک آواز سے گونج اٹھا۔

”خوش آمدید انسپکٹر جمشید! مجھے تمہارا ہی انتظار تھا اور مجھ سے زیادہ تمہاری بیوی، بیگم شیرازی ، حاجو خان اور اس کے بیوی بچوں کو تمہارا انتظار تھا۔ ان لوگوں کا خیال تو یہ تھا کہ تم ان کے نجات دہندہ بن کر آﺅگے اور میرا خیال یہ تھا کہ تم بھی اپنی موت کی تلاش میں یہاں آﺅگے۔“

”شکریہ! موت کا کیا ہے وہ تو ایک دن آکر رہے گی۔“

”تب پھر آگے چلے آﺅ موت تیار ہے۔“

”کیا کہا موت تیار ہے؟“ پروفیسر سام چلا اٹھے۔

”بھائی صاحب! آپ مو ت تیار ہے تو ا س طرح کہہ رہے ہیں جیسے کہہ رہے ہوں، کھانا تیار ہے۔“ محمود نے جھلا کر کہا، لیکن اس نے یہ الفاظ بلند آواز میں نہیں کہے تھے۔

”فکر نہ کرو پہلے تمہیں کھانا کھلایا جائے گا۔ پھر موت کی نیند سلایا جائے گا۔“

”ارے باپ رے! بھائی صاحب نے تو میری آہستہ آواز بھی سن لی۔“

”ا س جزیرے پر سوئی گرنے کی آواز بھی میں سن لوں گا۔“

”آپ کی تعریف۔“ محمود نے بلند آواز میں پوچھا۔

”پروفیسر صاحب! میراتعارف اس سے کرادو۔“ آواز آئی۔

”کک…. کون سے پروفیسر صاحب یہاں تو دو عدد پروفیسر موجود ہیں۔“ پروفیسر داﺅد بولے۔

”آپ تو کیا تعارف کرائیں گے، ہاں پروفیسر جیفر شاید کر ادیں۔“

”نن…. ہاں۔“ وہ ہکلائے۔

”آپ نے ہاں کہا یا نہیں۔“

”اپنے ساتھ آپ لوگ مجھے بھی لے بیٹھے۔ اب مجھے بھی آپ کے ساتھ مرنا پڑے گا۔“

”مرنا تو آپ کو ویسے بھی پڑے گا اور موت تو سب کو آئے گی۔“

”اور میں …. میں تو بالکل مفت میں مرگیا۔“ لانچ کے کپتان نے لرزتی آوازمیں کہا۔

”میں آپ دونوں کو واپس بھجوادیتا ہوں۔“ انسپکٹر جمشید مسکرائے۔

”کیا کہا آپ نے؟ آپ ہمیں واپس بھجواسکتے ہیں، وہ کیسے؟“ کپتان کے لہجے میں بلا کی حیرت در آئی۔

”ہاں ! بھجواسکتا ہوں کیوں پروفیسر سام؟ آپ واپس جانا پسند کریں گے یا ہمارے ساتھ ٹھہرنا۔“

”حد ہوگئی بھلا میں کیوں آپ لوگوں کے ساتھ ٹھہروں گا؟ ویسے لگتا ہے جزیرے پر آتے ہی آپ کا دماغ الٹ گیا ہے۔“

”اللہ کی مہربانی سے ایسا نہیں ہے۔“

”تب پھر آپ ہمیں کس طرح بھجواسکتے ہیں۔ پہلے ذرا اس کی وضاحت کردیں۔“

”ابھی میرے پاس اپنے ماتحتوں سے رابطہ کرنے کا ایک ذریعہ موجود ہے۔“

”اور…. اور وہ کیا ؟“ وہ سب ایک ساتھ بولے۔

”میری گھڑی۔“ انسپکٹر جمشید مسکرائے۔

”حد ہوگئی…. گھڑی نہ ہوئی ٹیلی فون ہوگیا۔“

”ابھی دکھاتا ہوں۔“

یہ کہہ کر انہوں نے گھڑی کی طرف ہاتھ اٹھایا۔ ایسے میں پروفیسر سام مارے خوف کے چلائے۔

”اُف …. وہ دیکھیے۔“

ساتھ ہی انہوں نے ایک جانب اشارہ کیا۔ سب نے بوکھلا کر اس طرف دیکھا اور پھر انہیں اپنی رگوں میں خون جمتا محسوس ہوا۔

انسپکٹر جمشید بھی گھڑی کا بٹن دبانے سے رہ گئے۔ ان گنت رائفلیں درختوں کے پیچھے سے ان کی طرف تنی ہوئی تھیں۔

”حرکت نہ کرنا ، انسپکٹر جمشید ورنہ پرخچے اڑجائیں گے۔“

وہ ساکت رہ گئے ۔

”تم لوگوں کے پاس جو کچھ بھی ہے نیچے گرا دو اور پندرہ قدم گن کر آگے آجاﺅ۔ انسپکٹر جمشید تم اپنی گھڑی کو ہاتھ نہیں لگاﺅگے۔ ہاتھ سر سے بلند کرکے کھڑے رہو۔ تمہارے ہاتھ سے گھڑی پروفیسر اتاریں گے۔ باقی لوگ اپنی سب چیزیں اتار کر نیچے گرادیں ۔ جسموں پر صرف کپڑے رہ جائیں ۔“

انہوں نے اپنی چیزیں گرادیں۔

”پروفیسر سام! آپ انسپکٹر جمشید کی گھڑی اتار کر سمندر میں پھینک دیں…. تاکہ نہ رہے بانس نہ بجے بانسری۔“

”جج…. جی ….جی اچھا…. حضور…. لل…. لیکن ۔“

”لیکن کیا؟“ پوچھا گیا۔

”اگر انہوں نے مجھ پر حملہ کردیا تو؟“

”ا ن کے پیچھے سے آکر گھڑی اتارلیں، یہ پوری طرح ہماری زد پر ہیں۔“

”اچھی بات ہے۔“ پروفیسر سام نے کہا۔

اور پھر اس نے ان کی کمر کی طرف آکر گھڑی اتارلی۔ انہوں نے کوئی حرکت نہ کی۔ وہ واقعی پوری طرح زد پر تھے اور جو رائفلیں ان پر تنی ہوئی تھیں ، وہ بہت خوفناک تھیں۔

”پروفیسر سام! آپ نے گھڑی سمندر میں گرادی؟“

”جی ….جی ہاں۔“ وہ بولے۔

”اب سب لوگ پندرہ قدم آگے آجائیں۔“

ان سب نے انسپکٹر جمشید کی طرف دیکھا جیسے پوچھ رہے ہوں اب کیا کریں؟

”جو کہا گیا ہے ، کرو۔ ہمارے پیچھے سمندر ہے اور آگے بلتان اور ابھی ہماری اپنے ساتھیوں سے ملاقات بھی نہیں ہوئی لہٰذا پندرہ قدم گن ڈالو۔“ انہوں نے خوش گوار لہجے میں کہا۔

”لیکن جناب! اس سارے معاملے میں میرا کیا قصور ہے؟“ کپتان نے روتی آواز میں کہا۔

”آپ کا کوئی قصور نہیں ہے۔ ہمارا بھی کوئی قصور نہیں، یہ سب تو لکھا ہوا ہے، انسان کے مقدر میں جو لکھ دیا گیا ہے وہ پیش آکر رہے گا، لہٰذا صبر کرو۔ ایک بات میں تم سے کہے دیتا ہوں اور وہ یہ کہ پہلے ہم مریں گے بعد میں تمہاری باری آئے گی۔ یہ نہیں ہوگا کہ کسی موقعے پر ہم اپنی جانیں بچانے کے لیے آپ کو آگے کردیں۔“

”لیکن اس سے مجھے کیا فائدہ ہوگا۔“ اس نے برا سا منہ بنایا۔

”اگر یہ بات ہے تو پھر سن لیں۔ مرنا تو آپ کو ویسے بھی پڑے گا۔ موت اس جزیرے پر آئے یا کسی اور جگہ آئے۔“

”تم لوگ بلاوجہ دیر لگارہے ہو۔ ان باتوں سے کوئی فائدہ نہیں ہوگا۔ قدم اٹھانے کی کرو۔“

انہوں نے قدم اٹھانے شروع کردیے۔ جلدہی آواز پھر ابھری:

”یہ کیا؟ کچھ لوگ پیچھے کیوں رہ گئے ہیں۔“

انسپکٹر جمشید، خان عبدالرحمن اور پروفیسر داﺅد نے چونک کر دیکھا۔ محمود اور فاروق باقی سب سے کئی قدم پیچھے نظر آئے:

”کیا ہوا تمہیں؟“

”جی…. ہوا تو کچھ بھی نہیں۔“ محمود مسکرایا۔

”تو پھر پیچھے کیوں رہ گئے؟“

”آپ کے قدم لمبے ہیں اور ہمارے چھوٹے، لہٰذا ہم پندرہ قدم اٹھا کر وہاں نہیں پہنچ سکیں گے جہاں آپ لوگ پہنچ جائیں گے۔“ محمود نے جلدی جلدی کہا۔

وہ مسکرادیے۔ ادھر جھنجھلاتی ہوئی آواز میں کہا گیا:

”تم بھی بڑوں کے پاس پہنچ جاﺅ۔ پندرہ قدم کا مطلب یہ نہیں کہ تم اپنے ساتھیوں تک پہنچنے کے لیے کوئی اور قدم اٹھا ہی نہیں سکتے۔“ 

”اب آپ نے کہا ہے تو اٹھا لیتے ہیں۔ ہمارا کیا جاتا ہے۔ ہم اپنے ساتھیوں سے بھی آگے نکل جاتے ہیں۔“

”نہیں! اس کی ضرورت نہیں۔ اِدھر اُدھر کی باتیں نہ کرو۔ میں تمہیں اچھی طرح جانتا ہوں۔“

”اچھی طرح جانتے ہیں…. کیا مطلب؟“

”مطلب یہ کہ تم لوگ اِدھر اُدھر کی باتوں میں لگا کر اپنا کام نکالنے کے ماہر ہو، لیکن میں تمہیں کوئی موقع نہیں دوں گا۔“

”چلیے خیر…. نہ دیجیے گا موقع۔ ہم آپ سے مانگیں گے بھی نہیں۔“ محمود نے برا سا منہ بنایا۔

”کیا نہیں مانگیں گے ۔ “ بلتان نے اسے گھورا۔

”بھئی موقع اور کیا۔“

”آپ لوگوں کے ساتھ میں بھی پھنس گیا۔ وہ دس ہزار میرے کس کام آئے؟“

”بعد میں کام آجائیں گے فکر نہ کریں۔“ محمود نے جلدی سے کہا۔

”میں، میں آگے نہیں جاﺅں گا۔ میں تو بس جزیرے کے کنارے پر رہوں گا۔ کیا خبر کوئی جہاز یا لانچ اس طرف آجائے۔ اس صورت میں اس پر سوار تو ہو سکوں گا، لیکن اگر میں آپ لوگوں کے ساتھ آگے چلا گیا، تو ایسا کوئی موقع ہاتھ نہیں آئے گا۔“

”اگر مسٹر بلتان آپ کو اجازت دیتے ہیں، تو ہمیں کوئی اعتراض نہیں۔“ انسپکٹر جمشید نے خوش گوار لہجے میں کہا۔

”اگر یہ دونوں حضرات کنارے پر جا کر کسی گزرتے جہاز کا انتظار کرنا چاہیں، تو مجھے کوئی اعتراض نہیں شوق سے چلے جائیں۔ اگر ان دونوں نے آپ لوگوں کی کسی بھی طرح سے مدد کرنے کی کوشش کی، تو پھر ان کے ساتھ کوئی رعایت نہیں ہوگی۔“

”ٹھیک ہے ہم کیوں کریں گے ان کی مدد؟ ان کی وجہ سے تو ہم اس مصیبت میں پھنسے ہیں۔ ہماری طرف سے یہ لوگ جائیں جہنم میں۔“

”ایسا تو نہ کہو۔ کیا تم نے اپنے بارے میں ہمارے والد کے الفاظ نہیں سنے، یعنی ان کے جذبات کیا ہیں اور آپ کیا سوچ رہے ہیں۔“

”آپ لوگ اگر ہم سے پہلے اپنی جانیں دے دیتے ہیں، تو اس سے ہمیں کیا فائدہ ہوجائے گا؟ ہم دونوں بھی اپنی جان سے تو ہاتھ دھو بیٹھیں گے۔“

”اب بات سمجھ میں آئی۔ آپ دونوں جزیرے کے کنارے اس لیے ٹھہرنا چاہتے ہیں کہ جان سے ہاتھ دھونے کے بجائے پانی سے ہاتھ دھوسکیں۔“ محمود نے جل بھن کر کہا اور وہ سب مسکرائے بغیر نہ رہ سکے۔

”ہم کچھ بھی کریں آپ کو کیا اور میرا خیال ہے ان کے دشمن کو ہمارے الگ ہوجانے پر کوئی اعتراض نہیں ہوگا۔“

”بالکل نہیں آپ دونوں خوشی سے کنارے پر چلے جائیں، لیکن اگر کوئی چال چلنے کی کوشش کی تو نقصان میں رہیں گے۔“

”ہم کوئی چال نہیں چلیں گے۔ ہمیں ضرورت بھی کیا ہے کچھ کرنے کی؟ یہ لوگ ہمارے کس کام آئیں گے۔ رہ گئے آپ…. آپ سے نہ ہماری دوستی ہے نہ دشمنی اس لیے آپ سے کوئی امید ہوسکتی ہے کیونکہ وقت کی باگ ڈور اس وقت آپ کے ہاتھ میں ہے۔“

”آپ دونوں عقل مند ہیں۔ کنارے پر چلے جائیں اور ہمیں ان لوگوں سے فارغ ہولینے دیں۔ پھر آپ کو ساحل کی طرف بھجوادیا جائے گا۔“

”بہت خوب…. آپ کا شکریہ ! آپ بہت اچھے ہیں۔“ پروفیسر سام نے خوش ہوکر کہا۔

”تب پھر ایک کام کرتے جائیں۔“ آواز آئی۔

”جی …. وہ کیا؟“ 

”ان لوگوں نے جو چیزیں گرائی ہیں، وہ اٹھا کر لے جائیں اور سمندر میں گرادیں۔“

”اچھی بات ہے۔“

”اور میرے تین ساتھی ان لوگوں کی اچھی طرح تلاشی لیں۔ کوئی چیز ان کے پاس رہ گئی ہو تو وہ بھی نکال کر سمندر میں گرادی جائے۔“

اس پر عمل کیا گیا۔ ایسے میں اچانک انسپکٹر جمشید کی آنکھیں مارے حیرت کے پھیل گئیں۔

انسپکٹر جمشید اتنے زور سے چونکے تو ان کے ساتھی بھی حیران رہ گئے۔

”کک…. کیا ہوا ابا جان؟“ محمود گھبرا کر بولا۔

”ایک خیال آیا ہے۔ کیا پروفیسر جیفر سام اور کپتان ساحل کی طرف جا چکے ہیں؟“ وہ بولے۔

”جی ہاں وہ تو ان لوگوں کے تلاشی شروع کرنے سے پہلے چلے گئے تھے۔“

”خفیہ عمارت نمبر ایک کو جب بلتان کے آدمیوں نے گھیرا تھا، تو ہم وہاں ایک آواز سنتے رہے تھے….“ انہوں نے کھوئے کھوئے انداز میں کہا۔

”جی…. جی ہاںبالکل سنتے رہے ہیں۔“

”بعد میں ہمیں بتایا گیا تھا کہ وہ آواز بلتان کی نہیں تھی۔“

”جی…. جی ہاں! یہی بات ہے۔“

”اب جو ہم نے آواز سنی ہے۔ کیا یہ وہی نہیں ہے؟“

”اوہ جی ہاں! یہ وہی آواز ہے، تو کیا آپ یہ کہنا چاہتے ہیں کہ یہ بلتان کی آواز ہے۔“ 

”میں ابھی یہ نہیں کہہ سکتا کہ یہ آواز بلتان کی ہے یا کسی اور کی، لیکن یہ آواز ہے وہی جو ہم خفیہ عمارت نمبر ایک کے باہر سنتے رہے ہیں۔“

”مطلب یہ کہ زیادہ امکان اسی بات کا ہے کہ یہی بلتان ہے۔“

”ہاں! یہ کہا جاسکتا ہے۔“

”لیکن انسپکٹر جمشید۱ اس سے کیا فرق پڑتا ہے بھلا۔“ آواز لہرائی۔

”یہ میں بعد میں بتاﺅں گا کہ اس سے کیا فرق پڑتا ہے۔“ انسپکٹر جمشید مسکرائے۔

ان کی یہ مسکراہٹ بہت عجیب تھی۔ اس مسکراہٹ نے ان کے ساتھیوں کو شدید الجھن میں ڈال دیا۔

”کیا مطلب ؟“ وہ بول اٹھے۔

”ابھی اس کامطلب رہنے دیں۔“ وہ ہنسے۔

”لیکن ابا جان! ہم شدید الجھن محسوس کررہے ہیں۔“

”کوئی بات نہیںکرتے رہیں الجھن محسوس۔“ انہوں نے پھر عجیب اندا ز میں کہا۔

”مطلب یہ کہ آپ کو کوئی خاص بات معلوم ہوگئی ہے۔“ فاروق نے ان کی طرف غور سے دیکھا۔

”ہاں ! تم یہ کہہ سکتے ہو۔“

”اب یہ اپنی اِدھر اُدھر کی باتیں ختم کرو اور قدم اٹھاﺅ۔ میرے ماتحتو! تم یہ ہدایت سن لو کہ اگر اب ان کے قدم رکیں تو فائر کردینا۔“

”اوکے سر!“

”پیچھے سے چند ہوائی فائر کرکے انہیں جتادو کہ تم لو گ ان کے پیچھے موجود ہو اور بہت آسانی سے تم انہیں نشانہ بناسکتے ہو۔ سب لوگ ایک ہی وقت میں فائر کریں۔“

”اوکے سر!“

اس کے ساتھ ہی جزیدہ ان گنت گولیوں کی آوازوں سے گونج اٹھا۔ جزیرے کے پرندے خوف زدہ انداز میں درختوں سے اڑے اور ان کا بے تحاشا شور مچ گیا، اب تو گویا کان پڑی آواز سنائی نہیں دے رہی تھی…. ان کے قدم اٹھتے رہے۔ تین چار منٹ بعد کہیں جاکر پرندے پرسکون ہوئے۔

”کیا ضرورت تھی ان پرندوں کو خوف زدہ کرنے کی؟“

انسپکٹر جمشید نے برا سا منہ بنایا۔

”تم لوگ پوری طرح ہماری زد پر ہو صرف یہ بتایا ہے۔“

”یہ بات تو ہم اس جزیدے پر قدم رکھنے سے پہلے سے جانتے تھے۔“ انسپکٹر جمشید جھلا اٹھے۔

”آگیا غصہ…. میں نے تو سنا تھا انسپکٹر جمشید کو غصہ نہیں آتا اور دشمنوں سے مقابلے میں یہی ان کی کامیابیوں کا رازہے۔“

”میں بھی آخر انسان ہوں کبھی آبھی جاتا ہے۔“ وہ ہنس دیے۔

وہ چلتے رہے،پندرہ منٹ بعد ایک کھلے میدان میں داخل ہوئے۔ اس کے چاروں طرف درخت ایک دائرے کی صورت میں تھے۔ گویا اس وقت وہ ان درختوں کے گھیرے میں تھے۔

”ان کے ساتھی نیچے لٹکادو۔“

”کیا کہا نیچے لٹکا دو۔“ مارے حیرت کے ان کے منہ سے نکلا۔ ساتھ ہی انہوں نے اوپر دیکھا درختوں سے چند رسیاں لٹکتی نظر آئیں۔ ان کے سروں پر ان کے ساتھی بری طرح بندھے ہوئے تھے۔ دیکھتے ہی دیکھتے وہ نیچے آرہے۔

”اُف اتنا ظلم سربلتان! میں آپ کو ایسا نہیں سمجھتا تھا۔ خیر …. میں آپ کو اس ظلم کا مزہ چکھاﺅں گا۔“

”خوب بہت خوب پہلے اپنے ساتھیوں کی خبر لے لو۔“

”محمود جلدی کرو چاقونکالو۔“

محمود نے جوتے کی ایڑھی سرکائی اور پھر دھک سے رہ گیا۔ ایڑی میں چاقو نہیں تھا۔ اس نے پریشانی کے عالم میں ان کی طرف دیکھا۔

”چاقو غائب ہے ابا جان۔“

”اوہو اچھا! خیر کوئی بات نہیں۔“

”انہیں کوئی چاقو دے دو بھئی۔ بے چارے آخری بار اپنے ساتھیوں سے مل لیں گے۔“

اوپر سے ایک چاقو نیچے آگرا۔ وہ عام سا چاقو تھا۔ انہوں نے ا س کے ذریعے رسیاں کاٹنی شروع کردیں اور جلد ہی وہ آزاد ہوگئے۔ ان کے ہونٹوں پر بھی ٹیپ چپکائی گئی تھی۔ اسے اتارتے وقت انہیں شدید تکلیف محسوس ہوئی۔منہ کھلتے ہی ان سب نے کہا:

”اللہ کا شکر ہے اس مصیبت سے نجات ملی اور آپ لوگوں کی شکل نظر آئی۔“

”اچھی طرح اللہ کا شکر ادا کرلو۔ آج تم لوگوں کی زندگیوں کا آخری دن ہے۔“

”تب پھر پہلے ہمیں یہ بتادیں کہ حاجو خان سے آپ کیا کام لے رہے تھے۔ دفتر کے لوگوں کی چیزیں کیوں اس کے ذریعے اڑا رہے تھے۔“

”پہلے چند آدمیوں کی چھوٹی چھوٹی چیزیں اڑ ا کر حاجو خان کو یہ احساس دلایا تھا کہ یہ کام بے ضررہے۔ پھر اس کے ذریعے نصیر الدین شاہ کی دراز میں گھڑی رکھوانے کا پروگرام تھا، لیکن حاجو خان کم بخت دھوکا دے گیا۔

امید نہیں تھی کہ وہ ایسا ثابت ہوگا۔ میرا تو خیال تھا وہ پوری طرح شیشے میں اتر چکا ہے، لیکن ہو ااِس کا اُلٹ۔ خیر …. کوئی بات نہیں۔ تم لوگوں کے ساتھ اس کا بھی کانٹا نکال دیاجائے گا۔ جب تم ایک دوسرے کو خوب جی بھر کر دیکھ چکو تو بتا دینا۔ اُس وقت میرے ساتھی درختوں پر سے فائرنگ کرکے تم لوگوں کو اگلے جہاں پہنچادیں گے۔“

”اچھی بات ہے، لیکن یہ تو کوئی مزے داری نہ ہوئی۔“ انسپکٹر جمشید نے حیران ہوکر کہا۔

”کیا مطلب؟“

”مسٹر بلتان! کم ا ز کم ہماری اور آپ کی ملاقات تو ہونی چاہیے تھی۔“

”اچھی بات ہے۔ تم سے ملاقات بھی کر لیتا ہوں۔ کہیں مرتے وقت تم یہ خوش فہمی لے کر نہ مرو کہ میں تم سے ڈر رہا تھا ، اس لیے سامنے نہیں آیا۔“

”چلیے ٹھیک ہے۔ ہم یہ خوش فہمی لے کر نہیں مریں گے وعدہ کرتے ہیں۔“ فاروق نے خوش ہوکر کہا۔

”حد ہوگئی یہ خوش ہونے کا کون سا موقع ہے؟“

”اچھا جب خوش ہونے کا موقع آئے تو بتادینا۔“ اس نے برا سا منہ بنایا۔

اب انہوں نے اپنے ساتھیوں کی طرف توجہ دی۔

”ہمیں افسوس ہے کہ یہ لوگ آپ لوگوں کو اغوا کرکے لے آئے۔ غلطی ہماری تھی۔“

”اب تو جوہونا تھا ہوچکا۔“ حاجو خان نے پریشانی کے عالم میں کہا۔

”موت کا وقت مقررہے اور اپنے وقت پر آکر رہتی ہے۔ بس اللہ تعالیٰ سے دعا ہے کہ وہ ہمیں معاف کردے، ہمارے گناہوں سے درگزر کرے۔“

”آمین ۔“ ان سب کے منہ سے نکلا۔ ساتھ ہی آنکھو ں میں آنسو آگئے۔

”انسپکٹر جمشید! تم لوگوں کی آنکھوں میں آنسو؟ میں نے تو سنا تھا تم لوگ وہ ہو جو موت کی آنکھوں میں آنکھیں ڈال کر دیکھتے ہو، لیکن میں تو تم لوگوں کی آنکھوں میں آنسو دیکھ رہا ہوں۔“

”یہ آنسو حاجو خان اور اس کے بیوی بچوں کے لیے ہیں۔ ہم ان کی حفاظت نہ کرسکے۔ وہ ہماری پناہ میں تھے۔“

”اس میں آپ کا کیا قصور؟“ حاجو خان کے منہ سے نکلا۔

”کیا تم لوگ ایک دوسرے سے مل چکے؟“

”ہاں! لیکن ا ب آپ سے ملنا چاہتے ہیں۔“

”میں آرہا ہوں۔ بالکل آرہا ہوں….فکر نہ کریں۔“

اور پھر خاموشی چھا گئی۔ وہ چارو ں طرف دیکھنے لگے …. درختوں کے حلقے کے اندران کے سوا کوئی نہیں تھا۔

اچانک انہیں درختوں کے درمیان سے نکل کر کوئی آتا نظر آیا۔

پھر وہ درختوں کے دائرے میں داخل ہوا۔ اس کے چہرے پر نقاب تھا۔ وہ درمیانے قد کا دبلا پتلا سا آدمی تھا۔ پرسکون انداز میں چلتے ہوئے وہ ان کے سامنے آکھڑا ہوا:

”اس نقاب کی ضرورت سمجھ میں نہیں آئی جب کہ ہمیں معلوم ہے آپ بلتان ہیں۔“ انسپکٹر جمشید نے الجھن کے عالم میں کہا۔

”میں نے سوچا کہیں تم لوگ مجھے دیکھ کر ڈر نہ جاﺅ۔“

”جہاں تک بلتان کے حلیے کا تعلق ہے مجھے معلوم ہے، لہٰذا اس کے حلیے سے تو ہم خوف زدہ ہوں گے نہیں کوئی اور بات ہو تو وہ آپ بتادیں۔“

”میرا خیال تھا تم حلیے کے چکر میں پڑنے کی بجائے یہ پوچھو گے کہ میں کیا چاہتا ہوں؟ یہ سارا چکر کیا ہے۔“

”اس میں شک نہیں ۔ ضروری یہی ہے، چلیے خیر اگر آپ اپنا چہرہ نہیں دکھانا چاہتے تو پھر یہ باتیں بتادیں جن کی طرف خود آپ نے اشارہ کیا ہے؟“

”ضرور کیوں نہیں حاجو خان کے محکمے کے ڈائریکٹر پر ہماری ایک مدت سے نظریں تھیں۔ محکمہ اطلاعات بہت اہم ہوتا ہے۔ اس کا ڈائریکٹر اگر ہماری مرضی کا ہو تو بہت سے کام چٹکیوں میں نکل آتے ہیں۔ سو اوپر سے حکم ملا، نصیر الدین شاہ کو ختم کردیاجائے ، لیکن اس طرح کہ تفتیش کرنے والے چکر ہی کھاتے رہ جائیں۔ سو حاجو خان کو چھوٹے چھوٹے معاملات میں دس دس ہزار روپے دے کر قابو کیا گیا۔ یہ اور بات ہے کہ اصل واردات کی باری میں وہ ہاتھ سے پھسل گیا اور اس نے ہدایات کے مطابق عمل نہ کیا۔ اب ظاہر ہے ہمیں نصیر الدین کو تو ٹھکانے لگانا تھا۔ سوچا اس کے ساتھ ہی ، حاجو خان کو بھی مزہ چکھا دیا جائے لیکن یہ حضرت پہنچ گئے آپ کے پاس۔ جب انہیں آپ کے گھر سے اغوا کیا گیا تو پروگرام طے پایا کہ ساتھ میں آپ کے گھر کو بھی لپیٹ میں لیا جائے تاکہ ایک تیر سے تین شکار ہوجائیں چنانچہ دیکھ لیں سب یہاں موجود ہیں۔ نصیر الدین شاہ بھی ہیں۔ ایک ہی بار آپ سب کو لپیٹ دیا جائے گا۔ پھر یہاں لاشوں سے چھٹکارا حاصل کرنے کا مسئلہ بھی نہیں ہے۔ اٹھا کر سمندر میںپھینک دیں گے اور فارغ…. پھر ہم ہوں گے اور آپ کا ملک ہوگا۔ بات ایک ڈائریکٹر پر تو ختم نہیں ہوجائے گی۔ تمام اسلام پسندوں کو ایک ایک کرکے ختم کریں گے اور ان کی جگہ اپنی مرضی کے آدمی لائے جائیں گے…. اس طرح یہ ملک بغیر کسی جنگ کے فتح ہوجائے گا۔ جب انسپکٹر جمشید جیسے لوگ نہیں ہوں گے تو ہمارے لیے آسانیاں ہی آسانیاں ہوں گی اور تم لوگوں کے ہوتے ہوئے رکاوٹیں ہی رکاوٹیں ہیں۔“

”یہاں آپ خوش فہمی میں مبتلا ہیں۔“ انسپکٹر اس کے خاموش ہوتے ہی بولے۔

”وہ کیسے؟“

”ایسے کہ اس ملک میں ایک ہم ہی نہیں ہیں۔ ہم جیسے نہ جانے کتنے سرپھرے موجود ہیں۔“ 

”کوئی پروا نہیں…. باری باری سبھی کو اس جزیرے پر لایا جائے گا اور یہ جزیرہ موت کا جزیرہ بن جائے گا۔“

”چلیے ٹھیک ہے۔ اب ذرا آخر میں اپنا چہرہ دکھا دیں تاکہ ہم بھی دیکھ لیں بلتان کیسا ہوتا ہے۔“ انہوں نے شوخ انداز میں کہا۔

”اچھی بات ہے۔ تم لوگ بھی کیا یاد کروگے۔“

اس نے کہا اور چہرے سے نقاب اتار دیا۔ انہوں نے بالکل اس حلیے کے آدمی کو اپنے سامنے دیکھا…. جو حلیہ انہوںنے بلتان کا سن رکھا تھا۔

”چلو اس بہانے زندگی میں بلتان کو دیکھ لیا، بہت شہرت سنی تھی آپ کی۔ اب ایک بات اور بتادیں۔“

”جو پوچھنا ہے پوچھ لو۔ پھر تمہیں کہاں موقع ملے گا۔“ وہ ہنسا۔

”اس مرتبہ آپ کس ملک کے لیے کام کررہے ہیں۔“

”انشارجہ کے لیے…. ویسے میں زیادہ تر انشارجہ کے لیے ہی کام کرتا ہوں۔“

”خوب بہت خوب میرا بھی یہی اندازہ تھا۔ یہ انشارجہ ہی تو ہے جو ہر ملک کو غلام بنانے کی فکر میں رہتا ہے۔ وہ بھی بلتان جیسے لوگوں کے ذریعے۔“

”بس ہوگئیں تم لوگوں کی باتیں ختم۔ اب ہم اپنا کام کریں گے۔“

”میری ایک خواہش تھی۔“ انسپکٹر جمشید کی آواز ابھری۔

”کیا مطلب؟کیسی خواہش؟‘ ‘ وہ چونکا۔

”دو بے چارے ساحل پر رہ گئے۔ اس معاملے میں واقعی ان کا کوئی قصور نہیں وہ بلاوجہ پھنس گئے۔ میں چاہتا تھا آپ انہیں بھی یہاں بلالیں جو کچھ ہوان کے سامنے ہوجائے۔ اس طرح اس واقعے کے گواہ بھی ہوں گے۔“

”ان گواہوں کا تم لوگوں کو کیا فائدہ ہوگا بھلا؟“

”بات فائدے اور نقصان کی نہیں۔ میں تو بس ان کا خیال کرتے ہوئے کہہ رہا ہوں۔ وہ بھی دیکھ لیتے اپنے دین اور ملک کے لیے کس طرح زندگیاں قربان کی جاتی ہیں۔“

”اگرچہ اس کی ضرورت نہیں پھر بھی میں اس کو آپ کی آخری خواہش سمجھ کر پوری کیے دیتا ہوں۔ پروفیسر سام اور کپتان صاحب! آپ دونوں تک میری آوز پہنچ رہی ہے نا۔“

”جج….جی ہاں پہنچ رہی ہے۔“

”بس تو پھر آپ بھی آگے چلے آیئے۔ آپ دونوں کو خوف زدہ ہونے کی ضرورت نہیں۔ آپ کو کوئی نقصان نہیں پہنچایاجائے گا۔ بس آپ ان لوگوں کی موت کا منظر دیکھیں گے۔“

”نن نہیں…. ہم یہ خوفناک منظر نہیں دیکھ سکتے ۔“ پروفیسر سام کی لرزتی آواز سنائی دی۔

”میں نے کہا نا آپ کو ڈرنے کی ضرورت نہیں …. بس چلے آیئے۔ ورنہ پھر ہم آپ لوگوں کو جزیرے پر چھوڑ کر چلے جائیں گے۔“

”ن…. نہیں…. ایسا نہ کیجیے۔“ ڈرائیور خوف زدہ آواز میں چلا اٹھا۔

”تو پھر چلیں آئیں ناک کی سیدھ میں آکر ان کی موت کا منظر دیکھ لیں۔ پھر ہم یہاں سے چلیں گے۔“

”چلیے پروفیسر صاحب! اب تو چلنا پڑے گا۔“ 

”ہاں …. بالکل۔“

اور پھر وہ انتظار کرنے لگے۔ یہاں تک کہ دونوں درختوں کے دائرے میں داخل ہوتے نظر آئے۔ ان کے چہروں پر خوف طاری تھا۔

چوتھا حصّہ؎

”آیئے پروفیسر صاحب! آیئے۔“ بلتان چہکا۔

”پروفیسر صاحب! میں آپ سے کچھ کہنا چاہتا ہوں۔ آپ تو جانتے ہی ہیں۔ یہ ہمارا آخری وقت ہے۔ کیا آپ میری بات سننا پسند کریں گے۔“

”آ پ لوگوں ہی نے تو ہمیں اس مصیبت میں پھنسایا ہے۔ ہم آپ کی بات کیوں سنیں۔“

”شاید وہ بات آپ کے حق میں ہو۔“

”اچھی بات ہے سن لیتا ہوں۔“ پروفیسر سام نے برا سا منہ بنایا اور ان کی طرف دیکھنے لگا۔

پروفیسر سام کے قدم ان کی طرف اٹھنے لگے۔ ان کی نظریں پروفیسر پر جم کر رہ گئی تھیں۔ ایسے میں محمود نے دبی آوا ز میں کہا۔

”ابا جان! آپ پروفیسر صاحب سے کیا کہنا چاہتے ہیں؟“

”بس دیکھتے جاﺅ۔“ وہ بولے۔

”جی…. کیا دیکھتے جائیں؟“

”یہ کہ میں ان سے کیا کہنا چاہتا ہوں۔“

”آپ کہتے ہیں تو دیکھ لیتے ہیں، ہمارا کیا جاتا ہے۔“ فاروق نے منہ بنایا۔

اور وہ مسکرانے لگے۔ اگرچہ موت کے دہانے پر مسکرانا آسان کام نہیں تھا، لیکن ان کی زندگیوں میں ایسے لمحات آتے ہی رہتے تھے، لہٰذا مسکراسکتے تھے۔ آخر پروفیسر سام ان کے بالکل نزدیک پہنچ گئے۔

”ہاں انسپکٹر جمشید آپ مجھ سے کیا کہنا چاہتے ہیں؟“

”میں آپ کے کان میں کہنا چاہتا ہوں۔ مہربانی فرما کر اور نزدیک آجائیں۔“

”اوہو…. وہ ایسی کیا بات ہے آخر۔“

”آپ سن کر حیرت زدہ رہ جائیں گے۔“

”چلیے مان لیامیں سن کر دھک سے رہ جاﺅں گا، لیکن بات ہے کیا۔“ 

”وہ تو میں کان میں بتاسکتا ہوں۔“

”اچھی بات ہے، میں نزدیک آجاتا ہوں۔“

اس کے قدم اٹھنے لگے یہاں تک کہ وہ ان کے بالکل نزدیک پہنچ گیا۔

”لیجیے آگیا نزدیک کہیے کیا کہنا چاہتے ہیں؟“

”کان قریب کیجیے نا۔“ انہو ں نے منہ بنایا۔

پروفیسر سام نے بھی منہ بنایا تاہم وہ ان سے اور نزدیک ہوگیا اور اپنا کا ن ان کے منہ کی طرف کردیا۔

عین اس وقت انسپکٹر جمشید نے ایک عجیب حرکت کی۔

وہ عجیب حرکت یہ تھی کہ انسپکٹر جمشید نے پروفیسر سام کی گردن کے گرد اپنا دایاں بازو کس دیا تھا اور بایاں ہاتھ اس کے سر پر اس طرح رکھا کہ جونہی ذرا سا جھٹکا دیں تو اس کی گردن ٹوٹ جائے اور یہ انسپکٹر جمشید کا ایک خاص انداز تھا۔ ایک عجیب داﺅ تھا۔ اس داﺅ سے وہ بڑے سے بڑے ماہر لڑاکے کو قابو میں کرچکے تھے۔ ان کے اس داﺅد کے جواب میں ان کا شکار اگر ذرا بھی حرکت کرنے کی کوشش کرتا تو اس کی گردن ٹوٹ جاتی تھی۔ شکار فوراً محسوس کرلیتا تھا کہ وہ بہت بری طرح پھنس گیا ہے۔

”یہ…. یہ کیا انسپکٹر جمشید ؟ تم نے اپنے ساتھی کو اس طرح کیوں پکڑلیا۔“ بلتان کی حیرت زدہ آواز گونجی۔

”یہ ہمارا ساتھی نہیں، البتہ ہمارے ساتھ یہاں تک آیا ضرور ہے۔ اب یہ اس حالت میں ہے کہ اس کے جسم کو ذرا بھی حرکت ہوئی تو اس کی گردن ٹوٹ جائے گی۔ یہ خود حرکت کرے یا میں حرکت کروں ، ایک ہی بات ہوگی بلکہ تم میں سے کوئی کسی طرح بھی ہم پر وار کرے، اس کی گردن پہلے ٹوٹے گی۔ اگر یقین نہیں تومسٹر ساکا خود اس سے پوچھ لو۔“

”کیا …. کیا کہا مسٹر ساکا؟“ وہ بری طرح اچھلا۔

”ہاں! تم بلتان نہیں ہو ساکا ہو۔ ہمارے ملک کا ایک بڑا جرائم پیشہ تم سے میری ملاقات ایک کیس کے سلسلے میں ہوچکی ہے، لیکن تم میرے ہاتھ سے بچ کر نکل گئے تھے۔ میں چونکہ اس وقت تمہاری آوا ز سنتا رہا ہوں، اس لیے اب جب میں نے تمہاری آواز سنی تو میرے دماغ میں ایک جھماکا سا ہوا۔ میرے دماغ نے مجھے فوراً بتایا کہ یہ شخص بلتان نہیں ساکا ہے۔ ایک مقامی جرائم پیشہ کیوں میں غلط تو نہیں کہہ رہا؟“

”نہیں! تم بالکل ٹھیک سمجھے۔“ اس نے ہنس کر کہا۔

”خوب! تم نے اتنی بات تو مانی۔ اب اپنے ساتھیوں کو حکم دو، وہ درختوں سے نیچے آجائیں لیکن نیچے آنے سے پہلے اپنے پستول اور رائفلیں گرادیں۔“

”کیا آپ پاگل ہوگئے ہیں انسپکٹر جمشید۔“ ساکا غرایا۔

”نہیں البتہ تم لوگوں کو پاگل کردینے کا ارادہ ہے اور وہ تم آج ضرور ہوگے۔“

”کیا اِدھر اُدھر کی ہانک رہے ہو؟ پروفیسر سام کو چھوڑ دو۔ تم لوگ پوری طرح ہماری زد پر ہو۔ ایک پل میں سب کے سب تڑپتے نظر آﺅگے۔“

”اس میں شک نہیں لیکن مشکل یہ ہے کہ ہمارے ساتھ پروفیسر سام بھی تڑپتے نظر آئیں گے۔“

”تو کیا ہوا ہماری بلا سے۔ آجائیں تڑپتے نظر۔“ساکا بولا۔

”تب پھر اپنے ساتھیوں کو حکم دوکہ وہ ہم پر فائرنگ شروع کریں۔ ہم پوری طرح ان کی زد پر ہیں نا؟فائرنگ شروع کرنا ان کے لیے کیا مشکل ہے شروع کریں۔“

”لگتا ہے آپ واقعی پاگل ہوگئے ہیں۔ بھلا ہمیں پروفیسر سام کی کیا پروا؟ تم لوگو ںکے ساتھ یہ بھی مرتے ہیں تو ہمیں کیا۔“

”اسی لیے تو کہہ رہا ہوں اپنے ساتھیوں سے کہو ہم پر فائرنگ کریں۔“

”یہ حکم تو خیر مجھے دینا ہی ہے، لیکن….“ ساکا کہتے کہتے رک گیا۔

”لیکن کیا…. یہ لیکن اٹک کیوں گیا؟“ فاروق کی شوخ آواز سنائی دی۔ اب صورت حال ان کی سمجھ میں بہت تیزی سے آرہی تھی۔

”لیکن…. میں سوچتا ہوں بلاوجہ پروفیسر سام کیوں مارے جائیں؟ آپ انہیں چھوڑ دیں تاکہ ہم فائرنگ شرو ع کرسکیں۔ انہیں ساحل کی طرف جانے دیں۔“

”اب میں اتنا بھی پاگل نہیں۔“ انسپکٹر جمشید ہنسے۔

”کتنے بھی جمشید؟“ خان عبدالرحمن نے حیران ہوکر کہا۔

”یار سمجھا کرو۔“ وہ جھلا کر بولے۔

”اچھی بات ہے، اب سمجھا کروں گا۔“ خان عبدالرحمن نے فوراً کہا۔

”کیا سمجھا کروگے؟“ انسپکٹر جمشید بولے۔ جب کہ ان کی پوری توجہ پروفیسر سام کی طرف تھی۔ وہ ذرا بھی اِدھر اُدھر نہیں دیکھ رہے تھے۔

”جج…. جو تم کہوگے بس وہی سمجھا کروں گا۔“

”انسپکٹر جمشید تم بھی اپنے بچوں کی طرح اِدھر اُدھر کی باتوں میں لگ گئے۔ ہے کوئی تک…. تم پروفیسر سام کو چھوڑتے ہو یا میں فائرنگ کا حکم دوں۔“

”یہی تو میں کہہ رہا ہوں تم فائرنگ کا حکم دے دو۔“

”ضرور تم پاگل ہوگئے ہو۔“ ساکا گرجا۔

”تو پھر تمہیں اس سے کیا؟ میں پاگل ہوگیا ہوں، تمہاری بلا سے۔ میں تو تمہارا دشمن ہوں، تمہارے قابو میں ہوں اور پروفیسر سام کوئی تمہارے سگے رشتے دار بھی نہیں ہیں کہ تمہیں ان کی زندگی کی کوئی پروا ہوگی، تو پھر حکم دو اپنے ساتھیوں کو وہ ہم پر فائرنگ کریں۔“

”اب یہی کرنا ہوگا۔ میں تو بس اس لیے رک گیا تھا کہ بے چارے پروفیسر سام بلاوجہ مارے جائیں گے جب کہ ان کا کوئی قصور نہیں ہے اور ہمیں ان سے کوئی دشمنی نہیں، لہٰذا میں آخر ی بار کہہ رہاہوں پروفیسر سام کو چھوڑ دیں۔“

”اور میں بھی تمہیںآخری بار کہہ رہاہوں کہ فائرنگ کا حکم دو۔“ انسپکٹر جمشید گرجے۔

ان کی گرج نے ان سب کو ہلا کر رکھ دیا، لیکن خود انسپکٹر جمشید نہیں ہلے تھے، اس لیے کہ اگر وہ ہلتے تو پروفیسر سام کی گردن ٹوٹ جاتی۔

”اچھی بات ہے انسپکٹر جمشید! آپ جیت گئے۔ آپ پروفیسر کو چھوڑدیں، ہم آپ سے بات چیت کے لیے تیار ہیں۔“ ساکا نے ڈھیلی ڈھالی آواز میں کہا۔

”انسپکٹر جمشید نے اپنے بال دھوپ میں سفید نہیں کیے۔“انسپکٹر جمشید مسکرائے۔

”کیا کہہ رہے ہیں ابا جان؟ آپ کے بال تو ابھی سفید ہوئے ہی نہیں۔“ فاروق نے حیران ہوکر کہا۔

”اوہ…. معاف کرنا محاورہ درمیان میں ٹپک پڑا۔“

”کیا کہنا چاہتے ہیں انسپکٹر جمشید؟“ ساکا نے جھلائے ہوئے اندا ز میں کہا۔

”با ت تو جتنی بھی ہوگی اسی حالت میں ہوگی یعنی پروفیسر سام کو چھوڑے بغیر۔“

”اوکے…. آپ کیا چاہتے ہیں؟“ساکا کی آواز اور ڈھیلی ہوگئی۔

”ہاں! اب آپ آئے سیدھے راستے پر…. درختوں پر جتنے لوگ موجود ہیں ان سب سے کہو اپنی رائفلیں اور پستول نیچے گرادیں۔ اگر کسی کے پاس بھی پستول یا رائفل نظر آئی تو ہم اسے نہیں چھوڑ یں گے۔“

”گرادو بھئی….نیچے۔“ ساکا بولا۔

”یہ کیا؟ یہ صاحب توپروفیسر سام کو بچانے کے لیے آپ کی ہر بات ماننے کے لیے تیار ہوگئے کمال ہے۔“ محمود نے حیران ہوکر کہا۔

”اسی کو کہتے ہیں انقلاب زمانہ۔“ انسپکٹر جمشید ہنسے۔

”یہ تو کمال ہوگیا جمشید…. لیکن یہ ہو کیسے گیا؟“ پروفیسر داﺅد کے لہجے میں حیرت تھی۔

”ساکا کے چہرے کی طرف دیکھ لیں۔“ 

”ساکا کے چہرے کی طرف دیکھ لوں کیا وہاں پر لکھا ہے کہ یہ کیسے ہوگیا۔“

”کچھ نہ کچھ تو لکھا نظر آ ہی جائے گا۔“

”اچھی بات ہے جمشید تم کہتے ہو تو دیکھ لیتا ہوں۔ ورنہ اس کی طرف دیکھنے کو جی نہیں چاہتا۔ ارے یہ کیا؟ اس کے چہرے پر تو سیاہی ہی سیاہی نظر آرہی ہے۔“

”بلکہ یوں کہیں کہ کالک ملی نظر آرہی ہے۔“ خان عبدالرحمن بولے۔

”اوہو! سوال تو یہ ہے کہ کیوں؟ پروفیسر سام کی ان لوگوں کے نزدیک کیا اہمیت ہے؟“ فاروق نے جھلائے ہوئے اندا ز میں کہا۔

”ابھی تک رائفلیں نہیں گرائی گئیں۔“ انسپکٹر جمشید کی سرد آواز لہرائی۔

”گراتے کیوں نہیں۔“ ساکا چلایا۔

رائفلیں اور پستول نیچے گرنے لگے۔

”تم لوگ حرکت میں آجاﺅ۔ تمام رائفلوں اورپستولوں کو خالی کرکے دور پھینک دو۔ اس قدر دور کہ اس سے زیادہ دور نہ پھینک سکو۔“ 

”جی اچھا۔“ وہ بولے۔

اور انہوں نے اپنا کام شروع کردیا۔ جلد ہی میدان رائفلوں اور پستولوں سے پاک ہوگیا۔

”اب ان لوگوں سے کہو کہ نیچے آجائیں۔“

”نیچے آجاﺅ۔“ ساکا بولا۔

ان لوگوں نے درختوں سے رسیوں کی سیڑھیاں لگائی ہوئی تھیں۔ فوراً ہی وہ ان کے ذریعے نیچے اترتے نظر آئے۔

”فاروق ان رسیوں کو کاٹ کر نیچے گرادو۔“

”جی اچھا۔“

فاروق نے وہ چاقو اٹھالیاجو میدان میں پڑا تھا اور اس کو لے کر درخت پر چڑھ گیا۔ اس طرح اس نے رسیاں کاٹ ڈالیں۔

”اب ان رسیوں سے ان لوگوں کو باندھنا شروع کردو۔“

وہ اس کام میں لگ گئے۔ جب سب کو باندھ لیا گیا تو انسپکٹر جمشید نے کہا:

”مسٹر ساکا! اب تم خود کو بندھوالو۔“

”اچھی بات ہے۔“

انہوں نے اسے بھی باندھ دیا۔

”میں اس کی گردن پکڑے رہوں گا۔تم لوگ اسے بھی رسیوں سے باندھ دو۔“

”آپ کا مطلب ہے پروفیسر سام کو ۔“ مارے حیرت کے محمود کے منہ سے نکلا۔

”ہاں! پروفیسر سام کو۔“

”تت…. تو یہ بھی ان کا ساتھی ہے۔“ فاروق چلا اٹھا۔

”بہت دیر بعد سمجھے…. جب میں نے خان عبدالرحمن کی گاڑی اڑنے کی خبر سنی تھی، تو میں اس وقت چونکا تھا۔ پھر جب لانچ اڑی تو مجھے یقین ہوگیا کہ یہ سب پروفیسر سام کررہا ہے۔ اس کا صاف مطلب یہ تھا کہ یہ بھی ان کا ساتھی ہے۔ اسی لیے تو ایک ایسے جزیرے کو منتخب کیا گیا جس کے بارے میں ہمیں اس سے رابطہ کرنا پڑا۔ اب کیوں نہ میں تمہیں اس کا اصل نام بھی بتادوں؟“

”جج…. جی …. اصل نام…. آپ…. آپ کامطلب ہے …. جیفر سام اس کا اصل نام نہیں ہے۔“

”نہیں…. جیفر نام کا آدمی تو اس وقت بھی اپنے گھرمیں موجود ہے۔ یہ تو اس کے میک اپ میں ہے۔“

”کیا؟“ مارے حیرت کے ان کے منہ سے نکلا۔

”ہاں ! بالکل یہی بات ہے۔ یہ جیفر سام نہیں ہے۔ اس کے میک اپ میں ہمارا اصل مجرم ہے۔“ انسپکٹر جمشید بولے۔

”آپ….آپ کا مطلب ہے یہ بلتان ہے۔“ وہ چلا اٹھے۔

”ہاں بالکل…. دراصل ہمارا سب سے بڑا دشمن انشارجہ ہمارے ملک کی اہم ترین جگہوں پر اسلامی ذہن کے لوگ پسند نہیں کرتا۔ اس بار اس نے بلتان کے ذمے کچھ لوگوں کو ٹھکانے لگانے کا کام لگایا تھا۔ ان میں پہلا نمبر نصیر الدین شاہ کا تھا۔ بلتان جیسے لوگ دور بیٹھ کر اپنا کام کرنا پسند کرتے ہیں، لہٰذا اس نے یہ کام دوسروں سے لینے کا منصوبہ بنایا تھا۔ آٹھ دس خاص خاص آدمیوں کو یہ اسی قسم کی سازشوں کے ذریعے ٹھکانے لگاتا اور فتح کے شادیانے بجاتا انشارجہ چلا جاتا۔ منصوبہ تو بس اتنا سا تھا۔ اب اس کے وہم و گمان میں بھی یہ بات نہیں تھی کہ اس کا پہلا ہی شکار ا س کے ہاتھوں سے پھسل جائے گا۔ اسے کیا معلوم تھا کہ حاجو خان اس کا سارا منصوبہ چوپٹ کردے گا جہاں تک میرا خیال ہے اس نے اس شہر میں پروفیسر جیفر سام کے گھر کو اپنا ہیڈ کوارٹر بنایاتھا…. جیفر سام انہی کا کارندہ ہوگا، لہٰذا اسی کے مشورے سے اس جزیرے کا نام ہمیں دیا گیا تاکہ ہم اس کے بارے میں معلوم کرنے کے لئے اس کے پاس جائیں اور وہاں سے جیفر سام کے روپ میں بلتان ہمارے ساتھ ہولے۔ جب ہماری گاڑی ساحل سمندر پر بھک سے اڑ گئی تو مجھے بہت حیرت ہوئی کیونکہ پروفیسر داﺅد پہلے ہی گاڑی کو چیک کرچکے تھے اور اس وقت کوئی چیز اس میں نہیں ملی تھی۔ پھر گاڑی میں دھماکا کرنے کا سامان کب رکھا گیا؟ یہ بات مجھے اس وقت سوجھی جب لانچ بھی اسی طرح اُڑ گئی۔ اس وقت مجھے قطعاً کوئی شک نہیں رہ گیا تھا کہ بلتان خود ہمارے ساتھ ہے۔ نتیجہ یہ کہ اس وقت بلتان کا پورا منصوبہ خاک میں مل چکا ہے۔ اس کے تمام ساتھی ہماری قید میں ہیں اور خود یہ موت کے دہانے پر کھڑا ہے۔ لو میں اس کا بھی کانٹانکالے دے رہا ہوں۔“

”واہ! کیا انصاف ہے۔“ایسے میں بلتان نے اپنے جسم کو حرکت دیے بغیر کہا۔

”انصاف…. گو یا تم مجھے ناانصافی کا طعنہ دے رہے ہوبھلا وہ کیسے؟“

”دھوکے سے مجھے قابو میں کرلیا۔یہ کیا بہادری ہے؟ مزہ تو تب تھا جب مجھے مقابلے کے لیے للکارتے۔ میری تمہاری جنگ ہوتی پھر میں تمہیں بتاتا، تم کتنے پانی میں ہو۔“

”یہ بات وہ شخص کہہ رہا ہے جس نے اس وقت تک صرف اور صرف دھوکے سے کام لیاہے۔ ہماری گاڑی اڑا دی، لانچ اڑادی اور اس سے پہلے حاجوخان کو دھوکا دیا۔ اب یہ صاحب مجھ سے مطالبہ کررہے ہیں کہ میں انہیں باقاعدہ مقابلہ کرکے شکست دوں۔ واﺅ کیا خوب۔“

”گویا تم مجھے اسی طرح ہلاک کردینا چاہتے ہو۔“

”ہاں بالکل! میں دشمن کو بلاوجہ موقع دینے کے حق میں نہیں۔ تم میرے ذاتی دشمن نہیں ہو میر ے ملک کے دشمن ہو ، میری قوم کے دشمن ہو۔ اس سے بھی بڑھ کر یہ کہ اسلام کے دشمن ہو۔ اب دیکھو نا میں بہادری کے گھمنڈ میں تمہاری گردن چھوڑ دوں اور تم سے کہوں آﺅ کرو مجھ سے مقابلہ اور مقابلے میں جیت جاﺅ تم، تو یہ نقصان کس کا ہوگا؟ مجھے تو یہ نقصان پہنچے گا کہ میں تمہارے ہاتھوں مارا جاﺅں گا یا شدید زخمی ہوجاﺅں گا اور میرے بچے تمہارے ہاتھوں مارے جائیں گے۔ میرے ساتھی بھی مارے جائیں گے۔ غرض ہم سب ختم ہوجائیں گے۔ بات صرف یہاں تک ہوتی، تو بھی میں تمہاری خواہش پوری کرتااور تم سے دو دو ہاتھ کرتا، لیکن خطرہ بس یہ نہیں اس سے بھی آگے بڑھ کر یہ ہے کہ تم اسلام کے دشمن ہو۔ ہمارے ملک کی جڑیں کھوکھلی کرتے ہو، لہٰذایہ تم جاری رکھوگے اور اگر ایسا ہوا تو یہ میری اس بہادری کے گھمنڈ کا نتیجہ ہوگا۔ بات یہ ہے کہ میں دشمن کو مہلت دینے کا قائل نہیں۔ ہاں اس کی ایک صورت ہے۔“

”ایک صورت…. اور وہ کیا؟“ بلتان کی آواز میں تجسس تھا۔

”وہ یہ کہ تم میرے ایک سوال کا جواب دے دو۔“ 

”کک…. کیسا سوال؟“

”بالکل آسان سا سوال ہے۔ یہ بتادو کہ ہم سب کو ختم کرنے کی صورت میں تم لوگ یہاں سے کس طرف جاتے؟ ظاہر ہے اس جزیرے پر تو رہنے کے لیے انتظام نہیں ہے۔“

بلتان کے چہرے پر ایک رنگ آکر گزر گیا، وہ کچھ نہ بول سکا۔

”مسٹر بلتان ! تم نے جواب نہیں دیا۔“ انسپکٹر جمشید مسکرائے۔

وہ اب بھی خاموش رہا۔

”واہ جمشید …. تم نے تو کمال کردیا اِسے گنگ کردیا۔

”میں اب اس کی گردن توڑ رہا ہوں کیونکہ اس نے کوئی جواب نہیں دیا۔“

”ٹھیک ہے جمشید…. یہی بہتر ہے۔ سانپ کو چھوڑ دینا عقل مندی نہیں۔“

”ٹھہرو انسپکٹر جمشید ! میں تمہارے سوال کا جواب دے رہا ہوں۔ یہاں پاس ہی ایک اور جزیرہ ہے وہاں میرے بہت سے ماتحت موجود ہیں۔ ان کے پاس ایسی کئی لانچیں ہیں۔“

”خوب بہت خوب! آپ نے دیکھا پروفیسر صاحب۔“ انسپکٹر جمشید چہکے۔

”کک…. کیادیکھا۔“ پروفیسر ہکلائے۔

”یہ کہ ادھر میرا اور اس کا مقابلہ شروع ہوتا، ادھر اس کے ساتھی ہمیں پکڑلیتے اور رائفلیں ہم پہلے ہی یہاں سے بہت دور پھینک چکے ہیں اور وہ سب ان کے ہاتھ لگ جاتیں اور ہم بہت آسانی سے ان کے ہاتھوں مارے جاتے۔ بازی پھر بلتان کے ہاتھ میں رہتی۔“

”ارے باپ رے۔“ پروفیسر داﺅد اور خان عبدالرحمن بوکھلا اٹھے۔ وہ مسکرادیے۔

”پھر اب کیا کرنا ہے جمشید؟“

”بس دیکھتے جاﺅ۔“

”اچھا دیکھتے جائیں گے،ہمارا کیا جاتا ہے۔“پروفیسر داﺅد نے منہ بنایا۔

”چلو بھئی بلتان اپنے ساتھیوں سے کہو وہ ادھر ہی آجائیں۔ وہ بھی یہ مقابلہ دیکھیں گے۔“

”ٹھیک ہے۔“ بلتان نے فوراً کہا۔

”تو دو نا پیغام۔“

”میری جیب سے موبائل نکال کر مجھے دیں۔“ وہ بولا۔

”نمبر بتاﺅ میں دائل کرتا ہوں۔ کیا نام ہے؟ اس ماتحت کا جسے تم ہدایات دوگے۔“

”راجر بوم۔“ وہ بولا۔

”محمود بہت احتیاط سے اس کی جیب سے موبائل نکال لو۔ خود کو اس کی زد سے بچائے رکھنا۔“

”کیا اِس حالت میں یہ صاحب مجھ پر حملہ کرسکتے ہیں؟“

”نہیں…. لیکن ہوشیار رہنا اچھا ہے۔“

”جی اچھا۔“

محمود نے موبائل اس کی جیب سے نکال لیا۔ پھر اس سے نمبر پوچھا۔ اس نے جونہی نمبربتایا۔ انسپکٹر جمشید نے اس کے جسم کو زو ر دار جھٹکا دیا…. اس کے منہ سے ایک دل دوز چیخ نکل گئی۔

”یہ …. یہ آپ نے کیا کیا؟ اسے ختم کردیا۔“ فاروق بول اٹھا۔

”نہیں ! بے ہوش کیا ہے۔“

اب وہ خان عبدالرحمن کی طرف مڑے اور بولے۔

”خان عبدالرحمن حرکت میں آجاﺅ۔“

”کیا کہا…. حرکت میں آجاﺅں…. کیسے؟“

”سب لوگ ان رائفلوں کو تلاش کرلیں۔ ان میں میگزین بھرلیں اور درختوں کی بہترین انداز میں اوٹ لے لیں۔ دشمن کے ساتھی سیدھے ادھر آئیں گے۔ ان کا نشانہ لینا بھلا کیا مشکل ہوگا۔“

”بہت خوب جمشید!“

اور پھر اس ہدایت پر کام شروع ہوگیا۔ جلد ہی وہ درختوں کے پیچھے پوزیشن لے چکے تھے۔ اب انسپکٹر جمشید نے پروفیسر داﺅ دسے کہا۔

”جن لوگوں کو ہم نے رسیوں سے باندھا ہے، انہیں آپ کوئی چیز سونگھا کر بے ہوش کردیں تاکہ یہ شور وغیرہ کرکے آنے والوں کو خبردار کرنے کی کوشش نہ کریں۔“

”اچھی بات ہے جمشید۔“ وہ مسکرا دیے ۔

جب سب لوگ بے ہوش ہوگئے تو انسپکٹر جمشید نے راجر بوم کے نمبرملائے جونہی اس کی آواز ابھری۔ انہوں نے حلق سے بلتان کی آواز نکالی۔

”راجر بوم۔“

”یس سر!“ دوسری طرف سے فوراً کہا گیا۔

”ہم نے ان سب کو قابو کرلیا ہے۔ اب تم بے فکر ہوکر آجاﺅ۔“

”اوکے سر۔“ 

انہوں نے فون بند کیا ہی تھا کہ فاروق نے پریشانی کے عالم میں کہا۔©

”ہم ایک بات نظر انداز کرگئے ابا جان۔“

”اور وہ کیا؟“

ان سب کے منہ سے نکلا۔

”ہم یہ بات نظر انداز کرگئے ہیں کہ ہمارا مقابلہ بلتان سے ہے۔“ محمو د مسکرایا۔

”حد ہوگئی بھلا یہ بات بھی کوئی بھولنے والی ہے؟ بلتان ہمارے سامنے پڑ اہے۔“ فاروق نے منہ بنایا۔

”کیا کہنا چاہتے ہو محمود؟“ انسپکٹر جمشید الجھن کے عالم میں بولے۔

”بلتان نے بھی آخر اپنے منصوبے کا ہر طرح جائزہ لیا ہوگا۔ اس نے یہ اندازہ لگایا ہوگا کہ آپ نے اس کے بارے میں بھانپ لیا تو اس صورت میں وہ کیا قدم اٹھائے گا۔ ایک قدم تو آپ سمجھ گئے لیکن میرا خیال ہے اس نے کوئی اور قدم بھی سوچا ہے یعنی یہ راجر بوم اور اس کے آدمیوں کو ختم کردیتے ہیں۔ بلتان پر بھی قابو پالیتے ہیں تو اس صورت میں آخری داﺅ کے طور پر وہ کیا قدم اٹھائے گا۔“

”ہوں…. تمہارا خیال ٹھیک ہے محمود۔ بلتان نے اس مقام پر شکست کے بعد ضرو رکوئی اور پہلو بچا رکھا ہے۔“

”اور ابا جان ! وہ پہلو یہ ہے کہ جب ہم بلتان اور اس کے ساتھیوں کو لے کر لانچ پر سوار ہوجائیں گے تو اس وقت وہ آخر ی وار ہوگا۔“

”ہوں…. ضرور یہی بات ہے۔“

”بس تو پھر بلتان کو آپ اسی طرح پھر سے قابو میں کرلیں۔“ محمود نے تجویز پیش کی۔

”لیکن جمشید اسے ختم ہی کیوں نہ کردیا جائے۔“پروفیسر داﺅد بولے۔

”ہوں ٹھیک ہے اس کا کانٹانکال ہی دیتے ہیں۔ پھر ہم راجر بوم اور اس کے ساتھیوں کا انتظار کریں گے۔ وہ زد میں آگئے تو ان کا کام بھی تمام کردےں گے۔ اس کے بعد ہم یہیں اسی طرح انتظار کریں گے۔ ان کی لائی ہوئی لانچوں میں ہر گز سفر نہیں کریں گے۔“

”یہ ٹھیک رہے گا۔ بلتان والا موبائل اب ہمارے پاس ہے۔ ہم اس کے ذریعے آئی جی صاحب کو فون کرکے یہاں لانچیں منگوا سکتے ہیں۔“

”ٹھیک ہے جمشید بسم اللہ کرو اور بلتان کاکام تمام کردو۔“

انسپکٹر جمشید اس کی طرف بڑھے ہی تھے کہ بلتان کے جسم میں بجلی کی سی حرکت پیدا ہوئی اور وہ اٹھ کھڑا ہوا۔ وہ بری طرح چونکے اب ان کے چہروں پر حیرت ہی حیرت تھی۔

”تم سے چوک ہوگئی جمشید۔ میں پوری طرح تمہارے قابو میں تھا۔ مجھے بے ہوش کرنے کے بجائے ختم کردینا چاہیے تھا۔“ وہ ہنسا۔

”اللہ مالک ہے جس نے مجھے تم پر پہلے قابو دیا تھا۔ وہ اب پھر دے دے گا۔“

”اس وقت اور بات تھی میں تمہارے دھوکے میں آگیا تھا۔“

”کوئی بات نہیں آﺅ دو دو ہاتھ بھی ہو ہی جائیں کہ یہی تمہاری خواہش ہے۔ خان عبدالرحمن …. تم اپنا کام کرو۔ راجر بوم اور اس کے ساتھی کم از کم بلتان کی مدد کو نہ پہنچیں۔“ 

”ٹھیک ہے جمشید ! تم فکر نہ کرو۔“ خان عبدالرحمن کی پرسکون آواز سنائی دی۔

”تم لوگ بھی اپنے انکل کے ساتھ جاﺅ۔“

”یہ…. یہ کیسے ممکن ہے ابا جان!یہاں آپ کے اور بلتان کے دود و ہاتھ ہونے والے ہیں۔“ محمود نے پریشان ہوکر کہا۔

”اور ادھر دشمن آنے والا ہے۔ اگر آنے والوں کو نہ روکا گیا تو بلتان کی طاقت کئی گناہ بڑھ جائے گی، لہٰذا تم دشمن کی طرف توجہ دو۔ پروفیسر صاحب آپ بھی خان صاحب کی مدد کریں۔“

”ٹھیک ہے جمشید ہم چاروں پوزیشن لے لیتے ہیں، لیکن جب تک لانچیں نظر نہیں آجاتیں، اس وقت تک تو ہم رخ پھیر کر لڑائی دیکھ سکتے ہیں۔“ فاروق نے مارے بے چینی کے کہا۔

”ہاں ! اتنی اجازت ہے، لیکن تم خود لڑائی میں دخل اندازی نہیں کروگے۔ یہ مقابلہ صرف میرے اور بلتان کے درمیان ہوگاسمجھ گئے۔“

”جی ہاں ! وہ ایک ساتھ بولے۔

”چاہے میری پوزیشن کچھ بھی کیوں نہ ہوجائے۔ تم اپنی جگہ سے نہیں ہلوگے….تم نے سنا …. میں نے کیا کہا ہے۔“

”جی ….جی ہاں ۔“ وہ بولے۔

ایسے میں انہوں نے بلتان کو ہوا میں اڑ کر ان کی طرف آتے دیکھا۔

”سنبھل کر۔“ وہ چلا اٹھے۔

لیکن ان کے چیخنے سے بھی پہلے انسپکٹر جمشید ایک طرف گرکر لڑھک چکے تھے۔ گویا وہ پوری طرح ہوشیار تھے۔ ادھر بلتان اپنی جھونک میں سیدھا ایک درخت کی طرف آیا اور اگر وہ دونوں ہاتھ آگے نہ کردیتا تو بری طرح درخت سے ٹکرا گیا تھا۔ ساتھ ہی وہ ان کی طرف مڑا۔ اس کے چہرے پر حیرت نظر آئی اوریہ حیرت ضرور وار خالی جانے پر تھی۔ 

”ابا جان ! لانچیں نظر آرہی ہیں۔“

”بس ٹھیک ہے۔ اب تم لوگوں کی پوری توجہ حملہ آوروں کی طرف ہونی چاہیے۔ ادھر کوئی نہ دیکھے بلکہ خان عبدالرحمن تم ان لوگوں کے ساتھ کافی آگے چلے جاﺅ۔“

”لیکن جمشید….“

”خان عبدالرحمن ! یہاں کسی لیکن کی گنجائش نہیں ہے۔ سنا تم نے۔“ وہ تیز آواز میں بولے۔ 

”اچھی بات ہے جیسا تم کہوگے ، ہم کریں گے۔“

اور پھر وہ لڑائی کے اس مقام سے آگے بڑھتے چلے گئے۔ اگر چہ ان میں سے ایک کا جی بھی آگے جانے کو نہیں چاہ رہاتھا، لیکن مجبوری تھی۔ حملہ آوروں کو نہ روکا جاتا، تو پھر وہ سب کے سب مارے جاتے۔

”آﺅ بھئی رک کیوں گئے ۔“ انسپکٹر جمشید دونوں بازو پھیلاتے ہوئے بولے۔

”آرہا ہوں لوسنبھالو میرا وار۔“ یہ کہتے ہوئے بلتان پرسکون انداز میں ان کی طرف قدم اٹھانے لگا۔ انسپکٹر جمشید اس پر نظر جمائے اپنی جگہ کھڑے رہے۔پھر جونہی وہ نزدیک پہنچا تو یک دم اونچا اُچھلا۔ اس کے دونوں پاﺅں ان کے سینے کی طر ف آتے نظر آئے۔ وہ فوراً ترچھے ہوگئے اور ساتھ ہی دو ہتڑ چلادیا ۔ ان کے دونوں ہاتھ اس کی کمر پر لگے اور وہ اوندھے منہ گرا۔

”دو وار خالی ہوچکے ہیں۔ بس ایک کی اور مہلت دوں گا۔ تاکہ تم یہ نہ کہومیں نے مقابلہ نہیں کیا۔“

”ٹھیک ہے میرا بھی تیسرا وار فیصلہ کن ہوگا۔ اگر میں اس میں بھی کامیاب نہ ہوسکا، تو اپنی ہار مان لوں گا۔“

یہ کہتے ہی وہ زمین پر گرگیا اور بلا کی رفتار سے ان کی طرف آیا۔ نزدیک آتے ہی اس نے ایک ہاتھ زمین پر رکھا اور پورا جسم گھمادیا۔ انسپکٹر جمشید اس کے اس وار سے بچنے کے لیے اوپر اُچھل گئے۔ ان کا خیال تھا کہ اس طرح اس کا جسم نیچے سے نکل جائے گا، لیکن ایسا نہ ہوا بلکہ اس کے دونوں پیرا ِن کی پنڈلیو ں سے ٹکراگئے۔ انہیں یوں جیسے ان کے جسم سے جان نکل گئی ہو۔ وہ بے دم سے ہوکر زمین پر اوندھے منہ گرے۔

”انسپکٹر جمشید آپ تو گئے کام سے۔ اب آپ کے باقی ساتھیوں کو ٹھکانے لگانا میرے لیے کچھ بھی مشکل نہیں ہوگا۔“بلتان ہنسا۔

”گویا…. گویا تم مجھے موقع نہیں دوگے جب کہ میں نے تمہیں تین مواقع دیے ہیں۔ جب تم درخت سے ٹکرائے تھے اس وقت میں چاہتا تو ایک ہی وار میں تمہارا کام تمام کرسکتا تھا۔ پھر دوسرے وار کے بعد بھی میرے پا س حملہ کرنے کا وقت تھا اور تیسرا وار تمہارا کارگر رہا۔ اب ہونا تو یہ چاہیے کہ تم بھی مجھے تین مواقع دو۔“

”نہیں ! میں ایسا نہیں کروں گا۔ اس حالت میں آپ کی گردن مروڑ دینا میرے لیے آسان ہے۔“

یہ کہتے ہوئے وہ ان کی طرف بڑھا۔ اس کے دونوں ہاتھ ان کی گردن کی طرف آئے۔ انہوںنے اپنی قوت کو جمع کیا اور دائیں ہاتھ کو گھمادیا۔ وہ اس وقت تک پوری طرح ان پر جھک چکا تھا۔ دائیں ہاتھ کا مکا اس کے چہرے پر پوری قوت سے لگا۔ اس کے منہ سے ایک دل دو زچیخ نکل گئی۔وہ بری طرح لڑکھڑایا اور دھڑام سے گرا۔ ساتھ ہی انسپکٹر جمشید اس پر جا پڑے اور اس کی گردن بازو کی گرفت میں لے لی۔ بالکل ایسی طرح جیسے وہ پہلی با رقابو میں آیا تھا۔

”بلتان! اب کیا کہتے ہو؟“

اس کے منہ سے کچھ نہ نکل سکا۔ دوسرے ہی لمحے انہوں نے اس کی گردن کو جھٹکا دیا۔ اس کے منہ سے آخری چیخ نکلی اور وہ ساکت ہوگیا۔ وہ اسے اسی طرح پکڑے بیٹھے رہے کہ کہیں مکر نہ کررہا ہو اور زندہ نہ ہو، لیکن اس کی گردن ٹوٹ چکی تھی۔ آخر اس کی موت کا یقین ہوجانے پر وہ اسے چھوڑ کر اٹھ کھڑے ہوئے ۔ ایک نظر اس کے بے جان جسم پر ڈالی۔ اس کی کھلی آنکھوں سے وحشت ٹپک رہی تھی۔

وہ مڑے اور اپنے ساتھیوں کی طرف چل پڑے۔ دور سے انہیں لانچیں صاف نظر آئیں۔ اپنے ساتھیوں کے نزدیک پہنچ کر انہوں نے ایک درخت کی اوٹ لے لی کہ کہیں ان کے ساتھی انہیں دشمن خیال کرتے ہوئے فائر نہ کردیں۔ پھر وہ پرسکون آواز میں بولے۔

” میں بھی اب تمہارے ساتھ موجود ہوں۔“

”بلتان کا کیا بنا؟“ وہ ایک ساتھ بولے۔

”اللہ کی مہربانی سے مارا گیا۔“

”یا اللہ تیرا شکر ہے۔“

آخر لانچیں ساحل سے آلگیں ۔ بلتان کے ماتحت ساحل پر اترنے لگے۔ پھر بے فکری سے آگے بڑھنے لگے کیونکہ انہیں تو یہی معلوم تھا کہ ان کا راستہ صاف ہے جونہی وہ زد میں آئے۔ انہوں نے فائر کھول دیا۔

دیکھتے ہی دیکھتے وہ خاک اور خون میں تڑپتے نظر آئے۔ ان میں سے ایک بھی نہ بچ سکا۔

دو گھنٹے بعد پولیس کی لانچیں جزیرے کو گھیر چکی تھیں او ر وہ ایک لانچ پر ساحل کا رخ کررہے تھے۔

”اللہ کا شکر ہے ایک سازشی سے تو نجات ملی۔“ محمود کی آواز سنائی دی۔

”لیکن ہمارے ملک میں ایسے سازشیوں اور غداروں کی کیا کمی ہے۔ جلد ہی کسی اور سے ملاقات ہوجائے گی۔“ فاروق نے برا سا منہ بناتے ہوئے کہا۔

اور وہ مسکرانے لگے۔

٭….٭….٭

اس سلسلے کی مزید تحاریر

موت کا جزیرہ

• مئی 25, 2020

پانچ قدم پہ موت

• مئی 25, 2020

سازشی چہرہ

• مئی 25, 2020

بھوت بنگلہ

• مئی 25, 2020

خونی جال

• مئی 25, 2020

آخری امید

• مئی 25, 2020

چوہے دان

• مئی 25, 2020

ڈریکولا کا بھوت

• مئی 25, 2020

خونی سائنسدان

• مئی 25, 2020

-1 کیا ماورائی کردار ”ڈریکولا“ واقعی انسانی آبادیوں میں داخل ہوکر انسانی خون چوسنا شروع ہوگئے تھے؟

-2 کیا انسپکٹر جمشید بھی ڈریکولا بن گئے تھے؟ یا فرزانہ نے یہ بات کسی اور وجہ سے کہی تھی؟

-3 ڈریکولا آخر خون کے کس گھناﺅنے دھندے میں ملوث تھے؟

-4 انسپکٹر جمشید کے دوست نے فرانس سے ڈریکولا سے متعلق کیا معلومات بھیجی تھیں؟

-5 انسپکٹر جمشید اور ان کی ٹیم کو بکسوں میں بند کردینے کے بعد ڈریکولا ان کے ساتھ کیا کرنے والے تھے؟

-6 شہریوں کے لیے رات کے وقت کیا ہدایات جاری کی گئی تھیں؟

پڑھیے سنسنی خیز واردات کا احوال ”ڈریکولا کا بھوت“ میں۔

٭….٭….٭

خون کہاں گیا

ڈاکٹر رحمان انصاری کے کلینک میں ایک شخص ایک بچے کو اٹھائے اندر داخل ہوا اور دوسرے مریضوں کی پروا کیے بغیر ڈاکٹر تک جاپہنچا۔

”ڈاکٹر صاحب ! پہلے اسے دیکھیے۔“

”میں مریضوں کو باری کے مطابق دیکھتا ہوں، آپ سے پہلے بھی بہت سے مریض یہاں موجود ہیں، تشریف رکھیے اور اپنی باری کا انتظار کیجیے۔“

ڈاکٹر رحمان انصاری نے اس آدمی کی طرف دیکھے بغیر کہا۔ وہ اس وقت ایک بوڑھے آدمی کا معائنہ کررہا تھا جو دمے کا مریض تھا۔ اس کے ہاں ہمیشہ مریضوں کی بھیڑ لگی رہتی تھی۔ شہر کا مشہور ڈاکٹر تھا، لیکن بہت مہنگا تھا۔ غریب آدمی اس سے علاج کرانے کے بارے میں سو چ بھی نہیں سکتے تھے۔

”لیکن یہ مررہا ہے ڈاکٹر پہلے اسے دیکھیے، اس کا سانس اُکھڑ رہا ہے۔ اُف میرا بچہ۔“ آدمی نے بوکھلائے ہوئے لہجے میں کہا۔

اب ڈاکٹر نے نظر اُٹھا کر بچے کو دیکھا اور پھر چونک اٹھا۔ اس کا رنگ ہلدی کے مانند زرد ہورہا تھا اور وہ لمبے لمبے سانس لے رہا تھا، جیسے سانس لینے میں بہت تکلیف ہورہی ہو۔

”اسے کیا ہوا؟“ ڈاکٹر انصاری بوڑھے کو چھوڑ کر اس کی طرف مڑا۔

”خدا جانے اسے کیا ہوا، کس کی نظر لگ گئی، دو دن پہلے تو بالکل ٹھیک تھا۔ بھاگتا دوڑتا کودتا پھرتا تھا۔“ باپ نے کہا۔

”اسے لٹادیں، میں دیکھتا ہوں۔“

باپ نے بچے کو مریضوں کے لیے بچھائے اسٹریچر پر لٹادیا۔ 

ڈاکٹر انصاری اس پر جھک گیا۔ چند منٹ تک وہ مختلف طریقوں سے اس کا جائزہ لیتا رہا، پھر سیدھا ہوتا ہوا بولا:

”اس کے جسم میں تو خون بالکل نہیں ہے؟“

”لیکن دو دن پہلے تو یہ بالکل ٹھیک تھا، اسے کوئی چوٹ بھی تو نہیں لگی۔“

”اوہ! تو پھر خون کہاں گیا؟“ ڈاکٹر انصاری کے منہ سے نکلا۔

”جج جی…. میں کیا بتا سکتا ہوں۔“

”کل اس کی کیا حالت تھی؟“ ڈاکٹر نے پوچھا۔

”کل صبح یہ سو کر اُٹھا تو اس کا رنگ زرد ہورہا تھا، ہم دیکھ کر حیران رہ گئے۔ محلے کے ڈاکٹر کو دکھایا تو اس نے طاقت کی دوائیں لکھ دیں اور بتایا کہ بچے کو کوئی بیماری نہیں ہے، بس خون کی کمی ہے، ہم بہت حیران ہوئے کہ یکا یک خون کیسے کم ہوگیا۔ خیر دوائیں شروع کردیں ۔ آج یہ اٹھا تو رنگ بالکل ہی زرد تھا۔ ہم بری طرح گھبراگئے اور میں بچے کو آپ کے پاس لے آیا۔ “ وہ بتاتا چلا گیا۔

ڈاکٹر انصاری چند لمحے کے لیے سوچ میں ڈوب گیا۔ اس کی پیشانی پر فکر کی لکیریں اُبھر آئیں۔ آخر اس نے کہا:

”عجیب بات ہے، اس طرح یکا یک خون کا غائب ہونا کچھ سمجھ میں نہیں آتا، بہر حال سب سے پہلے میری فیس جمع کرادیں، اس کے بعد میں اس کا تفصیل سے معائنہ کروں گا، خون کا گروپ معلوم کروں گا اور اگر اس گروپ کا خون مل گیا، تو بچے کو دیا جائے گا، مجھے اُمید ہے کہ بچہ خون ملتے ہی تندرست ہوجائے گا۔“

”بہت بہتر !آپ کی فیس کتنی ہے۔“

”دو سو روپے، باقی خرچ کی تفصیل بعد میں بتائی جائے گی۔“

”بہت بہتر!“ یہ کہہ کر باپ بچے کو وہیں چھوڑ کر باہر نکل گیا۔ وہاں ڈاکٹر کا کلرک بیٹھا تھا، اس نے بچے کا نام پتا لکھا اور دو سو روپے وصول کرکے ایک چٹ اسے تھمادی۔یہ چٹ ا س نے اندر لے جاکر ڈاکٹر کو دی جو اب پھر دمے کے مریض بوڑھے کو دیکھ رہا تھا۔ آخر اس سے فارغ ہوکر وہ پھر بچے کی طرف بڑھتے ہوئے بولا:

”آ پ کا نام غلام جیلانی ہے۔“

”جی ہاں۔“ باپ نے کہا۔

”آ پ تو شہر کے بہت مشہور آدمی ہیں، اخبارات میں عام طور پر آپ کا نام شائع ہوتا رہتا ہے۔“

”جی ہاں! میں شہر میں اُون کا سب سے بڑا تاجر ہوں۔“

”او ر بچے کا نام کیا ہے؟“ ڈاکٹر نے پوچھا۔

”طاہر جیلانی۔“ غلام جیلانی نے کہا۔

”ہوں! اب میں اس کا معائنہ کرنے لگا ہوں، آپ تھوڑی دیر کے لیے باہر چلے جائیے۔“

”جی، وہ کیوں؟“ غلام جیلانی کے لہجے میں حیرت تھی۔

”ہم بچے کا خون لیں گے، ریڑھ کی ہڈی میں سے چند قطرے لیں گے اور یہ کافی تکلیف دہ طریقہ ہے، آپ باپ ہیں، آپ یہاں موجود رہیں گے تو آپ کو بھی تکلیف ہوگی۔“

”اوہ! اچھا میں باہر چلا جاتا ہوں۔“

غلام جیلانی نے کہا اور اس کمرے میں آکر بیٹھ گیا جس میں مریض بیٹھے اپنی باری کا انتظار کررہے تھے۔ اس کا دل دھک دھک کررہا تھا، بچے کے لیے بری طرح تڑپ رہا تھا۔ شہر کا سب سے بڑا تاجر، کروڑوں روپے میں کھیلنے والا، لیکن بچہ صرف ایک ہی تھا، اب اگر وہ بھی جل بستا تو اس کے لیے دنیا میں کیا رہ جاتا۔

ایک ایک منٹ ایک ایک سال بن کر گزرا، آخر پندرہ منٹ بعد ڈاکٹر کے اسسٹنٹ نے دروازے میں سر باہر نکال کر کہا:

”غلام جیلانی صاحب، اندر تشریف لے آئیں۔“

وہ اُٹھ کر ڈاکٹر کے پاس پہنچا، تو اس کا رنگ سفید ہورہا، آنکھوں میں خوف تھا، ہاتھ اور پیروں میں کپکپی تھی۔

”کیا ہوا ڈاکٹر صاحب! خیر تو ہے؟“

”جو کچھ میں نے اندازہ لگایا ہے، وہ اس قدر بھیانک اور لرزہ خیز ہے کہ میں بتانے کی ہمت نہیں کر پارہا ہوں۔“ ڈاکٹر انصاری نے تھر تھر کانپتی آواز میں کہا۔

”یا اللہ رحم! آخر بات کیا ہے۔“ غلام جیلانی کے منہ سے ڈرے ڈرے لہجے میں نکلا۔

”بات تو میں بعد میں بتاﺅں گا، پہلا مسئلہ تو بچے کو خون دینے کا ہے، اگر اسے چند منٹ کے اندر اندر خون نہ دیا گیا تو یہ چل بسے گا، اس کے خون کا گروپ او ہے، اس وقت میرے پاس اس گروپ کا خون نہیں ہے۔ یہاں ایک خون کا پرائیویٹ بنک ہے، اگر آپ کہیں تو میں فون پر ان سے بات کروں ، وہ فوراً خون یہاں پہنچادیں گے۔“

”ضرور کریں، اس میں پوچھنے والی کیا بات ہے؟“ غلام جیلانی نے کہا۔

ڈاکٹر نے اس کے سامنے کوئی نمبر گھمایا اور گروپ کے خون کے بارے میں بات کی پھر ریسیور پر ہاتھ رکھ کر غلام جیلانی سے بولا:

”دس ہزار روپے ایک بوتل کے مانگے ہیں اور آپ کے بیٹے کو کم از کم پانچ بوتل خون کی ضرورت ہے۔“

”جلدی کیجیے۔ میں دس لاکھ روپے کا خون بھی خریدنے کے لیے تیار ہوں۔“

”بہت بہتر۔“ یہ کہہ کر اس نے خون کے لیے ہدایت دی اور ریسیور رکھ دیا گیا۔ اس کا اسسٹنٹ بچے کے جسم میں خون داخل کرنے کے لیے سٹینڈ وغیرہ لگانے لگا۔ ابھی دس منٹ بھی نہ گزرے ہوں گے کہ خون کی پانچ بوتلیں اٹھائے وہ آدمی اندر داخل ہوئے۔ غلام جیلانی نے انہیں اس وقت پچاس ہزار روپے کا چیک کاٹ دیا۔ وہ چیک لے کر چلے گئے۔ کراس میچنگ ہوگئی تو تھوڑی دیر بعد خون قطرہ قطرہ کرکے طاہر جیلانی کے جسم میں داخل ہونے لگا، ڈاکٹر انصاری نے اب دوسرے مریضوں کو دیکھنا شروع کردیا تھا۔

اس طرح دو گھنٹے گزرگئے۔ طاہر کے منہ کی رونق واپس آنے لگی، اس کا سانس درست ہو گیا۔ باپ کی بے قراری دور ہوگئی۔ کلینک سے باہر اس کے گھر کے دوسرے افراد بھی بے چین تھے۔ اس نے انہیں جاکر بتایا کہ اب طاہر کی حالت بہتر ہے۔ آپ لوگ بے فکر ہو جائیں۔ یہ سن کر سب لوگ قدرے مطمئن ہوگئے۔ غلام جیلانی ڈاکٹر انصاری کے فارغ ہونے کا انتظار کرنے لگا۔ مگر مریض تھے کہ بڑھتے ہی جارہے تھے۔ تھوڑی دیر بعد ڈاکٹر انصاری خود ہی طاہر جیلانی کو دیکھنے چلے آئے۔ غلام جیلانی نے موقع غنیمت جانا اور ڈاکٹر انصاری سے اس مرض کے حوالے سے پوچھنے لگا۔ ڈاکٹر انصاری نے مختصر سا جواب دیا کہ ”فی الحال میں اسے خون لگانے کے سوا کچھ نہیں کرسکتا۔“

” اس سلسلے میں جتنی بھی کتابیں میرے پاس ہیں، میں آج رات سونے سے پہلے ان کا مطالعہ کروں گا اور غور کروں گا خدا جانے کیا چکر ہے۔ دیکھیے نا…. آخر بچے کا خون اس طرح یکا یک کہاں چلا گیا، جب کہ اس کے جسم پر کوئی چوٹ نہیں لگی، خون نہیں بہا۔ جسم سے خون اسی وقت نکلتا ہے جب اس کے چوٹ لگے، کٹ جائے ورنہ خون نہیں نکل سکتا۔“ ڈاکٹر بولا۔

”اب میں کیا کروں؟ سوال تو یہ ہے۔“ غلام جیلانی نے کہا۔

”رات کو اپنے گھر کے تمام دروازے بند کرکے سویئے، کھڑکیوں میں اگر لوہے کی سلاخیں نہیں ہیں تو فوراً سلاخیں لگوالیں، کیونکہ یہ بھی سننے میں آیا ہے کہ ڈریکولا قسم کے لوگوں میں طاقت بہت ہوتی ہے، گولی انہیں زخمی تو کرسکتی ہے، لیکن ختم نہیں کرسکتی، جس کا یہ خون پی لیتے ہیں وہ مرجاتا ہے، تو وہ بھی انہی کی طرح ڈریکولا بن کر دوبارہ زندہ ہوجاتا ہے اور لوگوں کا خون چوسنے لگتا ہے۔ اس طرح اور لوگوں کے لیے خطرہ بن جاتا ہے۔“

”آپ تو مجھے ڈرا رہے ہیں ڈاکٹر صاحب! مجھے چل کر فوراً دروازوں اور کھڑکیوںکا بندوبست کرنا چاہیے۔“

”ہاں اور رات کو دیر تک جاگتے رہیں، اس بچے کے پا س موجود رہیں، مکان کی بتیاں نہ بجھائیں بلکہ کچھ اور بلب لگالیں، کیوں کہ ایسے لوگ روشنی سے گھبراتے ہیں۔ “ ڈاکٹر نے اسے ہدایت دی۔

”بہت اچھا! میں چلتا ہوں۔“

غلام جیلانی گھر پہنچا ، تو اندر کسی کے زور زور سے باتیں کرنے کی آواز آئی۔ وہ فوراً ڈرائنگ روم کی طرف بڑھا اور پھر اس کے منہ سے نکلا۔

”ارے خان رحمان تم۔“

”ہاں میں! بھائی نے مجھے سب کچھ بتادیا ہے، انہوں نے مجھے فون کیا تھا۔ میں فوراً چلا آیا۔ ڈاکٹر کیا کہتا ہے؟“ خان رحمان جلدی جلدی بولے، وہ اس کے دوست تھے۔

غلام جیلانی نے انہیں سب باتیں بتادیں جو ڈاکٹر نے بتائی تھیں۔ خان رحمان کسی گہری سوچ میں ڈوب گئے۔ کافی دیر بعد انہوں نے سراُوپر اٹھایا اور بولے:

”ان حالات میں کوئی ڈاکٹر ہماری شاید ہی مدد کرسکے۔ صرف ایک شخص ایسا ہے ، جو اس مسئلے کا حل تلا ش کرسکتا ہے۔“

”لیکن اب تو طاہر ٹھیک ہوچکا ہے، اب ہمیں کسی کی مددکی کیا ضرورت؟“ غلام جیلانی نے حیران ہوکر کہا۔

”یہ سوچنا غلط ہے۔ صرف اپنے بچے کے بارے میں نہ سوچو، اگر شہر میں واقعی کوئی ڈریکولا قسم کا آدمی موجود ہے، تو وہ اور لوگوں کے لیے بھی تو خطرہ ہے۔ میرا اشارہ اس طرف تھا، لہٰذا مجھے اس شخص کو فون کرکے یہاں بلانا ہی ہوگا۔“

انہوں نے کہا۔

”اوروہ کون ہے؟“

”اس کا نام انسپکٹر جمشید ہے۔“

خان رحمان نے کہا اور فون پر جھک گئے۔

٭….٭….٭

خون کا پیغام

تینوں اپنی تجربہ گاہ میں تھے ۔فارغ ہوتے تو یہاں آکر بیٹھ جاتے اور اِدھر اُدھر کی آوازیں سنا کرتے تھے۔ اس وقت بھی اسی شغل میںمصروف تھے۔

”ہمیں یہ کام بغیر کسی وجہ کے نہیں کرنا چاہیے۔ اس طرح ہم لوگوں کی باتیں سن لیتے ہیں۔“ محمود کہہ رہا تھا۔

”لیکن ہم ان کے چہرے تو نہیں دیکھتے،ہمیں کیا ، کہنے والا اور سننے والا کون ہے۔“ فرزانہ نے جواب دیا۔

”ہم تو دن رات ایسے ہی کام کرتے رہتے ہیں، اس طرح تو ہمیں سب کچھ چھوڑ چھاڑ کر صرف اپنی تعلیم کی طرف توجہ دینی چاہیے۔ بے چاری تعلیم بھی ہمارے بارے میں کیا سوچتی ہوگی کہ ہم اس کی طرف آنکھ اٹھا کر بھی نہیں دیکھتے جب کہ دوسرے طالب علم دن رات کتابوں سے چمٹے رہتے ہیں۔“ فاروق نے مسکرا کر کہا۔

”فکر نہ کرو، تعلیم ہم سے بہت خوش ہے، جو طالب علم دن رات کتابیں پڑھتے ہیں، ہم ہر سال ان سے زیادہ نمبر حاصل کرتے ہیں پھر بھلا تعلیم کیوں کچھ سوچے گی؟ ویسے بھی سوچ بچار کرنا جان داروں کا کام ہے، نہ کہ بے جان چیزوں کا۔“ فرزانہ نے جل کر کہا۔

”ہائیں! تو کیا تعلیم بے جان ہے؟ پھر اسے حاصل کرنے کا کیا فائدہ۔“ فاروق نے منہ بنایا۔

”اس کا مطلب ہے، تم صرف جان دار چیزیں حاصل کرتے رہتے ہو۔“ محمود کے لہجے میں حیرت تھی۔

”ہاں ! میں ذرا شکاری قسم کا آدمی ہوں۔“ فاروق نے مسکرا کر کہا۔

”شکاری قسم کے ہو، شکاری تو نہیں ہونا اور پھر شکاری تو پرندوں اور جانوروں کو مارتے ہیں، زندہ کب پکڑتے ہیں۔“ فرزانہ نے کہا۔

”بہادر شکاری اپنے شکار کو زندہ پکڑتا ہے اور ا س کے بعد حلال کرتا ہے، ایک بار میری ملا قات ایک شیر سے ہوگئی تھی۔ کہنے لگا…. “ فارو ق کہہ رہا تھا کہ محمودنے اسے ٹوک دیا۔

”ٹھہرو! پہلے اتنا بتادو کہ یہ کب کی بات ہے۔“

”عجیب احمق ہو، یہ میں ڈائری دیکھ کر ہی بتا سکتا ہوں اور ڈائری اس وقت میرے پاس نہیں ہے۔“

”وہ کس کے پاس ہے۔“ فرزانہ شوخ انداز میں مسکرائی۔

”کانے دیو کے پاس، اس کے دو بڑے نوکیلے دانت ہیں، لیکن مصیبت یہ ہے کہ ڈائری اس نے اپنے پا س بھی نہیں رکھی، شاید اسے خطرہ تھا کہ میں اس سے حاصل کرنے کے لیے اس کے سر پر پہنچ جاﺅں گا۔ اگرچہ اس کا سربہت چکنا ہے اور پھسلنے کا خطرہ ہے، پھر بھی میں یہ خطرہ ضرور مول لیتا، جانتے ہی ہو، ہم خطرات مول لینے میں کس قدر تیز ہیں، ہاں تو میں کہہ رہا تھا، دیو نے ڈائری اپنے پا س رکھنے کے بجائے نیلے طوطے کی چونچ میں دے رکھی ہے اور اس نیلے طوطے تک پہنچنا اور اسے ہلاک کرنا بہت مشکل ہے۔“

”کیوں! ابھی تو تم شیر کے شکار کی بات کررہے تھے اور طوطے کا شکار نہیں کرسکتے؟“

”اس لیے کہ وہ طوطا، عام طوطا نہیں ہے، اسے مارنا اسی لیے بہت مشکل ہے کہ اس کی جان اس کانے دیو میں ہے۔“ فاروق کہتا چلا گیا۔

 ”یہ کیا بات ہوئی۔ آج تک تو جنوں اور دیوﺅں کی کہانیوں میں یہ پڑھا ہے کہ جنوں اور دیوﺅں کی جان کسی جانور یا پرندے میں ہوتی ہے اور تم اُلٹ بات کہہ رہے ہو۔“ محمود نے کہا۔

”ثابت ہوا، تم جنوں ، دیوﺅںا ور بھوتوں کی کہانیاں پڑھتے ہو، لاحول ولاقوة، کیسا شوق ہے تمہارا۔“ فاروق نے برا سا منہ بنایا۔

”غلط سمجھے! میں نے ایسی کہانیاں کبھی نہیں پڑھیں، لیکن جب ہم بہت چھوٹے تھے اور دادی جان زندہ تھیں، تو اس وقت وہ رات کو سونے سے پہلے ایسی کہانیاں ضرور سنایا کرتی تھیں۔“ محمود نے کہا۔

”ارے ہاں! یاد آیا۔ دادی اماں کتنی اچھی تھیں۔“ فاروق نے درد بھر ے لہجے میں کہا۔

”لو! ڈائری سے دادی اماں تک پہنچ گئے۔“ فرزانہ جھلا اُٹھی۔

”ڈائری سے نہیں، شیر کے شکار سے دادی اماں تک ۔“ فاروق مسکرایا۔ ”میں نے بات شیر کے شکار کی شروع کی تھی۔ درمیان میں ڈائری ٹپک پڑی۔“

”ٹپکی کہاں بے چاری! وہ تو طوطے کے منہ میں ہے۔“ فرزانہ مسکرائی۔

”بہت دیر سے تمہاری اوٹ پٹانگ باتیں جاری ہیں، شام کے کھانے کا وقت ہوگیا اور تمہارے ابا جان آنے والے ہیں، اس لیے اب یہاں سے اُٹھ کر میز پر پہنچ جاﺅ، آج میں نے بیگم شیرازی کو بھی چائے کی دعوت دے رکھی ہے۔“اچانک بیگم جمشید نے دروازے پر آکر کہا۔ وہ چونک اُٹھے۔

”بہت اچھا امی جان ! ہم پہنچ رہے ہیں۔“

بیگم جمشید مسکراتے ہوئے چلی گئیں۔ وہ اُٹھے ہی تھے کہ ٹرانسمیٹر پر ایک آواز سنائی دی۔ ساتھ ہی سبز رنگ کا ننھا سا بلب جلنے بجھنے لگا۔

”ہیلو…. میں پہنچ رہا ہوں، خون کا بندوبست ہوگیا ہے۔“

اس جملے کے بعد خاموشی چھا گئی۔ انہوں نے ایک دوسرے کی طرف دیکھااور پھر تینوں کے منہ سے ایک ساتھ نکلا:

”خون کا بندوبست۔“

پھر وہ کچھ نہ سمجھنے کے انداز میں اٹھے اور کھانے کی میز پر آئے۔ یہاں بیگم شیرازی موجود تھیں۔ انہیں دیکھتے ہی وہ حیرت زدہ ہوگئے۔ بیگم شیرازی کا رنگ زرد تھا اور وہ برسوں کی بیمار نظر آرہی تھیں۔ اسی وقت دروازے کی گھنٹی بجی۔ انداز انسپکٹر جمشید کا تھا۔ فرزانہ نے جلدی سے دروازہ کھولا۔جونہی انسپکٹر جمشید کی نظر بیگم شیرازی پر پڑی وہ چونک اُٹھے۔

”ارے! آپ کو کیا ہوا؟“ ان کے منہ سے نکلا۔

٭….٭….٭

سب کی نظریں بیگم شیرازی پر جم گئیں۔ ان کا رنگ ہلدی کی مانند زرد نظر آرہا تھا۔ حالانکہ وہ بہت صحت مند تھیں اور سرخ رنگ کی تھیں۔ ابھی چند روز پہلے ہی تو انہوں نے پانچوں کو شام کے کھانے پر بلایا تھا۔ اس وقت بھی بالکل ٹھیک ٹھاک تھیں۔

”میں خود حیران ہوں کہ یکا یک مجھے کیا ہوگیا ہے۔ کل میں اٹھی تو زبردست کمزوری محسوس کی، بلکہ اُٹھتے وقت مجھے چکر بھی آگیا۔ میں نے آئینے میں خود کو دیکھا تو زرد رنگ دیکھ کر حیران رہ گئی۔ آج ڈاکٹر کے پاس گئی تھی۔ اسے بھی بہت حیرت ہوئی وہ میری بیماری کو سمجھ نہیں سکا، تاہم اس نے طاقت کی دوائیں لکھ دی ہیں، میں نے وہ دوائیں شروع کردی ہیں۔“ انہوں نے بتایا۔

”اگر بیماری اس کی سمجھ میں نہیں آئی تو پھر آپ کو کسی اور ڈاکٹر کو دکھانا چاہیے تھا۔“ انسپکٹر جمشید نے فکر مند لہجے میں کہا۔

”میں بھی یہی سوچ رہی ہوں، صبح ڈاکٹر انصاری کو جاکر ملوں گی ۔ سنا ہے ، وہ شہر کا سب سے مشہور ڈاکٹر ہے۔“ انہوں نے کہا۔

”ہاں! مشہور بھی اور مہنگا بھی، آ پ اس کے پاس ضرور جائیں، لیکن بات ہے بہت عجیب۔“ انسپکٹر جمشید بولے۔

”خیر دیکھا جائے گا، آیئے چائے پئیں۔‘ ‘ بیگم شیرازی بولیں۔

اور وہ چائے کی طرف متوجہ ہوگئے، لیکن ابھی چائے شروع کی ہی تھی کہ فون کی گھنٹی بج اُٹھی۔ انسپکٹر جمشید نے چائے کا کپ رکھتے ہوئے فون کا ریسیور اُٹھایا اور بولے:

”ہیلو! جمشید بول رہاہوں۔“

”جمشید فوراً یہاں پہنچ جاﺅ۔“ انہیں خان رحمان کی آواز سنائی دی۔

”ارے رحمان تم؟ کیا بات ہے، خیر تو ہے، مجھے کہاں بلا رہے ہو۔“ انسپکٹر جمشید جلدی سے بولے، کیونکہ خان رحمان کی آواز میں گھبراہٹ شامل تھی۔

”میں غلام جیلانی کے گھر سے بول رہاہوں، تم انہیں جانتے ہی ہوگے۔ اُون کے سب سے بڑے تاجر ہیں اور میرے دوست ہیں۔ یہاں تمہاری خاص ضرورت ہے، بہت اہم معاملہ ہے، ا س لیے فوراً آجاﺅ۔“ وہ کہتے چلے گئے۔

”اچھی بات ہے، میں پہنچ رہا ہوں۔“ انہوں نے کہا۔ دوسری طرف سے ریسیور رکھ دیا گیا۔ وہ ان کی طرف مڑتے ہوئے بولے:

”خان رحمان نے مجھے ایک جگہ بلایا ہے، کوئی اہم معاملہ ہے، تم لوگ چائے پیو۔“

”نہیں ابا جان ! ہم بھی چلیں گے، ورنہ ہم الجھن میں رہیں گے۔“

”اچھا چلو، بیگم تم بیگم شیرازی کو جانے نہ دینا، یہ رات کا کھانا بھی ہمارے ساتھ کھائیں گی، ان کی طبیعت ٹھیک نہیں ہے، کہاں پکاتی پھریں گی۔“ انہوںنے اٹھتے ہوئے کہا۔

”ارے ارے بھائی جان ! اس کی ضرورت نہیں۔“ بیگم شیرازی جلدی سے بولیں۔

”اس کی ضرورت ہے۔“ انہوں نے کہا اور محمود، فاروق اور فرزانہ کو ساتھ لے کر باہر نکل گئے۔

محکمے نے چند روز پہلے انہیں جیپ دے دی تھی۔ اگرچہ وہ انکار کرتے رہے تھے، لیکن آئی جی نہیں مانے تھے۔ ان کا کہنا تھا کہ موٹر سائیکل ان کے لیے ناکافی ہے، اکثر ان چاروں کو اچانک کسی مہم پر جانا پڑجاتا ہے تو مشکل پیش آتی ہے۔ اس طرح انسپکٹر جمشید کو ان کی بات ماننا پڑی، لیکن اس کے باوجود انسپکٹر جمشید کو جب تنہا کہیں جانا پڑتا تو اپنی موٹر سائیکل ہی استعمال کرتے تھے، جیپ میں بیٹھ کر وہ غلا م جیلانی کے گھر کی طرف روانہ ہوگئے۔ انہیں حیرت تھی کہ خان رحمان وہاں کیا کررہے ہیں اور انہیں کیا پریشانی آپڑی ہے۔ پندرہ منٹ کے بعد غلام جیلانی کی شاندار کوٹھی کے سامنے پہنچ گئے۔ گھنٹی بجانے پر ان کے ملازم نے دروازہ کھولا اور انہیں اندر لے گیا۔ ڈرائنگ روم میں انہیں خان رحمان کے ساتھ ایک ادھیڑ عمر آدمی ایک عورت اور دو ملازم نظر آئے۔

”السلام علیکم ۔“ چاروں نے اندر داخل ہوتے ہوئے ایک ساتھ کہا۔

”وعلیکم السلام، آﺅ آﺅ جمشید ، ہم تمہارا بے تابی سے انتظار کررہے تھے۔“

”خیر تو ہے۔“ انسپکٹر جمشید کے منہ سے نکلا۔

”خیریت ہی تو نہیں ہے۔“ خان رحمان نے جلدی سے کہا ، پھر انہیں ساری بات بتادی۔ ڈاکٹر انصاری کا جو خیال تھا، وہ بھی سنادیا، وہ حیرت زدہ رہ گئے۔ سب سے پہلے انسپکٹر جمشید نے طاہر جیلانی کا معائنہ کیا۔ خاص طور پر اس کے گلے کو عد سے کی مدد سے دیکھا ، وہاں دوبار یک سے نشان موجود تھے، ایسے نشان جیسے کسی چیونٹی کے کاٹنے سے بن جاتے ہیں یا انجکشن کی سوئی چھوڑ دیتی ہے۔ محمود، فاروق اور فرزانہ نے بھی ان نشانوں کو دیکھا، پھر وہ کرسیوں پر بیٹھ گئے۔ کمرے میں مو ت کی سی خاموشی تھی، پھر اس خاموشی میں انسپکٹر جمشید کی آواز اُبھری:

”میں نے اس موضوع پر بہت سی کتابیں پڑھی ہیں۔ ان واقعات کا تعلق فرانس کی سرزمین سے بتایا جاتا ہے، لیکن ابھی تک یہ بات ثابت نہیں ہوسکی کہ ان واقعات میں حقیقت بھی ہے یا نہیں۔ میں آپ کو مختصر طور پر بتاتا ہوں۔ ڈاکٹر ڈریکولا روحانیت کا ماہر تھا، اس نے مرتے ہوئے اپنی روح ایک مردہ جسم میں داخل کرلی تاکہ ہمیشہ زندہ رہ سکے، لیکن اس جسم کی خوراک صرف خون تھی۔ اب وہ خون پی کر زندہ رہ سکتا تھا۔ اس نے سب سے پہلے ایک لڑکی کو اپنا شکار بنایا، وہ اس کے گھر میں رات کے وقت داخل ہوا اور اس نے اپنے نوکیلے دانت ا س کے گلے میں گاڑ دیے۔ لڑکی کی آنکھ کھل گئی۔ اس نے دیکھا، ایک خوف ناک سا آدمی اس کے اوپر جھکا ہوا ہے، اس کا لباس سیاہ ہے، چہرے پر بھیانک مسکراہٹ ہے، بازوﺅں پر اس کا لباس اس طرح لٹک رہا ہے جیسے وہ لباس نہ ہو، اس کے بازوﺅں کے پر ہوں، وہ اسے کوئی بہت بڑی چمگادڑ لگا، لیکن اس پر تو بے ہوشی سی طاری تھی، وہ جاگ بھی رہی تھی اور نیند کے عالم میں بھی تھی، کافی دیر تک وہ خوفناک آدمی اس کے گلے سے چمٹا رہا، پھر الگ ہٹ گیا۔ ا س کے ہونٹ خون سے ترتھے، اس کے ساتھ ہی لڑکی کو نیند آگئی۔

دوسری رات کو وہ پھر لڑکی کے کمرے میں آگیا۔ اس نے پھر اس کا خون پیا اور چلا گیا۔ جاتے وقت وہ کھڑکی میں سے کو دکر گیا، حالانکہ کمرا دوسری منزل پر تھا۔ ساتھ ہی لڑکی نے پروں کے پھڑپھڑانے کی آوازیں بھی سنی تھیں، یہ آواز اس نے اس وقت بھی سنی تھی۔ جب وہ اندر آیا تھا۔ اسے ایسا معلوم ہوا جیسے وہ شخص اڑ سکتا ہے۔ دوسری طرف لڑکی کے گھر والے پریشان تھے، ڈاکٹر بھی حیران تھے، ابھی وہ اس بیماری کو سمجھ بھی نہ پائے تھے کہ لڑکی مرگئی۔ اسے دفن کردیا گیا، لیکن انہیں کیا معلوم تھا کہ وہ مری نہیں، اب وہ ڈریکولا کی ایک ساتھی بن کر اُٹھے گی۔ پھر وہ اپنی قبر سے نکل آئی اور ڈریکولا کی طرح لوگوں کا خون پینے لگی۔ اس طرح وہ بھی ڈریکولا کی ساتھی بن گئی۔ ان کے ساتھیوں میں بہت تیزی سے اضافہ ہونے لگا، پھر انہوں نے اپنا ایک محل بنالیا اور اس میں رہنے لگے۔

”یہ تو ہے وہ کہانی جو بار بار شائع ہوئی اور لوگوں نے پڑھی، اس کے بعد جو واقعات بیان کیے جاتے ہیں، وہ یہ ہیں کہ ڈ ریکولا اور اس کے ساتھیوں کو مارنے کے لیے ایڑی چوٹی کا زور لگایا گیا، مگر وہ کسی طرح بھی نہ مرتے تھے، گولی سے زخمی ضرور ہوجاتے تھے، لیکن ہوا میں اُڑتے ہوئے نظروں سے اوجھل ہوجاتے تھے کسی کو ان کے ٹھکانے کا پتا نہیں تھا۔ آخر ان کا علاج ڈھونڈ لیا گیا اور اب یہ کہا جاتا ہے کہ ایسے آدمی کے عین دل میں اگر لکڑی کی سیخ ٹھونک دی جائے تو اس کی موت واقع ہوجاتی ہے اور وہ پھر کبھی نہیں اٹھ سکتا، لیکن اب ان کی تعداد اس قدر زیادہ ہوگئی ہے کہ فرانس کو ان کی سرزمین کہا جانے لگا ہے۔“ یہ کہہ کر انسپکٹر جمشید خاموش ہوگئے۔

”آپ کا یہ کہانی سنانے سے کیا مطلب ہے؟ کیا آ پ یہ کہنا چاہتے ہیں کہ ہمارے شہر میں ڈریکولا کا کوئی ساتھی آگیا ہے۔“ محمود نے سوال کیا۔

”میں ابھی کچھ نہیں کہنا چاہتا۔ صرف یہ بتایا ہے کہ ڈریکولا کی کہانیاں کیا ہیں۔ انہوں نے کہا۔

”پھر اب تمہارا کیا پروگرام ہے، تم طاہر جیلانی کے لیے کیا کروگے؟“خان رحمان نے پوچھا۔

”طاہر جیلانی کی حفاظت کے لیے تو کچھ نہ کچھ کر ہی لیا جائے گا، مجھے تو فکر ان بچوں کی ہے جن کے بارے میں ہمیں معلوم نہیں اور وہ ڈریکولا کا شکار بننے والے ہوں گے۔“ انہوں نے کہا۔

”اوہ! ان سب کے منہ سے نکلا، سب کو جیسے سانپ سونگھ گیا تھا۔

”ارے!“ اچانک انسپکٹر جمشید کے منہ سے نکلا اور وہ انہیں گھورنے لگے۔ ان کا چہرہ ایک دم زرد پڑ گیا تھا۔ پھر ان کا کپکپاتا ہوا ہاتھ فون کی طرف بڑھا ، انہوں نے نمبر گھمائے اور بولے:

”ہیلو،کون …. ہاں …. بیگم یہ میں ہوں…. دیکھو…. بیگم شیرازی کو ان کے گھر ہر گز نہ جانے دینا، ان کی بیماری کا مجھے پتا چل گیا ہے، میں ابھی واپس آرہا ہوں۔ وہ اپنے گھر ہر گز نہ جانے پائیں۔“

ان کے الفاظ نے محمود ، فاروق اور فرزانہ کو بری طرح چونکا دیا۔ وہ آنکھیں پھاڑ پھاڑ کر انسپکٹر جمشید کو دیکھنے لگے۔ ان کے چہرے پر بلا کی سنجیدگی طاری تھی۔

٭….٭….٭

کانچ کا ٹکڑا

”اُف اللہ ! تو کیا آپ کے خیال میں بیگم شیرازی بھی کسی ڈریکولا کا شکار ہوئی ہیں۔“ فرزانہ نے بوکھلا کر پوچھا۔

”اس کے علاوہ اور کیا کہا جاسکتا ہے، جب کہ ڈاکٹر کو ان کی بیماری بھی سمجھ میں نہیں آئی۔“ انسپکٹر جمشید بولے۔

”یہ ہم کن حالات کا شکار ہوگئے؟“ محمود کے منہ سے نکلا۔

”حالات تو ہمیں ہمیشہ ہی شکار کرتے رہتے ہیں، اب سوال یہ ہے کہ ہمیں کیا کرنا ہے، ادھر آنٹی کا سلسلہ ہے اور ادھر طاہر جیلانی صاحب کا۔“

فاروق نے کہا۔

”ہم دو پارٹیوں میں تقسیم ہوجاتے ہیں، میں اور فرزانہ واپس جائیں گے اور بیگم شیرازی کی حفاظت کریں گے، تم دونوں اپنے انکل کے ساتھ یہاں رہو گے اور طاہر جیلانی کو نظروں میں رکھوگے۔“ انسپکٹر جمشید نے تجویز پیش کی۔

”لیکن ابا جان ! اس طرح تو یہ تین ہوجائیں گے اور ہم دو ہی رہ جائیں گے۔“ فرزانہ نے اعتراض کیا۔

”اور امی جان کہاں گئیں۔“ محمود مسکرایا۔

”اوہ ہاں! بالکل ٹھیک۔ تو پھر چلیے امی اور آنٹی پریشان ہوں گی۔“

”ہاں، بس چلتے ہیں، میں ان تینوں کو کچھ ہدایات دے دوں۔“

یہ کہہ کر وہ محمود، فاروق اور خان رحمان کو الگ ایک کونے میں لے گئے اور دبی آواز میں انہیں کچھ کہنے لگے۔ آخر میں انہوں نے کہا۔

”رحمان ! تمہارے پاس پستول تو ہوگا؟“

”نہیں! میں یہاں اپنے دوست کے بیٹے کی بیماری کی خبر سن کر آیا تھا، پستول کیسے ساتھ لاتا۔“ انہوں نے جواب دیا۔

”میرا مطلب تھا، گھر میں تو ہوگا۔“

”ہاں بھلا گھر میں کیوں نہ ہوگا۔“ وہ بولے۔

”تو جاکر وہ پستول لے آﺅ یا ظہور کے ذریعے منگالو۔“ انسپکٹر جمشید بولے۔

”وہ تو پستول کو ہاتھ لگاتے ہوئے بھی کانپتا ہے۔“ خان رحمان مسکرائے۔

”ارے ! وہ کیوں؟“

”کہیں پستول چل نہ جائے، خیر…. تم فکر نہ کرو، میں ابھی جاکر پستول لے آتا ہوں۔ ابھی تو سورج بھی غروب نہیں ہوا، یہ ڈریکولا قسم کی چیزیں ، جہاں تک میرا خیال ہے، دن کی روشنی میں حملہ آور نہیں ہوتیں۔ 

”ہاں ! دن کے وقت انہیں دکھائی نہیں دیتا۔“

بس تو پھر ، فکر کی کیا بات ہے، میں ابھی جاکر لے آﺅں گا۔“

”ٹھیک ہے، میں تمہیں سمجھا چکا ہوں کہ کیا کرنا ہے۔اچھا۔“

اب ہم چلتے ہیں، ہمیں ادھر جاکر بھی کچھ انتظامات کرنے ہیں۔“

”ٹھیک ہے۔ آپ فکر نہ کریں ، آج رات ڈریکولا طاہر گیلانی کا کچھ نہیں بگاڑ سکے گا۔“ محمود نے کہا۔

انسپکٹر جمشید اور فرزانہ اُن سے رخصت ہوکر گھرپہنچے تو بیگم جمشید اور بیگم شیرازی کے رنگ واقعی اُڑے ہوئے تھے۔

”آپ نے وہ فون کیوں کیا تھا۔“ بیگم جمشید نے جلدی سے پوچھا۔

”ان کا تنہا رہنا ٹھیک نہیں، فکر کی کوئی بات نہیں ، آپ ہمارے ساتھ نہایت سکون سے رہیں گی، بیگم آج تم انہیں اپنے ساتھ سلا لینا، میں فرزانہ کے ساتھ ان کے کمرے میں سوجاﺅں گا۔“ انہوں نے کہا۔

”آخر بات کیا ہے۔ آپ نے فون پر کہا تھا ، میری بیماری سمجھ گئے ہیں۔“ بیگم شیرازی نے کہا۔

”ہاں اور آپ کے علاج کی تیاری کررہا ہوں، اسی لیے آپ کو گھر نہیں جانے دیا۔“ انہوں نے مسکرا کر کہا اور پھر فرزانہ سے بولے۔

”آﺅ فرزانہ ہم تمہاری آنٹی کے گھر کے سب دروازے بند کر آئیں۔“

”جی بہتر۔“ فرزانہ ان کا مطلب سمجھ کر بولی۔

دونوں بیگم شیرازی کے گھر میں داخل ہوئے، سب سے پہلے انہوں نے تمام کھڑکیاں اور دروازے اندر سے بندکیے اور پھر بیگم شیرازی کے سونے کے کمرے کا معائنہ کرنے لگے۔ انہوں نے ایک ایک انچ دیکھ ڈالا، لیکن کوئی سراغ نہ ملا۔

”اس نے اپنا کوئی نشان نہیں چھوڑا، کہیں وہ سچ مچ ڈریکولا ہی تو نہیں ہے۔“ فرزانہ کے منہ سے نکلا۔

”اگر وہ ڈریکولا ہے تو پھر اسے سراغ چھوڑنے اور نہ چھوڑنے کی کیا پروا ہوسکتی ہے۔“ انسپکٹر جمشید بولے۔

”اس کا مطلب ہے،ا گر ہمیں کوئی سراغ مل جاتا ہے کہ وہ واقعی ڈریکو لا ہے۔“ فرزانہ کے لہجے میں حیرت تھی۔

”ابھی یہ بھی نہیں کہا جاسکتا ، حالات غیریقینی ہیں اور ہم جب تک خود اسے اپنی آنکھوں سے نہ دیکھ لیں، کچھ نہیں کہہ سکتے، آﺅ ہم برآمدے اور صحن کا جائزہ لیں۔“

وہ کمرے سے باہر نکلے اور برآمدے کا جائزہ لینے لگے، اچانک کوئی چیز چمکتی نظر آئی۔ انسپکٹر جمشید نے جھک کر دیکھا برآمدے میں بلب روشن تھا، اس کی روشنی میں انہوں نے دیکھا ، وہاں کانچ کا ایک ننھا سا ٹکڑا پڑا تھا اور اس ٹکڑے پر خون لگا تھا۔

٭….٭….٭

رات سرد اور تاریک تھی۔ چاند کی آخری تاریخیں تھیں اور آسمان پر اَبر تھا، اس لیے تارے بھی نہیں نکلے تھے، سونے پر سہاگا یہ کہ ہلکی ہلکی بارش بھی شروع ہوگئی ، ایسے میں فاروق کے دانت بج اٹھے تو یہ کوئی عجیب بات نہیںتھی، لیکن محمود کو اس پر غصہ آگیا تھا۔

”اگر تمہارے دانتوں کی آواز ڈریکولا کے کانوں تک پہنچ گئی ، تو وہ ڈر کر بھاگ جائے گا۔“

”ہائیں! میرے دانت بجنے کی آواز اس قدر خوفناک ہے، پھر تو اسے ٹیپ کرالینا چاہیے اور جہاں کہیں بھی ڈریکولا کے آنے کا خطرہ ہو، وہ ٹیپ چلا دینا چاہیے، ویسے کیا تم یقین سے کہہ سکتے ہو کہ ڈریکولا کے کان بھی ہوتے ہیں۔“ فاروق شوخ لہجے میں کہتا چلا گیا۔

”کیوں ڈریکولا کے کان کیا کسی عورت نے کھا لیے تھے۔“ محمود کے لہجے میں حیرت تھی۔

”بھوت تو ڈریکولا سے ویسے ہی ڈر جائے، یار کیا خیال ہے، اگر ان دونوں کی کشتی کرادی جائے۔“ فاروق نے کہا اور خان رحمان بے ساختہ مسکرادیے۔

تینوں طاہر جیلانی کے کمرے میں موجود تھے۔ انہوں نے غلام جیلانی ، اس کی بیگم اور گھر کے دوسرے افراد کو آرام سے سونے کی ہدایت کی تھی اور خود طاہر کے کمرے میں رات بھر جاگتے رہنے کا پروگرام بنایا تھا۔ طاہر نیند کے انجکشن کے زیر اثر گہری نیند سو رہا تھا۔

”لو! کہاں سے کہاں پہنچ گئے۔“ محمود نے براسا منہ بنایا۔

”جہاں تم کہو پہنچ جاتا ہوں۔“ فاروق بولا۔

”فی الحال تو اسی کمرے میں موجود ہو۔“

”اچھی بات ہے، ہاں تو تم میرے دانتوں کی آواز کی بات کررہے تھے۔ اوّل تو ڈریکولا کے کان اتنے تیز نہیں ہوسکتے، دوسرے ابھی ہم یہ بھی نہیں جانتے ، وہ ڈریکولا ہے بھی یا نہیں۔“ فاروق بولا۔

”اگروہ ڈریکولا نہیں ہے تو پھر کیا ہے؟“ خان رحمان نے سوال کیا۔

”ہوسکتا ہے ڈریکولاکا بھوت ہو۔“ فاروق کے منہ سے سوچے سمجھے بغیر نکل گیا۔

”ڈریکولا کا بھوت۔“ دونوں کے منہ سے ایک ساتھ حیرت زدہ انداز میں نکلا۔ 

”ہاں!ڈریکولا کا بھوت!“

”بھئی واہ! یہ نئی بات ہوئی ، ایک ڈریکولا ہی کیا کم تھا کہ تم نے اس کے ساتھ بھوت کا بھی اضافہ کردیا۔“ خان رحمان مسکرائے۔

”ویسے خیال ہے خوب۔“ محمود مسکرایا۔

”میں مذاق نہیں کررہا، ہمارے ملک میں بھلاڈریکولا کہاں سے آسکتا ہے، یہ ضرور ا س کا کوئی بھوت ہے جو فرانس سے بھٹکتا ہوا یہاں تک پہنچ گیا ہے۔“

”اگر وہ ڈریکولا کا بھوت ہے تو پھر تو اس کا مقابلہ کرنا اور بھی مشکل ہوگا۔“ خان رحمان گھبراکر بولے۔

”فکر نہ کریں انکل، ہم نے بڑے بڑے بھوتو ں کو دیکھ رکھا ہے۔“ فاروق نے مذاق اڑانے والے لہجے میں کہا۔

”لیکن ڈریکولا کے بھوت کو نہیں دیکھا ہوگا۔“ محمود نے کہا۔

”ہم تمام دروازے اور کھڑکیاں بند کرچکے ہیں جن کھڑکیوں میں سلاخیں نہیں تھیں ، ان میں لکڑیاں پھنسا چکے ہیں ، دوسرے یہ کہ اس کمرے میں ہم خود موجود ہیں، ان حالات میںڈ ریکولا یا اس کے بھوت کی کیا دال گلے گی۔“ فاروق نے کہا۔

”ہائیں ! وہ دال کھاتا ہے۔“ محمو دکے منہ سے نکلا۔

”میں نے محاورہ استعمال کیا ہے۔“ فاروق نے جھلا کرکہا۔

”تو کاٹ کھانے کو کیوں دوڑ رہے ہو۔“ محمود تڑسے بولا۔

”لو اور سنو! انکل میں کوئی دوڑ رہا ہوں۔“ فاروق خان رحمان کی طرف مڑا۔

”نہیں تو…. تم تو چل بھی نہیں رہے، ہمارے پا س بیٹھے ہو۔“ خان رحمان گھبرا کر بولے۔

”تو پھر اسے سمجھادیں ،جھوٹ نہ بولا کرے۔‘ ‘ فاروق مسکرایا۔

”جھوٹ بولنا تو واقعی بہت بری بات ہے۔“ خان رحمان بولے۔

”انکل آپ بھی اس کی باتوں میں آگئے، میں نے بھی تو مذاق میں محاورہ بولا تھا۔“

”ارے ہائیں! تم نے پہلے کیوںنہیں بتایا۔“ فاروق کے لہجے میں حیرت تھی۔

”بنو نہیں! میں جانتا ہوں، تم محاوروں کو اچھی طرح سمجھتے ہو۔“ محمود نے براسا منہ بنایا۔

”تو ہم میں سے محاوروں کو بری طرح کون سمجھتا ہے، ذرا یہ بھی بتاتے چلو، کیونکہ میں محاوروں کی بے عزتی برداشت نہیں کرسکتا، انکل آپ کرسکتے ہیں؟“ فاروق کہتے کہتے خان رحمان کی طر ف متوجہ ہوگیا۔

”ہر گز نہیں، محاوروں کی بے عزتی بھی بری بات ہے۔“ انہوں نے مسکراکر کہا۔

”انکل! آپ اس کی اُوٹ پٹانگ باتوں میں اس کا ساتھ دے رہے ہیں۔“ محمود کے لہجے میں حیرت تھی۔

”اور کیاکروں۔اگر خاموش بیٹھ گئے تو رات کس طرح گزرے گی؟ یہ پہاڑ جیسی رات۔“ خان رحمان نے چھت کی طرف دیکھ کر ٹھنڈا سانس بھرا۔

”آج تک یہ بات میری سمجھ میں نہیں آئی کہ رات پہاڑ جیسی کس طرح ہوسکتی ہے؟ رات کالے دیو کی طرح تو ہوسکتی ہے، پہاڑ جیسی ہر گز نہیں ہوسکتی۔“ فاروق نے کہا۔

”یہ بھی محاورہ ہے۔“محمو دمسکرایا۔

”کہیں ہم پر محاوروں کا بھوت تو سوار نہیں ہوگیا۔“فاروق کے منہ سے نکلا۔

”نہیں تو…. ہم پر تو ڈریکولا کا بھوت سوار ہے۔“ محمود نے ہنس کر کہا۔

”ارے باپ رے۔“ فاروق نے بوکھلا کر اپنے سر پر ہاتھ پھیرا پھر فوراً پرسکون ہوکر بولا:

”یار کیوں مذاق کرتے ہو، میرے سر پر تو میرے بالوں کے سوا کچھ بھی نہیں ہے۔“

”ویسے تم دونوںکا خیال ہے، آج یہاں وہ ڈریکولا کا بچہ آئے گا۔“خان رحمان نے پوچھا۔

”کچھ کہا نہیں جاسکتا ، سننے میں تو یہی آیا ہے کہ ڈریکولا اپنے شکار کا خون اس وقت تک پیتا رہتا ہے جب تک وہ مر نہیں جاتااور قبر میں نہیں پہنچ جاتا، کیونکہ اسے معلوم ہے کہ قبر میں جانے کے بعد جب وہ اس میں سے اُٹھے گا تو اس کا ساتھی بن چکا ہوگا۔“

”پھر تو وہ یہاں ضرور آئے گا۔“خان رحمان بولے۔

”جی ہاں! اسی لیے تو ہم یہاں موجود ہیں۔“ محمود بولا۔

”رات کے گیارہ بج چکے ہیں۔ عام خیال یہ ہے کہ وہ گیارہ اور بارہ کے درمیان آتا ہے۔ ا س لیے اب ہمیں ابا جان کی ہدایات پر عمل شروع کردینا چاہیے۔“ فاروق بولا۔

”ٹھیک ہے، انکل آپ یہیں ٹھہریں۔ ہم اپنا کام ختم کرکے آتے ہیں۔ “

خان رحمن پھٹی پھٹی آنکھوں سے دائیں بائیں دیکھنے لگے۔ ہر طرف خاموشی کا راج تھا۔ انہیں محمود اور فاروق شدت سے یاد آئے جن کی باتوں سے کم از کم خوف کا احساس تو جاتا رہتا تھا۔ خان رحمن ابھی یہی سوچ رہے تھے کہ کسی چیز کے کھٹکے کی آواز سے چونکے۔

دراصل محمود اور فاروق اپنا کام نمٹا آئے تھے جو آنے والے حالات کے پیش نظر انہوں نے پلاننگ کی ہوئی تھی۔ ان دونوں کو دیکھ کر خان رحمن مسکرا دیے۔ اب تینوں نے سر جوڑ کر پلان کے نقشے پر نظریں جما دیں۔

٭….٭….٭

کھنڈرات کی آواز

”یہ تو کانچ کا ٹکڑا ہے۔“ فرزانہ کے منہ سے نکلا۔

”ہاں ہم جانتے ہیں، بیگم شیرازی بہت صفائی پسند ہیں، ان کے گھر میں صفائی کرنے والی ہر روز آتی ہے اور گھر کے ایک ایک انچ کو صاف کرتی ہے، پھر یہ ٹکڑا یہاں کہاں سے آگیا؟ اور اس پر خون بھی لگا ہوا ہے۔“

”ہوسکتا ہے، یہ اسی صفائی کرنے والی کا خون ہو۔“ فرزانہ بولی۔

”برآمدے میں کوئی نہ کوئی اور دھبا کہیں نظر نہیں آرہا۔یہ کس قدر عجیب بات ہے کہ صرف اس ٹکڑے پر خون لگا ہوا ہے۔ خیر ہم اس ٹکڑے کو محفوظ رکھ لیتے ہیں ۔ اس پر بعد میں غور کریں گے۔ میرا خیال ہے، یہاں کوئی اور کام کی چیز نہیں ہے،اس لیے واپس چلتے ہیں۔“ انسپکٹر جمشید بولے۔

”ڈریکو لا اگر یہاں آیا ، تو آنٹی کو نہ پاکر کس قدر مایوس ہوگا، کیا وہ واپس چلا جائے گا؟“ فرزانہ نے سوال کیا۔

”واپس جانے کے سوا وہ اور کر بھی کیا سکتا ہے، لیکن نہیں، وہ یہاں سے ہوکر سیدھا ہمارے گھر آئے گا۔“ انہوں نے چونک کر کہا۔

”یہ آ پ کس طرح کہہ سکتے ہیں، اسے کس طرح معلوم ہوجائے گا کہ آنٹی ہمارے ہاں ہیں۔“

”خون کی بو سے ،یہ لوگ اپنے شکار کی بو بہت دور سے محسوس کرلیتے ہیں۔“ انسپکٹر جمشید بولے۔

”آپ تو اس انداز سے کہہ رہے ہیں جیسے ڈریکولا کا سچ مچ وجود ہے جب کہ میں اسے محض کہانیاں خیال کرتی ہوں۔“

”یہ ہوسکتا ہے کہ دنیا میں ڈریکولا کاکوئی وجود نہ ہو اور یہ صرف کہانیاں ہوں، لیکن ہمارے سامنے جو حالات پیش آئے ہیں، ان کی روشنی میں دعوے سے کچھ نہیں کہا جاسکتا۔ دیکھو نا، آخر طاہر جیلانی کے جسم کا خون کہاں چلا گیا؟ بیگم شیرازی کیوں زرد نظر آرہی ہیں؟ ڈاکٹروں کی سمجھ میں ان لوگوں کی بیماری کیوں نہیں آئی؟ انسانی جسم سے خون صرف چوٹ لگنے یا کٹنے کی صورت میں نکلتا ہے، طاہر جیلانی کے جسم پر زخم کا کوئی نشان نہیں ملا، البتہ اس کی گردن پر ضرور انجکشن کی سوئیوں جیسے دو نشان موجود ہیں۔“ انسپکٹر جمشید کہتے چلے گئے۔

”اور ہم آنٹی کے گلے کو دیکھنا بالکل ہی بھول گئے۔“ فرزانہ مسکرائی۔

”اوہ ہاں! آﺅ چلیں پہلے ان کے گلے کا معائنہ کریں۔ پھر ان کی حفاظت کے سلسلے میں ضروری اقدامات کریں گے۔“

یہ کہہ کر وہ بیگم شیرازی کے گھر سے باہر نکل آئے۔ دروازے کو انہوں نے تالا لگا دیا تاکہ ڈریکولا تالا دیکھ کر ہی سمجھ جائے کہ اندر کوئی نہیں ہے۔ اپنے گھر میں داخل ہونے کے بعدانہوں نے دروازے اور کھڑکیاں اندر سے بند کرلیں اور اندرونی کمرے میں آئے یہاں بیگم جمشید او ربیگم شیرازی بستروں میں دُبکی باتیں کررہی تھیں۔

”میں آپ کی گردن کا معائنہ کرنا چاہتا ہوں۔“ انسپکٹر جمشید نے بیگم شیرازی کی طرف بڑھتے ہوئے کہا۔

”کیامطلب…. کیا مجھے گلے کی کوئی بیماری ہے اور یہ آپ ڈاکٹر کب سے ہوگئے؟“ بیگم شیرازی کے لہجے میں حیرت تھی۔

”ایسی کوئی بات نہیں، میں ایک خیال کے تحت آپ کی گردن دیکھنا چاہتا ہوں۔“ انہوں نے کہا۔

بیگم شیرازی نے گردن کے گرد سے دوپٹا ہٹالیا اور چہرہ اوپر کرلیا۔ انسپکٹر جمشید نے جیب سے عدسہ نکالا اور ان کی گرد ن پر جھک گئے۔ پھر انہوں نے عدسہ فرزانہ کے حوالے کردیا۔ اس نے عدسہ میں سے آنٹی کی گردن دیکھی اور پھر زور سے چونکی۔ انجکشن جیسے نشان ان کی گردن پر بھی موجود تھے۔ دونوں سکتے ہیں آگئے، انہوں نے ایک دوسرے کی طرف دیکھا ،جیسے کہہ رہے ہوں، یہ تو سچ مچ کسی ڈریکولا کا کام معلوم ہوتا ہے۔ وہ اصل بات ان دونوں کو بتا کر خوف زدہ نہیں کرنا چاہتے تھے، تا ہم بیگم جمشید نے بھانپ لیا کہ کوئی گڑبڑ ہے۔ انہوں نے پریشان ہوکر کہا:

”خیر تو ہے ، آپ ان کی گردن پر کیا دیکھ رہے ہیں۔“

”کچھ نہیں، یونہی ایک خیال آیا تھا، لیکن فکر والی کوئی بات نہیں، رات کافی گزرچکی ہے، اب آپ دونوں سونے کی کوشش کریں۔ کمرے کا دروازہ اندر سے بند کرلیں۔“

”کیا کوئی خطرہ ہے؟“ بیگم شیرازی نے پریشان ہوکر پوچھا۔

”نہیں !ہمارے ہوتے ہوئے خطرے کی کیا بات ہوسکتی ہے۔“ یہ کہتے ہی انسپکٹر جمشید باہر نکل آئے تاکہ وہ کوئی اور سوال نہ کر بیٹھیں۔

ساتھ ہی انہوں نے دروازے کی چٹخنی لگنے کی آواز سنی۔

”تمہاری امی کو شک ہوگیا ہے، وہ جان گئی ہیں کہ خطرہ ہے۔“ انسپکٹر جمشید نے سرگوشی کی۔

”یہ تو اور اچھی بات ہے، اب وہ بھی ہوشیار رہیں گی۔“ فرزانہ بولی۔

”لیکن ان کے ہوشیارہونے سے کچھ فائدہ نہیں، اگر ڈریکولا ان کے سامنے آگیا تو وہ کچھ بھی کرنے کے قابل نہیں رہیں گی۔“

”خیر دیکھا جائے گا۔ اب ہمیں کیا کرنا ہے؟“ فرزانہ بولی۔

”بس دیکھتی جاﺅ۔“

یہ کہہ کر انہوں نے جیب سے کوئی چیز نکالی اور برآمدے کے فرش پر جھک گئے۔ عین اسی وقت انہوںنے کسی شیشے کے ٹوٹنے کی آواز سنی۔

ان کے کان کھڑے ہوئے، وہ چونک کر سیدھے ہوگئے اور پھر بے ساختہ بیرونی دروازے کی طرف لپکے۔ بیرونی دروازے میں لگا شیشہ ٹوٹا ہوا تھا، اس کی کرچیاں اندر کی طرف بکھر گئی تھیں۔ انسپکٹر جمشید بلا کی تیزی سے دروازے تک پہنچے۔ چٹخنی بھی گری ہوئی تھی، لیکن اندر تو کوئی بھی نہیں تھا۔ کیا شیشہ توڑ کر دروازہ کھولنے والا باہر ہی رہ گیاتھا، لیکن یہ کیسے ہوسکتا تھا۔ ان کے ذہن تیزی سے گردش کرنے لگے۔

”ابا جان ! کہیں ایسا تو نہیں کہ وہ ہمارے یہاں آنے سے پہلے ہی اندر داخل ہوچکا ہو؟“ فرزانہ بولی۔

”ہم برآمدے میں سے آرہے ہیں۔ اگر اس نے ہمارے قدموں کی آواز سن لی تھی اور وہ اندر بھی داخل ہوچکا تھا تو پھر دو ہی باتیں ہوسکتی ہیں۔ یا وہ باہر نکل گیا یا وہ تمہارے کمرے میں چھپ گیا ہے۔ تمہارے کمرے میں ہونے کی صورت میں بھی وہ جب چاہے پائیں باغ والی کھڑکی کے راستے فرار ہوسکتا ہے، اس لیے تم فوراً پائیں باغ میں پہنچو، میں ادھر سے تمہارے کمرے میں داخل ہوتا ہوں۔“

”بہت بہتر!“ فرزانہ نے کہا اور دوڑتی ہوئی باہر نکل گئی۔ اس کا دل دھک دھک کررہا تھا۔ پائیں باغ میں پہنچ کر اس نے دیکھا، کھڑکی بند تھی۔ وہ اس کے نیچے چلی آئی اور کان اندر سے آنے والی کسی آواز کی طرف لگادیے، لیکن اندر تو گہری خاموشی طاری تھی ، اس نے سوچا ،کیا ابھی تک ابا جان اندر داخل نہیں ہوئے، شاید وہ اسے کھڑکی کے نیچے پہنچنے کی مہلت دینے کے لیے صحن میں ہی رُک گئے ہیں۔ اسی وقت اس کے کان کھڑے ہوگئے، جسم میں سنسنی کی لہر بجلی کی طرح سرایت کرگئی۔ اس نے ایک عجیب خوفناک قسم کی آواز سنی تھی۔

ایسی آواز اس نے اپنی زندگی میںپہلے کبھی نہیں سنی تھی۔ یہ آواز نہ تو کسی انسان کے حلق سے نکلی تھی او رنہ کسی درندے کے، فرزانہ اندا ز ہ نہ لگا سکی کہ آوا ز کس جان دار کی تھی۔

اس کے بدن کے رونگٹے کھڑے ہوتے چلے گئے۔ عین اسی وقت ایک فائر کی آواز گونجی۔

٭….٭….٭

ان کے سامنے زندگی کا سب سے حیران کن ترین منظر تھا خان رحمان کمرے کے فرش پر اُوندھے منہ بے ہوش پڑے تھے۔ ان کا پستول ان کے سر سے تھوڑی دور پڑا تھا۔ طاہر جیلانی بستر پر دراز تھا اور اس پر ایک عجیب خوف ناک آدمی جھکا ہوا تھا۔ اس کے جسم پر سیاہ لباس تھا اور شاید سر سے پیر تک ایک ہی کپڑا تھا۔ دونوں بازوﺅں میں بھی کپڑا لٹک رہا تھا جیسے چمگادڑکے پر ہوں۔ ابھی وہ اس کا چہرہ نہیں دیکھ سکے تھے، کیونکہ چہرہ تو طاہر جیلانی پر جھکا ہوا تھا۔خدا جانے وہ اس کے چہرے پر جھکا کیا کررہا تھا۔ محمود اور فاروق کے اوسان خطا ہوچکے تھے۔ یہ بات ان کی سمجھ سے باہر تھی کہ ایک منٹ کے اندر کیا ہوگیا تھا۔ خان رحمان جیسے دلیر آدمی کس طرح بے ہوش ہوگئے تھے، کیا انہیں پستول چلانے کاموقع نہیں ملا تھا۔ اچانک محمود چونک اُٹھا، اس نے اپنے سر کو جھٹکا دیا اور پھر لپک کر پستول اُٹھالیا۔ اس کے ساتھ ہی فاروق بھی جیسے ہوش میں آگیا۔ اس نے چلا کرکہا۔

”خبردار! گولی ماردیں گے، سیدھے کھڑے ہوجاﺅ۔“

اس عجیب مخلوق نے کوئی گھبراہٹ ظاہرنہیں کی،نہایت سکون سے اسی طرح جھکے جھکے گردن ان کی طرف گھمائی اور وہ لرز اُٹھے۔

ان کے سامنے ایک خوفناک مخلوق موجود تھی۔ اس کے سامنے والے دانت ہونٹوں سے باہر نکلے ہوئے تھے جن سے خون ٹپک رہاتھا۔ آنکھوں میں ایک ایسی خوفناک چمک تھی، جو دوسروں کو بے ہو ش کردینے کے لیے کافی تھی۔ چہرے پر موت کی زردی پھیلی ہوئی تھی، دانتوں کے ساتھ ہونٹ بھی خون سے تر تھے۔ اس کی ناک لمبی تھی۔ جبڑوں کی ہڈیاں اُبھری ہوئی اور قد بہت لمبا تھا۔ یہ بالکل وہی حلیہ تھا جو ڈریکولا کی کہانیوں میں بیان کیا جاتا ہے۔

ان کے ہاتھ میں پستول دیکھ کر وہ سیدھا کھڑا ہوگیا اور پھر ایک ایک قدم ان کی طرف بڑھنے لگا۔

”محمود! فائر کرو۔“ فاروق نے تیز آواز میں کہا۔

محمود نے اس کے سینے کا نشانہ لے کرٹریگر دبادیا۔ گولی چلنے کو دھماکا ہوا، ڈریکولا بدستور ان کی طرف بڑھتا رہا۔ گولی نے اس کا بال بھی بیکا نہیں کیا تھا۔ دونوں کے جسموں میں سرد لہریں دوڑ گئیں۔ اچانک محمود کو کوئی خیال آیا، اس نے اس کے بازو کا نشانہ لیا اور فائر کردیا۔

دوسرا لمحہ چونکا دینے والا تھا، ڈریکو لا کے منہ سے ایک ہولناک چیخ نکلی اور اس کے اُٹھتے قدم رُک گئے۔ چند سیکنڈ کے لیے وہ انہیں گھورتا رہا، پھر کھڑکی کی طرف مڑا اور گویا ہوا میں اڑتا ہوا اس تک جا پہنچا۔ انہیں یہی معلوم ہوا تھا جیسے وہ ہوا میں اُڑتا ہوا کھڑکی تک پہنچا ہو۔ اس نے ایک جھٹکے سے کھڑکی کے پٹ کھول ڈالے مگر کھڑکی میں تو سلاخیں لگ چکی تھیں۔ اس نے سلاخوں پر ایک زور دار ہاتھ رسید کیا،کھڑکی کی چوکھٹ اُکھڑ گئی اور دوسری طرف جا گری۔ یہ دیکھ کر محمود اور فاروق کی سٹی گم ہوگئی۔ اس کا صاف مطلب یہ تھا کہ ڈریکولا بلا کی طاقت رکھتا ہے اور پھر انہوں نے اپنی زندگی کا سب سے زیادہ عجیب منظر دیکھا۔ ان کی آنکھوں کے سامنے ڈریکولا نے کھڑکی میں سے چھلانگ لگادی۔

دونوں بے تحاشا دوڑتے ہوئے کھڑکی تک آئے۔ انہوں نے دیکھا، ڈریکولا تیرکی طرح نیچے جارہاتھا۔ جیسے کوئی پرندہ ہوا میں غوطہ لگاتاہے۔ پھر ا س کے قدم زمین سے ٹکرائے، وہ اچھلا جیسے کوئی گیند اچھلتی ہے اور پھر جونہی دوبارہ قدم زمین سے لگے۔ اس نے دوڑنا شروع کردیا۔

”فاروق جلدی کرو ،کہیں وہ نکل نہ جائے۔“ محمود نے گھبرا کر کہا۔

وہ پوری رفتار سے دوڑتے ہوئے زینے تک آئے اور سیڑھیاں اُترنے لگے۔ انہوں نے اپنے پیچھے دوڑتے قدموں کی آوازیں بھی سنیں، شاید گھر کے لوگ بیدا ر ہوگئے تھے۔ گھر سے باہر نکلتے ہی وہ اس سڑک پر دوڑنے لگے جس پر ڈریکولا کو دوڑتے دیکھا تھا۔ دور بہت دور وہ گویا ہوا میں اڑا جارہا تھا۔ اس کے قدم زمین پر لگتے بھی دکھائی دیتے تھے اور پھر وہ اس طرح اُچھلتا جیسے سڑک اسے اُوپر اچھال رہی ہو۔ ان چھلانگوں نے اس کی رفتار کو بہت زیادہ کردیا تھا اور ان دونوں کے بس کی بات نہیں تھی کہ دوڑتے ہوئے اس تک جاپہنچیں، تاہم انہوں نے ہمت نہ ہاری اور دوڑتے رہے۔

وہ دوڑتے چلے گئے ، اگرچہ اب ڈریکولا انہیں نظر بھی نہیں آرہا تھا۔ انہوں نے فیصلہ کرلیا تھا، اس وقت تک دوڑتے رہیں گے جب تک کہ ا س کے ٹھکانے پر نہیں پہنچ جاتے۔ انہیں یہ بات معلوم تھی، جس سڑک پر وہ چلے جارہے ہیں، وہ شہر سے باہر ویرانوں میں لے جاتی ہے۔ ان ویرانوں میں بے تحاشا کھنڈر بھی تھے اور ان کھنڈروں میں کسی حد تک قابل استعمال عمارات بھی تھیں۔ یہ اس قدر بوسیدہ اور پرانی تھیں کہ کوئی ان کی طرف رُخ کرنا پسند نہیں کرتا تھا اور کچھ عرصے سے تو شہر میں یہ بات مشہور ہوچکی تھی کہ ان کھنڈروں میں کوئی بد روح رہتی ہے جو راتوں کو عجیب و غریب آوازیں نکالتی ہے۔ پاس سے گزرنے والے اگر ان آوازوں کو سن لیتے ہیں تو بے ہوش ہوکر گرجاتے ہیں۔ اس لیے لوگوں نے رات کے وقت تو کیا، دن کے اوقات میں بھی ان کھنڈروں کی طرف سے گزرنا چھوڑ دیا تھا۔

محمود اور فاروق بے تحاشا دوڑے ہوئے اب انہی کھنڈروں کی طرف بڑھ رہے تھے۔ محمود کے دائیں ہاتھ میں ابھی تک پستول دبا ہوا تھا۔ ڈریکولا اب ان کی نظروں سے اوجھل ہوچکا تھا۔ آدھ گھنٹے تک دوڑتے رہنے کے بعد وہ شہری حدود سے باہر نکل آئے اور اب وہ ویرانہ شروع ہوگیا۔

یہاں ہولناکی کا راج تھا، ایک عجیب اور خوفناک سا سنسان پن طاری تھی۔ اب انہوں نے دوڑنا بند کردیا اور آہستہ آہستہ کھنڈروں کی طرف بڑھنے لگے، وہ سمجھ گئے، انہی میں سے کسی ایک کھنڈر میں ڈریکولا رہتا ہے اور اسی کھنڈر کو تلاش کرنا تھا۔

ایک ایک کھنڈر کا احتیاط سے جائزہ لیتے ہوئے وہ آگے بڑھنے لگے۔ اچانک ان کے رونگٹے کھڑے ہوگئے۔ اسی وقت وہ آواز کھنڈروں کا سینہ چیرتی ان کے کانوں سے ٹکرائی تھی۔ 

آواز کان کے پردے پھاڑ دینے والی تھی اور عجیب ترین بات یہ تھی کہ ہر کھنڈر سے اُٹھتی محسوس ہوئی تھی۔ یہاں تک کہ اس وقت وہ جس کھنڈر میں کھڑے تھے، آوازیں اس میں سے بھی گونجتی محسوس ہوئی تھیں۔

وہ کپکپا اُٹھے۔

٭….٭….٭

تعاقب میں

انسپکٹر جمشید نے کمرے میں قدم رکھا تو فوراً ہی انہیں احساس ہوگیا کہ وہاں کوئی موجود ہے۔ گہری تاریکی کی وجہ سے وہ اسے دیکھ نہ سکے۔ کمرے کا بلب بجھادیا گیا تھا اور برآمدے کا بلب وہ خود بجھا کر آئے تھے۔ دروازہ انہیں کھلاملا تھا۔

کسی کے زور زور سے سانس لینے کی آواز ان کے کانوں سے ٹکرائی تو وہ سمجھ گئے کہ وہ جو کوئی بھی ہے، کسی کونے میں موجود ہے، تاریکی میں اس پر حملہ کرنا خطرناک ہوسکتا تھا، کیونکہ وہ نہیں جانتے تھے، مقابلہ کس سے ہے اور وہ کس قسم کے ہتھیاروں سے لیس ہے، چنانچہ اندر داخل ہونے کے بعد وہ فوراً فرش پر لیٹ گئے اور دم سادھ لیا۔ ان کا ہاتھ جیب میں رینگ گیا۔ دوسرے ہی لمحے پستول ان کے ہاتھ میں تھا، انہوں نے سانسوں کی آواز کے ذریعے نشانہ لیا اور گولی چلانے ہی والے تھے کہ کمرے میں ایک عجیب و غریب آواز گونجی۔ انہوں نے ایسی آواز پہلے کبھی نہیں سنی تھی، وہ دھک سے رہ گئے۔ انہوں نے آﺅ دیکھا نہ تاﺅ، آواز کی سمت فائر کردیا۔گولی کی آواز پورے کمرے میں گونج اُٹھی، لیکن جواب میں کوئی چیخ سنائی نہ دی۔ شاید گولی اس کے نہیں لگی تھی۔ اسی وقت انہوں نے محسوس کیا،کوئی ہوا میں اُڑتا ہوا کمرے کے دروازے سے نکلتا چلاگیا ہے۔ وہ فوراً کمرے سے باہر نکلے اور صدر دروازے کی طرف دوڑے ، دروازہ فرزانہ کی وجہ سے اندر سے بند نہیں کیا تھا۔ انہوں نے باہر نکل کر دیکھا ، لیکن کوئی بھی نظر نہ آیا۔ انہوں نے سوچا، کہیں وہ باہر جانے کی بجائے اندر نہ چلا گیا ہو۔ فوراً ہی وہ مڑے اور بیگم کے کمرے کی طرف لپکے۔ انہوں نے ہدایت کی تھی کہ دروازہ اندر سے بند رکھا جائے، لیکن یہ دیکھ کر ان کی سٹی گم ہوگئی کہ دروازہ چوپٹ تھا۔ اندر داخل ہوتے ہی ان کے ہوش اڑگئے۔

ڈریکولا قسم کاایک آدمی بیگم شیرازی پر جھکا ہوا تھا اور بیگم جمشید ایک طرف بے ہوش پڑی تھیں۔

”خبردار ! سیدھے کھڑے ہوجاﺅ۔“

ڈریکولا نے پلٹ کر دیکھا اور ان کے ہاتھ میں پستول دیکھ کر چونک اُٹھا۔ دوسری طرف انسپکٹر جمشید حیرت زدہ تھے۔ ان کے سامنے واقعی ایک عدد ڈریکولا کھڑا تھا جب کہ وہ اب تک یہ سمجھتے رہے تھے کہ یہ سب شرارت کوئی چالاک آدمی کررہا ہے، لیکن اس شخص کی شکل صورت اس حلیے کے عین مطابق تھی جو فلموں میں ڈریکولا کا دکھایا جاتا رہا تھا یا کتابوںمیں لکھا گیا تھا۔ ایک پل کے لیے انہوں نے سوچا…. تو کیا وا قعی کوئی ڈریکولا ہمارے ملک میں آگیا ہے، لوگوں کا خون پینے کے لیے اور اپنے ساتھیوں کی تعداد میںا ضافہ کرنے کے لیے، دوسرے ہی لمحے وہ چونکے۔ انہوں نے اس کے دل کا نشانہ لے کر فائر کردیا، لیکن کچھ بھی نہ ہوا۔ انہوں نے کچھ سوچ کر اس کے بازو کانشانہ لے کر فائر کیا۔ اس مرتبہ ڈریکولا کے منہ سے بھیانک چیخ نکل گئی اور وہ گویا ہوا میں اُڑتا ہوا کمرے کی دروازے کی طرف چلا۔ یہ دیکھ کر انسپکٹر جمشید نے ایک ساتھ کئی فائر کرڈالے، اس کے باوجود وہ ان کے سر کے اُوپر سے گزرتا ہوا برآمدے میں جا پہنچا اور وہاں سے بیرونی دروازے تک پہنچ گیا۔ انسپکٹر جمشید جتنی دیر میں بیرونی دروازے تک پہنچتے، وہ باہر نکل چکا تھا۔ باہر نکلتے ہی انہو ں نے ڈریکولا کو ٹھوکر کھا کر اُوندھے منہ گرتے دیکھا۔ یہ کام فرزانہ نے دکھایا تھا، اس نے اپنی ٹانگ آگے کردی تھی۔ ڈریکولااس کی طرف سے بے خبر تھا، اس لیے دھڑام سے گرا۔ انسپکٹر جمشید نے یہ دیکھ کر فوراً اس پر چھلانگ لگائی، انہیں یوں لگا جیسے وہ کسی لوہے کے بنے ہوئے آدمی پر گرے ہوں جسم کے مختلف حصوں پر سخت چوٹیں آئیں مگر انہوں نے پروانہ کی اور ڈریکو لا کو گلے سے دبوچ لیا، لیکن پھر کئی فٹ اُونچا اچھلے اور زمین پر آرہے۔ ڈریکو لا میں خوفناک طاقت تھی، اس نے اپنی طاقت سے کام لے کر انہیں ہلکے پھلکے کھلونے کی طرح اچھال دیا تھا۔ دوسرے ہی لمحے وہ ایک بار پھراُڑا چلا جارہا تھا، اس کے قدم مشکل سے ہی زمین پر لگتے نظر آتے تھے۔ جب تک وہ دونوں سنبھلے، وہ بہت دور جاچکا تھا۔

”آﺅ فرزانہ جلدی کرو، کہیں وہ نکل نہ جائے۔“ انسپکٹر جمشید چلائے اور جیپ کی طرف دوڑ پڑے۔ فرزانہ بھی فوراً جیپ پر سوار ہوگئی۔ انسپکٹر جمشید نے جیپ کوپوری رفتار پر چھوڑ دیا۔ ان کا خیال تھا کہ وہ بہت جلد اس تک پہنچ جائیں گے، لیکن ان کا یہ خیال غلط نکلا، کیونکہ دو منٹ تک جیپ دوڑتے رہنے کے باوجود انہیں ڈریکولاکہیں نظر نہیں آیا۔

”حیرت ہے۔ وہ اتنا تیز کس طرح دوڑ سکتا ہے؟“ انسپکٹر جمشید بڑبڑائے۔

”یوں لگتاہے جیسے وہ اُڑنے کی طاقت رکھتا ہے اور اگر یہی بات ہے تو ہم جیپ پوری رفتار پر چھوڑ کر بھی اسے نہیں پکڑ سکتے ۔“ فرزانہ بولی۔

”لیکن ایک انسان کس طرح اڑ سکتا ہے؟ آج تک ایسا نہیں ہوا۔“ انہوں نے کہا۔

”ڈریکولا کے بارے میں تو یہی سنا ہے، وہ تقریباً ہوا میں اُڑسکتا ہے۔“

”یہ سب قصے کہانیاں ہیں، حقیقت میں ایسا نہیں ہوسکتا۔“ انہوں نے کہا۔

”لیکن اب تو ہم آنکھوں سے دیکھ چکے ہیں۔“ فرزانہ بولی۔

”ہوسکتا ہے، وہ جیپ کو آتے دیکھ کر ادھر ادھر کہیں چھپ گیا ہو اور ہم اس سے آگے نکل آئے ہوں۔“ انہوں نے خیال ظاہر کیا۔

”ہاں! یہ بھی ہوسکتا ہے، پھر کیا ہم واپس چلیں۔“ فرزانہ بولی۔

”نہیں! واپس جاکر بھی ہم اسے نہیں پاسکیں گے۔“ انہوں نے کہا۔

”کہیں وہ واپس آنٹی تک نہ پہنچ جائے۔“ فرزانہ نے خوف زدہ لہجے میں کہا۔

”کم از کم آج رات وہ دوبارہ ان تک نہیں پہنچ سکتا۔“ انسپکٹر جمشید بولے۔

”وہ کیوں؟“ فرزانہ نے پوچھا۔

”اس لیے کہ وہ زخمی ہوچکا ہے اور زخمی حالت میں اسے خون پینے کا کوئی فائدہ نہیں ہوگا۔ اس لیے وہ اپنے ٹھکانے پر جاکر خون روکنے کا بندوبست کرے گا اور آرام کرے گا،کل ہوسکتا ہے ، وہ پھرآئے۔“انہوں نے کہا۔

”آخر یہ ڈریکولا ہمارے شہر میں کہاں سے آگیا؟“ فرزانہ نے پریشان ہوکر کہا۔

”آگیا نہیں، آگئے، میرا خیال ہے ، یہ ایک سے زائد ہیں۔“ انسپکٹر جمشید بولے۔

”اوہ ! آ پ یہ کس طرح کہہ سکتے ہیں؟“ 

”اس طرح کہ ادھر تو بیگم شیرازی پر حملہ کیاگیا ہے، ادھر طاہر جیلانی کے ساتھ بھی ایسا ہی واقع پیش آیاہوگا۔ اس کا مطلب ہے ، یہ ایک سے زیادہ ہیں۔“

”لیکن ابھی یہ کیسے کہا جاسکتا ہے کہ اُ دھر بھی ڈریکولا پہنچا ہوگا، ہوسکتا ہے، اسی کو بعد میں ادھر جانا ہو، یا یہ وہاں سے ہوکر آیا ہو۔‘ ‘فرزانہ نے اعتراض کیا۔ اس بات کو سن کر انسپکٹر جمشید عجیب سے انداز میں مسکرائے ، پھر بولے:

”مجھے پہلے ہی اس بات کا خیال تھا اور میں نے محمود اور فاروق کو ہدایت کی تھی کہ اگر ڈریکولا آئے تو گھڑی پر ضرور نظر ڈال لیں۔ میں بھی وقت نوٹ کوچکا ہوں، اس طرح ہمیں معلوم ہوجائے گا کہ ڈریکولا ایک ہی ہے یا ایک سے زائد۔“

”لیکن ابا جان ! اس میں اتنی طاقت کیوں ہے۔“

”انسانی جسم میں اصل طاقت خون کی بدولت ہے او روہ خون پیتا ہے۔ نہ جانے اس وقت تک کتنے انسانوں کا خون پی چکا ہوگا، تو پھر اس میں طاقت کیوں نہ ہوگی۔“ انہوں نے جواب دیا۔

”آپ کی بات سن کر میںمحمود اور فاروق کے لیے پریشان ہوگئی ہوں۔“

”فکر نہ کرو، شاید وہ بھی ہمیں اسی سڑک پر کہیں مل جائیں، اسی لیے تو میں واپس نہیں مڑاا ور آگے چلاآیا ہوں۔“ انہوں نے کہا۔

”اوہ۔“ فرزانہ کے منہ سے نکلا۔

”عین اسی وقت انسپکٹر جمشید نے بریک لگائے۔ وہ شہری حدود سے باہر نکل کر ویرانوں کی حدود میں آگئے تھے۔ فرزانہ نے سنا ،ا نسپکٹر جمشید اس طرح بڑبڑائے تھے جیسے خواب میں بولے ہوں۔

”اوہو…. ان کھنڈروں کے بارے میں تو میں بہت کچھ سن چکا ہوں۔ آﺅ فرزانہ ذرا ان پر ایک نظر ڈال لیں۔“

یہ کہہ کر وہ جیپ سے اُتر آئے۔ فرزانہ نے بھی نیچے چھلانگ لگادی۔ دونوں آگے بڑھے اور پھر پہلے کھنڈر میں ٹارچ کی روشنی ڈالتے ہی وہ زور سے اُچھلے۔

٭….٭….٭

”یار یہ آواز کیسی تھی ؟“ محمود کے منہ سے نکلا۔

”یہ شاید کسی روح کی آواز تھی، کیونکہ انسانوں اور درندوں کی آوازیں تو ہم پہچانتے ہیں۔“

”اس کا مطلب ہے، تم نے پہلے کبھی کسی روح کی آواز نہیں سنی۔“ محمود بولا۔

”نہیں!“ فاروق کے منہ سے نکلا۔

”پھر تم کس طرح کہہ سکتے ہو کہ یہ کسی روح کی آواز تھی؟“ محمود بولا۔

”اگر یہ روح کی آواز نہیں تھی تو بتاﺅ ، کس کی تھی۔“

”ڈریکولا کی۔“ محمود بولا۔

”ابھی ہم نے اسے ڈریکولا تسلیم نہیں کیا۔“ فاروق نے جواب میں کہا۔

”آﺅ اس کھنڈر سے باہر نکل کر دیکھیں ، شاید ہمیں کوئی سراغ مل جائے۔“

”کیوں ڈریکولا کے ہتھے چڑھنا چاہتے ہو، وہ ہمارا خون پی جائے گا۔“ فاروق نے مسکرا کر کہا۔

”اب یہاں تک آئے ہیں تو اس کا ٹھکانہ دیکھ کر ہی واپس جائیں گے۔“ محمود نے فیصلہ کن لہجے میں کہا۔

”ٹھکانہ مل جانے کے بعد تم کہو گے، اب ٹھکانہ مل گیا ہے تو ڈریکولا سے کشتی لڑکر ہی جائیں گے، لیکن میں تمہیں بتائے دیتا ہوں کہ مجھے اس سے کشتی لڑنے کا کوئی شوق نہیں، تم ضرور اس سے دو دو ہاتھ کرلینا۔“

”گویا تم دور کھڑے تماشا دیکھتے رہوگے؟“ محمو دنے جل کر کہا۔

”ہاں! اسی طرح ہم ڈریکولا کو شکست دے سکتے ہیں۔“ فاروق مسکرایا۔

”وہ کیسے، ذرا میں بھی تو سنوں۔“ محمود نے حیران ہوکر کہا۔

”جب تم اس کا تنہا مقابلہ کروگے اور میں درمیان میں دخل نہیں دوں گا تو ڈریکولا بہت متاثر ہوگا اور خیال کرے گا کہ ہم کتنے بااصول ہیں کہ ایک کے مقابلے میں صرف ایک آیا ہے، دوسرا اس کی مدد نہیں کررہا، تو وہ خود اپنی ہار کا اعلان کردے گا اور اس طرح ہم فتح پائیں گے۔“ فاروق کہتا چلا گیا۔

”شاید تمہارا دماغ چل گیا ہے، ڈریکولا جیسے لوگ کسی اصول کو نہیں مانتے۔“ محمود نے انکار میں سرہلایا۔

”اگر تم سچ مچ اس کا مقابلہ کرنا چاہتے ہو تو اس کے لیے میری ایک تجویز ہے، اگر سننا پسند کرو۔“

”چلو بتاﺅ، کیونکہ اس وقت فرزانہ ہمارے ساتھ نہیں ہے۔“

”تجویز یہ ہے کہ ہم ڈریکولا کا ٹھکانہ دیکھ کر یہاں سے واپس چلتے ہیں اور ابا جان اور فرزانہ کو ساتھ لے کر آتے ہیں، بلکہ انکل رحمان کو بھی ساتھ لے آئیں گے اور پھر مل کر اس کا مقابلہ کریں گے۔“ فاروق نے کہا۔

”ایک دشمن کے مقابلے میں اتنے آدمی ساتھ لاﺅگے، ابھی تو اصول پرستی کی بات کررہے تھے؟“

”تم نے خود ہی تومیری وہ بات نہیں مانی تھی۔“

”اچھا بھائی یونہی سہی۔ آﺅ پہلے اس کا ٹھکانہ تو ڈھونڈلیں۔“ محمود نے تنگ آکر کہا۔

”لیکن آواز تو اس کھنڈر سے بھی آئی تھی۔ آخر یہ کس طرح ہوسکتا ہے کہ تمام کھنڈروں سے آواز آئے۔“ فاروق بولا۔

”ڈریکولا سے پوچھ کر بتاﺅں گا۔“ محمود نے منہ بنایا۔

”تو ذرا جلدی پوچھو، میں انتظار کرنے کا عادی نہیں۔“ فاروق نے مسکرا کر کہا۔

”یار تنگ نہ کرو، اچھا آﺅ ، پہلے اسی کھنڈ رکو ٹھوک بجاکر دیکھ لیتے ہیں۔“ محمود نے کہا۔

”میرے پاس ٹھوک بجا کر دیکھنے کے لیے کوئی چیز نہیں ہے پہلے کیوں نہیں بتایا، گھر سے کوئی ہاکی یا کرکٹ کا بلاہی لے آتے۔“ فاروق نے کہا۔

”ہم ہاتھوں سے کام لیں گے اور اگر تم ہاتھ پیر ہلانے کے لیے بالکل تیار نہیں ہو تو ایک طرف کھڑے رہو۔“

یہ کہہ کر محمود نے واقعی کھنڈر کی دیواروں کو ٹھوکنا، بجانا شروع کردیا۔ فاروق سے رہا نہ گیا ، وہ بھی اس کا ساتھ دینے لگا۔ یہ دیکھ کر محمودمسکرایا۔

”آخر تم خود کو کام چور ثابت کرنے کے چکر میں کیوں رہتے ہو جب کہ ہو نہیں۔“

”اس طرح میں شیخی بگھارنے سے بچ جاتا ہوں۔“ فاروق نے کہا۔

اچانک انہوں نے اپنے پیچھے کھٹکے کی آواز سنی۔ دونوں چونک کر مڑے، لیکن دیر ہوچکی تھی، سروں پر پڑنے والی لکڑیاں ان کی آنکھوں میں تارے نچاگئیں، پھر یہ تارے بھی ڈوب گئے اور ان کے ذہن اندھیروں میں ڈوب گئے۔

٭….٭….٭

خون کا بنک

”اُف اللہ! یہ تو محمود اور فاروق ہیں۔“ فرزانہ کی آواز میں کپکپاہٹ تھی۔

”ہاں ! دونوں بُری طرح زخمی بھی ہیں۔“ انسپکٹر جمشید نے فکر مند ہوکر کہا۔ پھر وہ جھکے اور فاروق کو اپنے کندھے پر ڈال کر کھنڈر سے نکل آئے۔ فرزانہ محمود کا وزن نہیں اٹھا سکی تھی، اس لیے وہ وہیں کھڑی رہی۔ انسپکٹر جمشید جلد ہی واپس آئے اور محمود کو اٹھا لیا، اب فرزانہ بھی ان کے ساتھ جیپ تک آئی۔ انسپکٹر جمشید نے دونوں کو پچھلی سیٹوں پر لٹا دیا تھا۔

”تم ان کو سنبھالے رہنا، کہیں لڑھک نہ جائیں۔“

یہ کہہ کر وہ ڈرائیونگ سیٹ پر بیٹھے ، دوسرے ہی لمحے جیپ شہر کی طرف اُڑی جارہی تھی۔

”ابا جان ! میرا دل بیٹھا جارہا ہے۔“ فرزانہ نے تھر تھر کانپتی آواز میں کہا۔

”اللہ پر بھروسا رکھو بیٹی! انہیں اس کے تعاقب میں اتنی دور نہیں نکل جانا چاہیے تھا۔ ڈریکو لا کوئی عام مجرم نہیں ہے اور نہ ہم اس سے عام مجرموں کی طرح مقابلہ کرسکتے ہیں، غلطی مجھ سے بھی ہوئی کہ انہیں تعاقب سے منع نہیں کیا، خیر جو ہونا تھا، ہوگیا۔“

محمود اور فاروق کو ہسپتال پہنچا کر اور فرزانہ کو ان کے پاس چھوڑ کر وہ گھر آئے۔ اس وقت انہیں یاد آیا، بیگم کو بھی وہ بے ہوش چھوڑ کر ڈریکولا کے تعاقب میں روانہ ہوگئے تھے۔ گھر پہنچے تو بیگم ہوش میں آچکی تھیں، البتہ بیگم شیرازی ابھی تک گہری نیند میں تھیں۔

”کیا ہوا تھا بیگم۔“ انہوں نے پوچھا۔

”اُف توبہ! میں نے اپنی زندگی میں اتنا خوفناک آدمی کبھی نہیں دیکھا۔ پھر بھی میں اسے دیکھ کربے ہوش نہیں ہوئی تھی۔ اس کی آنکھوں میں نہ جانے کیا تھا، اس نے میری آنکھوں میں دیکھا اور میں بے ہوش ہوکر گرپڑی۔“ بیگم جمشید نے بتایا، پھر چونک کر بولیں©:

”ارے فرزانہ کہاں ہے۔“

”فرزانہ، محمود اور فاروق کے پاس ہسپتال میں ہے۔“ 

”جی ۔ ہسپتال میں؟“بیگم جمشید بوکھلا کر بولیں۔

”ہاں۔ وہ زخمی ہوگئے ہیں، لیکن فکر کی کوئی بات نہیں، ان کی حالت اچھی ہے اور میں تمہیں لینے کے لیے آیا ہوں۔“

”اوہ! “ وہ اچھل کر کھڑی ہوگئیں۔ ان کے منہ سے نکلا:

”میرے بچے!“

”کیا تم چلنے کے لیے تیار ہو۔“

”جی ہاں! لیکن بیگم شیرازی کا کیا کریں ، انہیں بھی تو تنہا نہیں چھوڑ ا جاسکتا۔“

”انہیں بھی ساتھ لے چلتے ہیں، آخر یہ بھی تو بے ہوش ہیں۔“

انہوں نے بیگم شیرازی کو پچھلی سیٹ پر لٹادیا۔ بیگم جمشید ان کے پاس بیٹھ گئیں اور جیپ چل پڑی۔ ہسپتال پہنچنے میں انہیں چند منٹ سے زیادہ نہیں لگے۔ بیگم جمشید ، محمود اور فاروق کو دیکھ کر بھونچکاکر رہ گئیں ، ان کے سر پر پٹیاں باندھی جاچکی تھیں اور وہ ابھی تک بے ہوش تھے۔ ڈاکٹر کمرے میں موجود تھا اور اس کا کہنا تھا کہ ابھی ان کے ہوش میں آنے میں دیر لگے گی۔ انسپکٹر جمشید نے بیگم شیرازی کو ساتھ والے کمرے میں داخل کرادیا تاکہ دیکھ بھال میں آسانی رہے۔

اور پھر ادھر دن نکلا ، ادھر محمود ہوش میں آگیا۔ اس کے چند منٹ بعد فاروق نے بھی آنکھیں کھول دیں، وہ مسکرانے لگے۔ ڈاکٹر نے ان کامعائنہ کرنے کے بعد بتایا کہ حالات خطرے سے باہر ہیں۔ البتہ ابھی چند دن ہسپتال میں رہنا پڑے گا۔ دوسری طرف بیگم شیرازی ہو ش میں آچکی تھیں۔ ڈاکٹر وں نے ان کے معائنے کے بعد خون کی زبردست کمی بتائی تھی اور جب ان کے خون کا گروپ دیکھا گیا تو ہسپتال کے بلڈ بنک میں ان کے گروپ کا خون نہ ملا ڈاکٹر وں کا کہنا تھا کہ ان کے لیے خون بہت ضروری ہے۔

اچانک انسپکٹر جمشید کو یاد آیا۔ غلام جیلانی اپنے بیٹے کو ڈاکٹر انصاری کے پاس لے گیا تھا اور اس نے کسی پرائیویٹ بلڈ بنک سے خون منگوایا تھا۔ انہوں نے فرزانہ کو ساتھ لیا اور ڈاکٹر انصاری کے کلینک کی طر ف روانہ ہوگئے، لیکن ابھی تو دن نکلا تھا، ڈاکٹر انصاری وہاں کہاں تھا، البتہ ایک چوکیدار ضرور موجود تھا۔ انہوں نے اس سے ڈاکٹر کے گھر کا پتا معلوم کیا اور وہاں پہنچ گئے۔ گھنٹی کا بٹن دبانے پر ایک ملازم نے دروازہ کھولا۔©

”ہمیں ڈاکٹر انصاری صاحب سے ملنا ہے۔“ انسپکٹر جمشید بولے۔

”اتنے سویرے…. وہ تو ابھی سو رہے ہیں۔“

”ان سے ملاقات بہت ضروری ہے۔ ایک مریض کی زندگی کا سوال ہے، تم انہیں جگادو۔“

”لیکن ان کی ہدایت ہے، سوتے میں انہیں جگایا ہر گز نہ جائے۔“

”تم فکر نہ کرو، وہ تمہیں کچھ نہیں کہیں گے۔“ انسپکٹر جمشید بولے۔

”نہیں جناب! میں یہ نہیں کرسکتا، ایک دن اسی طرح کسی کے مجبور کرنے پر میں نے جگادیا تھا، انہوں نے میری پندرہ دن کی تنخواہ کاٹ لی تھی۔“ اس نے بتایا۔

”اگر انہوں نے تمہاری تنخواہ کاٹی تو میں تمہیں دوگنا تنخواہ جیب سے ادا کردوں گا اور اگر ملازمت سے نکالا تو اس سے بہتر ملازمت دلوادوں گا، بے فکرہوکر جاﺅ۔“

”یہ بات ہے تو میں ضرور جاﺅں گا، کیونکہ میں خود اس ملازمت کو چھوڑ نا چاہتا ہوں۔“ اس نے خوش ہوکر کہا اور اندر چلا گیا۔ وہ انہیں دروازے پر ہی چھوڑ گیا تھا۔

”عجیب ڈاکٹر ہے، یہ شاندار کوٹھی بتارہی ہے کہ بہت مال دار ہے، لیکن اپنے ملازموں کی تنخواہیں کاٹ لیتا ہے۔“

”ایسے لوگ اسی طرح مال دار بنتے ہیں۔ غلام جیلانی نے بتایا تھا کہ اس نے بہت بھاری فیس وصول کی تھی۔“

”اور ہاں سب سے پہلے ڈریکولا کا خیال پیش کرنے والا بھی یہی ڈاکٹر ہے۔“ فرزانہ بولی۔

”تم کیا کہنا چاہتی ہو۔“ انسپکٹر جمشید نے اُسے چونک کردیکھا۔

”یہ کہ کہیں یہی شخص تو ڈریکو لانہیں۔“

”ارے نہیں ! یہ تو بہت پرانا اور مشہور ڈاکٹر ہے۔ کم از کم اپنے پیشے کے اعتبار سے بہت قابل آدمی ہے۔“ انہوں نے مسکرا کر کہا۔

اسی وقت قدموں کی آواز سنائی دی۔ انہوں نے دیکھا، ملازم چلا آرہا تھا۔ اس کا چہرہ غصے سے سرخ تھا۔

”مجھے ملازمت سے نکال دیا گیا ہے جناب۔“ اس نے آتے ہی کہا۔

”بہت خوب، تم فکر نہ کرو اور اس جیپ میں جاکر بیٹھ جاﺅ۔ اب اس ڈاکٹر کے بچے سے مل کر ہی جاﺅں گا۔“ انسپکٹر جمشید کو بھی غصہ آگیا۔

انہوں نے گھنٹی کے بٹن پر ہاتھ روک لیا اور پھر ہٹانے کی کوشش نہ کی۔ گھنٹی بدستور بجتی چلی گئی۔ یہاں تک کہ ایک نوجوان لڑکا آتا نظر آیا ، وہ آنکھیں ملتے ہوئے ان کی طرف بڑھ رہا تھا، چہرے پر ناگواری تھی۔

”کیا بات ہے جناب! آپ کیا چاہتے ہیں؟“

”ہم ڈاکٹر سے ملنا چاہتے ہیں اور ملے بغیر ہر گز نہیں جائیں گے۔“ انسپکٹر جمشید بولے۔

”وہ ابھی آرام کررہے ہیں، دو گھنٹے بعد کلینک میں ملیں گے۔“ اس نے کہا۔

”تم ان کے بیٹے ہو۔“ انسپکٹر جمشید نے پوچھا۔

”جی ہاں۔“ وہ بولا۔

”تو پھر اپنے ابا جان سے جا کر کہہ دو دروازے پر کھڑا ہوا شخص ان سے ملے بغیر نہیں جائے گا، چاہے کچھ بھی ہوجائے۔“یہ کہتے وقت ان کا چہرہ غصے سے سرخ ہوگیا۔ فرزانہ کپکپا اٹھی۔ وہ ان کے اس روپ سے اچھی طرح وا قف تھی۔ عام طور پر بہت ہی برے مجرموں پر انہیں اس قدر غصہ آتا تھا، لیکن آج یہ غصہ شہر کے سب سے مشہور ڈاکٹر پر آیا تھا۔

لڑکا خاموشی سے واپس چلا گیا۔ وہ انتظار کرنے لگے اور جب ایک منٹ گزرنے پر بھی کوئی اندر سے نہ آیا تو انہوں نے پھر گھنٹی کے بٹن پر انگلی رکھ دی۔

اس بار وہی لڑکا پھر نمودار ہوا اور تلملا کر بولا©©:

”آیئے جناب!ڈرائنگ روم میں تشریف رکھیے۔“

”شکریہ۔“ انسپکٹر جمشید نے منہ بناکر کہا۔

ڈرائنگ روم میں بیٹھے انہیں پانچ منٹ گزر گئے۔ پھر انہوں نے دروازے کی گھنٹی بجنے کی آواز سنی۔ شاید کوئی اور ملاقاتی آگیا تھا اور پھر انہوں نے بھاری قدموں کی آواز سنی۔ فوراً ہی کمرے میں کچھ پولیس والے داخل ہوئے۔ سب سے آگے ڈاکٹر انصاری تھا جو سب انسپکٹر کے ساتھ چلا آرہا تھا۔ اس کے پیچھے تین کانسٹیبل تھے۔

”یہی وہ شخص ہے جس نے مجھے بے آرام کیا ہے، میرے ملازم نے اسے بتادیا تھا کہ میں سورہا ہوں تو جگایا جانا پسند نہیں کرتا، اس کے باوجود اس نے ملازم کو جگانے کے لیے کہا، میں نے اسے تو اسی وقت نوکری سے نکا ل دیا، کیونکہ اس نے میری ہدایت پر عمل نہیں کیا تھا۔ اس نے پھر گھنٹی بجائی تو میرے لڑکے نے اسے بتایا کہ میں دو گھنٹے بعد کلینک میںمل سکتا ہوں۔ یہ اس پر بھی باز نہیں آیا اور گھنٹی بجاتا چلا گیا۔ آخر مجھے آپ کو فون کرنا پڑا، اسے گرفتار کرلیجیے۔ میں چاہتا ہوں ، اس پر اتنا مضبوط مقدمہ بناﺅ کہ اس کی آئندہ نسلیں بھی یاد رکھیں کہ کسی کو بے آرام کرنے کا کیا نتیجہ نکلتا ہے۔“

ڈاکٹر رحمان انصاری کہتا چلا جارہاتھا ، دوسری طرف سے سب انسپکٹر مارے حیرت کے آنکھیں پھاڑے کھڑا تھا۔ وہ انسپکٹر جمشید کو بخوبی جانتا تھا۔ آخر ڈاکٹر کے خاموش ہونے پر اس نے کہا۔

”مجھے افسوس ہے جناب! میں انہیں گرفتار نہیں کرسکتا۔“

”یہ کیا بات ہوئی ، کیا یہ کوئی بہت اہم آدمی ہے، اگر یہ بات ہے تو میں آپ کو بتادوں ، میں بھی کوئی کم اہم آدمی نہیں ہوں، میرے تعلقات بھی بڑے بڑے لوگوں سے ہیں۔ اگر آپ نے اسے گرفتار نہ کیا تو میں ڈی آئی جی صاحب کو فون کروں گا۔“

”ڈی آئی جی صاحب بھی ان کی گرفتاری کا حکم جاری نہیں کریں گے۔“

”یہ کیسے ہوسکتا ہے، کیا اس شخص کو یہ اختیار دیا گیا ہے کہ یہ جس شہری کی بھی چاہے ، نیند حرام کرسکتا ہے۔“ ڈاکٹر انصاری نے تلملا کرکہا۔

”جی نہیں! ایسی کوئی بات نہیں، انہوں نے اگر آپ کو بے آرام کیا ہے تو اس کی کوئی ٹھوس وجہ ضرور ہوگی۔“

”آخر یہ کون ہے؟“ ڈاکٹر انصاری چیخ کربولا۔

”میں ان کی اجازت کے بغیر آپ کو نہیں بتا سکتا۔“ سب انسپکٹر نے کہا اور انسپکٹر جمشید کی طرف دیکھنے لگا۔ وہ مسکرائے اور پھر بولے۔

”ایک ڈاکٹر کا فرض دوسروں کی جانیں بچانا ہے، لیکن اگر وہ اپنے آرام کو زیادہ اہمیت دینے لگے تو پھر وہ دوسروں کی جانیں نہیں بچاسکتا۔ اس طرح ڈاکٹر انصاری خود اپنے پیشے کے مجرم ہیں اور انہیں اپنی سزا خود تجویز کرلینی چاہیے۔ مجھے اتنی صبح سویرے یہاں اس لیے آنا پڑا کہ ایک مریضہ کی جان خطرے میں ہے۔ ا س کے جسم میں سے خون نہ جانے کہاں چلا گیا ہے۔ یہ کل اس قسم کا ایک کیس دیکھ چکے ہیں۔ انہوں نے اس مریض کے لیے خون کے ایک پرائیویٹ بنک سے خون کا بندوبست کیا تھا۔ میں ان سے صرف یہ معلوم کرنے آیا تھا کہ اس بنک کا پتا کیا ہے تاکہ وہاں سے مریضہ کے لیے خون حاصل کیا جاسکے۔ مریضہ سرکاری ہسپتال میں ہے اور اس کے گروپ کا خون بنک میں نہیں ہے۔“ انسپکٹر جمشید رُکے بغیر کہتے چلے گئے۔ سب انسپکٹر اور ڈاکٹر انصاری خاموش کھڑے ان کی باتیں سن رہے تھے۔ ایک لمحے کے لیے رُک کر انہوں نے کہا:

”ڈاکٹر صاحب! اب آپ فوری طور پر اس بنک کا پتا بتادیں۔ پہلے ہی بہت دیر ہوچکی ہے، کہیں ایسا نہ ہو کہ مریضہ کی حالت خراب ہوجائے۔ بعد میں آپ ڈی آئی جی صاحب کو فون کرتے رہیے گا اور جو بھی قانونی کارروائی آ پ کرنا چاہیں کرسکتے ہیں، میرا نام اور پتا یہ آپ کو بتادیں گے۔“ یہ کہہ کر وہ خاموش ہوگئے اور ڈاکٹر کی طرف دیکھنے لگے۔

”آخر آپ کون ہیں۔“ ڈاکٹر نے تھکے تھکے انداز میں کہا، لہجے میں حیرت بھی تھی۔

”اگر آپ میرا نام جانے بغیر بنک کا پتا نہیں بتانا چاہتے تو سن لیں، مجھے انسپکٹر جمشید کہتے ہیں۔“

”اوہ!“ ڈاکٹر انصاری دھک سے رہ گیا۔ پھر اس کے ہونٹ اس طرح کھلے جیسے خواب میں بول رہا ہو:

”خون کا وہ بنک نیازی روڈ پرواقع ہے، اس سڑک پر سب سے اُونچی عمارت۔“

”بہت بہت شکریہ ! اب ہم چلیں گے۔ اگر آپ اس معاملے کو آگے بڑھانا چاہیں تو مجھے کوئی اعتراض نہ ہوگا، عدالت کا دروازہ کھٹکھٹائیں یا ڈی آئی جی صاحب سے بات کریں، لیکن آج کے بعد آپ اپنے کسی ملازم کو یہ ہدایت نہیں کریں گے کہ کسی ملاقاتی کے آنے پر آپ کو جگایانہ جائے۔“

یہ کہتے ہوئے انسپکٹر جمشید تیزی سے مڑے دروازے کی طرف چل پڑے، فرزانہ نے بھی ان کا ساتھ دیا۔

سب انسپکٹر ، کانسٹیبل اور ڈاکٹر انصاری پتھر کے بتوں کی طرح کھڑے کے کھڑے رہ گئے۔

٭….٭….٭

خون کے قطرے

”انسپکٹر جمشید اور فرزانہ نیازی روڈ پر پہنچے۔ انہیں بلڈ بنک تلاش کرنے میں کوئی دشواری نہ ہوئی۔ بنک کھل چکا تھا۔ وہ اندر داخل ہوئے تو کاﺅنٹر پر ایک لمبا چوڑا نوجوان نظر آیا۔ اس نے فوراً کہا:©

”جی فرمایئے!“

”ہمیں ڈاکٹر انصاری نے بھیجا ہے۔“ انسپکٹر جمشید بولے اور فرزانہ نے انہیں چونک کردیکھا۔ دوسری طرف کاﺅنٹر کلرک کے منہ سے نکلا©©:

”اوہ ! تب تو آپ سیدھے اندر چلے جایئے اور فاضلی صاحب سے مل لیں،آپ کا کام وہی بتاسکیں گے۔“

”بہت شکریہ! سیدھے جاکر کس طرف مڑنا ہے۔“

”دائیں ہاتھ آخری کمرہ ہے۔“ اس نے کہا۔

اور دونوں اندر کی طرف بڑھ گئے۔ فرزانہ نے سرگوشی کی:

”ابا جان ! یہ کیا معاملہ ہے۔“

”میںاندازہ لگا چکاہوں۔ ڈاکٹر انصاری کے اس بنک سے کچھ خاص تعلقات ہیں، اسی لیے میںنے ڈاکٹر انصاری کا نام لے دیا تھا، لیکن مجھے خیال ابھی نہیں تھا کہ اس کا نام لینے کے بعد ہمیں خاص اہمیت دی جائے گی۔ خیر آﺅدیکھتے ہیں۔“ انہوں نے کہا اور برآمدے کا موڑ مڑ گئے۔ آخر میں ایک کمرا نظر آیا۔ دروازہ پر چک پڑی تھی۔

انہوں نے چک اٹھائی اور اندر داخل ہوگئے۔ دن کے نوبج کر دس منٹ ہوچکے تھے۔ سورج کی خوش گوار دھوپ پھیل چکی تھی اور اس کمرے میں دھوپ اس کھڑکی کی وجہ سے داخل نہیں ہورہی تھی جس میں اندھے شیشے لگے ہوئے تھے۔انہیں یہ دیکھ کر حیرت ہوئی،کیونکہ سردیوں کے موسم میں ایسا کون شخص ہوگا جو دھوپ کا راستہ روکے گا۔ کھڑکی کے ساتھ ایک میز اور ایک کرسی بچھی تھی،میز کے دوسری طرف دروازے کے نزدیک تین کرسیاں اور موجود تھیں۔ سامنے والی کرسی پر ایک لمبے قد کا آدمی بیٹھا تھا، اس کی آنکھوں پرچمک دار شیشوں والی عینک تھی۔ ان شیشوں میں سے اس کی آنکھیں اگر چہ نظر آرہی تھیں، لیکن یہ اندازہ کرنا مشکل تھا کہ آنکھوں کارنگ کیسا ہے۔ اس نے دونوںکو گھور کردیکھا اور بولا:

”تو آپ کو انصاری نے بھیجا ہے۔“

”جی ہاں ! ہمیں او گروپ کا خون چاہیے۔“

”مل جائے گا، ڈاکٹر انصاری ہمارے بہت اچھے دوست ہیں اور ان کے بھیجے ہوئے گاہکوں کو ہم ہر حالت میں خون مہیا کرتے ہیں۔ آپ کوکتنی بوتلوں کی ضرورت ہے۔“

”کم از کم چاربوتلیں۔“ انسپکٹر جمشید بولے۔

”چار بوتلوں کی قیمت بارہ ہزار روپے ہوگی۔“ اس نے کہا۔

”اوہ! اس قدر زیادہ قیمت۔“ انسپکٹر جمشید چونکے۔

”لوگ اپنا خون سستا تو نہیں بیچتے، ضرورت مند آکر خون بیچنے پر مجبور ہوجاتے ہیںتو منہ مانگی قیمت ضرور وصول کرتے ہیں۔“

”خیر، چار بوتلیں پیک کرادیں۔میں بارہ ہزار وپے کا چیک لکھ دیتاہوں۔“ انہوں نے کہا۔

”چیک مجھے دے دیں اور بوتلیں کاﺅنٹر سے لے لیں۔“

”بہت بہتر!“ انہوں نے کہا اور جیب سے چیک بک نکال کر چیک لکھنے لگے۔ تھوڑی دیر بعد وہ مکان سے باہر نکل رہے تھے اور ایک پلاسٹک کی ٹوکری میں چار بوتلیں انسپکٹر جمشید کے ہاتھ میں لٹک رہی تھیں۔

”اس مکان کے اندر مجھے کچھ عجیب سا احساس ہوتا رہا ہے۔“ فرزانہ پریشان ہوکر بولی۔

”شاید اس لیے کہ یہ خون کی دکان ہے، کسی عام چیز کی نہیں۔“ انسپکٹر جمشید بولے۔

”اوہ! ہم طاہر جیلانی کے بیٹے کے بارے میں معلوم کرنا تو بھول ہی گئے، نہ جانے وہاں کیا حالات پیش آئے ہوں گے۔“

”خون ڈاکٹروں کے حوالے کرنے کے بعد معلوم کریں گے۔“انہوں نے کہا۔

ہسپتال پہنچ کر انہوں نے غلام جیلانی کے ہاں فون کیا تو ادھر سے خان رحمان نے بتایا:

”ڈریکولا مکان کے اندر گھس آیا تھا، محمود اور فاروق اس وقت باہر جائزہ لینے گئے ہوئے تھے۔ نہ جانے ڈریکولا کی آنکھوںمیں کیا تھا کہ میں بے ہوش ہوگیا، گھر کے دوسرے لوگوں سے یہ بات معلوم ہوئی ہے کہ رات مکان کے اندر گولی بھی چلائی گئی تھی۔ یہاں خون کے قطرے بھی پڑے ملے ہیں، میں نے تمہیں ہر جگہ فون کیا، لیکن کہیں نہ مل سکے، اس لیے مجبور ہوکر پولیس اسٹیشن فون کرنا پڑا۔“

”کیا وہ لوگ آگئے ہیں۔“ انسپکٹر جمشید نے پوچھا۔

”ہاں۔“ انہوں نے کہا۔

”تو انہیں میری طرف سے کہہ دو خون کا تجزیہ ضرور کرایا جائے۔ میں جاننا چاہتا ہوں کہ وہ خون کسی انسان کا ہے یا مردے کا۔“

”بہت بہتر! لیکن تم کہاں تھے، محمو د اور فاروق کا کوئی پتا چلایا نہیں۔

اس پر انہوں نے اپنے دونوں بیٹوں کے بارے میں بتایا ، پھر سلسلہ کلام بند کرکے فرزانہ کی طرف مڑے۔

”اس کا مطلب ہے، ڈریکولا واقعی ایک سے زائد ہیں۔“ فرزانہ بولی۔

”ہاں !میرا پہلے ہی یہی خیال تھا۔“

”اور مزے کی بات یہ کہ کم از کم دو ڈریکولازخمی ہوچکے ہیں۔ ان کا خون راستے میں گرتا چلا گیا ہوگا اور ان کھنڈروں میں بھی قطرے موجود ہوں گے۔ یہ قطرے ہمیں ان کے ٹھکانے تک لے جاسکتے ہیں۔“

”بہت خوب! ہمیں فوراً روانہ ہوجانا چاہیے، کہیں خون کے قطرے مٹادیے جائیں۔“ انسپکٹر جمشید بولے۔

”لیکن پہلے محمود اور فاروق کو تو دیکھ لیں۔“

”ہاں ! یہ بھی ضرور ی کام ہے۔“ انہوں نے چونک کر کہا اور ان کے کمرے کی طرف چل پڑے۔

یہاں بیگم جمشید کے علاوہ پروفیسر داﺅد اور شائستہ بھی موجود تھے۔

”ارے !آپ کو کس طرح خبر ہوگئی۔“

”میں نے اور شائستہ نے آج ناشتا تمہارے ساتھ کرنے کا پروگرام بنایا تھا۔ گھر گئے تو تم وہاں نہیں تھے، بیگم شیرازی سے معلوم کرنا چاہتا تو وہ بھی وہاں نہیں تھیں،لیکن تمہارے گھر میں خون کے قطرے ضرور موجود تھے، ہم سمجھ گئے، رات کو ئی حادثہ ہوگیا ہے، اس لیے سیدھے یہاں چلے آئے۔“پروفیسر داﺅد بولے۔

”بہت خوب! آپ تو جاسوس بنتے جارہے ہیں انکل۔“ فرزانہ نے مسکرا کر کہا۔

”شاید یہ تمہاری صحبت کا اثر ہے۔ ورنہ ایک سائنس دان کا جاسوسی سے کیا تعلق۔“

”لیکن میں آپ کو یہ بتادینا چاہتا ہوں کہ وہ خون ان کا نہیں، ایک ڈریکو لا کا ہے۔“ انسپکٹر جمشید بولے۔

”کیا مطلب؟“ پروفیسر داﺅد زور سے چونکے۔

انہوں نے تفصیل سے ساری بات دہرادی۔ اتنے میں خان رحمان بھی وہاں آگئے۔ اب سب نے مل کر کھنڈروں کا جائزہ لینے کا پروگرام بنایا۔ وہ دروازے کی طرف مڑے ہی تھے کہ ایک آواز نے ان کے قدم روک لیے۔ 

”آپ اتنی آسانی سے کھنڈروں میں نہیں جاسکیں گے۔“

وہ چونک کر مڑے، فاروق شوخ انداز میں مسکرا رہا تھا۔ یہ جملہ اس کے منہ سے نکلا تھا۔

”تو پھر کتنی آسانی سے جاسکیں گے؟“ فرزانہ نے جھلا کر کہا۔

”ہمیں ساتھ لے جانا ہوگا۔“ محمود بولا۔

”چل بھی سکو گے۔“ فرزانہ بولی۔

”چوٹ ہمارے سروں پر آئی ہے ، نہ کہ پیروں میں۔“ فاروق بولا۔

”لیکن ڈاکٹر صاحبان نے تمہیں چلنے پھرنے سے منع کیا ہے۔“

”ڈاکٹروں کو کیا معلوم ، ہم کتنے مضبوط ارادے کے مالک ہیں۔“ محمود نے کہا۔

”اچھا تو پھر ہم پہلے ڈاکٹر صاحبان سے اجازت لے لیں۔“

”ہاں ضرور! وہ آکر ہمارا معائنہ کرسکتے ہیں، ہم انہیں بالکل ٹھیک نظر آئیں گے۔“ فاروق بولا۔

”چناچہ ڈاکٹر صاحبان کو آنا پڑا، دونوں کا معائنہ کرنے کے بعد وہ حیرت زدہ رہ گئے۔ آخر انہیں یہ کہنا پڑا۔

”یہ دونوں چلنے پھرنے کے قابل ہیں، حالانکہ ہمارا خیال تھا ابھی اس حالت تک پہنچنے میںانہیں ایک ہفتہ لگے گا۔“

”یہ ہمارے ارادے کی طاقت کا کمال ہے۔“ فاروق بولا۔

تھوڑی دیر بعد وہ کھنڈروں کی طرف روانہ ہوگئے۔ خان رحمان، پروفیسر داﺅد اور شائستہ بھی ان کے ساتھ تھے۔ اچانک ایک جگہ انسپکٹر جمشید نے اپنی جیپ روک لی۔ پروفیسر داﺅد کو بھی کار روکنا پڑی۔ ابھی وہ شہری حدود سے نہیں نکلے تھے۔

”کیا بات ہے ابا جان۔“ فرزانہ نے پریشان ہوکر کہا۔

”میں ایک کام بھول گیا ، اکرام کو کچھ ہدایات دینی ہیں۔“

یہ کہہ کر وہ جیپ سے نیچے اُتر آئے۔ سامنے ہی ایک انگریزی ادویات کی دکان تھی۔ انہوں نے وہاں سے اکرام کو فون کیا اور واپس جیپ میں آبیٹھے۔

”آپ نے انکل اکرام کو کیا ہدایات دی ہیں؟“ فرزانہ نے پوچھا۔

”بیگم شیرازی اور تمہاری امی ہسپتال میں تنہا رہ گئی ہیں، ان کی حفاظت کا انتظام کرنا ضروری تھا۔ ادھر غلام جیلانی کے بیٹے کی حفاظت کے لیے بھی کچھ کرنا ضروری تھا، لہٰذا میں نے اکرام کو ہدایات دی ہیں کہ طاہر جیلانی کو بھی ہسپتال پہنچادے۔ ان تینوں کو ایک کمرے میں رکھا جائے اور اس کمرے کو پولیس کے پہرے میں دے دیا جائے، اندر خود اکرام موجود رہے،اس کے ہاتھ میں پستول ہو اور انگلی ٹریگر پر ڈریکولاکے بارے میں بھی میں نے اُسے سب کچھ بتادیا ہے۔ یہ بھی کہ وہ اسے کس طرح بھگا سکتا ہے۔“ انہوں نے بتایا۔

”آپ تو اس طرح کہہ رہے ہیں جیسے ہم رات سے پہلے ہسپتال واپس نہیں لوٹیں گے۔“ محمود نے پریشان ہوکر کہا۔

”کچھ کہہ نہیں سکتا۔ ان کھنڈروں میں خدا جانے کیا حالات پیش آئیں۔“ انسپکٹر جمشید بولے۔

”لیکن سننے میں تو یہ آیا ہے کہ ڈریکولا جیسے لوگ دن کے وقت اپنی قبروں سے نہیں نکلتے۔“ فاروق نے کہا۔

”ہاں! اس کے باوجود وہاں خطرہ ہے۔“ انہوں نے کہا۔

”خیر! دیکھا جائے گا۔“ محمود نے کندھے اُچکا ئے۔

ان کی جیپ اور پروفیسر داﺅد کی کار آگے پیچھے چلتے ہوئے شہر سے باہر نکل آئیں۔ آسمان بالکل صاف تھا اور سورج خوب چمک رہا تھا۔کھنڈروں کا سلسلہ شروع ہوتے ہی انسپکٹر جمشید نے جیپ روک دی۔ کار بھی رُک گئی، پھر سب نیچے اُتر آئے۔

”پروفیسر صاحب! آپ کا ڈریکولا اور اس کی کہانیوں کے بارے میں کیا خیال ہے؟“

”یہ سب بکواس ہے۔ صرف کہانیاں ہیں۔“ پروفیسر داﺅد فوراً بولے۔

”پہلے میرا بھی یہی خیال تھا، لیکن اب تو میں ایک عدد ڈریکولا کو اپنی آنکھوں سے دیکھ چکا ہوں۔“ انسپکٹر جمشید بولے۔

”اور ہم بھی دیکھ چکے ہیں۔“ محمود نے کہا۔

”اگر ایسا ہے ، تو یہ میرے لیے اس صدی کا سب سے حیرت انگیز واقعہ ہے۔“ انہوں نے کہا، پھر چونک کر بولے۔” یہ بھی تو ہوسکتا ہے کہ چند آدمیوں نے ڈریکولا کا روپ دھار لیا ہو۔“

”لیکن وہ اڑنے کے سے انداز اور رفتار سے کس طرح دوڑسکتے ہیں۔“ محمود نے اعتراض کیا۔

”اور انسان کا خون کس طرح پی سکتے ہیں۔“ فرزانہ بولی۔

”بھئی میں کیا کہہ سکتا ہوں۔یہ میری لائن کی چیز نہیں ہے۔“ پروفیسر داﺅد بولے۔

”تو کیا یہ ہماری لائن کی چیز ہے؟“ خان رحمان فوراً بولے۔

”شاید یہ ہم میں سے کسی کی لائن کی بھی چیز نہیں۔“ انسپکٹر جمشید بولے۔

پھر سب آگے بڑھے۔ سب سے پہلے ان کے سامنے وہی کھنڈر آیا جس میں محمود اور فاروق بے ہوش ملے تھے۔

”اوہو! ہم تو یہاں کس خیال کے تحت آئے تھے، شاید سبھی بھول گئے۔“ فرزانہ چونک کر بولی۔

”ارے ہاں ! ہمیں توخون کے قطرے تلاش کرنے ہیں۔“ 

”واقعی باتوں میں اس کا تو خیال ہی نہیں رہا۔ تو ایسا کرتے ہیں، سب کے سب الگ الگ سمتوں میں خون کے قطرے تلاش کرتے ہیں، اس طرح کام آسان ہوجائے گا۔“ انسپکٹر جمشید بولے۔

”یہ ٹھیک رہے گا۔“

خون کے قطروں کی تلاش شروع ہوئی۔ دور دور تک کھنڈر پہلے ہوئے تھے۔ یوں لگتا تھا جیسے کسی زمانے میں یہاں اچھی خاصی آبادی رہی ہو جو شاندار قسم کی عمارات میں رہتی تھی، بعض کھنڈر تو اب تک اچھی حالت میں تھے۔ ان میںسے چند ایک گنبد نما بھی تھے اور ایک گنبد نما عمارت کے کھنڈر کے سامنے فاروق چلا اُٹھا:

”ابا جان ذرا اِدھر آیئے۔“

وہ سب فاروق کی طرف لپکے، وہ جھکا ہوا تھا ۔ نزدیک پہنچنے پر انہوں نے دیکھا، اس جگہ خون کے کچھ قطرے موجود تھے اور ان کا سلسلہ ایک سمت میں چلا گیا تھا۔ یہ جگہ سڑک کے کنارے تھی اور زخمی ڈریکولا شاید اسی جگہ سڑک سے کھنڈر میں داخل ہوا تھا۔ البتہ سڑک پر انہیں خون کے قطرے نظر نہ آئے۔

”سڑک پر گاڑیاں گزرتی رہتی ہیں، ان کے ٹائروں نے خون کے قطرے مٹادیے ہوں گے۔“ خان رحمان نے خیال ظاہر کیا۔

”تب بھی ان کے نشانات سڑک پر ہونے تو چاہئیں تھے۔“ انسپکٹر جمشید بولے۔

”ہوسکتا ہے، ڈریکولا کو کوئی کارمل گئی ہو یا اس نے اپنی کار کہیں چھپا رکھی ہو اور وہ اس میں بیٹھ کر یہاں تک آیا ہو۔“ فاروق نے خیال ظاہر کیا۔

انسپکٹر جمشید اس کی بات سن کر مسکرائے اور بولے:

”تو پھر کار یہاں موجود ہونی چاہیے تھی۔“

”اوہ! “ ان سب کے منہ سے ایک ساتھ نکلا۔

”یہاں ایک بہت ضروری مسئلہ پیدا ہوگیا ہے اور میں سمجھتا ہوں، اس نقطے کے سمجھ میں آجانے سے ہی کیس حل ہوگا۔ اگر ڈریکولا یا دونوں زخمی ہونے والے ڈریکولا کے پاس کار تھی تو سڑک پر سے کارکون لے گیا۔“ انسپکٹر جمشید پرجوش انداز میں بولے۔

”ٹھہرئیے ابا جان !ہم دیکھ چکے ہیں کہ ڈریکو لا ہوا میں اُڑتا ہوا معلوم ہوتا تھا ، وہ لمبی لمبی چھلانگیں لگا رہا تھا اور اس کے پاﺅں کبھی کبھی ہی سڑک پر لگتے نظر آتے تھے۔ ان حالات میں ہوسکتا ہے خون کافی دور دور گرا ہو۔“ فرزانہ نے نیا خیال ظاہر کیا۔

اس پر انسپکٹر جمشید نے ایک زور دار قہقہہ لگایا اور ان کھنڈروں میں ان کا قہقہہ دیر تک گونجتا رہا۔ انہوں نے حیرت بھرے انداز میں انہیں دیکھا، کیوں کہ فرزانہ کی بات سن کر کسی اور کو تو ہنسی تک نہیں آئی تھی اور وہ قہقہہ لگا رہے تھے۔

”خیر تو ہے ابا جان ! آپ نے فرزانہ کی بات پر قہقہہ لگایا ہے یا کوئی اور بات ہے؟ کہیں ڈریکولا کا بھوت تو آپ سے نہیں چمٹ گیا۔“ فاروق نے بوکھلا کر کہا۔

”نہیں فرزانہ کی بات ہی اتنی مزے دار تھی کہ میں ہنسے بغیر نہیں رہ سکا۔“ انہوں نے کہا۔

”لیکن اس کی یہ بات ہمیں کیوں مزے دار نہیں لگی۔“ محمود کے لہجے میں حیرت تھی دوسری طرف فرزانہ بھی حیران کھڑی تھی۔ بات اس کی سمجھ میں بھی نہیں آئی تھی۔

”دیکھو نا….اگر ڈریکولا تقریباً ہوا میں اڑ رہا تھا تو اس کا خون تو مسلسل بہ رہا تھا، خون تو سڑک پر برابر گرتے رہنا چاہیے تھا۔ ہوا میں اڑنے کی صورت میں قطروں کا درمیانی فاصلہ تھوڑا بہت ہی زیادہ ہوسکتا ہے۔ لمبی چھلانگوں کے مطابق ہر گز نہیں ہوسکتا۔“

”واقعی آپ کی بات ٹھیک ہے، تو کیوں نہ ہم پہلے سڑک پر شہر کی طرف چل کر دیکھیں ، خون کے قطرے یہاں سے کتنے فاصلے پر ملتے ہیں۔“ محمود نے کہا۔

”بالکل ٹھیک! میں بھی یہی چاہتا ہوں۔“ انسپکٹر جمشید جلدی سے بولے۔

”تو پھر چلو۔“ پروفیسر داﺅد بولے۔

وہ سب سڑک پر چلنے لگے، انہوں نے نظریں سڑک سے چپکادیں ۔ سڑک پر خون کا ننھا سا قطرہ بھی ان کی نظروں سے چھپا نہیں رہ سکتا تھا، لیکن تقریباً ایک فرلانگ تک چلتے رہنے کے بعد بھی انہیں خون کا کوئی قطرہ نظر نہیں آیا۔ اب تو اُن کی حیرت کا کوئی ٹھکانہ نہیں رہا۔

”کم از کم اس کی چھلانگیں اتنی لمبی نہیں تھیں۔“ انسپکٹر جمشید کے منہ سے نکلا۔ کھنڈروں میں ہم دیکھ چکے ہیں، خون کے قطروں کی ایک قطار سی آگے چلی گئی ہے۔“ 

”ہوں! پھر تو وہی نقطہ دوبارہ پیداہوگیا۔“ فاروق کے منہ سے نکلا۔

”ہاں! ہمیں اس پر غور کرنا ہوگا کہ سڑک پر خون کے قطرے کیوں نہیں ہیں اور اب ہم واپس اسی جگہ چلیں گے جہاں سے سڑک پر چلنا شروع کیا تھا۔“ انسپکٹر جمشید بولے۔

وہ واپس اس جگہ پہنچے اور پھر دھک سے رہ گئے۔ انہوں نے پہلے زمین کو اور پھر ایک دوسرے کو آنکھیں پھاڑ پھاڑ کر دیکھا۔

خون کے قطرے غائب ہوچکے تھے اور دور دور تک کوئی نشاننظر نہیںآرہا تھا۔

٭….٭….٭

ڈریکولا کا بھائی

”یا اللہ رحم! یہ کیا ماجرا ہے؟“ خان رحمان کے منہ سے نکلا۔

”میں نے تو پہلے ہی کہا تھا۔“ فاروق نے کہا اور جملہ درمیان میں چھوڑ دیا۔

”کیا کہا تھا؟“ فرزانہ اس کی طرف جھلا کر پلٹی۔

”یہی کہ ہمارا واسطہ ڈریکولا سے نہیں، ڈریکولا کے بھوت سے ہے۔“ اس نے کہا۔

”اور اگر یہ ڈریکولا ہے تو پھر بہت عقل مند ڈریکولا ہے، جس نے ہمیں آتے دیکھ کر خون کے قطرے مٹادیے۔“ محمود نے کہا۔

”سوال تو یہ ہے کہ اس نے قطرے کس طرح مٹادیے، یہاں تو کھرچنے کے نشان بھی نہیں ہیں۔“ خان رحمان بولے۔

”یہ کچھ مشکل نہیں، سپرٹ یا پٹرول جیسی چیزوں سے یہ کام لیا جاسکتا ہے، کیا تم لوگ ہوا میں بو محسوس نہیں کررہے؟“ پروفیسر داﺅد بولے۔

”ہاں! بو تو محسوس ہورہی ہے۔“ انسپکٹر جمشید بولے۔”خیر! اگر قطرے مٹادیے گئے ہیں تو کیا ہوا، ہمیں سمت تو معلوم ہوچکی ہے۔ آﺅ اس طرف چلیں۔“

”ابا جان ! کیا اس جگہ ہم خطرے میں نہیں ہیں، کیا خون کے قطرے صاف کرنے والا ہماری تاک میں نہیں ہوگا؟“ فرزانہ نے کہا۔

”ہاں! یہ ٹھیک ہے، لیکن بھئی ! ہم خطرے میں کب نہیں ہوتے، خطرات سے کھیلنا تو ہمارا مشغلہ بن چکا ہے۔“ انسپکٹر جمشید مسکرائے اور آگے بڑھنے لگے۔ وہ سب ان کے ساتھ قدم اُٹھانے لگے۔ دل دھک دھک کررہے تھے۔

اب وہ صرف اندازے سے چل رہے تھے۔ خون کے قطرے نہ مٹادیے گئے ہوتے تو نہایت آسانی سے اس جگہ پہنچ جاتے جہاں ڈریکولا گیا تھا۔ تقریباً پندرہ منٹ تک ملبے کے ڈھیروں اور گری ہوئی دیواروں کو پھلانگتے آخر وہ ایک گنبد والی عمارت کے سامنے پہنچ گئے۔ اس کی سیڑھیاں ابھی تک سلامت تھیں اور ان کی آنکھوں کے سامنے تھیں۔ پورے علاقے پر ہو کا عالم طاری تھا اور سورج ان کے سروں پر چمک رہا تھا۔ اگر چہ موسم سرما تھا، تاہم اس وقت انہیں پسینہ آگیا تھا۔ اب خدا جانے یہ پسینہ خوف سے آیا تھا یا بھاگ دوڑسے۔

”کیا خیال ہے، اس عمارت کو اندر سے کیوں نہ دیکھا جائے۔“ انسپکٹر جمشید بولے۔

”دیکھ لو یار…. کہیں پھنس نہ جائیں۔“ خان رحمان بولے۔

”اللہ مالک ہے۔“ انہوں نے مسکرا کر کہا اور سیڑھیوں پر قدم رکھ دیا۔ فوراً ہی وہ سب مارے خوف کے اچھل پڑے انسپکٹر جمشید کے سیڑھیوں پر قدم رکھتے ہی ایک ہولناک گڑگڑاہٹ ہوئی تھی، یوں جیسے پوری وادی میں زلزلہ آگیا ہو۔ انسپکٹر جمشید بھی چونک کر پیچھے ہٹ آئے۔ گڑگڑاہٹ فوراً رُک گئی۔

”میرا خیال ہے، جمشید اندر نہ جاﺅ۔“ خان رحمان نے کپکپائی ہوئی آواز میں کہا۔

”اندر جائے بغیر کام کیسے چلے گا۔“ وہ بولے۔

”کہیں یہ واقعی روحوں کا معاملہ نہ ہو، جیسا کہ فرانس میں سننے میں آتا ہے۔“

”میرا ان باتوں پر ایمان نہیں۔‘ ‘ انسپکٹر جمشید بولے۔

”پھر بھی…. کیا یہ بہتر نہیں ہوگا کہ ہم شہر جاکر پوری تیاری کرکے آئیں۔“ پروفیسر داﺅد بولے۔

پوری تیاری سے آپ کی کیا مراد ہے؟“ انسپکٹر جمشید نے پوچھا۔

”یہی کہ ہم لکڑی کی میخیں تیار کر ا لائیں۔ ہوسکتا ہے، اندر ہمارا واسطہ ڈریکولوں سے پڑجائے، لکڑی کی میخوں کے بغیر ہم انہیں ٹھکانے نہیں لگا سکیں گے۔ اب ہم ان کا ٹھکانا دیکھ ہی چکے ہیں اور وہ یہاں سے کہیں جا بھی نہیں سکتے۔“ پروفیسر داﺅد کہتے چلے گئے۔

”اگر آپ سب کی مرضی یہی ہے تو واپس چلے چلتے ہیں۔“ انسپکٹر جمشید نے مجبور ہوکر کہا ، ورنہ وہ تو اسی وقت اندر جانا چاہتے تھے۔

آخر وہ واپس ہوئے۔ راستے میں انہوں نے ایک اخبار فروش لڑکے سے اخبار خریدا…. کیونکہ وہ تو صبح سویرے ہی اس مہم پر نکل کھڑے ہوئے تھے اور ابھی تک اخبار نہیں پڑھ سکے تھے۔ پہلے ہی صفحے نے ان کا سکون درہم برہم کردیا۔ سرخی یہ تھی:

”شہر کے پانچ دولت مند آدمیوں کا خون چوس لیاگیا۔“

نیچے تفصیل درج تھی۔ یہ وارداتیں ایک دن پہلے کی تھیں۔ اس رات دو واقعات تو ان کے سامنے ہی ہوئے تھے اور ان کے علاوہ بھی یقینا ہوئے ہوں گے، جن کے بارے میں انہیں کل ہی معلوم ہوسکتا تھا۔ اخبار میں ڈریکولا کے امکان پر بھی بات کی گئی تھی اور ڈریکولا کے بارے میں پوری تفصیل سے لکھا گیاتھا لوگوں کو اس سے بچنے کی ترکیبیں بھی لکھ دی گئی تھیں۔

اب شہر میں خوف و ہراس پھیل جائے گا۔ میرا خیال تو یہ تھا کہ ڈریکولا ایک سے زائد ہیں ، یعنی دو یا تین ہوں گے، لیکن اخبار پڑھنے کے بعد یہ کہنا پڑتا ہے کہ ان کی تعداد تقریبا ً پانچ تو ضرور ہے اور ہمیں جلد از جلد اس گنبد والی عمارت پر حملہ کردینا چاہیے۔“ انسپکٹر جمشید کہتے چلے گئے۔

”حیرت ہے، یہ اتنے ڈریکولا ہمارے شہر میں کہاں سے آگئے؟“ فرزانہ کے منہ سے نکلا۔

”اور وہ بھی یکا یک…. ابھی کل ہی تو پہلی مرتبہ یہ چیز سامنے آئی ہے۔“ محمود نے کہا۔

”ہوں، پروفیسر صاحب، کیوں نہ اس گنبد والی عمارت کو ٹینک کے ذریعے روند ڈالا جائے۔“ خان رحمان نے نئی ترکیب سوچی۔

”اس کا کوئی فائدہ نہیں ہوگا۔ ڈریکولا اپنے جسموں سے ضرور ہاتھ دھو بیٹھیں گے، لیکن وہ اپنی روحیں دوسرے جسموں میں داخل کرلیں گے، انہیں مارنے کا تو بس ایک ہی طریقہ ہے اور وہ یہ کہ جب وہ دن کے وقت سو رہے ہو ں تو ان کے سینوں میں عین دل کے مقام پر لکڑی کی میخیں ٹھوک دی جائیں۔ بس وہ ختم ہوجائیں گے۔“ پروفیسر نے بتایا۔

”میں بھی یہی سمجھتا ہوں، لیکن ابھی تک میرا ذہن یہ بات ماننے پر تیار نہیں کہ دنیا میں واقعی ڈریکولا کا وجود موجود ہے۔“ انسپکٹر جمشید بولے۔

”خدا ہی بہتر جانتا ہے، میں نے تو جو کچھ ڈریکولا کی کہانیوں میں پڑھا ہے ، وہی بتایا ہے۔“ پروفیسر بولے۔

وہ گھر پہنچے، سب سے پہلے انسپکٹر جمشید نے اکرام کو فون کیا۔ اس نے بتایا کہ ہسپتال میں خیریت ہے۔ انہوں نے اسے ہدایت دیں اور رات کے وقت خاص طور پر ہوشیار رہنے کے لیے کہا۔ پھر وہ لکڑی کی میخیں تیار کرنے میں مصروف ہوگئے۔ اس کام کے لیے وہ کسی بڑھئی کی مدد بھی لے سکتے تھے ،لیکن انسپکٹر جمشید نے اسے مناسب نہ سمجھا۔

انہیں یہ سب کچھ بہت عجیب لگ رہا تھا۔ دوپہر سے پہلے وہ ایک بار پھر اس عمارت تک پہنچ جانا چاہتے تھے مگر میخیں تیار کرتے اور دوپہر کا کھانا کھاتے انہیں دیر ہوگئی اور ابھی انہیں ہسپتال بھی جانا تھا، وہاں بیگم شیرازی اور طاہر جیلانی کے پاس کچھ بیٹھنے کے بعد وہ باہر نکلے تو سورج مغرب میں جھک گیا تھا۔

”میرا خیال ہے، اب جانے کا کوئی فائدہ نہیں۔“ پروفیسر بولے۔

”ابھی تو سورج غروب ہونے میں دیر ہے۔“محمود نے کہا۔

”ہاں ! لیکن اس وقت تک وہ اپنی نیند پوری کرچکے ہیں اور ہم ان تک پہنچیں گے تو وہ جاگ جائیں گے، جب کہ ہم سوتے میں ان کے سینوں میں میخیں ٹھوکنا چاہتے ہیں۔“

”کمال ہے، ہم تو اس طرح باتیں کررہے ہیں، جیسے سچ مچ کے ڈریکولوں سے واسطہ آپڑا ہو اور جیسے وہ سب کہانیاں بالکل سچ ہیں جو ہم نے پڑھی ہیں۔“ فاروق نے ہنس کر کہا۔

”تو پھر تمہارا کیا خیال ہے، بات دراصل یہ ہے۔“ انسپکٹر جمشید نے اسے دلچسپ نظروں سے دیکھ کر کہا۔

”میں تو یہ سمجھتاہوں کہ کوئی شہر کو الو بنارہا ہے۔“

”شہر کو الو…. تمہارا مطلب ہے کوئی شخص پورے شہر کو الو بنارہا ہے۔“ محمود نے حیران ہوکر کہا۔

”ہاں اور شہر میں ہم بھی رہتے ہیں۔“ فاروق مسکرایا۔

”یار کچھ تو خیال کرو، ہمارے ساتھ پروفیسر انکل اور انکل خان رحمان بھی ہیں۔“ محمود نے جھلا کر کہا۔

”خیر خیر…. تمہیں بہت جلد معلوم ہوجائے گا۔“ فاروق نے منہ بنایا۔

”فاروق ! تم کہنا کیا چاہتے ہو؟“ انسپکٹر جمشید نے پوچھا۔

”یہی کہ یہ سب کسی نے چکر چلایا ہے۔“ اس نے کہا۔

”تھوڑی دیر کے لیے تمہاری بات مان لیتے ہیں۔ اب تم یہ بتاﺅ کہ طاہر جیلانی اور بیگم شیرازی کا خون کہاں چلا گیا؟ شہر کے پانچ دولت مند آدمیوں کا خون کس طرح غائب ہوگیا۔“انہوں نے پوچھا۔

”میں ابھی اس سوال کا جواب نہیں دے سکتا، تاہم گنبد والی عمارت کا جائزہ لینے کے بعد کچھ کہہ سکوں گا۔“ فاروق نے کہا۔

”خدا کا شکر ہے کہ تم اس سوال کا جواب نہیں دے سکتے۔“ فرزانہ مسکرائی۔

”ہاں!ورنہ تمہیں بہت دکھ ہوتا کہ تمہاری بجائے میں نے کیوں جواب دے دیا۔“ فاروق جل بھن کر بولا۔

”اچھا تو پھر کیا طے رہا، کل صبح کھنڈروں کا رخ کریں گے۔“

انسپکٹر جمشید نے بات بدلتے ہوئے کہا۔

”ہاں ! کل ہی ٹھیک رہے گا۔“

”اس کا مطلب ہے، آج رات ہمیں ہسپتال میں گزارنا ہوگی۔“ محمود کے منہ سے نکلا۔

”ہاں!ہوسکتا ہے، ڈریکولا کا کوئی بھائی طاہر جیلانی یا بیگم شیرازی کا خون چوسنے آئے۔“ فاروق نے مسکرا کر کہا۔

”ڈریکولا کا بھائی۔ بھئی واہ۔ یہ بھی خوب رہی۔“ خان رحمان ہنسے بغیر نہ رہ سکے۔

”وہ رات انہوں نے ہسپتال میں جاگ کر گزاری ، لیکن کچھ بھی نہ ہوا۔ طاہر جیلانی اور بیگم شیرازی کی حالت بہت بہتر تھی، چنانچہ وہ سورج نکلتے ہی کھنڈرات کی طرف روانہ ہوگئے۔ انہوں نے اپنی اس مہم کے بارے میں کسی کو کچھ نہیں بتایا تھا، روانہ ہونے سے پہلے انہوں نے اخبار ضرور دیکھ لیا تھا اور شہر میں جگہ جگہ ڈریکولا کے حملوں کی خبریں پڑھنے میں آئی تھیں۔ پورا شہر خوف کی لپیٹ میں آچکا تھا۔ حکام نے اخبارات اور ویڈیو کے ذریعے اپنے دروازوں اور کھڑکیوں میں لوہے کی سلاخیں لگوانے کا مشورہ دیا تھا۔اور رات کے وقت اپنے گھر وں میں آگ جلائے رکھنے اور بلب روشن رکھنے کی ہدایات شائع ہوئی تھیں۔ خیال ظاہر کیا گیا تھا کہ جلائی ہوئی لکڑی سے اگر ڈریکولا پر حملہ کیا جائے تو وہ بھاگ جاتا ہے۔ اس کے علاوہ محکمہ پولیس کے اعلیٰ حکام نے فرانس کے حکام سے بھی رابطہ قائم کیا تھا۔ تاکہ وہاں سے کسی ماہر کو بلوایا جاسکے جو ڈریکولوں کا مقابلہ کرنے کا کام انجام دے سکے۔

”ایسے میں کسی کو انسپکٹر جمشید کا خیال تک نہ آیا، کیونکہ کوئی یہ سوچ ہی نہ سکا کہ وہ بھی ڈریکو لا کا مقابلہ کرسکتے ہیں۔ ان کے محکمے کے تمام لوگ بھی اس بات سے بے خبر تھے کہ انسپکٹر جمشید کہاں اور کس حال میں ہیں اور وہ ان کھنڈارت کی طرف بڑھ رہے تھے۔ اپنی پوری پارٹی کے ساتھ۔ اکرام کی ڈیوٹی آج بھی ہسپتال میں ہی تھی۔

ان کی جیپ کی پچھلی سیٹ پر لکڑی کی لمبی لمبی میخیں رکھی تھیںا ور لوہے کے دو ہتھوڑے بھی۔ محمود، فاروق اور فرزانہ بار بار مڑ مڑ کر ان ہتھیاروں کو دیکھ رہے تھے۔آج تک کسی دشمن کا مقابلہ انہوں نے اس قسم کے ہتھیاروں سے نہیں کیا تھا۔ وہ لمحہ بہ لمحہ کھنڈروں کے نزدیک ہوتے جارہے تھے۔

٭….٭….٭

سڑک کے کنارے انہوں نے جیپ اور کار روک دی اور نیچے اتر آئے۔ لکڑی کی میخیں ہاتھوں میںتھام کر اور ہتھوڑے پکڑ کر وہ اس گنبد والی عمارت کی طر ف بڑھے۔ انسپکٹر جمشید نے ہاتھ میں پستول بھی تھام رکھا تھا۔

”آج کا معرکہ فیصلہ کن ہوگا، ہم کامیاب لوٹیں گے، ورنہ یہیں ختم ہوجائیں گے، کیونکہ ناکام لوٹنے کی صورت میں یہ لوگ ہمارے شہر پر چھاجائیں گے اور جینا حرام کردیں گے۔“ انسپکٹر جمشید بولے۔

”ٹھیک ہے ابا جان! آج ہم ان ڈریکولا کے بچوں کو ناکوں چنے چبوادیں گے۔“ فاروق نے کہا اور اس کے جملے پر انہیں ہنسی آگئی۔ دور دور تک ان کے علاوہ وہاں اور کوئی نہ تھا۔

بس ٹوٹی پھوٹی دیواریں ، ستون اور ملبے کے ڈھیرہی ڈھیرتھے۔ ان ڈھیروں کے درمیان سے ہوتے ہوئے وہ برابر اس عمارت کی طرف بڑھ رہے تھے اور آخر اس کے سامنے پہنچ گئے۔

”کیا تم لوگ تیار ہو؟“ انسپکٹر جمشید نے دبی آواز میں کہا۔

”جی ہاں! ہم تیار ہیں۔“ محمود نے کہا۔

”تم میں سے ہر ایک ، ایک میخ تھام لے ، ہتھوڑوں کاکام اینٹوں سے بھی لیا جاسکتا ہے۔ انہوں نے کہا، خان رحمان اورپروفیسر داﺅد کے پاس ہتھوڑے موجود تھے۔ اس لیے محمود، فاروق اور فرزانہ نے اینٹیں اٹھالیں ۔ شائستہ کو تو ہسپتال میں ہی چھوڑ آئے تھے اور اس نے آنے کے لیے ضد بھی نہیںکی تھی۔

جونہی انسپکٹر جمشید نے پہلی سیڑھی پر قدم رکھا۔ ہولناک گڑگڑاہٹ ہوئی، اگر کوئی اور ہوتا تو شاید چیخیں مارتا ہوا بھاگ کھڑا ہوتا، لیکن انہوں نے پروانہ کی اور ان کے پیچھے دوسرے بھی چڑھتے چلے گئے۔ گڑگڑاہٹ کے ساتھ وہ آواز بھی شروع ہوگئی جو نہ کسی درندے کی تھی اور نہ انسان کی البتہ بہت خوف ناک تھی۔ جیسے کچھ لوگوں کا گلا کاٹا جارہا ہو اور خرخراہٹ کی بے شمار آوازیں مل جل کر آرہی ہوں۔ ایک بار تو ان کے دل دہل گئے۔ اگر انسپکٹر جمشید ساتھ نہ ہوتے تو شاید وہ بھاگ ہی کھڑے ہوتے، لیکن انسپکٹر جمشید تو بدستور آگے بڑھ رہے تھے اور انہیں چھوڑ کر وہ کیسے بھاگ سکتے تھے۔

سیڑھیاں ختم ہونے کے بعد ایک دروازہ تھا، وہ اس دروازے میں داخل ہوئے تو ان کے سامنے برآمد ہ آگیا اور برآمدے میں دائیں طرف ایک کمرے کا دروازہ ۔ دروازہ کھلا تھا۔ وہ آہستہ آہستہ چلتے ہوئے کمرے کے اندر داخل ہوگئے اور پھر دھک سے رہ گئے۔ اندر پانچ تابوت رکھے تھے ان کے دروازے بند تھے، انہوں نے ایک دوسرے کی طرف دیکھا جیسے کہہ رہے ہوں ، تو کیا ڈریکولا کی کہانیاں سچ ہی ہیں۔

تابوت کے نزدیک پہنچتے ہی عمارت میں گہری خاموشی چھا گئی۔ ان کے دل دھک دھک کر رہے تھے اور اس خاموشی میں وہ دلوں کی دھڑکنیں صاف سن سکتے تھے۔

”ہم بیک وقت خطرہ مول نہیں لیں گے، پہلے صرف ایک تابوت کھول کر دیکھیں گے اور اگر ہمیں اس میں کوئی مردہ لیٹا نظر آیا تو اس کے دل میں لکڑی کی میخ ٹھوک دیں گے۔“ پروفیسر داﺅد بولے۔

”ٹھیک ہے۔“ انسپکٹر جمشید بولے۔ وہ اس وقت بہت حیران تھے، تابوتوں کو دیکھ کر ان کے سب خیالات غلط ثابت ہورہے تھے۔ انہوں نے تو کبھی سوچا بھی نہیں تھا کہ واقعی ڈریکو لا ﺅں سے مقابلہ کرنا پڑے گا۔

انہوں نے آگے بڑھ کر سب سے پہلے تابوت کا ڈھکنا اٹھایا۔ دوسرے ہی لمحے ان سب کی چیخیں نکل گئیں، لیکن انسپکٹر جمشید کے منہ سے کوئی چیخ نہیں نکلی تھی، البتہ دم بخود وہ بھی رہ گئے تھے۔

اندر ڈریکولا سے ملتی جلتی شکل کا ایک آدمی لیٹا تھا۔ اس کے دو نوکیلے دانت باہر نکلے ہوئے تھے، ہونٹ تازہ خون سے تر تھے۔ آنکھیں کھلی تھیں، جن میں بلا کی چمک تھی، یہ چمک انتہائی خوفناک تھی۔ دونوں آنکھیں انہیں بری طرح گھورتی معلوم ہوئیں۔

”رحمان جلدی کرو، میخ اس کے دل میں اتار دو۔“ پروفیسر داﺅد چلائے۔

”خان رحمان نے تھر تھر کانپتے ہاتھوں سے لکڑی کی میخ اس کے دل کے مقام پر رکھ دی اور پروفیسر داﺅد نے ہتھوڑا میخ کے سر پر پوری قوت سے دے مارا۔ فوراً ہی ایک بھیانک چیخ عمارت میں گونجی اور خون اس کے سینے سے فوارے کے مانند اُبل پڑا۔ انہیں اس کی آنکھیں باہر کو اُبلتی معلوم ہوئیں۔ ان کے رونگٹے کھڑے ہوئے۔

انسپکٹر جمشید نے یہ منظر بغور دیکھا، انہوں نے اس کارروائی میں کوئی حصہ نہیں لیا تھا۔ اتنی دیر میں خان رحمان اور پروفیسر داﺅد دوسرے تابوت کی طرف بڑھ چکے تھے۔ وہ جلد از جلد اس کام سے فارغ ہوجانا چاہتے تھے جیسے انہیں کسی نظر نہ آنے والے دشمن کی تلاش ہو۔ اسی وقت دوسری چیخ گونجی اور انہیں معلوم ہوگیا کہ خان رحمان اور پروفیسر داﺅد نے دوسرے ڈریکولا کے ساتھ بھی وہی سلوک کر ڈالا ہے۔

وہ اس کارروائی کو اس طرح دیکھتے رہے جیسے ان کا اس سے کوئی تعلق ہی نہ ہو۔ نہ جانے یکا یک انہیں کیا ہوگیا تھا۔ ادھر خان رحمان اور پروفیسر داﺅد تیسرے ڈریکولا کے بعد چوتھے کا رُخ کررہے تھے اور اس وقت فرزانہ نے اس تبدیلی کو محسوس کرلیا جو ان میں رونما ہوئی تھی۔ وہ ان کے قریب کھسک سے آئی اور سرگوشی میں بولی:

”ابا جان! خیر تو ہے، آپ کچھ پریشان دکھائی دے رہے ہیں۔“

”ہاں! میں پریشان ہوں۔“ انہوں نے کھوئے کھوئے انداز میں کہا۔

”آخر کیوں…. بات کیا ہے، کیا یہ سب کچھ آپ کی مرضی کے مطابق نہیں ہورہا۔“

”کچھ کہہ نہیں سکتا۔“ انہوں نے عجیب لہجے میں کہا۔

”بات کوئی ضرور ہے اور آپ چھپا رہے ہیں۔“ فرزانہ بولی۔

”شاید تم ٹھیک کہتی ہو ، مجھے ایسا محسوس ہورہا ہے جیسے کوئی ہماری ان حرکات پر خوب قہقہے لگا رہا ہو، جسے ہم کامیابی سمجھ رہے ہیں، دراصل یہ ہماری ناکامی ہو۔“

”بظاہر تو ایسا نظر نہیں آتا۔“ فرزانہ نے کہا۔

”خیر، پانچوں چیخ بلند ہونے دو، پھر دیکھیں گے۔“ انہوں نے کہا اور پھر خان رحمان اور پروفیسر داﺅد کی طرف متوجہ ہوگئے۔

وہ اب پانچویں تابوت کی طرف بڑھ رہے تھے اور پھر فضا میں پانچویں چیخ بھی گونج اٹھی۔ خان رحمان خوشی سے اچھل پڑے۔

”وہ مارا! ہم نے اس مصیبت کا خاتمہ کردیا۔ اب کسی کے جسم کا خون غائب نہیں ہوگا۔“ انہوں نے بلند آواز میں کہا۔

”بالکل ٹھیک، اور اب ہم شہر چلیں گے، شہر والوں کو یہ خوش خبری سنائیں گے۔“ پروفیسر داﺅد بولے۔

”مگر ابا جان کیوں خاموش ہیں۔“ محمود نے پریشان ہو کر کہا۔

”کوئی خا ص بات نہیں۔“ انہوں نے مسکر اکر کہا۔

”تو پھر چلو…. واپس چلیں۔“ خان رحمان نے کہا۔

”ہاں ! چلو….“ پروفیسر داﺅد بولے۔

وہ عمارت کے بیرونی دروازے کی طرف بڑھے۔ اچانک انہیں محسوس ہوا، انسپکٹر جمشید ان کے ساتھ قدم نہیں اُٹھا رہے ہیں وہ چونک کر مڑے۔

”کیا بات ہے ابا جان ! کیا آپ نہیں چلیں گے۔“

”ہوں، چلو چل رہا ہوں۔“ انہوں نے اس طرح کہا جیسے اب تک سوتے رہے ہوں اور قدم اُٹھانے لگے ۔ 

”وہ ان سب سے پیچھے چلنے لگے۔ پستول اب تک ان کے ہاتھ میں تھا۔ سب سے آگے خان رحمان تھے، وہی دروازے تک پہنچے اور پھر چونک اُٹھے۔ دراوزہ بند تھا جب کہ اندر داخل ہوتے وقت انہوں نے دروازہ کھلا چھوڑ دیا تھا۔

”ارے! دروازہ کس نے بند کیا؟“ ان کے منہ سے نکلا۔

”شش…. شاید…. کسی بھوت نے شرارت کی ہو۔“ فاروق ہکلایا۔

خان ر حمان نے دروازے کا ہینڈل پکڑ کر کھینچا،لیکن وہ ٹس سے مس نہ ہوا۔ خان رحمان کا رنگ اڑگیا۔ انہوں نے پورا زور لگاڈالا، لیکن دروازہ نہ کھلا ۔ اب تو ان سب کے پیروں تلے سے زمین نکل گئی۔ چہروں پر ہوائیاں دوڑ گئیں۔

”یہ…. یہ کیا چکر ہے؟“ خان رحمان نے بوکھلا کر کہا۔

”مم…. میں نے پہلے ہی کہا تھا کہ یہ ڈریکولا نہیں، ڈریکولا کا بھوت ہے،آخر پھنس گئے نہ بھوت کے چکر میں۔“ فاروق نے پرسکون آواز میں کہا۔

”جمشید! تم کیوں خاموش ہو، کچھ بولتے کیوں نہیں۔“

”کیا بولوں…. مجھے کافی دیر پہلے یہ احسا س ہوگیا تھا کہ ہم اس عمارت میں قید کرلیے گئے ہیں۔“ انہوں نے سنجیدہ لہجے میں کہا۔

”تو بتایا کیوں نہیں تھا۔“ پروفیسر داﺅد جھلا کر بولے۔

”جب مجھے یہ احساس ہوا ہم اندر آچکے تھے اور باہر نکلنے کا موقع ہاتھ سے نکل چکا تھا۔“

”آخر دروازہ کس نے بند کیا؟ ڈریکولا تو سارے اندر موجود ہیں۔“پروفیسر داﺅد بولے۔

”یہ ڈریکولا نہیں ، ان کے مجسمے ہیں۔“

”مجسمے؟“

ان سب کے منہ سے ایک ساتھ نکلا۔ سب کی آنکھیں مارے حیرت اور خوف کے پھیلتی چلی گئیں۔

٭….٭….٭

قید اور انجام

”کیا کہا، تم نے مجسمے؟“ پروفیسر داﺅد بری طرح چیخے۔

”ہاں! مجسمے…. آپ مجسموں کے سینوں میں میخیں گاڑ تے رہے ہیں۔“

”شاید تمہارا دماغ چل گیا ہے۔ کیا تم نے ان کے سینوں سے خون اُبلتے نہیں دیکھا؟“ پروفیسر داﺅد بولے۔

”ہاں! دیکھا ہے۔ اس کے باوجود میں یہی کہوں گا کہ یہ مجسمے ہیں۔“

”آخر کیسے؟“

”انہیں چھو کر دیکھ لیں، یہ پلاسٹک کے مجسمے ہیں، گوشت پوست کا ان سے دور کا بھی واسطہ نہیں ، ہمیں نہایت خوبصورتی سے بے وقوف بنایا گیا ہے۔ اسی لیے خون کے قطرے مٹادیے گئے تھے تاکہ ہم شک میں پڑجائیں اور اس طرف چلے آئےں۔ دراصل ان واقعات کے پیچھے کسی بہت ہی چالاک ذہن کا ہاتھ ہے۔“

”اور اس ذہن کا مقصد کیا ہے، ظاہر ہے کہ خون واقعی جسموں سے نکالا گیا ہے۔“

”ہاں ! اس میں کوئی شک نہیں، لیکن خیر، تفصیل بعد میں بتاﺅں گا، پہلے تو یہ یقین کرلینا چاہیے کہ یہ پلاسٹک ہی کے ہیں یا نہیں۔“

یہ کہہ کر وہ تابوتوں کی طرف پلٹے۔ ان کے ڈھکنے ابھی تک کھلے پڑے تھے۔ انہوں نے پہلے ڈریکولا کے جسم کو چھو کر دیکھا اور پھر انہیں بھی چھونے کی دعوت دی۔ چند لمحے بعد ہی انہیں یہ حقیقت تسلیم کرنا پڑی کہ وہ واقعی پلاسٹک کے بنے ہوئے مجسمے تھے۔

”اُف میرے اللہ ! یہ کیا چکر ہے، اگر یہ پلاسٹک کے ہیں تو ان میں خون کہاں سے آگیا۔“

”پلاسٹک کی ہی تھیلیوں میں خون بھر کر اگر ان مجسموں میں رکھ دیا جائے اور لکڑی کی میخوں سے ان میں سوراخ کردیا جائے تو خون باہر نکلے گا، کیونکہ پلاسٹک ٹھوس حالت میں استعمال کیا گیا ہے۔“ انہوں نے بتایا۔

”لیکن آخر ایسا کیوں کیا گیا ہے؟“

”صرف اس لیے، اگر کوئی ادھر آہی نکلے تو اسے یہ یقین کرلینا پڑے کہ ان کا واسطہ واقعی ڈریکولا سے ہے۔“

”تب تو ہم یہ یقین کرسکتے تھے، پھر ہمیں یہاں سے نکل کیوں نہیں جانے دیا گیا۔“پروفیسر داﺅد نے اعتراض کیا۔

”اس لیے کہ مجھے پہچان لیا گیا ہے اور مجرم مجھ سے اچھی طرح واقف ہے، وہ جانتا ہے، میں اس کی بنائی ہوئی کہانی پر یقین نہیں کروں گا۔ اس لیے دروازہ بند کردیا گیا ہے، ہمارے علاوہ یہاں جو کوئی بھی آئے گا،اوّل تو سیڑھیوں پر سے ہی خوف زدہ ہوکر واپس چلا جائے گا ، ورنہ ان تابوتوں کو ایک نظر دیکھ لینے کے بعد تو کسی کو شک رہ ہی نہیں جائے گا اور شہر یہ خبر آنافاناً میں مشہور ہوجائے گی کہ یہاں واقعی ڈریکولا آبسے ہیں۔“

”تو آخر حقیقت کیا ہے۔“ خان رحمان چلائے۔

”حقیقت تمہارے سامنے ہے، یہ سب نقلی ڈریکولا ہیں، مجرم ڈریکولا کے روپ میں لوگوں کے جسموں سے خون نچوڑ لیتے ہیں اور پھر ضرورت مند لوگوں کو مہنگے داموں فروخت کردیتے ہیں۔“

”اوہ…. تت…. تو ….کیا….“ فرزانہ ہکلائی، اس کی آنکھیں مارے حیرت کے پھیل گئیں۔

”ہاں! تم ٹھیک سمجھیں۔ “ انسپکٹر جمشید بولے۔

”تو کیا تم مجرم کو جان چکے ہو۔“ خان رحمان نے بے تاب ہوکر پوچھا۔

”اگر میں پہچان نہ گیا ہوتا تو اس وقت اس عمارت کا دروازہ بند نہ کردیا جاتا۔“ انہوں نے کہا۔

”اوہ! اب ہم کیسے نکلیں گے یہاں سے؟“

”خدا ہم پر مہربان ہے، ہم لوہے کے ہتھوڑے ساتھ لے کر آئے ہیں، ان سے دیوار توڑی جاسکتی ہے۔“ انسپکٹر جمشید بولے۔

لیکن فوراً ہی ان کی مسکراہٹ بجھ گئی۔انہوں نے ناک سکیڑلی، پھر گھبرا کر بولے۔

”اوہ ! یہ گیس….“

ان کے الفاظ درمیان میں ہی رہ گئے۔ فوراً ہی وہ تڑپے گرے اور سب کے سب بے ہوش ہوگئے۔

ہوش آیا تو اسی عمارت میں تھے اور رسیوں سے جکڑے پڑے تھے۔ انہوں نے گردن اِدھر اُدھر گھما کر دیکھا، کمرے میں ان کے علاوہ تین آدمی اور تھے جو تابوتوں کے اوپر بیٹھے تھے۔ انہیں دیکھ کر فرزانہ کی آنکھیں مارے حیرت کے پھیل گئیں، البتہ انسپکٹر جمشید مسکراتے رہے۔

”میں پہلے ہی جان گیا تھا کہ ان واقعات کے پیچھے تمہارا ہاتھ ہے۔“ انہوں نے کہا۔

”تم سمجھ گئے تھے، اسی لیے تو یہاں نظر آرہے ہو۔ اب سنو ! ہمارا پروگرام…. تمہیں ان تابوتوں میں بند کردیا جائے گا۔ تمہارا لباس اور رنگ ڈھنگ ڈریکولا جیسے بنادیے جائیں گے۔ تمہیں مکمل طور پر بے ہوش کردیا جائے گا اور منہ پر ٹیپ چپکا دی جائے گی، کپڑوں کے اندر سے نائیلون کی رسیاں گزار کر تمہیں ان تابوتوں سے جکڑ دیا جائے گا۔ پھر ہم شہر میں خون چوسنے کی وارداتیں کریں گے اور جان بوجھ کر کچھ دلیر لوگوں کو اپنے پیچھے لگا لائیں گے۔ وہ اس عمار ت میں آئیں گے اور تابوتوں میں تمہیں بند دیکھ کر خیال کریں گے کہ ڈریکولا بند ہیں، چنانچہ وہ شہر جائیں گے او رلکڑی کی میخیں لے کر یہاں آجائیں گے،پھر تمہارے سینوں میں وہ میخیں گاڑ دیں گے، کہو کیسی رہے گی؟“

”بہت اچھی رہے گی۔“ فاروق نے ہنس کر کہا۔ حالانکہ دل ہی دل میں وہ ان کا پروگرام سن کر کانپ گیا تھا۔

٭….٭….٭

”ابا جان! آخر یہ کون لوگ ہیں۔“ محمود نے پوچھا۔

”ارے ہاں! اس کیس کے دوران تمہیں ان سے ملنے کا تو اتفاق ہی نہیں ہوا۔ سنو …. یہ تین ہیں، ان میں سے دو ڈریکولا کے بھیس میں خون حاصل کرتے ہیں، طریقہ یہ ہے کہ گیس کے ذریعے اپنے شکار کو بے ہوش کردیتے ہیں اور پھر سرنج کے ذریعے نسوں سے خون نکال لیتے ہیں۔ خون نکالنے کے لیے یہ خاص طور پر گلے کے قریب سے گزرنے والی نسوں کا انتخاب کرتے رہیں تاکہ دیکھنے والے کو یہی گمان ہو کہ گردن سے خون چوسا گیا ہے۔ اگر کوئی ان کا تعاقب کرتا ہے تو کھنڈروں کی طرف آنے والی سڑک پر دوڑ پڑتے ہیں۔ انہوں نے اپنے جوتوں میں ایک خاص قسم کی ربڑ لگوا رکھی ہے، یہ ربڑا نہیں اوپر اچھال دیتی ہے اور یہ اُڑتے ہوئے نظر آتے ہیں اور اگر کوئی تعاقب کرتا ہے تو تیسرا ساتھی کار لے کر سڑک پر موجود رہتا ہے اور ان دونوں کو کار میں لے کر ہوا ہوجاتا ہے۔ کار میں ہی یہ ڈریکولا کے لباس سے چھٹکارا حاصل کرلیتے ہیں۔ ان کا پیچھا کرنے والے کھنڈروں تک پہنچ جاتے ہیں۔ یہ بھی آگے جاکر کھنڈروں میں داخل ہوجاتے ہیں۔ یہاں انہوں نے ٹیپ ریکارڈ اور لاﺅڈ سپیکر فٹ کررکھے ہیں۔ ان پر یہ وہ عجیب اور خوفناک آواز نشر کرتے ہیں اور اس طرح تعاقب کرنے والے خوفزدہ ہوجاتے ہیں۔ اس عمارت کی سیڑھیوں کے نیچے گڑگڑاہٹ پیدا کرنے کے لیے ایک مشین لگا رکھی ہے ۔ اب میں تمہیں یہ بھی بتادوں کہ یہ ہیں کون۔ ان میں سے ایک تو ڈاکٹر انصاری ہے، دوسرا خون بنک کا فاضلی اور تیسرا فاضلی کا ساتھی، جو بنک کے باہر کاﺅنٹر پر موجود رہتا ہے۔ یہ بھی بتاتا چلوں کہ مجھے شک کیسے ہوا، بیگم شیرازی کے گھر میں ملنے والا شیشے کا وہ ٹکڑا تو تمہیں یاد ہوگا، جس پر خون بھی لگا ہوا تھا۔ اس روز دراصل اتفاق سے سرنج ڈاکٹر انصاری کے ہاتھ سے گر کر ٹوٹ گئی تھی، خون کے نشانات تو اس نے سپرٹ وغیرہ سے صاف کردیے لیکن وہ ٹکڑا اس کی نظروں میں آنے سے رہ گیا۔یہیں سے میں نے اصل معاملے کو تاڑنا شروع کیا تھا۔ پھر سڑک کنارے خون کے دھبے ملے تھے، لیکن سڑک پر نہیں تھے، ہم نے ایک ڈیڑھ فرلانگ تک سڑک کاجائزہ بھی لے ڈالا تھا، لیکن دھبے نہیں ملے، اس لئے میں نے اندازہ لگالیا کہ وہ یہاں تک کار پر آئے تھے، کار موجود نہیں تھی، بس میں سمجھ گیا کہ ان کی تعداد ایک سے زائد ہے اور میں تمہیں یہ بھی بتادوں…. تم سوچ رہے ہوگے کہ میں نے یہ سب باتیں کیسے جان لیں تو سنو ، فرانس اگرچہ اس قسم کے واقعات کا گڑھ سمجھا جاتا ہے، لیکن دراصل وہاں بھی ایسے ہی فرضی ڈریکولا ملتے ہیں جنہوں نے کہانیوں کی وجہ سے یہ رُوپ دھا رکر خون جمع کرنے کا کاروبار کررکھا ہے۔ یہ اور بات ہے کہ وہاں کچھ لوگ واقعی خون چوسنے لگ گئے ہوں، لیکن بدروحوں کا کوئی وجود نہیں، میں نے فرانس میں موجود اپنے ایک دوست سے ایک بار ان واقعات کی حقیقت معلوم کی تھی تو اس نے مجھے جواب میں ا س کی تفصیل لکھی تھی۔ اور یہی تفصیل ان دنوں میں میرے کام آئی۔“

انسپکٹر جمشید بتاتے چلے گئے اور ان پر سب راز کھلتے چلے گئے۔

”تو پھر آپ نے یہاں پھنسنا کیوں منظور کیا؟“ محمود نے سوال کیا۔

”اس کے بغیر یہ لوگ سامنے نہیں آسکتے تھے۔ جب انہوں نے وہ گیس چھوڑی اور سب بے ہوش ہوکر گرے، اس وقت بھی میں بے ہو ش نہیں ہوا تھا اور جب یہ لوگ مجھے باندھ رہے تھے تو میں نے اپنے جسم کو پھلا لیا تھا، چنانچہ اب میں نے اپنے جسم سے زائد ہوا نکال دی ہے۔ نتیجہ یہ نکلا کہ رسیاں ڈھیلی ہوگئی ہیں اور میں ان میں سے ہاتھ نکال سکتا ہوں، نہ صرف یہ کہ ہاتھ نکال سکتا ہوں، اپنی خفیہ جیب سے پستول بھی نکال سکتا ہوں جو میں ایسے ہی موقعے کے لیے چھپالایا تھا۔ اگر تم لوگوں کو یقین نہیں تو یہ دیکھ لو۔“

ان الفاظ کے ساتھ ہی ان کا پستول والا ہاتھ سامنے آگیا اور تینوں مجرم دھک سے رہ گئے اور ان سب کے چہرے خوشی سے کھل اُٹھے۔

”ارے! یہ تو دیکھتے ہی دیکھتے کایا پلٹ گئی۔“ فاروق کے منہ سے نکلا۔

”سچ بات تو یہ ہے کہ ابا جان ان سے بھی بڑے ڈریکولا ہیں۔“ فرزانہ نے مسکرا کر کہا۔

”ہائیں ! تم ابا جان کو ڈریکولا بنارہی ہو۔ جب کہ انہوں نے ڈریکولاﺅں کو آدمیوں میں بد ل دیا۔“ محمود نے بھی شوخ لہجے میں کہا۔

”شکر کرو کہ وہ تمہیں ڈریکولا نہیں بنارہی۔“ فاروق بولا اور سب ہنسنے لگے۔

انسپکٹر جمشید خود کو رسیوں سے آزاد کرتے جارہے تھے اور ان کے پستول کی نالی بدستور ان تینوں کی طرف اُٹھی ہوئی تھی۔

٭….٭….٭

اس سلسلے کی مزید تحاریر

موت کا جزیرہ

• مئی 25, 2020

پانچ قدم پہ موت

• مئی 25, 2020

سازشی چہرہ

• مئی 25, 2020

بھوت بنگلہ

• مئی 25, 2020

خونی جال

• مئی 25, 2020

آخری امید

• مئی 25, 2020

چوہے دان

• مئی 25, 2020

ڈریکولا کا بھوت

• مئی 25, 2020

خونی سائنسدان

• مئی 25, 2020

پیچھا کرنے والے

پروفیسر داﺅد اور ان کی بیٹی شائستہ ایک دکان سے نکلے۔ ان کے ہاتھوں میں خریدی ہوئی چیزوں کے بنڈل تھے۔ سڑک کے کنارے ان کی نیلے رنگ کی کار کھڑی تھی۔ دونوں کار میں بیٹھ گئے پھر انہوں نے کار موڑ لی اور گھر کی طرف روانہ ہو گئے۔ اچانک شائستہ چونک اٹھی۔

”ابا جان! ایک سرخ کار ہمارے پیچھے آرہی ہے۔“ شائستہ نے بیک ویو آئینے میں دیکھتے ہوئے کہا۔

”تو کیا ہوا۔ ہمارے پیچھے تو بہت سی کاریں ہیں۔“

”ابا جان! جب ہم گھر سے چلے تھے تو اس وقت بھی یہ کار ہمارے پیچھے تھی۔“

”یہ اتفاق بھی ہو سکتا ہے۔“

”اور سیاہ کپڑوں میں جو شخص کار چلا رہا ہے، میں نے اسے دکان کے اندر بھی دیکھا تھا کیا یہ بھی اتفاق ہے۔“

”کیا۔ یہ شخص دکان میں بھی ہمارے پیچھے تھا؟“

”ہاں!“

”اوہ! پھر تو بات خطرے والی ہے۔“

”جی ہاں۔ کار میں پچھلی سیٹ پر تین آدمی اور بھی ہیں۔“

”ہوں! تم ٹھیک کہتی ہو۔“

”اور آگے جا کر ہو سکتا ہے یہ اپنی کار کو آگے نکال لیں اور پھر ہمیں کار روکنے پر مجبور کر دیں۔“

”ہاں! ایسا ہو سکتا ہے۔“

”تو پھر۔ کیا یہ بہتر نہیں رہے گا کہ آپ کوٹھی کی طرف جائیں ہی نہ۔“

”تو پھر۔ کسی پولیس اسٹیشن چلوں؟“

”ہاں! یہ ٹھیک رہے گا۔“ شائستہ نے ان کی بات مانتے ہوئے کہا۔

پروفیسر داﺅد نے تیزی سے اپنی کار ایک دوسری سڑک پر موڑ لی اور پوری رفتار پر چھوڑ دی لیکن یہ دیکھ کر ان کی پریشانی کی کوئی انتہا نہ رہی کہ سرخ کار نے بھی اتنی ہی تیزی سے موڑ کاٹا تھا اور اب وہ پھر ان کے پیچھے تھی۔

”اب کوئی شک نہیں رہا۔ یہ ضرور ہمارا تعاقب کر رہے ہیں اور ان کے ارادے بھی نیک نہیں ہیں۔“

”ہاں! آپ کا خیال ٹھیک ہے۔ کیا اس سڑک پر کوئی پولیس اسٹیشن ہے؟“

”معلوم نہیں۔ مجھے بھلا پورے شہر کے پولیس اسٹیشنوں کے بارے میں کیسے معلوم ہو سکتا ہے۔“

”آپ رفتار کیوں نہیں بڑھاتے؟“ شائستہ نے کہا۔ ”انہیں آگے نہ نکلنے دیجئے گا۔“

”ابھی تو انہوں نے آگے نکلنے کی کوشش کی نہیں۔“

”سڑک خالی دیکھ کر نکلیں گے۔ آپ یوں کریں، سڑک پر کوئی موڑ آئے تو گاڑی ایک دم اس پر موڑ دیں۔“

”کیوں؟ اس سے کیا ہو گا؟“

”ہو سکتا ہے اس سڑک پر کوئی پولیس اسٹیشن ہو یا کوئی پولیس والا نظر آجائے۔“

”اب تو مجھے یہ بھی معلوم نہیں کہ ہم کون سی سڑک پر ہیں۔“ پروفیسر نے گھبرا کر کہا۔

”رفتار تیز کر دیں۔ دیکھا جائے گا۔“ شائستہ نے کہا۔

پروفیسر داﺅد نے ایک بار پھر رفتار بڑھائی۔ اسی وقت سڑک آگے سے ایک طرف مڑتی نظر آئی۔ انہوں نے آﺅ دیکھا نہ تاﺅ، کار اس سڑک پر موڑ دی۔

”ارے! اس سڑک پر تو انکل جمشید کا گھر ہے۔“ شائستہ چلائی۔

”ہاں! یہ سڑک وہی ہے۔“

”تو پھر آپ سیدھے ان کے گھر کی طرف چلیں۔“

”ٹھیک ہے۔ تم فکر نہ کرو۔ اس سے پہلے کہ سرخ کار ہمارے پاس پہنچے ہم انسپکٹر جمشید کے گھر میں پناہ لے چکے ہوں گے۔“

”گڈ!“ شائستہ کے منہ سے نکلا۔

جونہی انسپکٹر جمشید کا گھر قریب آیا، پروفیسر داﺅد نے کار سڑک سے نیچے اتارتے ہوئے ایک دم بریک لگائے اور ساتھ ہی انہوں نے کار کا دروازہ کھول دیا۔ دوسری طرف شائستہ بھی دروازہ کھول چکی تھی۔ دونوں تیزی سے انسپکٹر جمشید کے گھر کی طرف دوڑے۔

ادھر وہ دروازے پرپہنچے ادھر سرخ کار ان کی کار سے تھوڑے فاصلے پر آکر رکی۔ وہ چاروں کار سے اتر کر ان کی طرف دوڑے۔

”ابا جان! دروازہ بند ہے۔ اس سے پہلے کہ ہم گھنٹی بجا کر دروازہ کھلوائیں وہ لوگ یہاں پہنچ جائیں گے۔“ شائستہ بوکھلا گئی۔

”پھر کیا کریں۔“ پروفیسر کے منہ سے نکلا۔

”آئیے۔ پائیں باغ میں رینگ جائیں۔ اس وقت وہ لوگ ہمیں نظر نہیں آرہے ہیں۔“

”ٹھیک ہے۔“

دونوں تیزی سے جھکے اور جھکے جھکے پائیں باغ میں داخل ہو گئے۔

اس کے تقریباً تیس سیکنڈ بعد دوڑتے قدموں کی آواز آئی اور وہ چاروں دروازے پر پہنچ گئے۔

باڑھ کے پیچھے چھپے ہوئے پروفیسر داﺅد اور شائستہ نے دیکھا وہ دروازے کی گھنٹی بجا رہے تھے۔ سورج غروب ہو چکا تھا اور تاریکی پھیلتی جا رہی تھی۔

٭……..٭

شام کی چائے آج انہوں نے دیر سے پی تھی۔ اس کی وجہ یہ تھی کہ انسپکٹر جمشید دفتر سے ابھی تک نہیں لوٹے تھے۔ پہلے تو وہ چائے کی میز پر ان کا انتظار کرتے رہے اور جب وہ نہ آئے تو محمود نے شیرازی صاحب کے ہاں جا کر فون پر معلوم کیا کہ اس کے والد دفتر سے ایک چوری کے کیس کی تحقیقات کرنے چلے گئے ہیں اور آج دیر سے لوٹیں گے۔

چنانچہ انہوں نے چائے پی لی اور اب وہ ناشتے کی میز پر ہی بیٹھے باتیں کر رہے تھے۔

”آج کل چوروں کو بھی آرام نہیں۔ چوریوں پر چوریاں ہو رہی ہیں۔“ فرزانہ کہہ رہی تھی۔

”وہ تمہاری طرح کام چور تو نہیں ہیں۔“ فاروق نے فوراً کہا۔

”اگر مجھے کام چور کہا تو اچھا نہ ہو گا۔“ فرزانہ کو غصہ آگیا۔

”تو پھر تمہیں کیا کہا جائے تاکہ اچھا ہو سکے۔“ فاروق شریر انداز میں مسکرایا۔

”بس بس! مجھ سے بات نہ کرو۔“

”کیوں! تم سے بات کرنا جرم ہے؟“ فاروق بھی اس کے پیچھے پڑ گیا تھا۔

”اُف! کس سے پالا پڑا ہے۔“ فرزانہ نے دونوں کانوں میں انگلیاں ٹھونس لیں۔

”فاروق سے۔“

”سمجھوں گی تم سے۔“ فرزانہ نے جل کر کہا۔

”جو سمجھنا ہے، ابھی سمجھ لینا ورنہ ابا جان آجائیں گے اور اگر انہوں نے تمہیں کچھ سمجھتے دیکھ لیا تو پھر وہ بھی تمہیں وہی کہیں گے۔“

”وہی کیا؟“

”کام چور!“

”معلوم ہوتا ہے امی، یہ دونوں آج لڑے بغیر نہیں رہیں۔“ محمود نے دخل دیا۔

”تمہارا بھی جی چاہ رہا ہے کیا؟“ فرزانہ اس پر الٹ پڑی۔

”لو۔ اب مجھ پر برس پڑیں۔“ محمود نے مذاق اڑانے والے انداز میں کہا۔

”کیا بات ہے فرزانہ آج تمہارا موڈ کیوں خراب ہے؟ ان دونوں سے اگر ٹھنڈے دماغ سے لڑو گی تو اچھی رہو گی۔“ بیگم جمشید نے مسکرا کر کہا۔

”امی جان۔ آپ نے سنا نہیں۔ فاروق نے مجھے کام چور کہا ہے۔ وہ بھی ایک بار نہیں۔ دوبار۔“

”دوبار؟ نہیں تو ایک بار ہی تو کہا ہے۔“ فاروق نے حیرت سے کہا۔

”ہاں! دوسری بار تو اس نے ابا جان کی طرف سے کہا تھا۔“ محمود پھر ہنسا۔

”دیکھا۔ میں نے کہا تھا نا۔ ٹھنڈے دل سے کام لو۔“ بیگم جمشید پھر مسکرائیں۔

”آپ بھی ان ہی کی طرف داری کر رہی ہیں۔“ فرزانہ جھنجھلا گئی۔

”آج تمہیں ہوا کیا ہے؟“ انہوں نے پوچھا۔

”میں ابا جان کی وجہ سے پریشان ہوں۔ نہ جانے کس وقت آئیں۔“

”وہ دیر سے آئیں گے۔“

”اسی لیے تو پریشان ہوں۔“

”معلوم ہوتا ہے، کوئی بڑی واردات ہو گئی ہے۔“ فاروق نے کہا۔

”ہوں! ایسا ہی ہو گا۔“ محمود نے تائید کی۔

”کیا باہر کا دروازہ بند ہے۔“ بیگم جمشید نے پوچھا۔

”جی ہاں! میں نے بند کیا تھا۔“ محمود نے بتایا۔

”تو ٹھیک ہے۔“

”کیوں نہ کیرم کی بازی لگائی جائے۔“ فاروق نے تجویز پیش کی۔

”خیال بُرا نہیں ہے۔“ محمود نے کہا۔

”تو میں لاتی ہوں۔“ فرزانہ اٹھتی ہوئی بولی۔

عین اسی وقت دروازے کی گھنٹی بجی۔

”شاید ابا جان آگئے۔“

”ہوں! میں دیکھتا ہوں۔“ محمود دروازہ کی طرف بڑھا۔

اس نے دروازہ کھول دیا پھر بری طرح چونکا۔ دروازے میں چار لمبے تڑنگے بدمعاش کھڑے تھے۔

”کیوں؟ کیا بات ہے؟“ محمود نے ناگواری سے کہا۔

”اس گھر میں ابھی ابھی ایک بوڑھا شخص اور ایک بچی داخل ہوئے ہیں۔ ہمیں ان سے کچھ کام ہے۔“

”لیکن یہاں تو کوئی بھی نہیں گھسا۔“ محمود نے حیران ہو کر کہا۔

”تم جھوٹ بولتے ہو۔ وہ دونوں ہمارے سامنے اس دروازے پر آئے تھے۔“

”کیا بات ہے محمود؟“ اندر سے بیگم جمشید نے پوچھا۔

”ہٹو! ہم مکان کی تلاشی لیں گے۔“ ان میں سے ایک نے محمود کو دھکیلتے ہوئے کہا۔

”تم تلاشی نہیں لے سکتے۔ تمہیں کیا حق ہے۔“ محمود بھی تن کر کھڑا ہو گیا۔

دوسرے ہی لمحے بیگم جمشید، فاروق اور فرزانہ بھی وہاں پہنچ گئے۔

”کیا بات ہے؟ کون ہو تم لوگ؟“ بیگم جمشید نے جھلا کر کہا۔

”آپ کے مکان میں ایک بوڑھا اور ایک لڑکی داخل ہوئے ہیں۔ ہمیں ان سے کچھ کام ہے۔ انہیں باہر بھیج دیں۔“

”تم غلط کہتے ہو۔ مکان میں ہم چاروں کے سوا کوئی نہیں ہے۔“

”اگر یہ سچ ہے تو ہمیں مکان کی تلاشی لے لینے دیں۔“

”تم کون ہوتے ہو تلاشی لینے والے۔“ بیگم جمشید نے تنک کر کہا۔

”ہمیں کون روک سکتا ہے۔“

”اگر تم مکان میں داخل ہوئے تو تمہار اانجام اچھا نہیں ہوگا۔“ محمود نے کہا۔

”ہٹو پیچھے۔ اسرار تم دروازے پر ہی ٹھہرو۔“ ان میں سے ایک نے کہا اور وہ تینوں انہیں دھکیلتے ہوئے اندر داخل ہو گئے۔

”تم بھگتو گے۔“

”بھگت لیں گے۔“ اسی نے کہا جس نے اسرار کو باہر ٹھہرنے کے لیے کہا تھا۔ پھر وہ اپنے دونوں ساتھیوں سے بولا۔ ”پرویز، وزیر سارے گھر کی تلاشی لو۔ میں ان چاروں کے پاس ٹھہروں گا۔“

”بہت اچھا استاد۔“ ان میں سے ایک نے کہا اور مکان کے ایک کمرے میں گھس گئے۔

”تمہاری بھلائی اسی میں ہے ان دونوں کو خود ہی ہمارے حوالے کر دو۔“

”اس گھر میں کوئی بوڑھا اور لڑکی داخل ہی نہیں ہوئے تو حوالے کہاں سے کر دیں۔“ بیگم جمشید نے جھنجھلا کر کہا۔

”ہم نے اپنی آنکھوں سے انہیں اس مکان میں داخل ہوتے دیکھا ہے۔“

’خیر۔ تمہیں معلوم ہو ہی جائے گا۔ ویسے وہ دونوں کون ہیں اور تم انہیں کیوں پکڑنا چاہتے ہو۔“ محمود نے پرسکون آواز میں کہا۔

”یہ ہمارا کاروباری معاملہ ہے۔ ہم اس کے متعلق تمہیں کچھ نہیں بتائیں گے۔“

”تمہاری مرضی۔“ محمود نے شانے جھٹکے۔

”تم لوگ کیا کام کرتے ہو؟“ بدمعاشوں کے استاد نے پوچھا۔ اس کا منہ محمود کی طرف تھا۔

”پڑھتے ہیں۔“ محمود کے بجائے فاروق نے جواب دیا۔

”میر امطلب تھا، تمہارے والد کیا کام کرتے ہیں۔“

”وہ سرکاری ملازم ہیں۔“ محمود نے گول مول جواب دیا۔

”خود تم لوگ کیا کیا کرتے ہو۔“ فرزانہ نے نفرت سے منہ بناتے ہوئے کہا۔

”ہم؟ ننھی لڑکی۔ کیا کرو گی معلوم کر کے؟ یہ تمہارے جاننے کی باتیں نہیں ہیں۔“

”اچھا۔“ فرزانہ نے حیرت کا اظہار کیا۔

”ہاں۔ اس مکان میں کتنے کمرے ہیں؟“ استاد نے پوچھا۔

”چھ کمرے۔“ فاروق بولا۔

”ہوں! تمہارے والد کہاں گئے ہیں؟“

”کسی کام سے گئے ہیں۔ آتے ہی ہوں گے۔“ فاروق نے گویا انہیں دھمکی دی۔

”ان کے آنے سے پہلے ہمارا کام ختم ہو جائے گا۔“

”آخر وہ دونوں کون ہیں اور تم ان سے کیا چاہتے ہو؟“ 

فاروق نے پیچ و تاب کھاتے ہوئے کہا۔

”میں نے کہا نا۔ یہ نہیں بتا سکتا۔“

اسی وقت اس کے دونوں ساتھی وہاں پہنچ گئے۔

”وہ دونوں مکان میں نہیں ہیں۔“ ان میں سے ایک بولا۔

”کیا بکتے ہو۔“

”وزیر ٹھیک کہتا ہے استاد۔ ہم نے مکان کا چپہ چپہ چھان مارا لیکن ان دونوں کا کہیں پتا نہیں چلا۔“ پرویز بولا۔ ”حیرت ہے۔ ہم نے خود مکان کے پھاٹک میں انہیں داخل ہوتے دیکھا ہے۔“ استاد نے کہا۔

”استاد۔“ پرویز چونکا۔

”کیا بات ہے؟“

”کہیں وہ دونوں بائیں ہاتھ کے باغ میں نہ گھس گئے ہوں۔“

”اوہ! تم ٹھیک کہتے ہو۔ ہم سے غلطی ہو گئی جو پہلے وہاں نہیں دیکھا۔“ استاد بولا۔

”تو کیا ہوا استاد۔ اسرار دروازے پر موجود ہے۔ وہ نکل کر نہیں جا سکے ہوں گے۔ ضرور وہ دونوں باغ میں چھپے ہوں گے۔“

”تو آﺅ۔ جلدی کرو۔“

تینوں تقریباً دوڑتے ہوئے باہر نکل گئے۔

٭……..٭

بند کھڑکی

ان کے باہر نکلتے ہی محمود اور فاروق اپنے کمرے کی طرف لپکے۔

”کیوں تم کہاں جا رہے ہو؟“

”ہم دیکھنا چاہتے ہیں، وہ دونوں بدنصیب کہیں سچ مچ باغ میں چھپے تو نہیں ہیں۔“

”میں بھی تمہارے ساتھ چلتی ہوں۔“ فرزانہ نے کہا۔

”اور میں دروازہ اندر سے بند کر کے تمہارے پاس آتی ہوں۔“ بیگم جمشید بولیں۔

محمود اور فاروق نے اپنے کمرے کا دروازہ کھولتے ہی کھڑکی تک پہنچنے میں پھرتی دکھائی۔ دوسرے ہی لمحے انہوں نے کھڑکی کھول دی۔ عین اسی وقت تینوں بدمعاش مکان سے باہر نکل کر دروازے پر پہنچ چکے تھے اور اپنے ساتھی اسرار سے پوچھ رہے تھے۔

”اس باغ میں سے کوئی نکلا تو نہیں۔“

”باغ میں سے کیا مطلب؟“ اس نے حیران ہو کر پوچھا۔

”وہ دونوں اندر نہیں ہیں۔“

”تو کیا وہ دونوں باغ میں ہیں؟“

”خیال تو یہی ہے۔“

”لیکن اندر تو اندھیرا ہے۔ وہ ہمیں نظر نہیں آئیں گے۔“ اسرار نے کہا۔

”تم تینوں دروازے پر ہی ڈٹے رہو۔ میں کار میں سے ٹارچ نکال لاتا ہوں۔“ استاد نے کہا اور وہاں سے چلا گیا۔

”کہیں باغ میں سے نکلنے کا کوئی راستہ دوسری طرف نہ ہو۔“ اسرار نے کہا۔

”اگر کوئی دوسرا راستہ ہو گا تو وہ کب کے جا چکے ہوں گے۔“ وزیر بولا۔

”ہاں یہ تو ہے۔“

”اور اگر ایسا ہوا تو آج ہماری بھی شامت آجائے گی۔“

”دیکھا جائے گا۔“ استاد بھی تو ہمارے ساتھ ہے۔ وہ خود ہی جواب دے دے گا۔“

اسی وقت محمود نے دو سایوں کو کھڑکی کی طرف بڑھتے دیکھا۔

”فاروق! ان دو سایوں کو دیکھ رہے ہو۔ یہ ضرور وہی دونوں ہیں۔“

”شاید تم ٹھیک کہہ رہے ہو۔“

”اگر یہ دونوں پکڑے گئے تو نا جانے یہ لوگ ان کے ساتھ کیا سلوک کریں۔“

”تو پھر؟“ فاروق نے پوچھا۔

”ہمیں ان کی مدد کرنی چاہیے۔“

”لیکن ان کی مدد کرتے کرتے ہم خود مصیبت میں نہ پھنس جائیں۔“ فاروق نے خدشہ ظاہر کیا۔

”پھنستے ہیں تو پھنس جائیں۔ لیکن مصیبت زدوں کی مدد تو کرنی ہی چاہیے۔“

”تو ٹھیک ہے۔ اس سے پہلے کہ ان کا ساتھی ٹارچ لے کر آئے، ان دونوں کو اوپر چڑھا لو۔“

”اور اوپر چڑھاتے ہی دروازہ بند کر دو۔“

”ٹھیک ہے۔“

عین اسی وقت وہ دونوں کھڑکی کے نیچے پہنچ گئے۔

”اِدھر آجائیے۔“ محمود نے سرگوشی کی۔ اندر اسی وقت بیگم جمشید بھی داخل ہو گئیں۔

محمود نے ہاتھ نیچے لٹکا دیا تھا۔ دوسرے ہی لمحے ایک ننھا منا سا ہاتھ اس کے ہاتھ میں آگیا۔ اس نے اسے اوپر کھینچ لیا۔ کمرے میں بھی اندھیرا تھا اور انہوں نے بجلی کا بلب احتیاطاً روشن نہیں کیا تھا۔ اندھیرے میں انہوں نے دیکھا کہ یہ کوئی لڑکی تھی۔

اس کے بعد محمود اور فاروق دونوں نے اپنا اپنا ہاتھ نیچے لٹکا دیا۔ ان دونوں کے ہاتھوں کو دو ہاتھوں نے مضبوطی سے پکڑ لیا۔ ساتھ ہی دروازے کی طرف سے آواز آئی۔

”میں ٹارچ لے آیا ہوں۔ آﺅ اندر دیکھیں۔“ یہ استاد کی آواز تھی۔

”کیوں نہ ہم میں سے ایک دروازے پر ہی ٹھہرے۔“ اسرار نے پوچھا۔

اس سے پہلے کہ وہ تینوں ٹارچ لیے باغ میں داخل ہوتے، محمود اور فاروق بوڑھے آدمی کو کھینچ کر کھڑکی بند کر چکے تھے۔

٭……..٭

وہ تینوں باغ میں داخل ہوئے۔ استاد سب سے آگے تھا۔ ٹارچ اس کے ہاتھ میں تھی۔ یہ ایک چھوٹا سا پائیں باغ تھا۔ اس میں پھولوں اور پھلوں کے بے شمار پودے تھے۔ ٹارچ کی روشنی درختوں، پودوں اور باڑھ پر رینگنے لگی۔

”ہم سے ایک غلطی ہو گئی ہے۔“ پرویز کو اچانک خیال آیا۔

”وہ کیا؟“ وہ ٹھٹک کر رک گئے۔

”ہمیںچاہیے تھا کہ اسرار کو پروفیسر کی کار کے پاس کھڑا کر دیتے۔ ہو سکتا ہے وہ دونوں کسی طرف سے نکل کر کار تک پہنچنے میں کامیاب ہو جائیں۔“

”ہوں! بات تو ٹھیک ہے۔ اچھا۔ تو تم جا کر اسرار سے کہہ دو۔“ استاد نے کچھ سوچتے ہوئے کہا۔ پھر بولا۔

”اور تم خود دروازے پر ٹھہرنا۔“

”اچھا۔“ پرویز چلا گیا۔

وزیر استاد کے ساتھ ساتھ آگے بڑھنے لگا۔ انہوں نے پوری باڑھ اور تمام درخت دیکھ ڈالے لیکن پروفیسر اور ان کی بیٹی کا کہیں پتا نہ چلا۔

”حیرت ہے۔ انہیں زمین کھا گئی یا آسمان نگل گیا۔ آخر وہ کہاں چلے گئے۔“

”اور پھر ان کی کار باہر ہی موجود ہے۔“

”خیر! وہ یہاں سے کچھ فاصلے پر جا کر ٹیکسی لے کر جا سکتے ہیں۔ کار، جان سے زیادہ پیاری تو نہیں ہو سکتی نا۔“

”ہوں! پھر کیا کیا جائے؟“

”ایک چکر اور لگا کر دیکھ لیتے ہیں۔ ہو سکتا ہے وہ کسی درخت یا پودے کے پیچھے چھپے ہوئے ہوں اور ہمیں نظر نہ آئے ہوں۔“

”مجھے امید نہیں۔ ہم نے بہت غور سے دیکھا تھا۔“

”پھر بھی کیا حرج ہے۔“

”چلو۔ دیکھ لیتے ہیں۔“

ایک بار پھر پائیں باغ کی تلاشی کا کام شروع ہوا۔ انہوں نے اس مرتبہ اور بھی زیادہ احتیاط سے دیکھا۔ پوری باڑھ چھان ماری۔ ایک ایک درخت اور پودا دیکھ ڈالا۔ اچانک ٹارچ کی روشنی بند کھڑکی پر پڑی۔ وہ دونوں چونک اٹھے۔

”تم اس کھڑکی کو دیکھ رہے ہو؟“ استاد نے کہا۔

”ہاں! استاد دیکھ رہا ہوں۔“ وزیر بولا۔

”کیا خیال ہے۔“ استاد نے عجیب لہجے میں کہا۔

”آپ یہی سوچ رہے ہیں نا کہ کہیں وہ دونوں اس کھڑکی کے ذریعے اندر نہ پہنچ گئے ہوں۔“

”ہاں! تمہارا خیال ٹھیک ہے۔“ استاد نے کہا۔

”لیکن۔ ہم تو مکان کی اندر سے تلاشی لے چکے ہیں۔“

”تم نہیں سمجھے۔ وہ دونوں تلاشی کے بعد اندر داخل ہوئے ہوں گے۔“

”تو پھر ہم کیا کریں؟“ وزیر نے پوچھا۔

”ہم ایک بار پھر مکان کی تلاشی لیں گے۔“

”یہ ٹھیک ہے۔“

”تو آﺅ چلیں۔“

دونوں باغ سے نکل کر دروازے کی طرف بڑھے۔ یہاں وزیر موجود تھا۔

”کیوں۔ کیا رہا؟“

”وہ دونوں باغ میں نہیں ہیں۔ اسرار کہا ہے؟“

”پروفیسر کی کار کے پاس۔“

”ہم ایک بار پھر مکان کی تلاشی لیں گے۔ اس لیے تم اسرار سے کہہ آﺅ کہ وہ کار اور دروازے دونوں پر نظر رکھے۔ ہم تینوں اندر چلیں گے۔“

”اچھا۔“

پرویز کار کی طرف چلا گیا۔ دونوں اس کی واپسی کا انتظار کرنے لگے۔ جونہی وہ واپس آیا، استاد نے ایک بار پھر دستک دی۔

٭……..٭

نیا خطرہ

”کمرے کی بتی نہ جلانا۔“ بیگم جمشید نے دھیمے لہجے میں کہا۔

”ہاں۔ ان دونوں کو دوسرے کمرے میں لے چلتے ہیں۔“

دوسرے کمرے میں پہنچتے ہی انہوں نے بجلی کا بلب روشن کر دیا۔ دوسرے ہی لمحے ان کی آنکھیں پھٹی کی پھٹی رہ گئیں۔

”آپ!“ چاروں کے منہ سے حیرت اور خوف کی زیادتی سے نکلا۔

ان کے سامنے پروفیسر داﺅد اور شائستہ کھڑے تھے۔

”یہ سب کیا ہے۔ یہ کون ہیں جو آپ کا پیچھا کر رہے ہیں؟“

”معلوم نہیں کون لوگ ہیں۔ ہم دونوں شاپنگ کے لیے گھر سے نکلے تھے واپسی پر ان کے تعاقب کا پتا چلا۔ ہم اندھا دھند بھاگ کھڑے ہوئے۔ پھر اس سڑک پر مڑ گئے۔ تمہارے گھر کے پاس پہنچ کر یہ خیال آیا کہ ہم یہاں زیادہ محفوظ رہیں گے۔ اس خیال کے آتے ہی ہم کار سے اتر کر تمہارے دروازے کی طرف دوڑے۔ عین اسی وقت ان کی کار آکر رکی۔ دروازہ اندر سے بند تھا۔ اس لیے اتنا وقت نہیں تھا کہ دستک دے کر دروازہ کھلوایا جا سکتا۔ چنانچہ ہم دونوں پائیں باغ میں گھس گئے۔“

”ہوں۔ وہ لوگ ایک بار اندر کی تلاشی لے چکے ہیں۔“

”میں جانتا ہوں۔“ پروفیسر بولے۔ ”جمشید کہاں ہے؟“

”وہ ابھی تک واپس نہیں لوٹے۔ کوئی بڑی چوری ہو گئی ہے۔ موقع واردات پر گئے ہیں۔“

”اوہ! یہ تو بہت بُرا ہوا۔“

”کیوں۔ بُرا کیا ہوا۔ اب تو وہ لوگ باغ کی تلاشی کے بعد چلے ہی جائیں گے۔“ محمود نے کہا۔

”شاید وہ اتنی آسانی سے نہ جائیں۔ ان کی نظر پائیں باغ والی کھڑکی پر ضرور پڑے گی اور پھر باہر میری کار موجود ہے۔“

”ہوں! امی آپ دروازہ بند کر چکی ہیں نا۔“

”ہاں!“

”اور کھڑکی بھی اندر سے بند کر دی گئی ہے۔“ فاروق نے بتایا۔

”بس پھر۔ فی الحال گھبرانے کی کوئی ضرورت نہیں۔ اطمینان سے بیٹھیں۔“ بیگم جمشید نے کہا۔

”نہیں امی۔ ہمیں آئندہ کے لیے سوچ لینا چاہیے۔ فرض کیجئے، وہ لوگ پھر تلاشی لینے آجاتے ہیں تو اس صورت میں ہمیں کیا کرنا ہو گا۔“ محمود نے کہا۔

”سوچو۔ ذہن پر زور دو۔“ فاروق نے کہا۔

”کچھ تم بھی اپنے ذہن کو کام میں لاﺅ۔“ فرزانہ بولی۔

”ترکیبیں سوچنے میں تمہارا جواب نہیں ہے۔ اس لیے میں یہ ذمے داری تمہی کو سونپتا ہوں۔“

”سب لوگ سوچیں۔“ بیگم جمشید بولیں۔ ”یہ وقت مذاق کا نہیں ہے۔ اگر تمہارے ابا جان گھر میں ہوتے تو کوئی پریشانی والی بات نہیں تھی۔“

”ہاں۔ یہ تو ٹھیک ہے۔“

پھر سب ہی گہری سوچ میں کھو گئے۔ چند سیکنڈ بھی نہ گزرے ہوں گے کہ فرزانہ نے پرجوش انداز میں چٹکی بجائی۔

”وہ مارا۔“

”میں جانتا تھا۔ تم ہی مارو گی۔“ فاروق نے مسکرا کر کہا۔

”جلدی بتاﺅ۔ کیا سوچا ہے تم نے۔“ بیگم جمشید نے کہا۔

”انکل اور شائستہ کو ایک کمرے میں بند کر دیتے ہیں اور دروازے پر تالا لگا دیتے ہیں۔“

”گڈ!“ محمود کے منہ سے نکلا۔

”ترکیب تو….“

اسی وقت دروازے پر زور سے دستک دی گئی۔

’دلو وہ لوگ آگئے۔“ بیگم جمشید گھبرا گئیں۔

”گھبرائیے نہیں امی۔“ محمود بولا۔

”اب کیا کریں؟“ فاروق نے کہا۔

”گھر میں جو سب سے اچھا تالا ہے، وہ جلدی سے لے آئیں امی۔“

”اچھا۔ ابھی لائی۔“ بیگم جمشید دوڑی گئیں۔

اسی وقت دوبارہ دستک دی گئی۔

”ہو سکتا ہے، یہ ابا جان ہوں۔“ فاروق نے خیال ظاہر کیا۔

”ابا جان اتنی زور سے دستک نہیں دے سکتے۔“

”ہوں! ٹھیک ہے۔ یہ ضرور وہ لوگ ہیں۔“

تیسری مرتبہ پھر دروازہ کھٹکھٹایا گیا۔

”کیسے جاہل لوگ ہیں۔ دروازے پر کال بیل کا بٹن لگا ہوا ہے پھر بھی دروازہ کھٹکھٹا رہے ہیں۔“ پروفیسر بولے۔

”رعب ڈالنے کے لیے۔“

”ہوں!“

اسی وقت بیگم جمشید تالا لیے اندر داخل ہوئیں۔

”جائیے امی۔ آپ دروازہ کھول دیں لیکن کھولنے سے پہلے ایک آدھ منٹ ضائع کرنا نہ بھولیں۔“ محمود نے کہا۔

”اچھا۔“ بیگم جمشید دروازے کی طرف چلی گئیں۔

”انکل۔ آپ اور شائستہ اس کمرے میں بے فکر رہیں۔ کمرے کی کھڑکیاں بند ہیں۔ اگر کسی کھڑکی پر تین بار انگلی سے دستک دی جائے تو آپ وہ کھڑکی کھول دیجئے گا۔“

”یہ کیوں؟“ پروفیسر حیران رہ گئے۔

”شاید ایسا کرنا پڑے۔ اب آپ بے فکر رہیں۔“

محمود نے کہا اور تینوں کمرے سے نکل آئے۔ اس کے بعد محمود نے کمرے کے دروازے پر تالا لگا دیا اور تیزی سے اس کمرے سے ہٹ آئے۔ پھر وہ اپنے کمرے میں چلے آئے۔

”اب اس چابی کا کیا کریں؟“ محمود نے پوچھا۔

”لاﺅ میں اسے پائیں باغ میں کہیں چھپا آﺅں۔“ فرزنہ بولی۔

”اچھا۔ یہ لو۔“

فرزانہ نے چابی لی، کھڑکی کھولی اور آواز پیدا کیے بغیر باغ میں اتر گئی۔اس نے جلدی سے ایک درخت کے نیچے ایک خشک شاخ کی مدد سے گڑھا کھودا اور چابی اس میں دفن کر دی۔ دوسرے ہی لمحے وہ دوبارہ کمرے میں تھی۔ اسی وقت بیرونی دروازہ کھلنے کی آواز آئی۔

٭……..٭

بیگم جمشید نے دروازے پر پہنچ کر پوچھا۔

”کون ہے؟“

”ہم ہیں۔ دروازہ کھولو۔“ باہر سے رعب دار آواز آئی۔

”ہم کون؟“ انہوں نے کہا۔

”وہی۔ جنہوں نے ابھی ابھی مکان کی تلاشی لی تھی۔“

”اب کیا چاہتے ہو؟“

”ہم ایک بار پھر تلاشی لینا چاہتے ہیں۔“

”ہرگز نہیں۔ تم تلاشی نہیں لے سکتے۔“

”ہم لے سکتے ہیں۔ دروازہ کھولو۔“

”دروازہ نہیں کھلے گا۔“

”تو ہم دروازہ توڑ دیں گے۔ دروازہ کھولتی ہو یا ہم توڑنا شروع کریں۔“

”ٹھہرو۔ میں کھولتی ہوں۔“ بیگم جمشید نے کہا اور دیوار کے ساتھ لگ کر کھڑی ہو گئیں۔ کئی سیکنڈ اسی طرح گزر گئے۔

”کیا بات ہے۔ تم نے دروازہ نہیں کھولا۔“

بیگم جمشید نے کوئی جواب نہیں دیا۔ انہوں نے پھر دروازہ کھٹکھٹایا۔ بیگم جمشید مسکرائیں اور قدموں کی آواز پیدا کرتے ہوئے دروازہ کھول دیا۔

”میں ذرا چابی لینے گئی تھی۔“

”چابی؟“ ان کے استاد نے حیران ہو کر کہا۔

”کہاں ہے تالا۔“ استاد نے پوچھا۔

”تالا! ارے تالا کہاں گیا۔“ بیگم جمشید نے بھی حیرت کا مظاہرہ کیا۔

”بتاﺅ۔ کہاں ہے تالا؟“

”دراصل اس مکان پر آسیب کا سایہ ہے۔“

”یہ کیا بکواس ہے۔“ پرویز چلایا۔

”ہاں! یہ مکان آسیب زدہ ہے۔ ابھی ابھی تالا اور چابی میرے ہاتھ میں تھے اور اب غائب ہیں۔“

”ہمیں تمہاری کسی بات پر یقین نہیں۔ ہم جانتے ہیں وہ دونوں مکان کے اندر موجود ہیں۔“

”کون دونوں؟“ بیگم جمشید نے انجان بن کر کہا۔

”وہی دونوں۔ جن کی تلاش میں ہم ہیں۔“

”ابھی چند منٹ پہلے تو تم نے تلاشی لی ہے۔“

”اب پھر لیں گے۔“

”جیسے تمہاری مرضی۔ لیکن کہے دیتی ہوں تم ایک غیرقانونی کام کر رہے ہو جس کے لیے تمہیں بھگتنا پڑے گا۔“

”ہم جانتے ہیں۔ تم فکر نہ کرو۔“ وزیر بولا۔

”بہتری اسی میں ہے کہ اسی جگہ سے لوٹ جاﺅ۔“

”تو تم یہ چاہتی ہو کہ ہم تلاشی نہ لیں۔“ استاد نے کہا۔

”ہاں! کیوں کہ تمہاری بچت اسی میں ہے۔ کیوں کہ اگر تم یہاں سے نہ گئے اور میرے شوہر آگئے تو پھر تم بچ کر نہیں جا سکو گے۔“

”بس بس! تقریر ختم۔ چلو آگے بڑھو۔ تمہارے بچے کہاں ہیں۔“

”وہ اپنے کمرے میں ہوں گے۔“

”چلو۔ پہلے انہی کے کمرے میں چلو۔“

”تم لوگ پچھتاﺅ گے۔“ بیگم جمشید زیادہ سے زیادہ وقت گزار دینا چاہتی تھیں۔

”اگر ہم نے اس شخص کو نہ پکڑا تو بھی پچھتانا تو پڑے گا ہی۔“

”کون ہے وہ؟“

”ہے ایک مشہور آدمی۔ چلو ہمیں اپنے بچوں کے کمرے میں لے چلو۔“

”اچھا۔ آﺅ۔“

بیگم جمشید انہیں لیے پائیں باغ والے کمرے میں آئیں۔ یہاں تینوں موجود تھے۔ ان بدمعاشوں کو دیکھ کر انہوں نے چونکنے کی ایکٹنگ کی۔

”ارے! تم لوگ پھر آگئے۔“ محمود بول اٹھا۔

”ہاں! ہم ایک بار پھر تلاشی لیں گے۔“ استاد نے کہا۔

”کیوں۔ اب کیا ہوا؟“

”ہمارا خیال ہے کہ وہ دونوں اسی مکان میں کہیں چھپے ہوئے ہیں۔“

”تو دیکھ لو۔وہ یہاں نہیں ہیں۔“

”جاﺅ تم دونوں مکان کا چپہ چپہ چھان مارو۔ کوئی کونا رہ نہ جائے۔“ استاد نے اپنے دونوں ساتھیوں کو حکم دیا۔

دونوں چلے گئے۔

”تمہارے والد ابھی تک نہیں آئے۔“

”آنے ہی والے ہیں اور آتے ہی تم سے نبٹ لیں گے۔“

”ہم سے!“ استاد ہنسا۔

”کیوں۔ تم ہنسے کیوں۔ کیا تم سے نبٹا نہیں جا سکتا؟“ محمود نے پوچھا۔

”ہمارا نام ہی سن کر ان کا دم نکل جائے گا۔“

”اچھا! کیا نام ہے تمہارا۔ ذرا ہم بھی تو سنیں، دیکھتے ہیں ہمارا دم نکلتا ہے یا نہیں۔“

”کیا کرو گے جان کر۔ میں بچوں کو اپنا نام بتاتا نہیں پھرتا۔“

”ارے! کہیں تمہارا نام سلطانہ ڈاکو تو نہیں ہے۔“ فاروق نے مذاق اڑانے والے انداز میں کہا۔

’دتم بھول رہے ہو فاروق۔ وہ تو مر چکا ہے۔“ فرزانہ بولی۔

”تو پھر یہ بادل ڈاکو ہوں گے۔“ فاروق پھر ہنسا۔

”اگر یہ بادل ڈاکو ہیں تو زمین پر کیوں پھر رہے ہیں۔“ محمود نے حیران ہو کر کہا۔

”بہت بدتمیز ہو تم تینوں۔“

”یہ ہمارے لیے ایک نئی خبر ہے۔“ فاروق نے اعلان کیا۔

”تم چپ نہیں رہو گے؟“ استاد جھلا اٹھا۔

”تم نے اپنا نام نہیں بتایا۔“

”تو تم میرا نام ضرور جاننا چاہتے ہو۔“

”ہاں! ہمارا بے ہوش ہونے کا پروگرام ہے۔“ فاروق نے خوش ہو کر کہا۔ ”دراصل ہم آج تک بے ہوش نہیں ہوئے۔ ذرا دیکھیں تو سہی بے ہوش ہونے پر کیسا محسوس ہوتا ہے۔“

”اگر تم اب بولے تو میں تمہیں مار بیٹھوں گا۔“ استاد نے غرّا کر کہا۔

”یہ پابندی صرف مجھ پر لگا رہے ہو یا ہم سب پر۔“ فاروق نے پوچھا۔

”تم یوں نہیں مانو گے۔ تمہارے ایک آدھ ہاتھ رسید کرنا ہی پڑے گا۔“ وہ فاروق کی طرف بڑھتا ہوا بولا۔

”کیا تم آدھا ہاتھ بھی رکھتے ہو۔ گویا تمہارے اڑھائی ہاتھ ہیں۔“

”ابھی بتاتا ہوں۔“ استاد نے اپنا بھاری بھرکم ہاتھ فاروق کو مارنے کے لیے اٹھایا۔

”ٹھہرو دوست۔ یہ تو زیادتی ہے۔“ محمود نے پرسکون آواز میں کہا۔

”کیا مطلب؟“ استاد کا اٹھا ہوا ہاتھ رُک گیا۔

”اس نے صرف تمہارا نام ہی تو پوچھا تھا۔ کیا تمہارا نام معلوم کرنے کی سزا مقرر ہے۔“ محمود نے کہا۔

”میرا نام جاننا چاہتے ہو؟“

”جی ہاں!“ محمود نے ادب سے کہا۔

”مجھے بہزاد ڈاکو کہتے ہیں۔“

”کیا!“ ان چاروں کے منہ سے نکلا، کیوں کہ وہ سچ مچ حیران رہ گئے تھے۔

٭……..٭

فرزانہ کی غلطی

 ۱ 

 باقر گنج جانے سے پہلے انہوں نے بہزاد ڈاکو کا نام اپنے والد کی زبان سے کئی بار سنا تھا۔ ان دنوں اس نے شہر میں ہل چل مچائی ہوئی تھی۔ پھر کچھ دنوں بعد وہ بالکل ہی غائب ہو گیا تھا اور کسی واردات کے سلسلے میں اس کا نام سننے میں نہیں آیا تھا۔ آج بہزاد ڈاکو ان کے سامنے موجود تھا۔

”ارے۔ کیا واقعی تم بہزاد ڈاکو ہو؟“

”ہاں!“

”لیکن تم تو غائب ہو گئے تھے۔“

”میں دوسرے شہروں میں ہاتھ مارنے گیا ہوا تھا۔“ بہزاد ڈاکو نے بتایا۔

”بھئی واہ! بڑا نیک کام ہے۔“ فاروق نے خوش ہو کر کہا۔

”مسٹر بہزاد! بڑی خوشی ہوئی تم سے مل کر۔ واہ۔ ڈاکو ہو تو ایسا ہو۔“ محمود بولا۔

”بڑا نام پیدا کیا ہے آپ نے تو۔“ فرزانہ بھلا کب چپ رہنے والی تھی۔

بہزاد تینوں بچوں کو حیرت سے دیکھ رہا تھا۔

”آپ بیٹھ جائیں ڈاکو بھائی۔ تھک جائیں گے۔“ فرزانہ نے خوش اخلاقی کا مظاہرہ کیا۔

”ہاں ہاں! تشریف رکھیں۔ امی جان ڈاکو صاحب کے لیے چائے تیار کر دیں۔ یہ ہمارے مہمان ہیں۔“ محمود بولا۔

”خالی چائے سے کام نہیں چلے گا امی! کچھ کیک پیسٹریز بھی ہوں۔“ فاروق چہکا۔

”یہ سب کیا ہے۔ تم کس قسم کے بچے ہو؟“ بہزاد نے جھنجھلا کر کہا۔

”بچے کس قسم کے ہوتے ہیں۔ پہلے تو یہ بتائیں؟“ فرزانہ نے پوچھا۔

”اے۔ تم کہاں جا رہی ہو؟“ بہزاد ڈاکو نے دروازے کی طرف بڑھتی ہوئی بیگم جمشید سے کہا۔

”آپ کے لیے چائے بنانے۔“ بیگم جمشید نے مسکرا کر کہا۔

”خبردار! تم میں سے کوئی کمرے سے باہر قدم نہ رکھے۔“

”کیوں۔ کیا چائے پینے کا موڈ نہیں ہے۔“ فرزانہ نے پوچھا۔

”خاموش رہو۔ عجیب آدمی ہو تم۔“

”آدمی کہاں۔ بچے ہیں۔“ فاروق بولا۔

”اگر اب تم میں سے کوئی بولا تو میں برداشت نہیں کروں گا۔“

”شکریہ! آپ نے ہمیں بتا تو دیا کہ آپ کب تک برداشت کر سکتے ہیں۔“

اسی وقت بہزاد ڈاکو کے دونوں ساتھی وہاں آ دھمکے۔

”وہ دونوں پورے مکان میں کہیں نہیں ہیں استاد۔ البتہ۔“ پرویز کچھ کہتے کہتے رک گیا۔

”البتہ ایک کمرے کو تالا لگا ہوا ہے۔“

”کیا مطلب؟“

”پورے مکان میں صرف ایک کمرے کو تالا لگا ہوا ہے۔ ہم اس کی تلاشی نہیں لے سکے۔“

”اس کمرے کے تالے کی چابی کہاں ہے؟“ بہزاد ڈاکو نے پوچھا۔

”ابا جان کے پاس۔“ محمود نے تیزی سے کہا۔

”کیا مطلب؟“ اس نے غصے سے کہا۔

”کس بات کا مطلب پوچھ رہے ہیں آپ۔ ابا جان کے پاس کا؟“ محمود نے مذاق اڑانے والے لہجے میں کہا۔

”خاموش۔“

”جی بہتر۔“ اس نے ڈر کر کہا۔

”جس وقت پہلے تلاشی لی گئی تھی۔ اس وقت بھی کمرے کو تالا لگا ہوا تھا؟“ بہزاد ڈاکو نے اپنے دونوں ساتھیوں سے پوچھا۔

”جی نہیں۔ اس وقت ہم نے کسی کمرے کو تالا لگا ہوا نہیں دیکھا تھا اور تمام کمروں کی تلاشی لی تھی۔“ پرویز نے کہا۔

”تو پھر۔ اب یہ تالا کیسے لگ گیا؟“ بہزاد ڈاکو نے ان چاروں کو سوالیہ نظروں سے دیکھتے ہوئے کہا۔

”ہاں واقعی۔ یہ سوال تو بہت اہم ہے۔ آخر تالا کیسے لگ گیا۔“ فاروق بولا۔

”بات بہت عجیب ہے۔“ فرزانہ نے خوفزدہ ہو کر کہا۔

”ہمیں چل کر دیکھنا چاہیے۔ کس کمرے کو تالا لگا ہے اور کیسے لگ گیا ہے۔“

”یا الٰہی خیر۔“ بیگم جمشید نے کہا۔

”ڈاکو صاحب! ہمیں اجازت ہے۔“ محمود نے پوچھا۔

”ہم سب چل رہے ہیں۔“ بہزاد ڈاکو نے کہا۔

”تو بسم اللہ کیجئے۔ قدم رنجا فرمائیے۔“

”تم لوگ عجیب ہو۔“ بہزاد ڈاکو نے انہیں گھورتے ہوئے کہا۔

”یہ جملہ کتنی مرتبہ کسنے کا ارادہ ہے۔“ فاروق نے معصومیت سے پوچھا۔

”کیوں۔ یہ کیوں کہا تم نے؟“

”اس لیے کہ اس وقت تک آپ تین مرتبہ تو کہہ چکے ہیں۔“

”بکومت۔ چلو دکھاﺅ وہ کون سا کمرہ ہے؟“

سب باہر نکل کر بند کمرے کے دروازے پر آئے۔

”کیا وہ دونوں اس کمرے میں ہیں؟“ بہزاد ڈاکو نے اچانک سوال کیا۔

”کون دونوں؟“ فرزانہ تیزی سے بولی۔

”ہاں۔ کون دونوں؟“ محمود نے بھی کہا۔

”وہی بڑے میاں اور لڑکی۔“

”اگر وہ اس کمرے میں ہیں تو ہمارے لیے اس سے زیادہ حیرت کی بات نہیں ہو سکتی، کیوں کہ یہ ہمارے والد کا کمرہ ہے اور وہ اسے مقفل رکھتے ہیں لیکن اس سے یہ نہ سمجھ لینا کہ وہ اس میں اپنی تمام نقدی رکھتے ہوں گے اس لیے قفل لگا کر رکھتے ہیں۔ دراصل یہ بات نہیں ہے۔ اس کمرے میں وہ اپنے کاغذات رکھتے ہیں اس لیے ہمیشہ قفل لگا کر رکھتے ہیں۔“

”لیکن تھوڑی دیر پہلے تو تالا لگا ہوا نہیں تھا۔“ وزیر نے کہا۔

”تب پھریہ ضرور بھوت پریت کی شرارت ہو گی۔“ بیگم جمشید نے کہا۔

”کیا مطلب؟“

”میں نے بتایا تھا نا کہ مکان آسیب زدہ ہے۔ ہو سکتا ہے جس وقت آپ نے پہلے تلاشی لی تھی، اس وقت بھوتوں نے آپ کے احترام میں تالا کھول دیا ہو۔ ورنہ اس کمرے کو تو ہر وقت تالا لگا رہتا ہے۔ صرف میرے شوہر ضرورت پڑنے پر اسے کھولتے ہیں۔“

”لیکن ہم اس کمرے کو کھول کر ضرور دیکھیں گے۔“ بہزاد ڈاکو نے ضد پر اڑتے ہوئے کہا۔

”آپ اسے کیسے کھولیں گے؟“ محمود نے معصومیت سے پوچھا۔ ”اس پر تو تالا لگا ہوا ہے۔“

”ہم تالا کھول لیں گے اور اگر تالا نہ کھلا تو اسے توڑ دیں گے۔“

”ہاں۔ ڈاکو ہی ٹھہرے۔ دن رات یہی کام تو کرتے ہیں۔“ فاروق نے طنزیہ کہا۔

”بالکل! تم ٹھیک سمجھے۔ وزیر چابیوں کا گچھا مجھے دو۔“

”مگر استاد وہ تو کار میں ہے۔ کیا معلوم تھا کہ اس کی ضرورت پڑے گی۔“

”تو کیا ہوا۔ جا کر لے آﺅ۔“

”جی بہتر۔“

وزیر چابیوں کا گچھا لینے کے لیے چلا گیا۔

”تمہارے گھر میں بھی تو چابیوں کا گچھا ہو گا۔“ بہزاد ڈاکو نے بیگم جمشید سے پوچھا۔

”ہم ڈاکو نہیں ہیں۔“ ان کے بجائے فاروق نے کہا۔

”ہاں بالکل۔ چابیوں کا گچھا تو ڈاکوﺅں اور چوروں کے پاس ہوتا ہے۔“ محمود بولا۔

”ہر گھر میں چابیوں کا ایک گچھا ہوتا ہے۔“ بہزاد ڈاکو نے آنکھیں نکالیں۔

”اچھا۔ مجھے نہیں معلوم تھا۔“ فاروق نے حیرت کا اظہار کیا۔

”کمال ہے۔ یہ بات تو مجھے بھی معلوم نہیں تھی۔“ محمود بولا۔

”کیوں امی، کیا ہمارے گھر میں کوئی چابیوں کا گچھا ہے؟“

”ہاں۔ ایک ہے تو سہی۔“

”تب تو ڈاکو میاں ٹھیک ہی کہتے ہیں۔“

”ذرا وہ گچھا تو لاﺅ۔“ بہزاد نے کہا۔

”اچھا۔“ بیگم جمشید جانے کے لیے مڑیں۔

”ٹھہرو۔“ بہزاد ڈاکو نے سخت لہجے میں کہا۔

”تم عجیب ڈاکو ہو۔“ فاروق نے چیں بچیں ہو کر کہا۔

”کیوں؟“

”خود ہی تو کہا ہے کہ چابیوں کا گچھا لاﺅ۔ اب اگر وہ جانے لگیں تو کہتے ہو ٹھہرو۔“

”ہاں۔ میرا ساتھی ساتھ جائے گا۔“ بہزاد ڈاکو نے کہا۔

”بالکل۔ وہ تو جائے گا ہی۔ ساتھیوں کا کام ہی ساتھ جانا ہوتا ہے۔“ فرزانہ نے کہا۔

”میرا ساتھی تمہاری امی کے ساتھ جائے گا۔“

”کیوں۔ اس کی کیا ضرورت ہے؟“

”تاکہ یہ پولیس کو فون نہ کر دیں۔“

”لیکن ہمارے گھر میں تو فون ہے ہی نہیں۔“ محمود نے بتایا۔

”اچھا۔ فون نہیں ہے؟“

”نہیں۔“

”پھر بھی یہ ساتھ جائے گا۔ احتیاط کا تقاضا یہی ہے۔“

”ٹھیک۔ ساتھی صاحب ہماری امی کے ساتھ جاﺅ۔“

محمود نے گویا حکم دیا۔

وہ دونوں چلے گئے۔

”تم تینوں کی زبان بہت تیزی سے چلتی ہے۔“

”کیا آپ کو بُرا لگا ہے؟“

”ہاں!“

”اچھا تو ہم اب خاموش رہیں گے۔“

”تم پڑھتے ہو۔“

تینوں خاموش رہے۔

”جواب کیوں نہیں دیتے؟“

”کیا تمہیں سانپ سونگھ گیا ہے؟“

”عجیب ڈاکو ہو۔ خود ہی کہتے ہو ہمارا بولنا تمہیں ناگوار گزرتا ہے۔ اب ہم خاموش ہو گئے ہیں تو کہتے ہو بولو۔“ فاروق نے بُرا سا منہ بنایا۔

”بتاﺅ۔ کیا تم پڑھتے ہو؟“

”ہاں۔“ محمود نے ایسے لہجے میں کہا جیسے یہ بتا کر ڈاکو پر احسان کیا ہو۔

”تم تینوں کو میں اپنا ساتھی بناﺅں تو کیسا ہے؟“ بہزاد نے ہنس کر کہا۔

”کیا مطلب؟“ تینوں بری طرح چونکے۔

”تم تینوں کافی تیز طرار ہو۔ میں تمہیں جاتے وقت اپنے ساتھ لے جاﺅں گا اور پھر تم بھی ایک دن میرے ساتھی بن جاﺅ گے۔ نامی گرامی ڈاکو کہلاﺅ گے۔ تم تینوں مجھے بہت پسند آئے ہو۔“

”شکریہ! ہمارا ایسا کوئی ارادہ نہیں ہے۔“ محمود نے کندھے جھٹکے۔

”ہو نہ ہو۔ میں تمہیں لے جاﺅں گا۔“

اسی وقت اس کا ساتھی چابیوں کا گچھا لے کر آگیا۔

”پرویز کہاں گیا؟“ اس نے پوچھا۔

”وہ ان کی ماں کے ساتھ گھر کا چابیوں کا گچھا لینے گیا ہے۔“

”ہاں! یہ ٹھیک ہے۔“

جونہی بہزاد ڈاکو چابیوں کا گچھا لیے تالے کی طرف بڑھا، ان کے دل اس ڈر سے دھڑک اٹھے کہ کہیں تالا کھل نہ جائے۔

اسی وقت ان کی امی بھی پرویز کے ساتھ وہاں پہنچ گئیں۔

”کیوں استاد۔ کوئی چابی لگی؟“ پرویز نے پوچھا۔

”ابھی تو شروع ہی کرنے لگا ہوں۔“ اس نے کہا اور پہلی چابی تالے کو لگائی۔

پہلی چابی تالے میں گھوم کر رہ گئی۔ اس کے بعد اس نے اپنے گچھے کی سب چابیاں لگا کر دیکھ لیں لیکن کامیابی نہ ہوئی۔ اس کے بعد اس نے پرویز کے ہاتھ سے بیگم جمشید والا چابیوں کا گچھا لیا اور اس کی چابیاں آزمانے لگا۔ اب بیگم جمشید اور تینوں بچوں کے چہر پرسکون تھے کیوں کہ وہ جانتے تھے اس گچھے کی کوئی چابی تالے کو نہیں لگے گی۔

”حیرت ہے۔ میری زندگی میں یہ پہلا تالا ہے جو اتنی چابیوں سے بھی نہیں کھلا۔“

”کیا تم سب چابیاں لگا چکے ہو۔“ وزیر نے پوچھا۔

”ہاں! اب ہمیں دروازے کو توڑنا ہی پڑے گا۔“ بہزاد ڈاکو نے کہا۔

”یہ کون سا مشکل کام ہے۔ ابھی توڑے ڈالتے ہیں۔“ پرویز نے کہا۔

”لیکن اس طرح شور پیدا ہو گا۔“ بہزاد نے کہا۔

”پھر کیا کیا جائے؟“

”ہم بھول رہے ہیں۔“ بہزاد ڈاکو مسکرایا۔

”کیا مطلب!“ نہ صرف بہزاد کے ساتھی بلکہ وہ چاروں بھی چونکے۔

”دروازے کو تالا انہوں نے ہی لگایا ہے اور اس تالے کی چابی بھی ضرور انہی کے پاس ہے۔“

”اوہ۔ بات تو ٹھیک ہے۔“

”بس تو پھر ان سے معلوم کرو کہ چابی کہاں ہے اور اگر یہ نہ بتائیں تو انہیں گولیاں مار دو اور ان کے پائیں باغ میں ہی دفن کر دو۔“ بہزاد نے سخت لہجے میں کہا۔

”کہاں ہے چابی؟“ پرویز غرّایا۔

”ابا جان کے پاس۔“ محمود نے جواب دیا۔

”بکو مت۔ تمہیں بتانا پڑے گا۔ ورنہ ہم تمہیں زندہ نہیں چھوڑیں گے۔“ یہ کہتے ہوئے اس نے جیب سے پستول نکال لیا۔

”بہزاد ڈاکو تمہیں حکم دیتا ہے کہ فوراً سے پہلے بتا دو۔ ورنہ میرے اشارہ کرتے ہی تم خون میں تڑپتے نظر آﺅ گے۔“ بہزاد نے قہرآلود آواز میں کہا۔

”ٹھہرو۔ میں بتاتی ہوں۔ چابی پائیں باغ میں ہے۔“ فرزانہ بولی۔

”کیا بکتی ہو۔ چابی کا باغ میں کیا کام؟“ بیگم جمشید غصے سے چلائیں۔

”میں نے وہاں چھپائی تھی۔“

”تو وہ دونوں اس کمرے میں بند ہیں۔“

”ہاں!“ فرزانہ کے منہ سے نکلا اور وہ تینوں فرزانہ کو بُری طرح گھورنے لگے کہ یہ اس نے کیا کیا۔

چکر پر چکر

”یہ تم نے کیا کیا۔ میں تمہیں اپنا دودھ نہیں بخشوں گی۔ تم نے گھر میں پناہ لینے والوں کی حفاظت نہیں کی۔“ بیگم جمشید چلائیں۔

فرزانہ جواب میں خاموش رہی۔ اس کا سرشرم سے جھک گیا تھا۔

”جاﺅ۔ چابی لے کر آﺅ۔ وزیر تم اس کے ساتھ جاﺅ۔“ بہزاد نے کہا۔

”اچھا استاد۔“ وزیر نے فرزانہ کو بازو سے پکڑتے ہوئے کہا۔

فرزانہ نے محمود کی طرف دیکھا اور وزیر کے ساتھ باہر چلی گئی۔

”ہم بازی ہار چکے ہیں امی۔ اب اس کے سوا کوئی چارہ نہیں کہ ہم ان دونوں کو ان کے حوالے کر دیں۔“ محمود نے کہا۔

”تم ٹھیک کہتے ہو۔“ بیگم جمشید بولیں۔

”مسٹر ڈاکو۔ کیا میں پیشاب کر سکتا ہوں؟“

”ہاں ہاں۔ کیوں نہیں۔“ بہزاد نے اپنی کامیابی پر خوش ہوتے ہوئے کہا۔

محمود تیزی سے مڑا اور کمرے کے دوسری طرف آیا۔ اس نے کھڑکی پر تین بار آہستہ آہستہ انگلی ماری۔ کھڑکی فوراً ہی کھل گئی۔ محمود نے ہونٹوں پر انگلی رکھ کر ان کو خاموش رہنے اور باہر آنے کا اشارہ کیا۔ دونوں آواز پیدا کیے بغیر کھڑکی سے باہر آگئے۔ محمود انہیں اپنے کمرے میں لے آیا۔

”آپ دونوں باتھ روم میں چلے جائیں۔ دروازہ اندر سے بند کر لیں۔ اگر دروازہ توڑا جانے لگے تو باتھ روم کا دروازہ دوسرے کمرے میں بھی کھلتا ہے۔ آپ خاموشی سے پہلے کمرے میں جا کر دروازہ اندر سے بند کر دیں۔ ایک بار پھر آپ اسی کمرے میں پہنچ جائیں گے اور باہر پھر سے تالا لگ چکا ہو گا۔“

یہ باتیں اس نے دھیمے لہجے میں کہی تھیں۔ ان کے غسل خانے میں جانے کے بعد وہ کمرے سے باہر نکل آیا اور بہزاد ڈاکو کی طرف بڑھا۔ اسی وقت فرزانہ بھی دوسرے ڈاکو کے ساتھ مکان میں داخل ہوئی۔

”کیوں۔ مل گئی چابی؟“

”ہاں استاد مل گئی۔ کام بن گیا۔“

”بہت خوب۔ لاﺅ چابی مجھے دو۔“

بہزاد نے چابی لی۔ تالے میں لگائی۔ دوسرے ہی لمحے کھٹاک کی آواز کے ساتھ تالا کھل گیا۔ اس نے بے تابی سے دروازہ کھول دیا۔ دروازے میں داخل ہوتے ہی وہ دھک سے رہ گئے۔ کمرہ خالی پڑا ان کا منہ چڑا رہا تھا۔

”یہ کیا۔ کمرہ تو خالی ہے۔“ بہزاد نے کہا۔ وہ سخت حیران تھا۔

”تو آپ کا کیا خیال تھا۔ اس کمرے میں دولت کے انبار لگے ہوں گے۔“

”بکو مت۔ وہ دونوں کہاں ہیں جن کو تم نے پناہ دی تھی؟“

”ہم نے کسی کو بھی پناہ نہیں دی تھی۔“

”تو پھر اس کمرے کو تالا کیوں لگایا تھا؟ چابی پائیں باغ میں کیوں چھپائی تھی؟“

”ہمارے ابا جان کا حکم ہے کہ کمرہ کسی کو نہ دیکھنے دیا جائے۔“ محمود نے بات بنائی۔

”تم جھوٹ بولتے ہو۔ وہ دونوں ضرور اس کمرے میں تھے۔“

”تو پھر ڈھونڈ لو۔ کہاں گئے وہ دونوں۔“ فاروق نے تنگ آکر کہا۔

تینوں بدمعاشوں نے ایک بار پھر غصے کے عالم میں تلاشی شروع کی یہاں تک کہ وہ ان کے کمرے میں داخل ہوئے۔ وزیر نے آگے بڑھ کر باتھ روم کا دروازہ دھکیلا۔ دروازہ ٹس سے مس نہ ہوا تو وہ چونک اٹھا۔

”غسل خانے کا دروازہ اندر سے بند ہے۔“ اس نے کہا۔

”کیا؟ بند ہے۔ کون ہے اندر؟ یہ چاروں تو ہمارے پاس کھڑے ہیں۔“

”میں کہہ چکی ہوں۔ مکان آسیب زدہ ہے۔ ضرور کسی آسیب نے دروازہ اندر سے بند کر لیا ہو گا۔“

”نہیں۔ اندر وہی دونوں ہیں۔ دروازہ توڑ دو۔“ بہزاد ڈاکو نے کہا۔

”تم کیسے ڈاکو ہو۔ جو موت کی بجائے دو انسانوں کو پکڑنا چاہتا ہے۔ آخر کیا کرو گے تم ان دونوں کو پکڑ کر۔“ محمود نے کہا۔

”چلو۔ دروازہ توڑو۔“

وزیر نے پیچھے ہٹ کر دروازے پر کندھا مارا۔ ایک زوردار آواز کمرے میں گونجی۔ اسی طرح اس نے دس بارہ مرتبہ کندھا دروازے پر مارا۔ جب دروازہ نہ ٹوٹا تو اس کے ساتھ پرویز بھی شامل ہو گیا۔ اب بیک وقت دو آدمی دروازے پر ٹکریں مار رہے تھے۔ آخر کب تک۔ دروازہ ٹوٹ کر اندر کی طرف جا گرا۔

تینوں بدمعاش ایک ساتھ اندر داخل ہوئے۔ یہ دیکھ کر ان کی حیرت کی کوئی انتہا نہ رہی کہ اندر کوئی نہیں تھا۔

”کمال ہے۔ یہاں تو کوئی بھی نہیں ہے۔“ وزیر نے حیرت کے عالم میں کہا۔

”تو پھر دروازہ اندر سے کس نے بند کیا۔“ بہزاد نے پوچھا۔

”کہیں واقعی یہ مکان آسیب زدہ تو نہیں ہے۔“ پرویز بولا۔

”کیا بکتے ہو؟“ ارے۔ اس دوسرے دروازے کو دیکھو۔“

پرویز اور وزیر دوسرے دروازے کی طرف جھپٹے۔ یہ دروازہ بھی دوسری طرف سے بند تھا۔ تینوں چکرا کر رہ گئے۔ دوڑتے ہوئے باہر نکلے اور اس کمرے کے دروازے کی طرف آئے جس میں تھوڑی دیر پہلے پروفیسر داﺅد اور ان کی بیٹی بند تھے اور جس کے دروازے پر تالا لگا ہوا تھا۔

یہ دیکھ کر ان کی حیرت کا کوئی ٹھکانہ نہ رہا کہ دروازہ اس مرتبہ اندر سے بند تھا۔

٭……..٭

نیا محاذ

”اور اب وہ دونوں بچ کر کہاں جائیں گے؟“ بہزاد نے ہنس کر کہا۔ ”اب ہم اس کمرے کا دروازہ توڑیں گے۔ پھر تم انہیں کیسے بچاﺅ گے؟“

چاروں چکرا گئے کیوں کہ اب پروفیسر اور شائستہ کو بچانے کا کوئی راستہ نظر نہیں آرہا تھا۔

”وزیر تم غسل خانے کے دروازے پر پہنچ جاﺅ۔ پستول ہاتھ میں رکھنا۔ پروفیسر نکل کر بھاگنے نہ پائے۔ ہم ادھر سے دروازہ توڑ کر اندر داخل ہوں گے۔“

”اچھا استاد۔“ وزیر نے کہا اور محمود، فاروق کے کمرے کی طرف چلا گیا۔ 

”استاد۔ دروازہ بہت مضبوط ہے۔“ پرویز بولا۔

”پروا نہیں۔ میں نے بھی بڑے بڑے دروازے توڑ ڈالے ہیں۔“ بہزاد نے کہا اور دونوں مل کر دروازے پر ٹکریں مارنے لگے۔

چاروں حد درجے فکر مند نظر آرہے تھے۔ ان کے ذہنوں میں اس وقت بار بار یہی سوال گونج رہا تھا۔ کیا دروازہ ٹوٹ جائے گا اور یہ لوگ پروفیسر کو پکڑ کر لے جائیں گے۔ اگر ایسا ہو گیا تو ہم ابا جان کو منہ دکھانے کے قابل نہیں رہیں گے۔“

ان خیالات کے ساتھ ہی انہوں نے ایک دوسرے کی طرف دیکھا۔ محمود نے فاروق کی طرف دیکھا اور اس نے محمود کی طرف۔ دونوں نے آنکھوں ہی آنکھوں میں ایک انوکھا پروگرام بنایا۔

بہزاد ڈاکو اور پرویز دروازے پر ٹکر مارنے کے لیے پیچھے ہٹ رہے تھے۔ محمود اور فاروق ایک دوسرے کے سامنے کھڑے ہو گئے۔ ان کے درمیان میں سے بہزاد اور پرویز کو دوڑتے ہوئے دروازے تک جانا تھا۔ جونہی انہوں نے دوڑنا شروع کیا۔ محمود اور فاروق تیار ہو گئے۔ دونوں ان کے پاس پہنچے تو اچانک انہوں نے اپنی ایک ٹانگ آگے نکال دی۔ بہزاد اور پرویز منہ کے بل زمین پر آرہے۔ اسی وقت فرزانہ نے بجلی کی سی پھرتی سے گرے ہوئے بہزاد کی جیب میں سے پستول نکال لیا۔

”خبردار! اپنی جگہ لیٹے رہو۔ حرکت نہ کرنا۔ محمود تم دوسرے کا پستول بھی نکال لو۔“ وہ بولی۔

محمود نے دوسرے ساتھی کا پستول نکالنے میں دیر نہیں لگائی۔ جونہی وہ پستول نکال کر پیچھے ہٹا، بہزاد اور اس کا ساتھی اٹھ کھڑے ہوئے۔

”میں نے تم سے کہا تھا کہ اپنی جگہ سے حرکت نہ کرنا۔“ فرزانہ بولی۔

”تم۔ تم ننھے بچے پستول چلانا کیا جانو۔ لاﺅ پستول ہمارے حوالے کر دو۔“ بہزاد بے خوفی سے فرزانہ کی طرف قدم اٹھاتا ہوا بولا۔ اس کا ساتھی محمود کی طرف بڑھ رہا تھا۔

”خبردار۔ آگے نہ بڑھنا۔ ورنہ ہم گولی چلا دیں گے۔“ محمود نے گھبرا کر کہا۔

”تم گولی چلاﺅ گے۔ کبھی خواب میں بھی گولی چلائی ہے۔“ بہزاد ڈاکو ہنسا۔

”ہم گولی چلا سکتے ہیں۔“ فرزانہ نے اکڑ کر کہا۔

”تو پھر چلاﺅ۔ چلاتے کیوں نہیں؟“

”تم پر رحم آرہا ہے۔ اتنا بڑا ڈاکو اور چھوٹے چھوٹے بچے اسے ہلاک کر دیں۔“ فاروق ہنسا۔

”تم ننھے منے کیڑے مجھے ہلاک نہیں کر سکتے۔“ بہزاد برابر آگے بڑھا آرہا تھا۔

”اللہ تعالیٰ چاہے تو چیونٹی سے ہاتھی کو ہلاک کرا دے۔“فرزانہ بولی۔

”بہت خوب۔ تو تم چیونٹیاں ہو۔“

”ہم انسان ہیں۔“ فاروق نے بُرا سا منہ بنا کر کہا۔

اب بہزاد اور اس کا ساتھی ان دونوں سے تین چار قدم کے فاصلے پر رہ گئے تھے۔ محمود اور فرزانہ کی انگلیاں اپنے اپنے پستول کے ٹرائیگر پر تھیں۔ دونوں پستول کی نالیں ان کی طرف اٹھی ہوئی تھیں۔ اب محمود اور فرزانہ کے پاس دو راستے تھے۔ ایک تو یہ کہ وہ ان دونوں پر گولی چلا دیں کیوں کہ اسی صورت میں پروفیسر بچ سکتے تھے۔ دوسرے یہ کہ وہ ان دونوں کو یہ یقین دلا دیں کہ وہ پستول چلانا جانتے ہیں۔ اس صورت میں ڈاکوﺅں کے اٹھتے قدم رک جاتے۔ اس کا ایک فائدہ اور بھی ہوتا۔ لہٰذا محمود نے دوسرا راستہ اختیار کیا۔ وہ اچانک بولا۔

”ٹھہرو۔ شاید تم یہ سمجھ رہے ہو کہ ہم دونوں پستول چلانا نہیں جانتے ہوں گے۔“

”ہاں۔ اس میں کیا شک ہے۔“

”لیکن ہمیں پستول چلانا آتا ہے۔“

”یہ بکواس ہم ماننے کو تیار نہیں۔ تم ہمیں ڈرانا چاہتے ہو۔“

”اچھا تو سنو۔ یہ انسپکٹر جمشید کا گھر ہے۔“ محمود نے پُرسکون آواز میں کہا۔

”کیا کہا۔ انسپکٹر جمشید کا۔“ بہزاد اور اس کا ساتھی حیران رہ گئے۔

”ہاں! ہم انسپکٹر جمشید کے بچے ہیں۔ تمہیں بتا دوں۔ میرا نام محمود ہے، یہ فرزانہ ہے اور یہ صاحب فاروق ہیں، یہ ہماری امی ہیں۔ اب اگر تم نے ایک قدم بھی آگے بڑھایا تو بغیر جھجک کے گولی مار دیں گے۔“

دونوں کے منہ کھلے کے کھلے رہ گئے۔ انہوں نے انسپکٹر جمشید کے ساتھ ساتھ ان کے بچوں کے کارناموں کا حال اکثر اخبارات میں پڑھا تھا۔ دوسری طرف محمود نے انہیں ڈرا کر دوہرا فائدہ اٹھایا تھا۔ اگر وہ ان پر فائر کر دیتے تو بہزاد ڈاکو کے دوسرے دو ساتھیوں کو علم ہو جانا لازمی تھا اور پھر صورتِ حال اور بھی خطرناک ہو جاتی۔ اچانک فاروق کو ایک خیال آیا۔ اس نے بیگم جمشید سے کہا۔

”امی! آپ میرے ساتھ آئیے۔ یہاں کے لیے محمود اور فرزانہ ہی کافی ہیں۔

٭……..٭

پروفیسر داﺅد اور ڈاکوﺅں کی کار سے تھوڑے فاصلے پر ایک سفید رنگ کی کار کھڑی تھی۔ اس کا دروازہ کھلا۔ اس میں سے سیاہ کپڑوں میں ملبوس ایک شخص نکلا اور سڑک پر چلنے لگا۔ یہاں تک کہ وہ ایک پبلک فون بوتھ میں داخل ہوا۔ اس نے کسی کے نمبر ملائے اور انگریزی زبان میں کہا۔

”ہیلو! کون صاحب؟“

”تم کون ہو؟“ دوسری طرف سے پوچھا گیا۔

”جیری۔“

”تب تم نے ٹھیک نمبر پر فون کیا ہے۔ کیا رپورٹ ہے؟“

”بہزاد نے پروفیسر کا تعاقب گھر سے نکلتے ہی شروع کر دیا تھا۔ پروفیسر اپنی بیٹی کے ساتھ بازار گیا۔ وہاں اس نے کچھ چیزیں خریدیں۔ واپسی پر اسے تعاقب کا علم ہو گیا۔ وہ اندھا دھند بھاگ کھڑا ہوا۔ بہزاد کی کار بدستور اس کے تعاقب میں رہی۔ پروگرام یہی تھا کہ پروفیسر کو گھر سے باہر نکل جانے پر مجبور کیا جائے لیکن اچانک پروفیسر نے کار ایک سڑک پر موڑ دی۔ میں بہزاد کی کار کے پیچھے رہا جیسا کہ حکم دیا گیا تھا۔“

”تم نے ٹھیک کیا۔ آگے بتاﺅ۔ پھر کیا ہوا؟“ دوسری طرف سے بے چینی سے پوچھا گیا۔

”پروفیسر نے اچانک اپنی کار سڑک سے اتار کر کھڑی کر دی اور ایک طرف بھاگ کھڑا ہوا۔ اس کی بیٹی اس کے ساتھ تھی۔ پھر بہزاد اور اس کے ساتھی بھی کار سے اترے اور اس کے پیچھے بھاگے۔ میں نے ان دونوں کو ایک بڑے سے مکان کے بیرونی دروازے میں داخل ہوتے دیکھا تھا۔ پھر بہزاد اور اس کے ساتھی بھی اس میں داخل ہو گئے اور۔“

”اور کیا؟“

”اور اب انہیں اندر گئے تقریباً آدھ گھنٹہ ہو گیا ہے، وہ باہر نہیں نکلے۔“

”کیا مطلب؟“

”بہزاد اور اس کے ساتھی مکان سے باہر نکلتے ہوئے نہیں دیکھے گئے۔“

”اور پروفیسر۔“

”وہ بھی نہیں نکلے۔“

”کمال ہے۔ یہ لوگ اندر کیا کر رہے ہیں؟ اور دونوں کاریں؟“

”وہ اسی طرح سڑک کے کنارے کھڑی ہیں۔“

”ہوں! تو تم اندر جا کر حالات کا جائزہ لے سکتے ہو۔“

دوسری طرف سے کہا گیا۔

”جی بہتر۔ لیکن میں آپ کو ایک بات اور بتانا چاہتا ہوں۔“

”کیا؟“

”جہاں تک میری معلومات کا تعلق ہے۔ یہ مکان انسپکٹر جمشید کا ہے۔“

”کیا!“ دوسری طرف سے حلق پھاڑ کر پوچھا گیا۔

”جی ہاں!“

”کیا بہزاد کو اس بات کا علم نہیں تھا۔“

”میرا خیال ہے وہ نہیں جانتا تھا۔“

”یہ تو بہت بُرا ہوا۔ اگر بہزاد کو پکڑا گیا تو ہمارا راز فاش ہو جائے گا۔ اب تم اندر مت جانا۔ اسی جگہ ہمارا انتظار کرو ہم پہنچ رہے ہیں۔“

٭……..٭

انوکھے وار

فاروق اپنے کمرے میں داخل ہوا۔ یہاں وزیر غسل خانے کے دروازے پر موجود تھا۔ وہ اسے اندر داخل ہوتے دیکھ کر چونکا۔ اس کا پستول فاروق پر تن گیا۔

”کیوں۔ تم یہاں کیوں آئے ہو۔ کیا بات ہے؟“

”بہزاد نے تمہیں بلایا ہے۔ انہوں نے پروفیسر اور اس کی لڑکی کو پکڑ لیا ہے۔“

”کیا۔ پکڑ لیا ہے؟“

”ہاں۔“

”کیا دروازہ ٹوٹ گیا تھا۔“

”ہاں!“

”چلو۔ تم نے بہت بڑی خوشخبری سنائی ہے۔ اس کام کے بدلے میں ہمیں ہزاروں روپے ملیں گے۔“ وزیر خوش ہو کر بولا۔

دونوں کمرے کے دروازے کی طرف چلے فاروق اس کے پیچھے تھا۔

”میرے آگے چلو۔“ وزیر نے کہا۔

”مجھے تمہارے اس پستول سے ڈر لگتا ہے۔ کہیں چل گیا تو؟“

”ارے! اب اس کی ضرورت نہیں۔ میں اسے جیب میں رکھ لیتا ہوں۔“ وزیر نے کہا اور پستول جیب میں رکھ لیا۔

فاروق اس کے آگے آگیا اور چلتا ہوا کمرے سے باہر نکل آیا۔ باہر نکلنے سے پہلے وہ کھانسا بھی تھا۔ اس کے پیچھے وزیر باہر نکلا۔ ساتھ ہی اس کے سرپر کوئی چیز پورے زور سے مار دی گئی۔ وہ تیورا کر گرا۔ اس کے حلق سے آواز تک نہ نکل سکی۔

”بہت خوب امی۔ آپ نے بہت شاندار ہاتھ مارا۔“ فاروق نے دیوار کے ساتھ لگی کھڑی اپنی امی سے کہا۔ ان کے ہاتھ میں ہاکی سٹک تھی۔

”میں نے زندگی میں پہلی مرتبہ کسی کو اس طرح زخمی کیا ہے۔“ بیگم جمشید نے گھبرا کر کہا۔

”لیکن یہ بہت ضروری تھا امی۔“

”ہاں! اب کیا کرنا چاہیے۔“

”پہلے اسے رسی سے باندھ دینا چاہیے۔“

”اچھا۔ میں رسی لاتی ہوں۔“

دونوں نے مل کر اس کے ہاتھوں او رپیروں کو رسی سے جکڑ دیا۔ اس کے بعد وہ بیرونی دروازے کی طرف بڑھے۔ یہاں اسرار موجود تھا۔ فاروق باہر نکل آیا۔

”تمہیں بہزاد نے بلایا ہے۔“

”اچھا۔“

وہ پوچھے تاچھے بغیر ہی اندر گھس گیا۔ اسے تو اندر پیش آنے والے واقعات کی خبر ہی نہیں تھی۔ جونہی وہ اندر داخل ہوا، ہاکی سٹک نے اس کا مزاج پوچھا اور وہ بھی فرش پر ڈھیر ہو گیا۔ انہوں نے مل کر اسے بھی باندھا اور گھسیٹ کر ایک طرف ڈال دیا۔

”اب آپ یہیں ٹھہریں۔ میں بھی اپنے کمرے سے ہاکی سٹک لے آﺅں۔“ فاروق نے کہا۔

٭……..٭

محمود اور فرزانہ الجھن میں تھے۔ ان کی سمجھ میں نہیں آرہا تھا کہ وہ کب تک ان دونوں پر پستول اٹھائے کھڑے رہیں گے۔ وہ سوچ سوچ کر پریشان ہو رہے تھے کہ فاروق اور امی کہاں چلے گئے۔ نہ جانے ان کے ساتھ کیا بیتی۔ اچانک ان دونوں نے دیکھا کہ بہزاد ڈاکو اور اس کا ساتھی پرویز آہستہ آہستہ سرکتے ہوئے ان سے کافی نزدیک آچکے تھے۔ یہ سب کچھ بے خبری میں ہوا تھا لیکن خطرے سے پہلے ہی وہ سنبھل گئے۔

”آگے مت بڑھو۔ تم جانتے ہی ہو، تمہاری گرفتاری پہلے ہی پولیس والوں کے لیے پریشانی کا باعث بنی ہوئی ہے۔“محمود نے انہیں روکنے کے لیے کہا۔

”ہم تمہارے ساتھ ایک سوا کرنے کے لیے تیار ہیں۔“ بہزاد ڈاکو نے کہا۔

”کیسا سودا؟“

”تم ہمیں یہاں سے جانے دو۔ ہم تمہیں کچھ نہیں کہیں گے، اور تم اگر ان دونوں باپ بیٹی کو ہمارے حوالے کر دو تو ہم تم کو نقدی کی صورت میں کئی ہزار روپے پیش کرسکتے ہیں۔“

”بہت خوب! شاید تم نہیں جانتے، وہ باپ بیٹی کون ہیں۔“ فرزانہ نے کہا۔

”جانتے ہیں۔ وہ ایک پروفیسر ہے۔“

”پروفیسر داﺅد؟“ فرزانہ نے مسکرا کر کہا۔

”ارے! تم اسے جانتے ہو؟“

”ہم تینوں انہیں انکل کہتے ہیں۔ وہ ہمارے والد کے دوست ہیں۔“

”اوہ!“ بہزاد حیران رہ گیا۔

”اس صورت میں تم سوچ سکتے ہو کہ ہم انہیں کسی قیمت پر تمہارے حوالے نہیں کرسکتے۔“

”تو ہمیں جانے دو۔“

”کیوں؟ اب حالات ہمارے قابو میں ہیں۔“

”ابھی میرے دو ساتھی باہر موجود ہیں۔ وہ ادھر نکل آئے تو تمہارا بچنا مشکل ہو جائے گا۔“

”وہ ادھر آئیں گے تو ہم ان سے بھی سمجھ لیں گے۔ تم فکر نہ کرو۔“

”تمہاری مرضی۔“ بہزاد ڈاکو نے شانے اُچکائے۔

اسی وقت محمود اور فرزانہ نے فاروق اور امی کو دبے پاﺅں بہزاد اور اس کے ساتھی کی طرف بڑھتے دیکھا۔ وہ گھبرا گئے۔ ان دونوں کے ہاتھوں میں ہاکی سٹکیں تھیں۔ ان کے دل دھک دھک کرنے لگے۔ ایسے میں فرزانہ نے سوچا کہ انہیں باتوں میں لگائے رکھنا چاہیے تاکہ یہ پیچھے مڑ کر نہ دیکھنے پائیں۔ وہ فوراً بولی۔

”ویسے محمود! اگر ہم ان کی پہلی بات مان لیں تو۔“

”کیا مطلب؟“ محمود نے غصے سے کہا۔ وہ فرزانہ کا مطلب سمجھ گیا تھا۔

”میرا مطلب یہ ہے کہ ہم انہیں جانے دیں تو اس کے بدلے میں یہ ہمیں کیا دیں گے؟“

”اس کے بدلے میں ہم تمہیں کچھ نہیں دے سکتے۔ البتہ اگر تم پروفیسر داﺅد کو ہمارے حوالے کردو تو ہم تمہیں پانچ ہزار روپے اسی وقت دے سکتے ہیں۔“

”ارے! بس صرف پانچ ہزار؟“ فرزانہ نے مذاق اڑانے والے انداز میں کہا۔

”چلو سات ہزار لے لو۔“

”میں تو تھوکتی ہوں ایسے سات ہزار پر۔ محمود تم کیا کہتے ہو۔“ فرزانہ نے کہا۔

”میں تو تھوکنا بھی پسند نہیں کرتا۔“

”دس ہزار؟“ بہزاد نے بولی دینے والے انداز میں کہا۔

”ناممکن!“ محمود کے منہ سے نکلا۔

”بیس ہزار؟“

”توبہ کرو۔“ فرزانہ بولی۔

”ایک لاکھ کھرب کی بات کرو تو ہم یہ سوچیں گے کہ۔“محمود کہتے کہتے رک گیا۔

”کیا سوچو گے تم؟“ فرزانہ نے غصیلے لہجے میں کہا۔

”کہ ہمارے چچا کی اس قدر کم قیمت لگانے پر ان دونوں کو کیا سزا دی جائے۔“ محمود نے مسکرا کر بات مکمل کی۔

”بہت خوب۔ یہ ہوئی نہ بات۔ بھلا کوئی چچا کو بھی بیچتا ہے۔“

”ڈاکو لوگ بیچتے ہوں گے؟“

”بکو مت۔“ بہزاد غصے سے چلایا۔

”بہت اچھا۔ آپ ہی سودا کرنے کے لیے کہہ رہے تھے۔“

”میں جانتا ہوں۔ تم سودا دو۔“

اس کے الفاظ درمیان میں ہی رہ گئے۔ اسی وقت دونوں کے سروں پر ہاکی سٹکیں پوری قوت سے پڑی تھیں۔

”خس کم جہاں پاک۔“ فاروق نے ہاتھ جھاڑتے ہوئے کہا۔

٭……..٭

انسپکٹر جمشید کی آمد

سخت سردیوں کے موسم میں شام کے آٹھ بجے ہی یوں لگنے لگتا ہے جیسے رات آدھی سے زیادہ بیت گئی ہو۔ انسپکٹر جمشید کو تفتیش کے کام سے فارغ ہونے کے بعد کچھ ایسا ہی محسوس ہوا۔ وہ اپنی موٹرسائیکل پر سوار ہوتے وقت سوچ رہے تھے کہ شاید سب بچے سوچکے ہوں اور صرف ان کی بیگم انتظار کررہی ہوں گی۔ جونہی انہوں نے موٹرسائیکل سٹارٹ کی، تیز ہوا ان کے جسم سے ٹکرائی، وہ کپکپا اُٹھے۔ انہوں نے بائیں ہاتھ سے کوٹ کے کالر کھڑے کرلیے۔

اب وہ پوری رفتار سے گھر کی طرف اڑے جارہے تھے۔ وہ بھوکے بھی تھے اور جلد سے جلد گھر پہنچ جانا چاہتے تھے۔ گھر کی سڑک پر مڑتے ہی انہیں اپنے گھرسے چند قدم کے فاصلے پر دو کاریں نظر آئیں۔ انہوں نے پہلے تو ان کی طرف کوئی دھیان نہ دیا لیکن قریب پہنچنے پر وہ پروفیسر داﺅد کی کار دیکھ کر کھٹکے۔ پھر ان کی نظر کار کے نمبر پر پڑی تو انہیں معلوم ہوگیا کہ کار پروفیسر کی ہی ہے۔ وہ سوچ میں پڑ گئے کہ اس وقت پروفیسر داﺅد کا یہاں کیا کام۔

وہ موٹر سائیکل مکان کے بیرونی دروازے تک لیتے چلے گئے۔ انہوں نے موٹر سائیکل کا انجن بند کیا اور نیچے اتر آئے۔ دروازہ دھکیل کر دیکھا تو وہ کھلا ہوا تھا۔ وہ دبے پاﺅں اندر داخل ہوگئے۔ چند قدم آگے بڑھے ہوں گے کہ چونک اٹھے۔ کوئی شخص رسیوں سے بندھا فرش پر پڑا تھا۔ انہوں نے جھک کر اسے دیکھا، وہ ہوش میں تھا۔ اس کے منہ پر بھی ایک کپڑا بندھا تھا۔ انہوں نے منہ سے کپڑا ہٹایا اور پوچھا۔

”کون ہو تم اور یہاں کیوں بندھے پڑے ہو؟“ وہ حیران تھے۔

”میں…. مم…. میں۔“ وہ ہکلایا۔

”ہاں! کون ہوتم اور یہاں کیسے پہنچے؟“

بندھا ہوا شخص خاموش رہا۔ شاید وہ اپنے بارے میں کچھ بتانا نہیں چاہتا تھا۔ انسپکٹر جمشید نے وقت ضائع کرنا مناسب نہ سمجھا اور اس کے منہ پر کپڑا باندھ کر آگے بڑھے۔ ان کی حیرت کی کوئی انتہا نہ رہی جب انہوں نے ایک اور آدمی کو بندھا ہوا پایا۔

”یا الٰہی خیر! یہ کیا ماجرا ہے۔ یہ میرا گھر ہے یا کوئی غنڈوں کا اکھاڑہ۔“ وہ دل ہی دل میں بڑبڑائے۔

آگے جانے سے پہلے وہ محمود اور فاروق کے کمرے میں گھس گئے۔ ایک بار پھر انہیں زبردست جھٹکا لگا۔ ان کی آنکھیں پھٹی کی پھٹی رہ گئیں۔ منہ کھلا کا کھلا رہ گیا۔ غسل خانے کا دروازہ ٹوٹا پڑا تھا۔

”یا اللہ! یہ سب کیا ہے۔ معلوم ہوتا ہے یہاں باقاعدہ جنگ ہوئی ہے۔“

اب وہ کمرے سے نکل کر اندرونی حصے کی طرف بڑھے۔ ایک کمرے سے انہیں باتیں کرنے کی آواز آئی۔ کمرے کا دروازہ بند نہیں تھا۔ ایک طرف کھڑے ہوکر غور سے اندر ہونے والی گفتگو سننے لگے۔

”بھئی میں تو مان گیا۔ آج تک ان کے کارناموں کے متعلق سنا یا پڑھا تھا۔ آج سب کچھ اپنی آنکھوں سے دیکھ لیا۔“ یہ پروفیسر داﺅد کی آواز تھی۔ انسپکٹر جمشید سمجھ گئے محمود فاروق اور فرزانہ نے آج پھر کوئی معرکہ مارا ہے۔

”اب ہمیں اور شرمندہ نہ کریں انکل۔“ محمود کی آواز آئی۔

”تم شرمندہ ہونا بھی جانتے ہو؟“ فرزانہ نے حیران ہوکر کہا۔

”جی نہیں۔ وہ تو بس تمہیں ہی آتا ہے۔“

”تمہارا آج کا کارنامہ سنہری لفظوں میں لکھنے کے قابل ہے۔“

”لیکن انکل سنہری روشنائی کہاں سے آئے گی؟“ فاروق نے مذاق میں کہا۔

”میں بناﺅں گا تمہارے لیے سنہری روشنائی۔“ پروفیسر کے ہنسنے کی آواز آئی۔

”ویری گڈ انکل۔ اچھا اس خوشی کے موقع پر آپ ہمیں کوئی ننھا منا ہتھیار بھی بنا کر دیں گے یا نہیں۔“

”کیوں نہیں۔ میں تم تینوں کو تین حیرت انگیز چیزیں بنا کر دوں گا۔“

”بھئی واہ! خدا ایسے انکل ہر ایک کو دے۔“ فرزانہ نے غیرارادی طور پر کہا۔

”ایسی دعا نہ مانگو۔“ فاروق بولا۔

”کیوں؟“ محمود اور فرمانہ نے بیک وقت حیران ہوکر پوچھا۔

”ملک میں سائنس دان ہی سائنس دان ہو جائیں۔“

”ہاں! یہ بھی ٹھیک ہے۔“ وہ سب ہنس پڑے۔

”اچھا فرزانہ پہلے یہ بتاﺅ۔ تم نے ایک دم چابی کے متعلق کیوں بتا دیا تھا۔“ بیگم جمشید نے کہا۔

”ہاں! ہمیں تم پر بہت غصہ آیا تھا۔“ محمود بول اُٹھا۔

”اس وقت بہزاد نے ہمیں قتل کرنے کی دھمکی دی تھی اور میں نے اس کی آنکھوں میں ایک خوف ناک چمک دیکھی تھی۔ اس چمک نے مجھے فوراً یہ کہا کہ یہ شخص اپنے حکم کی فوراً تعمیل کرانے والا ہے۔ اس لیے میں نے جھٹ چابی کا پتا بتا دیا۔ کیوں کہ چابی ان کے حوالے کر دینے کے بعد بھی کچھ کرنے کے بہت مواقع تھے۔“

”بہت خوب۔ میرا خیال ہے اس نے ٹھیک ہی کیا۔“ انسپکٹر جمشید نے کمرے میں داخل ہوتے ہوئے کہا۔

وہ سب انہیں دیکھ کر چونک اُٹھے۔

”ارے! تم کب آئے۔“ پروفیسر بولے۔

”ابھی تھوڑی دیر پہلے۔ میں تم لوگوں کی باتیں سن چکا ہوں۔ پہلے یہ بتاﺅ۔ تم کس بہزاد کا ذکر کررہے تھے۔“ انہوں نے پوچھا۔

”بہزاد ڈاکو کا۔“

”کیا کہا۔ بہزاد ڈاکو۔“

”جی ہاں! وہ انکل کو اغوا کرکے لے جانا چاہتا تھا۔“

”اوہ!“

پھر پروفیسر نے پوری تفصیل سے انہیں بتایا کہ کیسے وہ یہاں تک پہنچے۔ اسی کے بعد کی کہانی کا کچھ حصہ محمود اور فرزانہ نے سنایا اور کچھ حصہ فاروق اور بیگم جمشید نے۔

”وہ دونوں اب کہاں ہیں؟“ انسپکٹر جمشید نے ساری کہانی سننے کے بعد پوچھا۔

”آپ کے کمرے میں بندھے پڑے ہیں۔“ بیگم جمشید نے بتایا۔

”مجھے یقین نہیں آتا کہ بہزاد ڈاکو کو گرفتار کیا جاچکا ہے۔“ انسپکٹر جمشید بولے۔

”کیا آپ اسے پہچانتے ہیں؟“ محمود نے پوچھا۔

”نہیں۔ یہی تو مصیبت ہے۔ اس کی وجہ یہی ہے کہ اس کا آمنا سامنا کسی پولیس افسر سے نہیں ہو سکا۔ ہمارے ریکارڈ میں بھی اس کی کوئی تصویر نہیں ہے۔ یہی وجہ ہے کہ وہ آج تک پکڑا نہیں جا سکا اور آج تم کہہ رہے ہو کہ تم نے بہزاد ڈاکو کو پکڑ لیا ہے۔“

”تو پھر چل کر دیکھ لیں۔ اس کے ساتھیوں سے سوالات کرنے سے سب کچھ معلوم ہوسکتا ہے۔“

”ہاں ٹھیک ہے۔ چلو۔ لیکن نہیں۔ ٹھہرو۔ ہم ایک ضروری کام تو بھول ہی گئے۔“انسپکٹر جمشید نے کہا۔

”وہ کیا؟“ پروفیسر داﺅد بولے۔

”کیا کسی نے پولیس کو فون کیا ہے۔“

”اوہ! نہیں۔“ محمود کے منہ سے نکلا۔

”حالاں کہ یہ سب سے ضروری تھا۔“

”تو میں ابھی فون کر دیتا ہوں جا کر۔“ محمود نے کہا۔

”ہاں! تم جاﺅ جا کر فون کر آﺅ۔ ہم بہزاد ڈاکو سے بات کرتے ہیں۔“ محمود گھر سے باہر نکل کر شیرازی صاحب کے گھر چلا گیا اور انسپکٹر جمشید دوسرے لوگوں کے ساتھ اس کمرے میں داخل ہوئے جس میں بہزاد ڈاکو موجود تھا۔ وہ اور اس کا ساتھی رسیوں سے بندھے پڑے تھے۔ ان کے سروں سے خون بہہ کر چہرے پر جم گیا تھا۔

”کیا تم بہزاد ڈاکو ہو؟“

بہزاد ڈاکو خاموش رہا۔ اگر وہ اقرار کرلیتا تو ساری عمر کے لیے جیل چلا جاتا۔ اس لیے وہ کیسے اپنے منہ سے کہہ سکتا تھا۔ اس کے خاموش رہنے پر انسپکٹر جمشید نے پرویز سے سوال کیا۔

”کیا تمہارا یہ ساتھی بہزاد ڈاکو ہے۔“

وہ بھی خاموش رہا۔ انسپکٹر جمشید تھوڑی دیر تک کچھ سوچتے رہے پھر کمرے سے نکل آئے۔ ان کے پیچھے دوسرے بھی نکل آئے۔

”یہ تو مشکل ہی اقرار کرے گا۔“ فرزانہ بولی۔

”ہاں! لیکن یہ ہے بہزاد ڈاکو ہی۔“ انسپکٹر جمشید نے کہا۔

”یہ کیسے کہہ سکتے ہیں آپ؟“ بیگم جمشید نے پوچھا۔ دوسرے بھی انہیں سوالیہ نظروں سے دیکھ رہے تھے۔

”اگر یہ بہزاد ڈاکو نہ ہوتا تو فوراً کہتا۔ میں بہزاد ڈاکو نہیں ہوں۔ لیکن یہ میرے سوال کے جواب میں خاموش رہا، جس کا مطلب یہ ہے کہ یہ بہزاد ڈاکو ہی ہے۔“

”لیکن سوال یہ ہے کہ تم اسے کیسے ثابت کرو گے۔“ پروفیسر داﺅد نے سوال کیا۔

”ابھی ثابت کیے دیتا ہوں۔ یہ کون سا مشکل کام ہے۔“

”آخر کیسے؟“ فاروق نے پوچھا۔

”بس دیکھتے جاﺅ۔“

وہ سب بہزاد ڈاکو کے اس ساتھی کے پاس آئے جو دروازے پر بندھا پڑا تھا۔ انسپکٹر جمشید نے اس کے منہ سے کپڑا ہٹایا۔

”تم کس کے ساتھ ہو؟“

”کیا مطلب؟“ اس نے حیران ہوکر پوچھا۔

”تمہارے گروہ کے سردار کا کیا نام ہے؟“

”کیوں؟ آپ کیوں پوچھ رہے ہیں؟“ اس نے پوچھا۔

”اس لیے کہ تمہارے تینوں ساتھی مارے جاچکے ہیں۔“ انسپکٹر جمشید نے اچانک کہا۔

”کیا کہا۔ مارے جاچکے ہیں؟“ اس کا منہ کھلا کا کھلا رہ گیا۔

”ہاں! صرف تم ہی بچے ہو۔ تمہارے سامنے اس وقت انسپکٹر جمشید کھڑا ہے۔ یہ میرا ہی مکان ہے۔ تم نے کسی عام آدمی کے مکان پر چڑھائی نہیں کی تھی۔ مکان اس وقت پولیس کے گھیرے میں ہے۔ تمہارے تینوں ساتھی فرار کی کوشش کرتے ہوئے ہلاک ہوچکے ہیں۔ لہٰذا تمہارے لیے بہتر یہی ہے کہ سچ سچ بتا دو کہ تمہارے گروہ کا سردار کون تھا۔“

”بہزاد ڈاکو۔“ اس نے پریشان ہوکر کہا۔

انسپکٹر جمشید مسکرائے۔

”اسے میرے کمرے میں بند کردینا چاہیے۔“ انہو ںنے کہا۔

پروفیسر داﺅداور انسپکٹر جمشید نے مل کر اسے اٹھایا اور کمرے میں ڈال کر دروازہ بند کردیا۔

اب وہ دوسرے قیدی کی طرف بڑھے جو محمود اور فاروق کے کمرے کے دروازے کے پاس بندھا پڑا تھا۔ جلد ہی اس نے بھی یہ اقرار کرلیا کہ وہ بہزاد ڈاکو کا ساتھی ہے۔

٭….٭….٭

محمود نے شیرازی صاحب کے دروازے پر دستک دی۔ دروازہ بیگم شیرازی نے کھولا۔

”السلام علیکم آنٹی!“

”وعلیکم السلام۔ آﺅ محمود کیا بات ہے؟“

”مجھے ذرا پولیس اسٹیشن فون کرنا ہے۔“

”اچھا آﺅ۔“

”شیرازی صاحب کہاں ہیں؟“

”اپنے کمرے میںآرام کررہے ہیں۔“

”اچھا!“

دونوں فون والے کمرے میں آئے۔ محمود نے فون پر نمبر ملائے اور ریسیور کان سے لگاتے ہوئے بولا۔

”ہیلو۔“

”پولیس اسٹیشن۔“ دوسری طرف سے کہا گیا۔

”کون صاحب؟“

”میں سب انسپکٹر ابراہیم بول رہا ہوں۔ آپ کون ہیں؟“

”محمود! انسپکٹر جمشید کا لڑکا۔ آپ فوراً کچھ کانسٹیبل لے کر یہاں پہنچ جائیں۔“

”کیوں۔ خیر تو ہے؟“

”ہاں! سب خیریت ہے لیکن ذرا جلدی کیجیے۔“

”کیا انسپکٹر صاحب گھر میں موجود ہیں؟“

”ہاں! وہ بھی ہیں۔“

”کیا یہ انہی کا حکم ہے؟“

”ہاں!“

”اچھا! میں آرہا ہوں۔“

”جلدی آئیے۔“ محمودنے کہا اور ریسیور رکھ دیا۔

”کیا بات ہے محمود۔ تم نے پولیس کو کیوں بلایا ہے۔“

”ہمارے ہاں اس وقت کچھ مجرم بندھے پڑے ہیں۔“

”ارے!“ وہ حیران رہ گئیں۔

”جی ہاں! بہزاد ڈاکو اور اس کے تین ساتھی۔“

”ان لوگوں کا تمہارے گھر میں کیا کام؟“

”وہ پروفیسر داﺅد کو اغوا کرنا چاہتے تھے۔“

”تو کیا پروفیسر داﺅد تمہارے ہاں موجود تھے۔“

”جی ہاں!“

”انہیں تمہارے والد نے پکڑا؟“

”نہیں وہ گھر میں موجود نہیں تھے۔“

”تو اس کا مطلب یہ ہے کہ ان چاروں کو تم نے پکڑا ہے۔“

”جی ہاں!“

”بھئی واہ! کمال کیا تم نے۔“

”اچھا آنٹی میں چلتا ہوں۔“

”اچھا۔“

محمود ان کے مکان سے نکل کر اپنے دروازے کی طرف بڑھا ہی تھا کہ ٹھٹک کر رک گیا۔ تین غیرملکی ان کے مکان میں داخل ہورہے تھے۔

٭……..٭

نئے حملہ آور

”بہت خوب! اسے بھی ایک کمرے میں بند کرنا چاہیے۔“ انسپکٹر جمشید نے کہا۔

دوسرے کمرے میں اسے ڈال کر دروازہ بند کردیا گیا۔ اب وہ ڈرائنگ روم میں آکر بیٹھ گئے۔

”میری سمجھ میں ابھی تک یہ بات نہیں آئی کہ بہزاد ڈاکو کو مجھ سے کیا دشمنی ہے۔ آخر وہ مجھے کیوں پکڑنا چاہتا تھا۔“ پروفیسر داﺅد نے آرام سے بیٹھنے کے بعد کہا۔

”ہم اس سے یہ بات اگلوا لیں گے۔ آپ فکر نہ کریں۔“

”ابا جان! ہو سکتا ہے کوئی اور بہزاد ڈاکو کے ذریعے انکل کو پکڑوانا چاہتا ہو۔“ فرزانہ نے خیال ظاہر کیا۔

”ہاں! یہ بھی ممکن ہے۔ بہزاد ڈاکو کو بھاری رقم کے لالچ میں ایسے کام پر آمادہ کرنا کچھ مشکل بھی نہیں۔“

”اب سوال یہ پیدا ہوتا ہے کہ وہ کون ہے جو ایسا چاہتا ہے۔“

”آپ لوگ ٹھہریں۔ میں بہزاد سے معلوم کرکے آتا ہوں۔“

انسپکٹر جمشید نے کہا اور کمرے سے نکل کر بہزاد ڈاکو والے کمرے میں پہنچے۔

”یہ بات ثابت ہوچکی ہے کہ تم بہزاد ڈاکو ہو۔ تمہارے دوسرے دو ساتھیوں نے اس بات کا اقرار کرلیا ہے۔“ انہوں نے کہا۔

”کسی کے کوئی بات کہنے سے کیا بنتا ہے۔“

”تو کیا تم بہزاد ڈاکو نہیں ہو؟“

”نہیں!“ اس نے جواب دیا۔

”بہت دیر بعد عقل آئی۔“ انسپکٹر جمشید مسکرائے۔

”کیا مطلب؟“

”مطلب یہ کہ ابھی تھوڑی دیر پہلے جب میں نے آکر پوچھا تھا تو تم نے کوئی جواب نہیں دیا تھا بلکہ خاموش ہو گئے تھے۔ تم نے اس وقت کیوں نہ کہہ دیا کہ تم بہزاد نہیں ہو۔“

”تم کہنا کیا چاہتے ہو؟“

”یہی کہ تم بہزاد ہو۔“

”لیکن میں بہزاد نہیں ہوں۔“

”خیر! ہم ثابت کردیں گے۔ تم یہ بتاﺅ کہ پروفیسر کو اغوا کرنے سے تمہارا کیا مقصد تھا۔“

”کوئی پروفیسر کو اغوا کرانا چاہتا ہے۔ پچیس ہزار روپے کے بدلے میں نے اس کام کو کرنے کا وعدہ کیا ہے۔“

”بہت خوب۔ کیا تمہیںرقم مل چکی ہے؟“

”نہیں۔ کام کے بعد ملے گی۔“

”کون پروفیسر کو اغوا کرانے کا خواہش مند ہے۔“

”یہ میں تمہیں نہیں بتا سکتا۔“

”کیوں؟“ انسپکٹر جمشید نے تیز لہجے میں کہا۔

”اس لیے کہ یہ میرا کاروباری معاملہ ہے۔“

”ہمیں اگلوانا آتا ہے۔“

”مجھ سے اگلواﺅ گے…. یعنی….“ وہ کچھ کہتے کہتے رُک گیا۔

”ہاں ہاںکہو۔ رک کیوں گئے۔ کہتے کیوں نہیں۔ تم یہی کہنے والے تھے نا۔ مجھ سے اگلواﺅ گے۔ یعنی بہزاد ڈاکو سے۔“

بہزاد خاموش رہا۔

”تو تم اس کا نام نہیں بتاﺅ گے؟“

”نہیں۔“

”اب تم یہاں سے بچ کر نہیں جاسکو گے۔“ انسپکٹر جمشید نے کہا۔

”میں صاف بچ کر نکل جاﺅں گا اور تم دیکھتے رہ جاﺅ گے۔“

بہزاد ہنسا۔

”ابھی میرے ساتھی یہاں پہنچ جائیں گے۔“

”کن ساتھیوں کی بات کررہے ہو۔ جنہوں نے تمہیں اس کام پر مامور کیا ہے؟“

”نہیں۔ میرے اپنے ساتھی۔“

”تمہارا ایک ساتھی تو تمہارے پاس موجود ہے۔“ انسپکٹر جمشید نے ہنس کر کہا۔ 

”دو دوسرے کمرے میں بندھے پڑے ہیں اور ساتھی کہاں سے آئیں گے۔ کیا پروگرام بنا کر آئے تھے کہ پروفیسر داﺅد کو گھیر کر انسپکٹر جمشید کے گھر میں لے جایا جائے گا اور پھر وہاں جب ہم پھنس جائیں تو دوسرے ساتھی بھی وہاں پہنچ جائیں۔“

بہزاد ڈاکو کے پاس اُن کی اس بات کا کوئی جواب نہ تھا۔ اس لیے وہ خاموش رہا۔

”بہت اچھا۔ تم نہیں بتاتے نہ بتاﺅ۔ اب سب کچھ معلوم کرنا میرا کام ہے۔“

انہوں نے کہا اور کمرے سے نکل آئے۔

٭……..٭

سڑک کے کنارے کھڑی سفید کار کے پاس ایک اور چھوٹی سی سبز کار آکر رُکی۔ اس میں سے تین غیرملکی نیچے اُترے۔ سفید کار میں بیٹھا ہوا آدمی انہیں دیکھ کر کار سے نکل آیا۔

”کیا حالات بدستور ہیں؟“ ان میں سے ایک نے انگریزی میں پوچھا۔

”جی ہاں!“ سفید کار والے نے جواب دیا۔

”تو آﺅ۔ اندر چل کر دیکھیں تو سہی ماجرا کیا ہے۔“ ایک بولا پھر اس نے اپنے ساتھی سے کہاجو ڈرائیور تھا۔ تم باہر ہی ٹھہرو گے۔“

”کیا آپ کے پاس پستول موجود ہیں؟“ سفید کار والے نے پوچھا۔

”ہاں! کیوں۔ تم نے یہ کیوں پوچھا؟“

”یہ انسپکٹر جمشید کا گھر ہے۔“

”اوہ! کیا فضول بات کہی تم نے۔ چلو اندر۔“

تینوں دروازے کی طرف بڑھے۔

”یاد رہے۔ کسی کی زبان پر ایک دوسرے کا نام نہ آئے ورنہ ملکی حالات بگڑ جائیں گے۔ دونوں ملکوں کے سفارتی تعلقات ٹوٹ جائیں گے۔“ سبز کار والوں میں سے ایک بولا۔

”ٹھیک ہے۔ ہم سمجھتے ہیں۔“

”لیکن ہم اندر جائیں گے کیسے؟ دروازہ تو اندر سے بند ہوگا؟“

”نہیں۔ دروازہ اندر سے بند نہیں ہے۔“ سفید کار والے نے کہا۔

”کیوں؟ تمہیں کیسے معلوم؟ کہیں ہم سے پہلے اندر تو نہیںہو آئے؟“

”نہیں! ابھی ابھی ایک لڑکا گھر سے نکل کر ساتھ والے مکان میں گیا تھا۔“

”سوال یہ ہے کہ وہ دوسرے مکان میں کس لیے گیا ہے؟“

”یہ مجھے کیا معلوم۔“

”مجھے تو خطرے کی بو آرہی ہے۔“

”تم آﺅ تو سہی۔ اگر ضرورت پڑی تو ہم بلا جھجک اپنے پستول استعمال کریں گے اور کسی کو زندہ نہ چھوڑیں گے تاکہ کسی کو شک کرنے کا موقع نہ ملے۔“

انہوں نے آواز پیدا کیے بغیر دروازہ کھولا اور اندر داخل ہوگئے۔ سب سے پہلے وہ ایک کمرے کے دروازے پر پہنچے۔ اس کا دروازہ باہر سے بندھ تھا۔ ان میں سے ایک نے آہستہ سے دروازہ کھولا اور اندر جھانک کر دیکھا۔ دوسرے ہی لمحے وہ چونک اٹھے۔ اندر کوئی بندھا پڑا تھا۔

”یہ کون ہے؟“ سبز کار والے نے پوچھا۔

”بہزاد کا ساتھی۔“

”اوہ! تو یہ لوگ پکڑے جاچکے ہیں۔“

”آﺅ۔ پہلے آگے چل کر دیکھ لیں۔“

وہ تینوں آگے بڑھے۔ اس مرتبہ انہوں نے محمود اور فاروق کے کمرے کا دروازہ کھول کر دیکھا۔ یہاں بھی انہیں بہزاد کا ایک ساتھی بندھا ملا۔

”یہ کیا ماجرا ہے؟ انہیں الگ الگ کمرے میں کیوں رکھا گیا ہے؟“

”خدا جانے کیا چکر ہے۔“

وہ آگے بڑھے تو ایک کمرے سے انہیں کئی آدمیوں کے باتیں کرنے کی آوازیں سنائی دیں۔ وہ دبے پاﺅں آگے بڑھنے لگے۔

٭……..٭

محمود ٹھٹک کر رہ گیا۔ اس نے سڑک پر چار کاریں کھڑی دیکھیں جن میں سے ایک پروفیسر کی تھی۔ دوسری یقینا بہزادڈاکو کی تھی۔ باقی دو کاریں؟ اس نے سوچا۔ ضرور ان غیرملکیوں کی ہیں۔ اس خیال کے آتے ہی اس نے اپنی جیب کو ٹٹولا لیکن جیب خالی تھی۔

وہ ایک بار پھر شیرازی صاحب کے مکان میں گھس گیا۔ بیگم شیرازی اسے دیکھ کر چونک اُٹھیں۔

”خیر تو ہے۔ تم واپس آگئے؟“

”ایک پنسل اور کاغذ کی ضرورت ہے۔ جلدی کریں۔“

”اچھا۔ لیکن بات تو بتاﺅ۔“ بیگم شیرازی اُٹھتے ہوئے بولیں۔

”بہزاد ڈاکو کے کچھ ساتھی ہمارے مکان میں داخل ہوئے ہیں۔ ان کی کاریں سڑک پر کھڑی ہیں۔ ان کے نمبر نوٹ کرنا چاہتا ہوں۔“

”اوہ!“ بیگم شیرازی گھبرائیں۔ جلدی سے انہوں نے کاغذ اور پنسل محمود کے ہاتھوں میں پکڑا دیے۔ محمود باہر کی طرف لپکا تو وہ بھی اس کے پیچھے چلی آئیں۔

محمود سڑک کے کنارے کھڑی کاروں کے پاس پہنچا اور جھک کر ان کے نمبر نوٹ کرنے لگا۔ ایک کار کے نمبر نوٹ کرنے کے بعد دوسری کار کی طرف بڑھا۔ یہ سبز رنگ کی کار تھی۔ وہ جھکا اور نمبر نوٹ کرنے ہی والا تھا کہ ایک تیز آواز نے اسے بوکھلا دیا۔

”کیا بات ہے صاحبزادے۔ یہ نمبر کس خوشی میں نوٹ ہورہے ہیں؟“

محمود ایک دم سیدھا کھڑا ہوگیا۔ اس نے دیکھا کہ وہ سبز کار کا ڈرائیور تھا جو کار سے باہر بجلی کے ایک کھمبے سے لگا اسے گھور رہا تھا۔

”تم نے کار کے نمبر کیوں نوٹ کیے ہیں؟“ اس نے دوبارہ سخت لہجے میں پوچھا۔

”جی…. جی….“ محمود سے کوئی بات نہ بن سکی۔

”بتاﺅ؟“

”جی…. جی دراصل یہ میرا شوق ہے۔“ اس نے بات بنا ہی ڈالی۔

”یہ تمہارا شوق ہے؟“ کار کے ڈرائیور نے حیران ہوکر کہا۔

”جی ہاں!“

”تو تم نے اپنے گھر کے سامنے کھڑی دو کاروں کے نمبر کیوں نوٹ نہیں کیے؟“ ڈرائیور نے پوچھا۔

”کون سی دو کاروں کے؟“ محمود نے یونہی پوچھا۔

”وہ جو کھڑی ہیں۔“ اس نے پروفیسر داﺅد اور بہزاد کی کار کی طرف اشارہ کرتے ہوئے کہا جو شیرازی صاحب کے گھر کے سامنے کھڑی تھیں۔

محمود سمجھ گیا کہ چوں کہ اس نے اسے شیرازی صاحب کے گھر سے نکلتے دیکھا ہے اس لیے یہ سمجھا ہے کہ یہی اس کا گھر ہے۔ اب وہ جواب دینے کے لیے تیار تھا۔

”ان دونوں کے نمبر تو میں پہلے ہی نوٹ کرچکا ہوں۔“

”ذرا دکھانا تو کاغذ۔“

مجبوری کے عالم میں اس نے کاغذ ڈرائیور کی طرف بڑھا دیا۔

”لیکن اس پر تو صرف ایک کار کا نمبر درج ہے۔“

”ان دو کاروں کے نمبر دوسرے کاغذ پر درج کیے تھے۔وہ گھر میں رکھا ہے۔“

”ہوں۔ بھاگ جاﺅ۔ اس کار کا نمبر نوٹ کرو۔“

”میرا کاغذ تو مجھے دے دیں۔ میں آپ کی کار نمبر نہیں نوٹ کرتا۔“ 

”دوڑ جاﺅ۔“

محمود نے مڑتے مڑتے سبز کار کے نمبر پر نظر ڈالی۔ اس کا نمبر ذہن میں محفوظ ہوچکا تھا۔

٭……..٭

پروفیسر داﺅد کا اغوا

انسکپٹر جمشید بہزاد ڈاکو کے کمرے سے نکل کر ڈرائنگ روم کی طرف بڑھے ہی تھے کہ چونک کر رُک گئے۔ تین غیرملکی ڈرائنگ روم کے دروازے پر کھڑے اندر ہونے والی گفت گو سن رہے تھے۔ انہوں نے سوچا کیا یہی لوگ پروفیسر کو اغوا کروانا چاہتے ہیں؟ اس کا مطلب یہ ہوا کہ یہ خود ہی آگئے۔“ یہ خیال آتے ہی انہوں نے جیب سے پستول نکال لیا۔

”اپنے ہاتھ اوپر اٹھا دو۔ خبردار تم میں سے کوئی حرکت نہ کرے۔“ انہوں نے وہیں کھڑے کھڑے انہیں للکارا۔

وہ بھڑک کر مڑے۔ دوسرے ہی لمحے ان کے ہاتھ اوپر اُٹھ گئے۔ انسپکٹر جمشید کی آواز ڈرائنگ روم کے اندر بھی پہنچ گئی۔ فاروق اور فرزانہ صورتِ حال معلوم کرنے کے لیے دروازے کی طرف دوڑے۔ فاروق نے دروازے پر پہنچتے ہی پوچھا۔

”کیا بات ہے ابا جان؟“

انسپکٹر جمشید نے جونہی فاروق کی طرف دیکھا۔ ان تینوں میں سے ایک نے بجلی کی سی پھرتی سے ہاتھ گرا دیا۔ دوسرے ہی لمحے اس کے ہاتھ میں پستول تھا۔ ساتھ ہی پستول سے فائر ہوا اور انسپکٹر جمشید کے ہاتھ سے پستول نکل کر فضا میں اچھلا پھر فرش پر گر گیا۔

”اب تم سب ہاتھ اوپر اٹھا دو۔“ پستول والے نے کہا۔ فاروق کا رنگ زرد پڑ گیا کیوں کہ یہ اچانک تبدیلی اس کی وجہ سے آئی تھی۔ اس کا سر شرم سے جھک گیا۔

”کوئی بات نہیں۔“ انسپکٹر جمشید نے اس کی طرف دیکھتے ہوئے مسکرا کر کہا۔

”ایسا بھی ہوتا ہے۔“

اور ان سب کے ہاتھ اوپر اُٹھ گئے۔

”جلدی کرو۔ بہزاد اور اس کے ساتھیوں کو کھول دو۔ اس کے بعد ہمیں یہاں سے پروفیسر سمیت جانا ہے۔ اس کام میں دو منٹ سے زیادہ نہیں لگنے چاہئیں۔“ پستول والے غیرملکی نے کہا۔ اس کے ساتھ ہی اس کے دونوں ساتھیوں نے بھی پستول نکال لیے تھے۔ وہ دونوں بہزاد ڈاکو والے کمرے کی طرف دوڑے گئے۔ انہوں نے پہلے بہزاد اور اس کے پاس پڑے ساتھی کی رسیاں کاٹیں پھر بہزاد کا ساتھی اپنے دونوں ساتھیوں کو آزاد کرنے کے لیے دوڑا گیا۔

ایک منٹ کے اندر اندر وہ سب ڈرائنگ روم میں جمع تھے۔ ان کی طرف بیک وقت چھے پستول اُٹھے ہوئے تھے۔

”اور اب پروفیسر صاحب آپ ہمارے ساتھ چلیں گے۔ باقی سب لوگ یہیں رہیں گے۔“ایک غیرملکی نے کہا۔

”سب لوگ دیوار کی طرف منہ کرکے کھڑے ہو جائیں۔ پروفیسر صاحب آپ ہمارے پاس چلے آئیں۔“

تعمیل کرنے کے سوا کوئی چارہ نہ تھا۔ وہ سب دیوار کی طرف منہ کرکے کھڑے ہوگئے۔ پروفیسر بے بسی کی حالت میں ان کی طرف بڑھتے چلے گئے۔

”پروفیسر کو مکان سے باہر نکال کر کار میں بٹھا دو۔ ہم بھی پہنچ رہے ہیں۔“ غیرملکی نے بہزاد اور اس کے ساتھیوں سے کہا۔

”جی بہت اچھا۔“ بہزاد ڈاکو نے کہا اور وہ پروفیسر داﺅد کو لے کر نکل گئے۔

”انسپکٹر جمشید! اس سے بڑی شکست آج تک تم نے نہیں کھائی ہوگی۔ آج کی شکست تمہیں ساری عمر یاد رہے گی۔ دیوار کے ساتھ لگے کھڑے رہو۔ اگر کسی نے پلٹ کر دیکھنے کی کوشش کی تو کامیابی کے اس مقام پر ہم فوراً گولی مارنے کے سوا کچھ نہیں کریں گے۔“ غیرملکی نے کہا۔

وہ سب خاموش کھڑے رہے۔ انسپکٹر جمشید جانتے تھے کہ اس وقت کچھ بھی نہیں کیا جاسکتا۔ ذرا بھی حرکت کرنے کا مطلب موت کے سوا کچھ نہیں تھا۔ پھر انہوں نے دروازہ بند ہونے اور چٹخنی لگنے کی آواز سنی۔

وہ پلٹے۔ دروازہ بند ہوچکا تھا۔ فاروق اور فرزانہ دروازے کی طرف دوڑے۔

”کوئی فائدہ نہیں۔ دروازے باہر سے بند کیا جا چکا ہے۔“ انسپکٹر جمشید نے انہیں روکنے کے لیے کہا۔

لیکن اتنی دیر میں وہ دونوں دروازے تک پہنچ چکے تھے۔ انہوں نے دروازے کا ہینڈل پکڑ کر کھینچا۔ لیکن وہ باہر سے بند کیا جاچکا تھا۔

٭……..٭

محمود شیرازی صاحب کے دروازے کی طرف بڑھ رہا تھا۔ وہ سیدھا اپنے گھر میں نہیں گھس سکتا تھا کیوں کہ سبز کار کا ڈرائیور ابھی تک اس کی طرف دیکھ رہا تھا۔ دروازے کے پاس پہنچ کر اس نے سب سے پہلے سبز کار کے نمبر کاغذ پر لکھ لیے۔

”کیا بات ہے محمود؟ تم پھر واپس آرہے ہو؟“ دروازے کے اندر کھڑی بیگم شیرازی نے پوچھا۔

”کار کا ڈرائیور سڑک پر موجود تھا۔ اس نے مجھے نمبر نوٹ کرتے دیکھ لیا ہے۔ اب میں اپنے گھر میں جانا چاہتا ہوں۔ کیوں کہ خدا جانے وہاں کیا حالات پیش آئے ہوں۔ ڈرائیور مجھے آپ کے گھر سے نکلتے دیکھ چکا ہے۔ اس کے ساتھی ہمارے مکان میں داخل ہوچکے ہیں۔ اب اگر میں اس طرف جاتا ہوں تو وہ ضرور مجھے ٹوکے گا۔“

”پھر کیا کیا جائے؟“

”خطرہ بہت بڑھ گیا ہے اور میں کچھ سوچ نہیں پا رہا ہوں۔“

”کیا میں شیرازی صاحب کو بلا لاﺅں؟“ انہوں نے پوچھا۔

”نہیں۔ ان کی ضرورت نہیں۔“

اسی وقت محمود نے اپنے گھر کا دروازہ کھلتے دیکھا۔ دوسرے ہی لمحے اس کی آنکھیں حیرت کی وجہ سے پھٹی کی پھٹی رہ گئیں۔ بہزاد ڈاکو کا ایک ساتھی باہر نکل رہا تھا اور اس کے پیچھے باہر نکلنے والے شخص پر نظر پڑنے پر تو اس کا رنگ ہی اُڑ گیا۔ یہ پروفیسر داﺅد تھے۔ ان کے پیچھے بہزاد ڈاکو اور اس کے دو ساتھی برآمد ہوئے۔

یہ پانچوں پروفیسر داﺅد کے برابر کھڑی کار میں بیٹھ گئے۔ فوراً ہی کار کا انجن سٹارٹ ہوگیا لیکن وہ اپنی جگہ کھڑی رہی۔ ابھی محمود اپنے ہوش و حواس درست بھی نہیں کر پایا تھا کہ اسے ایک شدید جھٹکا لگا۔ وہ حد درجے پریشان ہوگیا۔

تینوں غیرملکی اندر سے نکل کر سبز کار کی طرف بڑھ رہے تھے۔ جیسے ہی کار میں بیٹھے کار سٹارٹ ہوگئی۔ اس کے پیچھے بہزاد ڈاکو کی کار چل پڑی۔ ان دونوں کے بعد سفید کار والا بیٹھا اور ان کے پیچھے روانہ ہوگیا۔

محمود اچھل کر اپنے گھر کی طرف دوڑا۔ وہ اندھا دھند اندر داخل ہوا اور چلایا۔

”ابا جان! آپ کہاں ہیں؟“

”ہم ڈرائنگ روم میں ہیں۔“ انسپکٹر جمشید کی آواز آئی۔

وہ بے تحاشہ ڈرائنگ روم کی طرف بھاگا اور فوراً دروازہ کھول دیا۔

”آپ سب ٹھیک تو ہیں؟“ اس نے پوچھا۔

”ہاں! ہم سب ٹھیک ہیں مگر۔“ بیگم جمشید کے منہ سے نکلا۔

”میں جانتا ہوں۔ وہ لوگ انکل کو لے گئے۔“ یہ کہتے وقت اس نے شائستہ کو دیکھا وہ بری طرح سسک رہی تھی۔

”شائستہ! میری بچی نہ رو۔ میں صبح ہونے سے پہلے ان لوگوں سے پروفیسر کو واپس حاصل کرکے رہوں گا۔“ انسپکٹر جمشید نے اس کا شانہ تھپکتے ہوئے کہا۔ پھر بولے۔

”تم میرے ساتھ آﺅ۔ میں شہر کے تمام پولیس اسٹیشنوں کو باخبر کرنا چاہتا ہوں۔“

”چلیے۔“

دونوں گھر سے نکلے۔ دوسری طرف سے بیگم شیرازی حالات جاننے کے لیے آرہی تھیں۔

”واپس چلیے۔ مجھے کچھ فون کرنا ہیں۔“

”اچھا!“

تینوں فون والے کمرے میں آئے۔ انہوں نے سب سے پہلے اکرام کو وہاں پہنچنے کے لیے فون پر کسی سپاہی کو حکم دیا۔ پھر انہوں نے مختلف سمتوں میں فون کے گھوڑے دوڑائے۔ جب وہ اس کام سے فارغ ہوچکے تو محمود نے کہا۔

”ابا جان میرے پاس دو کاروں کے نمبر ہیں۔ مجرم انہی دو کاروں میں فرار ہوئے ہیں۔“

”کیا؟ یہ تم کیا کہہ رہے ہو؟“ انسپکٹر جمشید خوشی سے چلائے۔

”جی ہاں! جب تینوں غیرملکی اندر داخل ہوئے تو میں نے ان دونوں کاروں کے نمبر نوٹ کر لیے تھے۔“ اس نے پُرجوش لہجے میں نمبر بتائے۔ انسپکٹر جمشید نے نوٹ بک میں دونوں نمبر نوٹ کرلیے۔

انہوں نے کئی بار بے چینی کے عالم میں ان نمبروں کو پڑھا۔ پھر فون پر رجسٹریشن آفس کے نمبر ڈائل کرنے لگے لیکن دوسری طرف سے کسی نے فون کا ریسیور نہیں اٹھایا۔ انہیں یاد آگیا کہ رات کا وقت ہے۔ اس وقت دفتر میں کوئی نہیں ہوگا۔ اس پر انہوں نے ڈی آئی جی کے گھر نمبر ڈائل کیے۔ دوسری طرف سے فوراً ہی جواب دیا گیا۔

”جی! میں انسپکٹر جمشید ہوں۔ حالات بہت نازک ہیں۔ مجھے اسی وقت دو کاروں کے بارے میں معلوم کرانا ہے کہ وہ کس کی ہیں۔“ انہوں نے گھبرا کر کہا۔

”اس وقت! آخر بات کیا ہے؟“ ڈی آئی جی نے حیران ہوکر پوچھا۔

”ایک ایک لمحہ قیمتی ہے۔ کاروں کے نمبر سنیے اور رجسٹریشن آفس کے کسی افسر کو فوراً معلومات بہم پہنچانے کے لیے وہاں بھیج دیں۔ پھر میں آپ کو تمام حالات فون پر بتا دوں گا۔“

”اچھا!“ دوسری طرف سے کہا گیا۔

”تمہارا نمبر کیا ہے؟ میں تمہیں ابھی آدھ گھنٹے کے اندر معلوم کرکے فون کروں گا۔“

انسپکٹر جمشید نے نمبر بتا دیے۔دوسری طرف سے ریسیور رکھ دیا گیا۔ انہوں نے بھی ریسیور رکھ کر بیگم شیرازی سے کہا۔

”ہم ابھی آدھ گھنٹے بعد آئیں گے۔“

”اچھا!“

جونہی وہ باہر نکلے، سب انسپکٹر ابراہیم کچھ کانسٹیبل کے ساتھ جیپ سے اترا۔

”انسپکٹر صاحب! آپ بہت جلدی آئے۔ اب آپ ان دونوں کاروں کی تلاش میں روانہ ہوجائیں۔ وہ اس سڑک پر گئے ہیں۔ خیال رہے کہ وہ پروفیسر داﺅد کو اغوا کرکے لیے جارہے ہیں۔ صرف تعاقب کریں اور وائرلیس پر اطلاع دیتے رہیں۔“

´´”جی بہتر۔“ انسپکٹر ابراہیم نے دونوں کاروں کے نمبر نوٹ کیے اور دوبارہ جیپ میں بیٹھ کر چلا گیا۔

چھت پر

آدھ گھنٹے بعد وہ پھر بیگم شیرازی کے گھر میں موجود تھے کہ فون کی گھنٹی بجی۔ انسپکٹر جمشید نے ریسیور کان سے لگاتے ہوئے کہا۔

”یس سر!“

”جمشید۔ میں نے ان دونوں کاروں کے متعلق معلوم کرلیا ہے۔“ دوسری طرف سے ڈی آئی جی کی آواز آئی۔

”بہت بہت شکریہ! وہ کاریں کن کی ہیں؟“

”تمہیں یہ سن کر حیرت ہوگی کہ وہ ہمارے ایک دوست ملک کے سفارت خانے کی کاریں ہیں۔“

”کیا؟“ انسپکٹر جمشید کا منہ حیرت سے کھلا کا کھلا رہ گیا۔

”ہاں!“

”کاریں کن آفیسروں کے نام ہیں؟“ انسپکٹر جمشید نے حیران ہوکر پوچھا۔

دوسری طرف سے ڈی آئی جی صاحب نے نام بتاتے ہوئے پوچھا۔

”اب تم بتاﺅ۔ بات کیا ہے؟“

”ان لوگوں نے پروفیسر داﺅد کو اغوا کرلیا ہے۔“

”کیا؟“ ڈی آئی جی پریشان کن لہجے میں حیران ہوکر بولے۔

”جی ہاں! یہ ابھی ابھی تقریباً پینتالیس منٹ پہلے کا واقعہ ہے۔“

”اوہ! پھر۔ تمہیں ان دونوں کاروں کے نمبر کیسے معلوم ہوگئے؟“ انہوں نے پوچھا۔

جواب میں انسپکٹر جمشید نے انہیں پوری تفصیل سنا دی۔

”اوہ! تو بہزاد ڈاکو بھی ان کے لیے کام کررہا ہے؟“

”جی ہاں!“

”اب تم کیا چاہتے ہو؟“

”میں چاہتا ہوں۔ سفارت خانے کی عمارت کو مکمل طور پر گھیرے میں لے لیا جائے۔ ابھی ان لوگوں کو خیال بھی نہیں گزر سکتا کہ ہم ان تک پہنچ جائیں گے۔

”ٹھیک ہے۔ میں احکامات جاری کررہا ہوں۔ تم کتنی دیر میں وہاں پہنچ رہے ہو؟“

”میں پندرہ منٹ بعد وہاں پہنچ جاﺅں گا لیکن عمارت کو صرف حصار میں لیا جائے۔ کوئی قدم نہ اٹھایا جائے تو بہتر ہے۔“

”ٹھیک ہے، میں سمجھتاہوں۔ ایک دوست ملک کا معاملہ ہے۔ اگر ہمارا اقدام غلط ہوا تو اس سے تعلقات خراب ہو جائیں گے۔“

”تعلقات تو ویسے بھی خراب ہوں گے۔ اگر پروفیسر داﺅد وہاں سے برآمد کرلیے گئے۔“

”ہاں! اس صورت میں تو ہم خود اس ملک سے اپنے تعلقات ختم کرلیں گے۔“

”بس تو پھر آپ عمارت کو گھیرے میں لے لینے کے احکامات صادر فرمادیں۔“

”اچھا ٹھیک ہے۔“

دوسری طرف سے فون کا سلسلہ منقطع ہوگیا۔ انسپکٹر جمشید اور سب انسپکٹر اکرام واپس آئے تو فرزانہ نے پوچھا۔

”کیا رہا ابا جان؟“

”کاروں کے مالکان کے نام معلوم ہوگئے ہیں۔“

”کون ہیں وہ؟“

”بیٹی معاملہ اتنا معمولی نہیں ہے۔ جتنا ہم سمجھ بیٹھے تھے۔ یہ ایک دوست ملک کی کارستانی ہے۔ جو ظاہر میں تو ہمارا دوست ہے لیکن درحقیقت وہ بدترین دشمن ہے۔ میں تمہیں اس سے زیادہ کچھ نہیں بتا سکتا۔ اچھا۔ اب ہم جارہے ہیں۔ تم لوگ دعا کرنا کہ ہم پروفیسر صاحب کو ساتھ لے کر لوٹیں۔“

”تو آپ ہمیں ساتھ نہیں لے جائیں گے؟“

”نہیں! معاملہ اپنے ملک کا نہیں ہے۔“

”پھر کیا ہوا؟ آپ ہمیں ساتھ لے جائیں۔“

”اچھا آﺅ۔“

وہ جیپ میں سوار ہوکر سفارت خانے کی طرف روانہ ہوگئے۔

٭……..٭

تینوں کاریں برق رفتاری سے دوڑ رہی تھیں۔

”تم لوگ مجھے کہاں لے جانا چاہتے ہو؟“ پروفیسر داﺅد نے پریشان ہوکر پوچھا۔

”ہم تمہیں اس ملک سے باہر لے جانا چاہتے ہیں۔“ بہزاد ڈاکو نے کہا۔

”کس لیے؟“

”یہ میں نہیں جانتا، یہ غیرملکی جانتے ہیں۔“

”تم اس ملک سے تعلق رکھتے ہو؟“ پروفیسر نے پوچھا۔

”ہاں! میں یہیں پیدا ہوا، پلا بڑھا، جوان ہوا، کیوں تم نے یہ کیوں پوچھا؟“

”اس لیے کہ تم اس ملک سے غداری کررہے ہو۔“

”میں ایک ڈاکو ہوں۔“

”جانتا ہوں۔ پھر بھی ڈاکو اپنے وطن کے لوگوں کا دشمن ہوتا ہے۔ وطن کا نہیں۔“

”کیا مطلب؟“

”یہ لوگ ہمارے وطن کے دشمن ہیں۔“

”مجھے اس سے کیا۔ مجھے تو ان سے پچیس ہزار روپے تمہارے اغوا کے لیے ملے ہیں لہٰذا جب تک میں تمہیں ان کے گھر تک نہ پہنچا دوں۔ اس وقت تک میں ان کا زر خرید غلام ہوں۔“

”مجھے یہ سن کر حیرت ہوئی کہ ڈاکو بھی کسی کے زر خرید غلام بن سکتے ہیں۔“ پروفیسر نے طنزیہ لہجہ میں کہا۔

”اس قسم کا کام میں نے پہلی مرتبہ کیا ہے۔“

”اور ساری عمر پچھتاﺅ گے۔“

”یہ کام مجھے نہیں آتا۔“ بہزاد ڈاکو نے ہنس کر کہا۔

”تم انسان نہیں پتھر ہو۔“

”پتھر میرے آگے کیا چیز ہے۔ میں تو اس سے بھی سخت ہوں۔“

”ہاں! میرا بھی یہی خیال ہے۔ لیکن کاش تم محب وطن شہری ہوتے۔“

”ڈاکو محب وطن بھی ہوتے ہیں۔“ بہزاد نے طنزیہ لہجے میں کہا۔

”ہوتے ہیں۔ کچھ ہوتے ہیں مگر تم نہیں ہو۔“

”مجھے محب وطن بننے کا شوق نہیں۔“

”لعنت ہے تم پر۔“ پروفیسر نے غصے سے سر کو جھٹکا۔

تینوں کاریں اسی طرح برق رفتاری سے دوڑتی رہیں پھر اچانک اگلی کار کی رفتار کم ہوتی محسوس ہوئی۔ اس کے ساتھ ہی پچھلی کاروں کی رفتاری بھی سست پڑتی چلی گئی۔ یہاں تک کہ تینوں کاریں ایک سفید رنگ کی بڑی سی عمارت کے سامنے رک گئیں۔

وہ سب کاروں سے اترے۔

”سر!“ سبز کار کے ڈرائیور نے کچھ کہنا چاہا۔یہ بھی غیر ملکی تھا۔

”کیا بات ہے ڈرائیور؟“ ایک غیرملکی نے پوچھا۔

”میں کچھ کہنا چاہتاہوں۔“

”اس وقت نہیں۔ دیکھ نہیں رہے ہو ہم پروفیسر کو پکڑ لائے ہیں اور ہمارے لیے اس سے زیادہ ضروری کوئی کام نہیں کہ پہلے پروفیسر کو اصل جگہ پہنچا دیں۔“

”میں بھی اسی سلسلے میں کچھ کہنا چاہتا ہوں۔“

”کہو۔ کیا کہنا ہے۔“

”سر! ایک بات مجھے الجھن میں ڈال رہی ہے۔“

”بس کیا یہی کہنا تھا۔ بے وقوف کہیں کے ہمارا وقت بہت قیمتی ہے ہٹو پیچھے۔“

”سنیے تو سہی۔ میں نے ایک لڑکے کو سفید کار کا نمبر نوٹ کرتے دیکھا تھا۔“ ڈرائیور نے اس ڈر سے جلدی سے کہا جیسے اگر اس نے ایک سکینڈ کی بھی دیر لگائی تو اسے کہنے کا موقع نہیں ملے گا۔

”کیا کہا؟ سفید کار کا نمبر نوٹ کررہا تھا؟ یہ کیا بکواس ہے؟“

”انسپکٹر جمشید کے گھر کے ساتھ والے مکان سے وہ لڑکا نکلا تھا اور اس نے جھک کر سفید کار کا نمبر نوٹ کرلیا تھا۔ پھر جب میں نے اسے ڈانٹا تو وہ بھاگ کھڑا ہوا۔ یہ کہتا ہوا کہ یہ اس کا مشغلہ ہے۔ ویسے کاغذ میں نے اس سے چھین لیا تھا۔“

”کیا بکواس کرتے ہو۔ وہ لڑکا کون تھا؟“

”یہ مجھے کیا معلوم؟“

”ہوسکتا ہے وہ انسپکٹر جمشید کا لڑکا ہو؟“ دوسرے غیرملکی نے ڈرائیور کی بات پر سنجیدہ ہوتے ہوئے کہا۔

”اوہ! اگر یہ بات ہے تو ہم سب خطرے میں ہیں۔ الو کہیں کے تم نے یہ بات ہمیں پہلے کیوں نہیں بتائی تھی۔“ غیرملکی نے غصے سے کہا۔

”اس وقت میں نے اس بات کو اہمیت نہیںدی تھی لیکن پھر جوں جوں میں نے اس پر سوچا میرا ذہن الجھتا چلا گیا۔“

”اگر کوئی مصیبت آئی تو ہم تمہارے ذہن کو ہمیشہ ہمیشہ کے لیے سلا دیں گے سُور۔“ غیرملکی غصے سے لال بھبوکا ہورہا تھا۔

”کیوں کہ تم سے زیادہ بے وقوف کوئی نہیں ہوسکتا۔“

”اس پر بعد میں ناراض ہو لینا۔ پہلے یہ سوچ لینا چاہیے کہ اب ہم کیا کریں گے۔ کہیں ہم گھیر نہ لیے جائیں۔“دوسرے غیرملکی نے کہا۔

”ہاں! یہ ٹھیک ہے۔ خیر فی الحال اندر لے چلو اسے۔“

وہ پروفیسر کو لے کر اندر آئے۔ یہ ایک بہت عالی شان عمارت تھی۔ انہوں نے پروفیسر داﺅد کو ایک کرسی پر بٹھا دیا۔ اس کے بعد ایک غیرملکی نے ایک الماری میں سے وائرلیس نکالا اور اس کا بٹن دبا کر کہنے لگا۔

”ہیلو…. ہیلو….“

دفعتہ وائرلیس سیٹ پر ایک سرخ بلب جلنے بجھنے لگا۔ پھر دوسری طرف کی آواز آئی۔

”ہیلو! کون بول رہا ہے۔“

”سفارت خانے سے۔ نمبر تین۔“

”کیا بات ہے؟“

”پروفیسر داﺅد کو اغوا کرلیا گیا ہے۔“

”بہت اچھے! تم نے بہت بڑی خوش خبری سنائی ہے۔“

”لیکن….“ غیرملکی کہتے کہتے رک گیا۔

”لیکن کیا؟“ دوسری طرف سے پوچھا گیا۔

”پولیس ہمارے پیچھے ہے۔ شاید جلد ہی سفارت خانے کو گھیر لیا جائے۔“

”پروا نہ کرو اور پل پل کی خبر دیتے رہو۔ ہم ابھی کچھ پروگرام بناتے ہیں۔“

”جی! بہتر۔“ اس نے کہا۔

سرخ بلب جلنا بجھنا بند ہوگیا۔ اس نے بھی وائر لیس سیٹ بند کرکے الماری میں رکھ کر الماری کو تالا لگا دیا۔

”عمارت کی چھت پر پہنچ جاﺅ۔ چاروں کونوں پر ایک ایک آدمی موجود رہے۔ اگر عمارت کو گھیرے میں لیا جائے تو فوراً نیچے آکر بتا دینا۔“ غیرملکی نے بہزاد اور اس کے ساتھیوں سے کہا۔

”بہت اچھا۔“ بہزاد ڈاکو کمرے سے نکلنے کے لیے مڑا۔

”کیا تم چاروں کے پاس پستول ہیں؟“

”تین کے پاس ہیں۔“

”چوتھے کو ہم دے دیتے ہیں۔“

بہزاد ڈاکو کے ساتھی کو پستول مل گیا تو وہ عمارت کے زینے چڑھتے ہوئے چھت پر پہنچ گئے۔

٭……..٭

وہی کاریں

وہ سفارت خانے کی عمارت سے کافی فاصلے پر ہی جیپ سے اتر گئے۔

”کیا خیال ہے کیا اس وقت تک عمارت کو گھیرے میں لیا جاچکا ہوگا۔“ انسپکٹر جمشید نے اکرام سے پوچھا۔

”خیال تو یہی ہے۔“

”مجھے تو کوئی آثار نظر نہیں آتے۔“

”اندھیرے میں گھیرے کا اندازہ لگانا اتنا آسان بھی نہیں۔“

”تو آﺅ۔ آگے چلتے ہیں۔“ انسپکٹر جمشید نے کہا۔

وہ سب آگے بڑھنے لگے۔ ایک جگہ انہیں ایک جیپ کھڑی نظر آئی۔ وہ اسے دیکھ کر رک گئے۔ پھر انسپکٹر جمشید اور اکرام اٹنشن ہوگئے کیوں کہ جیپ میں ڈی آئی جی صاحب موجود تھے۔

”تم پہنچ گئے۔“ انہوں نے پوچھا۔

”جی ہاں! آپ نے کیوں تکلیف کی۔ ہم دیکھ لیتے۔“انسپکٹر جمشید نے کہا۔

”نئی بھئی! معاملہ دوست ملک کے سفارت خانے کا ہے۔“

”کیا عمارت کو گھیرے میں لیا جاچکا ہے؟“

”ہاں! مکمل طور پر۔ کوئی شخص عمارت سے نکل کر نہیں جاسکتا۔“

”ٹھیک ہے۔ اب میں سفارت خانے کی تلاشی لینا چاہتا ہوں۔“

”یہ بہت مشکل کام ہے۔ اگر عمارت سے پروفیسر برآمد نہ ہو سکے تو کیا ہوگا۔ دونوں ملکوں کے تعلقات خراب ہو جائیں گے۔“

”مجھے یقین ہے۔ یہ ملک ہمارا دوست نہیں ہے۔“

”حکومت ہماری بات پر بلاوجہ تو یقین کرے گی نہیں۔ثبوت بھی تو ہونا چاہیے۔ ہاں اگر پروفیسر یہاں سے برآمد ہو جائیں تو بات دوسری ہے۔“ ڈی آئی جی صاحب بولے۔

”مجھے جب تک یہ یقین نہیں ہو جاتا کہ پروفیسر عمارت میں موجود ہیں، اس وقت تک عمارت کی تلاشی نہیں لی جائے گی۔“

”تم کیسے یقین کرو گے۔“ ڈی آئی جی نے پوچھا۔

”اس کے لیے میرے ذہن میں ایک تجویز ہے۔“

”وہ کیا؟“

”میرے ساتھ آئیے۔“

یہ کہہ کر انسپکٹر جمشید عمارت کے دروازے کی طرف بڑھے۔

”ابا جان کیا ہم بھی آئیں؟“ فاروق نے پوچھا۔

”ابھی نہیں۔ اکرام تم ساتھ آﺅ۔“

”جی اچھا!“

”تینوں عمارت کے دروازے پر پہنچ گئے۔ پھاٹک پر چوکیدار موجود تھا۔

”خان صاحب! ہمارا تعلق پولیس سے ہے۔“ انسپکٹر جمشید نے کہا۔ کیوں کہ وہ تینوں اس وقت سادہ لباس میں تھے۔

”خوچہ…. تمہارا وردی کِدر ہے۔“ پٹھان چوکیدار نے پوچھا۔ جس پر انہیں ہنسی آگئی۔ اکرام نے ہلکی سی سیٹی بجائی جس کے جواب میں فوراً پانچ کانسٹیبل وہاں آکھڑے ہوئے۔

”کیوں؟ اب یقین آگیا؟“ اکرام نے پوچھا۔

”بالکل بالکل۔ ام سے غلطی ہوگیا۔ معافی دیو ساب۔“

”اچھا معاف کیا۔ ذرا اندر سے ڈرائیور کو بلا لاﺅ۔“

”کون سے ڈرائیور کو۔“ پٹھان نے پوچھا۔

”اندر کتنے ڈرائیور موجود ہیں۔“

”دو ساب جی۔“

”دونوں کو بلا کر لے آﺅ جلدی۔“

”اچھا ساب جی۔“ پٹھان اندر دوڑا گیا۔

”آخر تم ڈرائیوروں سے کیا معلوم کرو گے۔“ ڈی آئی جی صاحب نے بے چین ہوکر پوچھا۔

”بس دیکھتے جائیے۔“

”تمہاری ہر بات عجیب ہوتی ہے۔“ انہوں نے جھنجھلا کر کہا۔

اتنے میں پٹھان دو نوجوان غیرملکیوں کے ساتھ برآمد ہوا۔

”کیا تم دونوں سفارت خانے کی کاروں کے ڈرائیور ہو؟“ انسپکٹر جمشید نے انگیریز میں پوچھا۔

”جی ہاں! فرمائیے۔“ ان میںسے ایک نے کہا۔

”ہمارا تعلق پولیس سے ہے۔ ابھی ابھی ہمیں ایک فون موصول ہوا تھا۔ کسی نے کہا تھا کہ سفارت خانے کی دو کاریں چوری کر لی گئیں۔“

”ارے۔ نہیں تو۔ کاریں تو اندر موجود ہیں۔“

”اچھا! حیرت ہے۔“

”کسی نے یونہی اڑائی ہوگی۔“

”لیکن ہم اپنا اطمینان کرنا چاہتے ہیں۔“

”آئیے! آپ کو کاریں دکھا دیں۔“

وہ دونوں انہیں لے کر کاروں کے پاس آئے۔ انہوں نے گیراج کے بلب کی روشنی میں کاروں کے نمبر پڑھے۔ دونوں کے نمبر وہی تھے جو محمود نے نوٹ کیے تھے۔

بہزاد ڈاکو تیزی سے سیڑھیاں اترتا ہوا غیرملکیوں کے کمرے میں پہنچا۔ وہ تینوں وائرلیس میز پر رکھے بیٹھے تھے وائرلیس کا سوئچ آن تھا۔

”کیا خبر ہے؟“ ان میں سے ایک نے بہزاد سے اُردو میں پوچھا۔

”عمارت کو چاروں طرف سے گھیرا جاچکا ہے۔ دروازے پر انسپکٹر جمشید اور پولیس والے موجودہیں۔“

”آخر وہی ہوا جس کا ڈر تھا۔ یہ سب کچھ اس نامعقول ڈرائیور کی وجہ سے ہوا۔“

”ہاں! اسے اس لڑکے کو کاروں کے نمبر نوٹ نہیں کرنے دینے چاہئیں تھے اور اگر اس نے نوٹ کر ہی لیے تھے تو اس کو پکڑ لینا چاہیے تھا۔“

”اس پر گرم بعد میں ہو لینا۔ فی الحال یہ خبر آگے پہنچاﺅ۔“

”اچھا!“ اس نے کہا اور وائرلیس کے قریب منہ لے جا کر کہنے لگا۔

”ہیلو…. ہیلو….“ جونہی اس نے ہیلو ہیلو کہا، سُرخ بلب جلنے بجھنے لگا۔

”ہیلو…. نمبر تین۔ کیا خبر ہے؟“ دوسری طرف سے پوچھا گیا۔

”عمارت کو چاروں طرف سے گھیرا جاچکا ہے۔“

”اوہ!“

”اب ہم حکم کے منتظر ہیں۔“

”پروفیسر یہاں سے برآمد نہ ہو۔“ دوسری طرف سے حکم دیا گیا۔

”اس کے لیے ہم کیا کریں؟“

”یہ سوچنا تمہارا کام ہے۔“

”بہت اچھا! میرے ذہن میں ایک بہت شان دار ترکیب آئی ہے۔ میں فوراً اس پر عمل کرتا ہوں۔“

”میں یہ نہیں پوچھوں گا کہ وہ ترکیب کیا ہے؟ نہ ہی مجھے اس سے غرض ہے۔ میں تو یہ چاہتا ہوں کہ ہمارے دفتر سے پروفیسر کو برآمد نہ کیا جاسکے۔“

”ایسا ہی ہوگا۔ آپ مطمئن رہیں۔“

”تب پھر میں تمہاری طرف سے خوش خبری سننے کا منتظر رہوں گا۔“ آواز آنی بند ہوگئی۔ سرخ بلب جلنا بجھنا بند ہوگیا۔

”آپ نے کیا سوچا ہے؟“ بہزاد ڈاکو نے پوچھا۔

”تم اوپر چھت پر جاﺅ اور حالات کا جائزہ لیتے رہو۔ ہمیں باخبر رکھو۔“

”اچھا!“

ڈاکو چلا گیا تو دوسرے غیرملکی نے پوچھا۔

”تم کیا کرنا چاہتے ہو؟ جو کچھ کرنا ہے جلدی کرو۔ ہمارے پاس وقت بہت کم ہے۔“

”ہاں! میرے ساتھ آﺅ۔“

تینوں اٹھ کر پروفیسر داﺅد والے کمرے کی طرف بڑھے۔ اسی وقت پٹھان چوکیدار اندر داخل ہوا۔

”ساب جی! کچھ پولیس والا منا مانگتا ہے۔“ اس نے کہا۔

”تم انہیں ڈرائنگ روم میں بٹھاﺅ۔ ہم آتے ہیں۔“

”اچا۔ ساب جی۔“ پٹھان نے کہا اور باہر چلا گیا۔

”جلدی کرو۔“ دوسرے غیرملکی نے کہا۔

٭……..٭

 ”کہیے؟ کیا خیال ہے۔“ انسپکٹر جمشید نے سیدھے ہوتے کہا۔ 

”دونوں کاریں وہی ہیں۔ ابھی تھوڑی دیر پہلے یہ میرے گھر کے پاس موجود تھیں۔“

”ہوں۔ تو اس کا مطلب یہ ہے کہ پروفیسر اندر موجود ہیں۔“

”اور کیا کہا جاسکتا ہے۔“

”آپ کس پروفیسر کی بات کررہے ہیں۔“ ایک ڈرائیور نے انجان بن کر کہا۔

وہ اس کا جملہ سن کر چونک اُٹھے۔

”اکرام ان دونوں کو حراست میں لے لو۔ پستول کے نشانے پر انہیں جیپ تک لے چلو اور انہیں کانسٹیبلوں کی نگرانی میں دے آﺅ۔“

”اوکے سر!“ اکرام نے پستول نکال لیا۔

”چلو۔“

”آخر ہم نے کیا کیا ہے؟“ ایک ڈرائیور نے حیران ہوکر کہا۔ یہ وہی سبز کار کا ڈرائیور تھا۔

”چلو ورنہ بُری طرح پیش آﺅں گا۔“

دونوں اس کے آگے آگے چلتے ہوئے عمارت کے دروازے سے باہر نکل گئے۔ جلد ہی اکرام واپس آگیا۔

”اب کیا کریں؟“ ڈی آئی جی نے پوچھا۔

”اندر کی تلاشی لینے کے سوا کیا کرسکتے ہیں؟“

”ہاں! اب اس کے سوا کوئی چارہ نہیں۔“

”تو پھر آئیے۔“

وہ پانچ چھ کانسٹیبلوں سمیت ایک بار پھر دروازے پر آئے۔ اس بار محمود،فاروق اور فرزانہ بھی ان کے ساتھ تھے۔ یہاں چوکیدار موجود تھا۔

”اندر جا کر کہو ہم ملنا چاہتے ہیں۔“

”اچھا ساب۔“ وہ بھی گھبرایا ہوا تھا کیوں کہ اس نے ابھی ابھی دونوں ڈرائیوروںکو پستول کے نشانے پر آگے آگے چلتے دیکھا تھا۔ فوراً اندر دوڑا گیا۔

واپس آکر بولا۔

”چلیے ساب جی۔“ وہ انہیں لیے ڈرائنگ روم میں لے آیا اور انہیں بیٹھنے کا اشارہ کرتے ہوئے بولا۔

”آپ لوگ بیٹھیں۔ ساب لوگ ابی آتا ہے۔“ یہ کہہ کر وہ کمرے سے نکل گیا۔

”اکرام تم دروازے پر ٹھہرو۔ ایسا نہ ہو کہ وہ کوئی چال چل جائیں۔“

”جی بہتر۔“ اکرام اٹھا اور پہرے داروں کی طرح ڈرائنگ روم کے دروازے پر جاکھڑا ہوا۔

”کہیں ہم پروفیسر کو کھو نہ دیں۔“ اچانک انسپکٹر جمشید نے کہا۔

”کیا مطلب؟“ ڈی آئی جی چونکے۔

”یہ لوگ بہت چالاک ہیں۔ ہمارا وقت ضائع کررہے ہیں۔ ہمیں اٹھ کر تلاشی شروع کردینی چاہیے۔ ایسا نہ ہو کہ ہم یہاں بیٹھے رہ جائیں اور وہ لوگ کوئی کام دکھا جائیں۔“

”تو پھر اٹھو۔ سوچتے کیا ہو؟ پروفیسر کی زندگی ملک کے لیے بہت قیمتی ہے۔“

وہ اٹھے ہی تھے کہ تینوں غیرملکی اندر داخل ہوئے۔ انسپکٹر جمشید چونک اٹھے۔ یہ تینوں وہ نہیں تھے جو ان کے گھر سے پروفیسر کو اغوا کرکے لائے تھے۔ ان کی حیرت کی کوئی انتہا نہ رہی۔

”کیا بات ہے جناب! آپ لوگ کیسے تشریف لائے۔“ ایک غیرملکی نے پوچھا۔

”ہمیں سفارت خانے کی تلاشی لینی ہے۔“

”کیا مطلب؟ تلاشی لینی ہے لیکن کیوں؟“

”ہمیں شک ہے کہ یہاں ایک شخص پروفیسر داﺅد نامی کو اغوا کرکے لایا گیا ہے۔“

”ناممکن۔ یہ سراسر الزام ہے۔ ہم آپ کی حکومت سے احتجاج کریں گے۔ ویسے بھی آپ وارنٹ کے بغیر تلاشی نہیں لے سکتے۔“

”یہ ٹھیک ہے مگر ہم تلاشی لیں گے۔“

”کیا مطلب؟“

”مطلب یہ۔“ انسپکٹر جمشید نے پستول نکال لیا۔

”یہ کیا۔ معلوم ہوتا ہے تم اپنی ملازمت سے ہاتھ دھونا چاہتے ہو۔ کون ہو تم؟“

”انسپکٹر جمشید!“

”تم کوئی بھی ہو۔ ہم تلاشی نہیں دیں گے۔“

”اکرام۔ اپنے آدمیوں کے ساتھ پوری عمارت چھان مارو۔“

”اوکے سر!“

”خبردار! تلاشی مت لینا۔“ ایک غیرملکی نے دھمکی دینے والے انداز میں کہا۔

”اپنے ہاتھ اوپر اٹھا دو۔ اگر تم نے ہلنے کی کوشش کی تو میں گولی مار دوں گا۔ اکرام تم اپنا کام کرو۔“

ان دونوں کے ہاتھ اوپر اٹھ گئے۔ اکرام اور اس کے ساتھی کمرے سے نکل گئے۔ اب ڈی آئی جی صاحب بھی پستول نکالے کھڑے تھے۔

اسی وقت بہزاد دوڑتا ہوا کمرے میں داخل ہوا اور بولا۔

”جناب! پولیس کا گھیرا تنگ….“ اس کے الفاظ منہ میں ہی رہ گئے کیوں کہ اس کی نظر انسپکٹر جمشید اور ڈی آئی جی کے ہاتھ میں پکڑے ہوئے پستولوں پر پڑ گئی تھی۔

”بہت خوب! یہ رہا جناب بہزاد ڈاکو۔ تم بھی ہاتھ اوپر اٹھا دو۔“

بہزاد کے ہاتھ بھی اوپر اُٹھ گئے۔

٭……..٭

غیرملکی بوڑھا

سب انسپکٹر اکرام اندر داخل ہوا۔

”پروفیسر داﺅد عمارت میں موجود نہیں ہیں۔“

”کیا کہتے ہو۔ یہ کیسے ہوسکتا ہے؟“ انسپکٹر جمشید نے غصے سے کہا۔

”میں نے پوری عمارت دیکھ ڈالی ہے۔“

”کیا عمارت میں کوئی اور بھی موجود ہ ہے؟“

”سوائے ایک بوڑھے شخص کے کوئی نہیں۔ وہ سو رہا ہے۔“

”بوڑھا؟ سو رہا ہے؟“ انسپکٹر جمشید نے حیران ہوکر کہا۔

”جی ہاں! میں نے اسے جگانے کی کوشش کی تھی لیکن وہ نہیں جاگا۔“

”چلو۔ میں چل کر دیکھتا ہوں۔“ انسپکٹر جمشید نے کہا۔

”آپ یہیں موجود رہیں اور کانسٹیبلوں کو بھی یہیں رکھیں۔“

”ٹھیک ہے۔ تم بے فکر ہو کر جاﺅ۔ میں انہیں سنبھال لوں گا۔“

”انسپکٹر جمشید اکرام کے ساتھ باہر نکلنے لگے تو محمود بول اٹھا۔

”ابا جان! ہم بھی ساتھ چلیں گے۔“

”آجاﺅ!“ انہوں نے فکرمند ہوکر کہا۔

وہ سب اس غیرملکی بوڑھے کے بستر کے قریب آئے۔ بوڑھا گہری نیند سورہا تھا۔

”یہ تو کوئی انگریز بوڑھا ہے۔“ انسپکٹر جمشید بولے۔

”لیکن سوال تو یہ ہے کہ یہ جاگتا کیوں نہیں؟ یہ کیسی نیند ہے کہ اسے جھنجھوڑنے پر بھی نہیں ٹوٹی۔“ اکرام نے کہا۔

”ہوں۔ اسے جگانا چاہیے۔“ یہ کہہ کر انسپکٹر جمشید نے اس کے جسم سے چادر اتار دی اور اس کو ہلانے لگے مگر بوڑھا ٹس سے مس نہیں ہوا۔

”حیرت ہے۔“ فاروق کے منہ سے نکلا۔

”کیا بات ہے؟ تمہیں کس بات پر حیرت ہورہی ہے؟“

”بوڑھے کو دیکھ کر ہورہی ہوگی۔“ فرزانہ بولی۔

”جی نہیں۔ میں تو بوڑھے کے ہاتھوں کو دیکھ کر حیران ہورہا ہوں یہ ہاتھ کسی انگریز کے نہیں ہوسکتے۔“

وہ چونک اُٹھے۔ ان کا دھیان ابھی تک بوڑھے کے ہاتھوں پر نہیں گیا تھا۔ اب انہوں نے غور سے دیکھا تو حیران رہ گئے۔ بوڑھے کے ہاتھ تو پروفیسر داﺅد کے تھے۔

”انکل کی انگوٹھی بھی دیکھ لیں۔“ فاروق نے کہا۔

”انہیں اسی طرح ڈرائنگ روم میں لے چلو۔“ انسپکٹر جمشید نے کہا۔

اکرام نے چار کانسٹیبلوں کو بلایا۔ انہوں نے چارپائی اٹھائی اور ڈرائنگ روم میں لے آئے۔ ڈرائنگ روم میں موجود سب لوگ چونک اٹھے۔

”یہ بوڑھا کون ہے؟“ انسپکٹر جمشید نے غیرملکیوں سے پوچھا۔

”یہ میرے والد ہیں۔“ ایک غیرملکی نے غصے سے کہا۔

”اسے کیا ہوا؟“

”یہ بیمار ہیں۔“ اس نے کہا۔

”لیکن یہ جاگتا کیوں نہیں؟“

”ایک گھنٹے پہلے ڈاکٹر نے انہیں نیند کا انجکشن دیا ہے۔“

”اوہ! تو یہ بات ہے لیکن اس کے ہاتھوں کو کیا ہوا۔ یہ اتنے سفید کیوں نہیں جتنا اس کا چہرہ؟“

غیرملکی سے کوائی جواب نہ بن پڑا۔ وہ خاموش رہا۔

”لیجیے جناب!“ انسپکٹر جمشید ڈی آئی جی صاحب سے بولے۔

”پروفیسر داﺅد حاضر ہیں۔“

”کیا مطلب؟“ ڈی آئی جی چونکے۔

”جی ہاں! یہ پروفیسر داﺅد ہیں۔“

”یہ کیسے ہوسکتا ہے؟ یہ تو بالکل کوئی انگریز معلوم ہوتا ہے۔“

”یہ میک اپ کا کمال ہے۔ دیکھیے میں ابھی انہیں پروفیسر داﺅد میں تبدیل کیے دیتا ہوں۔“

انہوں نے یہ کہہ کر بوڑھے کے چہرے پر سے کوئی چیز جھٹکے سے اتار دی۔ یہ ایک جھلی تھی۔ اس کے اترتے ہی پروفیسر داﺅد کا چہرہ نظر آنے لگا۔

”حیرت ہے۔ اتنا زبردست میک اپ۔“

”یہ اس فن میں ماہر ہیں۔ ہمارے دوست ملک نے جوکہ دراصل دشمن ہے، چن کر آدمی بھیجے ہیں، یہ وہی تینوں ہیں، جنہوں نے میرے مکان سے پروفیسر صاحب کو اغواکیا تھا۔ انہوں نے اپنی شکلیں بھی تبدیل کرلی ہیں۔“

”مگر ابا جان! بہزاد ڈاکو کے ساتھی یہاں نظر نہیں آرہے ہیں۔“

”وہ بھی مل جائیں گے۔ اکرام ان کو تلاش کرو۔ وہ شاید چھت پر ہوں گے۔ کیوں بہزاد تمہارے ساتھی چھت پر ہیں نا؟“ انسپکٹر جمشید نے پوچھا۔

بہزاد ڈاکو نے کوئی جواب نہ دیا۔ اکرام کمرے سے نکل گیا۔

”ایک بات سمجھ میں نہیں آئی۔“ ڈی آئی جی صاحب نے پوچھا۔

”جی۔ وہ کیا؟“

”یہ پروفیسر کو کیوں اغوا کرنا چاہتے تھے؟“

”اپنے ملک لے جانا چاہتے ہوں گے کیوں کہ ان کی ایجادات کی وجہ سے ہمارا ملک بہت مضبوط ہوچکا ہے۔ یہ چاہتے تھے کہ پروفیسر ان کے ملک میں جا کر ان کے لیے ایجادات کریں۔“

”ہوں! اب اس ملک سے ہمارے دوستانہ تعلقات نہیں رہیں گے۔“

”ابا جان! اب ہمیں جلدی چلنا چاہیے۔“ فرزانہ نے کہا۔

”کیوں بیٹا؟“

اسی وقت اکرام تینوں ڈاکوﺅں کو ہتھکڑیاں پہنائے اندر داخل ہوا۔

”لیجیے جناب یہ بھی مل گئے۔“

”بہت اچھے۔ اب ہمیں چلنے کی تیری کرنی چاہیے۔“ ڈی آئی جی بولے۔

”ہاں فرزانہ تم کیا کہہ رہی تھیں؟“

”یہی کہ شائستہ پریشان ہورہی ہوگی۔“

”ہاں ٹھیک ہے، بس چلتے ہیں۔“

”لیکن ابا جان! انکل ہوش میں کیسے آئیں گے؟“

”خود بہ خود ہوش میں آجائیں گے۔ انہیں بے ہوشی کا انجکشن لگایا گیا ہے۔“

”اور کمال تو یہ ہے کہ انہوں نے انکل کو کپڑے بھی دوسرے پہنا دیے۔“ محمود بولا۔

”اگر یہ ایسا نہ کرتے تو اکرام ہی پہچان لیتا کہ یہ پروفیسر ہیں۔“

”ابا جان!“ فرزانہ بولی۔

”کیا بات ہے بیٹی؟“

”اگر محمود کاروں کے نمبر نہ نوٹ کرتا تو اس وقت ہم سب کس قدر پریشان ہورہے ہوتے۔“

”ہاں واقعی! یہ محمود کا بہت بڑا کارنامہ ہے۔“ ڈی آئی جی نے محمود کے شانے پر تھپکی دیتے ہوئے کہا۔

”جی ہاں! جیسے ہم نے تو کچھ کیا ہی نہیں۔“ فرزانہ بُرا سا منہ بنا کر بولی۔

”اور نہ ہی میں نے کچھ کیا ہے۔“ فاروق مسمسی صورت بنا کر بولا۔

ان کی اس انداز پر ان سب کو ہنسی آگئی۔

٭……..٭

اس سلسلے کی مزید تحاریر

موت کا جزیرہ

• مئی 25, 2020

سازشی چہرہ

• مئی 25, 2020

خونی جال

• مئی 25, 2020

ڈریکولا کا بھوت

• مئی 25, 2020

پانچ قدم پہ موت

• مئی 25, 2020

خونی سائنسدان

• مئی 25, 2020

بھوت بنگلہ

• مئی 25, 2020

آخری امید

• مئی 25, 2020

الف لیلہٰ داستان ۲۰۱۸ ۔ قسط نمبر ۷

قصہ آئیلویُولُو کا

آٹھویں رات:

شہرزاد نے اپنی سحربیانی اور شیریں زبانی سے سات راتوں تک تو خدا خدا کر کے قتل سے جان بچائی۔ جب آٹھویں رات آئی تو شاہِ کیواں جاہ کو آداب بجا لائی اور یوں سلسلہ سخن کو شروع کیا کہ راویانِ طلیق اللسان نے بیان کیا ہے کہ حسن بدرالدین کو بدقسمتی اور خوبی طالع نے زار زار رلایا اور دیر تک پھوٹ پھوٹ کر رونا آیا۔ آخر کہا، لاحول ولا قوۃ الا باللہ العلی العظیم۔ وہ قادرِ مطلق ہے اور اس کے مرضی کے بغیر کسی کو کوئی قدرت حاصل نہیں۔ میں نے لاکھ جتن کیے کہ احوالِ مراد داستانِ جگر خراش لوگوں کو سناؤں، اپنی مصیبت کا کوئی حل پاؤں مگر کسی نے میری بات نہ سنی۔ سب بے سود ہے، انجام مراد و کشود کا بہر نوع مفقود ہے۔ اب اس کے سوا کوئی چارہ نہیں کہ یہیں زندگانی گزاروں اور جنابِ باری کا شکر بجا لاؤں کہ بے شک اس زمانہء دہشت خیز میں پہنچایا پر ملک الموت سے نہ ملوایا۔ اب صابر شاکر رہوں اور مردانہ وار زندگی کی مشکلوں کا مقابلہ کروں۔ ہمت مرداں مددِ خدا۔

خود سے یہ عہد کر کے حسن بدرالدین اس گھر میں رہنے لگا۔ وہ گھر جہاں محبت کرنے والی نانی تھی، ایک مسکین مرنجاں مرنج ماموں تھا، ایک بد مزاج و ترش کلام ممانی تھی۔ شعلہ رخسار و گلعذار زلیخا تھی اور بھولا بھالا منا تھا۔ ان سب پر سوا ممانی کا پچھلے شوہر سے بیٹا، غصہ ور اور ہتھ چھٹ بنا تھا۔ یہ انسان تو ویسے ہی تھے جیسے سب انسان ہوتے ہیں لیکن زندگی ویسی نہ تھی جیسی زمانہ ازل سے انسان گزارتا آیا ہے۔ قدم قدم پر جادو کے کرشمے تھے، نئی نئی چیزیں تھیں، ان کے نئے نئے نام تھے، عجب تعجب خیز کام تھے۔ اچانک بجلیاں جل اٹھتی تھیں، بیٹھے بیٹھے گل ہو جاتی تھیں اور گھر والے واپڈا نامی کسی شخص کو کوسنے لگتے تھے۔ دیوار پر لگے چوکھٹے میں ہر وقت کوئی نہ کوئی ہنگامہ بپا رہتا تھا۔ نانی جان فرمائش کرتیں۔ ’’ٹی۔ وی لگاؤ۔‘‘ اور چوکھٹا، آئینہ جہاں نما بن جاتا۔ کبھی پریاں رقص کرتیں تو کبھی پیرانِ فرتوت، عجب کرتوت، لڑتے جھگڑتے نظر آتے۔ ہر چھوٹا بڑا اپنی اپنی تختیاں اٹھائے پھرتا جسے وہ فون کہتے تھے۔ اس عجوبہ روزگار تختی پر بیٹھے بٹھائے کوئی دورہ پڑتا تھا اور گھنٹیاں بجنے لگتی تھیں۔ ادھر گھنٹی بجی، ادھر اسے کان سے لگایا اور مصروف گفتگو ہوئے۔ حسن کا فون بھی بجتا تھا مگر وہ ڈر کر اسے چھپا دیتا تھا، ہاتھ میں نہ لیتا تھا۔ یہ اور ایسی کئی اور چیزیں تھیں جن کی وجہ سے حسن حیران و بے قرار ہوتا تھا اور مثلِ زلف پریشان روزگار ہوتا تھا۔
پہلا جھٹکا اسے اس وقت لگا جب معلوم ہوا کہ جمعہ کو چھٹی نہیں ہوتی، اتوار کی چھٹی کا رواج ہے۔ حسن حیران ہوا اور کہا لاحول ولا قوۃ ! یہ مسلمانوں کا راج ہے؟ دوسرا جھٹکا تب لگا جب معلوم ہوا کہ اب ملک کا نام ہندوستان نہیں پاکستان ہے۔ حسن کو یہ نام پسند آیا، مگر یہ راز سمجھ میں نہ آیا۔ تیسرا اور سب سے بڑا جھٹکا اسے تب لگا جب چھٹی کے روز ممانی نے اسے حکم دیا کہ مارکیٹ سے انڈے ڈبل روٹی لے آئے۔ یہ کہہ کر ایک کاغذ کا نیلے رنگ کا ٹکڑا اس کے ہاتھ میں تھمایا، اسے پھاٹک کا رستہ دکھایا۔ حسن گھبرایا اور بولا ’’یہ کیا ماجرا ہے؟ یہ مارکیٹ کیا بلا ہے؟ اس کاغذ کے ٹکڑے کا میں کیا کروں؟ کچھ رقم دیجئے کہ جا کر انڈے لاؤں۔‘‘
یہ سن کر ممانی ناراض ہوئی اور بولی۔ ’’میرا تیرا کوئی مذاق نہیں۔ سیدھی طرح جاتا ہے یا اتاروں جوتی؟‘‘
ناچار حسن بدرالدین وہاں سے بہ دل اندوہ گیں خستہ و حزیں نکل کھڑا ہوا اور سراسیمہ و پریشان سڑک پر چلنے لگا۔
اچانک پیچھے سے آواز آئی۔ ’’حسن بھائی حسن بھائی رکیں۔‘‘ مڑا تو دیکھا منا بھاگتا ہوا آرہا ہے۔ وہ حسن کے قریب آیا اور پھولی سانس کے ساتھ بولا۔ ’’میں نے بھی مارکیٹ جانا ہے۔ آج میچ ہے میرا، بال نہیں ہے۔‘‘ یہ کہہ کر حسن کے ساتھ ساتھ چلنے لگا۔

سوئِ بار
(افسانہ)
میمونہ صدف

ٹھنڈی وڈاں گاو ¿ں کے رشک خان کی پوتی گاو ¿ں کی اونچی نیچی پگڈنڈیوں پہ اچھلتی کودتی زمین کی دراڑوں کو دیکھتی جاتی ہے ۔ گہری اور بڑی دراڑیں جنھوں نے زمین کو اندر تک چیر ڈالا تھا۔ اماں بتاتی تھی کہ یہ دراڑیں برسوں پہلے تب پڑی تھیں جب اس علاقے میں شدید بھونچال آیا تھا ، آبادی کی آبادی تلپٹ ہوگئی تھی ۔
”اماں بھونچال کیسے آتا ہے؟“ اس کی آٹھ جماعتیں پڑھی ماں بتاتی کہ جب زیرِ زمین پلٹیں سرکتی ہیں تو بھونچال آتا ہے ، زمین ہچکولے کھانے لگتی ہے اور دادا ایسے میں ٹھنڈی آہیں بھرتے کہا کرتے تھے کہ جب زمین پہ بوجھ بڑھ جاتا ہے، تو زمین اس بوجھ کو اتار پھینکنے کو انگڑائیاں لیتی ہے ۔ اس کا ننھا ذہن سوچتا کہ زمین پر آخر کس شے کا بوجھ ہے ؟ انسانوں اور ڈھورڈنگروں کایا شہرکی بڑی بڑی عمارتوں کا ؟
دادا کہتے تھے ۔ ” جب حضرت انسان حد سے تجاوز کرنے لگتا ہے تو پہاڑ دھرتی بنانے والے کے حضور گزارش کرتے ہیں کہ ایک حکم دیں اور وہ سرک جائیں ، ہوا بھی سوال بن کر کھڑی ہو جاتی ہے کہ آیا وہ سب اڑا لے جائے ، پانی چاہتا ہے کہ وہ سب بہا لے جائے لیکن قدرت خاموش رہتی ہے ۔بنانے والا حکم نہیں دیتا ، مہلت دیتا ہے۔۔ تبھی آدم شیر ہوتا ہے ۔تباہ ہو کر بھی اصلاح نہیں کرتا ، پچھتاتا نہیں ہے۔ سوال کرتا ہے ، اکڑتا ہے اور پھر سے وہی دہراتا ہے ۔“
رشک خان کی پوتی ناسمجھی سے بس اثبات میں سر ہلا دیتی ۔ اس کی سمجھ میں نہیں آتا کہ دادا کیسی باتیں کرتے ہیں اور رشک خان ماضی میں کھو جاتا جہاں برسوں پہلے زمین کو سرکنے کا حکم جاری ہو ا تھا ۔
٭….٭….٭
ٹھنڈی وڈاں گاو ¿ں میں ایک ہی بات زبانِ زد عام تھی کہ زمان خان کے اِکو اِک پتر کا ضمیر بگڑ گیا ۔ شہر بھیجا تھا پڑھنے کو ، عقل مت سیکھنے کو، افسر بن کر لوٹنے کو ۔ مگر کچھ نہ بنا بس ناخلف بن گیا ، ناشدنی، نافرجام۔ اب اسے انہی القابات سے نوازا جاتا ۔ کبھی و ہ جو باپ کی نیک نامی کا باعث بنا، اب بدنامی کا باعث بن رہا تھا۔ پہلے گاو ¿ں والے اسے سر آنکھوں پر بٹھاتے، اب سب اسے آنکھیں دکھاتے ۔ وہ جو قابل ِ مثال رہا تھا۔
”دیکھ شیر گل جیسا بن۔ کتنا لائق نکلا ۔ پورے گاو ¿ں کیا آس پاس کے گاو ¿ں میں بھی کوئی اس جیسا نہیں ۔“ اب بھی قابلِ مثال ہی تھا ۔
”خبردار جو شیر گل سا وتیرہ اپنایا۔ ناعاقبت اندیش۔ ہماری سات پیڑھیوں میں اس سا کوئی نہیں نکلا۔“
تو وہ جو شیر گل تھا اس کے باپ دادا اور تایا کا اس گاو ¿ں میں دیگر لوگوں کی طرح ایک ہی کاروبار تھا ۔ مہاجن ، جو مجبوروں کو قرض دیا کرتے اور سود سمیت وصول کیا کرتے ۔ آس پاس کی دکانوں پر بھی یہ نہیں تو کم و بیش اسی قسم کاکاروبار عام تھا ۔ کوئی سرحد پار سے غیر قانونی اسلحہ منگوا کر دکانوں کی زینت بنا رہا ہے ، تو کوئی پوست کی کاشت سے کما رہا ہے ۔ سب حلال اور باعثِ برکت مانا جاتا ۔کالا دھن سفید سمجھ کر وصولا اور بیچا جاتا۔ اسی مال سے صدقہ کیا جاتا ، خیرات کی جاتی، زکوة دی جاتی۔ وہاں کوئی قاعدہ قانون نہ تھاکہ ان کے اپنے قاعدے اپنے قانو ن تھے اور صدیوںسے ایسا ہی چلا آرہا تھا ۔
شیر گل جب شہر سے آتا نجانے کس کس کو ایسے کاروبار سے جڑا پاتا ، اندر کہیں سے برا مناتا لیکن ظاہر نہ کرتا ۔ ایمان کا کمزور ترین درجہ ہی سہی پر کوئی درجہ تو تھا ۔جب رہا نہ گیا تو ایک روز بول پڑا ۔
”کاکا یہ کام چھوڑ دو ۔ یہ سارا سود ہے ۔ خدا اور اس کے رسولﷺ کے خلاف اعلان جنگ، یہ آمدن حرام ہے۔ “ زمان خان سکتے میں آگیا ۔ یہ کون سی زبان تھی جو وہ بول رہا تھا ۔ کون سا فتویٰ وہ جاری کر رہا تھا۔
”کون کہتا ہے کہ آمدن حرام ہے ؟“
”وہ قرض جو نفع لے کر آئے حلا ل کیسے ہو سکتا ہے؟“ زمان خان کا جوان بیٹے پر ہاتھ اٹھ گیا تھا۔
”اسی کمائی سے تیرے دادا نے ہمیں پالا اور اسی کمائی سے ہم اپنی نسل کو پال رہے ہیں ۔ اب یہ حرام ہوگئی۔ پاپ چڑھ گیا۔“ وہ انیس سالہ شیر گل کو مارتا رہا اور وہ مار کھاتا رہا ۔ جب وہ مار مار کر ہانپنے لگا تو اس نے شیر گل کے منہ پر تھوک دیا۔
”باپ دادا کو حرام خور کہتا ہے۔ شہر اس لیے بھیجا تجھے؟“ شیر گل نے اپنا منہ آستین سے پونچھ ڈالا پھر بھی مو ¿دب کھڑا رہا ۔
”شہر حق اور سچ کی تلاش میں بھیجا تھا نا۔ اب جب حق اور سچ کی بات کرتا ہوں، تو سب سے بڑا جھوٹا بھی میں ہوں اور باطل بھی میں۔“
”سائنس پڑھنے کو بھیجا تھا، تو ہمیں مذہب پڑھا رہا ہے۔“
”سائنس پڑھنا اور مذہب پڑھنا ایک برابر ہے ۔ سچ ہے ۔“
”کہاں سے آیا تیرا یہ سچ؟“ زمان خان دہاڑا تھا۔ پہلے کبھی دہاڑا نہیں تھا مگر اب اس سے کم پر بات نہ بن رہی تھی ۔
”آسمانوں سے اترا ہے ۔“ وہ نظریں جھکائے کھڑا رہا ۔مو ¿دب بنا رہا۔
”نافرمان ہے تو، خمیدہ آگیا تجھ میں ، میری تربیت میں۔ کیا تجھے دکھتا نہیں کہ سب اسی کاروبار سے کما رہے ہیں ، کتنی برکت ہے اس میں ؟“
”حرام میں کبھی برکت نہیں ہوتی۔ تبھی یہاں کی عوام کبھی خوشحال نہیں ہوتی ۔“
”سب غلط ہیں کیا؟“ اس نے کف اڑایا۔
”جو یہ کرتے ہیں وہ غلط ہیں۔“
”ایک تو سچا ہے؟“ نخوت سے دیکھا گیا۔
”جو یہ نہیں کرتے سب سچے ہیں۔“ ادب سے جواب آیا۔
”مردود ہو گیا ہے تو۔“ زمان خان اکلوتے بیٹے کا ماتم منانے کو سر پیٹنے لگا تھا۔
بات پھیلتے پھیلتے ٹھنڈی وڈاں تو کیا آس پاس کے چھوٹے دیہات تک جا پہنچی تھی۔ سو اب پنجایت بٹھائی گئی۔
”تو ہمارے کاروبار کو حرام کہنے والا کون ہوتا ہے؟“ سب گاو ¿ں والے بیٹھے تھے ۔ وہاں ایک ہی عاصی کھڑا تھا ۔ انیس سالہ جوان شیر گل۔
”میری کیا مجال۔ یہ تو خدا اور اس کا رسول ﷺ کہتے ہیں ۔“
”تجھے کیا خدا نے خود کہا یا فرشتے بھجوائے؟“ بڑا زمیندار ٹھنکا تھا ۔
” کلام بھیجا گیا ہے وہاں لکھا ہے سب۔ وہاں درج ہے سب ۔“ وہ سر جھکائے ، ہاتھ باندھے کھڑا تھا ۔
سب کی تیوریاں چڑھیں۔

قتل کیس پر مبنی ایک سبق آموز سچ بیانی
فیصلہ
محمد ظہیر شیخ
راج نگرکے تھانیدار کی بدقسمتی کہ ہر دوسرے تیسرے دن کوئی نہ کوئی ایسی خبر ملتی کہ مجبوراً پولیس کو پہنچنا پڑتا تھا۔ چھوٹے موٹے واقعات اپنی جگہ تھے کہ اطلاع ملی کہ راجہ شہباز کے بیٹے کو قتل کر دیا گیا ہے۔ گاﺅں کی بات تھی جنگل کی آگ کے مانند پورے علاقے میں فوری طور پر پھیل گئی۔
٭….٭….٭
راج نگر یوں تو گاﺅں ہی تھا، مگر اس کی آبادی اور رقبہ کسی چھوٹے شہر سے کم نہ تھا۔ آزاد کشمیر قانون ساز اسمبلی میں ایک حلقے کی سیٹ حاصل کرنے کے لیے تمام متعلقہ امیدواروں کی توجہ کا مرکز راج نگر ہوتا تھا۔ یوں تو راج نگر کی آبادی کا بڑا حصہ راجپوت خاندان پر مشتمل تھا، مگر اس کے باوجود کم ازکم چھے سات مختلف برادریوں کے لوگ بھی اسی گاﺅں کے باسی تھے۔ ساری برادریوں کے ہوتے ہوئے بھی راجپوتوں کو اکثریت حاصل تھی۔ اس لیے کسی قسم کے سماجی یا سیاسی فیصلے کرنے میں ان کے پاس جملہ حقوق محفوظ تھے اور کسی برادری کے کسی فرد کی مجال نہ تھی کہ ان کے فیصلوں پر احتجاج یا نافرمانی کرے۔ باقی لوگ تو اللہ اللہ کرکے اور مصلحت کے تحت جی حضوری کرکے وقت گزار رہے تھے مگر جب سامنے اپنا ہی خون آجاتا تو بات بڑی دور تک چلی جاتی۔ اپنوں سے محبت تو ہوتی ہے، مگر جب وہی ادشمنی پر اتر آتے ہیں تو قیامت کا سماں ہوتا ہے۔
راجہ عامر بچپن ہی سے بہت نازک طبیعت واقع ہوا تھا۔ اسکول کے لڑکے اکثر اسے لیڈی، لیڈی کہہ کر چھیڑتے تھے۔ اسے خود بھی کبھی کبھی احساس ہوتا تھا کہ وہ جس گاﺅں اور فیملی سے تعلق رکھتا ہے وہاں تو حاکم رہا جاتا ہے ، مگر وہ الگ طبیعت رکھتا تھا ۔ گاﺅں میں کوئی بھی شادی بیاہ یا کسی بھی قسم کی تقریب میں شامل ہونا اسے باعثِ شرم محسوس ہوتا تھا۔ لڑائی جھگڑا کرنا تو درکنار وہ کسی ایسی جگہ جانا بھی ناپسند کرتا تھا جہاں اس قسم کی کسی بات کا اندیشہ ہو۔ اسکول سے کالج پہنچا تو مسیں بھیگی اور نوجوانی سے جوانی کا سفر طے ہوا، مگر طبیعت کی وہ شادابی برقرار رہی۔ گھر والے تو ایک طرف گاﺅں والے بھی حیرت زدہ تھے کہ یہ کیسا راجپوت ہے جو ہر ایک سے مسکرا کر ملتا ہے اور گریبان بھی کھلا نہیں رکھتا۔ باقی برادریوں کے تمام افراد اس کی دل سے عزت کرتے تھے مگر اپنی برادری میں وہ کم حیثیت شمار ہوتا تھا ۔ وہ ایسا پھول تھا جو صرف دکھائی دینے کے لیے تھا، مگر پھول کانٹوں کے بغیر ہو یہ کیسے ممکن ہے۔ اسی لیے اس کے ساتھ بھی ایک زہریلا کانٹا تھا، اس کا بڑا بھائی ناصر……..
عامر شبنم تھا تو ناصر شعلہ، دونوں بھائیوں کی آپس میں گاڑھی چھنتی تھی۔ ہر کام مل جل کر کرتے، ہر راز ایک کا دوسرے کو پتا ہوتا تھا۔ کھانا پینا اور کھیلنا حتیٰ کہ سونے کا کمرا بھی کا مشترکہ تھا، مگر جب بات آتی لڑائی جھگڑے کی تو عامر بھیگی بلی اور ناصر بھیڑیا بن جاتا تھا۔ ناصر بلا کا لڑاکا تھا۔ گھر والوں کی روک ٹوک نہ ہونے کے باعث وہ ہر پھڈے میں پیش پیش ہوتا تھا۔ اس کے والد راجہ دلاور ایک سرکاری کالج کے پرنسپل تھے، گھر میں دولت کی ریل پیل تھی۔ عیاش پرست گھرانہ تھا۔ مکان کی تعمیر کے علاوہ جو کچھ کمایا جاتا عیش و عشرت میں اڑا دیا جاتا۔ گزر بسر اچھے سے ہو رہی تھی اور کیا چاہیے تھا۔ مستقبل کی فکر اس لیے بھی نہیں تھی کہ چار پانچ سال بعد ریٹائرمنٹ کی رقم سے کاروبار کرنے کا ارادہ تھا۔ اسی لیے کسی بھی پھڈے کی صورت میں فوری طور پر ناصر کو مکھن کے بال کی مانند بچا لیا جاتا۔ زیادہ باز پرس نہ کی جاتی کیونکہ یہی ایک ہتھیار تھا جس کی بدولت وہ برادری ہر سو حاوی تھی۔ ناصر، عامر کو اکثر طنز کا نشانہ بناتا مگر عامر ٹس سے مس نہ ہوتا۔ وہ اکثر کہتا ”دیکھ عامرے! یہ جو طاقت ہے نا یہ مرد کی شان ہوتی ہے ۔ اگر انسان اس سے محروم ہو جائے یا جان بوجھ کر اسے زنگ لگا دے تو پھر مرد اور خواجہ سرا میں کوئی فرق نہیں رہ جاتا۔“
”ہوں! تو اس کو تم مردانگی کہتے ہو۔“ وہ مسکراتے ہوئے سادہ سے انداز میں کہتا۔
”اگر مظلوموں کو دبانے کو، ان کا حق چھین لینے کو اور اپنے سے کمزور لوگوں کو پیٹنے کو تم مردانگی سمجھتے ہو تو میں ایسی مردانگی پر سو بار لعنت بھیجتا ہوں۔“
”ایک دن آئے گا جب میری بات تمہاری سمجھ میں آجائے گی ۔ جب تمہیں احساس ہوگا کہ ہر چیز تمنا اور محبت سے نہیں ملتی، کچھ حقوق ایسے ہوتے ہیں جو چھیننے پڑتے ہیں ۔ پھر تم میرے پاس آﺅ گے اپنا ہیجڑا پن لے کر……
”دیکھنا ایک دن تمہیں میری باتیں یاد آئیں گی عامرے۔“وہ میٹھی ڈانٹ پلاتے ہوئے عامر سے کہتا اور پھر ایک دن عامر کو اس کی بات سمجھ آگئی۔ وہ پریشان تھا کہ اپنی مشکل کیسے ناصر سے بیان کرے۔ اسے بیان کرنے کی ضرورت ہی نہ پڑی کیونکہ ناصر نے اس کی حالت سے خود ہی اندازہ لگا لیا کہ کوئی گڑ بڑ ہے۔ عامر اپنی کتب لیے بیٹھا تھا کہ ناصر اس کے پاس پہنچ گیا۔ اس نے سر اٹھا کر دیکھا تو ناصر زیر لب مسکرا رہا تھا ۔ اسے معلوم تھا کہ اب اس کی خیر نہیں سب کچھ ناصر کے گوش گزار کرنے کے سوا کوئی چارہ نہیں تھا ۔
٭….٭….٭