محمدۖہمارے
بنتِ محمد رفیق (کراچی)
محبت کی معراج پالینے والے
نمازوں کا تحفہ ہیں وہ لانے والے
سراپا صداقت سراپا امانت
امین اور صادق وہ کہلانے والے
نبوت کے خاتم رسالت کے خاتم
وہ ختم الرسل کا لقب پانے والے
نبیوں کی آکر امامت کرائی
وہ آخر میں تشریف لے آنے والے
شریعت ہمارے لیے لے کے آئے
وہ غاروں میں تشریف لے جانے والے
٭…٭…٭
نعت رسولِ مقبولۖ
سید عطاالمصطفیٰ
اے کاش کبھی ہو جو رسائی ترے در کی
کرتا رہوں دن رات گدائی ترے در کی
آنکھوں کے لیے سرمہ ِ نایاب تھا درکار
سو خاک مدینے سے منگائی ترے در کی
ہے جن و بشراور ملائک کا وظیفہ
کرتے ہیں بیاں سب ہی بڑائی ترے در کی
احوالِ مدینہ سنا زائر سے تو ہم نے
تصویر خیالوں میں بنائی ترے در کی
اک درجہ سکوں ہوگی ترے در کی زیارت
اک بارِ گراں ہوگی جدائی ترے در کی
مجھ کو نہ ہی مخمل نہ ہی کمخواب کی حاجت
سرکار عطا ہو جو چٹائی ترے در کی
٭…٭…٭
آؤ کھانا کھائیں
نظیر فاطمہ
آؤ بچو! کھانا کھائیں
مل کر دسترخوان بچھائیں
اپنے ہاتھوں کو دھولیں
شروع میں بسم اللہ پڑھ لیں
پلیٹ میں تھوڑا سالن لیں
اور نوالے چھوٹے لیں
دائیں ہاتھ سے کھائیں کھانا
ہر لقمے کو خوب چبانا
چپکے چپکے کھائیں سب
برتن کو چمکائیں سب
کھا کر، رب کا شکر کریں
کلی کریں اور ہاتھ دھوئیں
٭…٭…٭
رات کو دیکھوں!
صوبیہ اطہر
رات کو دیکھوں، جی للچائے
کوئی تارا ہاتھ میں آئے
امی بولیں بیٹے پیارے
تم بھی تو ہو میرے تارے
پُھولے گال، چمکتی آنکھیں
خُوش بو، خُوش بو، مہکی سانسیں
ننھے منّے پیارے پیارے
ربّ نے بنائے کتنے سارے
ٹِم ٹِم کرتے پیارے تارے
دیکھو ربّ کی قدرت سارے
٭…٭…٭
ہمیں اُن سے عقیدت ہے
نوشین فاطمہ عبدالحق
ہے خوش قسمت وہ وادی جس کا مکہ نام ہے بچو!
وہاں کا ذرّہ ذرہ قابلِ اکرام ہے بچو!
اسی وادی میں پیدائش ہوئی حضرت محمدۖ کی
انہی کی تو بدولت مذہب اسلام ہے بچو!
خدائے برتر و بالا کا ہے انعام یہ ہم پر
حضورِ پاک کی امّت میں ہیں ہم، ہوں سلام اُن پر
سب ان کی عظمتوں کے معترف، انسان، جن، پتھر
جو لائے ہم تلک وہ رب کا ہی پیغام ہے بچو!
ہمیں اُن سے محبت ہے ہمیں اُن سے عقیدت ہے
انہی کے نام سے گل ہیں، گلوں میں رنگ و نگہت ہے
انہی کی سنتوں پر چلنے کا انعام جنت ہے
ہر اک سنت کو زندہ رکھنا اپنا کام ہے بچو!
مشکل الفاظ:
قابلِ اکرام عزت کے قابل
برتروبالا عظمت والا
معترف تعریف کرنے والا
نگہت خوش بو
برسات
اسماعیل میرٹھی
وہ دیکھو اُٹھی کالی کالی گھٹا
ہے چاروں طرف چھانے والی گھٹا
گھٹا کے جو آنے کی آہٹ ہُوئی
ہوا میں بھی اِک سنسناہٹ ہُوئی
گھٹا آن مِینہہ جو برسا گئی
تو بے جان مِٹّی میں جان آگئی
زمِیں سبزے سے لہلہانے لگی
کِسانوں کی محنت ٹِھکانے لگی
جڑی بُوٹِیاں، پیڑ آئے نِکل
عجب بیل پتّے، عجب پُھول پھل
ہر اک پیڑ کا اِک نیا ڈھنگ ہے
ہر اِک پُھول کا اِک نیا رنگ ہے
یہ دو دِن میں کیا ماجرا ہوگیا
کہ جنگل کا جنگل ہرا ہوگیا
جہاں کل تھا میدان چٹیَل پڑا
وہاں آج ہے گھاس کا بَن گھڑا
ہزاروں پُھدکنے لگے جانور
نِکل آئے گویا کہ مِٹّی کے پَر
٭…٭…٭