محمدۖہمارے
بنتِ محمد رفیق (کراچی)
محبت کی معراج پالینے والے
نمازوں کا تحفہ ہیں وہ لانے والے
سراپا صداقت سراپا امانت
امین اور صادق وہ کہلانے والے
نبوت کے خاتم رسالت کے خاتم
وہ ختم الرسل کا لقب پانے والے
نبیوں کی آکر امامت کرائی
وہ آخر میں تشریف لے آنے والے
شریعت ہمارے لیے لے کے آئے
وہ غاروں میں تشریف لے جانے والے
٭…٭…٭
نعت رسولِ مقبولۖ
سید عطاالمصطفیٰ
اے کاش کبھی ہو جو رسائی ترے در کی
کرتا رہوں دن رات گدائی ترے در کی
آنکھوں کے لیے سرمہ ِ نایاب تھا درکار
سو خاک مدینے سے منگائی ترے در کی
ہے جن و بشراور ملائک کا وظیفہ
کرتے ہیں بیاں سب ہی بڑائی ترے در کی
احوالِ مدینہ سنا زائر سے تو ہم نے
تصویر خیالوں میں بنائی ترے در کی
اک درجہ سکوں ہوگی ترے در کی زیارت
اک بارِ گراں ہوگی جدائی ترے در کی
مجھ کو نہ ہی مخمل نہ ہی کمخواب کی حاجت
سرکار عطا ہو جو چٹائی ترے در کی
٭…٭…٭
برسات
اسماعیل میرٹھی
وہ دیکھو اُٹھی کالی کالی گھٹا
ہے چاروں طرف چھانے والی گھٹا
گھٹا کے جو آنے کی آہٹ ہُوئی
ہوا میں بھی اِک سنسناہٹ ہُوئی
گھٹا آن مِینہہ جو برسا گئی
تو بے جان مِٹّی میں جان آگئی
زمِیں سبزے سے لہلہانے لگی
کِسانوں کی محنت ٹِھکانے لگی
جڑی بُوٹِیاں، پیڑ آئے نِکل
عجب بیل پتّے، عجب پُھول پھل
ہر اک پیڑ کا اِک نیا ڈھنگ ہے
ہر اِک پُھول کا اِک نیا رنگ ہے
یہ دو دِن میں کیا ماجرا ہوگیا
کہ جنگل کا جنگل ہرا ہوگیا
جہاں کل تھا میدان چٹیَل پڑا
وہاں آج ہے گھاس کا بَن گھڑا
ہزاروں پُھدکنے لگے جانور
نِکل آئے گویا کہ مِٹّی کے پَر
٭…٭…٭
نویں انعام یافتہ نظم
دادی جان نے دال پکائی
سارہ قیوم
دادی جان نے دال پکائی
امی، ابو، آپا، بھائی
ناک بھوں سب نے چڑھائی
دادی جان نے دال پکائی
کاش بنائی ہوتی چُوری
کُنا، بھاجی، حلوہ، پوری
گھر میں ہوتا کوئی حلوائی
دادی جان نے دال پکائی
نہ کوئی زردہ نہ کوئی کھیر
نہ فالودہ اور پنیر
نہ کوئی پائے، نہ کوئی پائی
دادی جان نے دال پکائی
مزے کی ہوگئی ایسی دال
ٹپکی سب کی اس پر رال
اتنے میں موٹی ہمسائی
بھاگی دوڑی اندر آئی
ساری دال ہماری کھائی
میرے اللہ تیری دہائی